EUR-Lex Access to European Union law
This document is an excerpt from the EUR-Lex website
Document 52012DC0243
REPORT FROM THE COMMISSION TO THE COUNCIL AND THE EUROPEAN PARLIAMENT Sixth Annual Report 2011 on the implementation of Community assistance under Council regulation (EC) No 389/2006 of 27 February 2006 establishing an instrument of financial support for encouraging the economic development of the Turkish Cypriot community
RAPPORT TAL-KUMMISSJONI LILL-KUNSILL U LILL-PARLAMENT EWROPEW Is-Sitt Rapport Annwali tal-2011 dwar l-implimentazzjoni ta' assistenza Komunitarja skont ir-Regolament tal-Kunsill (KE) Nru 389/2006 tas-27 ta' Frar 2006 li jistabbilixxi strument ta’ sostenn finanzjarju għall-inkoraġġiment tal-iżvilupp ekonomiku tal-komunità Turko-Ċiprijotta
RAPPORT TAL-KUMMISSJONI LILL-KUNSILL U LILL-PARLAMENT EWROPEW Is-Sitt Rapport Annwali tal-2011 dwar l-implimentazzjoni ta' assistenza Komunitarja skont ir-Regolament tal-Kunsill (KE) Nru 389/2006 tas-27 ta' Frar 2006 li jistabbilixxi strument ta’ sostenn finanzjarju għall-inkoraġġiment tal-iżvilupp ekonomiku tal-komunità Turko-Ċiprijotta
/* COM/2012/0243 final */
RAPPORT TAL-KUMMISSJONI LILL-KUNSILL U LILL-PARLAMENT EWROPEW Is-Sitt Rapport Annwali tal-2011 dwar l-implimentazzjoni ta' assistenza Komunitarja skont ir-Regolament tal-Kunsill (KE) Nru 389/2006 tas-27 ta' Frar 2006 li jistabbilixxi strument ta’ sostenn finanzjarju għall-inkoraġġiment tal-iżvilupp ekonomiku tal-komunità Turko-Ċiprijotta /* COM/2012/0243 final */
RAPPORT TAL-KUMMISSJONI LILL-KUNSILL U
LILL-PARLAMENT EWROPEW Is-Sitt Rapport Annwali tal-2011 dwar
l-implimentazzjoni ta' assistenza Komunitarja skont ir-Regolament tal-Kunsill
(KE) Nru 389/2006 tas-27 ta' Frar 2006 li jistabbilixxi
strument ta’ sostenn finanzjarju għall-inkoraġġiment
tal-iżvilupp ekonomiku tal-komunità Turko-Ċiprijotta 1. Introduzzjoni Ir-Regolament tal-Kunsill (KE) Nru 389/2006
li jistabbilixxi strument ta’ sostenn finanzjarju
għall-inkoraġġiment tal-iżvilupp ekonomiku tal-komunità Turko-Ċiprijotta[1] (minn hawn 'il quddiem
ir-"Regolament dwar l-Għajnuna") huwa l-bażi
għall-implimentazzjoni tal-assistenza għall-Komunità
Turko-Ċiprijotta u jeħtieġ rapportar annwali lill-Kunsill u
l-Parlament Ewropew. Dan is-sitt rapport ikopri s-sena 2011. 2. Ipprogrammar tal-assistenza Bejn l-2006 u l-2010, EUR 264 miljun
kienu pprogrammati taħt ir-Regolament dwar l-Għajnuna u ħafna
mill-proġetti li jirriżultaw minn dan l-iffinanzjar bikri kienu
għadhom għaddejjin fl-2011. L-iżvilupp tal-programm tal-2011
uża input minn konsultazzjonijiet mal-partijiet interessati u minn
evalwazzjonijiet tal-2009 u l-2010. Huwa segwa l-objettivi tar-Regolament dwar
l-Għajnuna: ir-riunifikazzjoni ta’ Ċipru permezz tal-promozzjoni
tal-iżvilupp soċjali u ekonomiku; ir-rikonċiljazzjoni, il-bini
ta' fiduċja u s-sostenn lis-soċjetà ċivili; li komunità
Turko-Ċiprijotta tinġab eqreb lejn l-UE u l-preparazzjoni ta' testi
legali allinjati mal-acquis bl-iskop li dawn isiru applikabbli immedjatament
mad-dħul fis-seħħ ta' soluzzjoni komprensiva għall-problema
ta' Ċipru. Finanzi għall-infrastruttura jew tagħmir kbir ma
kinux inklużi fl-allokazzjoni tal-2011, billi proġetti
infrastrutturali sostanzjali kienu diġà bdew. L-allokazzjoni tal-2011 ta’
EUR 28 miljun saret disponibbli b'żewġ Deċiżjonijiet
tal-Kummissjoni[2]. 3. Mekkaniżmi ta'
implimentazzjoni Il-programm hu implimentat fi Stat Membru tal-UE
f’qasam li mhuwiex taħt il-kontroll effettiv tal-Awtoritajiet tal-Istat
Membru u fejn l-applikazzjoni tal-acquis tal-UE tinsab sospiża.
L-għajnuna hi implimentata primarjament permezz ta’ ġestjoni
ċentralizzata mill-Kummissjoni Ewropea. Xi proġetti huma ġestiti
b'mod konġunt mal-Programm ta’ Żvilupp tan-Nazzjonijiet Uniti (UNDP).
