EUR-Lex Access to European Union law
This document is an excerpt from the EUR-Lex website
Document 52009IP0110
Prospects for the Doha Development Agenda following the Seventh WTO Ministerial Conference European Parliament resolution of 16 December 2009 on the prospects for the Doha Development Agenda (DDA) following the Seventh WTO Ministerial Conference
Prospetti għall-Aġenda ta' Doha għall-iżvilupp wara s-Seba' Konferenza ministerjali tad-WTO Riżoluzzjoni tal-Parlament Ewropew tas- 16 ta' Diċembru 2009 dwar il-prospetti għall-Aġenda ta' Doha għall-Iżvilupp wara s-Seba' Konferenza Ministerjali tad-WTO
Prospetti għall-Aġenda ta' Doha għall-iżvilupp wara s-Seba' Konferenza ministerjali tad-WTO Riżoluzzjoni tal-Parlament Ewropew tas- 16 ta' Diċembru 2009 dwar il-prospetti għall-Aġenda ta' Doha għall-Iżvilupp wara s-Seba' Konferenza Ministerjali tad-WTO
ĠU C 286E, 22.10.2010, p. 1–5
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
22.10.2010 |
MT |
Il-Ġurnal Uffiċjali tal-Unjoni Ewropea |
CE 286/1 |
L-Erbgħa, 16 ta’ Diċembru 2009
Prospetti għall-Aġenda ta' Doha għall-iżvilupp wara s-Seba' Konferenza ministerjali tad-WTO
P7_TA(2009)0110
Riżoluzzjoni tal-Parlament Ewropew tas-16 ta' Diċembru 2009 dwar il-prospetti għall-Aġenda ta' Doha għall-Iżvilupp wara s-Seba' Konferenza Ministerjali tad-WTO
2010/C 286 E/01
Il-Parlament Ewropew,
wara li kkunsidra l-Kapitolu IV, Artikoli 36 (Prinċipji u Objettivi) u 37 (Impenji) tal-Ftehim GATT,
wara li kkunsidra d-Dikjarazzjoni Ministerjali ta' Doha tal-Organizzazzjoni Dinjija tal-Kummerċ (WTO) tal-14 ta' Novembru 2001,
wara li kkunsidra d-Dikjarazzjoni Ministerjali ta' Ħong Kong tad-WTO tat-18 ta' Diċembru 2005,
wara li kkunsidra r-riżoluzzjoni tiegħu tal-4 ta' April 2006 dwar l-evalwazzjoni tar-Rawnd ta' Doha wara l-Konferenza Ministerjali tad-WTO f'Ħong Kong (1),
wara li kkunsidra l-abbozz tal-pjanijiet dettaljati (jew “modalitajiet”) għal ftehim finali dwar il-kummerċ agrikolu u mhux agrikolu,
wara li kkunsidra l-impenn mill-mexxejja dinjija tal-G20 fis-samits riċenti li jżommu status quo u li ma jeħdux miżuri li jintroduċu ostakli għall-kummerċ u l-investiment u li jirrettifikaw kwalunkwe miżura bħal din immedjatament,
wara li kkunsidra d-diskors inawgurali minn Pascal Lamy waqt il-Forum Pubbliku tad-WTO fit-28 ta' Settembru 2009,
wara li kkunsidra l-Għanijiet ta' Żvilupp tal-Millennju tan-Nazzjonijiet Uniti u l-impenji li ħadu l-Istati Membri tal-UE biex tingħata għajnuna biex jiġu indirizzati l-ġuħ u l-faqar,
wara li kkunsidra r-rapport annwali tal-2009 tad-WTO,
wara li kkunsidra s-sommarju tal-President tas-Seba' Konferenza Ministerjali tad-WTO tat-2 ta' Diċembru 2009,
wara li kkunsidra l-Artikolu 115(5) u 110(2) tar-Regoli ta' Proċedura tiegħu,
