DIRETTIVA TAL-KUMMISSJONI (UE) .../…
of 15.9.2017
li tissupplimenta lid-Direttiva 2001/83/KEE tal-Parlament Ewropew u tal-Kunsill b’rabta mal-prinċipji u l-linji gwida dwar il-prassi tajba tal-manifattura tal-prodotti mediċinali għall-użu mill-bniedem
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2001/83/KEE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem, u b’mod partikolari l-ewwel paragrafu tal-Artikolu 47 tagħha,
Billi:
(1)Id-Direttiva tal-Kummissjoni 2003/94 KE tapplika kemm għall-prodotti mediċinali għall-użu mill-bniedem u anki għall-prodotti mediċinali fil-fażi ta’ investigazzjoni għall-użu mill-bniedem.
(2)B’konformità mal-Artikolu 63(1) tar-Regolament (UE) Nru 536/2014 tal-Parlament Ewropew u tal-Kunsill, il-Kummissjoni għandha s-setgħa li tadotta att delegat li jistabbilixxi l-prinċipji dwar il-prassi tajba tal-manifattura għall-prodotti mediċinali fil-fażi ta’ investigazzjoni għall-użu mill-bniedem. Għaldaqstant hu meħtieġ li jiġu adottati d-dispożizzjonijiet tad-Direttiva 2003/94/KE billi jitħassru r-referenzi għal prodotti mediċinali fil-fażi ta’ investigazzjoni għall-użu mill-bniedem.
(3)Għandhom jiġu aġġornati d-definizzjoni ta’ sistema tal-kwalità tal-farmaċewtika u xi terminoloġija oħra ħalli jkunu jirriflettu l-iżviluppi internazzjonali jew l-użu proprju ta’ din it-terminoloġija tal-ispetturi u l-manifatturi.
(4)Kull prodott mediċinali għall-użu mill-bniedem li jiġi manifatturat jew importat fl-Unjoni, inkluż il-prodotti mediċinali maħsuba għall-esportazzjoni, għandu jiġi manifatturat skont il-prinċipji u l-linji gwida dwar il-prassi tajba tal-manifattura. Madankollu, biex il-manifatturi jkunu jistgħu jikkonformaw ma’ dawk il-prinċipji u l-linji gwida, hemm bżonn il-koperazzjoni bejn il-manifattur u d-detentur tal-awtorizzazzjoni tal-kummerċjalizzazzjoni, meta dawn ikunu etitajiet legali differenti. L-obbligi tal-manifattur u tad-detentur tal-awtorizzazzjoni tal-kummerċjalizzazzjoni lejn xulxin għandhom jiġu ddefiniti fi ftehim tekniku bejniethom.
(5)Il-manifattur tal-prodotti mediċinali jrid jiżgura li dawn ikunu adattati għall-użu maħsub tagħhom, ikunu konformi mar-rekwiżiti tal-awtorizzazzjoni tal-kummerċjalizzazzjoni, u ma jkunux jixħtu lill-pazjenti f’riskju minħabba kwalità inadegwata. Sabiex dan l-għan tal-kwalità jintlaħaq b’mod affidabbli, il-manifattur irid jimplimenta sistema tal-kwalità tal-farmaċewtika li tkun imfassla b’mod komprensiv u implimentata sew u li tkun tinkorpora prassi tajba tal-manifattura u ġestjoni tar-riskji tal-kwalità.
(6)Sabiex tkun żgurata konformità mal-prinċipji u l-linji gwida dwar il-prassi tajba tal-manifattura, hemm bżonn jiġu stabbiliti dispożizzjonijiet dettaljati fuq l-ispezzjonijiet li jagħmlu l-awtoritajiet kompetenti u dwar ċerti obbligi tal-manifattur.
(7)Jeħtieġ ikun żgurat li kull prodott mediċinali disponibbli fit-territorju tal-UE jkun jikkonforma mal-istess standards tal-kwalità, u għalhekk il-prodotti mediċinali importati fl-Unjoni għandhom jiġu manifatturati skont l-istandards li għall-inqas huma ekwivalenti għall-istandards dwar il-prassi tajba tal-manifattura stabbiliti fl-Unjoni.
