Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62020CC0560

Konklużjonijiet tal-Avukat Ġenerali A. M. Collins, ippreżentati l-4 ta’ Mejju 2023.


ECLI identifier: ECLI:EU:C:2023:375

 KONKLUŻJONIJIET TAL-AVUKAT ĠENERALI

COLLINS

ippreżentati fl‑4 ta’ Mejju 2023 ( 1 )

Kawża C‑560/20

CR,

GF,

TY

konvenut:

Landeshauptmann von Wien

(talba għal deċiżjoni preliminari mressqa mill-Verwaltungsgericht Wien, (il-Qorti Amministrattiva, Vjenna, l-Awstrija))

(Rinviju għal deċiżjoni preliminari – Politika tal-immigrazzjoni – Dritt għal riunifikazzjoni tal-familja – Direttiva 2003/86/KE – Riunifikazzjoni tal-familja ta’ refuġjati – Minuri mhux akkumpanjat – Artikolu 10(3)(a) – Ġenituri li qegħdin japplikaw għal riunifikazzjoni tal-familja ma’ minuri mhux akkumpanjat bi status ta’ refuġjat flimkien ma’ oħt adulta b’diżabbiltà tar-refuġjat – Membru tal-familja tar-refuġjat mhux imsemmi fl-Artikolu 10(2) u l-Artikolu 10(3) – Artikolu 3(5) – Possibbiltà għall-Istati Membri li jadottaw dispożizzjonijiet iktar favorevoli – Artikolu 4(2)(b) – Riunifikazzjoni tal-familja ma’ tfal adulti mhux miżżewġa tal-isponsor li huma inkapaċi li jipprovdu għall-ħtiġijiet tagħhom stess minħabba l-istat ta’ saħħithom – Artikolu 17 – Eżami ta’ applikazzjonijiet għal riunifikazzjoni fuq il-bażi ta’ każ b’każ – Evalwazzjoni bbilanċjata u raġonevoli tal-interessi rilevanti kollha – Artikolu 7 u Artikolu 24(2) u (3) tal-Karta tad-Drittijiet Fundamentali tal-Unjoni Ewropea)

I. Introduzzjoni

1.

Din it-talba għal deċiżjoni preliminari mill-Verwaltungsgericht Wien (il-Qorti Amministrattiva, Vjenna, l-Awstrija) tikkonċerna l-eliġibbiltà għal riunifikazzjoni tal-familja tal-ġenituri u l-oħt adulta b’diżabbiltà ta’ refuġjat minuri mhux akkumpanjat ( 2 ). Għal dan il-għan, il-qorti tar-rinviju tixtieq tivverifika d-data li fiha għandha tevalwa l-istatus ta’ minuri tar-refuġjat. Hija tistaqsi wkoll jekk, bħala kwistjoni tad-dritt tal-Unjoni, għandux jingħata permess ta’ residenza lill-oħt adulta b’diżabbiltà ta’ refuġjat minuri mhux akkumpanjat jekk rifjut li jingħata dan ikollu l-effett li jipprevjeni lill-ġenituri tagħhom milli jeżerċitaw id-dritt tagħhom għal riunifikazzjoni tal-familja.

II. Il‑kuntest ġuridiku

A.   Id‑dritt tal‑Unjoni Ewropea

2.

L-Artikolu 2(ċ) tad-Direttiva 2003/86 jiddefinixxi t-terminu “sponsor” bħala:

“… ċittadin ta’ pajjiż terz li joqgħod legalment fi Stat Membru u li japplika jew il-membri tal-familja tiegħu japplikaw għal riunifikazzjoni tal-familja biex jingħaqdu miegħu/magħha”.

3.

Permezz tal-Artikolu 2(f) tad-Direttiva 2003/86 it-terminu “minorenni mhux akkompanjat [minuri mhux akkumpanjat]” huwa definit bħala:

“… ċittadini ta’ pajjiżi terzi jew persuni bla stat taħt l-età tmintax, li jaslu fit-territorju ta’ l-Istati Membri mhux akkompanjati minn adulti responsabbli bil-liġi jew b’użanza, u sakemm ma jittiħdux effettivament fir-reponsabbilta ta’ persuna tali, jew minorenni [minuri] li jibqgħu mhux akkompanjati wara li jkunu daħlu fit-territorju ta’ l-Istati Membri.”

4.

Permezz tal-Artikolu 3(5) tagħha, id-Direttiva 2003/86 ma għandhiex taffettwa l-possibbiltà għall-Istati Membri li jadottaw jew iżommu dispożizzjonijiet iktar favorevoli.

5.

Skont l-Artikolu 4(2)(b) tad-Direttiva 2003/86, l-Istati Membri jistgħu jawtorizzaw, skont dik id-direttiva u suġġetti għal konformità mal-kundizzjonijiet stabbiliti fil-Kapitolu IV tagħha, id-dħul u r-residenza tat-tfal adulti mhux miżżewġa tal-isponsor jew il-konjuġi tagħha jew tiegħu, fejn huma oġġettivament inkapaċi li jipprovdu għall-ħtiġijiet tagħhom stess minħabba l-istat ta’ saħħithom.

6.

