Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32020H2243

Ir-Rakkomandazzjoni tal-Kummissjoni (UE) 2020/2243 tat-22 ta’ Diċembru 2020 dwar approċċ ikkoordinat għall-ivvjaġġar u t-trasport bi tweġiba għall-varjant tas-SARS-COV-2 innutat fir-Renju Unit

C/2020/9607

ĠU L 436, 28.12.2020, p. 72–76 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

ELI: http://data.europa.eu/eli/reco/2020/2243/oj

28.12.2020   

MT

Il-Ġurnal Uffiċjali tal-Unjoni Ewropea

L 436/72

IR-RAKKOMANDAZZJONI TAL-KUMMISSJONI (UE) 2020/2243

tat-22 ta’ Diċembru 2020

dwar approċċ ikkoordinat għall-ivvjaġġar u t-trasport bi tweġiba għall-varjant tas-SARS-COV-2 innutat fir-Renju Unit

IL-KUMMISSJONI EWROPEA,

Wara li qieset it-Trattat dwar il-Funzjonament tal-Unjoni Ewropea, u b’mod partikolari l-Artikolu 292 tiegħu,

Billi:

(1)

Fit-13 ta’ Ottubru 2020, il-Kunsill adotta r-Rakkomandazzjoni (UE) 2020/1475 (1) dwar approċċ ikkoordinat għar-restrizzjoni tal-moviment liberu b’reazzjoni għall-pandemija tal-COVID-19.

(2)

L-objettiv tar-Rakkomandazzjoni (UE) 2020/1475 huwa li tiġi żgurata koordinazzjoni akbar fost l-Istati Membri meta titqies l-adozzjoni ta’ miżuri, fil-livell nazzjonali, li jirrestrinġu l-moviment liberu għal raġunijiet ta’ saħħa pubblika. Din ir-Rakkomandazzjoni tipprovdi l-qafas meħtieġ biex tiġi kkoordinata l-adozzjoni ta’ miżuri speċifiċi biex titrażżan il-firxa tal-COVID-19, li trid tkun proporzjonata u mhux diskriminatorja. Pereżempju, tipprovdi liema miżuri jistgħu jiġu applikati għal vjaġġaturi li jaslu minn żona ta’ riskju għoli u l-eċċezzjonijiet meħtieġa minn kwalunkwe miżura bħal din. Barra minn hekk, dan jirrikjedi l-għoti ta’ informazzjoni f’waqtha u aġġornata lill-pubbliku ġenerali dwar miżuri introdotti ġodda.

(3)

Ir-Rakkomandazzjoni (UE) 2020/1475 hija indirizzata lill-Istati Membri kollha. Matul il-perjodu ta’ tranżizzjoni, previst fl-Artikolu 126 tal-Ftehim dwar il-Ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (2), u skont l-Artikolu 127 ta’ dan il-Ftehim, id-dritt tal-Unjoni, inkluża r-Rakkomandazzjoni (UE) 2020/1475 jibqa’ japplika għar-Renju Unit. Matul il-perjodu ta’ tranżizzjoni, iċ-ċittadini tar-Renju Unit għandhom jitqiesu bħala ċittadini tal-UE u r-residenti tar-Renju Unit għandhom jitqiesu bħala residenti tal-Unjoni, b’mod partikolari għall-fini li jibbenefikaw mil-libertà ta’ moviment skont id-dritt tal-Unjoni u għall-fini ta’ dik ir-Rakkomandazzjoni.

(4)

Fl-2020 il-Kummissjoni adottat għadd ta’ dokumenti ta’ gwida dwar il-Korsiji Ħodor, inkluża l-Komunikazzjoni tagħha tat-28 ta’ Ottubru 2020 li taġġorna l-kunċett ta’ Korsiji Ħodor biex ma jiġux koperti biss it-toroq imma anki l-ferroviji, il-merkanzija fuq l-ilma u l-merkanzija bl-ajru, biex jiġi żgurat li l-ktajjen tal-provvista essenzjali jkomplu jiffunzjonaw u biex jiġi evitat kwalunkwe tfixkil tal-merkanzija u tal-loġistika fl-UE fit-tieni mewġa tal-pandemija.

