(1)

Bis-saħħa tad-Deċiżjoni tal-Kunsill 98/392/KE (2), il-Komunità Ewropea approvat il-Konvenzjoni tan-Nazzjonijiet Uniti dwar il-Liġi tal-Baħar tal-10 ta’ Diċembru 1982 (UNCLOS) u l-Ftehim tat-28 ta’ Lulju 1994 dwar l-implimentazzjoni tal-Parti XI tiegħu fir-rigward ta’ dawk il-kwistjonijiet irregolati minnha li l-kompetenza dwarhom ġiet ittrasferita lill-Komunità mill-Istati Membri tagħha. L-Unjoni s’issa hija l-unika organizzazzjoni internazzjonali li hija Parti għall-UNCLOS skont it-tifsira tal-Artikolu 305(1)(f) tal-UNCLOS u l-Artikolu 1 tal-Anness IX tagħha.

(2)

Il-Ftehim fil-qafas tal-Konvenzjoni tan-Nazzjonijiet Uniti dwar il-Liġi tal-Baħar fuq il-konservazzjoni u fuq l-użu sostenibbli tal-bijodiversità marina fiż-żoni lil hinn mill-ġuriżdizzjoni nazzjonali (“il-Ftehim”) ġie adottat fi New York fid-19 ta’ Ġunju 2023.

(3)

Fil-konklużjonijiet tiegħu tal-20 ta’ Lulju 2023, il-Kunsill innota li l-Unjoni u l-Istati Membri tagħha huma impenjati għar-ratifika u l-implimentazzjoni rapida tal-Ftehim u ħeġġeġ lill-Istati kollha biex jagħmlu l-istess.

(4)

L-Unjoni u l-Istati Membri tagħha għandhom l-għan li jirratifikaw il-Ftehim qabel il-Konferenza tan-Nazzjonijiet Uniti dwar l-Oċeani li ser isseħħ fl-2025.

(5)

F’konformità mad-Deċiżjoni tal-Kunsill (UE) 2023/1974 (3), il-Ftehim ġie ffirmat fl-20 ta’ Settembru 2023, f’isem l-Unjoni, soġġett għall-konklużjoni tiegħu f’data aktar tard.

(6)

Skont l-Artikolu 66 tal-Ftehim, il-Ftehim huwa soġġett għar-ratifika, l-approvazzjoni jew l-aċċettazzjoni mill-Istati u mill-organizzazzjonijiet reġjonali għall-integrazzjoni ekonomika, bħall-Unjoni.

(7)

Il-Ftehim huwa konformi mal-objettivi ambjentali tal-Unjoni kif imsemmi fl-Artikolu 191 tat-Trattat dwar il-Funzjonament tal-Unjoni Ewropea (TFUE), jiġifieri: l-preservazzjoni, il-protezzjoni u t-titjib tal-kwalità tal-ambjent; il-protezzjoni tas-saħħa tal-bniedem; l-użu prudenti u razzjonali tar-riżorsi naturali; u l-promozzjoni ta’ miżuri fil-livell internazzjonali biex jittrattaw problemi ambjentali reġjonali jew globali, u partikolarment għall-ġlieda kontra t-tibdil klimatiku.

(8)

Jenħtieġ li din id-Deċiżjoni ma tiġix interpretata bħala li tagħmel użu mill-possibbiltà li l-Unjoni teżerċita l-kompetenza esterna tagħha fir-rigward tal-oqsma koperti mill-Ftehim li jaqgħu taħt kompetenza kondiviża. Fil-qasam tal-kompetenzi kondiviżi, l-Istati Membri jżommu l-kompetenza tagħhom sa fejn il-Ftehim ma jaffettwax regoli komuni jew ma jbiddilx il-kamp ta’ applikazzjoni tagħhom, inkluż l-iżvilupp futur prevedibbli tagħhom.

(9)

Il-konklużjoni tal-Ftehim mill-Unjoni hija mingħajr preġudizzju għall-kompetenza tal-Istati Membri fir-rigward tar-ratifika, l-approvazzjoni jew l-aċċettazzjoni tal-Ftehim.

(10)

F’konformità mal-Artikolu 67(1) tal-Ftehim, ġie mfassal kodiċi ta’ kondotta bejn il-Kunsill, l-Istati Membri u l-Kummissjoni li jistabbilixxi l-arranġamenti interni bejn l-Unjoni u l-Istati Membri tagħha li jirriflettu r-responsabbiltajiet rispettivi tagħhom għat-twettiq tal-obbligi tagħhom u l-eżerċizzju tad-drittijiet skont il-Ftehim u għandu jkun applikabbli mid-data tad-dħul fis-seħħ ta’ din id-Deċiżjoni. Dawk l-arranġamenti jqisu kif xieraq l-interessi leġittimi tal-Unjoni u tal-Istati Membri tagħha fl-oqsma ta’ kompetenza rispettivi tagħhom, b’rispett dovut għad-drittijiet u l-obbligi tagħhom skont l-UNCLOS.

(11)

F’konformità mal-Artikolu 67(2) tal-Ftehim, l-Unjoni għandha tiddikjara, fl-istrument ta’ approvazzjoni tagħha, l-estent tal-kompetenza tagħha fir-rigward tal-kwistjonijiet regolati mill-Ftehim (“id-Dikjarazzjoni tal-Kompetenza”).

(12)

Skont l-Artikolu 70 ta’ dan il-Ftehim, flimkien mal-Artikolu 10(1) tiegħu, jenħtieġ li l-Unjoni tagħmel eċċezzjoni biex teskludi l-effetti retroattivi kif jinsabu fit-tieni sentenza tal-Artikolu 10(1) tal-Ftehim (“l-Eċċezzjoni dwar in-nonretroattività”). Għaldaqstant, id-dispożizzjonijiet tal-Ftehim jenħtieġ li japplikaw, għall-Unjoni, biss għal attivitajiet marbuta mar-riżorsi ġenetiċi marini u mal-informazzjoni ta’ sekwenza diġitali dwar riżorsi ġenetiċi marini ta’ żoni lil hinn mill-ġuriżdizzjoni nazzjonali miġbura u ġġenerata wara d-dħul fis-seħħ ta’ dan il-Ftehim għall-Unjoni.

(13)

Din id-Deċiżjoni hija mingħajr preġudizzju għas-sovranità, id-drittijiet sovrani u l-ġuriżdizzjoni tal-Istati Membri f’konformità mal-UNCLOS.

(14)

Il-Ftehim, id-Dikjarazzjoni ta’ Kompetenza u l-Eċċezzjoni dwar in-nonretroattività jenħtieġ li jiġu approvati,