L-Artikolu 10 tad-Direttiva 2003/86 jipprovdi li:

“[…]

2.   L-Istati Membri jistgħu jawtorizzaw riunifikazzjoni tal-familja ta’ membri oħra tal-familja li ma jirreferix għalihom l-Artikolu 4, jekk huma dipendenti fuq ir-refuġjat.

3.   Jekk ir-refuġjat huwa minorenni mhux akkompanjat [minuri mhux akkumpanjat], l-Istat Membru:

(a)

għandu jawtorizza d-dħul u residenza għall-għanijiet tar-riunifikazzjoni tal-familja tal-qraba ta’ l-ewwel grad tiegħu/tagħha fil-linja diretta axxendenti mingħajr ma japplika l-kondizzjonijiet preskritti fl-Artikolu 4(2)(a);

…”

7.

Skont l-Artikolu 12 tad-Direttiva 2003/86:

“1.   Permezz ta’ deroga mill-Artikolu 7, l-Istati Membri m’għandhomx jirrikjedu li r-refuġjat u/jew il-membri tal-familja jipprovdu, fir-rigward ta’ applikazzjonijiet dwar dawk il-membri tal-familja li jirreferi għalihom l-Artikolu 4(1), ix-xiehda li r-refuġjat jissodisfa r-rekwiżiti ddikjarati fl-Artikolu 7.

[…]

Stati Membri jistgħu jirrikjedu li r-refuġjat jissodisfa l-kondizzjonijiet li jirreferi għalihom l-Artikolu 7(1) jekk l-applikazzjoni għal riunifikazzjoni tal-familja ma tkunx issottomessa fi żmien perjodu ta’ tliet xhur wara l-għoti ta’ l-istatus ta’ refuġjat.

[…]”

B.   Id‑dritt Awstrijak

8.

Id-dispożizzjonijiet rilevanti tad-dritt nazzjonali jinsabu fil-punti 11 u 46 tal-Bundesgesetz über die Niederlassung und den Aufenthalt in Österreich (Niederlassungs-und Aufenthaltsgesetz – NAG) (il-Liġi Federali dwar l-istabbiliment u r-residenza fl-Awstrija, iktar ’il quddiem in-“NAG”) tas‑16 ta’ Awwissu 2005 ( 3 ) u l-punti 34 u 35 tal-Bundesgesetz über die Gewährung von Asyl (Asylgesetz 2005) (il-Liġi Federali dwar l-għoti tal-ażil (Liġi dwar l-Ażil, 2005), iktar ’il quddiem l-“AsylG 2005”) tas‑16 ta’ Awwissu 2005 ( 4 ).

III. Il‑fatti tal-kawża prinċipali u d-domandi magħmula għal deċiżjoni preliminari

9.

RI huwa ċittadin Sirjan, imwieled fl‑1 ta’ Settembru 1999. Huwa wasal fl-Awstrija bħala minuri mhux akkumpanjat fil‑31 ta’ Diċembru 2015 u applika għal protezzjoni internazzjonali fit‑8 ta’ Jannar 2016. Il-Bundesamt für Fremdenwesen und Asyl (l-Uffiċċju Federali għall-Immigrazzjoni u l-Ażil, l-Awstrija) ta l-istatus ta’ refuġjat lil RI meta kien minuri u nnotifikah b’dik id-deċiżjoni fil‑5 ta’ Jannar 2017. Fis‑6 ta’ April 2017, tliet xhur u ġurnata wara, il-ġenituri ta’ RI, CR u GF, u oħtu adulta, TY ( 5 ) applikaw ( 6 ) għand l-Ambaxxata tal-Awstrija fis-Sirja sabiex jingħataw permess jidħlu u jirrisjedu fl-Awstrija ma’ RI għall-finijiet ta’ riunifikazzjoni tal-familja. RI kien minuri fiż-żmien meta ġew ippreżentati dawk l-applikazzjonijiet. L-Ambaxxata tal-Awstrija ċaħdithom ( 7 ) għar-raġuni li RI kien sar adult matul il-proċedura ta’ riunifikazzjoni tal-familja. Ma ġie ppreżentat ebda appell mid-deċiżjoni u din saret finali fis‑26 ta’ Ġunju 2018.

10.

Fil‑11 ta’ Lulju 2018, CR, GF u TY applikaw lill-Landeshauptmann von Wien (il-Kap tal-Gvern tal-Land ta’ Vjenna) għal permessi ta’ residenza għall-finijiet ta’ riunifikazzjoni tal-familja skont l-Artikolu 46(1)(2) tan-NAG. CR u GF invokaw id-drittijiet tagħhom taħt id-Direttiva 2003/86. TY ibbażat l-applikazzjoni tagħha fuq l-Artikolu 8 tal-Konvenzjoni Ewropea dwar id-Drittijiet tal-Bniedem (iktar ’il quddiem il-“KEDB”). Fl‑20 ta’ April 2020, il-Landeshauptmann von Wien (il-Kap tal-Gvern tal-Land ta’ Vjenna) ċaħad dawk l-applikazzjonijiet peress li ma kinux ġew ippreżentati fi żmien tliet xhur mid-data li fiha ġie rikonoxxut l-istatus ta’ refuġjat ta’ RI.

