EUR-Lex Access to European Union law
This document is an excerpt from the EUR-Lex website
Document 52013DC0085
REPORT FROM THE COMMISSION TO THE EUROPEAN PARLIAMENT AND THE COUNCIL on Member States' efforts during 2011 to achieve a sustainable balance between fishing capacity and fishing opportunities
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-isforzi tal-Istati Membri matul l-2011 biex jintlaħaq bilanċ sostenibbli bejn il-kapaċità tas-sajd u l-opportunitajiet tas-sajd
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-isforzi tal-Istati Membri matul l-2011 biex jintlaħaq bilanċ sostenibbli bejn il-kapaċità tas-sajd u l-opportunitajiet tas-sajd
/* COM/2013/085 final */
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-isforzi tal-Istati Membri matul l-2011 biex jintlaħaq bilanċ sostenibbli bejn il-kapaċità tas-sajd u l-opportunitajiet tas-sajd /* COM/2013/085 final */
RAPPORT TAL-KUMMISSJONI LILL-PARLAMENT
EWROPEW U LILL-KUNSILL dwar l-isforzi tal-Istati Membri matul l-2011
biex jintlaħaq bilanċ sostenibbli bejn il-kapaċità tas-sajd u
l-opportunitajiet tas-sajd 1. INTRODUZZJONI U RIŻULTATI EWLENIN L-Istati Membri huma responsabbli għal
bilanċ stabbli u kontinwu bejn il-flotot tagħhom u l-opportunitajiet
tas-sajd allokati lilhom[1].
Il-ġestjoni sostenibbli tal-industrija tas-sajd timplika flotta
ekonomikament vijabbli li tisfrutta r-riżorsi naturali taħt
il-livelli tar-rendiment massimu sostenibbli (MSY). Dan huwa wieħed
mill-prinċipji ewlenin tar-riforma tal-Politika Komuni tas-Sajd proposta
mill-Kummissjoni Ewropea. Dan ir-rapport jipprovdi ħarsa
ġenerali lejn il-flotot tas-sajd tal-UE. L-informazzjoni użata hija
dik mibgħuta mill-Istati Membri fir-rapporti annwali tagħhom tal-2011[2], fir-Reġistru tal-Flotta
tal-UE[3],
jew bħala dejta miġbura skont il-Qafas tal-Ġbir tad-Dejta (DCF –
'Data Collection Framework')[4],
ara l-Anness 1. Il-Kumitat Xjentifiku, Tekniku u Ekonomiku għas-Sajd
(STECF) għamel valutazzjoni ta’ din id-dejta[5]. Is-sejba prinċipali hija li huwa
meħtieġ titjib sinifikanti fis-snin li ġejjin fil-mod kif
l-Istati Membri jevalwaw il-bilanċ u jimmaniġġjaw il-flotot
tagħhom. Hekk kif il-ġestjoni tas-sajd tiżviluppa sabiex
tinkludi l-objettiv tal-MSY, ma għadux aktar sodisfaċenti li
wieħed jibbaża fuq limiti massimi espressi f’parametri statiċi.
Huma meħtieġa indikaturi tal-vijabbiltà ekonomika u ta’ sostenibbiltà
usa’ għall-ġestjoni tal-flotot tal-UE biex tintlaħaq flotta
ekonomikament vijabbli li tisfrutta riżorsa bil-potenzjal bijoloġiku
kollu tagħha. It-titjib fil-valutazzjoni tal-istokk huwa kruċjali,
kif ukoll fil-ġbir u d-disponibilità, l-analiżi u l-metodoloġija
tad-dejta. 2. LIMITI MASSIMI TAL-KAPAĊITÀ … Kull Stat Membru għandu jiżgura li
l-kapaċità tas-sajd tiegħu f’tunnellaġġ (f’TG) u
f'saħħa (f’kW) tkun dejjem ugwali jew inqas mil-livelli nominali kif
stabbilit fir-Regolament (UE) Nru 1013/2010[6].
Annotazzjonijiet li hemm bħalissa fir-reġistru tal-flotta jindikaw li
l-Istati Membri kollha minbarra r-Rumanija kkonformaw ma’ dawn il-livelli
nominali (ara l-Anness 2). Il-flotta tal-Unjoni kienet 14.1 %
taħt il-limiti massimi tat-TG u 9.9 % taħt il-limiti massimi
tal-kW, b’dawn il-marġini jvarjaw minn 2 % sa 62 %[7]. Fl-2011, l-għadd ta’
bastimenti naqas bi 2 %, filwaqt li t-tunnellaġġ u
s-saħħa naqsu bi 3.7 % u bi 3.1 % rispettivament.
It-tnaqqis kemm fit-tunnellaġġ kif ukoll fis-saħħa kien
simili fost l-Istati Membri, bi ftit varjazzjonijiet (ara l-Anness 3). Biex tkun żgurata l-preċiżjoni
tal-kejl fir-reġistru tal-flotta, l-Istati Membri huma obbligati
jiċċertifikaw magni ġodda b’mod sistematiku, u magni sostituti u
mmodifikati teknikament ta’ aktar minn 120 kW għall-bastimenti
soġġetti għal reġim tal-isforz tas-sajd minn
Jannar 2012 u għall-bastimenti kollha minn Jannar 2013. L-Istati
Membri għandhom iwettqu wkoll verifika tad-dejta fuq il-bażi
tal-pjanijiet għat-teħid ta’ kampjuni. Meta l-informazzjoni tindika
li s-saħħa tal-magna hija akbar mis-saħħa ddikjarata fuq
il-liċenzja tas-sajd tal-bastiment, huma jridu jwettqu verifiki
fiżiċi. Għadd ta’ Stati Membri għadhom ma
ssodisfawx id-dati ta’ skadenza għall-kejl u l-monitoraġġ. Xi
Stati Membri xejn m’hu qed jikkonformaw ma’ dawn l-obbligi
tal-monitoraġġ. Ftit Stati Membri biss adottaw il-pjanijiet
għat-teħid ta’ kampjuni meħtieġa għall-verifika
tad-dejta. Mill-aħħar ta’ Novembru 2012, ħdax-il Stat
Membru adottaw pjan għat-teħid ta’ kampjuni għall-verifika
tas-saħħa tal-magna, filwaqt li disa’ Stati Membri ħabbru l-adozzjoni
fil-futur qarib. Żewġ Stati Membri għadhom m’għamlux dan. Il-Kummissjoni tagħti importanza kbira
lir-rispett tar-Regolament tal-Kontroll. Dan huwa essenzjali sabiex jiġu
żgurati kundizzjonijiet ugwali għal kulħadd fis-sajd fl-UE. Fl-2011, il-Qorti Ewropea tal-Awdituri
ppubblikat Rapport Speċjali dwar il-ġestjoni tal-kapaċità
tal-flotta fl-UE. Id-definizzjonijiet eżistenti tal-kapaċità ma
tqisux bħala indikaturi affidabbli għall-kapaċità tal-bastimenti
li jaqbdu l-ħut[8].