A. |
billi r-Rawnd ta' Doha tnieda fl-2001 bl-għan li jinħolqu opportunitajiet ġodda ta' kummerċ, jissaħħu r-regoli kummerċjali multilaterali, jiġu indirizzati l-iżbilanċi attwali fis-sistema kummerċjali u li l-iżvilupp sostenibbli jinqeda mill-kummerċ, b'enfasi fuq l-integrazzjoni ekonomika tal-pajjiżi li għadhom qed jiżviluppaw, speċjalment il-pajjiżi l-inqas żviluppati, konsegwenza tal-konvinzjoni li sistema multilaterali, ibbażata fuq regoli aktar ġusti u ekwi, tista' tikkontribwixxi biex ikun hemm kummerċ ġust u ħieles li jaqdi l-iżvilupp tal-kontinenti kollha, |
B. |
billi d-Dikjarazzjoni ta' Doha terġa' tafferma l-impenn li jingħata trattament speċjali u divrenzjat għall-pajjiżi li qed jiżviluppaw sabiex tiġi kkunsidrata s-sitwazzjoni inugwali tagħhom, |
C. |
billi t-Taħditiet Ministerjali tad-WTO biex ikun konkluż ir-Rawnd ta' Doha sabu ruħhom f'impass fl-aħħar ta' Lulju 2008, |
D. |
billi l-kummerċ internazzjonali ġie affettwat b'mod partikolarment qawwi mill-kriżi ekonomika, filwaqt li l-flussi kummerċjali naqsu saħansitra b'mod aktar sinifikanti mill-produzzjoni globali, |
E. |
billi jekk ikun hemm titjib fir-regoli tad-WTO dwar il-faċilitazzjoni tal-kummerċ u dwar kwistjonijiet oħrajn relatati mal-kummerċ, dan ikun vantaġġuż għall-membri kollha tad-WTO minħabba li titjieb iċ-ċertezza legali, jonqsu l-ispejjeż ta' tranżazzjonijiet kummerċjali u jiġi evitat l-abbuż, |
F. |
billi s-Seba' Konferenza Ministerjali tad-WTO, li saret f'Ġinevra bejn it-30 ta' Novembru u t-2 ta' Diċembru 2009, enfasizzat l-importanza kbira tal-kummerċ u tar-Rawnd ta' Doha għall-irkupru ekonomiku u għat-tnaqqis tal-faqar fil-pajjiżi li qed jiżviluppaw, |
G. |
billi l-isem “Unjoni Ewropea” ntuża għall-ewwel darba fid-WTO fis-sessjoni ta' ħidma tal-1 ta' Diċembru 2009 waqt is-Seba' Konferenza Ministerjali, wara d-dħul fis-seħħ tat-Trattat ta' Lisbona, |
1. |
Itenni l-impenn tiegħu favur is-sistema ta' kummerċ multilaterali u d-WTO bħala l-organizzazzjoni li tiggarantixxi sistema kummerċjali bbażata fuq ir-regoli; jemmen li d-WTO għandha rwol ċentrali biex jiġi żgurat li jkun hemm ġestjoni aħjar tal-globalizzazzjoni u tqassim aktar ġust tal-benefiċċji tagħha; |
2. |
Huwa tal-fehma li, fil-kriżi ekonomika attwali, ir-regoli u l-impenji tad-WTO impedixxew b'mod sostanzjali li l-Istati Membri jirrikorru għal miżuri li jirrestrinġu l-kummerċ, filwaqt li ppermettew li jkun hemm flessibilità fl-adozzjoni ta' miżuri għall-irkupru ekonomiku; |
3. |
Iħeġġeġ lill-Membri tad-WTO biex jibqgħu impenjati b'mod attiv kontra l-protezzjoniżmu fir-relazzjonijiet bilaterali u multilaterali u l-ftehimiet futuri kollha tagħhom; |
L-Aġenda ta' Doha għall-Iżvilupp (DDA)
