1)

Ir-regoli tal-Unjoni dwar l-għajnuna mill-Istat, inkluż ir-rekwiżit tal-effett ta’ inċentiv stabbilit fil-punt 50 tal-Komunikazzjoni tal-Kummissjoni — Linji Gwida dwar l-għajnuna mill-Istat għall-protezzjoni ambjentali u l-enerġija 2014–2020 (1), għandhom jiġu interpretati fis-sens li hija kompatibbli ma’ dawn ir-regoli skema ta’ għajnuna li tippermetti lil produttur ta’ enerġija rinnovabbli japplika għall-ħlas ta’ għajnuna mill-Istat wara li jkun inbeda x-xogħol fuq il-proġett, jekk dispożizzjoni nazzjonali tagħti dritt għall-għajnuna lil kull produttur li jissodisfa r-rekwiżiti stabbiliti fil-liġi, u ma tagħti l-ebda diskrezzjoni lill-awtorità kompetenti f’dan ir-rigward?

2)

L-effett ta’ inċentiv ta’ għajnuna huwa f’kull każ eskluż jekk l-investiment li għalih tintalab l-għajnuna jkun sar minħabba bidla fir-rekwiżiti għal permess ambjentali – anki meta l-applikant għall-għajnuna, bħal fil-każ preżenti, kien x’aktarx iwaqqaf l-attività tiegħu kieku ma rċeviex l-għajnuna mill-Istat minħabba r-rekwiżiti għall-permess iktar stretti?

3)

Fid-dawl, b’mod partikolari, tad-dikjarazzjonijiet tal-Qorti tal-Ġustizzja fis-sentenza tagħha fil-Kawża C-590/14 P (punti 49 u 50) (2), fejn, bħal fil-każ preżenti, il-Kummissjoni tkun iddikjarat, permezz ta’ deċiżjoni dwar għajnuna mill-Istat, kemm skema ta’ għajnuna eżistenti kif ukoll il-bdil propost fiha bħala kompatibbli mas-suq intern, u fejn l-Istat ikun indika, fost l-oħrajn, li ser japplika l-iskema ta’ għajnuna eżistenti biss sa data speċifika, hija din għajnuna ġdida fis-sens tal-Artikolu 1(c) tar-Regolament (UE) 2015/1589 (3), jekk l-iskema ta’ għajnuna eżistenti abbażi tal-liġi fis-seħħ tibqa’ tapplika lil hinn mid-data finali mill-Istat?

4)

Fil-każ li l-Kummissjoni tkun iddeċidiet sussegwentement li ma tqajjem ebda oġġezzjoni fir-rigward ta’ skema ta’ għajnuna applikata bi ksur tal-Artikolu 108(3) TFUE, persuni li huma intitolati għall-għajnuna għall-funzjonament huma intitolati li jitolbu l-ħlas tal-għajnuna għall-perijodu qabel id-deċiżjoni tal-Kummissjoni, kemm-il darba r-regoli proċedurali nazzjonali jippermettu dan?

5)

Applikant li jkun applika għal għajnuna għall-funzjonament taħt skema ta’ għajnuna u li beda x-xogħol fuq proġett li jissodisfa r-rekwiżiti meqjusa bħala kompatibbli mas-suq intern fi żmien meta l-iskema ta’ għajnuna ġiet applikata legalment, iżda li jkun talab għajnuna fi żmien meta l-iskema ta’ għajnuna kienet estiża mingħajr ma l-Kummissjoni tkun ġiet innotifikata b’dan, għandu dritt għal għajnuna mill-Istat, minkejja d-dispożizzjonijiet tal-Artikolu 108(3) TFUE,?