11.

CR, GF u TY (iktar ’il quddiem ir-“rikorrenti”) ikkontestaw dawn id-deċiżjonijiet quddiem il-Verwaltungsgericht Wien (il-Qorti Amministrattiva, Vjenna). Din il-qorti tistaqsi, inter alia, jekk ir-rikorrenti għandhomx dritt għal riunifikazzjoni tal-familja skont l-Artikolu 10(3)(a) tad-Direttiva 2003/86 meta jiġi kkunsidrat li RI sar adult matul il-proċedura ta’ riunifikazzjoni tal-familja. Jekk ir-risposta hija le, tixtieq tkun taf id-data li fiha kellha tiġi ppreżentata din l-applikazzjoni għar-riunifikazzjoni tal-familja sabiex dan id-dritt ikun jeżisti.

12.

Wara seduta, il-Verwaltungsgericht Wien (il-Qorti Amministrattiva, Vjenna) ikkonstatat li r-rikorrenti ma għandhomx dritt għal akkomodazzjoni meqjusa bħala “normali” ( 8 ), ma għandhomx “assigurazzjoni kontra l-mard” li tiggarantilhom kopertura stabbli u regolari ( 9 ) u ma għandhomx dħul ( 10 ) fl-Awstrija. Għaldaqstant, dawn ma jissodisfawx ir-rekwiżiti tal-Artikolu 7 tad-Direttiva 2003/86. Il-qorti tar-rinviju kkonstatat ukoll li TY, li tgħix mal-ġenituri tagħha fis-Sirja, tbati minn paraliżi ċerebrali, li b’konsegwenza ta’ dan qiegħda f’siġġu tar-roti u teħtieġ assistenza personali kuljum, inkluż għajnuna biex tiekol. Ommha, CR, tipprovdi dik l-assistenza. Il-ġenituri ta’ TY ma jistgħux iħalluha waħedha peress li l-assistenza li tipprovdilha ommha ma hijiex disponibbli b’mod ieħor fis-Sirja u l-ebda membru ieħor tal-familja ma joqgħod hemmhekk.

13.

Il-Verwaltungsgericht Wien (il-Qorti Amministrattiva, Vjenna) iddeċidiet li peress li r-Repubblik tal-Awstrija ma tapplikax l-għażla fl-Artikolu 10(2) tad-Direttiva 2003/86, TY ma hijiex membru tal-familja għall-finijiet tar-riunifikazzjoni tal-familja bħala kwistjoni tad-dritt Awstrijak. Il-qorti tar-rinviju għalhekk tqis li l-ġenituri ta’ RI jkunu obbligati jirrinunzjaw għad-dritt tagħhom għal riunifikazzjoni tal-familja taħt l-Artikolu 10(3)(a) tad-Direttiva 2003/86 jekk oħt RI, TY, ma tingħatax permess ta’ residenza fl-istess ħin magħhom. Hija tistaqsi jekk l-interpretazzjoni tal-Artikolu 20 TFUE fis-sentenzi Ruiz Zambrano ( 11 ) u Dereci et ( 12 ) tistax tapplika b’analoġija għall-eżerċizzju tad-dritt għal riunifikazzjoni tal-familja skont l-Artikolu 10(3)(a) tad-Direttiva 2003/86 billi testendi l-kamp ta’ applikazzjoni ta’ din id-direttiva għal kategoriji ta’ persuni li ma humiex espressament previsti fiha. Il-qorti tar-rinviju ssemmi l-fatt li, skont il-liġi Awstrijaka, TY tista’ tkun eliġibbli għal permess ta’ residenza għal raġunijiet konvinċenti relatati mal-ħajja privata u tal-familja tagħha skont l-Artikolu 8 KEDB. Madankollu hija tqis li dritt għal permess ta’ residenza taħt id-dritt tal-Unjoni jista’ jagħti protezzjoni ikbar minn dik li tista’ tkun disponibbli permezz tal-applikazzjoni tal-Artikolu 8 KEDB mill-awtoritajiet fl-Awstrija.

14.

F’dawn iċ-ċirkustanzi, il-Verwaltungsgericht Wien (il-Qorti Amministrattiva, Vjenna) iddeċidiet li tissospendi l-proċedura u li tagħmel id-domandi preliminari li ġejjin lill-Qorti tal-Ġustizzja:

“(1)

Il-ġenituri, ċittadini ta’ pajjiż terz, ta’ refuġjat li ppreżenta applikazzjoni għall-ażil inkwantu minuri mhux akkumpanjat u li kiseb l-ażil meta kien għadu minuri, jistgħu jkomplu jinvokaw l-Artikolu 2(f), moqri flimkien mal-Artikolu 10(3)(a) tad-[Direttiva 2003/86] meta r-refuġjat ikun sar maġġorenni wara l-għoti tal-ażil, iżda matul il-proċedura għall-għoti ta’ permess ta’ residenza lill-ġenituri tiegħu?

