Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52020IR4756

Opinjoni tal-Kumitat Ewropew tar-Reġjuni — Il-kisba sal-2025 taż-Żona Ewropea tal-Edukazzjoni

COR 2020/04756

ĠU C 175, 7.5.2021, p. 6–9 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

7.5.2021   

MT

Il-Ġurnal Uffiċjali tal-Unjoni Ewropea

C 175/6

Opinjoni tal-Kumitat Ewropew tar-Reġjuni — Il-kisba sal-2025 taż-Żona Ewropea tal-Edukazzjoni

(2021/C 175/02)

Relatur:

Emil BOC (RO/PPE), Sindku ta’ Cluj-Napoca

Dokument ta’ referenza:

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar il-kisba sal-2025 taż-Żona Ewropea tal-Edukazzjoni

COM(2020) 625 final

RAKKOMANDAZZJONIJIET TA’ POLITIKA

IL-KUMITAT EWROPEW TAR-REĠJUNI

1.

 jiġbed l-attenzjoni għall-fatt li l-edukazzjoni hija essenzjali għall-iżvilupp armonjuż tal-awtoritajiet lokali u reġjonali, speċjalment fil-kuntest il-ġdid fejn din hija fattur strateġiku ewlieni fil-bini ta’ ekonomija bbażata fuq l-għarfien. L-edukazzjoni għandha wkoll impatt kruċjali fuq oqsma oħrajn ta’ interess għall-awtoritajiet lokali u reġjonali, bħall-eżodu jew il-kisba ta’ mħuħ, il-koeżjoni soċjali, l-implimentazzjoni ta’ strateġiji ta’ speċjalizzazzjoni intelliġenti, it-trasformazzjoni diġitali, l-innovazzjoni (teknoloġika u soċjali) il-komunitajiet ekoloġiċi, u l-kooperazzjoni bejn il-qasam akkademiku u setturi oħrajn. L-edukazzjoni hija fattur importanti fl-iżvilupp tar-reżiljenza tal-komunitajiet u tippermettilhom jindirizzaw b’mod aktar faċli l-kriżijiet, sew jekk ekonomiċi jew xort’oħra, kif ukoll li jadattaw għall-bżonnijiet u ċ-ċirkustanzi differenti. Fil-livell lokali u reġjonali, il-promozzjoni tal-edukazzjoni u tat-taħriġ għandha titqies bħala investiment kbir fil-futur tagħna;

2.

 iqis li r-rwol tal-awtoritajiet lokali u reġjonali fis-suċċess tal-proġett taż-Żona Ewropea tal-Edukazzjoni huwa essenzjali minħabba r-rabtiet diretti u sostanzjali tagħhom mal-komunitajiet li fihom għandhom jiġu implimentati l-politiki tal-edukazzjoni definiti fil-livell Ewropew u li fuqhom imbagħad dawn il-politiki jkollhom impatt dirett. L-awtoritajiet lokali u reġjonali huma responsabbli għall-implimentazzjoni ta’ 70 % tal-leġiżlazzjoni tal-UE. Fl-aħħar mill-aħħar, l-edukazzjoni sseħħ fil-livell lokali u, minn dan il-lat, f’konformità mal-prinċipju tas-sussidjarjetà attiva, il-livelli lokali u reġjonali għandhom jiġu inklużi fil-pjan, bl-istess mod tal-livelli nazzjonali u Ewropej, u jipparteċipaw mill-bidu nett fil-proċessi tat-teħid ta’ deċiżjonijiet. Naturalment, għandha tiġi stabbilita relazzjoni strutturata u kontinwa bejn il-Kummissjoni u l-KtR f’dan il-qasam ewlieni;

3.

 jirrimarka li l-objettivi strateġiċi taż-Żona Ewropea tal-Edukazzjoni jeħtieġ li jitqabblu ma’ riżorsi finanzjarji ċari u identifikabbli disponibbli għall-awtoritajiet lokali u reġjonali;

4.

 iqis li l-kisba tal-Għanijiet ta’ Żvilupp Sostenibbli, il-ħidma favur is-sostenibbiltà ambjentali u t-tisħiħ tal-identitajiet Ewropej, nazzjonali u reġjonali għandhom ikunu l-għanijiet ewlenin taż-Żona Ewropea tal-Edukazzjoni;

5.