4. |
Jerġa' jafferma l-appoġġ qawwi tiegħi li l-iżvilupp jitpoġġa fil-qalba tal-Aġenda ta' Doha għall-Iżvilupp u jistieden lill-Membri tad-WTO sabiex iwettqu l-għanijiet ambizzjużi stipulati fid-Dikjarazzjoni Ministerjali ta' Doha tal-2001 sabiex jiżguraw li ċ-ċiklu kummerċjali attwali jkun ċiklu ta' żvilupp u li jikkontribwixxi għall-kisba tal-Għanijiet ta' Żvilupp tal-Millennju tan-Nazzjonijiet Uniti; |
5. |
Jemmen li, sabiex jiġi ssodisfat kompletament l-impenn li jiġi konkluż ċiklu dwar l-iżvilupp, il-pajjiżi żviluppati jridu jevitaw li jfittxu li jintlaħqu għanijiet ta' negozjar li jistgħu jkunu ta' ħsara għall-għanijiet ta' żvilupp taċ-ċiklu; huwa wkoll tal-fehma li l-pajjiżi emerġenti jridu jiżguraw ukoll li l-għanijiet ta' żvilupp tagħhom ma jkunux ta' ħsara għal dawk ta' pajjiżi oħra li qed jiżviluppaw, b'mod partikulari l-pajjiżi l-anqas żviluppati; |
6. |
Jirrikonoxxi l-progress li sar fl-Aġenda ta' Doha għall-Iżvilupp mill-Konferenza Ministerjali ta' Ħong Kong “l hawn; jinnota l-impenn muri matul is-Seba” Konferenza Ministerjali f'Ġinevra, li ma kinitx tirrigwarda n-negozjati dwar id-DDA; |
7. |
Jappoġġja b'mod qawwi l-konklużjoni tad-DDA fuq il-bażi ta' riżultat komprensiv, ambizzjuż u bbilanċjat tan-negozjati, għall-benefiċċju kemm tat-tkabbir ekonomiku u l-iżvilupp madwar id-dinja kollha, kif ukoll tal-kredibilità tas-sistema kummerċjali multilaterali; jemmen li konklużjoni b'suċċess tal-Aġenda ta' Doha għall-Iżvilupp tista' tkun parametru importanti biex jiġi stimulat l-irkupru ekonomiku madwar id-dinja kollha wara l-kriżi finanzjarja u ekonomika; |
8. |
Iħeġġeġ lill-ekonomiji emerġenti sabiex jerfgħu r-responsabilità tagħhom bħala protagonisti ekonomiċi globali u jagħtu konċessjonijiet paragunabbli mal-livell tagħhom ta' żvilupp u kompetittività (settorjali); jenfasizza l-importanza tal-kummerċ kemm Tramuntana-Nofsinhar kif ukoll dak Nofsinhar-Nofsinhar; |
9. |
Jitlob lill-pajjiżi żviluppati u lill-ekonomiji emerġenti biex isegwu l-inizjattiva Kollox barra l-Armi tal-UE, li toffri aċċess għas-suq 100 % mingħajr dazju u mingħajr kwoti għall-LCDs; jenfasizza anki l-importanza ta' qafas imsaħħaħ għall-Għajnuna għall-Kummerċ; |
10. |
Jistieden lill-Kummissjoni biex taħdem biex tilħaq l-objettivi mfissra fil-mandat għan-negozjar fir-rigward tal-protezzjoni tal-indikazzjonijiet ġeografiċi u tad-drittijiet tal-proprjetà intellettwali, l-aċċess għas-suq għall-prodotti u s-servizzi industrijali u l-akkwist pubbliku kemm fil-pajjiżi żviluppati kif ukoll f'dak li qed jiżviluppaw, u r-rekwiżiti minimi għal standards ambjentali u soċjali; |
11. |