Il-Kummissjoni topera f’kuntest politiku, legali u
diplomatiku uniku. Huma meħtieġa arranġamenti ad hoc sabiex
jiġi implimentat il-programm filwaqt li jitħarsu l-prinċipji ta’
ġestjoni finanzjarja soda. Fi programmi ta' għajnuna ffinanzjati
mill-UE, f'ċirkostanzi normali, ftehim ta’ finanzjament mal-Gvern
benefiċjarju jistabbilixxi l-qafas legali tal-assistenza. Ma jeżisti
l-ebda ftehim bħal dan għall-assistenza lill-komunità
Turko-Ċiprijotta. Il-Kummissjoni għandha toqgħod fuq dak li
taħseb li għandhom ikunu r-regoli u l-kundizzjonijiet applikabbli
lokalment u dan jintroduċi ċertu livell ta’ riskju. Il-ġestjoni
u l-mitigazzjoni ta' dawn ir-riskji huma parti mir-responsabbiltà
tal-Kummissjoni u l-miżuri adottati jinkludu monitoraġġ u
sostenn intensiv għall-benefiċjarji, kundizzjonijiet ta’ ħlas
riveduti, li jgħaqqdu ħlasijiet bil-quddiem mal-evidenza ta'
kuntratti ta' akkwist iffirmati u użu aktar mifrux ta’garanziji bankarji. Il-Kummissjoni tiddependi fuq is-sostenn
tal-komunità Turko-Ċiprijotta sabiex dan il-programm ikun
suċċess u b’mod partikolari sabiex tiżgura s-sostenibbiltà
tiegħu fuq medda twila ta’ żmien. Il-partijiet interessati
Turko-Ċiprijotti huma kkonsultati dwar il-ħtiġijiet tagħhom
għal finanzjament futur u esperti Turko-Ċiprijotti jieħdu sehem
f'kumitati ta' evalwazzjoni tal-offerti u għandhom rwol ewlieni fil-kumitati
ta’ tmexxija tal-proġetti. Kooperazzjoni bejn il-komunitajiet
Ċiprijotti Torok u Ċiprijotti Griegi tibqa meħtieġa
għall-effikaċjà sħiħa tal-programm u għall-għan
aħħari biex tinkiseb riunifikazzjoni. It-Tim tal-Programm, imwaqqaf fl-2006 fi ħdan
id-Direttorat Ġenerali tal-Kummissjoni għat-Tkabbir, juża
l-Uffiċċju ta’ Sostenn għall-Programmi tal-UE (EUPSO) fil-parti
tat-Tramuntana ta' Nikosija, ma' loġistiċi tal-uffiċċju
pprovduti permezz ta' kuntratt ta' servizz. Dan l-uffiċċju jipprovdi
bażi lokali għall-implimentazzjoni tal-proġett u
għall-interazzjoni ma' partijiet interessati Turko-Ċiprijotti.
Ir-rappreżentanza tal-Kummissjoni f’Ċipru tospita wkoll laqgħat
u seminars u tikkomunika mal-pubbliku Ċiprijott dwar il-programm
bħala parti mir-rwol standard tagħha. Fin-nuqqas ta’ Ftehim ta’ Finanzjament li
jistabbilixxi l-qafas legali li skontu tiġi implimentata l-assistenza,
programmi ta’ żvilupp tas-settur ma jistgħux jinftiehmu
faċilment. Il-programm ta’ assistenza, għalhekk, jinkludi ammont sinifikanti
ta’ appoġġ permezz ta' għotja, partikolarment lill-atturi mhux
pubbliċi inklużi l-NGOs, l-SMEs, bdiewa u studenti. Il-ġestjoni
ta’ din l-asssitenza permezz ta' għotja (aktar minn 1000 għotja
mill-2009) hija impenjattiva f'termini ta' riżorsi umani tal-EUPSO, u
fl-2011 is-sitwazzjoni tal-persunal kienet partikolarment ta' sfida,
b'għadd imnaqqas u bdil għoli ta' persunal, u dan kien
jeħtieġ l-iffissar ta' prijoritajiet stretti. Waħda mill-isfidi għall-assistenza
mill-UE lill-komunità Turko-Ċiprijotta hija d-diffikultà ta' ppjanar
fit-tul u fuq terminu medju. Il-programm bħalissa huwa ffinanzjat
mill-marġini tal-baġit tal-UE minħabba li mhux inkluż
fil-qafas finanzjarju multiannwali għall-2007-2013 u l-allokazzjonijiet annwali
mhumiex garantiti. Madankollu, hemm għadd ta’ setturi, inkluż dawk
importanti għall-konformita mal-acquis fil-ġejjieni, fejn huwa
meħtieġ sostenn multiannwali biex l-intervent jirnexxi
bis-sħiħ. 4. Implimentazzjoni matul
il-perjodu ta’ rapportar 4.1. Ħarsa Ġenerali Is-sena 2011 rat il-kuntratti
maġġuri ta' provvista u kostruzzjoni kbira tal-programm tal-2006
jersqu lejn it-tlestija fl-oqsma tal-ilma, l-iskart solidu, il-ħarsien
tan-natura, l-enerġija u t-telekomunikazzjoni. Bosta kuntratti ta'
għotjiet taħt l-iskemi varji għall-NGOs tas-soċjetà
ċivili, l-SMEs, l-iżvilupp rurali, skejjel, boroż ta’studju, u
organizzazzjonijiet tat-taħriġ tlestew. Ingħatat ukoll
assistenza teknika (AT) konsiderevoli b’appoġġ ta’ dawn il-programmi.
