L-ittestjar biex tiġi żgurata s-sikurezza tal-vetturi u t-trejlers

 

SOMMARJU TA’:

Id-Direttiva 2014/45/UE dwar testijiet perjodiċi tal-affidabbiltà stradali għal vetturi bil-mutur u t-trejlers tagħhom

X’INHU L-GĦAN TAD-DIRETTIVA?

Hija għandha l-għan li ttejjeb is-sikurezza stradali billi tistabbilixxi rekwiżiti minimi għal testijiet perjodiċi tal-affidabbiltà stradali ta’ vetturi u trejlers fl-Unjoni Ewropea (UE).

PUNTI EWLENIN

Kamp ta’ applikazzjoni

Il-liġi tapplika għal vetturi li kapaċi jtellgħu veloċità ta’ aktar minn 25 km/siegħa fil-kategoriji li ġejjin.

• Karozzi tal-passiġġieri u vetturi kummerċjali ħfief (kategoriji M1 u N1). Dawn għandhom jiġu ttestjati erba’snin wara l-ewwel reġistrazzjoni u mbagħad kull sentejn;
• Vetturi fil-kategorija M1 użati bħala taxis jew ambulanzi, karozzi tal-linja jew minibuses (M2, M3), vetturi ta’ merkanzija tqila (N2, N3) u trejlers tqal (O3, O4). Dawn għandhom jiġu ttestjati sena wara l-ewwel reġistrazzjoni u mbagħad kull sena wara dan;
• Tratturi veloċi b’veloċità ddisinjata ta’ aktar minn 40 km/siegħa (T1b, T2b, T3b, T4.1b, T4.2b and T4.3b) u użati b’mod kummerċjali. Dawn għandhom jiġu ttestjati erba’snin wara l-ewwel reġistrazzjoni u mbagħad kull sentejn;

Motoċikli b’saħħithom

Vetturi b’żewġ jew tliet roti (kategorija L) b’magna ta’ kombustjoni ikbar minn 125 cm³ se jiġu ttestjati mill-2022, sakemm l-istatistiċi tas-sikurezza stradali għall-ħames snin ta’ qabel ma jurux li l-istess livell ta’ sikurezza stradali jista’ jinkiseb b’miżuri alternattivi.

Testijiet tal-affidabbiltà stradali qabel id-dati dovuti

F’ċerti ċirkostanzi, jista’ jkun meħtieġ li jsir test fuq il-vetturi qabel id-dati dovuti:

• wara inċident;
• meta d-detentur taċ-ċertifikat tar-reġistrazzjoni jkun inbidel;
• ladarba jilħqu l-160 000 km;
• f’każijiet fejn is-sikurezza stradali tkun affettwata serjament.

Eżenzjonijiet

It-tipi ta’ vetturi li ġejjin jistgħu jiġu eżentati mit-testijiet tal-affidabbiltà stradali:

• vetturi ta’ interess storiku,
• vetturi diplomatiċi,
• vetturi użati mill-forzi armati, mill-pulizija, mid-dwana, mis-servizzi tat-tifi tan-nar jew għal skopijiet agrikoli u tal-forestrija biss:
• vetturi użati esklussivament fuq gżejjer żgħar.

Ċentri tal-ittestjar approvati

Kull Stat Membru tal-UE għandu jkollu ċentri tal-ittestjar approvati u konformi, filwaqt li l-ispetturi għandhom jissodisfaw il-kriterji ta’ kompetenza u jkunu ħielsa minn kwalunkwe kunflitt ta’ interess.

Valutazzjoni tad-difetti

• Id-difetti huma kklassifikati bħala minuri, maġġuri jew perikolużi, bid-difetti minuri li ma jkunux biżżejjed biex il-vetturi ma jgħaddux mit-test.
• Meta d-difetti jkunu perikolużi, l-użu tal-vettura fit-toroq pubbliċi jista’ jkun sospiż sakemm titranġa l-ħsara.

Ċertifikat tal-affidabbiltà stradali

Meta vettura li tkun diġà rreġistrata fi Stat Membru ieħor tiġi rreġistrata mill-ġdid, iċ-ċertifikat tagħha għandu jkun rikonoxxut minn Stati Membri oħrajn, anki meta s-sjieda tkun inbidlet.

Sal-2021, iċ-ċentri tal-ittestjar se jkollhom jiskambjaw informazzjoni rilevanti mal-awtorità nazzjonali tal-Istat Membru tagħhom.

Pjattaforma elettronika Ewropea għall-informazzjoni dwar il-vetturi

Il-fattibilità, il-kostijiet u l-benefiċċji tal-istabbiliment ta’ pjattaforma elettronika Ewropea għall-informazzjoni dwar il-vetturi għandhom jiġu eżaminati.

Frodi

• Biex jinkixfu frodi bl-odometru (manipulazzjoni tal-apparat użat biex titkejjel id-distanza vvjaġġata), id-data mit-test preċedenti għandha tkun disponibbli għall-ispetturi.
• Ir-rappreżentazzjoni ħażina tad-distanza li vettura tkun kopriet tikkostitwixxi reat punibbli.

MINN META TAPPLIKA D-DIRETTIVA?

Id-direttiva kellha tiġi trasposta fil-liġi nazzjonali sal-20 ta’ Mejju 2017. Dawn ir-regoli għandhom japplikaw mill-20 ta’ Mejju 2018.

SFOND

Għal aktar informazzjoni, ara:

• Sikurezza stradali (il-Kummissjoni Ewropea).

DOKUMENT PRINĊIPALI

Id-Direttiva 2014/45/UE tal-Parlament Ewropew u tal-Kunsill tat3 ta’ April 2014 dwar testijiet perjodiċi tal-affidabbiltà stradali għal vetturi bil-mutur u t-trejlers tagħhom u li tħassar id-Direttiva 2009/40/KE (ĠU L 127, 29.4.2014, pp. 51–128).

Emendi suċċessivi għad-Direttiva 2014/45/UE ġew inkorporati fit-test oriġinali. Din il-verżjoni konsolidata għandha valur dokumentarju biss.

l-aħħar aġġornament 22.06.2023