This document is an excerpt from the EUR-Lex website
Document E2012G0004
Decision of the Standing Committee of the EFTA States No 4/2012/SC of 26 October 2012 designating committees to assist the EFTA Surveillance Authority in carrying out its functions under Article 3 of Protocol 1 to the Agreement between the EFTA States on the Establishment of a Surveillance Authority and a Court of Justice and repealing certain Standing Committee Decisions
Deċiżjoni tal-Kumitat Permanenti tal-Istati tal-EFTA Nru 4/2012/SC tas- 26 ta’ Ottubru 2012 li jinnomina kumitati biex jassistu lill-Awtorità ta’ Sorveljanza tal-EFTA fit-twettiq tal-funzjonijiet tagħha skont l-Artikolu 3 tal-Protokoll 1 tal-Ftehim bejn l-Istati tal-EFTA dwar it-Twaqqif ta’ Awtorità ta’ Sorveljanza u ta’ Qorti tal-Ġustizzja u li jħassar ċerti Deċiżjonijiet tal-Kumitat Permanenti
Deċiżjoni tal-Kumitat Permanenti tal-Istati tal-EFTA Nru 4/2012/SC tas- 26 ta’ Ottubru 2012 li jinnomina kumitati biex jassistu lill-Awtorità ta’ Sorveljanza tal-EFTA fit-twettiq tal-funzjonijiet tagħha skont l-Artikolu 3 tal-Protokoll 1 tal-Ftehim bejn l-Istati tal-EFTA dwar it-Twaqqif ta’ Awtorità ta’ Sorveljanza u ta’ Qorti tal-Ġustizzja u li jħassar ċerti Deċiżjonijiet tal-Kumitat Permanenti
ĠU L 36, 7.2.2013, p. 8–10
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
In force
7.2.2013 |
MT |
Il-Ġurnal Uffiċjali tal-Unjoni Ewropea |
L 36/8 |
DEĊIŻJONI TAL-KUMITAT PERMANENTI TAL-ISTATI TAL-EFTA
Nru 4/2012/SC
tas-26 ta’ Ottubru 2012
li jinnomina kumitati biex jassistu lill-Awtorità ta’ Sorveljanza tal-EFTA fit-twettiq tal-funzjonijiet tagħha skont l-Artikolu 3 tal-Protokoll 1 tal-Ftehim bejn l-Istati tal-EFTA dwar it-Twaqqif ta’ Awtorità ta’ Sorveljanza u ta’ Qorti tal-Ġustizzja u li jħassar ċerti Deċiżjonijiet tal-Kumitat Permanenti
IL-KUMITAT PERMANENTI TAL-ISTATI TAL-EFTA,
Wara li kkunsidra l-ftehim dwar kumitat permanenti tal-Istati tal-EFTA, u b’mod partikulari l-artikolu 5(2) tiegħu;
Wara li kkunsidra l-proposta mingħand l-Awtorità ta’ Sorveljanza tal-EFTA;
Billi:
(1) |
L-artikolu 3 tal-protokoll 1 tal-ftehim bejn l-Istati tal-EFTA dwar it-twaqqif ta’ awtorità ta’ sorveljanza u ta’ qorti tal-ġustizzja, kif aġġustat permezz tal-protokoll li jaġġusta l-ftehim bejn l-Istati tal-EFTA dwar it-twaqqif ta’ awtorità ta’ sorveljanza u ta’ qorti tal-ġustizzja ("il-ftehim dwar sorveljanza u qorti"), jistabbilixxi li, fejn f’att imsemmi fl-annessi ta’ mal-ftehim dwar iż-ŻEE li fihom hemm il-proċeduri deskritti fl-artikolu 1, il-Kummissjoni Ewropea tippreżenta lil kumitat tal-UE abbozz ta’ miżura biex tiġi adottata, jew inkella tikkonsulta miegħu, l-Awtorità ta’ Sorveljanza tal-EFTA, skont proċeduri korrispondenti li għandhom jiġu stabbiliti mill-kumitat permanenti, tikkonsulta ma’ kumitat korrispondenti, jekk ikun jeżisti, li jkun stabbilit jew innominat skont il-ftehim dwar kumitat permanenti tal-Istati tal-EFTA. |
(2) |
Fir-Regolament (UE) nru 182/2011 tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (1), il-Parlament Ewropew u l-Kunsill stabbilixxew ir-regoli u l-prinċipji ġenerali dwar ir-regoli u l-prinċipji ġenerali li jirregolaw il-mekkaniżmi li japplikaw fejn att tal-Unjoni li jkun jorbot legalment (“att bażiku”) jidentifika l-ħtieġa ta’ kundizzjonijiet uniformi għall-implimentazzjoni u jirrikjedi li l-adozzjoni ta’ atti ta’ implimentazzjoni mill-Kummissjoni tkun suġġetta għall-kontroll tal-Istati Membri; |