(5)

Fit-30 ta’ Ġunju 2020, il-Kunsill adotta Rakkomandazzjoni (UE) 2020/912 (3) dwar ir-restrizzjoni temporanja fuq vjaġġar mhux essenzjali lejn l-UE u t-tneħħija possibbli ta’ tali restrizzjoni. F’din ir-Rakkomandazzjoni, il-Kunsill adotta approċċ komuni fir-rigward tar-restrizzjoni temporanja ta’ vjaġġar mhux essenzjali lejn l-UE kif miftiehem mill-Kapijiet ta’ Stat jew ta’ Gvern tal-UE fis-17 ta’ Marzu 2020 u t-tneħħija gradwali ta’ tali restrizzjoni.

(6)

Ir-Rakkomandazzjoni (UE) 2020/912 għandha żewġ Annessi: L-Anness I li jelenka l-pajjiżi terzi li r-residenti tagħhom ma għandhomx jiġu affettwati minn restrizzjoni temporanja fil-fruntieri esterni fuq l-ivvjaġġar mhux essenzjali lejn l-UE, u l-Anness II li jelenka kategoriji speċifiċi ta’ vjaġġaturi b’funzjoni jew ħtieġa essenzjali.

(7)

Wara l-iskadenza tal-perjodu ta’ tranżizzjoni previst fl-Artikolu 126 tal-Ftehim dwar il-Ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (4), ir-Renju Unit għandu jitqies bħala pajjiż terz għall-fini tar-Rakkomandazzjoni (UE) 2020/912. Sakemm ma titteħidx deċiżjoni biex ir-Renju Unit jiġi inkluż fil-lista ta’ pajjiżi terzi fl-Anness I ta’ din ir-Rakkomandazzjoni jew sakemm ma jkunx miftiehem mod ieħor bejn l-Unjoni Ewropea u r-Renju Unit minn qabel, l-ivvjaġġar mhux essenzjali mir-Renju Unit lejn l-Unjoni Ewropea mhux se jkun possibbli mill-1 ta’ Jannar 2021. Fl-istess ħin, iċ-ċittadini tal-UE li jirrisjedu fir-Renju Unit jenħtieġ li jkomplu jibbenefikaw mir-regoli u s-salvagwardji previsti fil-punt 5 (a) tar-Rakkomandazzjoni (UE) 2020/912 wara l-1 ta’ Jannar 2021.

(8)

Matul l-aħħar ftit ġimgħat, ir-Renju Unit iffaċċja żieda rapida fil-każijiet ta’ COVID 19 fix-Xlokk tal-Ingilterra, li wasslet għal investigazzjonijiet epidemjoloġiċi u viroloġiċi mtejba. Analiżi tad-data tas-sekwenza tal-ġenoma virali identifikat proporzjon kbir ta’ każijiet li jappartjenu għal varjant ġdid ta’ SARS-CoV-2, definit minn mutazzjonijiet multipli tal-proteina spike preżenti kif ukoll mutazzjonijiet f’reġjuni ġenomiċi oħra. Filwaqt li huwa magħruf u mistenni li l-viruses jinbidlu kontinwament permezz ta’ mutazzjoni li twassal biex jitfaċċaw varjanti ġodda, l-analiżi preliminari fir-Renju Unit tissuġġerixxi li dan il-varjant huwa ferm aktar trażmissibbli minn varjanti li kienu jiċċirkolaw qabel, bi stima ta’ żieda fit-trażmissibbiltà sa 70 %. F’dan il-punt ma hemm l-ebda indikazzjoni ta’ żieda fis-severità tal-marda assoċjata mal-varjant il-ġdid.

(9)

Dan il-varjant ġdid feġġ fi żmien tas-sena meta tradizzjonalment kien hemm żieda fil-kuntatti familjari u soċjali. B’reazzjoni għal dawn l-iżviluppi, fid-19 ta’ Diċembru 2020, il-Gvern tar-Renju Unit ħabbar restrizzjonijiet aktar iebsa għal partijiet kbar tax-Xlokk tal-Ingilterra, inkluż parir li n-nies ma għandhomx jivvjaġġaw lejn jew barra minn dawk iż-żoni, u li l-persuni f’dawn iż-żoni ma għandhomx jivvjaġġaw barra mill-pajjiż, ħlief għal eċċezzjonijiet limitati.

