Ebda oppożizzjoni għal konċentrazzjoni notifikata

(Każ M.9557 — Swisscom/AMAG Group/Zürich Insurance Group/autoSense)

(Test b'rilevanza għaż-ŻEE)

(2019/C 408/01)

Fil-25 ta’ Novembru 2019, il-Kummissjoni ddeċidiet li ma topponix il-konċentrazzjoni notifikata msemmija hawn fuq u li tiddikjaraha kompatibbli mas-suq intern. Din id-deċiżjoni hi bbażata fuq l-Artikolu 6(1)b tar-Regolament tal-Kunsill (KE) Nru 139/2004 (1). It-test sħiħ tad-deċiżjoni hu disponibbli biss fil-Ġermaniż u ser isir pubbliku wara li jitneħħa kwalunkwe sigriet tan-negozju li jista’ jkun fih. Dan it-test jinstab:

—

Fit-taqsima tal-amalgamazzjoni tal-websajt tal-Kummissjoni dwar il-Kompetizzjoni (http://ec.europa.eu/competition/mergers/cases/). Din il-websajt tipprovdi diversi faċilitajiet li jgħinu sabiex jinstabu d-deċiżjonijiet individwali ta' amalgamazzjoni, inklużi l-kumpanija, in-numru tal-każ, id-data u l-indiċi settorjali,

—	f’forma elettronika fil-websajt EUR-Lex (http://eur-lex.europa.eu/homepage.html?locale=mt) bid-dokument li jġib in-numru 32019M9557. Il-EUR-Lex hu l-aċċess fuq l-internet għal-liġi Ewropea.

---

(1)  ĠU L 24, 29.1.2004, p. 1.

Ebda oppożizzjoni għal konċentrazzjoni notifikata

(Il-Każ M.9567 — PGGM/Macquarie/Genesee & Wyoming Awstralja)

(Test b’rilevanza għaż-ŻEE)

(2019/C 408/02)

Fit-28 ta’ Novembru 2019, il-Kummissjoni ddeċidiet li ma topponix il-konċentrazzjoni notifikata msemmija hawn fuq u li tiddikjaraha kompatibbli mas-suq intern. Din id-deċiżjoni hi bbażata fuq l-Artikolu 6(1)(b) tar-Regolament tal-Kunsill (KE) Nru 139/2004 (1). It-test sħiħ tad-deċiżjoni hu disponibbli biss fl-Ingliż u ser isir pubbliku wara li jitneħħa kwalunkwe sigriet tan-negozju li jista’ jkun fih. Dan it-test jinstab:

—

fit-taqsima tal-amalgamazzjoni tal-websajt tal-Kummissjoni dwar il-Kompetizzjoni (http://ec.europa.eu/competition/mergers/cases/). Din il-websajt tipprovdi diversi faċilitajiet li jgħinu sabiex jinstabu d-deċiżjonijiet individwali ta’ amalgamazzjoni, inklużi l-kumpanija, in-numru tal-każ, id-data u l-indiċi settorjali,

—	f’forma elettronika fil-websajt EUR-Lex (http://eur-lex.europa.eu/homepage.html?locale=mt) fid-dokument li jġib in-numru 32019M9567. Il-EUR-Lex hu l-aċċess fuq l-Internet għal-liġi Ewropea.

---

(1)  ĠU L 24, 29.1.2004, p. 1.

Opinjoni tal-Bank Ċentrali Ewropew

tat-30 ta’ Ottubru 2019

dwar proposta għal regolament dwar qafas ta’ governanza għall-istrument baġitarju għall-konverġenza u l-kompetittività għaż-żona tal-euro

(CON/2019/37)

(2019/C 408/03)

Introduzzjoni u bażi legali

Fid-9 u t-18 ta’ Settembru 2019, il-Bank Ċentrali Ewropew (BĊE) irċieva talba mingħand il-Kunsill tal-Unjoni Ewropea u l-Parlament Ewropew, rispettivament, għal opinjoni dwar proposta għal regolament tal-Parlament Ewropew u tal-Kunsill dwar qafas ta’ governanza għall-istrument baġitarju għall-konverġenza u l-kompetittività għaż-żona tal-euro (1) (iktar ’il quddiem ir-“regolament propost”).

