“5)    Iċ-ċentru ta’ evalwazzjoni

Sa massimu ta’ tliet (3) darbiet in-numru stabbilit ta’ kandidati li jirnexxu se jiġu mistiedna għal din il-fażi. Jekk tissodisfa r-rekwiżiti tal-eliġibbiltà skont id-data fl-applikazzjoni online tiegħek u jekk għandek waħda mill- ogħla marki globali fis-selezzjoni fuq il-bażi tal-kwalifiki, se tiġi mistieden sabiex tagħmel ġurnata jew bosta ġranet f’ċentru ta’ evalwazzjoni (online jew personalment) bil- lingwa 2 tiegħek. Innota li t-test bil-miktub fil-qasam jista’ jiġi organizzat f’wieħed miċ-ċentri tat-testijiet akkreditati tal-EPSO jew mill-bogħod. Aktar dettalji u struzzjonijiet jiġu inklużi fl-ittra ta’ stedina tiegħek.

Jekk it-testijiet MCQ bil-kompjuter deskritti fil-punt 2 ma jkunux ġew organizzati minn qabel , tagħmilhom waqt il-fażi taċ-ċentru ta’ evalwazzjoni jew f’wieħed miċ-ċentri akkreditati tal-EPSO jew mill-bogħod. Dawn it-testijiet huma eliminatorji u l-marki miksuba ma jiżdidux mal-marki ta’ testijiet oħra li jsiru fiċ-ċentru ta’ evalwazzjoni fil-kalkolu tal-punteġġ totali tiegħek.

Sakemm ma tingħatax struzzjonijiet oħra, ikollok ittella’ kopji skennjati tad-dokumenti ta’ sostenn tiegħek fil-kont tal-EPSO tiegħek. Aktar dettalji u struzzjonijiet jiġu inklużi fl-ittra ta’ stedina tiegħek.

Fiċ-ċentru ta’ evalwazzjoni jiġu ttestjati tmien (8) kompetenzi ġenerali, kif ukoll il-kompetenzi relatati mal-qasam meħtieġa għall-kompetizzjoni, permezz ta’ erba’ (4) testijiet kif deskritt fil-matriċi li ġejjin:

Kull kompetenza ġenerali tiġi mmarkata minn 1 sa 10 punti. Ma jkun hemm l-ebda marka minima meħtieġa għal kull kompetenza. Madankollu trid tilħaq il-marka minima meħtieġa ta’ mill-inqas 40/80 b’kollox.