 jenfasizza l-ħtieġa li jitfassal pjan direzzjonali, kif ukoll stadji importanti u indikaturi annwali, sabiex ikun jista’ jiġi vvalutat il-progress imwettaq fl-implimentazzjoni tal-objettivi taż-Żona Ewropea tal-Edukazzjoni fil-livelli Ewropew, nazzjonali, u, fejn meħtieġ, reġjonali u lokali. Huwa meħtieġ li tiġi appoġġjata l-valutazzjoni tas-sitwazzjoni attwali lokali u reġjonali u li l-għanijiet, l-objettivi u s-sistema ta’ appoġġ huma definiti kif xieraq;

6.

 jiġbed l-attenzjoni għall-fatt li hemm bżonn li jitwettaq dibattitu serju fil-livell Ewropew dwar ir-responsabbiltajiet tal-awtoritajiet lokali u reġjonali fil-ħolqien taż-Żona Ewropea tal-Edukazzjoni, f’kuntest fejn il-kompetenzi tal-awtoritajiet lokali u reġjonali fil-qasam tal-edukazzjoni jvarjaw b’mod konsiderevoli minn Stat Membru għal ieħor. Huwa essenzjali li jkun hemm rabta bejn dawn ir-responsabbiltajiet u l-istrateġiji u l-azzjonijiet tal-gvernijiet nazzjonali. Kull belt, muniċipalità u reġjun għandhom jinkludu objettivi edukattivi ewlenin marbuta mal-objettivi nazzjonali u Ewropej fl-istrateġiji tagħhom;

7.

 jinnota li filwaqt li l-kwistjonijiet u l-isfidi tal-edukazzjoni huma komuni, l-għodod u r-riżorsi disponibbli għall-awtoritajiet lokali u reġjonali jvarjaw. Barra minn hekk, mhux l-awtoritajiet lokali u reġjonali kollha għandhom l-istess kapaċità amministrattiva, u dan jinfluwenza direttament il-possibbiltajiet tagħhom ta’ suċċess fit-tfassil u l-implimentazzjoni ta’ strateġiji u politiki differenti fil-qasam tal-edukazzjoni. Huwa essenzjali li jiġu identifikati l-ħtiġijiet reġjonali tal-edukazzjoni u jiġu promossi politiki edukattivi speċifiċi, li jqisu l-kuntest lokali. F’dan ir-rigward, huwa importanti li jiġu żviluppati għodod biex l-awtoritajiet lokali u reġjonali jkunu jistgħu jitgħallmu mill-prattiki tajba ta’ komunitajiet oħra fl-Unjoni. L-iżvilupp ta’ sistema pan-Ewropea li tidentifika r-riżorsi disponibbli f’kull reġjun biex tippermetti l-użu flessibbli u effiċjenti se jikkontribwixxi għall-ħolqien ta’ Żona Ewropea tal-Edukazzjoni. Il-kooperazzjoni hija essenzjali biex jiġu pprovduti servizzi edukattivi u jiġu evitati d-duplikazzjonijiet. Il-Kummissjoni għandha tappoġġja dan l-approċċ u tiżgura li kwalunkwe ostakolu għall-kooperazzjoni jitneħħa billi jiġi żviluppat u promoss b’mod attiv qafas ta’ kooperazzjoni flessibbli, aċċessibbli u faċli għall-utent;

8.

 iqis li huwa importanti li jitnaqqsu d-differenzi fl-edukazzjoni li jeżistu bejn iż-żoni remoti, rurali u urbani, bejn id-disparitajiet reġjonali, bejn il-livelli differenti ta’ tagħlim (edukazzjoni primarja, sekondarja u għolja) u bejn l-istituzzjonijiet edukattivi differenti. Dawn id-differenzi jikkontribwixxu biex jinżammu l-inugwaljanzi fl-aċċess għall-edukazzjoni it-tkomplija tal-istudji u r-riżultati fit-tul, b’mod partikolari l-integrazzjoni fis-suq tax-xogħol u l-possibbiltà li jinstab impjieg imħallas tajjeb;

9.

 jinnota li għandna bżonn nadottaw approċċ koerenti għall-programmi u finanzjamenti differenti fil-qasam tal-edukazzjoni u t-taħriġ offrut mill-Unjoni Ewropea. Apparti l-Erasmus+, approċċ ġdid jeħtieġ li jintegra strumenti addizzjonali bħall-Orizzont Ewropa u l-Fondi Strutturali. Dan l-approċċ irid ikun inklużiv u l-istrumenti kollha tal-UE jridu jappoġġjaw lir-reġjuni u lill-komunitajiet lokali fi proċess flessibbli u bla xkiel ta’ trasformazzjoni, adattat għad-diversità eżistenti, filwaqt li jiġu żgurati s-sinerġiji u jiġu evitati d-duplikazzjonijiet fl-edukazzjoni u fit-tagħlim (kemm għall-istudenti kif ukoll għall-għalliema);

