EUR-Lex Access to European Union law
This document is an excerpt from the EUR-Lex website
Document 52011PC0607R(01)
Proposal for a REGULATION OF THE EUROPEAN PARLIAMENT AND OF THE COUNCIL on the European Social Fund and repealing Council Regulation (EC) No 1081/2006
Proposta għal REGOLAMENT TAL-PARLAMENT EWROPEW U TAL-KUNSILL dwar il-Fond Soċjali Ewropew u li jħassar ir-Regolament tal-Kunsill (KE) Nru 1081/2006
Proposta għal REGOLAMENT TAL-PARLAMENT EWROPEW U TAL-KUNSILL dwar il-Fond Soċjali Ewropew u li jħassar ir-Regolament tal-Kunsill (KE) Nru 1081/2006
/* COM/2011/0607 final /2 - 2011/0268 (COD) */
Proposta għal REGOLAMENT TAL-PARLAMENT EWROPEW U TAL-KUNSILL dwar il-Fond Soċjali Ewropew u li jħassar ir-Regolament tal-Kunsill (KE) Nru 1081/2006 /* COM/2011/0607 final /2 - 2011/0268 (COD) */
MEMORANDUM TA’ SPJEGAZZJONI 1. KUNTEST TAL-PROPOSTA Il-qgħad u r-rati għolja b'mod
persistenti ta’ faqar jeħtieġu azzjoni fil-livell tal-UE u fil-livell
nazzjonali. Illum, kważi 23 miljun ruħ huma qiegħda u 'l
fuq minn 113-il miljun huma stmati li jgħixu fir-riskju tal-faqar jew
l-esklużjoni. Il-kwistjonijiet soċjali u tal-impjiegi huma
tħassib primarju għaċ-ċittadini Ewropej u huwa qasam fejn
huwa mistenni aktar mill-Unjoni. Sfidi addizzjonali li tiffaċċja
l-Unjoni huma relatati ma': nuqqasijiet fil-livelli tal-ħiliet, rendiment
baxx fil-politika tas-suq tax-xogħol attiv u fis-sistemi edukattivi,
l-esklużjoni soċjali tal-gruppi marġinalizzati, u mobbiltà baxxa
tal-ħaddiema. Hemm ħtieġa għal inizjattivi ta' politika kif
ukoll għal azzjonijiet ta' appoġġ konkreti. Ħafna minn dawn il-problemi marru
għall-agħar bil-kriżi finanzjarja u ekonomika, ix-xejriet
demografiċi u migratorji u l-pass mgħaġġel tal-bidla
teknoloġika. Jekk dawn ma jiġux indirizzati b’mod effettiv,
jikkostitwixxu sfida sinifikanti għall-koeżjoni soċjali u
l-kompetittività. Għalhekk huwa essenzjali li l-investiment li jtejjeb
it-tkabbir fl-infrastruttura, fil-kompetittività reġjonali u
fl-iżvilupp tan-negozju jiġi akkumpanjat b’miżuri li jsostnu
l-ħolqien ta' impjiegi sostenibbli fl-oqsma tal-politika tas-suq
tax-xogħol, l-edukazzjoni u t-taħriġ, l-inklużjoni
soċjali, l-adattabbiltà tal-ħaddiema, l-intrapriżi u
l-intraprendituri, u l-kapaċità amministrattiva. Il-Fond Soċjali Ewropew (FSE)
jappoġġa l-politiki u l-prijoritajiet li jimmiraw għall-kisba
ta' progress lejn livell massimu ta' impjiegi, it-tisħiħ tal-kwalità
u l-produttività fix-xogħol, iż-żieda tal-mobbiltà
ġeografika u okkupazzjonali tal-ħaddiema fl-Unjoni, it-titjib
tas-sistemi tal-edukazzjoni u t-taħriġ, u l-promozzjoni
tal-inklużjoni soċjali, u b'hekk ikunu qed jikkontribwixxu
għall-koeżjoni ekonomika, soċjali u territorjali. Billi l-FSE għandu jkun allinjat
bis-sħiħ mal-Istrateġija Ewropa 2020 u l-miri ewlenin
tagħha, dan għandu jappoġġa l-politiki segwiti mill-Istati
Membri skont il-Linji Gwida Integrati adottati skont l-Artikoli 121
u 148(4) tat-Trattat u r-Rakkomandazzjonijiet dwar il-Programmi
tar-Riforma Nazzjonali. L-istabbiliment ta' ishma u ammonti minimi
għall-FSE bħala wieħed mill-Fondi Strutturali se jiżgura li
l-prijoritajiet tal-Unjoni jiġu riflessi b'mod xieraq fil-volum
tal-investiment dirett lejn iċ-ċittadini Ewropej. L-FSE se jagħmel ukoll kontribuzzjoni
prezzjuża lil prijoritajiet importanti oħra tal-Istrateġija
Ewropa 2020, bħat-tisħiħ tal-investiment tagħna fir-riċerka
u l-innovazzjoni, it-tisħiħ tal-aċċessibbiltà u l-użu
tat-teknoloġiji tal-informazzjoni u l-komunikazzjoni, iż-żieda
tal-kompetittività tal-impriżi żgħar u medji, l-appoġġ
tal-bidla lejn ekonomija baxxa fil-karbonju, il-protezzjoni tal-ambjent, u l-promozzjoni
tal-użu sostenibbli tar-riżorsi. L-FSE se jaħdem
f'sinerġija mal-Programm integrat il-ġdid għall-Bidla
Soċjali u l-Innovazzjoni. Flimkien, dawn se jikkostitwixxu l-Inizjattiva
Ewropea komprensiva għall-Impjiegi u l-Inklużjoni Soċjali. 2. RIŻULTATI TAL-KONSULTAZZJONIJIET
MAL-PARTIJIET INTERESSATI U L-VALUTAZZJONIJIET TAL-IMPATT Ir-riżultati tal-konsultazzjonijiet
pubbliċi għall-ħames Rapport ta' Progress dwar il-Koeżjoni
Ekonomika, Soċjali u Territorjali[1],
ir-Reviżjoni tal-Baġit tal-UE[2]
u l-proposti għall-qafas finanzjarju multiannwali[3], kollha tqiesu għal din
il-proposta. Il-konsultazzjoni pubblika dwar
il-konklużjonijiet tal-ħames Rapport dwar il-Koeżjoni saret bejn
it-12 ta' Novembru 2010 u l-31 ta' Jannar 2011 u
kkonludiet bil-Forum ta' Koeżjoni. Waslu total ta’
444 kontribuzzjoni. Il-konvenuti kienu jinkludu l-Istati Membri,
l-awtoritajiet reġjonali u lokali, l-imsieħba soċjali,
organizzazzjonijiet ta' interess Ewoprew, organizzazzjonijiet non-governattivi,
ċittadini u partijiet interessati oħra. Il-konsultazzjoni
ppreżentat serje ta' mistoqsijiet dwar il-futur tal-politika ta'
koeżjoni. Ġiet ippubblikata taqsira tar-riżultati
fit-13 ta' Mejju 2011[4]. Barra minn hekk, ġew organizzati
konferenzi speċifiċi u seminars li jiffokaw fuq il-futur tal-FSE.
F'Ġunju 2010 il-konferenza "L-FSE u l-Ewropa 2020"
ġabret flimkien aktar minn 450 rappreżentant ta' livell
għoli mill-awtoritajiet pubbliċi, l-imsieħba soċjali u
s-soċjetà ċivili f'livell tal-UE u nazzjonali kif ukoll
mill-pajjiżi terzi. Barra minn hekk, f'Diċembru 2010 sar seminar
mal-NGOs u l-imsieħba soċjali dwar il-futur tal-FSE. Apparti minn hekk,
fis-7 ta' Ottubru 2010, il-Parlament Ewropew adotta
reżoluzzjoni dwar il-futur tal-politika ta' koeżjoni u l-FSE[5]. Il-Kummissjoni Ewropea talbet
ukoll għal opinjonijiet esploratorji mill-Kumitat Ekonomiku u Soċjali[6] u mill-Kumitat tar-Reġjuni[7] u rċeviethom. Ġie provdut parir espert permezz
tal-grupp ad hoc tal-Kumitat tal-FSE dwar il-futur tal-Fond Soċjali
Ewropew, grupp informali ta' esperti mill-Istati Membri u l-imsieħba
soċjali. Il-grupp ad hoc iltaqa’ seba' darbiet bejn
Diċembru 2009 u Marzu 2011. Barra minn hekk, ġie stabbilit
grupp ta' ħidma bir-rappreżentanti tal-Istati Membri biex jiġu
diskussi l-indikaturi komuni. Dan iltaqa' erba' darbiet u stabbilixxa
l-bażi għall-indikaturi proposti. Il-Kumitat tal-FSE innifsu
ħareġ opinjonijiet dwar il-futur tal-FSE fil-laqgħat tiegħu
tat-3 ta' Ġunju 2010 u l-10 ta' Marzu 2011.
