17.2.2005   

MT

Il-Ġurnal Uffiċjali ta’ l-Unjoni Ewropea

C NaN/35

1

2-6

3

4-6

7-16

1.

L-Aġenzija Ewropea għar-Rikostruzzjoni (minn hawn ‘l quddiem imsejħa “l-Aġenzija”) twaqqfet bir-Regolament tal-Kunsill (KE) Nru 1628/96 tal-25 ta’ Lulju 1996 (1). Dan ir-regolament kien sostitwit bir-Regolament tal-Kunsill (KE) Nru 2667/2000 tal-5 ta’ Diċembru 2000 (2). L-Aġenzija, li kienet imwaqqfa fi Frar tas-sena 2000, għall-ewwel kienet responsabbli għall-ġestjoni tal-programmi ta’ għajnuna ta’ l-UE f’Kosovo. Wara żewġ estensjonijiet tal-mandat tagħha fl-2001 u fl-2002, l-operazzjonijiet tagħha issa jkopru s-Serbja u l-Montenegro u l-ex Repubblika Jugoslava tal-Maċedonja. Il-kwartjieri ġenerali ta’ l-Aġenzija huma f’Tessaloniki u għandha ċentri ta’ l-operat f’Belgrad, Podgorica, Pristina u Skopje. Hija timplimenta programmi sabiex tippromwovi l-bini ta’ istituzzjonijiet u t-tmexxija tajba, sabiex tippromwovi l-iżvilupp ta’ l-ekonomija tas-suq u l-infrastruttura essenzjali u sabiex tikkonsolida soċjetà ċivili. It-Tabella 1 tiġbor fil-qosor il-poteri u l-attivitajiet ta’ l-Aġenzija bbażati fuq l-informazzjoni mogħtija mill-Aġenzija nnifisha.

2.

Il-Qorti ta’ l-Awdituri eżaminat il-kontijiet annwali ta’ l-Aġenzija għas-sena finanzjarja li għalqet fil-31 ta’ Diċembru 2003, u t-transazzjonijiet ta’ bażi. Hija wettqet il-verifika tagħha skond il-politika u l-istandards ta’ verifiki tagħha. Dawn huma bbażati fuq standards internazzjonali adattati għall-kuntest Komunitarju. Il-Qorti għalhekk kisbet assigurazzjoni raġonevoli sabiex issostni l-opinjoni espressa li ġejja.

3.

Fl-opinjoni tal-Qorti, il-kontijiet ta’ l-Aġenzija ma jagħtux stampa preċiża tas-sitwazzjoni ekonomika ta’ l-Aġenzija u tas-sitwazzjoni rigward l-assi tagħha (ara l-paragrafi 8 u 10).

4.

Minħabba n-nuqqas ta’ informazzjoni neċessarja fuq l-użu finali tal-fondi fdati mill-Aġenzija lil korpi terzi nazzjonali u internazzjonali, il-Qorti ma tistax tesprimi opinjoni dwar il-legalità u r-regolarità tat-transazzjonijiet li huma fil-bażi għal pagamenti ta’ 21.4 miljun euro li saru fl-2003 (ara l-paragrafu 15). Mill-bqija, iżda skond ir-riservi miżmuma f’paragrafi 5 u 6 isfel, il-Qorti tistma illi t-transazzjonijiet li huma fil-bażi tal-kontijiet annwali ta’ l-Aġenzija huma legali u regolari.

5.

Għal dak li jikkonċerna pagamenti, il-Qorti nnutat żbalji relatati mal-validità tad-dokumenti ta’ sostenn, l-osservanza ta’ dispożizzjonijiet kuntrattwali u d-delegazzjoni tal-poteri li jappartjenu lil awtorita’ pubblika (ara l-paragrafu 13).

6.

Rigward l-għotja ta’ kuntratti, il-Qorti nnutat, għal każ minn kull ħamsa illi hija eżaminat, anomaliji proċedurali illi jpoġġu f’dubju r-rispett tal-prinċipju ta’ opportunitajiet indaqs bejn min jitfa’ offerti għal xogħol bl-appalt (ara l-paragrafu 14).

7.