(2)

Jekk l-ewwel domanda tingħata risposta fl-affermattiv: f’każ bħal dan, huwa neċessarju li l-ġenituri taċ-ċittadin ta’ pajjiż terz josservaw it-terminu msemmi fis-sentenza tal-Qorti tal-Ġustizzja tat‑12 ta’ April 2018, C‑550/16, A u S, [(C‑550/16, EU:C:2018:248] punt 61)], għall-preżentazzjoni ta’ applikazzjoni għal riunifikazzjoni tal-familja, jiġifieri ‘bħala prinċipju, […]fi żmien tliet xhur mill-jum li fih il-minuri kkonċernat jingħata l-istatus ta’ refuġjat’?

(3)

Jekk l-ewwel domanda tingħata risposta fl-affermattiv: għandu jingħata, direttament abbażi tad-dritt tal-Unjoni, permess ta’ residenza lill-oħt adulta, ċittadina ta’ pajjiż terz, ta’ persuna li tkun ingħatat l-istatus ta’ refuġjat jekk, fil-każ ta’ rifjut ta’ dan il-permess ta’ residenza, il-ġenituri tar-refuġjat, minħabba dan, ikunu mġiegħla jirrinunzjaw għad-dritt tagħhom għal riunifikazzjoni tal-familja skont l-Artikolu 10(3)(a) tad-Direttiva [2003/86] għaliex, minħabba l-istat ta’ saħħa tagħha, din l-oħt adulta tar-refuġjat għandha bżonn imperattiv ta’ kura għal żmien twil mill-ġenituri tagħha u ma tistax għaldaqstant tibqa’ waħedha fil-pajjiż ta’ oriġini?

(4)

Jekk it-tieni domanda tingħata risposta fl-affermattiv: liema huma l-kriterji li għandhom jittieħdu inkunsiderazzjoni sabiex jiġi evalwat jekk tali applikazzjoni għal riunifikazzjoni tal-familja ġietx ippreżentata fit-terminu stabbilit, jiġifieri, ‘bħala prinċipju’, fi żmien tliet xhur fis-sens tas-sentenza tal-Qorti tal-Ġustizzja tat‑12 ta’ April 2018, […], A u S, [(C‑550/16, EU:C:2018:248, punt 61)]?

(5)

Jekk it-tieni domanda tingħata risposta fl-affermattiv: il-ġenituri tar-refuġjat jistgħu jkomplu jinvokaw id-dritt tagħhom għal riunifikazzjoni tal-familja skont l-Artikolu 10(3)(a) tad-Direttiva [2003/86] meta tliet xhur u ġurnata jkunu għaddew bejn il-jum li fih il-minuri ngħata l-istatus ta’ refuġjat u l-applikazzjoni tagħhom għal riunifikazzjoni tal-familja?

(6)

Fil-kuntest ta’ proċedura għal riunifikazzjoni tal-familja taħt l-Artikolu 10(3)(a) tad-Direttiva [2003/86] Stat Membru jista’, bħala prinċipju, jeżiġi mill-ġenituri tar-refuġjat li huma jissodisfaw il-kundizzjonijiet previsti fl-Artikolu 7(1) tad-Direttiva [2003/86]?

(7)

Ir-rekwiżit li jiġu ssodisfatti l-kundizzjonijiet stabbiliti fl-Artikolu 7(1) tad-Direttiva [2003/86] fil-kuntest ta’ riunifikazzjoni tal-familja taħt l-Artikolu 10(3)(a) tad-Direttiva [2003/86] jiddependi mill-punt dwar jekk, fis-sens tat-tielet subparagrafu tal-Artikolu 12(1) tad-Direttiva [2003/86] l-applikazzjoni għal riunifikazzjoni tal-familja tkun ġiet ippreżentata fi żmien tliet xhur mill-għoti tal-istatus ta’ refuġjat?”

IV. Il‑proċedura quddiem il‑Qorti tal‑Ġustizzja

15.

Fid‑9 ta’ Lulju 2021, il-President tal-Qorti tal-Ġustizzja ssospenda l-proċeduri f’din il-kawża sakemm tittieħed deċiżjoni finali fil-Kawża C‑279/20 u fil-Kawżi Magħquda C‑273/20 u C‑355/20. Fit‑8 ta’ Awwissu 2022, il-President tal-Qorti tal-Ġustizzja staqsa lill-qorti tar-rinviju jekk, fid-dawl tas-sentenzi mogħtija f’dawn il-kawżi, riditx iżżomm it-talba tagħha għal deċiżjoni preliminari kollha kemm hi jew parzjalment ( 13 ). Fis‑6 ta’ Settembru 2022, il-qorti tar-rinviju rtirat l-ewwel domanda fit-talba tagħha għal deċiżjoni preliminari iżda żammet it-talba tagħha fir-rigward tat-tieni sas-seba’ domanda.

16.

Ir-rikorrenti, il-Gvern Olandiż u l-Gvern Awstrijak u l-Kummissjoni Ewropea ppreżentaw osservazzjonijiet bil-miktub. Dawn l-istess partijiet ippreżentaw argumenti orali u rrispondew għad-domandi tal-Qorti tal-Ġustizzja fis-seduta tal‑14 ta’ Frar 2023.

V. Evalwazzjoni

17.

B’konformità mat-talba tal-Qorti tal-Ġustizzja, ser nillimita l-konklużjonijiet tiegħi għal analiżi tat-tielet domanda ( 14 ).