L-operazzjonijiet permezz ta’ ġestjoni konġunta mal-UNDP tmexxew
b’appoġġ għall-Kumitat għall-Persuni Nieqsa, trattament
tad-drenaġġ u titjib tal-infrastruttura lokali u urbana. Il-mandat
tal-Kummissjoni skont ir-Regolament dwar l-Għajnuna jinkludi wkoll
it-tħejjija għall-applikazzjoni sħiħa u l-implimentazzjoni
tal-acquis Komunitarju biex tinsab soluzzjoni għall-problema ta'
Ċipru u t-tixrid ta' informazzjoni dwar l-ordni politika u legali
tal-Unjoni Ewropea lill-komunità Turko-Ċiprijotta. Is-sentejn mill-2009
kienu, għalhekk, perjodu intensiv għall-implimentazzjoni
tal-proġetti li fih il-Kummissjoni żviluppat esperjenza kunsiderevoli
fit-trattament ta' restrizzjonijiet lokali. Minkejja l-fatt li xi
infrastruttura maġġuri waslet biex tgħaddi f'idejn
il-benefiċjarju, għad hemm problemi dwar is-sostenibbiltà tal-proġetti.
Kuntratti ta' xogħlijiet għall-impjant ta' desalinizzazzjoni qrib
Sirianokhori/Kumköy u l-bini ta' faċilitajiet għall-protezzjoni
tan-natura f'erba' Żoni Speċjali ta' Protezzjoni Ambjentali, definiti
bħala siti potenzjali ta' Natura 2000, kellhom
jiġu kanċellati mill-Kummissjoni. Problema oħra li rriżultat fl-2011
kienet l-istatus tal-garanziji bankarji maħruġa fil-parti
tat-Tramuntana ta’ Ċipru. Kuntrattur lokali fetaħ kawża
fil-"qorti" lokali biex iwaqqaf lill-Kummissjoni milli tuża
garanziji fuq il-ħlas bil-quddiem u ta’ prestazzjoni wara t-terminazzjoni
ta' kuntratt. Din il-kwistjoni hija ta’ rilevanza għall-programm
inġenerali u, sakemm il-kwistjoni tkun riżolta, se jibqa' jkun hemm
tħassib dwar l-effettività ta' garanziji bankarji lokali. 4.2. Progress skont l-objettivi L-objettiv ġenerali tal-Programm
għall-Għajnuna huwa li jiffaċilita l-għaqda mill-ġdid
ta’ Ċipru billi jinkoraġġixxi l-iżvilupp ekonomiku
tal-komunità Turko-Ċiprijotta b’enfażi partikolari fuq l-integrazzjoni
ekonomika tal-gżira, fuq it-titjib tal-kuntatti bejn
iż-żewġ komunitajiet u mal-UE, u fuq it-tħejjija
tal-implimentazzjoni tal-liġi tal-UE f'każ li jintlaħaq ftehim
komprensiv dwar il-problema ta’ Ċipru. Sar kontribut konsiderevoli
għat-titjib f'ċerti oqsma, partikolarment l-ilma,
id-drenaġġ u l-ambjent, u hemm xi evidenza li d-distakk
fil-PDG/capita bejn iż-żoni kkontrollati mill-gvern u l-parti
tat-Tramuntana ta' Ċipru ġie mnaqqas, għalkemm l-istampa mhix
kompletament ċara minħabba dejta mhux kompleta. 4.2.1. Objettiv 1: Żvilupp
u ristrutturazzjoni tal-infrastruttura Fis-settur tal-ilma, it-tibdil ta’ pajpijiet
tad-distribuzzjoni tal-ilma tal-konkrit tal-asbestos qodma fit-Tramuntana ta’
Nikosija, Kyrenia, Kioneli/Gonyeli u Lefka/Lefke kien tlesta matul l-2011.
F'Nikosija, il-benefiċjarju rrappurta tnaqqis sostanzjali ta' tnaqqis
sostanzjali fit-tnixxiegħat tal-ilma, li jwassal għal tnaqqis globali
tal-provvista tal-ilma lejn il-parti tat-Tramuntana ta' Nikosija minn 0.67
għal 0.40 m3/jum/miter tal-konsumatur. Fiż-żona ta' Morphou/Güzelyurt,
l-ikkummissjonar tal-impjant tat-trattament tad-drenaġġ kien beda
matul it-tieni nofs tal-2011. Barra minn hekk, 53 km ta' netwerk
tad-drenaġġ u 43 km ta' mejns tal-ilma ġew installati. Wara
li jsiru l-konnessjonijiet kollha tad-djar, dan se jipprovdi, għall-ewwel
darba, il-ġbir u t-trattament tad-drenaġġ f’dan ir-reġjun
għal madwar 10,700 persuna biex b'hekk jitnaqqas it-tniġġis
tas-sorsi tal-ilma taħt l-art. Fiż-żona ta' Famagusta,
l-infrastruttura l-ġdida għat-trattament tad-drenaġġ
għal madwar 30,000 persuna qed joqrob it-tlestija u se jkun
kummissjonat matul l-ewwel nofs tal-2012. Il-proġett jinkludi 50 km
ta' netwerks tad-drenaġġ u 45 km ta' netwerks tal-ilma.