(10)

Xi każijiet bil-varjant il-ġdid sa issa ġew irrappurtati mill-Belġju, id-Danimarka, l-Italja u n-Netherlands. Pajjiżi oħra li rrappurtaw każijiet bħal dawn jinkludu l-Iżlanda u l-Awstralja. Filwaqt li huwa probabbli li l-varjant diġà qed jiċċirkola fi Stati Membri oħra tal-UE, hija meħtieġa aktar riċerka epidemjoloġika u viroloġika biex jiġi ddeterminat it-tixrid attwali ta’ dan il-varjant fl-UE.

(11)

Fid-dawl tar-riskju ta’ importazzjoni ulterjuri ta’ dan il-varjant, b’konsegwenzi f’termini ta’ għadd akbar ta’ każijiet u għalhekk ta’ dħul fl-isptar, l-Istati Membri ħadu miżuri prekawzjonarji temporanji fir-rigward tal-ivvjaġġar mir-Renju Unit, sakemm ikun hemm approċċ komuni. Jekk Stat Membru, fil-kuntest speċifiku tas-sitwazzjoni bejn l-UE u r-Renju Unit u fil-jiem li ġejjin, ikollu bżonn testijiet tal-antiġeni rapidi għall-ħaddiema tat-trasport, jenħtieġ li dan ma jwassalx għal interruzzjonijiet fit-trasport. Fl-UE, l-approċċ tal-Korsiji Ħodor jibqa’ jkollu importanza fundamentali.

(12)

Fil-laqgħa tar-Rispons Politiku Integrat f’Sitwazzjonijiet ta’ Kriżi (Integrated Political Crisis Response, IPCR) tal-21 ta’ Diċembru 2020, ħafna Stati Membri appellaw għal approċċ ikkoordinat.

TIRRAKOMANDA li:

1.

 Sa tmiem il-perjodu ta’ tranżizzjoni previst fl-Artikolu 126 tal-Ftehim dwar il-Ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika, jiġifieri l-31 ta’ Diċembru 2020, jenħtieġ li l-Istati Membri jkomplu japplikaw il-prinċipji u l-mekkaniżmi stabbiliti fir-Rakkomandazzjoni (UE) 2020/1475 meta jadottaw miżuri li jirrestrinġu l-moviment liberu mir-Renju Unit lejn l-Unjoni Ewropea.

Skont il-punt 17 tar-Rakkomandazzjoni (UE) 2020/1475, jenħtieġ li l-Istati Membri fil-prinċipju ma jirrifjutawx id-dħul ta’ persuni li jivvjaġġaw minn Stati Membri oħra jew, matul il-perjodu ta’ tranżizzjoni, mir-Renju Unit.

2.

 B’mod partikolari, l-Istati Membri kollha jenħtieġ li jimplimentaw il-punti minn 19 sa 21 tar-Rakkomandazzjoni (UE) 2020/1475 dwar il-qafas komuni dwar miżuri possibbli għal vjaġġaturi li ġejjin minn żoni ta’ riskju ogħla. Fid-dawl tal-prinċipju ta’ prekawzjoni, l-Istati Membri jenħtieġ li jiskoraġġixxu l-ivvjaġġar mhux essenzjali kollu lejn u mir-Renju Unit sakemm jingħata avviż ieħor. Madankollu, f’konformità mar-Rakkomandazzjoni (UE) 2020/1475, il-gruppi li ġejjin għandhom jiġu eżentati minn kull restrizzjoni temporanja addizzjonali, dment li jsirilhom test RT PCR jew, alternattivament, test tal-antiġeni rapidu fi żmien 72 siegħa qabel it-tluq, jew jirrispettaw għaxart ijiem ta’ kwarantina u jgħaddu minn test tar-RT-PCR fl-għaxar jum b’riżultat negattiv:

(a)

Ċittadini tal-Unjoni fis-sens tal-Artikolu 20(1) TFUE u ċittadini ta’ pajjiżi terzi li, skont ftehimiet bejn l-Unjoni u l-Istati Membri tagħha, minn naħa waħda, u dawk il-pajjiżi terzi, min-naħa l-oħra, igawdu drittijiet ta’ moviment liberu ekwivalenti għal dawk ta’ ċittadini tal-Unjoni, li jivvjaġġaw lejn l-Istat Membru jew il-pajjiż tan-nazzjonalità tagħhom;

(b)

