Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62020TN0735

Kawża T-735/20: Rikors ippreżentat fil-15 ta’ Diċembru 2020 – Planistat Europe u Charlot vs Il-Kummissjoni

ĠU C 53, 15.2.2021, p. 49–50 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

15.2.2021   

MT

Il-Ġurnal Uffiċjali tal-Unjoni Ewropea

C 53/49

Rikors ippreżentat fil-15 ta’ Diċembru 2020 – Planistat Europe u Charlot vs Il-Kummissjoni

(Kawża T-735/20)

(2021/C 53/65)

Lingwa tal-kawża: il-Franċiż

Partijiet

Rikorrenti: Planistat Europe (Pariġi, Franza), Hervé-Patrick Charlot (Pariġi) (rappreżentant: F. Martin Laprade, avukat)

Konvenuta: Il-Kummissjoni Ewropea

Talbiet

Ir-rikorrenti jitlobu li l-Qorti Ġenerali jogħġobha:

—

tikkonstata li l-Kummissjoni Ewropea tat lok għar-responsabbiltà mhux kuntrattwali tagħha b’applikazzjoni tad-dispożizzjoni tal-Artikolu 340 TFUE:

—

billi kisret b’mod suffiċjentement serju l-prinċipju ta’ premura u ta’ amministrazzjoni tajba;

—

billi kisret b’mod suffiċjentement serju d-drittijiet tad-difiża;

—

billi kisret b’mod suffiċjentement serju l-obbligu ta’ kunfidenzjalità;

—

u b’hekk ikkawżat dannu materjali u/jew morali lill-kumpannija Planistat u lid-direttur tagħha H.-P. Charlot;

konsegwentement,

—

tikkundanna lill-Kummissjoni Ewropea għall-ħlas tas-somma ta’ EUR 150 000 għad-dannu morali mġarrab minn Hervé-Patrick Charlot;

—

tikkundanna lill-Kummissjoni Ewropea għall-ħlas tas-somma ta’ EUR 11 600 000 għad-dannu materjali mġarrab mir-rikorrenti;

—

tikkundanna lill-Kummissjoni Ewropea għall-ħlas tal-ispejjeż kollha tal-istanza mibdija mill-kumpannija Planistat u Hervé-Patrick Charlot.

Motivi u argumenti prinċipali

Insostenn tar-rikors tagħhom, ir-rikorrenti jinvokaw erba’ motivi.

1.

L-ewwel motiv, ibbażat fuq in-nuqqas ta’ osservanza tad-dmir ta’ premura u tad-dritt għal amministrazzjoni tajba minħabba akkużi foloz magħmula mill-Uffiċċju ta’ Kontra l-Frodi (OLAF) u sussegwentement mill-Kummissjoni Ewropea kontra r-rikorrenti, li l-innoċenza tagħhom ġiet ikkonfermata b’mod definittiv fis-16 ta’ Ġunju 2016 mill-Qorti tal-Kassazzjoni Franċiża. F’dan ir-rigward, ir-rikorrenti jsostnu li:

—

l-amministrazzjoni tal-Unjoni Ewropea ma ħaditx inkunsiderazzjoni l-interessi leġittimi tar-rikorrenti akkużati b’mod inġust u falz b’reati kriminali, u għaldaqstant naqset milli tosserva d-dmir tagħha ta’ premura fil-konfront tagħhom;

—

id-dritt għal amministrazzjoni tajba ċarament jinkludi d-dritt ta’ kull persuna li ma tkunx is-suġġett ta’ akkużi foloż min-naħa tal-uffiċjali u istituzzjonijiet tal-Unjoni.

2.