10.

 jenfasizza li huwa fundamentali li jiġi rrispettat il-prinċipju li ħadd ma jitħalla jibqa’ lura. Edukazzjoni ta’ kwalità baxxa ħafna drabi hija marbuta mal-faqar u n-nuqqas ta’ riżorsi individwali. Billi nkomplu ma nappoġġjawx l-edukazzjoni b’mod adegwat, qed noħolqu ċirku vizzjuż fejn il-prestazzjoni u l-ħiliet insuffiċjenti jissarrfu f’nuqqas ta’ tkabbir ekonomiku lokali u riżorsi saħansitra aktar insuffiċjenti. Huwa essenzjali li l-istrateġija/il-programmi operattivi jqisu wkoll dawk iċ-ċittadini li m’għandhomx riżorsi u persuni żvantaġġati oħra, li għalihom l-edukazzjoni tirrappreżenta waħda mill-ftit opportunitajiet biex joħorġu mill-faqar;

11.

 jenfasizza wkoll li edukazzjoni ta’ kwalità baxxa hija marbuta wkoll ma’ ostakli relatati mal-aċċess għall-edukazzjoni minħabba raġunijiet differenti ta’ diskriminazzjoni, fosthom abbażi tal-ġeneru, razza jew oriġini etnika, reliġjon jew twemmin, diżabilità, jew orjentazzjoni sesswali. Għaldaqstant huwa essenzjali li tiġi żgurata edukazzjoni inklużiva u ġusta mingħajr preġudizzju għal kulħadd u li jittieħdu miżuri adegwati biex jiġu miġġielda r-razziżmu u d-diskriminazzjoni fl-istabbilimenti edukattivi;

12.

 iqis li wara l-kriżi tal-COVID-19, għandhom jinsiltu tagħlimiet importanti fil-qasam tal-edukazzjoni fil-livell tal-komunitajiet lokali u reġjonali. Il-kriżi kellha impatt profond fuq l-edukazzjoni fil-komunitajiet lokali u reġjonali, u obbligathom jindirizzaw l-isfidi ewlenin tal-ġestjoni tal-kriżijiet, ir-reżiljenza ekonomika u soċjali, l-użu tat-teknoloġija fl-edukazzjoni, l-adattament tar-riżorsi umani għal realtajiet ġodda, il-ħtieġa ta’ kooperazzjoni u l-ħtieġa li tiġi pprovduta edukazzjoni inklużiva u ta’ kwalità. Fil-livell tal-proċess edukattiv, l-isfidi kienu dawn li ġejjin: it-tranżizzjoni u t-trasformazzjoni diġitali, metodi pedagoġiċi ġodda, il-ħolqien ta’ klima ta’ sigurtà u ta’ benesseri għall-istudenti u l-għalliema, iż-żamma u t-trasformazzjoni tal-mobilità (tal-istudenti u tal-għalliema). Huwa importanti li jiġu identifikati l-isfidi li qed tiffaċċja s-sistema, kif ukoll il-bidliet li jeħtieġ li jsiru biex is-sistemi edukattivi jkunu reżiljenti għal sitwazzjonijiet simili fil-futur. Ir-reżiljenza tas-sistemi edukattivi trid tkun prijorità fil-kooperazzjoni fil-qasam tal-edukazzjoni u t-taħriġ, inkluż permezz tal-innovazzjoni fl-edukazzjoni u tat-teknoloġiji l-ġodda (eż. l-intelliġenza artifiċjali, is-supercomputers/l-informatika ta’ prestazzjoni għolja u ċ-ċibersigurtà). Huwa importanti, meta wieħed iqis ukoll id-differenzi u l-isfidi soċjali, etniċi u reġjonali, li jiġi żgurat li l-komunitajiet kollha jkollhom aċċess ugwali għall-edukazzjoni diġitali, inkluż it-tagħmir, ir-riżorsi u l-kontenut edukattiv diġitali;

13.

