Isem

Informazzjoni ta’ identifikazzjoni

Raġunijiet

Data tal-elenkar

“11.

Abu Aqla Mohamed Ahmed KAIKAL

Nazzjonalità: Sudaniża

Sess: raġel

Funzjoni: Kmandant tal-milizzja affiljata tal-SAF

Entitajiet assoċjati: SAF

Abu Aqla Mohamed Ahmed Kaikal huwa Kmandant Militari Sudaniż li serva fil-Forzi ta’ Appoġġ Rapidu (RSF) fl-istat ta’ Jazira fis-Sudan sakemm telaq biex imur mal-Forzi Armati Sudaniżi (SAF) f’Ottubru 2024. F’Diċembru 2023, inħatar mill-RSF bħala Gvernatur tal-istat ta’ Jazira, wara li l-RSF b’mod vjolenti ħadu f’idejhom dik iż-żona. L-RSF huma responsabbli għal attakki fuq bliet u ċentri umanitarji fl-istat ta’ Jazira, li wasslu għal spostament massiv ta’ persuni ċivili, ġuħ, nuqqas ta’ mediċini u impediment tal-għajnuna umanitarja. L-istat ta’ Jazira speċifikament kien ċentru ta’ vjolenza mwettqa mill-RSF matul il-governanza ta’ Kaikal. Għaldaqstant, Abu Aqla Mohamed Ahmed Kaikal huwa responsabbli għal azzjonijiet u politiki li jheddu l-paċi, l-istabbiltà u s-sigurtà tas-Sudan. Barra minn hekk, huwa responsabbli għat-tmexxija ta’ atti fis-Sudan li jikkostitwixxu ksur serju tad-drittijiet tal-bniedem, u għat-tfixkil tat-twassil ta’ assistenza umanitarja fis-Sudan, l-aċċess għaliha u d-distribuzzjoni tagħha.

18.7.2025

12.

Hussein BARSHAM

Nazzjonalità: Sudaniża

Sess: raġel

Funzjoni: Kmandant ta’ operazzjonijiet militari tal-RSF

Entitajiet assoċjati: RSF; it-tribù ta’ Misseria

Hussein Barsham huwa Kmandant ta’ Operazzjonijiet Militari tal-Forzi ta’ Appoġġ Rapidu (RSF), organizzazzjoni li ġiet akkużata minn organizzazzjonijiet internazzjonali mhux governattivi b’tindif etniku u saħansitra ġenoċidju kontra t-tribù Masalit u gruppi oħra mhux Għarab fid-Darfur.

Bħala Kmandant, Hussein Barsham mexxa suldati tal-RSF fil-ħtif tal-ajruport ta’ Baleela mill-Forzi Armati Sudaniżi (SAF), u l-ħtif ta’ lokalitajiet fl-istat ta’ Kordofan tal-Punent, bħal Meiram. Kellu rwol ewlieni fl-operazzjonijiet tal-RSF li rriżultaw f’atroċitajiet tal-massa, inkluż qtil immirat, vjolenza etnika, spostament furzat, u vjolenza kontra persuni ċivili, b’mod partikolari fid-Darfur u reġjuni oħra tas-Sudan milquta minn kunflitti. Taħt il-kmand tiegħu, il-forzi tal-RSF kienu involuti fi qtil tal-massa u atroċitajiet. Barsham kien involut fil-ġlied fir-reġjun ta’ Kordofan. Mexxa attakki fuq diversi lokalitajiet u kien preżenti fis-siti ta’ atroċitajiet u eżekuzzjonijiet tal-massa mwettqa minn suldati taħt il-kmand tiegħu. Tali atti jikkostitwixxu delitti tal-gwerra.

Hussein Barsham huwa għalhekk responsabbli għal azzjonijiet li jheddu l-paċi, l-istabbiltà u s-sigurtà tas-Sudan. Huwa responsabbli wkoll li dgħajjef l-isforzi biex terġa’ tibda t-tranżizzjoni politika fis-Sudan u li mexxa jew wettaq atti fis-Sudan li jikkostitwixxu ksur jew abbużi serji tad-drittijiet tal-bniedem jew ksur tad-dritt umanitarju internazzjonali.”

18.7.2025”;

Isem

Informazzjoni ta’ identifikazzjoni

Raġunijiet

Data tal-elenkar

“7.

Alkhaleej Bank Co Ltd

magħruf ukoll bħala:

Khaleej Bank;

Al Rowad Bank For Development & Investment;

Al Rowad Bank For Development And Investment;

Al-Khaleej Bank;

بنك الخليج

Indirizz: Albaraka Tower, 6th Floor, 1 Al Qasr, Khartoum, Sudan

Sit web: https://al-khaleejbank.com/alkhaleej/

Tip ta’ entità: istituzzjoni finanzjarja

Numru tar-reġistrazzjoni: SUDAN-EO14098

Post prinċipali tan-negozju: Khartoum, Sudan

Individwi jew entitajiet assoċjati: Mustafa Ibrahim ABDEL NABI MOHAMED deżinjat mill-Unjoni fl-24.6.2024; Musa Hamdan Dagalo Musa, ħu l-Kmandant tal-RSF Mohamed Hamdan Dagalo; Shield Protective Solutions Co. Ltd. (Sudan)

Alkhaleej Bank Co Ltd (‘Alkhaleej’) għandu rwol essenzjali fl-isforzi tal-Forzi ta’ Appoġġ Rapidu (RSF) biex jiffinanzjaw l-operazzjonijiet tagħhom, u hekk jikkomplika l-isforzi biex jitwaqqaf il-ġlied fis-Sudan. Alkhaleej huwa fil-biċċa l-kbira tiegħu proprjetà ta’ kumpaniji marbuta ma’ membri tal-familja tal-Kmandant tal-RSF Mohamed Hamdan Dagalo (Hemedti) u huwa għalhekk meqjus bħala li huwa kkontrollat mill-RSF.