(3) |
Fid-deċiżjoni tiegħu nru 3/2012 (proċeduri ġodda tal-komitoloġija) il-Kumitat Permanenti tal-Istati tal-EFTA stabbilixxa r-regoli ġenerali li jiddeskrivu l-proċeduri li għandhom jiġu segwiti meta l-kumitati jassistu lil-Awtorità ta’ Sorveljanza tal-EFTA, sabiex dawk il-proċeduri jiġu allinjati mal-proċeduri adottati fir-Regolament (UE) nru 182/2011; |
(4) |
Xi deċiżjonijiet tal-Kumitat Permanenti li huma fis-seħħ bħalissa u li jinnominaw kumitati biex jassistu lill-Awtorità ta’ Sorveljanza tal-EFTA jirreferu għal atti legali antiki li ġew irrevokati mill-ftehim dwar iż-ŻEE u li jista’ jkun li jirreferu għal proċeduri li ġew immodifikati minħabba d-dħul fis-seħħ tar-Regolament (UE) nru 182/2011. Huwa għalhekk meħtieġ li jiġu aġġornati d-deċiżjonijiet kollha li huma fis-seħħ u li jinnominaw kumitati, li ġew adottati mill-kumitat permanenti skont l-artikolu 5(2) tal-ftehim dwar kumitat permanenti tal-Istati tal-EFTA, u li tiġi indikata l-proċedura li għandha tiġi segwita mill-Awtorità ta’ Sorveljanza tal-EFTA f’kull każ speċifiku. |
(5) |
Sabiex jiġi ssimplifikat u ċċarat il-proċess tan-nominazzjoni tal-kumitati, il-kumitati kollha li l-awtorità ta’ sorveljanza tal-EFTA trid tissottomettilhom abbozzi ta’ miżuri jew inkella trid tikkonsulta magħhom huma b’dan innominati f’deċiżjoni waħda u d-deċiżjonijiet separati li jinsabu fis-seħħ għandhom jiġu rrevokati. |
(6) |
Mhuwiex meħtieġ, madankollu, li jiġu nnominati l-kumitati biex jassistu lill-Awtorità fl-eżerċizzju tas-setgħat tagħha fil-qasam tal-kompetizzjoni u tal-għajnuna mill-Istat minħabba li dawk il-kumitati diġà ġew innominati u stabbiliti permezz tal-protokolli 3 u 4 ta’ mal-ftehim bejn l-Istati tal-EFTA dwar it-twaqqif ta’ awtorità ta' sorveljanza u qorti tal-ġustizzja. |
(7) |
Il-proċedura applikabbli meta l-Kummissjoni Ewropea trid tissottometti abbozz ta’ miżura biex tiġi adottata jew inkella tikkonsulta ma’ kumitat hija stabbilita fl-att inkwistjoni. Il-proċedura applikabbli għall-awtorità ta’ sorveljanza tal-EFTA meta tagħmel dan skont att imsemmi fl-annessi ta’ mal-ftehim dwar iż-ŻEE trid tkun il-proċedura stabbilita fid-deċiżjoni tal-Kumitat Permanenti tal-Istati tal-EFTA nru 3/2012 (dwar il-proċeduri tal-komitoloġija) li l-aktar li tikkorrispondi mill-qrib għall-proċedura stabbilita fl-att imsemmi fl-annessi ta’ mal-ftehim dwar iż-ŻEE. Konsegwentement, mhux meħtieġ li tiġi speċifikata l-proċedura applikabbli għall-Kumitat malli jiġi innominat. |
(8) |
Fil-każ tal-atti eżistenti, l-artikolu 13 tar-Regolament (UE) nru 182/2011 jistabbilixxi ċerti miżuri tranżitorji għall-adattament tal-atti bażiċi eżistenti fl-ordni ġuridiku tal-UE li jneħħu l-ħtieġa li kull wieħed minn dawk l-atti jiġi mmodifikat. L-artikolu 7 tad-deċiżjoni tal-Kumitat Permanenti nru 3/2012 (proċeduri ġodda tal-komitoloġija) fih dispożizzjoni simili dwar l-adattament tal-proċeduri eżistenti. |
(9) |
L-Awtorità ta’ Sorveljanza tal-EFTA se tipproponi lill-kumitati li jadottaw regoli standard ta' proċedura. |
IDDEĊIEDA KIF ĠEJ:
Artikolu 1
Nominazzjoni ta’ kumitati
1. Il-kumitati elenkati fl-anness ta’ ma’ din id-deċiżjoni huma innominati biex jassistu lill-Awtorità ta’ Sorveljanza tal-EFTA fit-twettiq tal-funzjonijiet tagħha skont l-artikolu 3 tal-protokoll 1 ta’ mal-ftehim dwar sorveljanza u qorti.
