—

Ksur tal-Istat tad-dritt u tal-ġustizzja: l-istabbilimenti tal-edukazzjoni miżmuma minn trust ta’ interess pubbliku ma pparteċipawx fil-proċedura preċedenti għall-adozzjoni tad-Deċiżjoni ta’ Implimentazzjoni u huma ssanzjonati b’konsegwenza ta’ atti leġiżlattivi adottati mil-leġiżlatur Ungeriż.

—

Ksur taċ-ċertezza legali u taċ-ċarezza tar-regoli: sa fejn il-kategorija ta’ persuni li qegħdin jiġu akkużati b’kunflitt ta’ interessi, jiġifieri, l-“eżekuttivi politiċi għolja”, ma hijiex kunċett preċiż, din tiġġenera interpretazzjonijiet arbitrarji u applikazzjoni tad-dritt li tista’ tagħti lok għal abbużi.

—

Ksur tal-ugwaljanza u nuqqas ta’ osservanza tal-projbizzjoni ta’ diskriminazzjoni: id-Deċiżjoni ta’ Implimentazzjoni tiddiskrimina kontra l-istabbilimenti tal-edukazzjoni Ungeriżi miżmuma minn trust ta’ interess pubbliku meta mqabbla ma stabbilimenti oħra li joperaw skont mudell ieħor ta’ sostenn.

—

Nuqqas ta’ osservanza tal-projbizzjoni ta’ ċaħda ta’ kompetenzi: l-edukazzjoni u r-riċerka xjentifika – u, għaldaqstant, il-garanzija ta’ funzjonament tal-istituzzjonijiet tal-edukazzjoni għolja u d-definizzjoni tal-kuntest li fih joperaw – jaqgħu taħt il-kompetenza esklużiva tal-Istati Membri, kompetenza li minnha qiegħdha tiġi mċaħħda l-Ungerija permezz tad-Deċiżjoni ta’ Implimentazzjoni peress li hemm interferenza diretta fil-funzjonament tal-istabbilimenti tal-edukazzjoni Ungeriżi.

—

Ksur tas-sussidjarjetà: id-Deċiżjoni tippermetti li sanzjonijiet pekunjarji jiġu imposti direttament fuq entitajiet ġuridiċi li huma differenti mid-destinatarju tagħha, mingħajr ebda eżami minn qabel dwar jekk l-Ungerija tinsabx f’pożizzjoni li tipproteġi b’mod suffiċjenti l-interessi finanzjarji tal-Unjoni Ewropea.

—

Ksur tal-proporzjonalità: is-sospensjoni tal-pagamenti hija ritaljazzjoni finanzjarja li tant hija serja li l-applikazzjoni tagħha hija ġġustifikata biss fil-każ ta’ ksur manifest u immedjat ta’ drittijiet; barra minn hekk, din għandha effetti li jtulu fiż-żmien.

—

Nuqqas ta’ evalwazzjoni tal-effetti: ma ttieħdux inkunsiderazzjoni l-eventwali konsegwenzi fuq id-drittijiet u l-obbligi tal-persuni fiżiċi u ġuridiċi.

—

Ksur tal-ugwaljanza taċ-ċittadini tal-Unjoni: il-persuni leżi mill-miżura huma dawk l-għalliema, ir-riċerkaturi u l-istudenti li ppreżentaw it-talbiet korrispondenti, sa fejn is-sospensjoni tal-pagamenti fil-konfront tagħhom tagħmilha impossibbli li dawn iwettqu l-attivitajiet ta’ studju jew ta’ tagħlim u riċerka rispettivi tagħhom.

—

La kien hemm konsultazzjonijiet mal-istabbilimenti tal-edukazzjoni għolja miżmuma minn trust ta’ interess pubbliku u lanqas mal-istudenti, mal-għalliema, mar-riċerkaturi u mas-soċji ta’ dawn l-istabbilimenti.

—

It-TFUE ma ttrasferixxiex lill-Unjoni l-kompetenzi fil-kuntest tal-politika fil-qasam tal-edukazzjoni u tar-riċerka xjentifika li ġew eżerċitati fid-Deċiżjoni ta’ Implimentazzjoni.