Iż-żewġ proġetti f'Famagusta u f'Morphou sofrew minn
dewmien fil-bini, li tefa' piż fuq ir-riżorsi limitati ta'
superviżjoni. Il-kostruzzjoni ta' impjant għat-trattament
tad-drenaġġ bikomunali ġdid ta' Nikosija f'Milia/Haspolat,
kofinanzjat mill-UE u mill-Bord ta' Drenaġġ ta' Nikosija u
implimentat permezz tal-UNDP, kompla fl-2011 u l-kummissjonar mistenni
fit-tieni nofs tal-2012. L-akbar proġett fis-settur tal-ilma kien dak
tal-impjant ta' desalinizzazzjoni fi Sirianokhori/Kumköy għal EUR 27 miljun,
sabiex jipprovdi l-ilma għal 100,000 ruħ u jitnaqqas
l-isfruttament żejjed tal-akwifer ta' Morphou, li attwalment huwa s-sors
tal-ilma ewlieni fiż-żona. Il-programm kellu problemi inkluż
restrizzjonijiet fuq l-aċċess għas-sit imposti minn l-armata
Torka, li tfaċċaw fl-aħħar tal-2010. Ladarba dawk
ir-restrizzjonijiet tneħħew f'Marzu 2011, il-kuntrattur ma kienx
dispost li jkompli. Il-Kummissjoni temmet il-kuntratt f’Diċembru 2011. Dwar il-ħarsien tan-natura, ġew
ippreparati abbozzi ta' pjanijiet maniġerjali għaż-Żoni
Speċjali ta' Protezzjoni Ambjentali kollha (SEPAs) u saru laqgħat ta'
konsultazzjoni mal-partijiet interessati lokali. Tlestiet netwerk ta'
mogħdijiet għall-mixi ta' iktar minn 600 km. Kostruzzjoni ta'
ċentri ta' informazzjoni u ġestjoni li jinsabu f’erba’ SEPAs sofrew
minn prestazzjoni fqira tal-kuntrattur u l-Kummissjoni temmet il-kuntratt
f’Novembru 2011. Il-post tal-arbitraġġ tal-kuntratt huwa
l-Belġju, iżda l-kuntrattur Turko-Ċiprijott lokali fetaħ
kawża fil-qorti "lokali" biex iwaqqaf lill-Kummissjoni milli
tuża' l-garanziji fuq il-ħlas bil-quddiem u dawk ta’ prestazzjoni
mill-bank lokali. Sakemm il-kwistjoni tiġi solvuta, se jibqa' jkun hemm
tħassib dwar l-effettività tal-garanziji bankarji lokali. It-tlestija
tal-binjiet għadha sfida li għandha tkun indirizzata fl-2012.
Sadanittant, it-twassil u l-użu tal-provvisti maħsuba għal tim
tal-protezzjoni tan-natura kienu imdewma. Fir-rigward tal-iskart solidu, ir-rijabilitazzjoni
u l-għeluq tal-miżbla ta' Kato Dhikomo/Aşağı Dikmen
ipprogressaw sew u se jitlestew fl-ewwel nofs tal-2012. L-istazzjon ta'
trasferiment ta' Famagusta u l-miżbla l-ġdida f'Koutsoventis/Güngör
tlestew fl-2011. It-trasferiment u l-ftuħ ta’ faċilitajiet ġodda
kien, madankollu, imdewwem minħabba li l-benefiċjarju ma kienx
kapaċi jistabbilixxi l-entità operattiva meħtieġa.
Irriżulta wkoll dewmien minn kawża fil-"qorti" legali
mressqa minn università fil-qrib għal raġunijiet ambjentali.
Il-każ ġie miċħud mill-"qorti", iżda dan,
sadanitant, wassal għal rimi temporanju f'żona ġdida qrib is-sit
ta' Kato Dhikomo/Aşağı Dikmen. Il-faċilità tal-iskart
mediku tal-isptar ewlieni fil-parti tat-Tramuntana ta' Nikosija ġiet
mgħoddija lejn l-aħħar tal-2011. Fis-settur tal-enerġija, il-bqija
tal-kuntratti ta' provvista u ta' Assistenza Teknika tlestew. Il-kostruzzjoni
ambizzjuża tal-Impjant tal-Enerġija Solari ta' 1.27 MW tlesta u
l-installazzjoni ilha titħaddem b'kapaċità sħiħa minn
Novembru 2011. L-allokazzjoni ta' persunal iddedikat
mill-benefiċjarju hija meħtieġa, madankollu, għall-użu
sostenibbli u effikaċji tal-istallazzjoni ta’ ġenerazzjoni u
s-sistema ta' kontroll. L-Assistenza Teknika għar-ristrutturar tal-utilità
elettrika u r-riforma tal-politika tas-settur ma sarxs b'mod effikaċji
minħabba nuqqas ta’ kooperazzjoni mill-kontropartijiet. Fis-settur tat-telekomunikazzjoni,
it-tagħmir kollu għal titjib tan-netwerk ġie fornit lis-siti u
l-biċċa l-kbira ġie installat, iżda kien hemm dewmien fi
tħejjija tas-sit u l-kontribut tekniku mill-benefiċjarju.
Il-proġett għandu jitlesta sa nofs l-2012. Il-komponent
tal-Assistenza Teknika ġie estiż skont dan. Il-"liġi"
bid-dettalji tal-modalitajiet tal-liberalizzazzjoni tas-settur
tal-komunikazzjonijiet elettroniċi ġiet adottata
f’Diċembru 2011. Il-kundizzjonijiet meħtieġa biex tkun
isseparata l-provvista ta' servizzi mill-operazzjoni tan-netwerk għad
iridu jiġu sodisfatti sabiex ikun żgurat trasferiment mingħajr
xkiel u l-użu sostenibbli tal-assi ffinanzjati mill-UE. Taħt il-proġett tas-sigurtà
tat-traffiku, il-proġetti kollha tal-Assistenza Teknika u ta'
provvista huma lesti. Ġew ippreparati pjanijiet ta' ġestjoni
tat-traffiku, il-bażi tad-dejta tal-informazzjoni dwar l-inċidenti u
s-sistema tal-ġbir tad-dejta huma effettivi u t-tagħmir
għall-ispezzjoni tal-vetturi ġie installat u qed jintuża.
Il-kampanja ta' edukazzjoni biex tippromwovi s-sigurtà tat-traffiku
seħħet fil-bidu tal-2011 u tat xi riżultati pożittivi u
immedjati bi tnaqqis sinifikanti fl-għadd ta’ inċidenti gravi.