2. Meta l-kumitati jassisti lill-Awtorità ta’ Sorveljanza tal-EFTA, jagħmlu dan skont id-deċiżjoni tal-Kumitat Permanenti tal-Istati tal-EFTA nru 3/2012 (dwar il-proċeduri tal-komitoloġija).
Artikolu 2
Proċedura applikabbli
Meta l-Awtorità ta’ Sorveljanza tal-EFTA tkun trid, skont att imsemmi fl-annessi ta’ mal-ftehim dwar iż-ŻEE, tippreżenta abbozz ta’ miżura biex tiġi adottata jew inkella tikkonsulta ma’ kumitat, tagħmel dan skont il-proċedura stabbilita fid-deċiżjoni tal-Kumitat Permanenti tal-Istati tal-EFTA nru 3/2012 (dwar il-proċeduri tal-komitoloġija) li tkun tikkorrispondi l-aktar mill-qrib għall-proċedura stabbilita fl-att imsemmi fl-annessi ta’ mal-ftehim dwar iż-ŻEE.
Artikolu 3
Revoka ta’ deċiżjonijiet tal-Kumitat Permanenti
Id-deċiżjonijiet tal-kumitat permanenti nri 6/94/SC, 8/94/SC, 9/94/SC, 10/94/SC, 11/94/SC, 12/94/SC, 14/94/SC, 15/94/SC, 2/2000/SC, 3/2000/SC, 3/2001/SC, 1/2003/SC, 2/2004/SC, 3/2004/SC, 1/2005/SC, 4/2005/SC, 2/2006/SC, 3/2006/SC, 2/2007/SC, 3/2008/SC, 4/2008/SC, 1/2009/SC, 4/2009/SC, 6/2009/SC, 7/2009/SC, 8/2009/SC, 9/2009/SC, 4/2010/SC u 2/2012/SC jiġu b’dan irrevokati.
Artikolu 4
Dħul fis-seħħ
Din id-deċiżjoni tidħol fis-seħħ dakinhar li tiġi adottata.
Artikolu 5
Din id-Deċiżjoni tiġi ppubblikata fis-Sezzjoni taż-ŻEE ta’ Il-Ġurnal Uffiċjali tal-Unjoni Ewropea u fis-Suppliment taż-ŻEE ta’ miegħu.
Magħmul fi Brussell, is-26 ta’ Ottubru 2012.