—

Id-Deċiżjoni ta’ Implimentazzjoni ma twassalx għal livell għoli ta’ edukazzjoni u taħriġ; barra minn hekk, fit-tul, tikkawża effetti sfavorevoli fil-qasam akkademiku, xjentifiku u ta’ taħriġ għall-istudenti, għall-għalliem u għar-riċerkaturi tal-istituzzjonijiet tal-edukazzjoni għolja Ungeriżi miżmuma minn fondazzjonijiet.

—

Id-Deċiżjoni ta’ Implimentazzjoni tillimita d-drittijiet ta’ dawk iċ-ċittadini tal-Unjoni li ma humiex ċittadini Ungeriżi (studenti, għalliema, riċerkaturi) li jiżvolġu l-attività tagħhom fiċ-ċentri tal-edukazzjoni Ungeriżi miżmuma minn trust ta’ interess pubbliku.

—

Permezz tal-irtirar tal-fondi, id-Deċiżjoni ta’ Implimentazzjoni tirrendi impossibbli l-funzjonament taċ-ċentri miżmuma minn trust ta’ interess pubbliku u tirrappreżenta attakk fuq il-kuntest ġuridiku li fih joperaw l-imsemmija ċentri, jiġifieri, indirettament, fuq is-sistema legali awtonoma (differenti) Ungeriża u fuq it-tradizzjonijiet legali tal-Ungerija.

—

L-effetti diskriminatorji u sproporzjonati tal-miżura huma manifesti u joħolqu wkoll żvantaġġ kompetittiv mhux iġġustifikat għall-istituzzjonijiet tal-edukazzjoni għolja li joperaw fil-forma ta’ trust ta’ interess pubbliku.

—

Id-Deċiżjoni ta’ Implimentazzjoni ssospendiet il-fondi fir-rigward ta’ diversi destinatarji u fil-frattemp allokathom lil entitajiet oħra.

—

Id-Deċiżjoni ta’ Implimentazzjoni ma tikkontribwixxix għall-iżvilupp ta’ edukazzjoni ta’ kwalità, iżda fil-verità tikkawżalha danni gravi u tqiegħdha f’diffikultà.

—

L-irtirar tal-fondi tal-programm ta’ kooperazzjoni u ta’ skambju edukattiv Erasmus+ u tal-programm qafas għar-riċerka u l-innovazzjoni Horizon Europe jippreżupponi ostaklu ċar kemm għall-moviment liberu tar-riċerkaturi, tal-għarfien xjentifiku u tat-teknoloġiji kif ukoll għall-iżvilupp tal-kompetittività tagħhom.

—

Effett evidenti tad-Deċiżjoni ta’ Implimentazzjoni hija l-bidla fil-funzjonament tal-istituzzjonijiet tal-edukazzjoni għolja Ungeriżi li joperaw skont il-mudell il-ġdid.

—

Fl-opinjoni tar-rikorrenti, il-kunflitt ta’ interessi li jservi ta’ bażi u ta’ motivazzjoni għad-Deċiżjoni ta’ Implimentazzjoni ma jeżistix.

—

Id-Deċiżjoni ta’ Implimentazzjoni tissanzjona direttament lir-rikorrenti meta, fil-każ tagħha, ma jeżistix il-kunflitt ta’ interessi politiċi invokat bħala ġustifikazzjoni tas-sanzjoni, u dan jippreżupponi ksur gravi u manifest tal-preżunzjoni ta’ innoċenza.

—

Peress li, fil-każ tar-rikorrenti, de facto ma jeżistix kunflitt ta’ interessi politiċi, id-Deċiżjoni ta’ Implimentazzjoni tikser ir-rekwiżiti ta’ neċessità partikolari u ta’ proporzjonalità.

—

Il-Kunsill adotta d-Deċiżjoni ta’ Implimentazzjoni mingħajr ma eżamina, fuq il-mertu u speċifikament, l-eżistenza ta’ kunflitt ta’ interessi politiċi li jikkostitwixxi l-bażi tal-imsemmija deċiżjoni.