18.

Il-Verwaltungsgericht Wien (il-Qorti Amministrattiva, Vjenna) tistaqsi, essenzjalment, jekk ċittadin ta’ pajjiż terz, l-oħt adulta ta’ refuġjat minuri mhux akkumpanjat li, minħabba l-istat ta’ saħħa tagħha, tiddependi għal kollox mill-ġenituri tagħha, hijiex intitolata għal permess ta’ residenza skont id-dritt tal-Unjoni fejn rifjut li jingħata dan il-permess ikollu l-effett li jipprevjeni lill-ġenituri tagħha milli jeżerċitaw id-dritt tagħhom għal riunifikazzjoni tal-familja ( 15 ). Ir-rikorrenti u l-Kummissjoni jqisu li din id-domanda teħtieġ risposta fl-affermattiv. Il-Gvern Olandiż u l-Gvern Awstrijak jipproponu li tingħata risposta fin-negattiv.

19.

Ir-rikorrenti jsostnu li, minħabba l-istat ta’ saħħa ta’ TY, rifjut li tingħata riunifikazzjoni tal-familja jkun ifisser li l-ġenituri tagħha, CR u GF, ma jkunux jistgħu jeżerċitaw id-dritt tagħhom għal riunifikazzjoni tal-familja ma’ binhom RI, u għalhekk dan id-dritt jitneħħielu kwalunkwe effett prattiku. Dan ir-riżultat imur kontra l-għan tad-Direttiva 2003/86 li jippromwovi r-riunifikazzjoni tal-familja u l-obbligu li tingħata kunsiderazzjoni partikolari tas-sitwazzjoni tar-refuġjati. Imur ukoll kontra l-prinċipju ta’ effettività skont liema dispożizzjonijiet tad-dritt nazzjonali ma għandhomx jagħmlu l-eżerċizzju tad-drittijiet mogħtija mid-dritt tal-Unjoni fil-prattika impossibbli jew eċċessivament diffiċli. Il-Kummissjoni tqis ukoll li l-Artikolu 10(3)(a) tad-Direttiva 2003/86 għandu jiġi interpretat b’tali mod li jdaħħal lill-oħt adulta b’diżabbilità ta’ refuġjat minuri mhux akkumpanjat fil-kamp ta’ applikazzjoni tiegħu sabiex dan tal-aħħar ikun jista’ jibbenefika mir-riunifikazzjoni mal-ġenituri tiegħu jew tagħha.

20.

Il-Gvern Olandiż iqis li l-estensjoni tal-kamp ta’ applikazzjoni tal-Artikolu 10(3)(a) tad-Direttiva 2003/86 sabiex jinkludi l-oħt adulta b’diżabbiltà ta’ refuġjat minuri mhux akkumpanjat tneħħi l-effettività tad-dispożizzjonijiet tad-direttiva li jippermettu espressament lill-Istati Membri jestendu ċ-ċirku ta’ persuni li jistgħu jibbenefikaw mir-riunifikazzjoni tal-familja. Il-Gvern Awstrijak isostni li estensjoni tal-kamp ta’ applikazzjoni tad-Direttiva 2003/86 tmur kontra r-rieda espliċita tal-leġiżlatur tal-Unjoni peress li din il-miżura tiddefinixxi b’mod eżawrjenti l-kategoriji ta’ persuni mogħtija dritt għal riunifikazzjoni tal-familja taħtha.

21.

Il-qorti tar-rinviju tqis li l-eżerċizzju tad-dritt ta’ RI għar-riunifikazzjoni tal-familja mal-ġenituri tiegħu jiddependi mill-għoti ta’ dritt ta’ residenza lil TY fl-istess ħin bħall-ġenituri tagħha ( 16 ). Għalhekk l-ewwel ser neżamina d-dritt ta’ RI għal riunifikazzjoni tal-familja mal-ġenituri tiegħu skont id-dritt tal-Unjoni qabel nikkunsidra jekk TY għandhiex dritt għal permess ta’ residenza taħtu.

A.   Id‑dritt ta’ refuġjat minuri mhux akkumpanjat għal riunifikazzjoni tal‑familja mal‑ġenituri tiegħu jew tagħha – Artikolu 10(3)(a) tad‑Direttiva 2003/86

22.

Fl-għan tagħha li tiffaċilita l-integrazzjoni ta’ ċittadini ta’ pajjiżi terzi fl-Istati Membri billi tagħmel il-ħajja tal-familja possibbli permezz ta’ riunifikazzjoni, id-Direttiva 2003/86 tiddetermina l-kundizzjonijiet għall-eżerċizzju tad-dritt għar-riunifikazzjoni tal-familja minn ċittadini ta’ pajjiżi terzi li joqogħdu legalment fit-territorju tal-Istati Membri ( 17 ). L-Artikolu 5(5) tad-Direttiva 2003/86 jobbliga lill-Istati Membri jeżaminaw l-applikazzjonijiet għar-riunifikazzjoni fl-interessi ta’ kwalunkwe tfal minuri kkonċernati u bil-għan li jippromwovu l-ħajja tal-familja ( 18 ). Id-Direttiva 2003/86 għandha tiġi interpretata u applikata fid-dawl, inter alia, tal-Artikolu 7 u tal-Artikolu 24(2) u (3) tal-Karta tad-Drittijiet Fundamentali tal-Unjoni Ewropea (iktar ’il quddiem “il-Karta”) ( 19 ). L-Artikolu 7 tal-Karta jirrikonoxxi d-dritt għar-rispett tal-ħajja privata jew tal-familja ( 20 ). Din id-dispożizzjoni għandha tinqara flimkien mal-obbligu li jiġu kkunsidrati l-aħjar interessi tat-tfal, kif jirrikonoxxi l-Artikolu 24(2) tal-Karta. Għandha titqies ukoll il-ħtieġa, kif espressa fl-Artikolu 24(3) tal-Karta, li t-tfal kollha jkollhom relazzjoni personali maż-żewġ ġenituri regolarment ( 21 ).