Il-Kummissjoni hija konxja tal-inadegwatezzi tal-parametri bħat-TG u l-kW
biex jiġi evalwat il-progress tekniku, flimkien mad-diffikultajiet
prattiċi biex titkejjel is-saħħa tal-magna. Id-dekummissjonar kien l-aktar għodda
amministrattiva użata għat-tnaqqis tal-kapaċità. Il-Kummissjoni
tistma li fil-perjodu 2000-2015 se jintużaw madwar
EUR 1.3 biljun mill-fondi tal-UE għad-dekummissjonar, ara
l-Anness 4. Fl-analiżi tal-għajnuna
għad-dekummissjonar, il-Qorti Ewropea tal-Awdituri kkonkludiet li l-iskemi
tad-dekummissjonar li użaw il-fondi pubbliċi ma kinux immirati
tajjeb, u kienu neqsin minn kriterji ċari ta' eliġibbiltà u
għażla[9].
Il-Qorti kkonkludiet li l-iskrappjar tal-bastimenti tas-sajd ma kellux impatt
jew kellu ftit impatt fuq l-istokkijiet tal-ħut fil-mira. 3. ...U L-INDIKATURI TAL-KAPAĊITÀ Id-deskrizzjoni tal-kapaċità tal-flotot
f’termini tas-saħħa tal-magna u t-tunnellaġġ uriet
il-limitazzjonijiet tagħha maż-żmien. Iż-żamma ta’
dawn il-parametri fi ħdan il-limiti massimi mhijiex, fiha nnifisha,
evidenza li l-flotot tas-sajd huma f’bilanċ mal-istat tar-riżorsi li
jiddependu fuqhom. Pjuttost, il-valutazzjoni
tal-iżbilanċi teħtieġ analiżi tal-prestazzjoni
tal-flotot f’termini tal-istat tar-riżorsi li jibbażaw fuqhom,
f’termini ekonomiċi, u fir-rigward tal-utilizzazzjoni tal-bastimenti. Din
l-analiżi tidher li hija nieqsa, kollha kemm hi jew parti minnha,
f’għadd ta’ rapporti dwar il-flotot tal-Istati Membri. Il-flotta tas-sajd tisfrutta stokkijiet aktar
minn dak li huwa sostenibbli? Il-bastimenti fil-flotta bħala medja
jaqilgħu biżżejjed biex tal-inqas ikopru l-ispejjeż
tagħhom fuq perjodu ta’ żmien qasir? Il-profittabiltà tal-bastiment
se tkun biżżejjed għas-sostituzzjoni tal-bastimenti u tal-magni
meta jkun hemm bżonn? Il-bastimenti qed jintużaw kompletament jew
ħafna minnhom huma ta’ spiss weqfin? Dawn l-indikaturi jistgħu
jiżvelaw żbilanċ fil-livell tal-flotta. Dan ir-rapport jiġbor fil-qosor l-isforzi
li l-Istati Membri qed jagħmlu biex jindirizzaw il-problemi u janalizza
dak li nafu llum lil hinn minn dak li jirrapportaw l-Istati Membri. Flotta li qed topera b’mod sostenibbli u li
hija ekonomikament vijabbli: ·
tisfrutta l-istokkijiet b’mod sostenibbli fi
żmien qasir u f’perspettiva li żżomm l-isfruttar taħt
il-livell tar-rendiment massimu sostenibbli, ·
hija profittabbli kemm f’perspettivi ta’ żmien
qasir kif ukoll ·
f'perspettivi ta' żmien twil; u ·
hija utilizzata għal kollox, filwaqt li
titqies in-natura staġjonali ta’ ħafna industriji tas-sajd f'liema
perjodu l-bastimenti normalment suppost jaħdmu b’mod attiv Il-Kummissjoni talbet lill-STECF biex
janalizza l-flotot tal-UE billi juża indikaturi li jikkorrespondu
mal-kwistjonijiet ta’ hawn fuq. S’issa, u għal raġunijiet ta’
ħin u riżorsi, l-STECF indirizza biss lill-aktar 92 flotta
importanti fl-14-il Stat Membru bl-akbar industriji tas-sajd, iżda
dawn ikopru 72 % tad-dħul tal-UE mill-ħatt l-art, u
għalhekk huma indikattivi tal-aktar attivitajiet Ewropej importanti
tas-sajd. L-STECF uża l-valuri indikaturi kkalkulati mir-rapporti
tal-Istati Membri, id-dejta tad-DCF, u l-valutazzjonijiet tal-istokkijiet
tal-ħut kif xieraq. L-indikaturi użati huma elenkati hawn
taħt (għal deskrizzjoni sħiħa, ara l-Anness 5). Flotta dipendenti fuq stokkijiet mistada ’l
fuq mil-livelli tal-MSY tfisser li bħala medja,
flotta kienet qed tistad ’il fuq mil-livelli sostenibbli f’perspettiva fit-tul. Fid-dawl tal-miri tar-riformi tal-PKS,
iż-żamma taħt ir-rati tal-isfruttar tal-MSY intużat
bħala standard. Punt ta' ekwilibriju tfisser li l-flotta kienet qed taqla’ biżżejjed biex tkopri
n-nefqa tagħha fuq perjodu ta’ żmien qasir. Livell baxx ta'
prestazzjoni ekonomika tfisser li
fuq perjodu ta’ żmien twil il-flotta ma kinitx qed taqla’
biżżejjed biex tissostitwixxi l-oġġetti kapitali kbar
(bastimenti, magni) meta dawn ma jkunux għadhom tajbin għall-użu minħabba ż-żmien. Redditi
negattivi fuq l-assi fissi u tanġibbli jistgħu jkunu indikazzjoni ta’
kapitalizzazzjoni ekonomika eċċessiva jekk osservati konsistentement
fuq perjodu ta’ żmien twil. Mhux utilizzati biżżejjed tfisser li l-bastimenti kienu jistadu, iżda kienu qed
jagħmlu dan b’70 % jew inqas meta kkumparat mal-ħin li
setgħu jistadu, filwaqt li titqies in-natura staġjonali
tal-industriji tas-sajd. Bastimenti mhux attivi tirreferi għal bastimenti li fl-ebda ħin matul is-sena ma
sar sajd bihom. L-indikaturi huma bbażati fuq medji
għal kull segment ta’ flotta vvalutat. Pereżempju, il-prestazzjoni
ekonomika individwali ta’ kull bastiment f’segment tvarja; il-bastimenti se
jkunu jrendu aħjar jew agħar mill-valuri medji. 4. Il-kapaċità tal-flotta skont
l-Istati Membri Din il-ħarsa ġenerali lejn
is-sitwazzjoni tal-flotta skont l-Istat Membru hija bbażata fuq