Ċittadini tal-Unjoni fis-sens tal-Artikolu 20(1) TFUE, ċittadini ta’ pajjiżi terzi li, skont ftehimiet bejn l-Unjoni u l-Istati Membri tagħha, minn naħa waħda, u dawn il-pajjiżi terzi, min-naħa l-oħra, igawdu drittijiet ta’ moviment liberu ekwivalenti għal dawk ta’ ċittadini tal-Unjoni, u ċittadini tar-Renju Unit, li jivvjaġġaw lejn l-Istat Membru jew il-pajjiż ta’ residenza tagħhom;

(c)

ċittadini ta’ pajjiżi terzi li jkunu residenti għat-tul skont id-Direttiva dwar ir-Residenza fit-Tul, persuni li jiksbu d-dritt tagħhom li jirrisjedu minn Direttivi oħra tal-UE, mil-liġi nazzjonali jew li jkollhom viżi nazzjonali fit-tul, li jivvjaġġaw lejn l-Istat Membru ta’ residenza tagħhom;

(d)

il-membri tal-familja tal-persuni msemmija fil-punti minn (a) sa (c).

3.

 Il-vjaġġaturi b’funzjoni jew ħtieġa essenzjali kif definit fil-punt 19 tar-Rakkomandazzjoni (UE) 2020/1475, bl-eċċezzjoni tal-ħaddiema tat-trasport, jenħtieġ li jintalbu jagħmlu test RT PCR, jew, alternattivament, test tal-antiġeni rapidu fi żmien 72 siegħa qabel it-tluq, iżda ma għandhomx ikunu meħtieġa jgħaddu minn kwarantina waqt li jkunu qed jeżerċitaw din il-funzjoni essenzjali.

4.

 It-tranżitu tal-passiġġieri, speċjalment għal dawk li jivvjaġġaw b’mod essenzjali, jenħtieġ li jiġi ffaċilitat mingħajr kwarantina. F’każ li jkun meħtieġ riżultat negattiv tat-test tar-RT-PCR għat-tranżitu, il-vjaġġaturi jenħtieġ li jiġu infurmati b’dan ir-rekwiżit qabel ma jibdew il-vjaġġ tagħhom jew jiġu offruti ttestjar matul il-layover tagħhom mingħajr dewmien żejjed.

5.

 Fid-dawl tal-bżonn li jiġi żgurat it-trasport tal-persuni li jaqgħu fil-kategoriji msemmija hawn fuq, il-projbizzjoni ta’ servizzi tat-trasport, bħall-projbizzjoni ta’ titjiriet jew vjaġġi bil-ferrovija, jenħtieġ li tintemm (5).

6.

 Jenħtieġ li l-persunal tat-trasport, inklużi s-sewwieqa tat-trakkijiet u tal-ferroviji, l-ekwipaġġi tal-vapuri u tal-ajru, jiġu eżentati minn xi tip ta’ projbizzjoni fuq vjaġġar fi kwalunkwe fruntiera. B’mod simili, l-ivvjaġġar u t-tranżitu tal-baħħara jenħtieġ li jiġi faċilitat. Jenħtieġ li l-persunal tat-trasport u l-baħħara jiġu eżentati mir-rekwiżiti tal-ittestjar u tal-kwarantina meta jaqsmu fruntiera lejn u minn bastiment, vettura, jew inġenju tal-ajru, għalkemm jenħtieġ li jirrispettaw il-miżuri ta’ protezzjoni ġenerali u ta’ distanza li japplikaw lokalment. Jekk Stat Membru, fil-kuntest speċifiku tas-sitwazzjoni bejn l-UE u r-Renju Unit u fil-jiem li ġejjin, ikollu bżonn testijiet tal-antiġeni rapidi għall-ħaddiema tat-trasport, jenħtieġ li dan ma jwassalx għal interruzzjonijiet fit-trasport. Finalment, jenħtieġ li l-konnettività għall-ivvjaġġar essenzjali, inkluż ir-ritorn taċ-ċittadini u tar-residenti lura d-dar, tiġi ppreservata filwaqt li jiġu rrispettati l-miżuri ta’ prekawzjoni rilevanti.

7.

 Il-flussi tal-merkanzija wkoll iridu jkomplu mingħajr interruzzjoni, f’konformità mal-Komunikazzjoni dwar il-Korsiji Ħodor u l-Merkanzija bl-Ajru (6), mhux l-inqas biex tiġi żgurata d-distribuzzjoni fil-ħin tal-vaċċini kontra l-COVID-19 u l-provvisti anċillari, pereżempju.