Il-kompetenza tal-BĊE li jagħti opinjoni hija bbażata fuq l-Artikoli 127(4) u 282(5) tat-Trattat dwar il-Funzjonament tal-Unjoni Ewropea peress li r-regolament propost huwa relevanti għall-għan ewlieni tas-Sistema Ewropea ta’ Banek Ċentrali (SEBĊ) biex tinżamm l-istabbiltà tal-prezzijiet u, mingħajr preġudizzju għall-għan li tinżamm l-istabbiltà tal-prezzijiet, li jiġu appoġġati l-politiki ekonomiċi ġenerali fl-Unjoni, kif imsemmi fl-Artikoli 127(1) u 282(2) tat-Trattat u l-Artikolu 2 tal-Istatut tas-Sistema Ewropea ta’ Banek Ċentrali u tal-Bank Ċentrali Ewropew.

Skont l-ewwel sentenza tal-Artikolu 17.5 tar-Regoli tal-Proċedura tal-Bank Ċentrali Ewropew, il-Kunsill Governattiv adotta din l-opinjoni.

1.   Osservazzjonijiet ġenerali

1.1.   Għanijiet ġenerali tal-BICC

Ir-Rapport tal-Ħames Presidenti tat-22 ta’ Ġunju 2015 enfasizza l-ħtieġa li titlesta l-arkitettura ekonomika u istituzzjonali tal-Unjoni Ekonomika u Monetarja (UEM). B’mod partikolari, saħaq dwar l-importanza li tiġi kkoreġuta d-diverġenza li dehret matul il-kriżi u li jitnieda proċess ta’ konverġenza ġdid. Fir-Rapport tqajjem l-argument li “il-konverġenza sostenibbli teħtieġ ukoll ġabra usa’ ta’ politiki li jaqgħu taħt l-intestatura ta’ ‘riformi strutturali’, jiġifieri riformi mmirati biex jimmodernizzaw lill-ekonomiji biex jiksbu aktar tkabbir u xogħolijiet” (2).

L-istrument baġitarju għall-konverġenza u l-kompetittività (iktar ’il quddiem “il-BICC”) jimmira mhux biss li jappoġġa politiki strutturali iżda wkoll l-investiment pubbliku fi Stati Membri li l-munita tagħhom hija l-euro billi jiżborsa fondi speċifiċi għall-proġett. L-Istati Membri li jipparteċipaw fil-mekkaniżmu tar-rata tal-kambju (ERM II) jistgħu jipparteċipaw ukoll fil-BICC fuq bażi volontarja (iktar ’il quddiem flimkien ma’ Stati Membri li l-munita tagħhom hija l-euro “l-Istati Membri parteċipanti”).

Kontra dan l-isfond, jekk il-BICC jiġi applikat b’mod korrett, huwa mistenni li jtejjeb il-funzjonament tal-ekonomija u jwassal għal kompożizzjoni tal-infiq pubbliku li tkun aktar aġevolanti għat-tkabbir, b’impatt pożittiv fuq it-tkabbir potenzjali u r-reżiljenza tal-ekonomiji taż-żona tal-euro għal xokkijiet avversi. Bħala riżultat ta’ dan, il-BICC għandu jikkontribwixxi għall-funzjonament bla xkiel tal-UEM u l-effettività tal-politika monetarja tal-BĊE. Il-BICC għandu jingħata riżorsi suffiċjenti biex jilħaq il-miri intiżi tiegħu.

1.2.   Governanza tal-BICC

Ir-regolament propost jistabbilixxi qafas ta’ governanza għall-BICC, f’żewġ passi. L-ewwel nett, jipprevedi l-adozzjoni ta’ orjentazzjonijiet strateġiċi dwar riformi u prijoritajiet ta’ investiment għaż-żona tal-euro bħala ħaġa sħiħa. Bħala t-tieni pass sussegwenti, jipprevedi “gwida speċifika għall-pajjiż” (iktar ’il quddiem “CSG”) għal Stati Membri individwali taż-żona tal-euro, li trid tkun konsistenti mal-orjentazzjonijiet strateġiċi u r-rakkomandazzjonijiet tal-Kunsill speċifiċi għal kull pajjiż (iktar ’il quddiem “CSRs”). Abbażi ta’ CSG, l-Istati Membri mbagħad għandhom jidentifikaw pakketti possibbli ta’ riforma u investiment li għandhom jiġu sottomessi lill-Kummissjoni għal valutazzjoni. Il-Kunsill għandu jiddeċiedi dwar il-gwida politika u l-orjentazzjonijiet strateġiċi wara diskussjoni fil-Grupp tal-Euro u fuq il-bażi tal-inizjattiva meħuda mill-Kummissjoni.