ir-rapporti tal-Istati Membri u s-sejbiet tal-analiżi tal-STECF
għall-perjodu 2008-2011, fejn ikunu disponibbli. Il-flotot fil-Belġju naqsu
b’mod sostanzjali mill-2003, permezz ta’ tnaqqis tal-liċenzji
eżistenti u r-riallokazzjoni tal-opportunitajiet tas-sajd fost
il-bastimenti li kien jifdal. Ma ġietx ipprovduta informazzjoni dettaljata
fil-livell tal-flotta. Il-Belġju kkonkluda li l-flotot tiegħu huma
f’bilanċ mal-opportunitajiet tas-sajd. L-analiżi tal-STECF tindika li,
bħala medja, il-flotta tat-tkarkir bit-travu ta’ 18-24 m ma kinitx
qiegħda tagħmel biżżejjed profitt sabiex tkun tista’
tissostitwixxi l-oġġetti kapitali kbar tagħha. Kemm din
il-flotta kif ukoll il-bastimenti tas-sajd tat-tkarkir bit-travu ta’
24-40 m kienu dipendenti fuq stokkijiet mistada ’l fuq mil-livelli
tal-MSY. Il-Bulgarija kkonkludiet li
jidher li hemm kważi bilanċ bejn l-istokkijiet tal-ħut u d-daqs
tal-flotta. Il-Bulgarija għandha l-ħsieb li tieħu miżuri
sabiex tnaqqas il-bastimenti mhux attivi u bħalissa tinsab
fil-proċess li tbiddel il-qafas leġiżlattiv. Fl-2011, aktar minn 57 % tal-bastimenti
kollha ma kinux attivi, u l-maġġoranza tagħhom kienu
iżgħar minn 12-il metru. Il-flotot kollha akbar minn
12-il metru dehru li qed juru livell baxx ta' prestazzjoni ekonomika
fil-perjodu analizzat minħabba l-konsum ogħla tal-fjuwil u
l-prezzijiet għoljin tal-fjuwil, anki jekk dawn qegħdin jilħqu
punt ta' ekwilibriju. Il-bastimenti iżgħar minn 18-il metru ma
ġewx utilizzati biżżejjed, billi ntużaw għas-sajd
f’70 % biss tal-ħin tas-sajd massimu possibbli. Ċipru
għandu l-ħsieb li jnaqqas il-kapitalizzazzjoni eċċessiva
billi jiskrappja madwar 100 bastiment żgħir li joperaw qrib
il-kosta, li l-isforz tagħhom jibqa’ mhux ristrett, wara deċennju ta’
żieda fl-għadd ta’ bastimenti iżgħar soġġetti
għal-limitazzjonijiet tal-isforz, filwaqt li tnaqqset il-kapaċità
fit-TG u l-kW. In-nuqqas ta’ utilizzazzjoni
biżżejjed ġie rrappurtat fil-flotot kollha għajr għal
bastimenti li jużaw irkaptu passiv polivalenti ta’ 12-24 m, kif ukoll
ġew rappurtati redditi baxxi jew negattivi fuq l-investimenti
għall-flotot kollha. Mill-2003 kien hemm tnaqqis sostanzjali
fil-kapaċità tal-flotta tad-Danimarka (bastimenti, TG, kW)
bl-introduzzjoni tas-sistema ITQ. Id-Danimarka hija tal-fehma li s-sitwazzjoni
hija pjuttost stabbli u li ma hemm ebda kapaċità eċċessiva
fiżika sinifikanti fit-tul. Minkejja dan id-Danimarka tidentifika
kapaċità eċċessiva fil-flotot li jużaw irkapti passivi
polivalenti ta' 0-12 m u 12-24 m, kif ukoll fil-flotot ta’ bastimenti
tas-sajd iżgħar tat-tkarkir (il-bastimenti tat-tkarkir
għall-ħut tal-qiegħ u l-flotta tas-seiners ta' 0-12 m) u
l-gangmi ta' 12-24 m. L-analiżi tal-STECF tindika li l-flotot
Daniżi kollha li ġew ivvalutati kienu dipendenti fuq stokkijiet
mistada ’l fuq mil-livelli tal-MSY. Tliet flotot ma kellhomx
biżżejjed dħul sabiex ikunu jistgħu jissostitwixxu
l-oġġetti kapitali kbar tagħhom (irkapti passivi polivalenti ta'
10-12 m u 12-18 m, irkapti mobbli u passivi ta’ 12-18 m). Barra
minn hekk, kien hemm ukoll żewġ flotot (irkapti mobbli u passivi ta’
18-24 m u seiners u bastimenti tat-tkarkir għall-ħut
tal-qiegħ ta’ 18-24 m) li wkoll urew li ma kinux utilizzati
biżżejjed. Ir-rapport tal-Ġermanja
mhuwiex ibbażat fuq il-linji gwida u l-indikaturi eżistenti.
Il-bilanċ ġie eżaminat biss fuq il-livell kwalitattiv skont
il-flotta. Il-Ġermanja ddikjarat li l-għan tagħha huwa li
żżomm biżżejjed kapaċità kumplessiva sabiex tkun
tista’ tuża l-kwoti allokati lilha. Fl-2011, twettaq tnaqqis ta’
5.6 % fil-bastimenti, ta’ 4.4 % fit-TG u ta’ 6.4 % fil-kW.
Pubblikament ma ġie ffinanzjat ebda ħruġ mill-flotta. L-analiżi tal-STECF identifikat li
l-flotot li jużaw irkapti passivi ta’ <10 m, il-bastimenti tat-tkarkir
għall-ħut tal-qiegħ ta’ 12-18 m, 18-24 m, 24-40 m
u tat-tkarkir bit-travu ta’ 24-40 m kienu dipendenti fuq stokkijiet
mistada ’l fuq mil-livelli tal-MSY (iżda kienu ekonomikament sostenibbli).
Il-bastimenti ma kinux utilizzati biżżejjed u kien hemm flotta kbira
mhux attiva ta’ bastimenti iżgħar (inklużi 458 bastiment
mhux attivi ta’ <10 m). L-Estonja rrappurtat
kapaċità eċċessiva, primarjament fil-bastimenti tas-sajd
tat-tkarkir ta’ >12-il metru. Il-flotta tnaqqset b’7 bastimenti
fl-2011 (bl-eliminazzjoni ta’ 371 TG u 1056 kW). L-analiżi tal-STECF tindika li
l-bastimenti tas-sajd tat-tkarkir għall-ħut pelaġiku ta’
24-40 m kienu dipendenti fuq stokkijiet mistada ’l fuq mil-livelli tal-MSY
u ma ġewx utilizzati biżżejjed, iżda kienu ekonomikament
sostenibbli. Il-Greċja ma
ppreżentatx valutazzjoni tal-bilanċ u lanqas ma vvalutat il-politika
tal-flotta tagħha jew ipprovdiet xi dejta skont id-DCF. Il-Greċja
rrapportat indikazzjonijiet ta’ sajd eċċessiv għall-marlozz u
l-gambli fil-Baħar Eġew, iżda ma ġewx ipprovduti dettalji.