23.

L-Artikolu 4 tad-Direttiva 2003/86 jiddefinixxi l-membri tal-familja ta’ ċittadin ta’ pajjiż terz li l-Istati Membri għandhom jew jistgħu, skont il-każ, jagħtuhom dritt għar-riunifikazzjoni tal-familja fis-sens ta’ din id-direttiva ( 22 ). L-Artikolu 4(1) tad-Direttiva 2003/86 jirregola d-dritt għar-riunifikazzjoni tal-familja tal-membri tal-familja nukleari tal-isponsor, jiġifieri l-konjuġi tiegħu/tagħha u t-tfal minuri tagħhom ( 23 ). L-Artikolu 4(2)(a) tad-Direttiva 2003/86 jipprovdi li l-Istati Membri jistgħu, f’ċerti ċirkustanzi, jawtorizzaw ir-riunifikazzjoni tal-familja tal-ġenituri tal-isponsor jew tal-konjuġi tiegħu/tagħha. Il-possibbiltà ta’ riunifikazzjoni tal-familja mal-ġenituri hija għalhekk, bħala prinċipju, kwistjoni li kull Stat Membru għandu jiddetermina b’riferiment għal din id-dispożizzjoni. It-tgawdija tagħha hija suġġetta, b’mod partikolari għall-kundizzjoni li l-ġenituri jkunu dipendenti fuq l-isponsor u li jkunu mċaħħda mill-appoġġ xieraq tal-familja fil-pajjiż ta’ oriġini tagħhom ( 24 ). L-eżerċizzju tad-dritt għar-riunifikazzjoni tal-familja skont l-Artikolu 4(2)(a) tad-Direttiva 2003/86 huwa wkoll “[suġġett] għal konformita mal-kondizzjonijiet preskritti fil-Kapitolu IV” tad-Direttiva 2003/86.

24.

L-Artikolu 7(1) tad-Direttiva 2003/86, li jinsab fil-Kapitolu IV tagħha, jippermetti lill-Istati Membri jirrikjedu xiehda li l-isponsor għandu (a) akkomodazzjoni meqjusa bħala normali għal familja komparabbli f’dak l-Istat; (b) assigurazzjoni tal-mard għalih innifsu/għaliha nnifisha u l-membri tal-familja tiegħu/tagħha; u (ċ) riżorsi stabbli u regolari li huma suffiċjenti biex imantni lilu nnifsu/lilha nnifisha u l-membri tal-familja tiegħu/tagħha, mingħajr ma jirrikorri għas-sistema ta’ għajnuna soċjali tal-Istat Membru kkonċernat. Peress li l-Artikolu 7(1) tad-Direttiva 2003/86 juża l-kelma “jista’”, l-Istati Membri jistgħu jirrinunzjaw ir-rekwiżiti li tistabbilixxi din id-dispożizzjoni.

25.

F’ċerti każijiet ir-refuġjati jibbenefikaw minn kundizzjonijiet iktar favorevoli għall-eżerċizzju tad-dritt għar-riunifikazzjoni tal-familja ( 25 ). L-Artikolu 10(3) tad-Direttiva 2003/86 jindirizza speċifikament is-sitwazzjoni tar-refuġjati minuri mhux akkumpanjati. Dan jagħtihom trattament preferenzjali ( 26 ) billi jiżgura r-riunifikazzjoni tal-familja, inter alia, mal-ġenituri tagħhom ( 27 ) jew il-kustodji legali tagħhom ( 28 ) mingħajr ma jimponi ċerti kundizzjonijiet normalment applikabbli taħt dik id-direttiva. L-Artikolu 10(3)(a) tad-Direttiva 2003/86 għalhekk jeħtieġ ( 29 ) li l-Istati Membri jawtorizzaw ir-riunifikazzjoni tal-familja ta’ refuġjat li jkun minuri mhux akkumpanjat mal-ġenituri tiegħu jew tagħha “mingħajr ma [japplikaw] il-kundizzjonijiet preskritti fl-Artikolu 4(2)(a)” ta’ dik id-Direttiva.

26.