Kemm il-Kumitat tal-Impjiegi (EMCO) kif ukoll il-Kumitat tal-Protezzjoni
Soċjali (SPC) ħarġu opinjonijiet speċifiċi wkoll,
f'Jannar u Marzu 2011, rispettivament. Ir-riżultati tal-evalwazzjonijiet ex-post
li twettqu fil-programmi ta' bejn l-2000 u l-2006, u medda kbira ta' studji,
intużaw bħala input. Twettqet valutazzjoni tal-impatt b'mod
speċifiku għar-Regolament tal-FSE, bħala parti minn pakkett ta'
tliet valutazzjonijiet tal-impatt li jkopru wkoll r-Regolamenti tal-FEŻR u
l-Fond ta' Koeżjoni u l-valutazzjonijiet tal-impatt għar-Regolament
Ġenerali li jirregola l-FSE, l-FEŻR u l-Fond ta' Koeżjoni. Il-valutazzjoni tal-impatt
għar-Regolament tal-FSE indirizzat prinċipalment il-kamp ta'
applikazzjoni tal-istrument u aspett speċifiku wieħed
tas-simplifikazzjoni. Din iddiskutiet ukoll l-artikulazzjoni bejn u
l-komplimentarjetà mal-istrumenti finanzjarji disponibbli għad-Direttorat
Ġenerali għall-Impjiegi, l-Affarijiet Soċjali u
l-Inklużjoni, jiġifieri l-FSE, il-Fond Ewropew ta’
Aġġustament għall-Globalizzazzjoni, il-programm PROGRESS,
il-EURES u l-Faċilità Mikrofinanzjarja PROGRESS. Dan huwa appoġġ wiesa' ħafna
għar-rwol tal-FSE. L-FSE jitqies li qed jipprovdi valur miżjud
Ewropew konsiderevoli minħabba li jippermetti lill-Istati Membri u
r-reġjuni jindirizzaw il-prijoritajiet ewlenin Ewropej permezz tal-finanzjament
Ewropew. Jitqies bħala element importanti fl-indirizzar tal-isfidi ewlenin
li jiffaċċjaw iċ-ċittadini Ewropej u fil-progress lejn
il-miri stabbiliti fl-istrateġija Ewropa 2020. L-iffokar fuq l-isfidi
ewlenin u r-Rakkomandazzjonijiet tal-Kunsill jitqies bħala prekundizzjoni
importanti għall-effettività tal-appoġġ. It-tnaqqis
tal-komplessità tal-appoġġ u tal-piż tal-awditjar relatat,
l-aktar għall-benefiċjarji iżgħar, jitqies ukoll bħala
qasam importanti li għandu jiġi indirizzat. 3. ELEMENTI LEGALI TAL-PROPOSTA Il-Fond Soċjali Ewropew (FSE) huwa
stabbilit permezz tal-Artikolu 162 tat-Trattat dwar il-Funzjonament
tal-Unjoni Ewropea (TFUE). It-termini ta' żmien għar-reviżjoni
tal-finanzjament tal-UE għall-promozzjoni tal-koeżjoni huma marbuta
mal-proposta għal Qafas Finanzjarju Multiannwali ġdid, kif imsemmi
fil-Programm ta' Ħidma tal-Kummissjoni. Din il-proposta għal Regolament hija
bbażata fuq l-Artikolu 164 TFUE. Ir-Regolament tal-Kunsill (UE)
Nru […] jistabbilixxi l-qafas għall-azzjoni mill-Fondi Strutturali u
mill-Fond ta' Koeżjoni u jistabbilixxi, b'mod partikolari,
l-għanijiet tematiċi, il-prinċipji u r-regoli dwar
l-ipprogrammar, il-monitoraġġ u l-evalwazzjoni, il-ġestjoni u
l-kontroll. Fi ħdan dan il-qafas ġenerali, din
il-proposta tiddefinixxi l-missjoni u l-kamp ta' applikazzjoni tal-FSE,
flimkien mal-prijoritajiet ta' investiment assoċjati li jindirizzaw
l-għanijiet tematiċi, u tistabbilixxi dispożizzjonijiet
speċifiċi dwar il-programmi operattivi kofinanzjati mill-FSE u dwar
in-nefqa eliġibbli. L-FSE se jopera fi ħdan il-kuntest
tal-Artikolu 174 TFUE, li jsejjaħ għal azzjoni mill-Unjoni
Ewropea sabiex issaħħaħ il-koeżjoni ekonomika, soċjali
u territorjali tagħha u tippromwovi żvilupp armonjuż globali
permezz tat-tnaqqis tad-diverġenzi bejn il-livelli tal-iżvilupp
tar-reġjuni u l-promozzjoni tar-reġjuni l-inqas vantaġġati. Kif enfasizzat ir-Reviżjoni
tal-Baġit tal-UE, "il-baġit tal-UE għandu jintuża
sabiex jiffinanzja ġid pubbliku tal-UE, azzjonijiet li l-Istati Membri u
r-reġjuni ma jistgħux jiffinanzjawhom huma stess, jew fejn jista'
jikseb riżultati aħjar"[8].
Din il-proposta tirrispetta l-prinċipju tas-sussidjarjetà hekk kif inhuma
stabbiliti l-kompiti tal-FSE fit-Trattat u l-politika hija implimentata skont
il-prinċipju tal-ġestjoni konġunta u bir-rispett tal-kompetenzi
istituzzjonali tal-Istati Membri u tar-reġjuni. 4. IMPLIKAZZJONIJIET BAĠITARJI Il-proposta tal-Kummissjoni għal Qafas
Finanzjarju Multiannwali tinkludi EUR 376 biljun għall-politika
ta' koeżjoni għall-perjodu ta' bejn l-2014 u l-2020. Baġit propost 2014-2020 || EUR biljun || Sehem minimu tal-FSE || Ammont tal-FSE minimu li jirriżulta EUR biljun Reġjuni l-inqas żviluppati Reġjuni ta' tranżizzjoni Reġjuni aktar żviluppati Kooperazzjoni territorjali Fond ta' Koeżjoni Allokazzjoni addizzjonali għal reġjuni l-aktar imbiegħda b'poplazzjoni baxxa || 162.6 38.9 53.1 11.7 68.7 0.926 || 25 % 40 % 52 % - - - || 40.7 15.6 27.6 - - - Faċilità Nikkollegaw l-Ewropa, għat-trasport, l-enerġija u l-ICT || EUR 40 biljun (b'EUR 10 biljuni addizzjonali separati għal użu preċiż fil-Fond ta' Koeżjoni) || - || *Iċ-ċifri
kollha bil-prezzijiet kostanti tal-2011 Bl-għan li tissaħħaħ
l-abbiltà tal-Fondi li jwettqu l-miri ewlenin tal-istrateġija
Ewropa 2020, din il-proposta tistabbilixxi ishma minimi għall-FSE
għal kull kategorija ta' reġjuni definita fil-proposta għal
Regolament Ġenerali. Dan jirriżulta f'sehem minimu globali
għall-FSE ta' 25 % tal-baġit allokat lill-politika ta'
koeżjoni (eskluża l-allokazzjoni lill-Faċilità Nikkollegaw
l-Ewropa), jiġifieri EUR 84 biljun. L-allokazzjoni minima
tal-FSE indikata tinkludi l-baġit (EUR 2,5 biljun) għal
proposta tal-Kummissjoni li ser issir dwar l-appoġġ ta' ikel
għall-persuni l-aktar fil-bżonn. 5. TAQSIRA
TAL-KONTENUT TAR-REGOLAMENT F'termini tal-kamp ta' applikazzjoni, l-abbozz
tar-Regolament tal-FSE għall-2014-2020 jipproponi li l-FSE jimmira erba'
"għanijiet tematiċi" madwar l-Unjoni Ewropea kollha. (i)
il-promozzjoni tal-impjiegi u l-mobbiltà tax-xogħol; (ii) l-investiment
fl-edukazzjoni, il-ħiliet u t-tagħlim tul il-ħajja; (iii)
il-promozzjoni tal-inklużjoni soċjali u l-ġlieda kontra l-faqar;
(iv) it-titjib tal-kapaċità istituzzjonali u amministrazzjoni pubblika
effiċjenti. Kull għan tematiku jissarraf f'kategoriji ta' intervent
jew "prijoritajiet ta' investiment". Barra minn hekk, l-FSE
għandu jikkontribwixxi wkoll għal għanijiet tematiċi
oħrajn bħal pereżempju l-appoġġ għall-bidla lejn
ekonomija baxxa fil-karbonju, reżistenti għat-tibdil fil-klima u li
tagħmel użu effiċjenti tar-riżorsi, it-tisħiħ
tal-użu tat-teknoloġiji tal-informazzjoni u l-komunikazzjoni, it-tisħiħ
tar-riċerka, l-iżvilupp tekonoliġiku u l-innovazzjoni u
t-tisħiħ tal-kompetittività tal-impriżi żgħar u medji. Hija meħtieġa l-konċentrazzjoni
tal-finanzjament sabiex jinkiseb impatt suffiċjenti u li jista' jintwera.