Qabel u waqt il-gwerra, l-RSF stabbilew networks finanzjarji kumplessi li jużaw profitti min-negozju tagħhom fid-deheb biex jiffinanzjaw armi, pagi u kampanji tal-media, u biex jiksbu appoġġ politiku. Jikkontrolla network ta’ mhux aktar minn 50 kumpanija, inkluż Alkhaleej, li sar finanzjatur ewlieni u f’Marzu 2023 rċieva USD 50 miljun mill-Bank Ċentrali tas-Sudan. Barra minn hekk, Alkhaleej għandu rabtiet bankarji internazzjonali li jippermettu lill-RSF joperaw fis-sistema finanzjarja globali. In-network ta’ Hemedti allegatament huwa s-sid ta’ porzjon sinifikanti ta’ Alkhaleej, b’xi stimi jissuġġerixxu kontroll tal-maġġoranza.

L-attivitajiet kummerċjali tal-RSF huma mifruxa fuq diversi setturi, inkluż it-trasport, il-kostruzzjoni, l-agrikoltura, u s-settur bankarju, li jagħmlu lil Hemedti wieħed mill-aktar figuri sinjuri u b’saħħithom tas-Sudan. Alkhaleej għandu rwol kruċjali f’dawk l-operazzjonijiet għax joffri għajnuna finanzjarja diretta jew indiretta lill-RSF.

Bħala finanzjatur ewlieni u faċilitatur tal-RSF u tal-attakki u l-azzjonijiet armati tagħhom, Alkhaleej Bank Co Ltd huwa għaldaqstant involut direttament jew indirettament fl-għoti ta’ appoġġ għal azzjonijiet jew politiki li jheddu l-paċi, l-istabbiltà jew is-sigurtà tas-Sudan jew qed jibbenefika minnhom.

18.7.2025

8.

Red Rock Mining Company

magħrufa wkoll bħala Red Rock Ltd

Indirizz: Blok 9, Kafory, Khartoum, Sudan

Telefon: + 249 1203 47711

Sit web: https://redrockmining.co/contact-us/#

Posta elettronika: corporate@redrockmining.net

info@redrocksd.com

Tip ta’ entità: kumpanija tal-minjieri

Data tar-reġistrazzjoni: is-sittinijiet

Numru tar-reġistrazzjoni: ID tal-grupp: 16463

Post prinċipali tan-negozju: l-Emirati Għarab Magħquda

Indirizz: Office 320, Emarat Atrium Building, Business Bay, Dubai, United Arab Emirates

Individwi jew entitajiet assoċjati: SMT Engineering

Red Rock Mining Company hija kumpanija tal-estrazzjoni u l-esplorazzjoni tal-minjieri. Il-kumpanija omm tagħha hija SMT Engineering (SMT), li hija soġġetta għal miżuri restrittivi mill-Unjoni, mill-Istati Uniti u mir-Renju Unit. SMT hija azzjonist konġunt ewlieni, flimkien ma’ Defense Industries System (DIS), fi tliet kumpaniji involuti fil-produzzjonijiet ta’ armi u vetturi għall-Forzi Armati Sudaniżi (SAF).

Is-settur tal-minjieri huwa ta’ importanza partikolari biex jalimenta l-kunflitt. Iż-żoni tal-estrazzjoni mill-minjieri spiss ikunu marbuta ma’ żoni tal-gwerra u jirrappreżentaw siti strateġikament importanti li l-partijiet fil-kunflitt ikunu jridu jikkonkwistaw, u dan iżid il-kompetizzjoni u t-tensjonijiet. Red Rock Mining Company hija preżenti u attiva fis-Sudan. Barra minn hekk għandha konċessjoni qrib al Damazin, li ttieħdet mill-SAF fl-2012.

Red Rock Mining Company tipprovdi finanzjament lill-gruppi armati responsabbli għall-kunflitt Sudaniż, bl-aktar mod prominenti lill-SAF. Red Rock Mining Company hija azzjonista, għandha sehem ta’ 99 % f’Advanced Mining Works, li hija parti min-network multisettorjali ta’ korporazzjonijiet u parteċipazzjonijiet azzjonarji mmexxija mill-kumpanija omm GIAD. Fost affarijiet oħra, GIAD hija involuta fil-produzzjoni ta’ armi u vetturi għall-SAF, kif ukoll fil-forniment ta’ servizzi. Il-konglomerat GIAD huwa kkontrollat mill-SAF permezz tad-DIS.

Għaldaqstant, Red Rock Mining Company hija entità li tipprovdi appoġġ lill-azzjonijiet jew il-politiki li jheddu l-paċi, l-istabbiltà u s-sigurtà tas-Sudan. Hija assoċjata wkoll ma’ individwi u entitajiet deżinjati.

18.7.2025”.