Peress li l-Artikolu 4(2)(a) tad-Direttiva 2003/86 jirreferi espliċitament għall-kundizzjonijiet stabbiliti fil-Kapitolu IV, l-Istati Membri ma jistgħux jirrikjedu li refuġjat minuri mhux akkumpanjat jew il-ġenituri tiegħu jew tagħha jissodisfaw ir-rekwiżiti tal-Artikolu 7(1) tad-Direttiva 2003/86 fi proċedura ta’ riunifikazzjoni tal-familja bbażata fuq l-Artikolu 10(3)(a) tagħha ( 30 ). L-Artikolu 10(3)(a) tad-Direttiva 2003/86 jagħmilha ċara li l-leġiżlatur tal-Unjoni eskluda speċifikament, inter alia, ir-rekwiżit li refuġjat minuri mhux akkumpanjat ikun dipendenti fuq il-ġenituri tiegħu jew tagħha ( 31 ) u li jikkonforma mal-Artikolu 7(1) tad-Direttiva 2003/86 ( 32 ). Dan il-qari tal-Artikolu 10(3)(a) tad-Direttiva 2003/86 huwa konformi kemm mal-kuntest li jidher fih kif ukoll mal-għan tad-Direttiva 2003/86 li tagħti protezzjoni preferenzjali lir-refuġjati u li tieħu inkunsiderazzjoni s-sitwazzjoni vulnerabbli tal-minuri, partikolarment minuri mhux akkumpanjati. Jekk il-ġenituri ta’ refuġjat minuri mhux akkumpanjat ikunu obbligati li jissodisfaw ir-rekwiżiti tal-Artikolu 7(1) tad-Direttiva 2003/86, l-applikazzjoni effettiva tal-Artikolu 10(3)(a) tagħha u t-trattament preferenzjali tar-refuġjati minuri mhux akkumpanjati jkunu ristretti.

B.   Id‑dritt ta’ refuġjat minuri mhux akkumpanjat għal riunifikazzjoni tal‑familja ma’ membri oħra tal‑familja – l‑Artikolu 10(2) u 10(3)(a) tad‑Direttiva 2003/86

27.

Il-Qorti tal-Ġustizzja ddeċidiet li oħt refuġjat ma hijiex waħda mill-membri tal-familja ta’ sponsor li jirreferi għalihom l-Artikolu 4 tad-Direttiva 2003/86 ( 33 ). Barra minn hekk, RI ma għandux dritt għar-riunifikazzjoni tal-familja ma’ oħtu, TY, skont l-Artikolu 10(3)(a) tad-Direttiva 2003/86. It-test ta’ dik id-dispożizzjoni huwa inekwivoku: japplika biss għar-refuġjati minuri mhux akkumpanjati u l-ġenituri tagħhom ( 34 ).

28.

Skont ġurisprudenza stabbilita, l-awtoritajiet nazzjonali ma jistgħux, abbażi tad-Direttiva 2003/86, joħorġu permess ta’ residenza lil ċittadin ta’ pajjiż terz li ma jissodisfax ir-rekwiżiti li din id-direttiva tistabbilixxi għal dan il-għan. Il-Qorti tal-Ġustizzja saħansitra waslet sabiex iddeċidiet li leġiżlazzjoni nazzjonali li tippermetti l-ħruġ ta’ permess ta’ residenza abbażi tad-Direttiva 2003/86 lil persuna li ma tissodisfax ir-rekwiżiti li hemm fiha tippreġudika l-effettività ta’ din id-direttiva u tmur kontra l-għanijiet tagħha ( 35 ).

29.

Permezz tal-promulgazzjoni tad-Direttiva 2003/86, li tapplika għall-Istati Membri kollha bl-eċċezzjoni tar-Renju tad-Danimarka u l-Irlanda, il-leġiżlatur tal-Unjoni ma kellux l-intenzjoni li jirregola l-kwistjonijiet kollha relatati mar-riunifikazzjoni tal-familja b’mod eżawrjenti ( 36 ), iżda minflok stabbilixxa sett ta’ regoli minimi komuni bbażati fuq il-prinċipji tas-sussidjarjetà u l-proporzjonalità ( 37 ). Id-Direttiva 2003/86 għalhekk tipprevedi armonizzazzjoni minima u ma teskludix id-dritt tal-Istati Membri li japplikaw dispożizzjonijiet tad-dritt nazzjonali dwar ir-riunifikazzjoni tal-familja f’każijiet li ma humiex irregolati minn din id-direttiva ( 38 ). Il-kundizzjonijiet fid-Direttiva 2003/86 huma għalhekk bla ħsara għall-Istati Membri, taħt l-Artikolu 3(5) ta’ din id-direttiva, li jagħtu drittijiet ta’ dħul u residenza taħt kundizzjonijiet iktar favorevoli fir-rigward tal-liġijiet nazzjonali rispettivi tagħhom ( 39 ). Meta Stat Membru jipprevedi tali kundizzjonijiet favorevoli, huwa d-dritt nazzjonali, u mhux id-Direttiva 2003/86 ( 40 ), li jirregola l-eżerċizzju tagħhom, u għalhekk dan jeskludi l-applikazzjoni tal-Karta ( 41 ).

30.