8.

 Jenħtieġ li kwalunkwe miżura ġdida meħuda mill-Istati Membri fir-rigward tar-Renju Unit tiddikjara b’mod espliċitu li tiskadi fi tmiem il-perjodu ta’ tranżizzjoni, jiġifieri fil-31 ta’ Diċembru 2020.

9.

 Jenħtieġ li l-Istati Membri jiżguraw li tingħata informazzjoni komprensiva, aġġornata u fil-ħin lill-pubbliku ġenerali permezz tal-kanali ta’ komunikazzjoni kollha li huma disponibbli.

10.

 Jenħtieġ li, b’rispett sħiħ tad-drittijiet fundamentali, l-awtoritajiet tas-saħħa pubblika u l-laboratorji tal-Istati Membri:

(a)

Iżidu l-isforzi ta’ sekwenzjar u janalizzaw l-iżolati tal-virus fil-ħin biex jidentifikaw malajr il-każijiet tal-varjant il-ġdid, b’mod partikolari iżolati tal-virus minn każijiet li jinvolvu persuni li reċentement żaru jew għandhom rabta mal-pajjiżi fejn il-varjant huwa preżenti;

(b)

Jidentifikaw immedjatament il-każijiet li jinvolvu persuni li vjaġġaw lejn jew mir-Renju Unit fl-aħħar 14-il jum biex isiru testijiet skont l-RT-PCR, l-iżolat, u jiġu soġġetti għal traċċar tal-kuntatti aktar qawwi. L-iżolati tal-virus minn dawn il-każijiet jenħtieġ li jiġu sekwenzjati b’mod f’waqtu biex jiġu identifikati l-każijiet tal-varjant il-ġdid.

(c)

Jidentifikaw immedjatament każijiet li jinvolvu persuni li huma kuntatti mill-qrib ta’ każ ikkonfermat tal-varjant il-ġdid jew bi storja tal-ivvjaġġar lejn ir-Renju Unit sabiex jiġu ttestjati, iżolati jew segwiti l-kuntatti tagħhom u biex jitwaqqaf it-tixrid tal-varjant il-ġdid. L-iżolati tal-virus minn dawn il-każijiet jenħtieġ li jiġu sekwenzjati b’mod f’waqtu biex jiġu identifikati l-każijiet tal-varjant il-ġdid.

11.

 Mill-1 ta’ Jannar 2021, l-Istati Membri japplikaw ir-Rakkomandazzjoni (UE) 2020/912 fuq ir-restrizzjoni temporanja fuq l-ivvjaġġar mhux essenzjali lejn l-UE u t-tneħħija possibbli ta’ tali restrizzjoni (7) fir-rigward taċ-ċittadini tar-Renju Unit ċittadini oħra ta’ pajjiżi terzi residenti fir-Renju Unit li kienu jibbenefikaw mid-dritt ta’ moviment liberu fil-qafas tad-dritt tal-Unjoni sa tmiem il-perjodu ta’ tranżizzjoni. Dan ifisser li jista’ jsir biss vjaġġar essenzjali mir-Renju Unit lejn iż-żona Schengen sakemm ir-Renju Unit ma jitpoġġiex fil-lista tal-Anness I ta’ dik ir-Rakkomandazzjoni.

12.

 F’konformità mal-punt 5 tar-Rakkomandazzjoni (UE) 2020/912, jenħtieġ li l-kategoriji li ġejjin ta’ persuni jiġu eżentati mir-restrizzjoni fuq l-ivvjaġġar, indipendentement mill-iskop tal-ivvjaġġar, bil-kundizzjoni li jsirilhom test tal-RT-PCR jew, b’mod alternattiv, test tal-antiġeni rapidu fi żmien 72 siegħa qabel it-tluq, jew iħarsu 10 ijiem ta’ kwarantina u jagħmlu test tal-RT-PCR fl-10 jum b’riżultat negattiv:

(a)

ċittadini tal-Unjoni fis-sens tal-Artikolu 20(1) TFUE u ċittadini ta’ pajjiżi terzi li, skont ftehimiet bejn l-Unjoni u l-Istati Membri tagħha, minn naħa, u dawk il-pajjiżi terzi, min-naħa l-oħra, igawdu drittijiet ta’ moviment liberu ekwivalenti għal dawk ta’ ċittadini tal-Unjoni, kif ukoll il-membri tal-familja rispettivi tagħhom;