Sabiex tiġi żgurata din il-konċentrazzjoni, huwa propost li –
l-appoġġ għall-kapaċità
amministrattiva għandha tiġi llimitata għall-Istati Membri
b'reġjuni inqas żviluppati jew eliġibbli għall-Fond ta'
Koeżjoni; –
mill-inqas 20 % tal-allokazzjoni tal-FSE
għandu jkun ddedikat għall-"promozzjoni tal-inklużjoni
soċjali u l-ġlieda kontra l-faqar"; –
il-programmi operattivi għandhom jiffokaw
il-finanzjament fuq għadd limitat ta' "prijoritajiet ta'
investiment". Barra minn hekk, l-abbozz tar-Regolament
jiċċara u jsaħħaħ il-kontribuzzjoni tal-FSE
għall-impenn tal-Unjoni biex telimina l-inugwaljanzi bejn in-nisa u
l-irġiel u biex tipprevjeni d-diskriminazzjoni. L-Istati Membri
għandhom jgħaqqdu approċċ b'saħħtu ta'
mainstreaming u azzjonijiet speċifiċi biex jippromwovu l-ugwaljanza
tas-sessi u n-nondiskriminazzjoni. B'mod simili, l-abbozz tar-Regolament
għandu l-għan li jsaħħaħ l-innovazzjoni soċjali u
l-kooperazzjoni transnazzjonali bl-FSE, permezz ta' inċentiv fil-forma ta'
rata ta' kofinanzjament ogħla għall-assi prijoritarji ddedikati
lilhom, programmar speċifiku u arranġamenti ta' monitoraġġ,
u rwol akbar għall-Kummissjoni fl-iskambju u t-tixrid tal-prassi tajba,
l-azzjonijiet konġunta u r-riżultati madwar l-Unjoni kollha. Fir-rigward tas-sistemi ta'
monitoraġġ u evalwazzjoni, l-abbozz tar-Regolament jipproponi
standards ta' kwalità minimi u grupp ta' indikaturi komuni obbligatorji. Dan
għandu jiżgura li l-monitoraġġ jipproduċi dejta
b'saħħitha u affidabbli li tista' faċilment tiġi aggregata
fil-livell tal-UE u li l-evalwazzjoni tiffoka fuq il-valutazzjoni
tal-effettività u l-impatt tal-appoġġ mill-FSE. L-abbozz tar-Regolament jagħti importanza
kbira lill-involviment tal-imsieħba soċjali u tal-organizzazzjonijiet
mhux governattivi fl-ipprogrammar u l-implimentazzjoni tal-prijoritajiet u
l-operazzjonijiet tal-FSE. Għal dan l-għan, għar-reġjuni u
l-pajjiżi inqas żviluppati, l-abbozz tar-Regolament jitlob li ammont
xieraq tar-riżorsi tal-FSE jiġi allokat għall-azzjonijiet
għall-bini tal-kapaċitajiet għall-imsieħba soċjali u
l-organizzazzjonijiet mhux governattivi. L-attivitajiet konġunti mwettqa
mill-imsieħba soċjali se jiġu appoġġati wkoll,
minħabba r-rwol essenzjali tagħhom fil-qasam tal-impjiegi,
l-edukazzjoni u l-inklużjoni soċjali. Bl-istess mod, l-abbozz tar-Regolament
jipproponi għadd limitat ta' regoli speċifiċi ta'
eliġibbiltà biex jiġi ffaċilitat l-aċċess
għall-finanzjament tal-FSE għal benefiċjarji u operazzjonijiet
iżgħar u biex titqies in-natura differenti tal-operazzjonijiet
tal-FSE u t-tip differenti ta' benefiċjarji tal-FSE meta mqabbla ma' Fondi
oħrajn. Sabiex jiġi żgurat li s-simplifikazzjoni tasal
sal-benefiċjarji, l-abbozz tar-Regolament jipproponni li jiġi
estiż l-użu tal-għażliet tal-kosti ssimplifikati,
inkluż il-fatt li l-użu tagħhom isir obbligatorju għal
operazzjonijiet iżgħar. Dawn id-dispożizzjonijiet se jnaqqsu
l-piż amministrattiv fuq il-benefiċjarji u l-awtoritajiet ta'
ġestjoni, isaħħu l-orjentazzjoni tar-riżultati tal-FSE u
jikkontribwixxu għat-tnaqqis tar-rata ta' żbalji. Fl-aħħar nett, huma introdotti
dispożizzjonijiet speċifiċi għal strumenti finanzjarji
sabiex iħeġġu lill-Istati Membri u lir-reġjuni jgħinu
lill-FSE u b'hekk iżidu l-kapaċità tiegħu biex jiffinanzja
l-azzjonijiet li jappoġġaw l-impjiegi, l-edukazzjoni u l-inklużjoni
soċjali.
2011/0268 (COD) Proposta għal REGOLAMENT TAL-PARLAMENT EWROPEW U
TAL-KUNSILL dwar il-Fond Soċjali Ewropew u li
jħassar ir-Regolament tal-Kunsill (KE) Nru 1081/2006 IL-PARLAMENT EWROPEW U L-KUNSILL
TAL-UNJONI EWROPEA, Wara li kkunsidraw it-Trattat dwar
il-Funzjonament tal-Unjoni Ewropea, u b'mod partikolari l-Artikolu 164
tiegħu, Wara li kkunsidraw il-proposta
mill-Kummissjoni Ewropea[9], Wara t-trasmissjoni tal-abbozz tal-att
leġiżlattiv lill-Parlamenti nazzjonali, Wara li kkunsidraw l-opinjoni tal-Kumitat
Ekonomiku u Soċjali Ewropew[10], Wara li kkunsidraw l-opinjoni tal-Kumitat
tar-Reġjuni[11], Filwaqt li jaġixxu skont
il-proċedura leġiżlattiva ordinarja, Billi: (1) Ir-Regolament (UE)
Nru […] jistabbilixxi l-qafas ta' azzjoni mill-Fond Soċjali Ewropew
(FSE), il-Fond Ewropew għall-Iżvilupp Reġjonali (FEŻR),
il-Fond ta' Koeżjoni, il-Fond Agrikolu Ewropew għall-Iżvilupp
Rurali u l-Fond Ewropew għall-Affarijiet Marittimi u s-Sajd u jistipula,
b'mod partikolari, l-għanijiet tematiċi, il-prinċipji u r-regoli
dwar l-ipprogrammar, il-monitoraġġ u l-evalwazzjoni, il-ġestjoni
u l-kontroll. Għalhekk huwa meħtieġ li tiġi
speċifikata l-missjoni u l-kamp ta' applikazzjoni tal-Fond Soċjali
Ewropew, flimkien mal-prijoritajiet ta' investiment relatati li jindirizzaw
l-għanijiet tematiċi, u li jiġu stabbiliti dispożizzjonijiet
speċifiċi dwar it-tip ta' attivitajiet li jistgħu jiġu
finanzjati mill-FSE. (2) L-FSE għandu jtejjeb
l-opportunitajiet tal-impjiegi, jippromwovi l-edukazzjoni u t-tagħlim tul
il-ħajja u jiżviluppa politiki ta' inklużjoni attiva skont
il-kompiti mogħtija lill-FSE permezz tal-Artikolu 162 tat-Trattat, u
b'hekk jikkontribwixxi għall-koeżjoni ekonomika, soċjali u
territorjali skont l-Artikolu 174 tat-Trattat. Skont l-Artikolu 9
tat-Trattat, l-FSE għandu jieħu kont tal-ħtiġijiet marbuta
mal-promozzjoni ta’ livell għoli ta’ impjiegi, mal-garanzija ta’
protezzjoni soċjali xierqa, mal-ġlieda kontra l-esklużjoni
soċjali kif ukoll ma’ livell għoli ta’ edukazzjoni, taħriġ
u protezzjoni tas-saħħa tal-bniedem. (3) Il-Kunsill Ewropew
tas-17 ta' Ġunju 2010 talab li l-politiki komuni kollha,
inkluża l-politika ta' koeżjoni, jappoġġaw
l-Istrateġija Ewropa 2020 għat-tkabbir intelliġenti,
sostenibbli u inklussiv"[12].
Sabiex jiġi żgurat l-allinjament sħiħ tal-FSE
mal-għanijiet ta' din l-istrateġija, b'mod partikolari fir-rigward
tal-impjiegi, l-edukazzjoni u l-ġlieda kontra l-esklużjoni
soċjali, l-FSE għandu jappoġġa lill-Istati Membri
fl-implimentazzjoni tar-rakkomandazzjonijiet tal-Kunsill fuq il-linji gwida
wiesgħa għall-politiki ekonomiċi tal-Istati Membri u l-Unjoni u
d-deċiżjonijiet tal-Kunsill dwar il-linji gwida għall-politiki
tal-impjiegi tal-Istati Membri li ġew adottati skont l-Artikoli 121
u 148(4) tat-Trattat. Dan għandu wkoll jikkontribwixxi
għall-implimentazzjoni tal-inizjattivi ewlenin, b'mod speċjali fir-rigward
tal-"Aġenda għall-Ħiliet Ġodda u l-Impjiegi"[13],
"Żgħażagħ Attivi"[14], u l-"Pjattaforma Ewropea
Kontra l-Faqar u l-Esklużjoni Soċjali"[15]. Se jappoġġa wkoll
l-attivitajiet fl-inizjattivi "Aġenda Diġitali"[16] u l-"Unjoni
tal-Innovazzjoni"[17]. (4) L-Unjoni Ewropea qed
tiffaċċja sfidi strutturali li jirriżultaw mill-globalizzazzjoni
ekonomika, il-bidla teknoloġika u forza tax-xogħol li dejjem qed
tiżdied fl-età u nuqqas dejjem jikber ta' ħiliet u xogħol f'xi
setturi u reġjuni. Is-sitwazzjoni kkumplikat ruħha aktar
minħabba l-kriżi ekonomika u finanzjarja reċenti, li
rriżultat f'livelli ogħla ta' qgħad, li affettwat b'mod
partikolari ż-żgħażagħ u gruppi vulnerabbli oħra,
bħall-migranti. L-FSE għandu jimmira li jippromwovi l-impjiegi u
jappoġġa l-mobbiltà tax-xogħol, jinvesti fl-edukazzjoni,
il-ħiliet u t-tagħlim tul il-ħajja, jippromwovi
l-inklużjoni soċjali u jiġġieled kontra l-faqar.
