EUR-Lex Access to European Union law
This document is an excerpt from the EUR-Lex website
Document 52011SC0815
Recommendation for a COUNCIL RECOMMENDATION on the National Reform Programme 2011 of Slovakiaand delivering a Council opinionon the updated Stability Programme of Slovakia, 2011-2014
Recommendation for a COUNCIL RECOMMENDATION on the National Reform Programme 2011 of Slovakiaand delivering a Council opinionon the updated Stability Programme of Slovakia, 2011-2014
Recommendation for a COUNCIL RECOMMENDATION on the National Reform Programme 2011 of Slovakiaand delivering a Council opinionon the updated Stability Programme of Slovakia, 2011-2014
Recommendation for a COUNCIL RECOMMENDATION on the National Reform Programme 2011 of Slovakiaand delivering a Council opinionon the updated Stability Programme of Slovakia, 2011-2014
Rakkomandazzjoni għal RAKKOMANDAZZJONI TAL-KUNSILL dwar il-Programm Nazzjonali ta' Riforma 2011
tas-Slovakkja
u l-għoti ta' opinjoni tal-Kunsill
dwar il-Programm ta' Stabilità aġġornat tas-Slovakkja, 2011-2014 IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u partikolarment l-Artikoli 121(2)
u 148(4) tiegħu, Wara li kkunsidra r-Regolament tal-Kunsill
(KE) Nru 1466/97 tas-7 ta’ Lulju 1997 dwar
it-tisħiħ tas-sorveljanza ta' pożizzjonijiet ta' baġit u s-sorveljanza
u l-koordinazzjoni ta' politika ekonomika[1],
u partikolarment l-Artikolu 5(3) tiegħu, Wara li kkunsidra r-rakkomandazzjoni
tal-Kummissjoni Ewropea[2], Wara li kkunsidra l-konklużjonijiet
tal-Kunsill Ewropew, Wara li kkunsidra l-opinjoni tal-Kumitat
tal-Impjiegi, Wara li kkonsulta l-Kumitat Ekonomiku u
Finanzjarju, Billi: (1)
Fis-26 ta’ Marzu 2010, il-Kunsill
Ewropew qabel mal-proposta tal-Kummissjoni Ewropea li tvara strateġija
ġdida għall-impjiegi u t-tkabbir, Ewropa 2020, imsejsa fuq
koordinazzjoni msaħħa tal-politiki ekonomiċi, li tiffoka fuq
l-oqsma ewlenin fejn jeħtieġ azzjoni biex tingħata spinta
lill-potenzjal tal-Ewropa għat-tkabbir sostenibbli u l-kompetittività. (2)
Fit-13 ta’ Lulju 2010, il-Kunsill
adotta rakkomandazzjoni dwar il-linji gwida ġenerali għall-politiki
ekonomiċi tal-Istati Membri u l-Unjoni (mill-2010 sal-2014) u
fil-21 ta’ Ottubru 2010 il-Kunsill adotta deċiżjoni
dwar il-Linji Gwida għall-politiki dwar l-impjiegi tal-Istati Membri[3], li flimkien jagħmlu l-"Linji
gwida integrati". L-Istati Membri ġew mistiedna jqisu l-linji gwida
integrati fil-politiki nazzjonali ekonomiċi u okkupazzjonali tagħhom. (3)
Fit-12 ta’ Jannar 2011,
il-Kummissjoni adottat l-ewwel Stħarriġ Annwali tat-Tkabbir, li kien
il-bidu ta’ ċiklu ġdid ta’ governanza ekonomika fl-UE u l-ewwel
semestru Ewropew ta’ koordinazzjoni integrata u ex ante ta’ politika,
imsejsa fuq l-istrateġija Ewropa 2020. (4)
Fil-25 ta’ Marzu 2011, il-Kunsill
Ewropew approva l-prijoritajiet għall-konsolidazzjoni fiskali u r-riforma
strutturali (bi qbil mal-konklużjonijiet tal-Kunsill
tal-15 ta’ Frar u s-7 ta’ Marzu 2011 u b'żieda
mal-Istħarriġ Annwali tat-Tkabbir mill-Kummissjoni). Dan saħaq
fuq il-ħtieġa li tingħata prijorità lir-restawr ta’ baġits
tajbin u s-sostenibilità fiskali, it-tnaqqis tal-qgħad permezz ta’ riformi
fis-suq tax-xogħol u li jsiru sforzi ġodda biex jittejjeb it-tkabbir.
