—

tannulla, taħt l-Artikolu 263 TFUE, deċiżjoni taċita tal-Uffiċċju Ewropew ta’ Kontra l-Frodi (OLAF) tas-26 ta’ Mejju 2020, li tiċħad it-talba tar-rikorrenti għal protezzjoni tal-kunfidenzjalità tal-komunikazzjonijiet fir-rigward ta’ komunikazzjonijiet bejn ir-rikorrenti u l-konsulenti legali esterni tagħhom, sakemm ir-rikorrenti ma jispjegawx il-kuntest u l-kontenut ta’ tali komunikazzjonijiet kunfidenzjali;

—

tikkundanna lill-konvenuta għall-ispejjeż.

1.

L-ewwel motiv ibbażat fuq l-allegazzjoni li d-dritt tar-rikorrenti għall-protezzjoni tal-kunfidenzjalità tal-komunikazzjonijiet huwa, għalkemm mhux miktub, dritt fundamentali taħt id-dritt tal-Unjoni, kif rikonoxxut fil-ġurisprudenza tal-Qorti tal-Ġustizzja. L-eżerċizzju ta’ dan id-dritt ma jistax, qiegħed jiġi sostnut, ikun suġġett għall-kundizzjoni li r-rikorrenti juru li l-komunikazzjonijiet kunfidenzjali tagħhom huma sostantivament konnessi mal-investigazzjoni stess li fiha huma kunfidenzjali; dan ikun imur kontra l-għan tal-protezzjoni tal-kunfidenzjalità tal-komunikazzjonijiet.

2.

It-tieni motiv ibbażat fuq l-allegazzjoni li d-dritt tar-rikorrenti għall-protezzjoni tal-kunfidenzjalità tal-komunikazzjonijiet joriġina separatament mill-Konvenzjoni Ewropea tad-Drittijiet tal-Bniedem (iktar ’il quddiem il-“KEDB”) u mill-Karta tad-Drittijiet Fundamentali tal-unjoni Ewropea (iktar ’il quddiem il-Karta), b’mod partikolari d-dritt għall-ħajja privata taħt l-Artikolu 8 tal-KEDB (l-Artikolu 7 tal-Karta) u d-drittijiet tad-difiża taħt l-Artikolu 6 tal-KEDB (l-Artikolu 47 tal-Karta). Il-protezzjoni tal-kunfidenzjalità tal-komunikazzjonijiet taħt il-KEDB u taħt il-Karta ma tiddipendix, qiegħed jiġi sostnut, fuq l-għan u l-kontenut tal-komunikazzjonijiet rilevanti, iżda biss fuq l-identità tal-parteċipanti tagħhom.

3.

It-tielet motiv ibbażat fuq l-allegazzjoni li, anki jekk id-dritt għall-protezzjoni tal-kunfidenzjalità tal-komunikazzjonijiet taħt il-KEDB u taħt il-Karta jista’ jkun limitat għall-benefiċċju ta’ interess pubbliku, tali limitazzjonijiet għandhom ikunu espressi fil-forma ta’ liġi. Dawn ma jistgħux, qiegħed jiġi sostnut, ikunu bbażati fuq deċiżjoni diskrezzjonali ta’ awtur amministrattiv.