Fil-promozzjoni tal-funzjonament aħjar tas-swieq tax-xogħol permezz
tat-tisħiħ tal-mobbiltà ġeografika transnazzjonali
tal-ħaddiema, l-FSE għandu b'mod partikolari, jappoġġa
s-Servizzi Ewropej tal-Impjiegi (l-attivitajiet tal-EURES) f'dak li għandu
x'jaqsam mar-reklutaġġ u l-informazzjoni relatata, il-pariri u
s-servizzi ta' gwida f'livell nazzjonali u transkonfinali. (5) Minbarra dawn
il-prijoritajiet, fir-reġjuni inqas żviluppati u l-Istati Membri, u
bl-għan li jiżdiedu t-tkabbir ekonomiku u l-opportunitajiet
tal-impjiegi, l-effiċjenza tal-amministrazzjoni pubblika għandha
tittejjeb u l-kapaċità istituzzjonali tal-partijiet interessati fil-qasam
tal-impjiegi, l-edukazzjoni u l-politiki soċjali għandha
tissaħħaħ. (6) Fl-istess ħin, huwa
essenzjali li wieħed jappoġġa l-iżvilupp u l-kompetittività
tal-impriżi żgħar u medji Ewropej u jiżgura li n-nies
jistgħu jadattaw, permezz tal-kisba tal-ħiliet xierqa u permezz ta'
opportunitajiet ta' tagħlim tul il-ħajja, għal sfidi ġodda
bħall-bidla għal ekonomija bbażata fuq l-għarfien,
l-aġenda diġitali, u t-tranżizzjoni lejn ekonomija baxxa
fil-karbonju u aktar effiċjenti fl-enerġija. L-FSE għandu jikkontribwixxi
għall-indirizzar ta' dawn l-isfidi billi jkompli jaħdem
għall-kisba tal-għanijiet tematiċi ewlenin tiegħu. F'dan
il-kuntest, l-FSE għandu jappoġġa t-tranżizzjoni tal-forza
tax-xogħol lejn ħiliet u impjiegi aktar ekoloġiċi, b'mod
partikolari fl-effiċjenza tal-enerġija, l-enerġija rinovabbli u
s-setturi tat-trasport sostenibbli, filwaqt li titqies l-intenzjoni tal-Unjoni
biex iżżid il-proporzjon tal-baġit tal-UE li huwa relatat
mal-mainstreaming tal-klima għal mill-inqas 20 % b'kontribuzzjonijiet
minn oqsma tal-politika differenti. (7) L-FSE għandu
jikkontribwixxi għall-Istrateġija Ewropa 2020, filwaqt li
jiżgura konċentrazzjoni akbar ta' appoġġ fuq
il-prijoritajiet tal-Unjoni Ewropea. L-FSE għandu b'mod partikolari
jżid l-appoġġ tiegħu għall-ġlieda kontra
l-esklużjoni soċjali u l-faqar, permezz ta' allokazzjoni minima
separata għal użu preċiż. Skont il-livell
tal-iżvilupp tar-reġjuni appoġġati, l-għażla u
l-għadd ta' prijoritajiet ta' investiment għall-appoġġ
tal-FSE għandhom ukoll ikunu limitati. (8) Sabiex jiġi żgurat
monitoraġġ aktar mill-qrib u valutazzjoni mtejba tar-riżultati
miksuba fuq livell Ewropew permezz ta' azzjonijiet appoġġati
mill-FSE, għandu jiġi stabbilit grupp komuni ta' indikaturi ta' produzzjoni
u riżultati. (9) L-implimentazzjoni
effiċjenti u effettiva tal-azzjonijiet appoġġati mill-FSE
tiddipendi fuq it-tmexxija tajba u s-sħubija bejn l-atturi territorjali u
soċjoekonomiċi relevanti kollha, l-aktar l-imsieħba soċjali
u l-organizzazzjonijiet mhux governattivi. Għalhekk huwa neċessarju
li l-Istati Membri jħeġġu l-parteċipazzjoni
tal-imsieħba soċjali u l-organizzazzjonijiet mhux governattivi
fl-implimentazzjoni tal-FSE. (10) L-Istati Membri u
l-Kummissjoni għandhom jiżguraw li l-implimentazzjoni
tal-prijoritajiet iffinanzjati mill-FSE jikkontribwixxu għall-promozzjoni
tal-ugwaljanza bejn in-nisa u l-irġiel skont l-Artikolu 8
tat-Trattat. L-evalwazzjonijiet urew l-importanza li jitqies l-aspett tas-sessi
fid-dimensjonijiet kollha tal-programmi, filwaqt li jiġi żgurat li
jittieħdu azzjonijiet speċifiċi għall-promozzjoni
tal-ugwaljanza bejn is-sessi. (11) Skont l-Artikolu 10
tat-Trattat, l-implimentazzjoni tal-prijoritajiet iffinanzjati mill-FSE
għandhom jikkontribwixxu għall-ġlieda kontra d-diskriminazzjoni
bbażata fuq is-sess, l-oriġini razzjali jew etnika, ir-reliġjon
jew it-twemmin, id-diżabbiltà, l-età jew l-orjentazzjoni sesswali. L-FSE
għandu jappoġġa t-twettiq tal-obbligu skont il-Konvenzjoni
tan-NU dwar id-Drittijiet tal-Persuni b'Diżabbiltajiet fir-rigward inter
alia tal-edukazzjoni, ix-xogħol u l-impjiegi u
l-aċċessibbiltà. L-FSE għandu wkoll jippromwovi
t-tranżizzjoni mill-kura istituzzjonali għall-kura bbażata
fil-komunità. (12) L-appoġġ
għall-innovazzjoni soċjali huwa essenzjali għat-tfassil ta'
politiki li huma aktar adatti għall-bidla soċjali u biex
jitħeġġu u jiġu appoġġati l-impriżi
soċjali innovattivi. B'mod partikolari, l-ittestjar u
l-evalwazzjoni ta' soluzzjonijiet innovattivi qabel l-applikazzjoni
tagħhom fuq skala akbar huma essenzjali fit-titjib tal-effiċjenza tal-politiki
u għalhekk dan jiġġustifika l-appoġġ speċifiku
mill-FSE. (13) Il-kooperazzjoni
transnazzjonali għandha valur miżjud sinifikanti u hija
meħtieġa għat-tisħiħ tar-rwol tal-Kummissjoni biex
tiffaċilita l-iskambji tal-esperjenza u l-koordinazzjoni tal-implimentazzjoni
tal-inizjattivi rilevanti. (14) Il-mobilizzazzjoni
tal-partijiet interessati reġjonali u lokali hija meħtieġa
għat-twettiq tal-istrateġija Ewropa 2020 u l-miri ewlenin
tagħha. Il-patti territorjali, l-inizjattivi lokali għall-impjiegi u
l-inklużjoni soċjali, l-istrateġiji għall-iżvilupp
lokali mmexxija mill-komunità u l-istrateġiji għall-iżvilupp
urban sostenibbli jistgħu jintużaw u jiġu appoġġati
biex jinvolvu b'mod aktar attiv l-awtoritajiet reġjonali u lokali,
l-ibliet, l-imsieħba soċjali u l-organizzazzjonijiet mhux
governattivi fl-implimentazzjoni tal-programmi. (15) Ir-Regolament (KE)
Nru […] jistipula li r-regoli dwar l-eliġibbiltà tan-nefqa
għandhom jiġu stabbiliti fuq livell nazzjonali, b’xi
eċċezzjonijiet li għalihom ikun meħtieġ li jiġu
stabbiliti disposizzjonijiet speċifiċi fir-rigward tal-FSE. (16) Bl-għan li jiġi
ssimplifikat l-użu tal-FSE u biex jitnaqqas ir-riskju ta' żbalji, u
fir-rigward tal-ispeċifitajiet tal-operazzjonijiet appoġġati
mill-FSE, huwa xieraq li jiġu stabbiliti dispożizzjonijiet li
jikkumplimentaw l-Artikoli 57 u 58 tar-Regolament (UE) Nru […]. (17) L-Istati Membri u
r-reġjuni għandhom jitħeġġu sabiex jgħinu
lill-FSE permezz ta' strumenti finanzjarji sabiex jappoġġaw
pereżempju l-istudenti, il-ħolqien tal-impjiegi, il-mobbiltà
tal-ħaddiema, l-inklużjoni soċjali u l-intraprenditorija
soċjali. (18) Is-setgħa tal-adozzjoni
ta' atti skont l-Artikolu 290 tat-Trattat dwar il-Funzjonament tal-Unjoni
Ewropea għandha tiġi ddelegata lill-Kummissjoni
għall-istabbiliment tad-definizzjoni ta' skali standard tal-kosti unitarji
u somom f'daqqa u l-ammonti massimi tagħhom skont tipi differenti ta'
operazzjonijiet u għad-definizzjoni tar-regoli u l-kundizzjonijiet
speċifiċi tal-garanziji bbażati fuq il-politiki. Huwa ta’ importanza
partikolari li l-Kummissjoni twettaq konsultazzjonijiet xierqa matul
ix-xogħol preparatorju tagħha, inkluż fil-livell tal-esperti.
