Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62020TN0241

Kawża T-241/20: Rikors ippreżentat fis-27 ta’ April 2020 – Susta vs Il-Parlament

ĠU C 215, 29.6.2020, p. 46–47 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

29.6.2020   

MT

Il-Ġurnal Uffiċjali tal-Unjoni Ewropea

C 215/46

Rikors ippreżentat fis-27 ta’ April 2020 – Susta vs Il-Parlament

(Kawża T-241/20)

(2020/C 215/57)

Lingwa tal-kawża: il-Franċiż

Partijiet

Rikorrent: Gianluca Susta (Biella, l-Italia) (rappreżentanti: A. Schmitt u A. Grosjean, avukati)

Konvenut: Il-Parlament Ewropew

Talbiet

Ir-rikorrent jitlob li l-Qorti Ġenerali jogħġobha:

tiddikjara u tiddeċiedi li,

—

dan ir-rikors huwa ammissibbli;

—

safejn huwa neċessarju, bħala miżuri ta’ organizzazzjoni tal-proċedura jew bħala miżuri istruttorji ta’ din il-kawża, il-Parlament Ewropew għandu jiġi kkundannat jipproduċi l-pariri mogħtija mis-Servizz Legali tal-Parlament Ewropew, li ngħataw fis-16 ta’ Lulju 2018 kif ukoll fit-3 ta’ Diċembru 2018, bla ħsara għad-data eżatta, iżda f’kull każ qabel l-adozzjoni tad-deċiżjoni meħuda mill-Bureau tal-Parlament fl-10 ta’ Diċembru 2018 li temenda l-Miżuri ta’ Implimentazzjoni tal-Istatut tal-Membri tal-Parlament Ewropew (2018/C 466/02, Ġurnal Uffiċjali 28 ta’ Diċembru 2018, C 466/8);

—

id-deċiżjoni individwali kkontestata, innotifikata lir-rikorrent mid-Diviżjoni “Remunerazzjoni u Drittijiet Soċjali tal-Membri” tad-Direttorat Ġenerali għall-Finanzi tal-Parlament Ewropew dwar id-drittijiet tar-rikorrent għall-pensjoni tal-irtirar komplementari (volontarja) tiegħu, għandha tiġi annullata abbażi tal-Artikolu 263 TFUE, safejn din id-deċiżjoni implimentat iż-żieda fl-età għall-għoti tal-pensjoni tal-irtirar komplementari (volontarja) dovuta lir-rikorrent minn 63 għal 65 sena mill-1 ta’ Jannar 2019 kif stabbilita mid-deċiżjoni tal-Bureau tal-10 ta’ Diċembru 2018 msemmija iktar ’il fuq;

—

id-deċiżjoni meħuda mill-Bureau tal-Parlament fl-10 ta’ Diċembru 2018 msemmija iktar ’il fuq għandha tiġi annullata, jew iddikjarata mhux applikabbli, skont l-Artikolu 277TFUE, safejn hija temenda l-Artikolu 76 tal-MIIM, u b’mod iktar partikolari sa fejn hija żżid l-età għall-għoti tal-pensjoni tal-irtirar komplementari (volontarja) dovuta mill-1 ta’ Jannar 2019;

—

il-Parlament għandu jiġi kkundannat għall-ispejjeż.

Motivi u argumenti prinċipali

Insostenn tar-rikors tiegħu, ir-rikorrent jinvoka ħames motivi.

1.

L-ewwel motiv ibbażat fuq in-nuqqas ta’ kompetenza ratione materiae tal-Bureau.

—

minn naħa, id-deċiżjoni tal-Bureau tal-10 ta’ Diċembru 2018 (iktar ’il quddiem id-“deċiżjoni tal-Bureau”) ittieħdet bi ksur tal-Istatut tal-Membri tal-Parlament Ewropew adottat permezz ta’ deċiżjoni tal-Parlament Ewropew tat-28 ta’ Settembru 2005, 2005/684/KE, Euratom (ĠU 2005, L 262, p. 1) (iktar ’il quddiem l-“Istatut”). Id-deċiżjoni tal-Bureau tmur kontra, b’mod partikolari, l-Artikolu 27 tal-Istatut li jimponi ż-żamma tad-“drittijiet miksuba” u tad-“drittijiet futuri”.

—

min-naħa l-oħra, id-deċiżjoni tal-Bureau toħloq taxxa billi tistabbilixxi imposta speċjali ta’ 5 % tal-ammont nominali tal-pensjoni tal-irtirar filwaqt li l-ħolqien ta’ taxxa ma jaqax taħt il-kompetenza tal-Bureau skont l-Artikolu 223(2) TFUE.

2.

It-tieni motiv ibbażat fuq il-ksur tar-rekwiżiti formali essenzjali.

—

minn naħa, il-Bureau qiegħed jiġi kkritikat talli adotta d-deċiżjoni tiegħu mingħajr ma osserva r-regoli imposti mill-Artikolu 223 TFUE.

—

min-naħa l-oħra, id-deċiżjoni tal-Bureau ma hijiex suffiċjentement motivata u tikser għalhekk l-obbligu ta’ motivazzjoni previst fit-tieni paragrafu tal-Artikolu 296 TFUE u fl-Artikolu 41(2)(ċ) tal-Karta tad-Drittijiet Fundamentali tal-Unjoni Ewropea.

3.

It-tielet motiv ibbażat fuq il-ksur tad-drittijiet miksuba u tad-drittijiet futuri u tal-prinċipju ta’ aspettattivi leġittimi.

—

minn naħa, id-deċiżjoni tal-Bureau tikser id-drittijiet miksuba u d-drittijiet futuri li jirriżultaw kemm mill-prinċipji ġenerali tad-dritt kif ukoll mill-Istatut, li jimponi espressament li dawn jinżammu “fl-intier tagħhom” (Artikolu 27).

—

min-naħa l-oħra, id-deċiżjoni tal-Bureau tikser il-prinċipju ta’ aspettattivi leġittimi.

4.

Ir-raba’ motiv ibbażat fuq il-ksur tal-prinċipju ta’ proporzjonalità u tal-prinċipji ta’ ugwaljanza fit-trattament u ta’ nondiskriminazzjoni.

—

minn naħa, il-ksur tad-drittijiet tar-rikorrent huwa sproporzjonat fir-rigward tal-għanijiet li għandhom jintlaħqu mid-deċiżjoni tal-Bureau.

—

min-naħa l-oħra, id-deċiżjoni tal-Bureau għandha tiġi ddikjarata mhux applikabbli minħabba l-ksur tal-prinċipji ta’ ugwaljanza fit-trattament u ta’ nondiskriminazzjoni.

5.

Il-ħames motiv ibbażat fuq il-ksur tal-prinċipju ta’ ċertezza legali u fuq l-assenza ta’ miżuri tranżitorji.

—

minn naħa, id-deċiżjoni tal-Bureau tikser il-prinċipju ta’ ċertezza legali safejn hija għandha effetti retroattivi irregolari.

—

min-naħa l-oħra, id-deċiżjoni tal-Bureau tikser il-prinċipju ta’ ċertezza legali safejn hija naqset milli tipprevedi miżuri tranżitorji.
Top