14.11.2011   

MT

Il-Ġurnal Uffiċjali tal-Unjoni Ewropea

C 333/232

I.

Skont id-dispożizzjonijiet tal-Artikolu 287 tat-Trattat dwar il-funzjonament tal-Unjoni Ewropea (TFUE) u l-Artikolu 141 tar-Regolament Finanzjarju applikabbli għall-għaxar FEI, li japplika wkoll għall-FEI ta’ qabel, il-Qorti vverifikat:

II.

Skont l-Artikoli 310 sa 325 tat-TFUE u r-Regolamenti Finanzjarji applikabbli għat-tmien, id-disa' u l-għaxar FEI, il-maniġment hu responsabbli għall-preparazzjoni u l-preżentazzjoni ġusta tal-kontijiet annwali tal-FEI u l-legalità u r-regolarità tat-tranżazzjonijiet li fuqhom huma bbażati:

III.

Ir-responsabbiltà tal-Qorti hi li tipprovdi, abbażi tal-verifika tagħha, lill-Parlament Ewropew u lill-Kunsill b'dikjarazzjoni ta’ assigurazzjoni dwar l-affidabbiltà tal-kontijiet u l-legalità u r-regolarità tat-tranżazzjonijiet ta’ bażi. Il-Qorti wettqet il-verifika tagħha skont l-Istandards Internazzjonali tal-Verifika u l-Kodiċijiet tal-Etika tal-IFAC u l-Istandards Internazzjonali tal-Istituzzjonijiet Supremi tal-Verifika tal-INTOSAI, safejn dawn huma applikabbli fil-kuntest tal-FEI. Dawn l-istandards jeħtieġu li l-Qorti tippjana u twettaq il-verifika biex tikseb assigurazzjoni raġonevoli dwar jekk il-kontijiet annwali tal-FEI humiex ħielsa minn dikjarazzjoni żbaljata materjali u dwar jekk it-tranżazzjonijiet ta’ bażi humiex legali u regolari.

IV.

Verifika tinvolvi t-twettiq ta’ proċeduri sabiex tinkiseb evidenza tal-verifika dwar l-ammonti u l-iżvelar mogħtija fil-kontijiet konsolidati u dwar il-legalità u r-regolarità tat-tranżazzjonijiet li huma bbażati fuqhom. Il-proċeduri magħżula jiddependu fuq l-evalwazzjoni tal-awditur, li tinkludi valutazzjoni tar-riskji ta’ dikjarazzjoni żbaljata materjali fil-kontijet konsolidati u ta’ nuqqas ta’ konformità materjali tat-tranżazzjonijiet ta’ bażi mar-rekwiżiti tal-qafas legali tal-FEI, kemm jekk minħabba frodi jew inkella żball. Meta jivvaluta dawk ir-riskji, l-awditur jikkunsidra l-kontroll intern rilevanti għall-preparazzjoni u l-preżentazzjoni ġusta tal-kontijiet finali konsolidati, u s-sistemi ta’ sorveljanza u kontroll implimentati biex jassiguraw il-legalità u r-regolarità tat-tranżazzjonijiet ta’ bażi, sabiex jitfasslu proċeduri tal-verifika li huma xierqa fiċ-ċirkostanzi. Verifika f'dan il-kuntest tinkludi wkoll evalwazzjoni tal-adegwatezza tal-politika tal-kontabilità użata u tar-raġonevolezza tal-estimi tal-kontabilità, kif ukoll evalwazzjoni tal-preżentazzjoni ġenerali tal-kontijiet konsolidati u r-rapporti annwali tal-attività.

V.

Il-Qorti tqis li l-evidenza tal-verifika miksuba hija biżżejjed u xierqa biex tipprovdi bażi għad-dikjarazzjoni ta’ assigurazzjoni tagħha.

VI.

Fl-opinjoni tal-Qorti, il-kontijiet annwali finali tat-tmien, id-disa' u l-għaxar FEI jippreżentaw b'mod ġust, fl-aspetti materjali kollha, il-pożizzjoni finanzjarja tal-FEI fil-31 ta’ Diċembru 2010, u r-riżultati tal-operazzjonijiet tagħhom u l-likwidità għas-sena finanzjarja li ntemmet dakinhar, skont id-dispożizzjonijiet tar-Regolament Finanzjarju tal-FEI u r-regoli tal-kontabilità adottati mill-uffiċjal tal-kontabilità.

VII.

Fl-opinjoni tal-Qorti, id-dħul li fuqu huma bbażati l-kontijiet għas-sena li ntemmet fil-31 ta’ Diċembru 2010, fl-aspetti materjali kollha huma legali u regolari.

VIII.

Fl-opinjoni tal-Qorti, l-impenji li fuqhom huma bbażati l-kontijiet għas-sena li ntemmet fil-31 ta’ Diċembru 2010, fl-aspetti materjali kollha huma legali u regolari.

IX.

Il-verifika tal-Qorti wriet li s-sistemi ta’ sorveljanza u kontroll huma parzjalment effettivi biex jiżguraw ir-regolarità tal-pagamenti. L-istima tal-Qorti għar-rata ta’ żball l-aktar probabbli għall-pagamenti mit-tmien, id-disa' u l-għaxar FEI hija ta’ 3,4 %.

X.

Fl-opinjoni tal-Qorti, minħabba s-sinifikanza tal-kwistjonijiet deskritti fil-bażi għal opinjoni avversa dwar il-legalità u r-regolarità tal-pagamenti fil-bażi tal-paragrafu tal-kontijiet, il-pagamenti fil-bażi tal-kontijiet għas-sena li ntemmet fil-31 ta’ Diċembru 2010 huma materjalment milquta minn żbalji.