Fl-2011, il-flotta tnaqqset b’488 bastiment (u naqset bi 3.6 % fit-TG
u b’4.0 % fil-kW). Barra minn hekk, tfasslu pjanijiet ta’ ġestjoni,
inkluż ħruġ ta’ liċenzji speċjali, għall-bastimenti
tat-tkarkir tal-qiegħ u għas-sajd bil-purse seine
(għall-inċova u s-sardin). Minħabba n-nuqqas ta’ dejta
(bijoloġika, ekonomika u teknika) huwa impossibbli li jiġi vvalutat
il-bilanċ tal-flotot Griegi mar-riżorsi. Spanja
rrappurtat li l-kapaċità tal-flotta kienet għadha qiegħda
taqbeż l-opportunitajiet sa ċertu punt u li l-flotta setgħet
taqbad aktar ħut mill-kwota allokata lilha. Spanja tagħmel sforzi
kontinwi sabiex tnaqqas il-kapaċità tal-flotta bl-għajnuna pubblika u
mingħajrha, li wasslu għal tnaqqis ta’ 4.6 % fit-TG u ta’
3.7 % fil-kW matul l-2011. Fir-rigward tal-indikatur tekniku, Spanja
rrappurtat nuqqas ta’ utilizzazzjoni biżżejjed għal parti
mill-flotta kemm fiż-żoni tas-sajd nazzjonali kif ukoll fl-ilmijiet
internazzjonali, iżda osservat tendenza ta’ tnaqqis mill-2008 sal-2011.
Minbarra dan, ġiet ipprovduta informazzjoni biss dwar id-dħul
attwali/dħul li joħloq punt ta' ekwilibriju tal-flotot. Dan huwa
parzjalment dovut għal fatt li ma ġietx ippreżentata dejta diżaggregata
dwar il-qabdiet tal-ħut. Ir-rapport nazzjonali Spanjol jiddikjara li l-flotot
kollha qegħdin joperaw bi profitt. Is-sussidji rċevuti mis-sidien
tal-bastimenti ġew inklużi fil-kalkolu tad-dħul. Mhuwiex possibbli li ssir evalwazzjoni
komparabbli u oġġettiva tas-sajd eċċessiv u
tas-sostenibbiltà ekonomika minħabba n-nuqqas ta’ dejta disponibbli.
Id-dħul ikkalkolat mill-Kumitat Xjentifiku, Tekniku u Ekonomiku
għas-Sajd (STECF), li ma jinkludix id-dħul mis-sussidji, jindika li
l-flotot li jużaw irkapti mobbli u passivi ta’ <10 m, xbieki
għall-ħut tal-qiegħ u seines ta’ 18-24 m u 24-40 m u
snanar ta’ 24-40 m u >40 m ma laħqux punt ta' ekwilibriju. Franza
rrappurtat dwar il-bastimenti kontinentali flimkien u kkonkludiet li
l-biċċa l-kbira tal-attivitajiet tas-sajd jinsabu f’bilanċ. Ma
ġewx ipprovduti indikaturi bijoloġiċi, tekniċi u ekonomiċi.
Fl-2011, Franza ddekummissjonat 133 bastiment, 7653 TG u
20408 kW bl-għajnuna pubblika. Pjanijiet speċifiċi ta’
ħruġ mill-flotta wasslu għall-irtirar ta’ kważi
60 bastiment f’kategoriji differenti ta’ attivitajiet tas-sajd
‘sensittivi’. L-analiżi tal-STECF tiżvela firxa
ta’ sitwazzjonijiet differenti. Flotot b’għeżula tas-tisqif ('drift
nets’) u bi xbieki fissi ta’ <10 m, 10-12 m, 12-18 m,
18-24 m u 24-40m kienu dipendenti fuq stokkijiet mistada ’l fuq
mil-livelli tal-MSY - iżda dehru li kienu ekonomikament sostenibbli u li
kienu qegħdin jilħqu punt ta' ekwilibriju fil-perjodu analizzat.
Il-flotot li jistadu bi snanar ta’ 24-40 m u b’irkapti mobbli polivalenti
ta’ 24-40 m ukoll kienu dipendenti fuq stokkijiet mistada ’l fuq mil-livelli
tal-MSY. L-indikaturi jissuġġerixxu livell baxx ta' prestazzjoni
ekonomika matul is-snin analizzati. Il-flotot li jużaw il-gangmu ta’
12-18 m, bastimenti tas-sajd tat-tkarkir għall-ħut pelaġiku
ta’ 18-24 m u >40 m, bastimenti tat-tkarkir għall-ħut
tal-qiegħ u seines ta’ 18-24 m, 24-40 m u >40 m u purse
seines ta’ >40 m ukoll dehru li qed juru livell baxx ta' prestazzjoni
ekonomika fil-perjodu vvalutat. Min-naħa l-oħra, il-flotot li
jużaw in-nases ta’ <10 m, is-snanar ta’ <10 m, ix-xbieki
tat-tkarkir għall-ħut tal-qiegħ u s-seines ta’ 10-12 m u
x-xbieki tat-tkarkir għall-ħut tal-qiegħ u s-seines ta’
12-18 m kienu ekonomikament sostenibbli, għalkemm ftit li xejn hemm
tagħrif dwar l-istat tar-riżorsi li jiddependu fuqhom. L-Irlanda rrappurtat li jista’
jkun li f’xi flotot għad hemm xi żbilanċi, iżda ma
speċifikatx liema huma. Għaldaqstant, hemm bżonn ta’ aktar
ħidma fuq id-disponibbiltà tad-dejta. L-analiżi tal-STECF tindika li
l-bastimenti tas-sajd tat-tkarkir għall-ħut pelaġiku ta’
24-40 m kienu dipendenti fuq stokkijiet mistada ’l fuq mil-livelli tal-MSY
u ma kinux qegħdin jagħmlu biżżejjed profitt sabiex ikunu
jistgħu jissostitwixxu l-oġġetti kapitali kbar tagħhom.