(8)Sabiex jiżguraw applikazzjoni konsistenti tal-prinċipji dwar il-prassi tajba tal-manifattura, il-manifatturi tal-prodotti mediċinali għall-użu mill-bniedem u l-ispetturi għandhom jikkunsidraw il-linji gwida msemmija fit-tieni paragrafu tal-Artikolu 47 tad-Direttiva 2001/83/KEE. Iżda għall-prodotti mediċinali ta’ terapija avvanzata għandhom jiġu applikati l-linji gwida msemmija fl-Artikolu 5 tar-Regolament (UE) Nru 1394/2007. Għandhom jiġu stabbiliti prinċipji u linji gwida dwar il-prassi tajba tal-manifattura tal-prodotti mediċinali għall-użu mill-bniedem, b’rabta mal-ġestjoni tal-kwalità, il-persunal, il-bini u l-apparat, id-dokumentazzjoni, il-produzzjoni, il-kontroll tal-kwalità, l-operazzjonijiet subkontrattati, l-ilmenti, l-irtirar tal-prodotti, u l-awtospezzjonijiet. B’rabta mal-prodotti mediċinali ta’ terapija avvanzata, dawk il-prinċipji u l-linji gwida għandhom jiġu adattati għall-karatteristiki speċifiċi ta’ dawk il-prodotti b’konformità mal-approċċ ibbażat fuq ir-riskju.
(9)Għal raġunijiet ta’ ċarezza, ħafna mid-dispożizzjonijiet tad-Direttiva 2003/94/KE jeħtieġ jiġu aġġustati, u għalhekk dik id-Direttiva għandha titħassar.
(10)Il-miżuri previsti f’din id-Direttiva huma konformi mal-opinjoni tal-Kumitat Permanenti għal Prodotti Mediċinali għall-Użu mill-Bniedem,
ADOTTAT DIN ID-DIRETTIVA:
Artikolu 1
Suġġett
Din id-Direttiva tistabbilixxi l-prinċipji u l-linji gwida dwar il-prassi tajba tal-manifattura b’rabta mal-prodotti mediċinali għall-użu mill-bniedem li l-manifattura u l-importazzjoni tagħhom ikunu jeħtieġu l-awtorizzazzjoni msemmija fl-Artikolu 40 tad-Direttiva 2001/83/KEE.
Artikolu 2
Definizzjonijiet
Għall-finijiet ta’ din id-Direttiva għandhom japplikaw dawn id-definizzjonijiet:
(1)“manifattur” tfisser kull persuna involuta f’attivitajiet li jeħtieġu l-awtorizzazzjoni msemmija fl-Artikolu 40(1) u (3) tad-Direttiva 2001/83/KEE;
(2)“sistema tal-kwalità tal-farmaċewtika” tfisser l-għadd totali tal-arranġamenti organizzati li jsiru bil-għan li jiżguraw li l-prodotti mediċinali għandhom il-kwalità meħtieġa għall-użu maħsub għalihom;
(3)“prassi tajba tal-manifattura” tfisser il-parti tal-assigurazzjoni tal-kwalità li tiżgura li l-prodotti mediċinali jiġu manifatturati, importati u kkontrollati skont l-istandards tal-kwalità xierqa għall-użu maħsub għalihom.
Artikolu 3
Spezzjonijiet
1.Bl-ispezzjonijiet ripetuti msemmija fl-Artikolu 111(1a) tad-Direttiva 2001/83/KEE, l-Istati Membri għandhom jiżguraw li l-manifatturi awtorizzati b’konformità mal-Artikolu 40(1) u (3) tad-Direttiva 2011/83/KE, ikunu jirrispettaw il-prinċipji u l-linji gwida dwar il-prassi tajba tal-manifattura stabbiliti b’din id-Direttiva.
L-Istati Membri għandhom iqisu wkoll il-kompilazzjoni, ippubblikata mill-Kummissjoni, tal-proċeduri tal-Unjoni dwar l-ispezzjonijiet u l-iskambju tal-informazzjoni.
2.Għall-interpretazzjoni ta’ dawn il-prinċipji u l-linji gwida dwar il-prassi tajba tal-manifattura, il-manifatturi u l-awtoritajiet kompetenti għandhom iqisu l-linji gwida dettaljati msemmija fit-tieni paragrafu tal-Artikolu 47 tad-Direttiva 2001/83/KEE. Għall-prodotti mediċinali ta’ terapija avvanzata għandhom jitqiesu l-linji gwida dwar il-prassi tajba tal-manifattura speċifiċi għall-prodotti mediċinali ta’ terapija avvanzata kif imsemmi fl-Artikolu 5 tar-Regolament (KE) Nru 1394/2007 tal-Parlament Ewropew u tal-Kunsill dwar il-prodotti mediċinali ta’ terapija avvanzata.