It-tieni motiv, ibbażat fuq nuqqas ta’ osservanza tad-dritt għal amministrazzjoni tajba u l-ksur tad-drittijiet tad-difiża u tal-prinċipju ta’ preżunzjoni ta’ innoċenza minħabba nuqqas ta’ serjetà kundannabbli murija minn OLAF fir-rigward tal-akkużi foloz tar-rikorrenti quddiem l-awtoritajiet Franċiżi, imwettqa permezz ta’ ittra tad-19 ta’ Marzu 2003. Ir-rikorrenti jqisu f’dan ir-rigward li:

—

l-OLAF aġixxa b’mod mgħaġġel u inkompatibbli mal-obbligu ta’ osservanza ta’ terminu raġonevoli meta ttrażmetta informazzjoni lill-awtoritajiet Franċiżi l-għada tal-ftuħ tal-investigazzjoni esterna li tirrigwarda r-rikorrenti;

—

l-OLAF kien messu ta lir-rikorrenti trattament identiku għal dak tal-uffiċjali Ewropej u stenna sakemm ikollu informazzjoni addizzjonali sabiex jieħu deċiżjoni informata aħjar;

—

l-OLAF kien messu ħa l-prekawzjoni li jinforma minn qabel lir-rikorrenti, sabiex jirċievi l-ispjegazzjonijiet tagħhom, fil-kuntest ta’ skambju kontradittorju;

—

l-OLAF ma messux uża espressjonijiet qawwija li jirriflettu s-sentiment li r-rikorrenti kienu ħatja ta’ “sakkeġġ” għad-detriment tal-fondi Komunitarji.

3.

It-tielet motiv, ibbażat fuq il-ksur tal-obbligu ta’ kunfidenzjalità fir-rigward tad-data personali, bi ksur tad-dritt għal amministrazzjoni tajba kif ukoll tal-prinċipju ta’ preżunzjoni ta’ innoċenza minħabba “tixrid” min-naħa tal-OLAF dwar il-kontenut tal-akkużi foloz tiegħu bid-data tad-19 ta’ Marzu 2003. F’dan ir-rigward, ir-rikorrenti jqisu li:

—

l-OLAF ma osservax l-obbligu ta’ kunfidenzjalità li kellu fil-kuntest tal-investigazzjonijiet tiegħu;

—

l-OLAF kiser il-prinċipju ta’ amministrazzjoni tajba sa fejn dan jinvolvi d-dritt li dak kollu li jirrigwarda persuna jiġi ttrattat fl-osservanza tal-kunfidenzjalità;

—

l-OLAF kiser il-prinċipju ta’ preżunzjoni ta’ innoċenza billi ppermetta li informazzjoni li kienet is-suġġett tal-akkużi foloz tiegħu kontra r-rikorrenti tinxtered.

4.

Ir-raba’ motiv, ibbażat fuq nuqqas ta’ osservanza tad-dritt għal amministrazzjoni tajba, kif ukoll tal-prinċipju ta’ preżunzjoni ta’ innoċenza dovut għat-tressiq ta’ lment b’kostituzzjoni parti ċivili u l-komunikazzjoni pubblika tal-Kummissjoni Ewropea f’Lulju 2003. Ir-rikorrenti jsostnu li:

—

l-Kummissjoni aġixxiet b’mod mgħaġġel u inkompatibbli mal-obbligu ta’ osservanza ta’ terminu raġonevoli;

—

l-Kummissjoni kien messa stenniet il-konklużjonijiet tal-investigazzjoni tal-OLAF sabiex tkun tista’ tieħu deċiżjoni informata aħjar dwar eventwali tressiq ta’ ilment b’kostituzzjoni ta’ parti ċivili;

—

l-Kummissjoni ma aġixxietx b’imparzjalità fir-rigward tar-rikorrenti peress li hija pprivileġġat l-interessi finanzjarji tagħha, minkejja li dawn ma kinux mhedda serjament;

—

il-Kummissjoni kisret il-prinċipju ta’ preżunzjoni ta’ innoċenza meta ppublikat l-istqarrija għall-istampa tagħha tad-9 ta’ Lulju 2003.
Top