Fl-aħħar nett, wara bosta dewmien, il-proġett biex ikunu
eliminati l-"punti suwed" tal-inċidenti tat-traffiku għandu
jitlesta sal-ewwel nofs tal-2012. 4.2.2. Objettiv 2: Promozzjoni
ta’ żvilupp soċjali u ekonomiku Erba' timijiet tal-Assistenza Teknika komplew
iwasslu taħriġ u għajnuna lill-bdiewa, il-veterinarji u
l-kontropartijiet għall-iżvilupp rurali inkluż
l-appoġġ għall-implimentazzjoni tal-għotjiet.
Iż-żewġ skemi ta’ għotjiet Titjib fil-Produzzjoni
Agrikola u Appoġġ għall-Intrapriża Rurali
tlestew fl-2011, iżda ħafna mis-37 proġett taħt Żvilupp
Komunitarju permezz ta’ Inizjattivi tal-Irħula sofrew dewmien,
liema dewmien irriżulta partikolarment mill-akkwist ta' xogħlijiet
infrastrutturali. Tħejjew żewġ sejħiet addizzjonali
għall-proposti, biex jiġu ffinanzjati mill-baġit tal-2011. Taħt
il-proġett Aġġornament tal-Infrastruttura Urbana u Lokali
implimentat b'ġestjoni konġunta mal-UNDP, kienu ffinalizzati bosta
xogħlijiet ta' rijabilitazzjoni f’diversi villaġġi fil-parti
tat-Tramuntana ta’ Ċipru (Louroukina/Akıncilar, Tremetousia/Erdemli,
Galinoporni/Kaleburnu u Kormakitis/Kormacit). Ir-rinovazzjoni
tas-suq fil-parti tat-Tramuntana tal-belt iffortifikata ta’ Nikosija kompliet u
se tkun lesta fl-2012. L-attivitajiet tal-assistenza teknika għar-Riforma
Kontinwa tas-Settur tal-Edukazzjoni Primarja u Sekondarja komplew jiffokaw
fuq il-bini tal-kapaċitajiet tal-partijiet interessati ewlenin inkluż
taħriġ intensiv għal tim ewlieni ta’ spetturi, żjarat ta'
studju, taħriġ u appoġġ dwar edukazzjoni ffukata fuq
it-tfal, l-iżvilupp ta’ standards ta' kwalità u l-input
għall-iżvilupp tas-Sistema Ewropea ta' Ġestjoni
tal-Informazzjoni. Il-proġett intemm f’Diċembru 2011.
L-eżitu ewlieni kien abbozz ta’ dokument ta’ viżjoni u missjoni
għas-settur tal-edukazzjoni fil-parti tat-Tramuntana ta’ Ċipru.
Ħafna mit-72 kuntratt ta' għotja li ġew iffirmati ma'
skejjel lokali spiċċaw fl-2011. Sebgħa biss se jkomplu fl-2012. L-Assistenza Teknika kienet provduta
għall-iżvilupp ta’ Sistemi ta’ Taħriġ u Edukazzjoni
Vokazzjonali, Tagħlim Tul il-Ħajja u Miżuri Attivi
għas-Suq tax-Xogħol, inkluż il-ftuħ
taċ-ċentru għall-impjiegi f’Nikosija, żjarat ta’studju u
konferenzi barra l-pajjiż. L-isforzi kienu kkonċentrati fuq
taħriġ għall-partijiet interessati f’oqsma
bħall-intraprenditorija u konsulenza dwar il-karriera u l-kollaborazzjoni
mal-kontropartijiet lokali kienet produttiva ferm. Il-proġett intemm fi
Frar 2012. Taħt il-proġett għat-Tagħlim Tul
il-Ħajja, Inklużjoni Soċjali u Miżuri Attivi
għas-Suq tax-Xogħol, mill-2008 ingħataw 31 għotja
lill-SMEs, Kmamar tal-Kummerċ u organizzazzjonijiet oħra ta’
taħriġ. Il-biċċa l-kbira tlestew fl-2011 u tnejn biss se
jkomplu fl-2012. B'appoġġ
għall-Kompetittività tal-SMEs, 23 kuntratt
għall-għotjiet kienu għaddejjin matul l-2011. Kien hemm dewmien
minħabba nuqqas ta’ esperjenza relatata mal-għotjiet tal-UE minn SMEs
benefiċjarji, iżda l-kuntratti kollha se jintemmu fl-2012. Is-settur
privat irċieva wkoll appoġġ għal Assistenza Teknika li
jippromwovi l-prattiċi tajba tan-negozju. Riżultat sinifikanti kien
l-adozzjoni ta’ Strateġija għall-Iżvilupp tas-Settur Privat
mill-komunità Turko-Ċiprijotta. Saru wkoll inizjattivi tas-suq
speċifiċi għas-settur biex jippromwovu l-prodotti lokali
f'Nikosija u Famagusta. It-taħriġ fl-intraprenditorija u
fil-ġestjoni taċ-ċiklu tal-proġett beda fl-2011 u se
jkompli fl-2012. Fis-settur tal-ICT, ingħatat għajnuna biex tkun
żviluppata l-istrateġija għall-governanza elettronika. 4.2.3. Objettiv 3: Trawwim
tar-rikonċiljazzjoni, miżuri ta’ tisħiħ tal-kunfidenza, u
appoġġ lis-soċjetà ċivili Appoġġ lill-Kumitat
dwar Persuni Nieqsa għall-eżumazzjoni, l-identifikazzjoni u r-ritorn
tal-fdalijiet, amministrat b’mod konġunt mal-UNDP, jinsab għaddej.