3.Fl-ispettorati tagħhom, l-Istati Membri għandhom jistabbilixxu u jimplimentaw sistema tal-kwalità mfassla sew u jikkonformaw magħha l-persunal u l-maniġment tal-ispettorati. Is-sistema tal-kwalità għandha tiġi aġġornata kif xieraq
Artikolu 4
Konformità mal-prassi tajba tal-manifattura
1.L-Istati Membri għandhom jiżguraw li l-operazzjonijiet tal-manifattura jsiru skont il-prassi tajba tal-manifattura tajba u skont l-awtorizazzjoni tal-manifattura. Din id-dispożizzjoni għandha tapplika wkoll għall-prodotti mediċinali maħsubin biss għall-esportazzjoni.
2.Għall-prodotti mediċinali importati minn pajjiżi terzi, l-Istati Membri għandhom jiżguraw li l-prodotti jkunu ġew manifatturati skont l-istandards li għall-inqas huma ekwivalenti għall-istandards tal-prassi tajba tal-manifattura stabbiliti fl-Unjoni u li dawn il-prodotti jkunu ġew manifatturati minn manifatturi debitament awtorizzati biex jagħmlu dan.
Artikolu 5
Konformità mal-awtorizzazzjoni tal-kummerċjalizzazzjoni
1.L-Istati Membri għandhom jiżguraw li kull operazzjoni tal-manifattura jew tal-importazzjoni għall-prodotti mediċinali soġġetti għal awtorizzazzjoni tal-kummerċjalizzazzjoni ssir mill-manifatturi skont l-informazzjoni mogħtija fl-applikazzjoni għal dik l-awtorizzazzjoni tal-kummerċjalizzazzjoni.
2.L-Istati Membri għandhom jobbligaw lill-manifattur biex jirrevedi regolarment il-metodi tal-manifattura tiegħu skont il-progress xjentifiku u tekniku.
Jekk ikun hemm bżonn issir varjazzjoni fid-dossier tal-awtorizzazzjoni tal-kummerċjalizzazzjoni, il-varjazzjoni għandha ssir skont l-arranġamenti stabbiliti skont l-Artikolu 23b tad-Direttiva 2001/83/KEE.
Artikolu 6
Sistema tal-kwalità tal-farmaċewtika
L-Istati Membri għandhom jiżguraw li l-manifatturi jistabbilixxu, jimplimentaw u jħaddmu sistema effettiva tal-kwalità tal-farmaċewtika, li tkun tinvolvi l-parteċipazzjoni attiva tal-maniġment superjuri u tal-persunal mid-dipartimenti differenti.
Artikolu 7
Persunal
1.Il-manifattur għandu jkun obbligat li f’kull sit tal-manifattura u tal-importazzjoni jkollu biżżejjed persunal kompetenti u kkwalifikat kif jixraq biex jilħaq l-għanijiet tas-sistema tal-kwalità tal-farmaċewtika.
2.Id-doveri tal-persunal maniġerjali u superviżorju, inkluż il-persuni kkwalifikati msemmija fl-Artikolu 48 tad-Direttiva 2001/83/KEE, li huma responsabbli għall-implimentazzjoni u t-tħaddim tal-prassi tajba tal-manifattura, għandhom jiġu definiti fid-deskrizzjonijiet tal-impjieg. Ir-relazzjonijiet ġerarkiċi tagħhom għandhom jiġu definiti fit-tabella organizzattiva. It-tabelli organizzattivi u d-deskrizzjonijiet tal-impjieg għandhom jiġu approvati skont il-proċeduri interni tal-manifattur.
3.Il-persunal imsemmi fil-paragrafu 2 għandu jingħata awtorità biżżejjed biex jassumi r-responsabbiltà tiegħu kif xieraq.
4.Il-persunal għandu jingħata taħriġ tal-bidu u kontinwu li jkun ikopri b’mod partikolari t-teorija u l-applikazzjoni tal-kunċett ta’ assigurazzjoni tal-kwalità u ta’ prassi tajba tal-manifattura, filwaqt li għandha ssir verifika tal-effikaċja tiegħu.