Il-bastimenti tas-sajd tat-tkarkir għall-ħut pelaġiku ta’
>40 m kienu dipendenti wkoll fuq stokkijiet mistada ’l fuq mil-livelli
tal-MSY u ma kinux utilizzati biżżejjed, iżda kienu qegħdin
jilħqu punt ta' ekwilibriju u kienu jidhru li huma ekonomikament
sostenibbli. Il-flotot li jużaw il-gangmu ta’ 10-12 m u x-xbieki tat-tkarkir
għall-ħut tal-qiegħ u s-seines ta’ 18-24 m kienu jidhru li
qegħdin juru kapitalizzazzjoni ekonomika eċċessiva. Il-flotta li
tuża n-nases ta’ <10 m kienet qed tidher li hija ekonomikament
sostenibbli, iżda ftit li xejn hemm tagħrif dwar l-istat
tal-istokkijiet. L-Italja identifikat kapaċità
eċċessiva fil-purse seiners u fil-bastimenti tat-tkarkir
tal-qiegħ ta’ aktar minn 24 m u qiegħda tippjana skema estensiva
ta’ dekummissjonar. L-analiżi tal-STECF tindika li l-flotot
li jużaw ix-xbieki tat-tkarkir għall-ħut tal-qiegħ u
s-seines ta’ 24-40 m u l-bastimenti tat-tkarkir bit-travu ta’ 24-40 m
ma kinux qegħdin jagħmlu biżżejjed profitt sabiex ikunu
jistgħu jissostitwixxu l-oġġetti kapitali kbar tagħhom,
filwaqt li l-flotta msemmija l-aħħar kellha wkoll utilizzazzjoni baxx
tal-kapital. Il-flotot b’irkapti passivi polivalenti ta’ 6-12 m, gangmi u
xbieki tat-tkarkir għall-ħut tal-qiegħ u seines ta’ 12-18 m
u 18-24 m dehru li kienu ekonomikament sostenibbli. Għall-biċċa l-kbira tal-flotot,
hemm nuqqas ta’ għarfien dwar is-sitwazzjoni bijoloġika tal-istokkijiet,
li jagħmilha impossibbli li ssir analiżi tad-dipendenza fuq
l-istokkijiet mistada ’l fuq mil-livelli tal-MSY. Il-Latvja rrappurtat
kapaċità eċċessiva fil-bastimenti tat-tkarkir ta’ 12-24 m u
24-40 m u fil-flotta tan-netter ta’ 24-40 m. Il-flotta Latvjana
naqqset b’14.9 % f'TG u 14.3 % f'kW. Il-Latvja kellha skema ta'
twaqqif permanenti disponibbli għall-2011-2012. L-analiżi tal-STECF tindika li
l-bastimenti tas-sajd tat-tkarkir għall-ħut pelaġiku ta’
24-40 m kienu ekonomikament sostenibbli iżda kienu dipendenti fuq
stokkijiet ta’ ħut mistada ftit ’il fuq mil-livelli tal-MSY. Il-Litwanja għandha
l-għan li żżomm biżżejjed kapaċità kumplessiva
sabiex tkun tista’ tistad skont il-kwoti allokati lilha. Fl-2011, l-għadd
ta’ bastimenti tnaqqas b’mod sinifikanti (-12 %), iżda
l-kapaċità tal-flotta naqset biss bi ftit fir-rigward
tat-tunnellaġġ (-1.6% TG) u kważi xejn f’dak li għandu
x’jaqsam mas-saħħa tal-magni. Il-Litwanja ma applikatx l-indikaturi
fir-rapport tagħha. L-analiżi tal-STECF tindika li l-flotot
li jużaw ix-xbieki tat-tkarkir għall-ħut tal-qiegħ u
s-seines ta’ 24-40 m ma stadux għal stokkijiet mistada
żżejjed u kienu ekonomikament sostenibbli. Madankollu, kien hemm
nuqqas kbir ta’ utilizzazzjoni. Filwaqt li Malta rrappurtat
kapaċità eċċessiva għall-flotta kollha għall-2009 u
l-2010, hija ma setgħetx tasal għal konklużjoni għall-2011
minħabba n-nuqqas ta’ dejta ekonomika u soċjali. Il-kapaċità
tal-flotta Maltija tnaqqset b’mod sinifikanti (- 32.8 % f’TG u
9.2 % f’kW). L-użu tal-bastimenti kien inqas minn
50 %. Il-Pajjiżi l-Baxxi
rrappurtaw li rari ntużaw bastimenti tas-sajd għall-ħut
tal-qiegħ u li huwa possibbli li tinqabad il-kwota disponibbli b’inqas
bastimenti. Għas-settur tas-sajd għall-ħut tal-qiegħ,
l-indikatur bijoloġiku għadu kemxejn ’il fuq mil-livell fil-mira,
iżda mexa fid-direzzjoni t-tajba mill-2008 sal-2011. Għall-flotot
tas-sajd għall-ħut pelaġiku, is-sitwazzjoni bijoloġika
kienet raġonevolment tajba fil-Grigal tal-Atlantiku, iżda l-pressjoni
tas-sajd fuq stokkijiet fil-mira fil-Punent tal-Afrika u f’ilmijiet
imbiegħda oħrajn kienet għolja wisq. L-analiżi tal-STECF tindika li
l-ħames flotot kollha li ġew ivvalutati, minbarra s-sajd bit-tkarkir
bit-travu ta’ 18-24 m, kienu dipendenti fuq stokkijiet mistada ’l fuq
mil-livelli tal-MSY. Barra minn hekk, il-flotta tat-tkarkir għall-ħut
tal-qiegħ u s-seines ma kinitx utilizzata biżżejjed. Il-flotot
tas-sajd għall-ħut pelaġiku wrew sinjali ta’ kapitalizzazzjoni
ekonomika eċċessiva. Il-Polonja kkonkludiet li
l-flotta ma teħtieġx aktar tnaqqis. Għall-aringi tal-Baħar
Baltiku ċentrali, li jinqabdu l-aktar mill-bastimenti tas-sajd tat-tkarkir
għall-ħut pelaġiku ta’ 24-40 m, il-mortalità mis-sajd
kienet għolja wisq. Fl-2009, kien hemm titjib notevoli fl-indikaturi
ekonomiċi għall-flotta tal-Baħar Baltiku, għajr
għall-bastimenti li jistadu bil-konz ta’ 12-18 m u
għall-bastimenti li jistadu għall-ħut tal-qiegħ ta’
18-24 m. Fl-2011, żewġ terzi tal-bastimenti tal-flotta
għas-sajd tal-merluzz fil-Baħar Baltiku rċevew għajnuna
għal waqfien temporanju mis-sajd. Dawn il-bastimenti dalwaqt
jerġgħu lura għall-attività tas-sajd. 13.8 % tal-bastimenti
ma kinux attivi u dawn jirrappreżentaw 16 % tat-TG. Il-Portugall ikkonkluda li
l-flotot huma f’bilanċ mal-opportunitajiet tas-sajd. Fl-2011,
il-kapaċità totali tal-flotta kontinentali Portugiża baqgħet