Talab lill-Istati Membri biex isarrfu dawn il-prijoritajiet f'miżuri
konkreti li jiġu inklużi fil-Programmi ta’ Stabilità jew ta’ Konverġenza
tagħhom u fil-Programmi Nazzjonali ta’ Riforma. (5)
Fil-25 ta’ Marzu 2011, il-Kunsill
Ewropew stieden ukoll lill-Istati Membri jipparteċipaw fil-Patt Euro Plus
biex jippreżentaw l-impenji tagħhom fil-ħin
għall-inklużjoni fil-Programmi ta’ Stabilità jew ta’ Konverġenza
tagħhom u fil-Programmi Nazzjonali ta’ Riforma tagħhom. (6)
Fis-28 ta’ April 2011, is-Slovakkja ressqet
il-Programm ta’ Stabilità 2011 tagħha aġġornat li jkopri
l-perjodu 2011-2014 u fit-2 ta’ Mejju 2011 il-Programm
Nazzjonali ta’ Riforma. Sabiex jitqiesu l-konnotazzjonijiet bejniethom,
iż-żewġ programmi ġew ivvalutati fl-istess waqt. (7)
Minħabba l-kummerċ kbir miftuħ
tagħha, u l-ispeċjalizzazzjoni f'oġġetti durabbli
tal-manufattura, l-ekonomija Slovakka sofriet ħafna bil-kollass
fil-kummerċ dinji u d-domanda aggregata ta' wara l-kriżi finanzjarja.
B'riżultat ta' dan, il-PDG fl-2009 naqas b'4,7 % u l-qgħad
żdied għal 12 %. Fl-2010, l-aktar minħabba l-irkupru
tad-domanda esterna, is-sitwazzjoni ekonomika tjiebet sinifikament f'termini ta'
żieda fil-prodott (żieda ta' 4,1 % fil-PDG), iżda kompliet
sejra lura f'termini ta' impjiegi, bil-qgħad jitla' għal 14,5 %,
wieħed mill-ogħla livelli u l-ogħla żidiet fl-UE.
Il-qgħad ser jibqa' sew taħt il-livelli ta' qabel il-kriżi
fl-2011-12. Il-kriżi ġabet deterjorazzjoni sinifikanti fil-finanzi
pubbliċi u l-defiċit tal-amministrazzjoni pubblika żdied minn
2 % tal-PDG fl-2008 għal 8 % tal-PDG fl-2009-10. Il-proporzjoni
dejn-PDG, waqt li baqa' relattivament f'livell baxx, żdied ukoll bi 15-il
punt perċentwali, u laħaq 41 % tal-PDG fl-2010. (8)
Abbażi tal-valutazzjoni tal-Programm ta'
Stabilità aġġornat skont ir-Regolament tal-Kunsill (KE)
Nru 1466/97, il-Kunsill iqis illi x-xenarju makroekonomiku li fuqu
jissejjes il-programm huwa plawsibbli għall-ewwel sentejn, iżda huwa
favorevoli wisq lejn tmiem il-perjodu tal-programm. Il-programm jippjana li
jnaqqas d-defiċit taħt it-3 % tal-PDG fl-2013, skont l-iskadenza
stipulata mill-Kunsill u ulterjorament għal 2,8 % tal-PDG fl-2014.
Lil hinn mill-2011, l-aġġustament huwa ġeneralment ibbażat
fuq in-nefqa. Hemm riskji kontra l-miri baġitarji, l-iktar minħabba
l-implimentazzjoni ta' miżuri proposti. Il-programm ma jipprevedix
l-ilħiq tal-Objettiv ta’ Terminu Medju. L-ilħiq tal-miri
baġitarji għandu jimplika sforz fiskali annwali b'medja ta'
1,4 % tal-PDG għall-2011-2013. (9)
Id-defiċit huwa mistenni li jonqos
sostanzjalment fl-2011 minħabba miżuri ta' konsolidazzjoni
fil-Programm Slovakk ta' Stabilità stmati għal madwar 2,5 % tal-PDG.