Safejn ikun possibbli, il-governanza tal-BICC għandha tmur id f’id mas-Semestru Ewropew u kull mekkaniżmu eżistenti ieħor tal-koordinazzjoni tal-politika ekonomika. Dan għandu jiżgura l-konsistenza meħtieġa bejn proċessi u proċeduri. Ir-regolament propost jimmira li jikseb dik il-konsistenza fil-gwida strateġija stabbilita mill-Kunsill matul is-Summit tal-Euro u, wara diskussjonijiet mal-Grupp tal-Euro, fir-rakkomandazzjonijiet taż-żona tal-euro. Jenfasizza wkoll il-ħtieġa għal konsistenza tas-CSG mas-CSRs, peress li s-CSRs huma l-ġebla tax-xewka tas-Semestru Ewropew. B’mod konformi mar-rwol tagħhom ibbażat fuq it-Trattat fil-proċess ta’ koordinazzjoni tal-politika ekonomika, il-Kummissjoni għandha tevalwa l-pakketti ta’ riforma u investiment sottomessi mill-Istati Membri, timmonitorja l-progress tal-implimentazzjoni tagħhom, u tieħu l-inizjattiva biex tiżviluppa orjentazzjonijiet strateġiċi u gwida.

Barra minn hekk, huwa essenzjali, kif previst attwalment li l-pakketti ta’ riforma u investiment sottomessi mill-Istati Membri jiġu vvalutati kontra ħtiġijiet speċifiċi għall-pajjiż maqbula b’mod komuni, peress li l-prijoritajiet ta’ riforma u investiment ivarjaw b’mod sinifikanti bejn l-Istati Membri. Għal dik ir-raġuni, CSRs — diġà maħruġa annwalment mill-Kummissjoni u approvati mill-Kunsill bħala parti mill-proċess tas-Semestru Ewropew — għandhom ikunu l-punt ta’ referenza ewlieni għall-Istati Membri u għandhom jirreferu b’mod espliċitu għal CSRs eżistenti meta jissottomettu l-pakketti tagħhom ta’ riforma u investiment. Peress li r-rapporti tal-pajjiżi tal-Kummissjoni maħruġa fil-kuntest tas-CSRs tal-Kunsill jidentifikaw, sa mill-2019, ħtiġijiet importanti tal-politika strutturali u oqsma ewlenin għal investiment pubbliku fil-livell tal-Istati Membri, dawn jipprovdu l-punt ta’ riferiment xieraq għall-formolazzjoni ta’ pakketti nazzjonali ta’ riforma u investiment. Is-CSG tista’ tispeċifika ulterjorment dawk is-CSRs, fejn xieraq.

Fil-prattika, u skont meta l-pakketti ta’ riforma u investiment relatati mal-BICC jiġu sottomessi lill-Kummissjoni għal valutazzjoni, is-CSRs tas-sena ta’ qabel għandhom jintużaw bħala punt ta’ riferiment għall-BICC. Fil-valutazzjoni tagħhom tal-pakketti ta’ riforma u investiment sottomessi mill-Istati Membri, il-Kummissjoni tista’ tqis ukoll is-CSRs tas-sena attwali sal-punt li jkunu ppubblikati fiż-żmien dovut.

B’mod ġenerali, dan il-mod ta’ kif wieħed għandu jipproċedi kif imsemmi hawn fuq għandu jgħin biex is-CSRs jinżammu bħala l-punt ta’ riferiment ewlieni u tiġi żgurata konsistenza fis-sustanza bejn proċeduri ta’ koordinazzjoni differenti, b’mod partikolari s-Semestru Ewropew, u fil-ħin. F’dak il-kuntest, il-BICC jista’ joħroġ il-potenzjal tiegħu, billi jibqa’ ffukat biex jindirizza l-aktar sfidi pressanti tal-politika ekonomika u fiskali li jiffaċċjaw l-Istati Membri.