virtwalment l-istess (tnaqqis ta’ 1 %). Partijiet kbar mill-qabdiet kienu komposti
minn stokkijiet ta’ ħut mhux ivvalutati. Madankollu, l-indikaturi
kkalkolati mill-STECF urew li l-flotot kienu dipendenti fuq stokkijiet mistada
’l fuq mil-livelli tal-MSY. L-analiżi tal-STECF turi li l-flotot
b’irkapti mobbli u passivi ta’ 0-10 m u l-flotot bi snanar ta’
24-40 m urew livell baxx ta' prestazzjoni ekonomika fit-tul. Il-flotot li
jużaw l-irkapti passivi polivalenti ta’ 0-10 m, l-għeżula
tat-tisqif u x-xbieki fissi ta’ 12-18 m, in-nases ta’ 12-18 m u
l-purse seines ta’ 18-24 m u 24-40 m ma ġewx utilizzati
biżżejjed. Il-flotot li jużaw irkapti mobbli u passivi polivalenti,
bi xbieki tas-sajd għall-ħut tal-qiegħ u seines u bi snanar ta’
24-40 m kienu ekonomikament sostenibbli, iżda ma kienet disponibbli
ebda valutazzjoni tas-sostenibbiltà bijoloġika. Ir-Rumanija ma ssottomettiet
ebda rapport għall-2011. Għaldaqstant, ma kienet disponibbli ebda
dejta tad-DCF min-naħa tar-Rumanija. Is-Slovenja rrapportat
kapaċità eċċessiva fil-biċċa l-kbira tal-flotot
tagħha. Is-Slovenja qiegħda tippjana li tuża l-għajnuna
pubblika għall-iskrappjar fl-ewwel nofs tal-2012, kif ukoll li
taġġusta l-isforz tas-sajd għal diversi flotot. Il-flotta kienet ikkaratterizzata minn nuqqas
sinifikanti ta’ utilizzazzjoni, fejn 55 % tal-bastimenti ma kinux attivi,
iżda dan jinkludi s-sajd fuq bażi parzjali għal speċijiet
migratorji. Hemm nuqqas ta’ għarfien dwar
is-sitwazzjoni bijoloġika tal-istokkijiet u ma hemmx valutazzjonijiet
disponibbli. Il-Finlandja ma applikatx
il-linji gwida fir-rapport tagħha u lanqas ma inkludiet xi indikaturi
oħrajn sabiex tivvaluta l-kapaċità fir-rigward tal-opportunitajiet
tas-sajd. Il-Finlandja qalet li l-flotta tagħha tinsab f’bilanċ
aċċettabbli mar-riżorsi tas-sajd. Fl-2011, l-isforz żdied
bi 12.2 % meta mqabbel mal-2010, l-aktar fis-sajd għall-ħut
pelaġiku. Minn fost il-75 bastiment fis-settur tas-sajd lil hinn
mill-kosta, 28 % ma kinux attivi matul l-2011. L-Isvezja rrappurtat li
għadha tista’ tiġi osservata kapaċità eċċessiva
f’bosta flotot u qiegħda tipprova tindirizza din il-kwistjoni permezz ta’
dekummissjonar. Kien hemm żewġ skemi mmirati għall-bastimenti
tas-sajd bit-tkarkir għall-merluzz. Barra minn hekk, ġew irtirati
total ta’ -26 % f’TG u ta’ -19 % f’kW mill-flotta. L-analiżi tal-STECF tindika li ħafna
flotot li ġew ivvalutati kienu dipendenti fuq l-istokkijiet mistada ’l fuq
mil-livelli tal-MSY. Barra minn hekk, il-flotot ta’ 10-12 m li jużaw
irkapti passivi, u ta’ 24-40 m li jistadu bix-xbieki għat-tkarkir
tal-ħut tal-qiegħ u s-seines, ma għamlux biżżejjed
profitt sabiex ikunu jistgħu jissostitwixxu l-oġġetti kapitali
kbar tagħhom. Kien hemm nuqqas ta’ utilizzazzjoni f’xi setturi. Ir-Renju Unit huwa tal-fehma li ħafna
flotot joperaw b’mod sostenibbli minħabba li r-riżorsi li jisfruttaw
jiġu mistada fi ħdan il-mortalità mis-sajd prekawzjonali,
għalkemm hemm żbilanċ f’ċerti oqsma (pereżempju
għal stokkijiet li huma koperti minn sistemi ta’ rkupru). Minn
Ottubru 2010, faċilità ta’ parkeġġ liċenzjat tat
iċ-ċans lill-flotot sabiex jirristrutturaw. Ir-Renju Unit irrapporta
dwar it-tnaqqis miksub fil-kapaċità, iżda ma qiegħed
jippreżenta ebda pjan għal aġġustamenti ulterjuri. L-analiżi tal-STECF tindika li ħafna
flotot kienu dipendenti fuq stokkijiet mistada ’l fuq mil-livelli tal-MSY.
Għall-flotot ta’ <10 m li jużaw in-nases ta’ 12-18 m,
18-24 m u >40 m u li jistadu bix-xbieki tat-tkarkir
għall-ħut tal-qiegħ u s-seines ma hija disponibbli ebda
valutazzjoni tad-dipendenza fuq ir-riżorsi, iżda dawn il-flotot kienu
ekonomikament sostenibbli. 5. Konklużjonijiet Din l-analiżi tal-isforzi tal-Istati
Membri sabiex jinkiseb bilanċ sostenibbli bejn il-kapaċità tal-flotta
u r-riżorsi tas-sajd turi li l-kapaċità tal-flotta tas-sajd
tal-Ewropa għadha għolja wisq. Minkejja t-tnaqqis fid-daqs ta’
ħafna flotot tas-sajd Ewropej matul l-aħħar deċennju,
ħafna bastimenti f’diversi Stati Membri ma laħqux punt ta'
ekwilibriju u ma ġewx utilizzati biżżejjed. Barra minn hekk,
ħafna bastimenti kellhom dħul żgħir wisq biex ikunu
jistgħu jagħmlu l-investimenti meħtieġa,
bħall-immodernizzar tal-bastimenti u tal-irkapti. Fil-perjodu analizzat, kien hemm wisq flotot
li kienu dipendenti fuq stokkijiet mistada żżejjed fir-rigward
tar-rendiment massimu sostenibbli, li huwa wieħed mill-għanijiet
prinċipali tal-PKS riformata. Il-politika attwali dwar il-ġestjoni
tal-flotot naqset milli ġġib il-flotot f’bilanċ mar-riżorsi
li jisfruttaw. Mhuwiex biżżejjed li dawn jiddependu biss fuq
il-konformità mal-limiti massimi nazzjonali tal-kapaċità tal-flotta
(espressi fid-daqs tal-bastiment (TG) jew fis-saħħa tal-bastiment
(kW)). L-iżgurar tal-bilanċ bejn
il-kapaċità tal-flotta u r-riżorsi tal-ħut huwa waħda
mill-kwistjonijiet ewlenin għar-riforma tal-Politika Komuni tas-Sajd.