Iħeġġeġ lill-UE sabiex tkun minn ta' quddiem fil-promozzjoni tal-progress tanġibbli fin-negozjati tad-WTO li għaddejjin bħalissa sabiex jiġi konkluż iċ-Ċiklu ta' Doha, kif ukoll sabiex tkun faċilitata l-parteċipazzjoni sħiħa tal-pajjiżi li qed jiżviluppaw u tal-LDCs fil-kummerċ dinji, billi sservi ta' pont bejn id-diversi pożizzjonijiet tal-membri tad-WTO; |
Agrikoltura
12. |
Jistieden lill-Kummissjoni biex tikkonforma b'mod strett mal-mandat għan-negozjar mogħti lilha mill-Kunsill, li jiffissa r-riforma tal-PAK li tlestiet diġà bħala l-limitu għall-azzjoni tagħha, sakemm jinkisbu konċessjonijiet ekwivalenti mill-imsieħba kummerċjali tagħha, u sabiex tiddefendi bil-qawwa l-pożizzjoni tal-UE dwar l-indikazzjonijiet ġeografiċi; |
13. |
Jistieden lill-Kummissjoni, fil-qafas tal-ftehim dwar il-banana li wasal biex ikun konkluż, biex tiżgura ċ-ċertezza legali vera għall-produtturi Komunitarji u tal-ACP, kif ukoll biex tiżgura li jitqiesu l-konsegwenzi finanzjarji ta' dan il-ftehim; |
14. |
Ifakkar fl-impenn tal-Membri tad-WTO matul il-Konferenza Ministerjali ta' Ħong Kong sabiex tinkiseb it-tneħħija parallela tal-forom kollha ta' sussidji għall-esportazzjoni kif ukoll tal-kontrolli rigward il-miżuri kollha għall-esportazzjoni b'effett ekwivalenti; |
15. |
Jistieden lill-pajjiżi żviluppati u lill-ekonomiji emerġenti biex jiżguraw li l-ftehim jagħti lill-pajjiżi li qed jiżviluppaw l-użu tal-għodda politika li għandhom bżonn biex jiddefendu u jiżviluppaw is-settur agrikolu tagħhom u l-produzzjoni alimentari lokali tagħhom, biex jgħollu l-istandards tal-għajxien rurali u biex isaħħu s-sigurtà tal-ikel (i.e. aċċess univerali għal livelli xierqa ta' ikel bi prezzijiet għall-but ta' kulħadd); jitlob għalekk li fil-ftehim jiġu inklużi dispożizzjonijiet ċari għal trattament speċjali u divrenzjat, speċjalment fir-rigward ta' prodotti speċjali u mekkaniżmi ta' salvagwardja speċifiċi; |
L-Aċċess għas-Suq ta' Prodotti Mhux Agrikoli (NAMA)
16. |
Jitlob li jkun hemm riżultati ambizzjużi fin-negozjati dwar l-aċċess għas-suq mhux agrikolu, li jiggarantixxu opportunitajiet reali ġodda ta' aċċess għas-suq, permezz ta' tnaqqis sostanzjali fir-rati applikati, filwaqt li jippermettu trattament speċjali u divrenzjat; jiffavorixxi t-twettiq ta' inizjattivi settorjali f'oqsma ta' interess mil-lat tal-esportazzjoni għall-UE; |
Servizzi
17. |
Iħeġġeġ lill-Kummissjoni biex iżżomm pożizzjoni soda ta' negozjar immirata lejn aċċess għas-suq ġenwinament imsaħħaħ għall-prodotti u s-servizzi Ewropej kemm fl-ekonomiji żviluppati kif ukoll f'dawk emerġenti; |
18. |
Jitlob, li jittieħdu passi biex jiġi żgurat li l-ftehimiet kummerċjali fis-settur tas-servizzi finanzjarji jinkludu miżuri li jiżguraw ir-rispett tal-għanijiet tal-komunità internazzjonali u tal-G20 biex jiġu regolati dawn is-servizzi u, b'mod partikulari, biex jiġu evitati t-toqob suwed u l-evażjoni fiskali; |