1.3.   Kunsiderazzjonijiet addizzjonali

Minħabba l-għan tal-BICC biex jappoġġa politiki strutturali u investiment pubbliku sabiex itejjeb il-kompetittività u l-konverġenza, huma meħtieġa diskussjonijiet ulterjuri lil hinn mill-BICC dwar kif għandha tiġi stabbilita funzjoni ta’ stabilizzazzjoni makroekonomika, li għadha nieqsa fuq il-livell taż-żona tal-euro. Dik il-funzjoni teżisti f’kull unjoni monetarja, sabiex jiġu indirizzati aħjar l-iskossi ekonomiċi li ma jistgħux jiġu mmaniġġjati fuq livell nazzjonali (3). Kif ġie enfasizzat qabel mill-BĊE (4), funzjoni ta’ stabilizzazzjoni makroekonomika għandha, jekk tkun iddisinnjata b’mod xieraq, iżżid ir-reżiljenza ekonomika tal-Istati Membri parteċipanti u taż-żona tal-euro bħala ħaġa sħiħa, sabiex b’hekk tiġi appoġġata wkoll il-politika monetarja unika. Għal dak il-għan, funzjoni ta’ stabilizzazzjoni fiskali għandha tkun ta’ daqs suffiċjenti.

Din l-opinjoni ser tiġi ppubblikata fuq is-sit elettroniku tal-BĊE.

---

(1)  COM(2019) 354 final.

(2)  Ara “Completing Europe’s Economic and Monetary Union” (Inlestu l-Unjoni Ekonomika u Monetarja tal-Unjoni), Rapport minn Jean-Claude Juncker, f’kooperazzjoni mill-qrib ma’ Donald Tusk, Jeroen Dijsselbloem, Mario Draghi u Martin Schulz, 22 ta’ Ġunju 2015, paġna 7, disponibbli fuq is-sit elettroniku tal-Kummissjoni fuq www.ec.europa.eu

(3)  Ara l-osservazzjonijiet ġenerali tal-Opinjoni CON/2018/51. L-opinjonijiet kollha tal-BĊE huma ppubblikati fuq is-sit elettroniku tal-BĊE fuq www.ecb.europa.eu

(4)  Ara l-osservazzjonijiet ġenerali tal-Opinjoni CON/2018/51.

Rata tal-kambju tal-euro (1)

It-3 ta' Diċembru 2019

(2019/C 408/04)

1 euro =

	Munita	Rata tal-kambju
USD	Dollaru Amerikan	1,1071
JPY	Yen Ġappuniż	120,39
DKK	Krona Daniża	7,4719
GBP	Lira Sterlina	0,85200
SEK	Krona Żvediża	10,5653
CHF	Frank Żvizzeru	1,0947
ISK	Krona Iżlandiża	134,40
NOK	Krona Norveġiża	10,1668
BGN	Lev Bulgaru	1,9558
CZK	Krona Ċeka	25,527
HUF	Forint Ungeriż	331,75
PLN	Zloty Pollakk	4,2845
RON	Leu Rumen	4,7777
TRY	Lira Turka	6,3508
AUD	Dollaru Awstraljan	1,6186
CAD	Dollaru Kanadiż	1,4747
HKD	Dollaru ta' Hong Kong	8,6675
NZD	Dollaru tan-New Zealand	1,7000
SGD	Dollaru tas-Singapor	1,5117
KRW	Won tal-Korea t'Isfel	1 319,15
ZAR	Rand ta' l-Afrika t'Isfel	16,2253
CNY	Yuan ren-min-bi Ċiniż	7,8140
HRK	Kuna Kroata	7,4400
IDR	Rupiah Indoneżjan	15 615,65
MYR	Ringgit Malażjan	4,6216
PHP	Peso Filippin	56,583
RUB	Rouble Russu	71,0634
THB	Baht Tajlandiż	33,529
BRL	Real Brażiljan	4,6545
MXN	Peso Messikan	21,6958
INR	Rupi Indjan	79,4300

---

(1)  Sors: rata tal-kambju ta' referenza ppubblikata mill-Bank Ċentrali Ewropew.

Notifika minn qabel ta’ konċentrazzjoni

(Il-Każ M.9608 — ENGIE/CDC/CNR Solaire 10)

Każ li jista’ jiġi kkunsidrat għal proċedura ssimplifikata

(Test b’rilevanza għaż-ŻEE)

(2019/C 408/05)

---

(1)  ĠU L 24, 29.1.2004, p. 1 (ir-“Regolament dwar l-Għaqdiet”).

(2)  ĠU C 366, 14.12.2013, p. 5.