Ir-responsabbiltà primarja għall-ġestjoni tal-flotot hija f'idejn
l-Istati Membri. Il-konsegwenzi potenzjali tal-kapitalizzazzjoni
eċċessiva tal-flotot u tad-dipendenza kontinwa fuq l-istokkijiet
mistada ’l fuq mir-rendiment massimu sostenibbli huma l-prova li
neħtieġu strumenti aħjar għall-ġestjoni tal-flotot
skont il-PKS riformata. Dan jirrikjedi li l-Istati Membri jiġġestixxu
l-flotot tagħhom sabiex jisfruttaw l-istokkijiet tal-ħut taħt
il-livelli tar-rendiment massimu sostenibbli u b’tali mod li jippermettilhom
ikunu ekonomikament vijabbli. Anness 1:
Il-kwalità tal-informazzjoni 1. Informazzjoni Kwalitattiva u Deskrittiva L-oqsma ta’ tħassib fejn ma ġiet
ipprovduta ebda informazzjoni jew fejn ġiet ipprovduta informazzjoni
limitata fir-rapporti nazzjonali huma elenkati u mmarkati bis-simbolu (X)
fit-tabella ta’ hawn taħt: || Rabtiet bejn il-flotot u l-attivitajiet tas-sajd || Żvilupp tal-flotta || Dikjarazzjoni ta’ skemi ta’ tnaqqis tal-isforzi || L-impatt tal-iskemi ta’ tnaqqis tal-isforzi || Valutazzjoni tas-sistema ta’ ġestjoni tal-flotot || Pjanijiet sabiex tittejjeb is-sistema ta’ ġestjoni tal-flotot || Dikjarazzjoni ta’ Konformità tal-iskema ta’ dħul/ħruġ || Bidliet fil-proċeduri amministrattivi || Valutazzjoni tal-bilanċ BE || || || X || X || || || || || BG || X || || || X || || X || || X || CY || || || || || || || || || DE || || || X || X || X || X || || || X DK || || || || || || || || || EE || || || X || X || X || || || X || X EL || || || || || X || X || || X || X ES || || || || || || || || || FI || X || || || || || X || || X || X FR || X || X || X || || X || || X || || X IE || || || || || X || X || || || IT || || || || || || || || || LT || X || || || || X || X || X || || X LV || || || || X || || X || || || X MT || X || X || || || X || || || X || NL || || || X || || || X || || X || X PO || || || || || X || || || || PT || || || || X || || || || || RO || X || X || X || X || X || X || X || X || X SI || X || || || || || X || || || X SE || || || || X || || X || X || || UK || X || X || || || X || X || || || X Sors:
it-tabella 5.3 tar-rapport STECF-12-18 Analiżi tar-rapporti
nazzjonali dwar l-isforzi tal-Istati Membri sabiex jintlaħaq bilanċ
bejn il-kapaċità tal-flotta u l-opportunitajiet tas-sajd. 2. Informazzjoni Kwantitattiva L-evalwazzjoni tad-dipendenza ta’ flotta fuq
stokkijiet mistada ’l fuq mil-livelli tal-MSY tiddependi fuq id-disponibbiltà
tal-valutazzjonijiet kwantitattivi tal-istokkijiet tal-ħut. Dawn huma
disponibbli għall-maġġoranza tal-istokkijiet fil-Baħar
Baltiku u fil-Baħar tat-Tramuntana, iżda l-kopertura fl-Ibħra
Ċeltiċi mhijiex kompleta. Fil-Baħar Mediterran, ħafna
flotot jistadu fuq stokkijiet bi status mhux magħruf, iżda dan
il-qasam ta’ għarfien qiegħed jitjieb b’pass mgħaġġel.
Filwaqt li xi Stati Membri pprovdew informazzjoni dwar ir-rati tal-qbid
tal-ħut, tali informazzjoni ma tistax tintuża sabiex isiru
konklużjonijiet dwar is-sostenibbiltà. Il-biċċa l-kbira tar-rapporti
tal-Istati Membri naqsu milli jindirizzaw kwistjonijiet ta’ bilanċ
fil-livell tal-flotot tas-sajd kif definit fid-DCF. Dan ixekkel l-evalwazzjoni
kwantitattiva tal-bilanċ minħabba li d-dejta disponibbli ma
tikkorrispondix għall-flotot li qegħdin jiġu evalwati. Hija meħtieġa wkoll dejta
mill-Istati Membri dwar il-qabdiet u l-valur tal-qabdiet għal kull flotta.
Din l-informazzjoni hija meħtieġa mid-DCF, iżda ma ġietx
ipprovduta mill-Istati Membri kollha. L-informazzjoni dwar ir-redditu fuq l-assi
tanġibbli fissi (ROFTA – 'return on fixed tangible assets') kienet nieqsa
jew mhux kompleta għal xi Stati Membri. L-informazzjoni dwar in-numri ta’ bastimenti
mhux attivi hija disponibbli skont il-klassi tat-tul (irrispettivament mis-sajd
fil-mira jew mit-tip ta’ rkaptu) għall-maġġoranza tal-Istati
Membri mid-dejta tad-DCF. Madankollu, f’xi każijiet, jinħolqu dubji
dwar il-kwalità ta’ dan is-sors ta’ dejta. Fir-rapporti nazzjonali, il-valuri
tal-indikatur tekniku (il-jiem medji tal-bastiment fuq il-baħar
diviżi mill-massimu għall-flotta) ġew ipprovduti
mill-maġġoranza tal-Istati Membri, iżda din l-informazzjoni ma
kinitx kompleta. Kien hemm seba’ Stati Membri li ma pprovdewx il-valuri
tal-indikatur tekniku fir-rapporti nazzjonali tagħhom. Anness 2: Tabella 2.1: Konformità mal-limitu
massimu ta’ dħul-ħruġ fil-31 ta’ Diċembru 2011
(minbarra r-reġjuni l-aktar imbiegħda) NB: Dejta estratta mir-Reġistru tal-Flotta
tal-Unjoni abbażi tas-sitwazzjoni fl-1 ta’ Settembru 2012
(ir-Rumanija: is-sitwazzjoni fl-1 ta’ Marzu 2012) Anness 3: Tabella 3.1. L-evoluzzjoni
tal-flotot tal-Istati Membri (il-bastimenti, it-tunnellaġġ u
s-saħħa tal-magna) matul l-2011 (minbarra r-reġjuni l-aktar
imbiegħda) NB: Dejta estratta mir-Reġistru tal-Flotta
tal-Unjoni abbażi tas-sitwazzjoni fl-1 ta’ Settembru 2012
(ir-Rumanija: is-sitwazzjoni fl-1 ta’ Marzu 2012) Anness 4 Tabella 4.1. L-impenji tal-FES f’waqfien permanenti (2007 –
il-31 ta’ Lulju 2012) Sors: Dejta