 jenfasizza li l-promozzjoni tal-professjoni tal-għalliema (inkluż mil-lat finanzjarju) u, f’dan ir-rigward, it-taħriġ kontinwu ta’ għalliema li huma motivati u kompetenti, huma fatturi essenzjali biex tinħoloq iż-Żona Ewropea tal-Edukazzjoni. Mingħajr fehim sħiħ tar-rwol fundamentali tal-għalliema, huwa impossibbli li fil-qasam tal-edukazzjoni tinbena strateġija li tista’ tirnexxi. L-investiment f’oqsma bħat-taħriġ tal-għalliema, il-proċeduri effettivi għall-għażla, ir-reklutaġġ u l-evalwazzjoni tal-għalliema, jew sabiex il-professjoni tat-tagħlim tkun iktar attraenti, speċjalment fiż-żoni rurali, huwa essenzjali biex jinżammu l-kwalità u l-kompetittività tas-sistemi edukattivi tal-Istati Membri u biex tissaħħaħ il-pożizzjoni tal-UE bħala l-aqwa mexxejja fix-xena internazzjonali;

14.

 jenfasizza li qed isir dejjem aktar importanti li jinbnew sħubijiet strateġiċi bejn l-awtoritajiet lokali u reġjonali u l-universitajiet fit-territorji tagħhom (li huma atturi ċentrali fil-“qasam ta’ għarfien” li jirrigwarda l-edukazzjoni, ir-riċerka, l-innovazzjoni u s-servizzi għas-soċjetà). Ir-rwol tal-universitajiet huwa essenzjali fl-iżvilupp ta’ komunitajiet lokali u reġjonali reżiljenti. L-edukazzjoni għolja tista’ tistimula kemm il-kisba ta’ mħuħ kif ukoll iċ-ċirkolazzjoni ta’ mħuħ u tgħin lill-Ewropa tattira riżorsi umani internazzjonali ta’ kwalità. Fil-qasam tal-edukazzjoni universitarja, ir-riformi proposti fil-livell tal-UE huma massivi, inklużi l-Inizjattiva tal-Universitajiet Ewropej, il-mobilità tal-istudenti, il-Kard Ewropea tal-Istudenti, il-monitoraġġ tal-gradwati, u r-rikonoxximent reċiproku awtomatiku tad-diplomi tal-edukazzjoni għolja. L-awtoritajiet lokali u reġjonali għandhom ikunu jistgħu jiżviluppaw sħubijiet strateġiċi mal-universitajiet u jikkontribwixxu għal dan il-proċess ta’ trasformazzjoni;

15.

 jenfasizza r-rabtiet mill-qrib bejn iż-Żona Ewropea tal-Edukazzjoni u ż-Żona Ewropea tar-Riċerka, u jappella għal “approċċ ġdid għal Żona Ewropea tal-Edukazzjoni u r-Riċerka, u jiġbed l-attenzjoni għall-ħtieġa ta’ approċċ trasversali għal dawn il-kwistjonijiet, li huma marbuta mill-qrib mal-politiki reġjonali” (1);

16.

 jinnota l-importanza li d-diplomi tal-edukazzjoni għolja, tal-edukazzjoni sekondarja għolja u ċ-ċertifikati ta’ taħriġ jiġu rikonoxxuti b’mod reċiproku u awtomatiku mill-Istati Membri. Dan ir-rikonoxximent reċiproku awtomatiku huwa meħtieġ jekk irridu nimxu ’l quddiem u, preferibbilment, għandu jkun ibbażat fuq l-eżiti mistennija tat-tagħlim, skont il-Qafas Ewropew tal-Kwalifiki;

17.

 jinnota l-importanza li jitfasslu kurrikuli flessibbli, billi jiġu enfasizzati l-ħiliet u jinħolqu riżorsi edukattivi ħielsa adatti għall-proċess ta’ tagħlim appoġġjat mit-teknoloġija. Iqis ukoll li kurrikuli flessibbli jistgħu jrawmu l-integrazzjoni tal-ispeċifiċitajiet lokali u reġjonali billi jindirizzaw il-kwistjonijiet u jiżviluppaw il-ħiliet skont ir-realtajiet u l-ħtiġijiet/l-isfidi ta’ kull komunità u reġjun;

18.

 iqis li huwa essenzjali li jiġu identifikati u promossi l-eżempji ta’ implimentazzjoni b’suċċess tal-objettivi taż-Żona Ewropea tal-Edukazzjoni fil-livell lokali u reġjonali. L-analiżi u t-tixrid ta’ dawn l-aħjar prattiki jistgħu jsaħħu l-valur miżjud tal-azzjoni tal-awtoritajiet lokali u reġjonali fl-Istati Membri;