5.Għandhom jiġu stabbiliti programmi ta’ iġjene li jkunu addattati għall-attivitajiet imwettqa, u dawn għandhom jiġu osservati. B’mod partikolari, dawn il-programmi għandhom jinkludu proċeduri relatati mas-saħħa, mal-prattika tal-iġjene u mal-ilbies tal-persunal.
Artikolu 8
Bini u apparat
1.Fejn jidħlu l-bini u l-apparat tal-manifattura, il-manifattur għandu jkun obbligat jiżgura li dawn jinsabu, jitfasslu, jinbnew, jiġu adattati u jinżammu b’tali mod li jkunu xierqa għall-operazzjonijiet maħsuba.
2.L-Istati Membri għandhom jeżiġu li l-bini u l-apparat tal-manifattura jiġu stabbiliti, jitfasslu u jitħaddmu b’tali mod li jnaqqsu kemm jista’ jkun ir-riskju tal-iżball u li jippermettu tindif u manutenzjoni effettivi ħalli jevitaw kontaminazzjoni, kontaminazzjoni kroċjata u, b’mod ġenerali, kull effett ħażin fuq il-kwalità tal-prodott.
3.Il-bini u l-apparat li għandu jintuża għall-operazzjonijiet tal-manifattura jew tal-importazzjoni, li huma kritiċi għall-kwalità tal-prodotti, għandhom ikunu soġġetti għal kwalifika u validazzjoni xierqa.
Artikolu 9
Dokumentazzjoni
1.Il-manifattur għandu jkun obbligat jistabbilixxi u jżomm sistema ta’ dokumentazzjoni bbażata fuq speċifikazzjonijiet, formoli tal-manifattura, u struzzjonijiet, proċeduri u reġistrazzjonijiet tal-ipproċessar u tal-ippakkjar, li jkunu jkopru l-operazzjonijiet varji tal-manifattura li jsiru. Is-sistema tad-dokumentazzjoni għandha tiżgura l-kwalità u l-integrità tad-dejta. Id-dokumenti għandhom ikunu ċari, mingħajr żbalji u jinżammu aġġornati. Il-proċeduri stabbiliti minn qabel għall-operazzjonijiet u l-kundizzjonijiet ġenerali tal-manifattura għandhom ikunu disponibbli, flimkien ma’ dokumenti speċifiċi tal-manifattura ta’ kull lott. Dak is-sett ta’ dokumenti għandu jippermetti li tiġi intraċċata l-istorja tal-manifattura ta’ kull lott.
Il-manifattur għandu jintalab iżomm id-dokumentazzjoni tal-lott għal mill-anqas sena wara l-iskadenza ta’ dak il-lott, jew għal mill-anqas ħames snin wara ċ-ċertifikazzjoni msemmija fl-Artikolu 51(3) tad-Direttiva 2001/83/KEE, skont liema minnhom ikun l-itwal perjodu.
2.Jekk minflok dokumenti bil-miktub, ikunu qed jintużaw sistemi elettroniċi, fotografiċi jew sistemi oħra tal-ipproċessar tad-dejta, il-manifattur għandu qabelxejn jivvalida s-sistemi billi juri li fil-mument maħsub għar-reġistrazzjoni tad-dejta, din tkun qed tiġi rreġistrata kif xieraq. Id-dejta rreġistrata b’dawk is-sistemi għandha ssir disponibbli b’format li jinqara u għandha tingħata lill-awtoritajiet kompetenti meta tintalab. Id-dejta rreġistrata b’mod elettroniku għandha tkun protetta kontra l-aċċess illeċitu, it-telf jew il-ħsara tad-dejta, permezz ta’ tekniki bħad-dupplikazzjoni jew il-backup u t-trasferiment lejn sistema oħra tar-reġistrazzjoni, filwaqt li għandhom isiru l-verifiki.
Artikolu 10
Produzzjoni
1.L-Istati Membri għandhom jiżguraw li l-manifatturi jwettqu l-operazzjonijiet differenti tal-produzzjoni skont l-istruzzjonijiet u l-proċeduri stabbiliti minn qabel u skont il-prassi tajba tal-manifattura. Għandu jkun hemm riżorsi adegwati u biżżejjed għall-manifatturi biex iwettqu l-kontrolli ta’ matul il-proċess. Kull devjazzjoni tal-proċess u kull difett tal-prodott għandhom jiġu ddokumentati u investigati bir-reqqa.
2.Il-manifatturi għandhom ikunu obbligati jieħdu l-miżuri tekniċi u organizzazzjonali xierqa biex jevitaw il-kontaminazzjonijiet kroċjati u t-taħlit.