Għall-Kumitat Permanenti
Il-President
Atle LEIKVOLL
Is-Segretarju Ġenerali
Kristinn F. ÁRNASON
ANNESS
|
ISEM IL-KUMITAT |
ATT LEGALI |
1 |
Il-kumitat tal-EFTA dwar kwistjonijiet veterinarji u fitosanitarji |
L-atti rilevanti msemmijin fl-ambitu tal-Anness I (Kwistjonijiet veterinarji u fitosanitarji) ta’ mal-ftehim dwar iż-ŻEE. |
2 |
Il-kumitat tal-EFTA dwar ir-regolamenti tekniċi, l-istandards, l-ittestjar u ċ-ċertifikazzjoni |
L-atti rilevanti msemmijin fl-ambitu tal-Anness II (Regolamenti tekniċi, standards, ittestjar u ċertifikazzjoni) ta’ mal-ftehim dwar iż-ŻEE. |
3 |
Kumitat tal-EFTA dwar ir-responsabbiltà għal danni minn prodotti |
L-atti rilevanti msemmijin fl-ambitu tal-Anness III (Responsabbiltà għal danni minn prodotti) ta’ mal-ftehim dwar iż-ŻEE. |
4 |
Il-kumitat tal-EFTA dwar l-enerġija |
L-atti rilevanti msemmijin fl-ambitu tal-anness IV (Enerġija) ta’ mal-ftehim dwar iż-ŻEE. |
5 |
Il-kumitat tal-EFTA dwar il-moviment liberu tal-ħaddiema |
L-atti rilevanti msemmijin fl-ambitu tal-anness V (Moviment liberu tal-ħaddiema) ta’ mal-ftehim dwar iż-ŻEE. |
6 |
Il-kumitat tal-EFTA dwar is-sigurtà soċjali |
L-atti rilevanti msemmijin fl-ambitu tal-anness VI (Sigurtà Soċjali) ta’ mal-ftehim dwar iż-ŻEE. |
7 |
Il-kumitat tal-EFTA dwar ir-rikonoxximent tal-kwalifiki professjonali |
L-atti rilevanti msemmijin fl-ambitu tal-anness VII (Rikonoxximent tal-kwalifiki professjonali) ta’ mal-ftehim dwar iż-ŻEE. |
8 |
Il-kumitat tal-EFTA dwar id-dritt tal-istabbiliment |
L-atti rilevanti msemmijin fl-ambitu tal-anness VIII (Dritt tal-istabbiliment) ta’ mal-ftehim dwar iż-ŻEE. |
9 |
Il-kumitat tal-EFTA dwar is-servizzi finanzjarji |
L-atti rilevanti msemmijin fl-ambitu tal-anness IX (Servizzi finanzjarji) ta’ mal-ftehim dwar iż-ŻEE. |
10 |
Il-kumitat tal-EFTA dwar is-servizzi |
L-atti rilevanti msemmijin fl-ambitu tal-anness X (Servizzi inġenerali) ta’ mal-ftehim dwar iż-ŻEE. |
11 |
Il-kumitat tal-EFTA dwar l-komunikazzjonijiet elettroniċi (il-COCOM) |
L-atti rilevanti msemmijin fl-ambitu tal-anness XI (Komunikazzjoni elettronika, servizzi awdjoviżivi u soċjetà tal-informazzjoni) ta’ mal-ftehim dwar iż-ŻEE. |
12 |
Il-kumitat tal-EFTA dwar il-moviment liberu tal-kapital |
L-atti rilevanti msemmijin fl-ambitu tal-anness V (Moviment liberu tal-kapital) ta’ mal-ftehim dwar iż-ŻEE. |
13 |
Il-kumitat tal-EFTA dwar it-trasport |
L-atti rilevanti msemmijin fl-ambitu tal-anness XIII (Trasport) ta’ mal-ftehim dwar iż-ŻEE. |
16 |
Il-kumitat tal-EFTA dwar l-akkwist |
Il-protokoll 2 tal-ftehim dwar sorveljanza u qorti u l-atti rilevanti msemmijin fl-ambitu tal-anness XVI (Akkwist) ta’ mal-ftehim dwar iż-ŻEE. |
17 |
Il-kumitat tal-EFTA dwar il-proprjetà intellettwali |
L-atti rilevanti msemmijin fl-ambitu tal-anness XVII (Proprjetà intellettwali) ta’ mal-ftehim dwar iż-ŻEE. |
18 |
Il-kumitat tal-EFTA dwar is-saħħa u s-sigurtà fuq ix-xogħol, il-liġi tax-xogħol, u t-trattament ugwali għall-irġiel u n-nisa |
L-atti rilevanti msemmijin fl-ambitu tal-Anness XVIII (Is-saħħa u s-sigurtà fuq ix-xogħol, il-liġi tax-xogħol, u t-trattament ugwali għall-irġiel u n-nisa) ta’ mal-ftehim dwar iż-ŻEE. |
19 |
Il-kumitat tal-EFTA dwar il-protezzjoni tal-konsumatur |
L-atti rilevanti msemmijin fl-ambitu tal-anness XIX (Protezzjoni tal-konsumatur) ta’ mal-ftehim dwar iż-ŻEE. |
20 |
Il-kumitat tal-EFTA dwar l-ambjent |
L-atti rilevanti msemmijin fl-ambitu tal-anness XX (Ambjent) ta’ mal-ftehim dwar iż-ŻEE. |
21 |
Il-kumitat tal-EFTA dwar l-istatistika |
L-atti rilevanti msemmijin fl-ambitu tal-anness XXI (Statistika) ta’ mal-ftehim dwar iż-ŻEE. |