L-aġġustament huwa mistenni jkompli matul l-2011 u l-2013 permezz ta'
tnaqqis fid-defiċit ta' madwar 1 punt perċentwali tal-PDG
fis-sena. L-isforz ta' konsolidazzjoni jiffoka primarjament fuq in-naħa
tan-nefqa, permezz ta' ffrankar fin-nefqa fuq oġġetti u servizzi u
fin-nefqa tal-pagi, li madankollu jista' jkun diffiċli biex jiġi
sigwit ulterjurament fuq bażi sostenibbli. Ġeneralment, l-isfida
tas-Slovakkja hija li tiżgura li l-konsolidazzjoni tissalvagwardja u anke
żżid in-nefqa fuq punti li jgħinu t-tkabbir,
bħall-edukazzjoni u l-infrastruttura tat-trasport. B'mod partikolari,
il-livell baxx tal-formazzjoni grossa tal-kapital fiss tal-gvern, li huwa
mistenni li jkompli jonqos, huwa ta' tħassib. Hemm lok li
jiżdied id-dħul mit-taxxi li jagħmlu l-inqas ħsara
lit-tkabbir, bħal taxxi fuq proprjetà u taxxi ambjentali, u li titjieb
l-effiċjenza fil-ġbir tat-taxxi, speċjalment minħabba li
hemm ħafna VAT li ma tinġabarx. (10)
Bis-saħħa tar-riforma tal-2005, li
introduċiet ippjannar multiannwali, baġitjar abbażi ta’
programmi u bosta regoli fiskali, is-Slovakkja tejbet il-qafas fiskali
tagħha b'mod sinifikanti. Madankollu, il-qafas attwali ma waqqafx il-gvern
milli jiffaċċja defiċits anke fi snin ta' tkabbir ekonomiku
għoli. Fost id-dgħufijiet ewlenin hemm il-fatt li l-miri fiskali
għal snin imbiegħda jistgħu jiġu emendati faċilment u
għalhekk ma jservux l-għan li l-proċess baġitarju jibqa'
l-istess fis-snin li ġejjin. Limiti massimi tan-nefqa kif proposti
fil-Programm ta' Stabilità aġġornat u fil-Programm Nazzjonali ta'
Riforma jistgħu jgħelbu dan id-difett, sakemm jinkludu l-ikbar sehem
possibbli tan-nefqa tal-amministrazzjoni pubblika. In-nuqqas attwali ta'
informazzjoni ppubblikata fil-ħin b'mod partikolari għal gvern lokali
u l-fondi tas-sigurtà soċjali huwa ostkalu ieħor
għall-monitoraġġ minn sena għall-oħra
tal-iżviluppi fiskali u l-infurzar tar-regoli fiskali.
Fl-aħħarnett, is-Slovakkja ma għandhiex istituzzjoni
indipendenti, li tista' tiġi involuta direttament fil-ħidmiet
preparatorji, u fil-monitoraġġ u fil-mekkaniżmi ta' valutazzjoni
relatati mal-baġit. (11)
Is-Slovakkja hija fost dawk l-Istati Membri li qed
jiffaċċjaw sfidi sinifikanti fir-rigward tas-sostenibilità fit-tul
tal-finanzi pubbliċi. In-nefqa relatata mat-tixjiħ hija prevista li
tikber b'rata akbar mill-medja tal-UE matul id-deċenji li ġejjin.
Sors ewlieni ta' din iż-żieda ser ikunu l-pensjonijiet, minkejja
riforma ewlenija implimentata fl-2004-06. Ir-riforma ma indirizzatx
sistematikament iż-żidiet previsti għall-ġejjieni
fl-istennija tal-għomor. Pressjonijiet oħrajn
għall-ġejjieni fuq il-pilastru ta' pagament progressiv
(pay-as-you-go) jistgħu jinħolqu minn komponent qawwi ta' mertu
għall-kalkolu ta' pensjonijiet u l-mekkaniżmu ta' indiċizzar.
Tibdiliet fl-2008-09 fil-pilastru totalment finanzjat, inkluż
ir-rekwiżit għal fondi tal-pensjonijiet li jkopru telf imġarrab
u t-tneħħija ta' parteċipazzjoni obbligatorja għal dawk li
jidħlu l-ewwel darba fis-suq tax-xogħol, ippreġudikaw
l-vijabilità tiegħu. Il-Programm Nazzjonali ta' Riforma u l-Programm ta'
Stabilità jipprevedu bosta aġġustamenti għas-sistema
tal-pensjoni li għandhom jindirizzaw id-defiċenzi attwali
tagħha. (12)
Sfida oħra ewlenija hija l-indirizzar ta’
żidiet mdaqqsa fil-qgħad, qabel ma jsir qgħad strutturali.