Il-Kummissjoni, meta tkun qed tħejji u tfassal atti delegati, għandha
tiżgura t-trażmissjoni simultanja, f’waqtha u xierqa ta’ dokumenti
rilevanti lill-Parlament Ewropew u lill-Kunsill. (19) Dan ir-Regolament
jissostitwixxi r-Regolament (KE) Nru 1081/2006 tal-Parlament Ewropew u
tal-Kunsill tal-5 ta' Lulju 2006 dwar il-Fond Soċjali
Ewropew u li jħassar ir-Regolament (KE) Nru 1784/1999[18]. Dak ir-Regolament għandu
għalhekk jitħassar, ADOTTAW DAN IR-REGOLAMENT: Kapitolu I
Dispożizzjonijiet ġenerali Artikolu 1
Suġġett Dan ir-Regolament jistabbilixxi l-missjoni
tal-Fond Soċjali Ewropew (FSE), il-kamp ta' applikazzjoni tal-għajnuna
tiegħu, id-dispożizzjonijiet speċifiċi u t-tipi ta' nefqa
eliġibbli għall-għajnuna. Artikolu 2
Missjoni 1. L-FSE għandu jippromwovi
livelli għoljin ta' kwalità ta' impjiegi u xogħol, jappoġġa
l-mobbiltà ġeografika u okkupazzjonali tal-ħaddiema, jiffaċilita
l-adattament tagħhom għall-bidla, iħeġġeġ livell
għoli ta' edukazzjoni u taħriġ, jippromwovi l-ugwaljanza bejn
is-sessi, l-opportunitajiet indaqs u n-nondiskriminazzjoni,
isaħħaħ l-inklużjoni soċjali u jiġġieled
kontra l-faqar, u b'hekk ikun qed jikkontribwixxi għall-prijoritajiet
tal-Unjoni Ewropea fir-rigward tat-tisħiħ tal-koeżjoni
ekonomika, soċjali u territorjali. 2. Għandu jagħmel dan
billi jappoġġa l-Istati Membri fil-ħidma għall-kisba
tal-prijoritajiet u l-miri ewlenin tal-istrateġija Ewropa 2020
għal tkabbir intelliġenti, sostenibbli u inklussiv. L-FSE għandu
jappoġġa t-tfassil u l-implimentazzjoni tal-politiki u l-azzjonijiet,
filwaqt li jqis il-linji gwida integrati għall-politiki ekonomiċi u
tal-impjiegi tal-Istati Membri[19]
u r-Rakkomandazzjonijiet tal-Kunsill dwar il-Programmi tar-Riforma Nazzjonali. 3. L-FSE għandu jkun ta'
benefiċċju għan-nies, inklużi l-gruppi
żvantaġġjati bħal pereżempju n-nies li jkunu
qiegħda fit-tul, in-nies b'diżabbiltajiet, il-migranti,
il-minoritajiet etniċi, il-komunitajiet marġinalizzati u n-nies li
qed jiffaċċjaw l-esklużjoni soċjali. L-FSE għandu
wkoll jipprovdi appoġġ lill-impriżi, is-sistemi u l-istrutturi
bl-għan li jiffaċilita l-adattament tagħhom għal sfidi
ġodda u biex jippromwovi tmexxija tajba u l-implimentazzjoni tar-riformi,
b'mod partikolari fl-oqsma tal-impjiegi, l-edukazzjoni u l-politiki
soċjali. Artikolu 3
Kamp ta' applikazzjoni
tal-għajnuna 1. Skont l-għanijiet
tematiċi elenkati hawn taħt, u skont l-Artikolu 9 tar-Regolament
(UE) Nru […], l-FSE għandu jappoġġa l-prijoritajiet ta'
investiment li ġejjin: (a)
Il-promozzjoni tal-impjiegi u l-appoġġ
għall-mobbiltà fix-xogħol permezz ta': (i) L-aċċess għall-impjiegi
għal dawk li qed ifittxu xogħol u għan-nies li mhumiex attivi,
inkluzi inizjattivi għall-impjiegi lokali u appoġġ
għall-mobbiltà fix-xogħol; (ii) L-integrazzjoni sostenibbli
taż-żgħażagħ li mhumiex qegħdin f'impjieg,
fl-edukazzjoni jew fit-taħriġ għas-suq tax-xogħol; (iii) L-impjiegi indipendenti,
l-intraprenditorija u l-ħolqien ta' negozji; (iv) L-ugwaljanza bejn l-irġiel u n-nisa
u r-rikonċiljazzjoni bejn ix-xogħol u l-ħajja privata; (v) L-adattament tal-ħaddiema,
l-impriżi u l-intraprendituri għall-bidla; (vi) It-tixjiħ attiv u fi stat tajjeb
ta' saħħa; (vii) Il-modernizzazzjoni u t-tisħiħ
tal-istituzzjonijiet tas-suq tax-xogħol, inklużi l-azzjonijiet
għat-tisħiħ tal-mobbiltà transnazzjonali tax-xogħol; (b)
L-investiment fl-edukazzjoni, il-ħiliet u
t-tagħlim tul il-ħajja permezz ta': (i) It-tnaqqis tat-tluq bikri mill-iskola u
l-promozzjoni ta' aċċess ugwali għall-edukazzjoni ta' kwalità
tajba fil-bidu tat-tfulija, l-edukazzjoni primarja u dik sekondarja; (ii) It-titjib tal-kwalità,
l-effiċjenza u l-ftuħ tal-edukazzjoni terzjarja u ekwivalenti
bl-għan li jiżdiedu l-livelli ta' parteċipazzjoni u ta' kisba; (iii) It-tisħiħ
tal-aċċess għat-tagħlim tul il-ħajja, it-titjib
tal-ħiliet u l-kompetenzi tal-forza tax-xogħol u ż-żieda
tar-rilevanza tas-suq tax-xogħol tas-sistemi tal-edukazzjoni u
t-taħriġ; (c)
Il-promozzjoni tal-inklużjoni soċjali u
l-ġlieda kontra l-faqar permezz ta': (i) L-inklużjoni attiva; (ii) L-integrazzjoni tal-komunitajiet
marġinalizzati bħar-Roma; (iii) Il-ġlieda kontra
d-diskriminazzjoni minħabba s-sess, l-oriġini razzjali jew etnika,
ir-reliġjon jew it-twemmin, id-diżabbiltà, l-età jew l-orjentazzjoni
sesswali; (iv) It-tisħiħ tal-aċċess
għal servizzi bi prezz li jista' jintlaħaq, sostenibbli u ta' kwalità
għolja, inkluża l-kura tas-saħħa u s-servizzi soċjali
ta' interess ġenerali; (v) Il-promozzjoni tal-ekonomija soċjali
u l-impriżi soċjali; (vi) Strateġiji lokali
għall-iżvilupp lokali mmexxija mill-komunità; (d)
It-titjib tal-kapaċità istituzzjonali u
l-amministrazzjoni pubblika effiċjenti permezz ta': (i) L-investiment fil-kapaċità
istituzzjonali u fl-effiċjenza tal-amministrazzjonijiet pubbliċi u
s-servizzi pubbliċi bl-għan li jkun hemm riformi, regolamentazzjoni
aħjar u tmexxija tajba;
Din il-prijorità ta' investiment tapplika biss madwar it-territorju tal-Istati
Membri li għandhom mill-inqas reġjun wieħed NUTS
tal-livell 2 kif definit fl-Artikolu 82(2)(a) tar-Regolament (UE)
Nru […] jew fl-Istati Membri li huma eliġibbli għal
appoġġ mill-Fond ta' Koeżjoni. (ii) Il-bini tal-kapaċitajiet għall-partijiet
interessati li joħorġu politiki dwar l-impjiegi, l-edukazzjoni u
soċjali u patti settorjali u territorjali għall-mobilizzazzjoni
tar-riforma f'livell nazzjonali, reġjonali u lokali. 2. Permezz tal-prijoritajiet ta'
investiment elenkati fil-paragrafu 1, l-FSE għandu wkoll
jikkontribwixxi għall-għanijiet tematiċi l-oħra elenkati
fl-Artikolu 9 tar-Regolament (UE) Nru […], l-aktar billi: (e)
Jappoġġa l-bidla lejn ekonomija baxxa
fil-karbonju, reżistenti għat-tibdil fil-klima, li tagħmel
użu effiċjenti tar-riżorsi u ambjentalment sostenibbli, permezz
tar-riforma tas-sistemi tal-edukazzjoni u tat-taħriġ, l-adattament
tal-ħiliet u l-kwalifiki, it-titjieb tal-ħiliet tal-forza
tax-xogħol, u l-ħolqien ta' impjiegi ġodda f'setturi relatati
mal-ambjent u l-enerġija; (f)
It-titjib tal-aċċessibbiltà, l-użu u
l-kwalità tat-teknoloġiji tal-informazzjoni u l-komunikazzjoni, permezz
tal-iżvilupp tal-kompetenza diġitali, l-investiment
fl-inklużjoni diġitali, il-ħiliet diġitali u l-ħiliet
intraprenditorjali relatati; (g)
It-tisħiħ tar-riċerka,
l-iżvilupp u l-innovazzjoni teknoliġiċi, permezz
tal-iżvilupp tal-istudji post universitarji, it-taħriġ
tar-riċerkaturi, l-attivitajiet ta' netwerking u l-isħubiji bejn
istituzzjonijiet ta' edukazzjoni ogħla, iċ-ċentri
tar-riċerka u teknoloġiċi u l-intrapriżi; (h)
It-tisħiħ tal-kompetittività
tal-impriżi żgħar u medji, permezz tal-promozzjoni
tal-adattabbiltà tal-impriżi u l-ħaddiema u aktar investiment
fil-kapital uman. Artikolu 4
Konsistenza u
konċentrazzjoni tematika 1. L-Istati Membri għandhom
jiżguraw li l-istrateġija u l-azzjonijiet stabbiliti fl-Programmi
Operattivi huma konsistenti u jiffokaw fuq l-indirizzar tal-isfidi identifikati
fil-Programmi tar-Riforma Nazzonali u r-Rakkomandazzjonijiet tal-Kunsill
rilevanti li saru skont l-Artikolu 148(4) tat-Trattat, sabiex
jikkontribwixxu għall-kisba tal-miri ewlenin tal-istrateġija
Ewropa 2020 dwar l-impjiegi, l-edukazzjoni u t-tnaqqis tal-faqar. 2. Mill-inqas 20 %
tar-riżorsi totali tal-FSE f'kull Stat Membru għandu jiġi
allokat lill-għan tematiku "il-promozzjoni tal-inklużjoni
soċjali u l-ġlieda kontra l-faqar" stabbilit
fl-Artikolu 9(9) tar-Regolament (UE) Nru […]. 3. L-Istati Membri għandhom
ikomplu jwettqu l-konċentrazzjoni tematika skont il-modalitajiet li
ġejjin: (a)
Għar-reġjuni aktar żviluppati,
l-Istati Membri għandhom jikkonċentraw 80 % tal-FSE
tal-allokazzjoni lil kull programm operativ fuq sa erbgħa
mill-prijoritajiet ta' investiment stabbiliti fl-Artikolu 3(1). (b)
Għar-reġjuni tranżitorji, l-Istati
Membri għandhom jikkonċentraw 70 % tal-allokazzjoni tal-FSE lil
kull programm operativ fuq sa erbgħa mill-prijoritajiet ta' investiment
stabbiliti fl-Artikolu 3(1). (c)
Għar-reġjuni inqas żviluppati,
l-Istati Membri għandhom jikkonċentraw 60 % tal-allokazzjoni
tal-FSE lil kull programm operativ fuq sa erbgħa mill-prijoritajiet ta'
investiment stabbiliti fl-Artikolu 3(1). Artikolu 5
Indikaturi 1. Għandhom jintużaw
indikaturi komuni kif stabbiliti fl-Anness ta' dan ir-Regolament u indikaturi
speċfiċi għal kull programm skont l-Artikolu 24(3) u
87(2)(b)(ii) tar-Regolament (UE) Nru […]. L-indikaturi kollha
għandhom jiġu espressi f'numri assoluti.
L-indikaturi tal-produzzjoni komuni u dawk speċifiċi għal kull
programm jirrigwardaw l-operazzjonijiet implimentati parzjalment jew
bis-sħiħ. Fejn ikunu rilevanti għan-natura tal-operazzjonijiet
appoġġati, il-valuri ta' mira kwantifikati kumulattivi għandhom
jiġu stabbiliti għall-2022. L-indikaturi ta' referenza għandhom
jiġu ffissati għal żero.