(b)

ċittadini ta’ pajjiżi terzi li jkunu residenti fit-tul skont id-Direttiva dwar ir-Residenza fit-Tul (8), u persuni li jiksbu d-dritt tagħhom li jirrisjedu minn Direttivi oħra tal-UE jew mil-liġi nazzjonali jew li jkollhom viżi nazzjonali għal soġġorn twil, kif ukoll il-membri tal-familja rispettivi tagħhom. Jenħtieġ li dan ikun ikopri wkoll persuni li jiksbu d-dritt tagħhom li jirrisjedu fl-UE mill-Ftehim dwar il-Ħruġ.

13.

 In-nazzjonali tar-Renju Unit li mhumiex residenti legalment fl-UE mhumiex koperti mill-eżenzjoni tal-punt 5(b) tar-Rakkomandazzjoni (UE) 2020/912 mill-1 ta’ Jannar 2021. Dan ifisser li n-nazzjonali tar-Renju Unit li mhumiex protetti mill-Ftehim dwar il-Ħruġ u li mhumiex residenti legalment fl-Unjoni u lanqas ma huma membri tal-familja ta’ ċittadini tal-Unjoni ma jistgħux jinvokaw il-punt 5(b) tar-Rakkomandazzjoni (UE) 2020/912. Madankollu, dawn in-nazzjonali tar-Renju Unit jistgħu xorta waħda jkunu koperti mill-eċċezzjoni dwar l-ivvjaġġar essenzjali (funzjoni jew ħtieġa essenzjali), kif stabbilit fl-Anness II tar-Rakkomandazzjoni (UE) 2020/912.

14.

 Jenħtieġ li l-Istati Membri u l-Pajjiżi Assoċjati ma’ Schengen jieħdu l-miżuri kollha b’mod koordinat u koerenti u jinformaw lill-Kummissjoni u lill-Istati Membri l-oħra dwar kwalunkwe miżura li jkunu ħadu mill-aktar fis possibbli. Jenħtieġ li jikkomunikaw kwalunkwe miżura futura qabel id-dħul fis-seħħ tagħha. Ir-restrizzjonijiet fuq is-servizzi tal-ajru jridu jiġu notifikati f’konformità mal-Artikoli 21 u 21a tar-Regolament (KE) Nru 1008/2008.

Magħmul fi Brussell, it-22 ta’ Diċembru 2020.

Għall-Kummissjoni

Ylva JOHANSSON

Membru tal-Kummissjoni

(1)  ĠU L 337, 14.10.2020, p. 3.

(2)  ĠU L 29, 31.1.2020, p. 7.

(3)  Ir-Rakkomandazzjoni tal-Kunsill (UE) 2020/912 tat-30 ta’ Ġunju 2020 dwar ir-restrizzjoni temporanja fuq vjaġġar mhux essenzjali lejn l-UE u t-tneħħija possibbli ta’ tali restrizzjoni (ĠU L 208 I, 1.07.2020, p. 1).

(4)  Ara n-nota 2 f’qiegħ il-paġna.

(5)  Huwa mfakkar li, fi kwalunkwe każ, ir-Regolament (KE) Nru 1008/2008 tal-Parlament Ewropew u tal-Kunsill (ĠU L 293, 31.10.2008, p. 3) jillimita b’mod strett ħafna l-possibbiltà li l-Istati Membri jipprojbixxu t-titjiriet; ara l-Artikolu 21, kif ukoll l-Artikolu 21a (applikabbli sal-31 ta’ Diċembru 2020).

(6)  Il-Komunikazzjoni tal-Kummissjoni Ewropea — Linji gwida: L-iffaċilitar tal-Operazzjonijiet tal-Merkanzija bl-Ajru waqt it-tifqigħa tal-COVID-19, C/2020/2010 (ĠU C 100 I, 27.3.2020, p. 1).

(7)  Ara n-nota 3 f’qiegħ il-paġna.

(8)  Id-Direttiva tal-Kunsill 2003/109/KE tal-25 ta’ Novembru 2003 dwar l-istatus ta’ ċittadini ta’ pajjiżi terzi li jkunu residenti għat-tul (ĠU L 16, 23.1.2004, p. 44).

Top