—

tannulla d-deċiżjoni tal-Bord Uniku ta’ Riżoluzzjoni tal-11 ta’ April 2022 dwar il-kalkolu tal-kontribuzzjonijiet ex ante tal-2022 għall-Fond Uniku ta’ Riżoluzzjoni (SRB/ES/2022/18), inklużi l-annessi tagħha, sa fejn id-deċiżjoni kkontestata, inklużi l-Anness I, l-Anness II u l-Anness III tagħha, tikkonċerna l-kontribuzzjoni tar-rikorrenti;

—

tikkundanna lill-konvenut għall-ispejjeż tal-kawża.

1.

L-ewwel motiv: id-deċiżjoni tikser l-obbligu ta’ motivazzjoni previst fit-tieni paragrafu tal-Artikolu 296 TFUE u fl-Artikolu 41(1) u (2)(ċ) tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”) u d-dritt fundamentali għal protezzjoni ġudizzjarja effettiva skont l-Artikolu 47(1) tal-Karta, sa fejn il-motivazzjoni tagħha għandha lakuni partikolarment fir-rigward tal-applikazzjoni mill-konvenut tad-diversi setgħat diskrezzjonali legali u d-data tal-istituzzjonijiet l-oħra ma ġietx ikkomunikata b’tali mod li stħarriġ ġudizzjarju tad-deċiżjoni huwa prattikament impossibbli.

2.

It-tieni motiv: id-deċiżjoni tikser l-Artikolu 4 tar-Regolament ta’ Implimentazzjoni (UE) 2015/81 (1), moqri flimkien mal-Artikoli 69 u 70 tar-Regolament (UE) Nru 806/2014 (2), kif ukoll l-Artikoli 16, 17, 41 u 52 tal-Karta sa fejn il-konvenut stabbilixxa l-baġit annwali fil-mira għall-2022 fl-ammont ta’ EUR 14 253 573 821,46; sussidjarjament l-Artikoli 69 u 70 tar-Regolament (UE) Nru 806/2014 jiksru dritt ta’ livell ogħla.

3.

It-tielet motiv: l-Artikoli 6, 7 u 9 u kif ukoll l-Anness I tar-Regolament ta’ Delega (UE) 2015/63 (3) jiksru dritt ta’ livell ogħla partikolarment minħabba li jmorru kontra r-rekwiżit li l-kontribuzzjonijiet jiġu kkalkolati skont ir-riskji, kontra l-prinċipju ta’ proporzjonalità u kontra r-rekwiżit li jittieħdu inkunsiderazzjoni l-fatti kollha.

4.

Ir-raba’ motiv: id-deċiżjoni tikser il-libertà ta’ intrapriża tar-rikorrenti prevista fl-Artikolu 16 tal-Karta u l-prinċipju ta’ proporzjonalità sa fejn il-multiplikaturi ta’ aġġustament tar-riskju użati ma humiex konformi mal-kapaċità għolja tar-rikorrenti li tassorbi t-telf u mar-riskju, għalhekk, manifestament iktar baxx tal-użu tal-Fond Uniku ta’ Riżoluzzjoni fil-każ ta’ likwidazzjoni tar-rikorrenti.

5.

Il-ħames motiv: id-deċiżjoni tikser l-Artikoli 16 u 20 tal-Karta kif ukoll il-prinċipju ta’ proporzjonalità u d-dritt għal amministrazzjoni tajba minħabba żbalji manifesti fl-eżerċizzju ta’ diversi setgħat diskrezzjonali mill-konvenut.

6.

Is-sitt motiv: l-ewwel u t-tieni sentenza tal-Artikolu 20(1) tar-Regolament ta’ Delega jiksru l-Artikolu 103(7) tad-Direttiva 2014/59/UE (4) kif ukoll ir-rekwiżit li l-kontribuzzjonijiet jiġu kkalkolati skont ir-riskji.