Pubblikazzjoni ta’ applikazzjoni għar-reġistrazzjoni ta’ isem skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2019/C 408/06)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1)fi żmien tliet xhur mid-data ta’ din il-pubblikazzjoni.

DOKUMENT UNIKU

“GYŐR-MOSON-SOPRON MEGYEI CSEMEGE SAJ T”

Nru tal-UE: PGI-HU-02303 — 23.3.2017

DOP ( ) IĠP (X)

1.   Isem/ismijiet

“Győr-Moson-Sopron megyei Csemege sajt”

2.   Stat Membru jew Pajjiż Terz

L-Ungerija

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta’ prodott

Klassi 1.3. Ġobon

3.2.   Deskrizzjoni tal-prodott li għalih japplika l-isem f’(1)

“Győr-Moson-Sopron megyei Csemege sajt” huwa ġobon xaħmi, mielaħ u poruż magħmul mill-ħalib tal-baqar u mmaturat bil-flora tal-qoxra Brevibacterium linens. Il-mikroflora tal-maturazzjoni ewlenija tirriproduċi l-aktar b’mod naturali fiż-żona tal-produzzjoni msemmija fil-punt 4.

Tabella 1

Proprjetajiet organolettiċi tal-“ Győr-Moson-Sopron megyei Csemege saj t”

Fuq barra:	Ġobon forma ċilindrika bil-qiegħ u l-parti ta’ fuq ċatti u l-ġnub jisporġu ’l barra. Il-qoxra rqiqa u flessibbli hija poruża, b’lewn uniformi isfar jagħti fl-aħmar u li tinħass kemxejn mutjana mal-mess.
Fuq ġewwa:	Il-korporatura għandha lewn uniformi abjad jagħti fl-isfar, bi xquq distribwiti b’mod dens u bilanċjat fuq il-wiċċ maqtugħ.
Konsistenza:	Għandu konsistenza kemxejn ratba bħal għasida, jinqata’ faċilment u jitfarrak f’biċċiet fil-ħalq.
Riħa:	L-aroma distintiva hija ftit lattika u ħielsa minn kwalunkwe riħa barranija.
Togħma:	It-togħma distintiva hija pjaċevolment aromatika u mielħa, kemxejn aċiduża u ħielsa minn kwalunkwe togħma barranija.

Tabella 2

Il-karatteristiċi fiżiċi u kimiċi tal-“ Győr-Moson-Sopron megyei Csemege saj t”

Karatteristika	Kwantità % (g/100 g)
Materja niexfa (minima)	51,5
Kontenut ta’ xaħam fil-materja niexfa	45,0 ± 2
Klorur tas-sodju	2,0 ± 0,5

Tabella 3

Forma, dimensjonijiet u piż tal-“ Győr-Moson-Sopron megyei Csemege saj t”

Forma	Dimensjonijiet, cm	Piż, kg
Dijametru	tad-diska: 20-22 għoli: 7-9	2,1-3,1

3.3.   Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

—	ħalib tal-baqar;

—	kulturi starter mingħajr OĠM li fihom batterji lattiċi u oħrajn għall-maturazzjoni;

—	enzimi tal-koagulazzjoni tal-ħalib;

—	klorur tal-kalċju;

—	melħ tal-mejda.

3.4.   Passi speċifiċi tal-produzzjoni li jridu jsiru fiż-żona ġeografika ddefinita

L-istadji li ġejjin tal-produzzjoni tal-ġobon isiru fiż-żona ġeografika ddefinita.

—	Preparazzjoni u koagulazzjoni enzimatika tal-ħalib

—	Qtugħ u pproċessar tal-baqta

—	Iffurmar u ppressar

—

Tmelliħ

—	Maturazzjoni:

—	Imsiħ u tnixxif tal-ġobon

3.5.   Regoli speċifiċi dwar it-tqattigħ, it-taħkik, l-ippakkjar, eċċ.

—

3.6.   Regoli speċifiċi dwar it-tikkettar

—

4.   Definizzjoni fil-qosor taż-żona ġeografika

Iż-żona ġeografika tal-“Győr-Moson-Sopron megyei Csemege sajt” tikkorrispondi għaż-żona li tinkludi l-unitajiet amministrattivi li ġejjin:

Il-muniċipalitajiet li ġejjin tad-distrett ta’ Győr:

Abda, Bezi, Bőny, Börcs, Dunaszeg, Dunaszentpál, Enese, Fehértó, Gönyű, Győr, Győrladamér, Győr-Ménfőcsanak, Győrság, Győrsövényház, Győrújbarát, Győrújfalu, Győrzámoly, Ikrény, Kajárpéc, Kisbajcs, Koroncó, Kunsziget, Mezőörs, Mosonszentmiklós, Nagybajcs, Nagyszentjános, Nyúl, Öttevény, Pér, Rábapatona, Rétalap, Sokorópátka, Tényő, Töltéstava, Vámosszabadi, Vének.