L-implimetazzjoni ta’ l-approprjazzjonijiet għas-sena finanzjarja 2003 u ta’ l-approprjazzjonijiet miġjuba ‘l quddiem mis-sena finanzjarja preċedenti hija murija fit-Tabella 2. Il-kontijiet tad-dħul u nfiq u l-karta tal-bilanċ għas-sena finanzjarja 2003 huma miġbura fil-qosor fit-Tabelli 3 u 4  (3).

8.

L-Artikolu 1 tar-Regolament Finanzjarju ta’ l-Aġenzija jistipula li l-baġit tagħha għandu jkun awtorizzat skond il-prinċipju ta’ l-approprjazzjonijiet differenzjati fejn jiġu ddiferenzjati l-approprjazzjonijiet ta’ impenn mill-approprjazzjonijiet ta’ pagament. L-Artikolu 3 ta’ l-istess regolament jistipula li d-dħul totali għandu jkopri l-infiq totali, li jimplika li l-baġit għandu dejjem jibbilanċja u li l-implimentazzjoni għandha tkun kemm jista’ jkun viċin l-ekwilibriju. Madanakollu, fil-prattika l-baġit ta’ l-Aġenzija kif adottat mill-Bord ta’ Gvernaturi ma josservax il-prinċipju ta’ l-approprjazzjonijiet differenzjati, bir-riżultat li l-Aġenzija tippreżenta bħala nfiq u mhux biss pagamenti għall-perjodu li jitħallsu mill-approprjazzjonijiet għas-sena finanzjarja imma wkoll kull pagament pendenti fir-rigward ta’ l-impenji għas-sena finanzjarja (4), irrispettivament ta’ safejn dawn l-impenji kienu implimentati. Għalhekk il-kontijiet tal-kwantitajiet maħduma għas-sena finanzjarja ma jirrappreżentawx ir-realtà ekonomija tal-ħidma ta’ l-Aġenzija. L-iżbilanċ kumulattiv fil-31 ta’ Diċembru 2003, jiġifieri 140,95 miljun euro, huwa għalhekk fil-biċċa l-kbira artifiċjali peress illi huwa hekk minħabba l-impenji pendenti fuq it-transazzjonijiet ekonomiċi li għandhom ma ġewx implimentati.

9.

Fl-2003, is-sistema tal-kontijiet ta’ l-Aġenzija baqgħat turi nuqqasijiet serji. Per eżempju, il-kontijiet ġenerali kienu għandhom jinżammu fuq il-bażi ta’ daħla waħda minkejja r-riskji kollha ta’ żbalji li jinvolvu għall-integrità ta’ l-informazzjoni u minkejja l-fatt li l-Artikolu 55 tar-Regolament Finanzjarju ta’ l-Aġenzija jistipula li l-kontijiet għandhom jinżammu fuq il-bażi ta’ daħliet doppji.

10.

Minkejja l-osservazzjoni magħmula mill-Qorti fir-rapport tagħha fuq is-sena finanzjarja 2002 (5), fondi mħallsa lill-intermedjarji finanzjarji taħt programmi ta’ self ma ddaħħlux fin-naħa ta’ l-attiv tal-karta tal-bilanċ. L-użu li sar minn dawn il-fondi jissemma biss fin-nota ta’ informazzjoni fir-rapport anness mal-kontijiet (6). Mill-ħolqien tagħha, l-Aġenzija ħallset 52,4 miljun euro (7) taħt dawn il-programmi. Barra minn dan, programmi varji li kienu għandhom qed jiġu implimentati fl-2003 jipprovdu għat-tmexxija ta’ fondi minn kuntratturi lill-Aġenzija. Il-fondi li ġew imħallsa hekk, li ġew identifikati mill-Qorti, ammontaw għal 43,38 miljun euro. Fiż-żewġ każijiet, il-bilanċi li kienu għadhom disponibbli fl-aħħar tas-sena finanzjarja 2003 kellhom jiġu murija fin-naħa ta’ l-attiv fil-karta tal-bilanċ ta’ l-Aġenzija.

11.

L-isforzi ta’ l-Aġenzija biex ittejjeb it-tmexxija tagħha tal-baġit, i-mexxija tagħha finanzjarja, u dik tat-tmexxija tal-kontijiet għandhom jiġu intensifikati bil-ħsieb tal-konsolidazzjoni tal-kontijet ta’ l-Aġenzija ma’ dawk ta’ l-istituzzjonijiet tal-Komunità, li ser issir mis-sena finanzjarja 2005 (8). Fil-fatt il-baġit ta’ l-Aġenzija irid jiġi adottat fil-forma provduta fir-Regolament Finanzjarju tagħha (ara l-paragrafu 8) u r-regoli tal-kontijiet li jirregolaw id-dħul u l-infiq għandhom jiġu armonizzati mal-prinċipji li jirregolaw iż-żamma tal-kotba bbażata fuq l-akkumulazzjoni.