19.

 iqis li hemm bżonn li jinbidlu l-prijoritajiet għall-iżvilupp tal-infrastruttura edukattiva fil-livell lokali u jirrimarka li l-awtoritajiet lokali u reġjonali ser jappoġġjaw it-tranżizzjoni lejn infrastrutturi edukattivi moderni, funzjonali, diġitali u ekoloġiċi fil-komunitajiet tagħhom. Għandha ssir enfasi fuq it-tbegħid minn strutturi edukattivi riġidi lejn mudelli flessibbli biex jingħelbu l-ostakli formali, kemm bejn l-istituzzjonijiet kif ukoll bejn il-livelli tal-edukazzjoni;

20.

 josserva li l-edukazzjoni hija fattur ewlieni fit-trasformazzjoni tal-mudell ekonomiku fil-livell lokali u reġjonali (jiġifieri tranżizzjoni lejn ekonomija ekoloġika bbażata fuq l-għarfien u t-trasformazzjoni diġitali). It-tranżizzjoni ekoloġika u diġitali doppja għandha tiġi integrata fil-proċessi edukattivi u l-objettivi trasversali kollha fil-qasam tal-edukazzjoni u t-taħriġ;

21.

 jilqa’ t-tnedija tal-Koalizzjoni Edukazzjoni għall-Klima biex tappoġġja l-implimentazzjoni tal-Patt Klimatiku Ewropew u jesprimi r-rieda tiegħu li jkun involut mill-qrib f’din l-inizjattiva ewlenija taż-Żona Ewropea tal-Edukazzjoni sabiex tinkiseb tranżizzjoni soċjetali ġusta, ekoloġika u diġitali għal kulħadd;

22.

 jitlob lill-Kummissjoni Ewropea tinkludi fil-Koalizzjoni Edukazzjoni għall-Klima r-reġjuni u l-komunitajiet lokali u inizjattivi bħall-Patt Globali tas-Sindki għall-Klima u l-Enerġija sabiex tkun żgurata rabta bejn l-inizjattivi minn isfel għal fuq u l-azzjoni fil-livell tal-UE, filwaqt li tappoġġja wegħdiet u azzjonijiet konkreti għal imġiba sostenibbli fl-UE kollha;

23.

 iqis li għandha tingħata aktar attenzjoni lill-ħiliet tal-ħajja u l-ħiliet trasversali sabiex tiżdied il-kapaċità taċ-ċittadini Ewropej li jadattaw għal suq tax-xogħol dinamiku u li qed jinbidel kontinwament;

24.

 jenfasizza li hemm bżonn li tittejjeb il-kwalità tal-edukazzjoni fil-livell lokali u reġjonali għax hija fattur li jista’ jillimita b’mod sinifikanti l-fenomenu tal-eżodu ta’ mħuħ, u jiġbed l-attenzjoni għall-importanza tal-appoġġ mogħti mill-Kummissjoni u mill-Unjoni Ewropea biex jiġi miġġieled l-eżodu ta’ mħuħ u biex dan jinbidel f’ċirkolazzjoni tal-imħuħ;

25.

 iqis essenzjali li l-awtoritajiet lokali u reġjonali jappoġġjaw bl-aħjar mod l-edukazzjoni u l-inklużjoni diġitali għall-istudenti, kif ukoll għaċ-ċittadini u l-impjegati taċ-ċivil (b’rabta mal-Pjan ta’ Azzjoni għall-Edukazzjoni Diġitali l-ġdid promoss mill-Kummissjoni);

26.

 josserva li huwa importanti li tittejjeb il-kwalità tal-proċessi edukattivi f’oqsma bħall-iżvilupp tal-ħiliet bażiċi, l-interkulturaliżmu, it-tagħlim tal-lingwi, id-diversità kulturali u lingwistika, kif ukoll biex jiġi żgurat li t-tfal żvantaġġati jiksbu ħiliet li tfal oħra jiksbu d-dar;

27.