L-indikaturi tar-riżultati komuni u dawk speċifiċi għal
kull programm jirrigwardaw l-assi prijoritarju. L-indikaturi ta' referenza
għandhom jużaw id-dejta l-aktar reċenti disponibbli. Il-valuri
ta' mira kwantifikati kumulattivi għandhom jiġu stabbiliti
għall-2022. 2. Fl-istess żmien
tar-rapporti tal-implimentazzjoni annwali, l-awtorità ta' ġestjoni
għandha titrażmetti dejta strutturata b'mod elettroniku għal
kull prijorità ta' investiment. Id-dejta għandha tkopri
l-kategorizzazzjoni u l-indikaturi tal-produzzjoni u tar-riżultati. Kapitolu II
Dispożizzjonijiet speċifiċi għall-ipprogrammar u
l-implimentazzjoni Artikolu 6
Involviment tal-imsieħba 1. L-involviment
tal-imsieħba soċjali u partijiet interessati oħra, b'mod
partikolari l-organizzazzjonijiet mhux governattivi, fl-implimentazzjoni ta'
programmi operattivi, kif imsemmi fl-Artikolu 5 tar-Regolament (UE)
Nru […], jista' jieħu l-forma ta' għotjiet globali kif definit
fl-Artikolu 113(7) tar-Regolament (UE) Nru […]. F'tali każ,
il-progamm operativ għandu jidentifika l-parti tal-programm
ikkonċernat mill-għotja globali, inkluża allokazzjoni
finanzjarja indikattiva minn kull assi prijoritarju lilu. 2. Sabiex
titħeġġeġ parteċipazzjoni xierqa tal-imsieħba
soċjali f'azzjonijiet appoġġati mill-FSE, l-awtoritajiet ta'
ġestjoni ta' programm operattiv f'reġjun kif definit fl-Artikolu 82(2)(a)
tar-Regolament (UE) Nru […] jew fi Stati Membri li huma eliġibbli
għall-appoġġ mill-Fond ta' Koeżjoni għandhom
jiżguraw li ammont xieraq tar-riżorsi tal-FSE jiġi allokat
għall-attivitajiet tal-bini tal-kapaċitajiet, fil-forma ta'
taħriġ, miżuri ta' netwerking, u t-tisħiħ tad-djalogu
soċjali, u lil attivitajiet li jitwettqu b'mod konġunt
mill-imsieħba soċjali. 3. Sabiex
titħeġġeġ parteċipazzjoni xierqa u l-aċċess
mill-organizzazzjonijiet mhux governattivi għal azzjonijiet
appoġġati mill-FSE, l-aktar fl-oqsma tal-inklużjoni
soċjali, l-ugwaljanza bejn is-sessi u l-opportunitajiet indaqs,
l-awtoritajiet ta' ġestjoni ta' programm operattiv f'reġjun kif
definit fl-Artikolu 82(2)(a) tar-Regolament (UE) Nru […] jew fi Stati
Membri li huma eliġibbli għall-appoġġ mill-Fond ta'
Koeżjoni għandhom jiżguraw li ammont xieraq tar-riżorsi
tal-FSE jiġi allokat għall-bini tal-kapaċitajiet
għall-organizzazzjonijiet mhux governattivi. Artikolu 7
Promozzjoni tal-ugwaljanza
bejn l-irġiel u n-nisa L-Istati Membri u l-Kummissjoni għandhom
jippromwovu l-ugwaljanza bejn l-irġiel u n-nisa permezz tal-mainstreaming
kif imsemmi fl-Artikolu 7 tar-Regolament (UE) Nru […] u azzjonijiet
b'mira speċifika kif imsemmi fl-Artikolu 3(1)(a)(iv), b'mod partikolari
bl-għan li tiżdied il-parteċipazzjoni sostenibbli u l-progress
tan-nisa fl-impjiegi, titnaqqas is-segregazzjoni bbażata fuq is-sessi
fis-suq tax-xogħol, jiġġieldu kontra l-isterjotipi skont
is-sessi fl-edukazzjoni u t-taħriġ u jippromwovu r-rikonċiljazzjoni
tax-xogħol u l-ħajja personali għall-irġiel u n-nisa. Artikolu 8
Promozzjoni
tal-opportunitajiet indaqs u n-nondiskriminazzjoni L-Istati Membri u l-Kummissjoni għandhom
jippromwovu l-opportunitajiet indaqs għal kulħadd, inkluża
l-aċċessibbiltà għall-persuni b'diżabbiltà permezz
tal-mainstreaming tal-prinċipju tan-nondiskriminazzjoni, kif imsemmi
fl-Artikolu 7 tar-Regolament (UE) Nru […], u permezz ta' azzjonijiet
speċifiċi fi ħdan il-prijoritajiet ta' investiment kif definit
fl-Artikolu 3, u b'mod partikolari l-Artikolu 3(1)(c)(iii). Tali
azzjonijiet għandhom jimmiraw in-nies li għandhom riskju ta'
diskriminazzjoni u nies b'diżabbiltà, bl-għan li tiżdied
il-parteċipazzjoni tagħhom fis-suq tax-xogħol,
tissaħħaħ l-inklużjoni soċjali tagħhom, jitnaqqsu
l-inugwaljanzi f'termini ta' kisba edukattiva u l-istat tas-saħħa u
tiġi faċilitata t-tranżizzjoni mill-kura istituzzjonali
għal dik ibbażata fuq il-komunità. Artikolu 9
Innovazzjoni soċjali 1. L-FSE għandu jippromwovi
l-innovazzjoni soċjali fi ħdan l-oqsma kollha li jaqaw fil-kamp ta'
applikazzjoni tal-FSE, kif definit fl-Artikolu 3 ta' dan ir-Regolament,
b'mod partikolari bl-għan li jiġu ttestjati u mtejba s-soluzzjonijiet
innovattivi sabiex jiġu indirizzati l-ħtiġijiet soċjali. 2. L-Istati Membri għandhom
jidentifikaw temi għall-innovazzjoni soċjali, li jikkorrispondu
għall-ħtiġijiet speċifiċi tagħhom fil-programmi
operattivi tagħhom. 3. Il-Kummissjoni għandha
tiffaċilita l-bini tal-kapaċitajiet għall-innovazzjoni
soċjali, b'mod partikolari permezz tal-appoġġ tat-tagħlim
reċiproku, l-istabbiliment ta' netwerks, u t-tixrid tal-prassi tajba u
tal-metodoloġiji. Artikolu 10
Koperazzjoni transnazzjonali 1. L-Istati Membri għandhom
jappoġġaw il-kooperazzjoni transnazzjonali bl-għan li
jippromwovu t-tagħlim reċiproku u b'hekk iżidu l-effettività
tal-politiki appoġġati mill-FSE. Il-kooperazzjoni transnazzjonali
għandha tinvolvi l-imsieħba minn mill-inqas żewġ Stati
Membri. 2. L-Istati Membri jistgħu
jagħżlu temi għall-kooperazzjoni transnazzjonali minn lista
proposta mill-Kummissjoni u approvata mill-Kumitat tal-FSE. 3. Il-Kummissjoni għandha
tiffaċilita l-kooperazzjoni transnazzjonali fit-temi msemmija
fil-paragrafu 2 permezz tat-tagħlim reċiproku u l-azzjoni
koordinata jew konġunta. B'mod partikolari, il-Kummissjoni għandha
tħaddem pjattaforma fuq livell tal-UE biex tiffaċilita l-iskambju
tal-esperjenza, il-bini tal-kapaċitajiet u n-netwerking kif ukoll
it-tixrid tar-riżultati rilevanti. Barra minn hekk, il-Kummissjoni
għandha tiżviluppa qafas ta' implimentazzjoni koordinat, inklużi
kriterji ta' eliġibbiltà komuni, tipi u għażla ta' żmien
tal-azzjonijiet, u approċċi metodoloġiċi komuni
għall-monitoraġġ u l-evalwazzjoni, bl-għan li tiġi
ffaċilitata l-kooperazzjoni transnazzjonali. Artikolu 11
Dispożizzjonijiet
speċifiċi għall-fondi għall-programmi operattivi 1. B'deroga
mill-Artikolu 87(1) tar-Regolament (UE) Nru […], il-programmi
operattivi jistgħu jistabbilixxu assi prijoritarju
għall-implimentazzjoni tal-innovazzjoni soċjali u l-kooperazzjoni
transnazzjonali kif imsemmi fl-Artikoli 9 u 10. 2. B'deroga
mill-Artikolu 110(3) tar-Regolament (UE) Nru […], ir-rata ta'
kofinanzjament massima għal assi prijoritarju għandha tiżdied
b'għaxar punti perċentwali, iżda ma taqbiżx 100 %,
fejn l-assi prijoritarju sħiħ ikun dedikat għall-innovazzjoni
soċjali jew għall-kooperazzjoni transnazzjonali, jew taħlita
tat-tnejn. 3. Minbarra d-dispożizzjoni
magħmula fl-Artikolu 87(3) tar-Regolament (UE) Nru […],
il-programmi operattivi għandhom ukoll jistabbilixxu l-kontribut