Ix-xogħol issa jiffoka aktar fuq l-eżumazzjonijiet individwali
minflok l-eżumazzjonijiet tal-massa u dan influwenza l-ħeffa
tal-proċess. Ftehim ġdid ta' Kontribuzzjoni mal-UNDP, li jkompli
x-xogħol, aktarx li jkun iffirmat fl-2012. It-tneħħija tal-mini fiż-żona
ta' lqugħ kważi tlestiet. Il-kontinwazzjoni tal-attivitajiet
iffinanzjati mill-UE għat-tneħħijja tal-mini qed tkun imfixkla
minn nuqqas ta' qbil li hemm dwar aċċess għaż-żoni mminati
li fadal fiż-żona ta' lqugħ jew l-estensjoni
tat-tneħħijja tal-mini għal żoni 'l barra
miż-żona ta' lqugħ. Evalwazzjoni finali tal-proġett kienet
pożittiva, u tefgħet enfasi fuq l-apprezzament tal-proġett
mill-partijiet interessati kollha. Sa issa mill-44 proġett taħt tliet
skemi ta’ għotjiet għas-Soċjetà Ċivili fl-Azzjoni, 27 ġew
konklużi jew huma qrib it-tlestija tagħhom. Għaxar proġetti
se jtemmu l-attivitajiet tagħhom fl-2012. Tim tal-assistenza teknika
pprovda gwida lill-applikanti dwar il-ġestjoni tal-għotjiet. Aktar
taħriġ se jkun meħtieġ biex jakkumpanja s-sejħa li
jmiss għall-għotjiet fl-2012, minħabba li l-kapaċità
tal-benefiċjarji sabiex jipproduċu applikazzjonijiet ta' kwalità
tajba għall-għotjiet tal-UE u għall-amministrazzjoni
tal-għotjiet u r-rappurtar tal-attivitajiet qed tirriżulta
insuffiċjenti f'bosta każijiet. 4.2.4. Objettiv 4: It-Tqarrib
tal-komunità Turko-Ċiprijotta lejn l-Unjoni Ewropea Għall-ħames sena tal-Programm
tal-Boroż ta' Studju, ingħataw 89 borża ta' studju (9
għalliema, borża universitarja 1, 79 gradwat),
bl-għażla ħielsa bejn programm ta' studju jew ta'
taħriġ, għalkemm ingħatat prijorità
għas-suġġetti tekniċi u amministrattivi fejn hemm skarsezza
ta’ ħiliet fil-komunità Turko-Ċiprijotta. Evalwazzjoni tal-iskema ta’
boroż ta’ studju se ssir fl-2012. Il-viżibilità kienet prinċipalment
żgurata permezz tal-proġett Infopoint u l-2011 kienet sena li
ħalliet il-frott b'37 avveniment. L-akbar avveniment iffinanzjat
mill-UE ġie organizzata bil-kollaborazzjoni tal-Assoċċjazzjoni
Turko-Ċiprijotta għall-Benesseri tat-Tfal u attira madwar 1000 parteċipant.
Minbarra dan, l-arkivji tar-ritratti u filmati tħejjew u kien hemm
żewġ konferenzi akkademiċi organizzati bil-parteċipazzjoni
ta’ skulari magħrufa internazzjonalment u lokalment u akkademiċi
Ċiprijotti Torok u Ċiprijotti Griegi. Kien hemm ukoll tmien
ħarġiet ta' Infopoint Newsbulletin ppubblikati bit-Tork u waħda
bl-Ingliż li jkopru l-Programm ta’ Għajnuna u kwistjonijiet attwali
tal-UE. 4.2.5. Objettiv 5: Tħejjija
tal-komunità Turko-Ċiprijotta fl-introduzzjoni u l-implimentazzjoni
tal-acquis communautaire L-istrument tal-Kummissjoni għall-Assistenza
Teknika u Skambju ta' Informazzjoni (ATIEX) jgħin biex jipprepara
lill-komunità Turko-Ċiprijotta għall-implimentazzjoni tal-acquis tal-UE
wara s-soluzzjoni tal-problema ta' Ċipru. ATIEX jappoġġa
t-tħejjija ta' abbozzi legali konformi mal-acquis, li mbagħad ikunu
suġġetti għal reviżjoni u l-approvazzjoni permezz ta'
proċessi lokali. Permezz tat-ATIEX, iktar minn 80 espert tal-UE
wettqu 528 azzjoni fl-2011, inkluż korsijiet ta' taħriġ,
workshops, u żjarat ta’ studju. L-attivitajiet segwew il-Programm
għall-Applikazzjoni Futura tal-Acquis (PFAA), li jipprovdi qafas
tat-terminu medju għall-intervent. Barra mit-13-il settur tal-PFAA,
l-assistenza kienet ipprovduta fl-2011 fil-Moviment Liberu tal-Merkanzija,
id-Drittijiet tal-Proprjetà Intellettwali u r-Rikonoxximent Reċiproku ta'
Kwalifiki Professjonali. Marbut mal-ġestjoni ġejjiena tal-Fondi
tal-UE wara li jintlaħaq ftehim, ingħata wkoll taħriġ fuq
il-Ġestjoni tan-Nefqa Pubblika. Fl-aħħar nett, il-kummerċ
min-naħa għall-oħra tal-Linja l-Ħadra (ir-Regolament 866/2004)
ġie appoġġat ukoll minn esperti tat-ATIEX mill-Istati Membri
tal-UE li ġew mobilizzati biex iwettqu spezzjonijiet fitosanitarji/veterinarji
regolari tal-patata u l-ħut. Preparazzjonijiet għal ċiklu
ġdid ta’ assistenza mit-ATIEX kienu mnedija fl-aħħar tal-2011