19. |
Jitlob li jkun hemm intensifikazzjoni tat-taħditiet fil-qasam tas-servizzi lejn liberalizzazzjoni ulterjuri tas-servizzi b'mod ġenerali, filwaqt li jinżammu l-objettivi tal-politika nazzjonali tal-membri tad-WTO u d-dritt tagħhom li jirregolaw is-servizzi pubbliċi; |
Riforma tad-WTO
20. |
Jinnota li hija meħtieġa riflessjoni dwar riforma istituzzjonali tad-WTO, imfassla sabiex jitjieb l-operat tagħha kif ukoll il-leġittimità demokratika u r-responsabilità diretta tagħha; jenfasizza f'dan il-kuntest l-importanza ta' dimensjoni parlamentari għad-WTO; jistieden lill-Kummissjoni biex ikollha rwol attiv fir-riforma istituzzjonali futura tad-WTO u fil-promozzjoni ta' assemblea parlamentari tad-WTO; |
21. |
Jemmen li hemm bżonn li d-WTO tindirizza b'mod aktar effikaċi r-rabtiet bejn il-kummerċ u l-isfidi globali l-ġodda, bħat-tibdil fil-klima, is-sigurtà u s-sovranità tal-ikel u kundizzjonijiet ta' xogħol diċenti; |
22. |
Jitlob li jkun hemm koperazzjoni msaħħa bejn id-WTO u organizzazzjonijiet u entitajiet internazzjonali oħrajn bħall-Organizzazzjoni tan-Nazzjonijiet Uniti għall-Ikel u l-Agrikoltura (FAO), l-Organizzazzjoni Internazzjonali tax-Xogħol (ILO), il-Programm tan-Nazzjonijiet Uniti għall-Ambjent (UNEP), il-Programm tan-Nazzjonijiet Uniti għall-Iżvilupp (UNDP) u l-Konferenza tan-Nazzjonijiet Uniti dwar il-Kummerċ u l-Iżvilupp (UNCTAD), sabiex jiġi żgurat appoġġ reċiproku u konsistenza bejn l-interessi kummerċjali u dawk mhux kummerċjali; f'dan il-kuntest jappoġġja sforzi li jkollhom l-għan li jiġu adottati standards internazzjonali u koperazzjoni regolatorja; |
23. |
Jappoġġja t-tisħiħ tal-ftehimiet ta' kummerċ ħieles bilaterali u reġjonali (WTO-plus) eżistenti u l-konklużjoni ta' oħrajn ġodda, bħala kumpliment għall-qafas multilaterali; |
It-Trattat ta' Lisbona
24. |
Iħeġġeġ lill-Kummissjoni biex tinvolvi mill-qrib lill-Parlament fin-negozjati li għaddejjin attwalment; jindika, għaldaqstant, il-bżonn li l-Ftehim ta' Qafas dwar ir-relazzjonijiet bejn il-Parlament u l-Kummissjoni jerġa' jiġi nnegozjat sabiex jirrifletti d-dispożizzjonijiet kummerċjali tat-Trattat ta' Lisbona, li permezz tagħhom il-politika kummerċjali tal-UE trid tiġi suġġetta għal skrutinju demokratiku aktar rigoruż; għandu l-ħsieb, li jirrevedi dak il-Ftehim sabiex tiġi stabbilita l-parteċipazzjoni sħiħa tal-Parlament fin-negozjati kummerċjali internazzjonali tal-UE, biex, b'mod partikulari, jiġi żgurat li:
|
*
* *
25. |
Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-gvernijiet u lill-parlamenti tal-Istati Membri u lid-Direttur Ġenerali tad-WTO. |
(1) ĠU C 293 E, 2.12.2006, p.155.