tal-azzjonijiet ippjanati appoġġati mill-FSE: (i)
lill-għanijiet tematiċi elenkati
fl-Artikolu 9(1) sa (7) tar-Regolament (UE) Nru […] għal kull
assi prijoritarju, kif xieraq; (j)
lill-innovazzjoni soċjali u l-kooperazzjoni
transnazzjonali, kif imsemmi fl-Artikoli 9 u 10, fejn dawn ma jkunux
koperti minn assi prijoritarju dedikat. Artikolu 12
Disposizzjonijiet
speċifiċi fuq it-trattament ta’ karatterisitiċi territorjali
speċjali 1. L-FSE jista'
jappoġġa strateġiji tal-iżvilupp lokali mmexxija
mill-komunità, kif imsemmi fl-Artikolu 28 tar-Regolament (UE) Nru […],
patti territorajli u inizjattivi lokali għall-impjiegi, l-edukazzjoni u
l-inklużjoni soċjali, kif ukoll Investimenti Territorjali Integrati
(ITI) kif imsemmi fl-Artikolu 99 tar-Regolamen (UE) Nru […]. 2. Bħala għajnuna
għall-interventi tal-FEŻR kif imsemmi fl-Artikolu 7
tar-Regolament (UE) Nru [FEŻR], l-FSE jista' jappoġġa
l-iżvilupp urban sostenibbli permezz ta' strateġiji li jistabbilixxu
azzjonijiet integrati sabiex jindirizzaw l-isfidi ekonomiċi, ambjentali u
soċjali li jaffettwaw iż-żoni urbani tal-ibliet li huma elenkati
fil-kuntratt ta' sħubija. Kapitolu III
Dispożizzjonijiet speċifiċi għall-ġestjoni finanzjarja Artikolu 13
Eliġibbiltà tan-nefqa 1. L-FSE għandu jipprovdi
appoġġ għan-nefqa eliġibbli li, minkejja
l-Artikolu 110(2)(b) tar-Regolament (UE) Nru […], jista' jinkludi
kwalunkwe riżorsi finanzjarji kollettivament kostitwiti minn min
iħaddem u minn ħaddiema. 2. L-FSE jista' jipprovdi
appoġġ għan-nefqa li ġġarrbet
għall-operazzjonijiet li jsiru 'l barra miż-żona tal-programm,
iżda ġewwa l-Unjoni, sakemm jiġu ssodisfati
ż-żewġ kundizzjonijiet li ġejjin: (k)
l-operazzjoni hija għall-benefiċċju
taż-żona tal-programm; (l)
l-obbligi tal-awtoritajiet għall-programm
relatati mal-ġestjoni, il-kontroll u l-awditjar fir-rigward
tal-operazzjoni jkunu ssodisfati mill-awtoritajiet responsabbli
għall-programm li taħtu tiġi appoġġata l-operazzjoni
jew jidħlu fi ftehim mal-awtoritajiet fl-Istati Membri li fihom qed
tiġi implimentata l-operazzjoni sakemm il-kundizzjonijiet stabbiliti
fil-paragrafu 2(a) u l-obbligi relatati mal-ġestjoni, il-kontroll u
l-awditjar fir-rigward tal-operazzjoni jkunu ssodisfati. 3. Minbarra n-nefqa msemmija
fl-Artikolu 59(3) tar-Regolament (UE) Nru […], ix-xiri
tal-infrastruttura, l-art u l-proprjetà ma għandux ikun eliġibbli
għal kontribut mill-FSE. 4. Il-kontributi materjali
fil-forma ta' għotjiet jew salarji maħruġa minn parti terza
għall-benefiċċju tal-parteċipanti f'operazzjoni
jistgħu jkunu eliġibbli għal kontribut mill-FSE sakemm il-valur
tagħhom ma jaqbiżx il-kost mġarrab mill-parti terza u li jkun
mġarrab skont ir-regoli nazzjonali, inklużi r-regoli tal-kontabbiltà. Artikolu 14
Għażliet tal-kosti
simplifikati 1. Minbarra l-metodi msemmija
fl-Artikolu 57 tar-Regolament (UE) Nru […], il-Kummissjoni tista'
tħallas lura n-nefqa mħallsa mill-Istati Membri fuq il-bażi
tal-iskali standard tal-kosti unitarji u s-somom f'daqqa definiti
mill-Kummissjoni. L-ammonti kkalkulati fuq din il-bażi għandhom
jitqiesu bħala appoġġ pubbliku mħallas
lill-benefiċjarji u bħala nefqa eliġibbli għall-iskop li
jiġi applikat ir-Regolament (UE) Nru […]. Għal dan l-iskop il-Kummissjoni għandu
jkollha s-setgħa li tadotta atti delegati skont l-Artikolu 16 dwar
it-tip ta' operazzjonijiet koperati, id-definizzjonijiet tal-iskali standard
tal-kosti unitarji u s-somom f'daqqa u l-ammonti massimi tagħhom, li
jistgħu jiġu aġġustati skont il-metodi normalment miftiehma
applikabbli. L-awditjar finanzjarju għandu jimmira
esklussivament li jivverifika li l-kundizzjonijiet għall-ħlas lura
mill-Kummissjoni fuq il-bażi tal-iskali standard tal-kosti unitarji u
s-somom f'daqqa jkunu ġew ssodisfati. Meta jintużaw dawn il-forom ta' finanzjament,
l-Istat Membru jista' japplika l-prattiki tal-kontabbiltà tiegħu
għall-appoġġ tal-operazzjonijiet. Għall-iskop ta' dan
ir-Regolament u r-Regolament (UE) Nru […] dawn il-prattiki tal-kontabbiltà
u l-ammonti li jirriżultaw ma għandhomx ikunu soġġetti
għall-awditjar mill-awtorità tal-awditjar jew mill-Kummissjoni. 2. Skont
l-Artikolu 57(1)(d) u (4)(d) tar-Regolament (UE) Nru […], tista'
tintuża rata fissa sa 40 % tal-kosti tal-persunal diretti
eliġibbli sabiex tkopri l-kosti eliġibbli ta' operazzjoni li jifdal. 3. L-għotjiet li
jitħallsu lura fuq il-bażi tal-kost eliġibbli
tal-operazzjonijiet, determinati permezz ta' finanzjament b'rata fissa, skali
standard ta' kosti unitarji u somom f'daqqa kif imsemmi fl-Artikolu 57(1)
tar-Regolament (UE) Nru […] jistgħu jiġu kkalkulati fuq
bażi ta' kull każ b'referenza għal abbozz ta' baġit
miftiehem ex ante mill-Awtorità ta' Tmexxija, fejn l-appoġġ
pubbliku ma jaqbiżx l-EUR 100 000. 4. L-għotjiet li
għalihom l-appoġġ pubbliku ma jaqbiżx
l-EUR 50 000 għandhom jieħdu l-forma ta' somom f'daqqa jew
skali standard ta' kosti unitarji skont il-paragrafu 1 jew
l-Artikolu 57 tar-Regolament (UE) Nru […], għajr
għall-operazzjonijiet li jirċievu appoġġ fi ħdan
il-qafas ta' skema ta' għajnuna mill-istat. Artikolu 15
Strumenti finanzjarji 1. Skont l-Artikolu 32
tar-Regolament (UE) Nru […], l-FSE jista' jappoġġa azzjonijiet u
politiki li jaqaw fil-kamp ta' applikazzjoni tiegħu permezz ta' strumenti
finanzjarji, bħall-iskemi tal-qsim tar-riskju, l-ekwità u d-dejn, fondi
ta' garanzija, fondi ta' investiment u fondi ta' self. 2. L-FSE jista' jintuża
għat-tisħiħ tal-aċċess għas-swieq tal-kapital
għal korpi pubbliċi u privati fuq livelli nazzjonali u reġjonali
li jimplimentaw azzjonijiet u politiki li jaqaw fil-kamp ta' applikazzjoni
tal-FSE u l-programm operattiv permezz ta' "garanziji tal-FSE bbażati
fuq il-politiki" sakemm il-Kummissjoni tagħti l-approvazzjoni
tagħha. Il-Kummissjoni għandu jkollha s-setgħa
li tadotta atti delegati skont l-Artikolu 16 sabiex tiddefinixxi r-regoli
u l-kundizzjonijiet speċifiċi għall-applikazzjonijiet tal-Istati
Membri, inklużi l-limiti, għall-garanziji bbażati fuq
il-politiki, filwaqt li tiżgura b'mod partikolari li l-użu
tagħhom ma jwassalx għal livelli eċċessivi ta' dejn
tal-korpi pubbliċi. Kull applikazzjoni għandha tiġi
vvalutata mill-Kummissjoni, u l-Kummissjoni għandha tapprova kull
"garanzija tal-FSE bbażata fuq il-politiki" sakemm din taqa' fil-qasam
ta' attività tal-Programm Operattiv imsemmi fl-Artikolu 87 tar-Regolament
(UE) Nru […] u sakemm tkun konformi mar-regoli u l-kundizzjonijiet
speċifiċi stabbiliti.