3.Għandha tiġi vverifikata kull bidla tal-manifattura jew bidla importanti fil-proċess tal-manifattura tal-prodott mediċinali. Għandhom jiġu vverifikati mill-ġdid u b’mod regolari wkoll l-istadji kritiċi tal-proċessi tal-manifattura.
Artikolu 11
Kontroll tal-kwalità
1.Il-manifattur għandu jkun obbligat jistabbilixxi u jħaddem sistema tal-kontroll tal-kwalità li tkun fl-awtorità ta’ persuna bil-kwalifiki meħtieġa u li tkun indipendenti mill-produzzjoni.
Dik il-persuna għandu jkollha għad-dispożizzjoni tagħha laboratorju tal-kontroll tal-kwalità wieħed jew aktar, jew aċċess għalihom, li jkunu mgħammra kif xieraq u bil-persunal meħtieġ biex ikunu jistgħu jsiru l-eżaminazzjonijiet u l-ittestjar meħtieġa tal-materjali tal-bidu u tal-materjali tal-ippakkjar u l-ittestjar tal-prodotti mediċinali intermedji u lesti.
2.Għall-prodotti mediċinali, inkluż dawk importati minn pajjiżi terzi, jistgħu jintużaw laboratorji b’kuntratt, diment li dawn ikunu awtorizzati skont l-Artikolu 12 ta’ din id-Direttiva u l-punt (b) tal-Artikolu 20 tad-Direttiva 2001/83/KEE.
3.Waqt il-kontroll finali tal-prodott mediċinali lest, qabel jinħareġ għall-bejgħ jew għad-distribuzzjoni, is-sistemi tal-kontroll tal-kwalità għandhom iqisu r-riżultati analitiċi iżda anke informazzjoni essenzjali bħall-kundizzjonijiet tal-produzzjoni, ir-riżultati tal-kontrolli ta’ waqt il-proċess, l-eżaminazzjoni tad-dokumenti tal-manifattura u l-konformità tal-prodott mal-ispeċifikazzjonijiet tiegħu, inkluż il-pakkett lest finali.
4.Il-kampjuni ta’ kull lot tal-prodott mediċinali lest għandhom jinżammu għal mill-inqas sena wara l-iskadenza.
Il-kampjuni għall-materjali tal-bidu, għajr is-solventi, il-gassijiet jew l-ilma, li jintużaw fil-proċess tal-manifattura għandhom jinżammu għal mill-inqas sentejn wara r-rilaxx tal-prodott. Dak il-perjodu jista’ jiqsar jekk il-perjodu tal-istabbilità tal-materjal, kif indikat fl-ispeċifikazzjoni rilevanti, ikun iqsar. Dawk il-kampjuni kollha għandhom jinżammu għad-dispożizzjoni tal-awtoritajiet kompetenti.
Jistgħu jiġu definiti kundizzjonijiet oħrajn bi qbil mal-awtorità kompetenti, għat-teħid tal-kampjuni u għaż-żamma tal-materjali tal-bidu u ta’ ċerti prodotti manifatturati individwalment jew fi kwantitajiet żgħar, jew meta l-ħażna tagħhom tista’ toħloq problemi speċjali.
Artikolu 12
Operazzjonijiet subkontrattati
1.L-Istati Membri għandhom jeżiġu li kull operazzjoni tal-manifattura jew tal-importazzjoni jew kull operazzjoni relatata magħha li tiġi subkuntrattata, ikunu soġġetti għal kuntratt bil-miktub.
2.Il-kuntratt għandu jiddefinixxi biċ-ċar ir-responsabilitajiet ta’ kull parti u għandu jiddefinixxi, b’mod partikolari, l-osservanza tal-prassi tajba tal-manifattura li jrid isegwi l-kuntrattur aċċettatur u l-mod kif għandha tassumi r-responsabbiltajiet tagħha dik il-persuna kwalifikata li jsemmi l-Artikolu 48 tad-Direttiva 2001/83/KEE u li hi responsabbli biex tiċċertifika l-lottijiet kollha.
3.Ix-xogħol li l-kuntrattur aċċettatur jingħata b’kuntratt ma għandux jgħaddih lil ħaddieħor b’kuntratt mingħajr l-awtorizzazzjoni bil-miktub mingħand min tah il-kuntratt.
