1)

Ir-rekwiżiti fil-qasam tal-ittikkettjar previsti fl-Artikolu 54, fl-Artikolu 55(3) u fl-Artikolu 63(1) tad-Direttiva 2001/83/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (2) japplikaw għal prodott mediċinali li fir-rigward tiegħu tkun inħarġet awtorizzazzjoni ta’ tqegħid fis-suq fi Stat Membru u li l-importazzjoni tiegħu fi Stat Membru ieħor tikkostitwixxi importazzjoni parallela meta mqabbla ma’ prodott mediċinali diġà awtorizzat f’dan it-tieni Stat Membru?

2)

L-Artikolu 63(3) tad-Direttiva 2001/83 għandu jiġi interpretat fis-sens li prodott mediċinali ma huwiex intiż li jiġi pprovdut direttament lill-pazjent jekk jiġi kklassifikat bħala prodott mediċinali suġġett għal preskrizzjoni medika?

3)

L-Artikolu 63(3) tad-Direttiva 2001/83 għandu effett dirett, b’tali mod li operatur ekonomiku li jixtieq jimporta fil-Ġermanja prodott mediċinali li joriġina minn Stat Membru ieħor jista’ jinvoka din id-dispożizzjoni quddiem il-qrati Ġermaniżi kontra l-konvenuta, ir-Repubblika Federali tal-Ġermanja, li ma ttrasponietx din id-dispożizzjoni fid-dritt nazzjonali tagħha jew li ma ttrasponiethiex b’mod komplet?

4)

L-Artikolu 34 u l-Artikolu 36 TFUE jipprekludu l-applikazzjoni ta’ dispożizzjonijiet tad-dritt nazzjonali u tad-dritt tal-Unjoni, li jeżiġu l-ittikkettjar tal-imballaġġ primarju b’ċerti indikazzjonijiet minimi fil-lingwa tal-Istat Membru ta’ importazzjoni, għal prodott mediċinali importat b’mod parallel, meta l-ittikkettjar mill-ġdid tal-imballaġġ primarju tal-prodott mediċinali importat b’mod parallel, sabiex jiġu ssodisfatti dawn ir-rekwiżiti fil-qasam tal-ittikkettjar, ma jkunx possibbli minħabba dannu sostanzjali għas-sostenibbiltà tiegħu?