Ir-rata attwali tal-qgħad hija aktar minn 14 %. Ir-rata
tal-qgħad fuq medda twila ta' 9,2 % tibqa' l-ogħla fl-UE u din
teżisti flimkien ma' differenzi reġjonali kbar u spariġġ
fil-ħiliet. Għalkemm is-suq tal-impjiegi fis-Slovakkja jopera
taħt kundizzjonijiet relattivament flessibbli, il-Gvern jippjana li
jkompli jżid din il-flessibilità permezz ta' emendi fil-kodiċi
tax-Xogħol. Ir-rata tal-qgħad hija partikolarment għolja fost
ħaddiema b'kompetenzi baxxi, u r-rata tal-impjiegi tagħhom hija
waħda mill-aktar baxxi fl-UE. Dan jista' jkun dovut għal porzjon ta'
taxxa relattivament għoli ta' 34 % għal dawk b'paga baxxa
(67 % tal-paga medja), b'inqas inċentivi biex jiġu impjegati
ħaddiema b'kompetenzi baxxi. Barra minn hekk, politiki attivi tas-suq
tax-xogħol imfassla tajjeb u immirati jista' jkollhom rwol ewlieni biex
dawk bla impjieg jerġgħu jingħataw xogħol. Bħalissa,
in-nefqa u l-parteċipazzjoni f'politiki bħal dawn huma fost l-aktar
baxxi fl-UE u għad hemm wisq ftit monitoraġġ u evalwazzjoni
tal-effikaċja tagħhom. Il-Gvern ippjana riforma tas-servizzi tas-suq
tax-xogħol u tal-politiki attivi tas-suq tax-xogħol sa tmiem din
is-sena. (13)
Minħabba l-importanza ta' ħaddiema
b'kompetenzi adegwati għal titjib tal-kompetizzjonji mingħajr prezz,
is-Slovakkja stabilixxiet mira ambizzjuża li żżid il-livell ta'
edukazzjoni mis-17,6 % attwali għal 40 % sal-2020. Bl-iskop li
jitnaqqas l-ispariġġ tal-ħiliet, is-Slovakkja qed tagħmel
riforma tal-edukazzjoni fl-iskejjel u tal-edukazzjoni u t-taħriġ
vokazzjonali, kif iddettaljat fil-Programm Nazzjonali ta' Riforma. Madankollu,
il-livell terzjarju tal-edukazzjoni għadu sewwa taħt il-medja tal-UE,
bi kwistjoni fuq il-kwalità, kif issuġerit minn bosta mill-indikaturi
eżistenti. Il-livell baxx ta' edukazzjoni tal-komunitajiet
marġinalizzati ta' Rom huwa fattur ewlieni li jikkontribwixxi għal
qgħad fit-tul tas-Slovakkja. Il-parteċipazzjoni tan-nies tal-età ta'
impjieg f'tagħlim matul il-ħajja kollha tibqa' baxxa ħafna
(2,8 %) mqabbla mal-medja tal-UE, li donnha għandha effett negattiv
fuq l-impjieg u tkompli tnaqqas l-isforzi għal tnaqqis fir-rata
għolja attwali tal-qgħad. (14)
Fis-Slovakkja, kif juri il-Programm Nazzjonali ta'
Riforma, hemm il-ħtieġa li jiġi promoss ambjent ta’ negozju li
jattira aktar tkabbir, kif ukoll il-ħtieġa li tittejjeb
il-prestazzjoni tal-qrati, l-akkwist pubbliku jsir aktar trasparenti u
l-korruzzjoni tiġi miġġielda, għalkemm hemm riskji relatati
mal-implimentazzjoni. Madankollu, il-problema ta' istituzzjonijiet
pubbliċi dgħajfin mhijiex indirizzata biżżejjed, u baqa'
wisq xi jsir biex jissaħħaħ it-tfassil ta' politika bbażat
fuq evidenza. Fl-amministrazzjoni pubblika, kapaċità insuffiċjenti u
ħafna tibdil ta' persunal inaqqsu pjuttost l-effikaċja u
t-trasparenza tagħha, idgħajfu l-kapaċitajiet analitiċi, u
b'mod ġenerali jfixklu li l-fondi tal-UE jiġu assorbiti b'mod
effikaċi u li r-riżorsi pubbliċi jintużaw b'mod
effiċjenti. Dawn il-fatturi jtelfu l-potenzjal għat-tkabbir
tal-ekonomija u l-kompetittività tagħha. (15)
Is-Slovakkja daħlet f'għadd ta' impenji
taħt il-Patt Euro Plus[4].