Il-muniċipalitajiet li ġejjin tad-distrett ta’ Mosonmagyaróvár:

Jánossomorja, Lébény, Hegyeshalom, Ásványráró, Bezenye, Darnózseli, Dunakiliti, Dunaremete, Dunasziget, Feketeerdő, Halászi, Hédervár, Károlyháza, Kimle, Kisbodak, Levél, Lipót, Máriakálnok, Mecsér, Mosonmagyaróvár, Mosonszolnok, Mosonudvar, Püski, Rajka, Újrónafő, Várbalog.

Il-muniċipalitajiet li ġejjin tad-distrett ta’ Csorna:

Bősárkány, Szany, Acsalag, Bágyogszovát, Barbacs, Bodonhely, Bogyoszló, Cakóháza, Csorna, Dör, Egyed, Farád, Jobaháza, Kóny, Maglóca, Magyarkeresztúr, Markotabögöte, Páli, Pásztori, Potyond, Rábacsanak, Rábapordány, Rábasebes, Rábaszentandrás, Rábatamási, Rábcakapi, Sobor, Sopronnémeti, Szil, Szilsárkány, Tárnokréti, Vág, Zsebeháza.

Il-muniċipalitajiet li ġejjin tad-distrett ta’ Kapuvár:

Beled, Babót, Cirák, Csermajor, Dénesfa, Edve, Gyóró, Himod, Hövej, Kapuvár, Kisfalud, Mihályi, Osli, Rábakecöl, Répceszemere, Szárföld, Vadosfa, Vásárosfalu, Veszkény, Vitnyéd.

Il-muniċipalitajiet li ġejjin tad-distrett ta’ Tét:

Árpás, Csikvánd, Felpéc, Gyarmat, Gyömöre, Győrszemere, Kisbabot, Mérges, Mórichida, Rábacsécsény, Rábaszentmihály, Rábaszentmiklós, Tét.

Il-muniċipalitajiet li ġejjin tad-distrett ta’ Pannonhalma:

Écs, Győrasszonyfa, Nyalka, Pannonhalma, Pázmándfalu, Ravazd, Táp, Tápszentmiklós, Tarjánpuszta.

Il-muniċipalitajiet li ġejjin tad-distrett ta’ Sopron:

Agyagosszergény, Fertőd, Fertődoboz, Fertőendréd, Fertőhomok, Fertőrákos, Fertőszéplak, Hegykő, Hidegség, Sarród, Tőzeggyármajor, Nyárliget, Fertőújlak.

5.   Rabta maż-żona ġeografika

Ir-rabta bejn il-“Győr-Moson-Sopron megyei Csemege sajt” u ż-żona ġeografika hija bbażata fuq il-kwalità u r-reputazzjoni, liema elementi ewlenin huma ppreżentati hawn taħt.

Speċifiċitàjiet taż-żona ġeografika

Il-Kontea ta’ Győr-Moson-Sopron tikkonsisti minn pjanura ffurmata mis-sediment depożitat l-aktar mix-Xmara Danubju, kif ukoll mix-Xmajjar Rába-Rábca, Répce u Ikva.