 iqis li l-awtoritajiet lokali u reġjonali jistgħu jaħdmu ma’ stabbilimenti ta’ edukazzjoni u taħriġ formali u mhux formali biex jipprovdu programmi ta’ tagħlim tul il-ħajja tant meħtieġa għat-titjib tal-ħiliet u t-taħriġ mill-ġdid sabiex in-nies ikunu jistgħu jibqgħu jew jidħlu f’suq tax-xogħol, kif ukoll f’oqsma oħra tal-ħajja li qed jinbidlu malajr fit-tranżizzjoni ekoloġika u dik diġitali. Tali programmi jistgħu wkoll jiġu mfassla għall-ħtiġijiet ta’ gruppi speċifiċi, bħall-anzjani, sabiex itejbu l-kwalità tal-ħajja u l-livell ġenerali ta’ sodisfazzjon u integrazzjoni ta’ dawn il-gruppi. L-universitajiet jistgħu/għandhom ukoll isiru msieħba ewlenin tal-awtoritajiet lokali u reġjonali fl-iżvilupp u l-implimentazzjoni ta’ programmi innovattivi għall-atturi lokali, skont l-ispeċifiċitajiet lokali u reġjonali;

28.

 iħeġġeġ lill-awtoritajiet lokali u reġjonali jappoġġjaw l-universitajiet, iċ-ċentri ta’ taħriġ vokazzjonali u organizzazzjonijiet oħrajn li jimplimentaw il-programmi ta’ Erasmus+ biex ma jħeġġux biss il-mobilità tal-istudenti, iżda wkoll il-mobilità tal-imprendituri żgħażagħ u l-voluntiera mill-Istati Membri;

29.

 jinnota kemm huwa importanti li, għat-tfal kollha li jattendu l-iskola, l-awtoritajiet lokali u reġjonali jippromovu ambjenti sikuri, ħielsa mill-vjolenza, il-fastidju, il-bullying fl-iskejjel, il-lingwa dannuża, id-diżinformazzjoni u l-forom kollha ta’ diskriminazzjoni;

30.

 jenfasizza l-importanza ta’ azzjoni mill-awtoritajiet lokali u reġjonali biex l-edukazzjoni ssir aktar inklużiva fil-livelli kollha għall-persuni b’diżabilità jew għall-gruppi vulnerabbli;

31.

 jinnota l-importanza li l-awtoritajiet lokali u reġjonali jippromovu l-evoluzzjoni (permezz tal-istabbilimenti tal-edukazzjoni) tal-attitudnijiet u l-kompetenzi taċ-ċittadini fit-tranżizzjoni ekoloġika u dik diġitali, kif ukoll il-mobilità tal-għalliema u l-istudenti fi sħubijiet nazzjonali u internazzjonali ma’ komunitajiet oħra. Mobilità bħal din tista’ tkun il-bażi ta’ trasferiment ta’ għarfien għat-tfassil u l-implimentazzjoni ta’ strateġiji edukattivi effettivi. L-istudju tal-OECD dwar l-edukazzjoni u t-tagħlim (TALIS, 2018) juri li għadd kbir ta’ għalliema jesprimu l-ħtieġa li jiżviluppaw ħiliet speċifiċi biex jgħallmu f’ambjenti li jinvolvu studenti bi bżonnijiet speċjali, jużaw teknoloġiji diġitali u jgħallmu fi klassijiet multilingwi u multikulturali;

32.

 iħeġġeġ lill-komunitajiet lokali u reġjonali (permezz ta’ sħubijiet bejn is-setturi pubbliċi, privati u mingħajr skop ta’ qligħ) biex itejbu l-kapaċitajiet tal-universitajiet fir-rigward ta’ programmi edukattivi speċjalizzati f’ħiliet diġitali avvanzati, pereżempju f’teknoloġiji avvanzati (l-intelliġenza artifiċjali, iċ-ċibersigurtà u l-computing ta’ prestazzjoni għolja);

33.

 josserva li l-awtoritajiet lokali u reġjonali fl-Istati Membri għandhom iħeġġu l-ħolqien ta’ ċentri edukattivi supranazzjonali fil-bliet universitarji ewlenin fl-UE, sabiex jippermettu t-tfassil ta’ prattiki tajbin u politiki pubbliċi fir-rigward tal-mobilità tal-istudenti u tal-għalliema, kif ukoll tat-trasformazzjoni diġitali tal-proċessi edukattivi.

Brussell, id-19 ta’ Marzu 2021.

Apostolos TZITZIKOSTAS

Il-President tal-Kumitat Ewropew tar-Reġjuni

(1)  Opinjoni tal-KtR dwar Żona Ewropea tar-Riċerka (ŻER) ġdida għar-riċerka u l-innovazzjoni (ĠU C 106, 26.3.2021, p. 31).

Top