12.

It-tmexxija ta’ entità finanzjarja li l-Aġenzija waqqfet ġewwa l-Kosovo, li t-tmexxija tagħha ġiet mogħtija lill-konsulent estern, kienet karatterizzata b’nuqqasijiet sinifikanti (per eżempju kontijet difettużi, analiżi mhux adegwata tar-riskju relatat ma dak li jissellef, dokumentazzjoni provduta bħala appoġġ għall-applikazzjonijiet ta’ self, mhux adegwata). Is-sorveljanza ta’ l-Aġenzija ma kientix biżżejjed sabiex tidentifika dawn in-nuqqasijiet u sabiex tieħu l-azzjoni korrettiva neċessarja kemm jista’ jkun malajr.

13.

Anomaliji ġew osservati fir-rigward ta’ pagamenti mħallsa fl-2003. F’ċerti każijiet huma joħorġu min-nuqqas li jiġu osservati jew dispożizzjonijiet kontrattwali jew kondizzjonijiet ta’ pagamenti (dokumenti ta’ sostenn invalidi, anki mhux adegwati) F’każijiet oħra, ħafna mill-anomaliji saru minħabba l-fatt li l-azzjonijiet li għalihom sar il-pagament ma jimxux mar-regoli li jirregolaw id-delegazzjoni tal-poteri ta’ l-awtorità pubblika u/jew dawk li jirregolaw l-emendi tal-kuntratti li diġà kienu konklużi. Dawn l-anomaliji juri li l-Aġenzija għandha ttejjeb is-sorveljanza tagħha tal-proċeduri li għandhom x’jaqsmu ma’ l-impenn u l-validazzjoni ta’ l-infiq.

14.

Anomaliji li jistgħu jaffettwaw id-deċiżjonijiet fuq l-għotja ta’ kuntratti kienu nnutati. Per eżempju, xi appaltaturi kienu mwarrba minħabba raġunijiet amministrattivi u tekniċi li kienu disputtabbli jew ma kienux issostanzjati biżżejjed. F’każijiet oħra, l-amministraturi tal-proġett ġew mibdula xi ftit żmien wara l-bidu ta’ l-implimetazzjoni tal-kuntratt minn persuni li ma kellhomx l-istess kwalifiki bħal dawk li ppermettew lill-appaltatur jirbaħ il-kuntratt. Sabiex jitnaqqas ir-riskju ta’ żbalji, l-Aġenzija għandha ssaħħaħ is-sistema tagħha tal-kontroll intern billi tagħżel b’mod rigoruż l-istaff responsabbli għall-valutazzjoni ta’ l-offerti u billi tiċċekkja li l-kumitati li jevalwaw isostnu b’mod ċar id-deċiżjonijiet tagħhom.

15.

F’każijiet diversi, l-Aġenzija kkonkludiet ftehim ma’ partijiet terzi pubbliċi jew semi-pubbliċi, nazzjonali jew internazzjonali. F’dawn il-każijiet kollha, hija għandha tiżgura applikazzjoni iktar rigoruża tal-mekkaniżmi eżistenti sabiex tiżgura li dawn l-entitajiet kollha jipprovduha bl-informazzjoni neċessarja biex tistma l-legalità u r-regolarità tat-transazzjonijiet ta’ bażi.

16.

Fir-rapport tagħha fuq is-sena finanzjarja 2002 (9), il-Qorti enfasizzat fuq in-numru eċċessiv ta’ l-uffiċjali li jawtorizzaw b’delegazzjoni u sub-delegazzjoni. Fl-aħħar ta’ l-2003, kien hemm 45 għat-Titolu III u 11 għat-Titoli I u II, jiġifieri 56 mqabbla mas-67 f’Ġunju 2003. Barra minn dan, l-ebda limitu m’ hu impost fuq in-numru u t-tul tal-delegazzjonijiet. L-Aġenzija għandha tkompli l-isforzi tagħha sabiex tnaqqas in-numru ta’ delegazzjonijiet.