Il-ħamrija u l-kondizzjonijiet klimatiċi taż-żona ġeografika huma ideali kemm għall-produzzjoni tal-għelejjel kif ukoll għat-trobbija tal-annimali. Il-ħamrija u l-kondizzjonijiet pluvjali taż-żona ġeografika huma partikolarment adatti għat-tkabbir tal-qamħirrum u l-għalf oħxon, li jipprovdu l-għalf meħtieġ għan-numru kbir ta’ baqar tal-ħalib fiż-żona, u jifformaw il-bażi għall-industrija tal-ipproċessar tal-ħalib tagħha. Tejgazdasági Kísérleti Intézet [l-Istitut għar-Riċerka dwar is-Settur tal-Ħalib] — li l-predeċessur tiegħu kien stabbilit f’Mosonmagyaróvár fl-1903 — iwettaq ir-riċerka bażika u applikata fl-ipproċessar tal-ħalib, kif ukoll jipprovdi r-riċerka u l-iżvilupp kif ukoll pariri dwar it-teknoloġija tal-ikel. F’Csermajor ġie stabbilit ċentru tar-riċerka sa mill-1886 biex jippermetti liż-żgħażagħ jitgħallmu l-fażijiet kollha tal-produzzjoni, it-trattament, l-ipproċessar u l-kummerċjalizzazzjoni tal-ħalib, u “jiksbu l-ħiliet manwali meħtieġ a”, biex jiġi żgurat li l-għarfien espert fl-ipproċessar tal-ħalib jintiret minn ġenerazzjoni għal oħra. Iż-żona ġeografika għandha l-fortuna li għandha l-bażi intellettwali u teknika u l-materja prima li jagħtu lill-prodotti tal-ħalib taż-żona — b’mod speċjali l-ġobon tagħha — is-sinifkat, ir-reputazzjoni u r-rikonoxximent tagħhom.

L-ispeċifitajiet tal-prodott

Karatteristika distintiva tal-ġobon hija l-kisja safra pallida li tidher fuq il-wiċċ tal-ġobon fir-4-5 jum tal-proċess tal-maturazzjoni, permezz tal-mikroflora tal-maturazzjoni ewlenija (Brevibacterium linens), li hija essenzjali għall-maturazzjoni u toriġina mill-bordijiet tal-arżnu użati. B’dan il-mod, tifforma rabta mill-qrib bejn il-kwalità tal-prodott u ż-żona tal-produzzjoni. It-tkabbir tal-batterji huwa ffaċilitat billi l-ġobon jiddawwar u jintmessaħ b’soluzzjoni tas-salmura kull 3-4 ijiem. Fit-2 ġimgħa, il-ġobon ikun essenzjalment miksi għalkollox. Trid tingħata attenzjoni estrema meta l-ġobon jiddawwar u jintmesaħ, biex jiġi żgurat li dan ma jinqasamx.

Il-maturazzjoni intensa tibda mill-wiċċ u tiċċaqlaq lejn iċ-ċentru, u tieħu madwar 3 ġimgħat. Il-maturazzjoni hija indikata wkoll permezz taż-żieda rapida fil-valur pH tal-qoxra, ikkawżata mid-dekompożizzjoni tal-lattilat (f’diossidu tal-karbonju u ilma) minn ċerti ħmejjer (eż. Oospora lactis) li jikbru b’mod naturali fuq il-wiċċ. Il-maturazzjoni hija kkaratterizzata mid-degradazzjoni rapida tal-maġġoranza tal-proteini, li jfisser li 60-80 % minnhom jieħdu l-forma ta’ komposti tan-nitroġenu solubbli fl-ilma sat-3 ġimgħa.

Il-proċess tal-maturazzjoni huwa element importanti għall-karattru distintiv tal-ġobon. Il-ġobon jista’ jiġi mmaturat biss fuq bordijiet magħmulin mill-injam tal-arżnu, f’kondizzjonijiet ta’ umdità relattiva għolja (‘il fuq minn 90 %). Dan jiżgura li tinżamm ir-razza tal-batterju speċifiku u li fuq il-ġobon frisk tiżviluppa l-kultura ħamra. Il-maturazzjoni tagħti lill-ġobon it-togħma kemxejn aċiduża, pjaċevolment aromatika u distintiva tiegħu. Aktar ma jkun twil iż-żmien tal-maturazzjoni, aktar ikunu qawwija r-riħa u t-togħma tal-ġobon. Il-karattru ewlieni tal-ġobon huwa derivat mid-degrazzjoni intensiva tal-proteini tiegħu, li jagħtuh il-konsistenza li titfarrak u jagħmluh iktar diġeribbli.

Il-“Győr-Moson-Sopron megyei Csemege sajt” għandu riħa u togħma intensa u aromatika permezz tal-flora tal-maturazzjoni unika tiegħu. Il-ġobon għandu lewn isfar jagħti fl-aħmar, il-wiċċ maqtugħ huwa poruż, u l-ġobon jitfarrak f’biċċiet fil-ħalq. Wara l-maturazzjoni għal 4-5 ġimgħat, it-togħma u r-riħa tiegħu jiżviluppaw ħjiel ta’ ammonijaka, u l-konsistenza ssir iktar ratba. Sabiex il-ġobon ikun jista’ jibqa’ jittiekel u jżomm il-proprjetajiet karatteristiċi tiegħu, dan irid jiġi maħżun f’temperatura ta’ 2-8 °C sa mit-3 ġimgħa.