4.Il-kuntrattur aċċettatur għandu jikkonforma mal-prinċipji u l-linji gwida dwar il-prassi tajba tal-manifattura applikabbli għall-operazzjonijiet konċernati stabbiliti fl-Unjoni u għandu jilqa’ l-ispezzjonijiet tal-awtoritajiet kompetenti b’konformità mal-Artikolu 111 tad-Direttiva 2001/83/KEE.
Artikolu 13
Ilmenti u rtirar tal-prodotti
1.L-Istati Membri għandhom jiżguraw li l-manifatturi jħaddmu sistema għar-reġistrazzjoni u għar-reviżjoni tal-ilmenti flimkien ma’ sistema effettiva għall-irtirar minnufih u f’kull ħin, tal-prodotti mediċinali fin-netwerk tad-distribuzzjoni. Il-manifattur għandu jirreġistra u jinvestiga kull ilment dwar difett. Il-manifattur għandu jintalab jinforma lill-awtorità kompetenti, u jekk applikabbli lid-detentur tal-awtorizzazzjoni tal-kummerċjalizzazzjoni, dwar kull difett li jista’ jwassal għal irtirar jew għal restrizzjoni mhux normali fil-provvista u, kemm jista’ jkun, għandu jindika l-pajjiżi tad-destinazzjoni.
2.Kull irtirar għandu jsir b’konformità mar-rekwiżiti msemmija fl-Artikolu 123 tad-Direttiva 2001/83/KEE.
Artikolu 14
Awtospezzjoni
Il-manifattur għandu jintalab jagħmel awtospezzjonijiet kontinwi bħala parti mis-sistema tal-kwalità tal-farmaċewtika biex jissorvelja l-implimentazzjoni u l-osservanza tal-prassi tajba tal-manifattura u biex jipproponi miżuri ta’ korrezzjoni u/jew azzjonijiet preventivi. Għandhom jinżammu reġistrazzjonijiet ta’ dawn l-awtospezzjonijiet u ta’ kull azzjoni korrettiva meħuda sussegwentament.
Artikolu 15
Tħassir tad-Direttiva 2003/94/KE
Id-Direttiva 2003/94/KE titħassar b’effett minn sitt xhur wara d-data tal-pubblikazzjoni f’Il-Ġurnal Uffiċjali tal-Unjoni Ewropea tal-avviż imsemmi fl-Artikolu 82(3) tar-Regolament (UE) Nru 536/2014 jew mill-1 ta’ April 2018, skont liema minnhom tkun aktar tard.
Kull referenza għad-Direttiva mħassra għandha tinftiehem bħala referenza għal din id-Direttiva u għar-Regolament Delegat tal-Kummissjoni xx u tinqara skont it-tabella ta’ korrelazzjoni fl-Anness.
Artikolu 16
Traspożizzjoni
1.Sa mhux aktar tard mill-[31 ta’ Marzu 2018], l-Istati Membri għandhom jadottaw u jippubblikaw il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma’ din id-Direttiva. Dawn għandhom jikkomunikaw it-test ta’ dawk id-dispożizzjonijiet lill-Kummissjoni minnufih.
Dawn għandhom japplikaw dawk id-dispożizzjonijiet minn sitt xhur wara d-data tal-pubblikazzjoni f’Il-Ġurnal Uffiċjali tal-Unjoni Ewropea tal-avviż imsemmi fl-Artikolu 82(3) tar-Regolament (UE) Nru 536/2014 jew mill-1 ta’ April 2018, skont liema minnhom tkun aktar tard.
Meta l-Istati Membri jadottaw dawk id-dispożizzjonijiet, dawn għandhom jirreferu għal din id-Direttiva jew ikunu akkumpanjati b’din ir-referenza waqt il-pubblikazzjoni uffiċjali tagħhom. L-Istati Membri għandhom jiddeċiedu kif għandha ssir din ir-referenza.
2.L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert b’din id-Direttiva.
Artikolu 17
Dħul fis-seħħ
Din id-Direttiva għandha tidħol fis-seħħ fl-għoxrin jum wara l-pubblikazzjoni tagħha f’Il-Ġurnal Uffiċjali tal-Unjoni Ewropea.
Artikolu 18
Destinatarji
Din id-Direttiva hi indirizzata lill-Istati Membri.
Done at Brussels, 15.9.2017
Għall-Kummissjoni
Il-President
Jean-Claude JUNCKER