L-impenji jirreferu għal tliet oqsma tal-Patt li huma rilevanti
għas-Slovakkja: sostenibilità tal-finanzi pubbliċi, impjiegi, u
kompetittività. Fuq il-lat fiskali, is-Slovakkja hija impenjata li ttejjeb
is-sostenibilità fit-tul tal-finanzi pubbliċi u li ssaħħaħ
il-qafas fiskali nazzjonali billi tadotta att legali ġdid dwar
ir-responsabilità fiskali. Miżuri għall-impjiegi jikkonċernaw
ir-reviżjoni ppjanta tal-kodiċi tax-xogħol bil-għan li
s-suq tax-xogħol isir aktar flessibbli. Il-miżuri tal-kompetittività
jiffokaw fuq tnaqqis tal-piż amministrattiv, l-indirizzar tal-korruzjoni,
żieda fit-trasparenza tal-akkwist pubbliku u s-sistema tal-qrati, u
żieda fl-effikaċja tas-sistema tat-taxxa. Dawn l-impenji msemmija
jirriflettu l-aġenda tar-riforma spjegata fil-Programm ta' Stabilità u
l-Programm Nazzjonali ta' Riforma. Jagħtu spinta lil proġetti ta'
riforma li għaddejjin bħalissa relatati mal-ambjent tan-negozju u
l-infurzar tad-drittijiet, kif ukoll jindirizzaw kwistjonijiet importanti
bħall-pensjonijiet u s-sostenibilità tal-finanzi pubbliċi fit-tul.
Dawn l-impenji ġew ivvalutati u tqiesu fir-rakkomandazzjonijiet. (16)
Il-Kummissjoni vvalutat il-Programm ta' Stabilità u
l-Programm Nazzjonali ta' Riforma, inkluż l-impenji tal-Patt Euro Plus[5]. Mhux biss qieset ir-rilevanza tagħhom
għall-politika sostenibbli fiskali u soċjoekonomika fis-Slovakkja,
iżda wkoll il-konformità tagħhom mar-regoli u l-gwida tal-UE,
fid-dawl tal-ħtieġa ġenerali tat-tisħiħ tal-governanza
ekonomika kumplessiva tal-Unjoni Ewropea billi jiġi pprovdut kontribut
fil-livell tal-UE għal deċiżjonijiet nazzjonali futuri F'dan
il-kuntest, il-Kummissjoni tikkunsidra li hemm riskji kontra l-ilħiq
tal-miri baġitarji lil hinn mill-2011. L-isforz fil-konsolidazzjoni
għandu jissalvagwardja n-nefqa fuq affarijiet li jtejbu t-tkabbir u
jiġi appoġġat b'miżuri li jsaħħu l-governanza fiskali
u s-sostenibilità tal-finanzi pubbliċi fit-tul. Fl-2011-12, għandhom
jittieħdu aktar passi lejn il-miri tat-tisħiħ tas-sorsi
domestiċi għat-tkabbir, l-indirizzar taż-żieda għolja
riċenti fil-qgħad, partikolarment permezz tat-tnaqqis fil-porzjon
tat-taxxa għal ħaddiema b'pagi baxxi, u r-riforma tal-politiki attivi
tas-suq tax-xogħol, l-indirizzar tal-ispariġġ tal-ħiliet,
it-titjib fil-kwalità tal-edukazzjoni u t-taħriġ u tal-ambjent
tan-negozju, u t-tisħiħ tal-istituzzjonijiet pubbliċi u
l-governanza tagħhom. (17)
Fid-dawl ta' din il-valutazzjoni, li tqies ukoll
ir-Rakkomandazzjoni tal-Kunsill skont l-Artikolu 126(7) tat-Trattat dwar
il-Funzjonament tal-Unjoni Ewropea tat-2 ta' Diċembru 2009,
il-Kunsill eżamina l-aġġornament tal-2011 tal-Programm ta'
Stabilità tas-Slovakkja u l-opinjoni tiegħu[6]
hija riflessa partikolarment fir-rakkomandazzjonijiet tiegħu