b'kooperazzjoni mal-benefiċjarji. Qed jintuża t-tagħmir ipprovdut fis-snin
preċedenti taħt kuntratti għall-monitoraġġ tal-kwalità
tal-arja. Iż-żewġ kuntratti ta' Assistenza Teknika għal dan
is-settur intemmu. It-tagħmir jappoġġa l-konformità mal-abbozz
il-ġdid tal-"liġi" ambjentali. Is-sostenibbiltà tirrikjedi
impenn għall-persunal u għall-manutenzjoni tat-tagħmir fuq
il-medda twila ta' żmien. Il-progress tal-abbozz
tal-“leġiżlazzjoni" mmirata lejn l-allinjament mal-acquis
permezz tal-proċess ta’ approvazzjoni kienet, madanakollu, aktar bil-mod
milli kien ittamat. Ir-riforma tal-"liġi" tat-telekomunikazzjoni
kienet finalment adottata fi tmiem l-2011, iżda l-"liġi"
ambjentali ġiet imdewma. 4.2.6. Proġetti oħra Fond Fiduċjarju ta' EUR 1 miljun
mal-Bank Dinji biex jitwettaq Programm ta' Analiżi Ekonomika
għat-Tkabbir u għall-Iżvilupp Sostenibbli nbeda
mill-ġdid fl-2011 u Rapport ta' Inventarju ngħata f'Diċembru. 4.3. Eżekuzzjoni finanzjarja
(kuntratti u ħlasijiet) 4.3.1. Għoti ta' kuntratti Impenji fl-2011 kienu EUR 7,45 miljun (66 %
tal-previżjoni għal Jannar ta’ EUR 11,2 miljun). Impenji
għal għotjiet tal-iskejjel u għall-Ftehim ta' Kontribuzzjoni
mal-UNDP fil-qasam tal-Wirt Kulturali ddewmu sal-2012. 4.3.2. Ħlasijiet Il-ħlasijiet fl-2011
ammontaw għal EUR 49,98 miljun (67 % tal-previżjoni
għal Jannar). Matul is-sena, madankollu, il-mira ġiet ivvalutata
mill-ġdid u imnaqqsa b'EUR 24,5 miljun. Dan kien minħabba
t-terminazzjoni ta' żewġ proġetti ta' xogħlijiet, dewmien
fi proġetti ta' skala kbira fil-qasam tal-ilma u t-telekomunikazzjoni u
t-tlestija tard ta' proġetti ta' għotja, partikolarment dawk li
jittrattaw l-aġġornament tal-irħula. Mill-projezzjoni riveduta, 100 %
kienu żburżati. B'kollox, EUR 179 miljun
(69 % tal-ammont globali ikkuntrattat mill-bidu tal-programm fl-2006)
kienu żbursati sa tmiem l-2011. L-għadd ta' kuntratti miftuħa
fl-aħħar tal-2011 kien 533. 4.4. Monitoraġġ Il-Mekkaniżmu ta’ Reviżjoni Iterim (IRM)
biannwali jservi bħala forum għal diskussjoni dettaljata tal-programm
mal-benefiċjarji. Il-persunal tal-KE wkoll iwettaq monitoraġġ
kontinwu permezz ta' żjarat fuq il-post, laqgħat fuq is-sit u
l-laqgħat tal-Kumitat tat-Tmexxija tal-Proġett. L-attivitajiet
tat-ATIEX huma monitorjati permezz ta' aktar minn 20 Grupp tat-Tmexxija
tal-Proġett, li kull wieħed iltaqa' darbtejn fl-2011, kif ukoll
il-laqgħat biannwali tal-Mekkaniżmu ta' Monitoraġġ.
Il-loġistika tat-ATIEX hija monitorjata permezz tas-Sistema onlajn
għall-Ġestjoni tat-ATIEX. Fil-parti l-kbira tal-oqsma ta' intervent,
nuqqas ta' esperjenza jew kapaċità min-naħa tal-benefiċjarju
tikkawża diffikultajiet fl-implimentazzjoni jew dewmien. Benefiċjarji
tal-għotjiet, pereżempju, esperjenzaw problemi bil-proċeduri
tal-UE, partikolarment għal akkwist bl-użu tal-fondi tal-għotja.
Dan ġie indirizzat permezz ta' Unitajiet ta' Ġestjoni
tal-Proġetti, stabbiliti sabiex jassistu lid-detenturi ta’ għotja
fl-amministrazzjoni tal-għotja. Fil-każ ta' proġetti
infrastrutturali jew ta' provvista, l-amministrazzjoni ċentrali jew lokali
Turko-Ċiprijotta, li se tkun responsabbli għall-operazzjoni u
l-manutenzjoni, qiegħda ssibha diffiċli biex tipprovdi riżorsi
xierqa u twaqqaf strutturi xierqa f’għadd ta’ każijiet. Assistenza
Teknika xierqa hija provduta biex issostni lill-benefiċjarji permezz
tal-perjodu ta' trasferiment. 4.5. Awditi u kontrolli Il-Qorti Ewropea tal-Awdituri wettqet awditjar ta'
prestazzjoni fl-2011. Ir-rapport se jkun ippubblikat fl-2012. Ir-Rapport tal-Awditjar tal-2008 dwar
il-Kapaċità tal-Awditjar Intern ta' ELARG kien supplimentat b'segwitu tal-2011
li kkonkluda li r-rakkomandazzjonijiet kollha issa ġew implimentati,
għalkemm xi riskju residwali ġie identifikat fit-trasferiment ta'
xogħlijiet u provvisti. Kontroll ex-post twettaq fl-aħħar tal-2010
mill-Unità tal-Awditjar Operazzjonali u l-Evalwazzjoni tad-DĠ ELARG biex
tivverifika l-legalità u r-regolarità ta' sett ta' 23 tranżazzjoni.