tal-Istati Membri bbażata fuq talba formali mid-DĠ MARE
(Awwissu 2012) sabiex tiġi ppreżentata dejta kumulattiva tal-FES
għall-perjodu mill-1 ta’ Jannar 2007
sal-31 ta’ Lulju 2012) %s: Perċentwali
tal-impenji tal-FES s’issa fl-iskrappjar; NS: Għadd ta’
operazzjonijiet ta’ skrappjar (bastimenti); R%: Perċentwali
tal-impenji tal-FES għall-assenjazzjoni mill-ġdid tal-bastimenti; NR: Għadd ta’ assenjazzjonijiet
mill-ġdid (bastimenti); %S + %R: Perċentwali totali
ta’ skrappjar + assenjazzjoni mill-ġdid Anness 5: Indikaturi użati mill-Kumitat
Xjentifiku, Tekniku u Ekonomiku għas-Sajd (STECF) L-"indikatur
tar-rata tal-ħsad sostenibbli” huwa medja tar-rati tal-mortalità mis-sajd
esperjenzati mill-istokkijiet tal-ħut sfruttati minn kull flotta,
bl-importanza fil-medja peżata skont l-importanza ekonomika ta’ kull stokk
fil-qabdiet. Meta dan l-indikatur ikun ugwali għal 1, bħala
medja l-istokkijiet ikunu qegħdin jiġu sfruttati b’rata ta’ rendiment
massimu sostenibbli. Għal valuri ta’ aktar minn 1, bħala medja
l-flotta tkun qiegħda tiddependi fuq stokkijiet sfruttati
żżejjed u viċi versa. Din il-miżura ma tqisx il-fatt li xi
stokkijiet fit-taħlita ta’ qabdiet jistgħu jkunu xi ftit jew wisq
sfruttati żżejjed jew fi stat ta’ eżawriment, u lanqas tqis
il-firxa tal-impatt ta’ flotot oħrajn fuq l-isfruttar tar-riżorsi. F’dan
ir-rigward, jintużaw żewġ "Indikaturi tas-sostenibbiltà
ekonomika". Ir-Redditu fuq l-Assi Tanġibbli Fissi (ROFTA) (prokura
għar-Redditu fuq l-Investiment) huwa miżura tas-saħħa
ekonomika fit-tul. Din il-miżura tkejjel il-profitt nett diviż
mill-valur tal-investimenti kapitali. Jekk din ir-rata tkun ogħla mir-rata
ta’ interess mingħajr riskju disponibbli band’oħra (nominalment
2 %), allura l-flotta tkun fi stat ekonomiku tajjeb u tkun tista’
tissostitwixxi oġġetti kapitali kbar kif dan isir meħtieġ.
Jekk ir-ROFTA jkun taħt it-2 %, dan ifisser li tali investimenti ma
jkunux utli f’termini finanzjarji minħabba li jistgħu jinkisbu
profitti akbar jekk il-fondi jiġu investiti fi bnadi oħrajn. Il-proporzjon
"Dħul Attwali/Dħul li jwassal għal Punt ta'
Ekwilibriju" (CR/BER – 'Current Revenue/Break-Even Revenue') huwa
miżura ta’ vijabbiltà fuq perjodu ta’ żmien qasir. Jekk il-proporzjon
ikun ta’ inqas minn wieħed, allura l-bastimenti ma jkunux jistgħu
jkopru l-ispejjeż operattivi tagħhom u jkollhom jieqfu jistadu meta
jispiċċaw bla flus; filwaqt li meta l-proporzjon ikun ta’ aktar minn
wieħed, il-bastimenti jkunu jistgħu jkopru l-ispejjeż operattivi
tagħhom, iżda dan ma jfissirx li huma jiġġeneraw
biżżejjed dħul sabiex jissostitwixxu l-oġġetti
kapitali kbar. F’dan
ir-rigward, jintużaw żewġ miżuri biex jivvalutaw jekk
il-bastimenti humiex qegħdin jiġu "utilizzati għal
kollox". "Indikatur Tekniku" huwa definit bħala
l-proporzjon taż-żmien medju fuq il-baħar diviż
miż-żmien massimu u fattibbli tas-sajd fl-attività rilevanti. Huwa
jieħu valur ta’ unità meta l-bastimenti kollha jkunu qegħdin jistadu
kemm jista’ jkun prattikabbli, anki jekk l-istaġun tas-sajd jista’ jkun
qasir. Valuri ta’ inqas minn wieħed jindikaw li partijiet mill-flotta
jkunu qegħdin jistadu inqas milli jistgħu. Valur ta’ livell limitu
ta’ 70 % ġeneralment jittieħed bħala sinjal ta’ nuqqas sinifikanti
fl-użu. Madankollu, xi bastimenti jistgħu ma jkunu qegħdin
jistadu xejn matul is-sena kollha u għalhekk ikunu “mhux attivi”. Jekk
ikun hemm ħafna bastimenti mhux attivi fi flotta tas-sajd, dan ikun
indikazzjoni li l-flotta ma tinsabx f’bilanċ mar-riżorsi tagħha.
[1] L-Artikolu 11 tar-Regolament tal-Kunsill (KE)
Nru. 2371/2002. [2] Kif obbligat skont l-Artikolu 14 tar-Regolament
tal-Kunsill (KE) Nru. 2371/2002. [3] Skont l-Artikolu 15 tar-Regolament tal-Kunsill (KE)
Nru 2371/2002 u l-Artikolu 11 tar-Regolament tal-Kummissjoni (UE)
Nru 1013/2010 li jippreskrivi regoli ta’ implimentazzjoni dwar il-Politika
tal-Unjoni dwar il-Flotta kif definita fil-Kapitolu III tar-Regolament
tal-Kunsill (KE) Nru 2371/2002. [4] Skont ir-Regolament tal-Kunsill (KE) Nru 199/2008
dwar l-istabbiliment ta’ qafas Komunitarju għall-ġbir,
il-ġestjoni u l-użu ta’ dejta fis-settur tas-sajd u appoġġ
għall-parir xjentifiku fir-rigward tal-Politika Komuni dwar is-Sajd. [5] Analiżi tar-rapporti nazzjonali dwar l-isforzi
tal-Istati Membri sabiex jintlaħaq bilanċ bejn il-kapaċità
tal-flotta u l-opportunitajiet tas-sajd (STECF-12-18). Fl-istampa 2012,
Rapporti Xjentifiċi u tal-Politika tal-JRC. [6] L-Artikoli 7 u 8 tar-Regolament tal-Kummissjoni(UE)
Nru 1013/2010 tal-10 ta’ Novembru 2010. [7] Ir-Rumanija mhijiex inkluża. [8] Rapport Speċjali tal-ECA Nru 12/2011 –
Il-miżuri tal-UE kkontribixxew għall-adozzjoni tal-kapaċità
tal-flotot tas-sajd għall-opportunitajiet tas-sajd disponibbli? –
il-paragrafu 21 tar-Rapport. [9] Rapport Speċjali tal-ECA Nru 12/2011 –
Il-miżuri tal-UE ikkontribixxew għall-adozzjoni tal-kapaċità
tal-flotot tas-sajd għall-opportunitajiet tas-sajd disponibbli? –
il-paragrafu 76 tar-Rapport.