Rabta kawżali bejn iż-żona ġeografika u l-kwalità jew il-karatteristiċi tal-prodott (għad-DPO) jew il-kwalità speċifika, ir-reputazzjoni jew il-karatteristiċi l-oħra tal-prodott (għall-IĠP)

L-applikazzjoni għar-reġistrazjoni tal-indikazzjoni ġeografika protetta, li hija relatata maż-żona ġeografika ddefinita fil-Kontea ta’ Győr-Moson-Sopron, hija bbażata fuq it-tradizzjoni, il-metodu ta’ produzzjoni uniku, il-ħiliet speċifiċi meħtieġa għall-produzzjoni, u r-reputazzjoni tal-ġobon.

Ir-reputazzjoni tal-ġobon hija bbażata fuq it-togħma, l-aroma, ir-riħa, il-konsistenza pjaċevoli ħafna li titfarrak u l-kwalità unikament uniformi tiegħu. Sal-lum, dan jiġi kkonsmat l-aktar minn esperti tal-ikel li jħobbu l-ġobon. Minħabba d-degradazzjoni intensa tal-proteini, dan huwa wieħed mit-tipi ta’ ġobon l-aktar diġeribbli.

Il-“Győr-Moson-Sopron megyei Csemege sajt” ilu rikonoxxut sew għal aktar minn seklu. Bejn l-1995 u l-2005, dan deher b’mod regolari u b’suċċess fl-ikbar fiera tal-ġobon Ungeriża, magħrufa fis-settur bħala l-Kompetizzjoni tal-Ġobon ta’ Csermajor. Il-ġobon rebaħ bosta premji matul dawn l-aħħar żewġ deċenji:

il-Kompetizzjoni Nazzjonali tal-Ġobon tal-1998, Csermajor: Ċertifikat tad-deheb

L-Ewwel Kompetizzjoni tal-Ġobon tal-Punent tat-Transdanubju tal-2001: L-aħjar ġobon maturat b’mod tradizzjonali tar-Reġjun tal-Punent tat-Transdanubju

il-Kompetizzjoni Nazzjonali tal-Ġobon tal-2005, Csermajor: Nomina speċjali mill-aġġudikanti

il-Kompetizzjoni Nazzjonali tal-Ġobon tal-2007, Csermajor: Ċertifikat tad-deheb

il-Kompetizzjoni Nazzjonali tal-Ġobon tal-2008, Csermajor: Ċertifikat tad-deheb

Fl-2011 il-“Győr-Moson-Sopron megyei Csemege sajt” ingħata d-dritt għall-użu tat-trade mark “HAGYOMÁNYOK-ÍZEK-RÉGIÓK” (HÍR) [Tradizzjonijiet-Togħmiet-Reġjuni]. Prodott jista’ jfittex protezzjoni bl-użu tat-trade mark HÍR (numru tar-reġistrazzjoni 172636) jekk il-produzzjoni tiegħu hija marbuta ma’ reġjun partikolari, il-metodu tal-produzzjoni tiegħu huwa tradizzjonali, mill-inqas wieħed mill-elementi tal-produzzjoni huwa bbażat fuq għarfien lokali, u r-reputazzjoni tiegħu tmur lura mill-inqas 50 sena. Is-sodisfazzjon tal-kriterji għall-użu tat-trade mark huwa evalwat minn Kumitat tal-Evalwazzjoni magħmul minn esperti maħtura mill-Ministru, fuq il-bażi tal-ispeċifikazzjoni mressqa u eżaminazzjoni organolettika.

Referenza għall-pubblikazzjoni tal-ispeċifikazzjoni tal-prodott

(it-tieni subparagrafu tal-Artikolu 6(1) ta’ dan ir-Regolament)

http://elelmiszerlanc.kormany.hu/download/e/33/c1000/17.pdf

fuq paġna 862 tad-dokument li l-link tiegħu tinsab hawn fuq.

---

(1)  ĠU L 343, 14.12.2012, p. 1.