fil-paragrafi (1), (2) u (3) hawn taħt. B'kunsiderazzjoni
tal-konklużjonijiet tal-Kunsill Ewropew
tal-25 ta’ Marzu 2011, il-Kunsill eżamina l-Programm
Nazzjonali ta’ Riforma tas-Slovakkja, JIRRAKKOMANDA li s-Slovakkja
għandha tieħu azzjoni fil-perjodu 2011-2012 sabiex: (1)
Timplimenta l-baġit 2011 kif previst u
tintroduċi l-miżuri pjanati speċifiċi ta' natura permanenti
fl-2012 u l-2013 biex tnaqqas d-defiċit għal inqas minn 3 %
tal-PDG sal-2013. Tissalvagwarda n-nefqa li ttejjeb it-tkabbir u tisfrutta
l-lok biex iżżid id-dħul billi tkabbar l-effiċjenza
fil-ġbir tal-VAT. (2)
Issaħħaħ il-governanza fiskali billi
fl-2011 tadotta limiti massimi multiannwali u vinkolanti għan-nefqa, li
tkopri l-gvern ċentrali u s-sistema tas-sigurtà soċjali, u
timplimetahom mill-2012. Barra minn hekk, tintroduċi Kunsill Fiskali
indipendenti u tiżgura pubblikazzjoni fil-ħin ta' dejta
baġitarja f'kull livell tal-gvern. (3)
Ittejjeb s-sostenibilità fit-tul tal-finanzi
pubbliċi billi tkompli taġġusta l-pilastru pagament progressiv
tas-sistema tal-pensjonijiet, partikolarment billi tgħaqqad l-età
pensjonabbli mal-istennija tal-għomor, u billi toħloq inċentivi
li jiżguraw il-vijabilità tal-pilastru tal-pensjonijiet iffinanzjat
kompletament, sabiex timxi 'l quddiem lejn sostenibilità fiskali filwaqt li
tiżgura pensjonijiet adegwati. (4)
Tieħu passi biex tappoġġa d-domanda
għall-ħaddiema għad-diżokkupati b'kompetenti baxxi, billi
tnaqqas il-porzjon ta' taxxa għal ħaddiema b'pagi baxxi. Barra minn
hekk, tintroduċi miżuri biex ittejjeb il-kapaċità
amministrattiva tas-servizzi tal-impjiegi pubbliċi bil-għan li
żżid il-miri, it-tfassil u l-evalwazzjoni ta' politiki attivi tas-suq
tax-xogħol, speċjalment għad-diżokkupati
żgħażagħ u dawk li ilhom diżokkupati. (5)
Tagħti spinta lill-implimentazzjoni
tar-riformi ppjanati fl-edukazzjoni, l-edukazzjoni u t-taħriġ
vokazzjonali u tieħu passi biex ittejjeb il-kwalità tal-edukazzjoni
għolja u r-rilevanza tagħha għal ħtiġijiet tas-suq.
Tiżviluppa qafas għal inċentivi kemm għal individwi kif
ukoll għall-impjegaturi biex tħeġġeġ
il-parteċipazzjoni f'tagħlim matul il-ħajja kollha minn dawk
b'kompetenzi baxxi. (6)
Tiżgura l-implimentazzjoni ta' miżuri
ppjanati li huma mmirati lejn applikazzjoni aktar effikaċi tar-regoli
għall-akkwist pubbliku, prestazzjoni u trasparenza ogħla tas-sistema
ġudiżjali. Magħmul fi Brussell, Għall-Kunsill Il-President [1] ĠU L 209, 2.8.1997, p.1. [2] ĠU C , p. . [3] Miżmuma għall-2011,
premezz tad-Deċiżjoni tal-Kunsill 2011/308/UE
tad-19 ta' Mejju 2011. [4] Aktar dettalji dwar l-impenji li saru fil-Patt Euro Plus
jinsabu f'(SEC)(2011) 733. [5] Ara SEC(2011) 733. [6] Prevista fl-Artikolu 5(3) tar-Regolament
tal-Kunsill (KE) Nru 1466/97.