Kapitolu IV
Delega tas-setgħa u dispożizzjonijiet finali Artikolu 16
Eżerċizzju tad-delega 1. Is-setgħa sabiex
jiġu adottati atti ddelegati tingħata lill-Kummissjoni skont
il-kundizzjonijiet stabbiliti f’dan l-Artikolu. 2. Id-delega tas-setgħa
msemmija fl-Artikoli 14(1) u 15(2) għandha tingħata għal
perjodu ta' żmien indeterminat mill-1 ta' Jannar 2014. 3. Id-delega tas-setgħa
msemmija fl-ewwel subparagrafu tal-Artikolu 14(1) u fit-tieni subparagrafu
tal-Artikolu 15(2) tista’ tiġi revokata fi kwalunkwe waqt
mill-Parlament Ewropew jew mill-Kunsill. Deċiżjoni ta’ revoka
għandha ttemm id-delega tas-setgħa speċifikata f’dik
id-deċiżjoni. Din għandha ssir effettiva mill-jum wara
l-pubblikazzjoni tad-deċiżjoni f’Il-Ġurnal Uffiċjali
tal-Unjoni Ewropea jew f’data aktar tard speċifikata fiha. Ma
għandhiex taffettwa l-validità tal-ebda att delegat diġà
fis-seħħ. 4. Malli tadotta att delegat,
il-Kummissjoni għandha tinnotifikah simultanjament lill-Parlament Ewropew
u lill-Kunsill. 5. Att delegat adottat skont
l-ewwel subparagrafu tal-Artikolu 14(1) u t-tieni subparagrafu
tal-Artikolu 15(2) għandu jidħol fis-seħħ biss jekk ma
jkunx hemm oġġezzjoni mill-Parlament Ewropew jew mill-Kunsill
f'perjodu ta’ xahrejn ta’ notifika ta’ dak l-att lill-Parlament Ewropew u
lill-Kunsill jew jekk, qabel l-iskadenza ta’ dak il-perjodu, il-Parlament
Ewropew u l-Kunsill ikunu t-tnejn infurmaw lill-Kummissjoni li mhux se
joġġezzjonaw. Dak il-perjodu għandu jiġi estiż
b’xahrejn fuq l-inizjattiva tal-Parlament Ewropew jew il-Kunsill. Artikolu 17
Revoka Ir-Regolament tal-Kunsill (KE)
Nru 1081/2006 huwa b’dan irrevokat b’effett
mill-1 ta’ Jannar 2014. Ir-referenzi għar-Regolament
imħassar għandhom jitqiesu bħala referenzi għal dan
ir-Regolament. Artikolu 18
Klawżola ta’
reviżjoni Il-Parlament Ewropew u l-Kunsill għandhom
jirrivedu dan ir-Regolament sal-31 ta' Diċembru 2020 skont
l-Artikolu 164 tat-Trattat. Artikolu 19
Dħul fis-seħħ Dan ir-Regolament għandu jidħol
fis-seħħ l-għada tal-jum tal-pubblikazzjoni tiegħu f'Il-Ġurnal
Uffiċjali tal-Unjoni Ewropea. Dan ir-Regolament għandu jorbot
fl-intier tiegħu u japplika direttament fl-Istati Membri kollha. Magħmul fi Brussell, Għall-Parlament Ewropew Għall-Kunsill Il-President Il-President ANNESS
Indikaturi tal-produzzjoni u tar-riżultati komuni għall-investimenti
tal-FSE (1)
Indikaturi tal-produzzjoni komuni dwar
il-parteċipanti Il-parteċipanti[20] jirreferu għal persuni li
jibbenefikaw direttament minn investiment tal-FSE u li jistgħu jiġu
identifikati u jintalbu l-karatteristiċi tagħhom, u li għalihom
tiġi mwarrba nefqa speċifika. Benefiċjarji oħra ma
għandhomx jitqiesu bħala parteċipanti. · persuni qiegħda, inklużi dawk qiegħda għal perjodu
ta' żmien twil* · il-persuni qiegћda gћal żmien twil* · inattivi* · inattivi, mhux li qed jedukaw irwieħhom jew qed
jitħarrġu* · impjegati, inklużi dawk li jaħdmu għal rashom* · ta' taħt il-25 sena* · 'il fuq minn 54 sena* · b'edukazzjoni primarja (ISCED 1) jew sekondarja baxxa (ISCED 2)* · b'edukazzjoni sekondarja għolja (ISCED 3) jew edukazzjoni post
sekondarja (ISCED 4)* · b'edukazzjoni terzjarja (ISCED 5 to 8)* · migranti, persuni bi sfond barrani, minoritajiet (inklużi l-komunitajiet
marġinalizzati bħar-Roma)** · il-persuni b’diżabbiltà** · persuni żvantaġġjati oћra** L-għadd totali tal-parteċipanti huwa
kkalkulat awtomatikament fuq il-bażi tal-indikaturi tal-produzzjoni. Din id-dejta dwar il-parteċipanti li
jidħlu f'operazzjoni appoġġata mill-FSE għandha tiġi
pprovduta fir-rapporti tal-implimentazzjoni annwali kif speċifikat
fl-Artikolu 44(1) u (2) u l-Artikolu 101(1) tar-Regolament (UE)
Nru […]. Id-dejta kollha għandha titqassam skont is-sess.
(2)
L-indikaturi tal-produzzjoni komuni
għall-entitajiet · għadd ta' proġetti implimentati bis-sħiħ jew
parzjalment mill-imsieħba soċjali jew l-organizzazzjonijiet mhux
governattivi · għadd ta' proġetti li jimmiraw l-amministrazzjonijiet
pubbliċi jew is-servizzi pubbliċi · għadd ta' mikroimpriżi u impriżi żgħar u medji
appoġġati Din id-dejta għandha tiġi pprovduta
fir-rapporti tal-implimentazzjoni annwali kif speċifikat
fl-Artikolu 44(1) u (2) u l-Artikolu 101(1) tar-Regolament (UE)
Nru […].
(3)
Indikaturi tar-riżultati immedjati komuni dwar
il-parteċipanti · parteċipanti inattivi li meta telqu kienu bdew ifittxu impjieg · parteċipanti li meta telqu kienu fl-edukazzjoni/taħriġ · parteċipanti li meta telqu kisbu kwalifika · parteċipanti li meta telqu sabu impjieg Din id-dejta għandha tiġi pprovduta
fir-rapporti tal-implimentazzjoni annwali kif speċifikat
fl-Artikolu 44(1) u (2) u l-Artikolu 101(1) tar-Regolament (UE)
Nru […]. Id-dejta kollha għandha titqassam skont is-sess.
(4)
Indikaturi tar-riżultati fuq żmien itwal
komuni dwar il-parteċipanti · parteċipanti li sabu impjieg sitt xhur wara li telqu · parteċipanti li sabu impjieg għal rashom sitt xhur wara li
telqu · parteċipanti b'sitwazzjoni tas-suq tax-xogħol imtejba sitt
xhur wara li telqu Din id-dejta għandha tiġi pprovduta
fir-rapporti tal-implimentazzjoni annwali kif speċifikat
fl-Artikolu 44(4) tar-Regolament (UE) Nru […]. Għandha
tinġabar fuq il-bażi ta' kampjun rappreżentattiv ta'
parteċipanti f'kull assi prijoritarju. Il-validità interna tal-kampjun
għandu jiġi żgurat b'tali mod li d-dejta tista' tiġi
ġeneralizzata fil-livell tal-assi prijoritarju. Id-dejta kollha
għandha titqassam skont is-sess. [1] Il-ħames Rapport dwar il-Koeżjoni Ekonomika,
Soċjali u Territorjali, Novembru 2010. [2] il-Komunikazzjoni mill-Kummissjoni lill-Parlament
Ewropew, lill-Kunsill, lill-Kumitat Ekonomiku u Soċjali Ewropew,
lill-Kumitat tar-Reġjuni u lill-parlamenti nazzjonali: Ir-Reviżjoni
tal-Baġit tal-UE, COM(2010) 700, 19.10.2010. [3] il-Komunikazzjoni mill-Kummissjoni lill-Parlament
Ewropew, lill-Kunsill, lill-Kumitat Ekonomiku u Soċjali Ewropew u
lill-Kumitat tar-Reġjuni: Baġit għall-Ewropa 2020,
COM(2011) 500, 29.6.2011. [4] Dokument ta' Ħidma tal-Persunal tal-Kummissjoni:
Ir-riżultati tal-konsultazzjoni pubblika dwar il-konklużjonijiet
tal-ħames rapport dwar il-koeżjoni ekonomika, soċjali u
territorjali, SEC(2011) 590 finali, 13.5.2011 [5] Riżoluzzjoni
tal-Parlament Ewropew tas-7 ta' Ottubru 2010 dwar il-futur
tal-Fond Soċjali Ewropew, P7_TA(2010)0357
Riżoluzzjoni tal-Parlament Ewropew tas-7 ta' Ottubru 2010
dwar il-politika ta’ koeżjoni u l-politika reġjonali tal-UE wara
l-2013, P7_TA(2010)0356. [6] ĠU C 132/8, 3/05/2011. [7] ĠU C 166/08, 7/06/2011. [8] COM(2010) 700, 19.10.2010. [9] ĠU C , , p. . [10] ĠU C , , p. . [11] ĠU C , , p. . [12] COM(2010) 2020 finali, 3.3.2010 [13] COM (2010) 682 finali, 23.11.2010 [14] COM(2010) 477 finali, 15.09.2010 [15] COM(2010) 758 finali, tat-16.12.2010 [16] COM(2010) 245 finali/2, 26.8.2010. [17] COM(2010) 546 finali, 6.10.2010 [18] ĠU L 210, 31.7.2006, p. 12. [19] Ir-Rakkomandazzjoni tal-Kunsill
tat-13 ta' Lulju 2010 dwar linji gwida ġenerali
għall-politika ekonomika tal-Istati Membri u tal-Unjoni (ĠU
L 191, 23.7.2010, p. 28–34) u d-Deċiżjoni tal-Kunsill
tal-21 ta' Ottubru 2010 dwar il-linji gwida għall-politika
tal-Istati Membri dwar l-impjiegi (ĠU L 308, 24.11.2010,
p. 46–51). [20] L-arranġamenti tal-ipproċessar tad-dejta
stabbiliti mill-Istati Membri għandhom ikunu konformi
mad-dispożizzjonijiet tar-Direttiva 95/46
tal-24 ta' Ottubru 1995 dwar il-protezzjoni ta’ individwi
fir-rigward tal-ipproċessar ta’ dejta personali u dwar il-moviment liberu
ta’ dik id-dejta, b'mod partikolari l-Artikoli 7 u 8 tagħha.
Id-dejta rrapurtata skont l-indikaturi mmarkati b'* hija dejta personali skont
l-Artikolu 7 tad-Direttiva msemmija hawn fuq. L-ipproċessar
tagħha ikun meħtieġ għall-konformità mal-obbligazzjoni
legali li għaliha l-kontrollur huwa soġġett
(l-Artikolu 7(c)). Għad-definizzjoni ta' kontrollu, ara
l-Artikolu 2 tad-Direttiva msemmija hawn fuq.
Id-dejta rrapurtata skont l-indikaturi mmarkati b'** hija dejta ta' kategorija
speċjali skont l-Artikolu 8 tad-Direttiva msemmija hawn fuq.
Soġġetti għad-dispożizzjonijiet ta’ protezzjoni xierqa,
l-Istati Membri jistgħu, għall-finijiet ta’ interess pubbliku
sostanzjali, jistabbilixxu eżenzjonijiet b’żjieda ma dawk stabbiliti
fl-Artikolu 8(2), permezz tal-liġi nazzjonali jew
b’deċiżjoni tal-awtorità ta’ superviżjoni
(l-Artikolu 8(4)).