Ir-rapport finali f’Mejju 2011 għamel xi osservazzjonijiet dwar
il-proċeduri, li qed jitqiesu. Awditjar estern twettaq fuq 12-il kuntratt
ta' għotja magħżula u r-rapport finali se jiġi ppubblikat
fl-ewwel nofs tal-2012. 4.6. Evalwazzjoni Reviżjoni fis-settur tal-ilma nbdiet fl-2011
u se tikkontribwixxi għall-ipprogrammar futur. Studju tal-Bank Dinji dwar
l-aspetti ekonomiċi tal-ekonomija Turko-Ċiprijotta kien ukoll
għaddej fl-2011. Sforz maġġuri ta' evalwazzjoni kien previst
għall-2012, meta l-parti l-kbira tal-programm tal-2006 se tispiċċa. 4.7. Informazzjoni,
Pubbliċità u Viżibilità Il-viżibilità kienet żgurata permezz ta'
Infopoint (ara Objettiv 4). Barra minn hekk, timijiet ta'
Assistenza Teknika mill-proġetti separati ngħataw il-kompitu li
jtejbu l-viżibilità. Għadd ta’ avvenimenti relatati mat-tlestija
tal-proġetti saru wkoll mill-benefiċjarji tal-għotja. Sitt
stqarrijiet għall-istampa relatati mal-Programm ta' Għajnuna
għall-komunità Turko-Ċiprijotta ġew mxerrda
mir-Rappreżentanza tal-Kummissjoni f’Ċipru. 4.8. Konsultazzjonijiet mal-Gvern
tar-Repubblika ta’ Ċipru Saru laqgħat regolari mar-rappreżentanti
tal-Gvern tar-Repubblika ta’ Ċipru, b’mod partikolari meta uffiċjali
għolja tal-Kummissjoni żaru l-gżira. Il-Kummissjoni tiltaqa’
wkoll regolarment mar-Rappreżentanza Permanenti fi Brussell.
Il-Kummissjoni tkompli toqgħod fuq il-kooperazzjoni tal-Gvern
tar-Repubblika ta’Ċipru għall-verifika tas-sjieda tal-proprjetà. 5. Konklużjonijiet Il-programm ikompli jiltaqa' ma' sfidi
fl-implimentazzjoni tiegħu, fin-nuqqas ta' benefiċjarju rikonoxxut
jew programm għar-ristrutturar istituzzjonali dirett. Il-progress lejn
l-ilħuq tal-objettiv tar-Regolament li jiffaċilita
r-riunifikazzjoni ta' Ċipru billi jinkoraġġixxi l-iżvilupp
ekonomiku tal-Komunità Turko-Ċiprijotta jibqa' diffiċli biex jintlaħaq,
minħabba l-ambjent operattiv u s-sitwazzjoni politika u ekonomika sui
generis prevalenti fil-parti tat-Tramuntana ta’ Ċipru. Il-proċess ta’
tħejjija għall-adozzjoni u l-implimentazzjoni futura tal-acquis hi
kajmana u l-komunità Turko-Ċiprijotta x'aktarx li teħtieġ
appoġġ kunsiderevoli sabiex tlaħħaq mar-rekwiżiti
tal-acquis f’ħafna oqsma wara li tinsab soluzzjoni u jkun hemm
riunifikazzjoni Matul il-perjodu tar-rappurtaġġ,
l-attivitajiet iffukaw fuq it-tlestija tal-programm tal-2006. Għadd
sostanzjali ta' proġetti ta' infrastruttura u ta' forniment
tat-tagħmir kienu qed iqarrbu lejn tlestija. L-impjant ta' Morphou
għat-trattament tad-drenaġġ beda jirċievi
d-drenaġġ u l-impjant pilota għall-enerġija solari, li
tlesta u kien trasferit f'Lulju, qed jopera f’kapaċità sħiħa.
Saru sforzi biex jippreparaw il-benefiċjarji għat-trasferiment u
l-operazzjoni futura, imma nuqqas ta’ riżorsi u esperjenza jfissru li
sostanzjalment aktar impenn u input huma meħtieġa mill-amministrazzjoni
Turko-Ċiprijotta biex jiżguraw is-sostenibbiltà tal-investimenti.
Strutturi ineffiċjenti u responsabbiltajiet mhux ċari huma
l-kawżi sottostanti f'bosta każijiet. Dan għandu jkun indirizzat
fl-2012. Il-bosta skemi ta’ għotjiet imnedija
mill-2009 intlaqgħu tajjeb, iżda kienu impenjattivi f'termini ta'
riżorsi umani, parzjalment minħabba n-nuqqas ta' esperjenza
tal-benefiċjarji għal ġestjoni tal-proġett u dik
finanzjarja. Hekk kif il-parti l-kbira tal-programm tal-2006
hija kompluta, evalwazzjoni analitika globali tal-Programm ta' Għajnuna,
kif ukoll studji tal-impatt speċifiċi għas-settur huma
meħtieġa u se jsiru fl-2012. Riżorsi umani għat-tim tal-Programm
jibqgħu sfida, parzjalment minħabba l-kompożizzjoni tal-programm
intensiv fl-għotjiet, iżda wkoll minħabba tnaqqis globali
tar-riżorsi umani previsti fis-servizzi kollha tal-Kummissjoni. Il-programm jibbenefika minn iktar ippjanar fuq
terminu medju u fit-tul li għalih huma neċessarji arranġamenti
iktar stabbli għall-iffinanzjar tal-kostijiet operazzjonali u
tal-persunal. [1] ĠU L65, 7.3.2006, p.5. [2] Id-deċiżjonijiet tal-Kummissjoni C(2011)337 u
C(2011)4443.