Waqt is-seduta, il-Gvern Awstrijak ikkonferma li għalkemm iqis li TY ma għandhiex dritt għar-riunifikazzjoni tal-familja ma’ RI skont l-Artikolu 10(3)(a) tad-Direttiva 2003/86, ir-Repubblika tal-Awstrija tagħti dritt għar-riunifikazzjoni tal-familja lil tali individwi taħt id-dritt nazzjonali skont l-Artikolu 8 tal-KEDB. Dan it-tqassim tal-kompetenzi bejn l-Unjoni Ewropea u l-Istati Membri huwa rifless kemm fit-termini ċari li bihom hija inkwadrata d-Direttiva 2003/86 kif ukoll fl-interpretazzjoni konsistenti tad-dispożizzjonijiet tagħha mill-Qorti tal-Ġustizzja.

31.

Ir-rikorrenti u l-Kummissjoni madankollu jsostnu li, sabiex tiġi ggarantita l-effettività tad-dritt ta’ refuġjat minuri mhux akkumpanjat għar-riunifikazzjoni tal-familja mal-ġenituri tiegħu jew tagħha taħt l-Artikolu 10(3)(a) tad-Direttiva 2003/86, din id-dispożizzjoni għandha tiġi interpretata sabiex tagħti dak id-dritt lill-aħwa b’diżabbiltà tiegħu jew tagħha. Dan il-għan għandu jintlaħaq permezz ta’ interpretazzjoni tal-Artikolu 10(3)(a) tad-Direttiva 2003/86 fid-dawl tal-Artikoli 7 u 24 tal-Karta sabiex jiġi ggarantit id-dritt ta’ RI għar-riunifikazzjoni tal-familja mal-ġenituri tiegħu u, b’estensjoni, ma’ oħtu ( 42 ).

32.

Meta jimplimentaw l-Artikolu 10(3)(a) tad-Direttiva 2003/86, l-Istati Membri għandhom jirrispettaw id-drittijiet fundamentali sanċiti fil-Karta, hawnhekk l-Artikoli 7 u 24 tagħha. L-eżistenza ta’ dan l-obbligu, madankollu, ma tistax tappoġġja interpretazzjoni tal-Artikolu 10(3)(a) tad-Direttiva 2003/86 jew kwalunkwe dispożizzjoni oħra ta’ din id-direttiva li tmur kontra t-termini espliċiti li huma espressi fiha. Interpretazzjoni contra legem ta’ dan it-tip, kemm jekk b’riferiment għad-dispożizzjonijiet tal-Karta jew għall-prinċipju ta’ effettività, hija eskluża wkoll peress li tikser il-prinċipju ta’ ċertezza legali ( 43 ). In-nuqqas ta’ riferiment għal xi membri oħra tal-familja fl-Artikolu 10(3)(a) tad-Direttiva 2003/86 lanqas ma jista’ jiġi attribwit għal nuqqas min-naħa tal-leġiżlatur tal-Unjoni peress li dan ippreveda speċifikament sitwazzjonijiet analogi għal dawk li jinqalgħu fil-każ preżenti kif evidenzjat b’mod ċar mill-Artikolu 4(2)(b) u mill-Artikolu 10(2) tagħha.

33.

L-Artikolu 10(2) tad-Direttiva 2003/86 jippermetti espliċitament lill-Istati Membri jagħtu d-dritt għar-riunifikazzjoni tal-familja lill-membri tal-familja ta’ refuġjat minbarra dawk li jirreferi għalihom l-Artikolu 4 tagħha meta dawn il-persuni jiddependu fuq ir-refuġjat ( 44 ). L-Artikolu 10(2) tad-Direttiva 2003/86 iħalli lil kull Stat Membru jiddeċiedi jekk jestendix il-kamp ta’ applikazzjoni tad-Direttiva 2003/86 jew le. Huwa jagħti wkoll libertà sinjifikanti lil kull Stat Membru sabiex jagħżel il-membri tal-familja ta’ refuġjat, minbarra dawk li jirreferi għalihom l-Artikolu 4 tad-Direttiva 2003/86, li jistgħu jibbenefikaw minn din l-estensjoni ( 45 ).

34.

Mill-fajl quddiem il-Qorti tal-Ġustizzja jirriżulta ċar li r-Repubblika tal-Awstrija għażlet li ma tużax il-possibbiltà mogħtija fl-Artikolu 10(2) tad-Direttiva 2003/86. Fi kwalunkwe każ, TY hija dipendenti mill-ġenituri tagħha u mhux minn ħuha RI ( 46 ). Il-Qorti tal-Ġustizzja ddeċidiet li leġiżlazzjoni nazzjonali li ma tosservax il-kundizzjoni ta’ dipendenza stabbilita fl-Artikolu 10(2) tad-Direttiva 2003/86 tmur kontra l-għanijiet ta’ din id-direttiva, sa fejn din tippermetti li jingħata l-istatus li jirriżulta minnha lil persuni li ma jissodisfawx il-kundizzjonijiet għall-kisba tiegħu ( 47 ).

35.

Il-Qorti tal-Ġustizzja ddeċidiet ukoll li l-Karta ma ċċaħħadx lill-Istati Membri mill-marġni ta’ diskrezzjoni li għandhom meta jiddeċiedu li jimplimentaw l-Artikolu 10(2) tad-Direttiva 2003/86 u jeżaminaw l-applikazzjonijiet għar-riunifikazzjoni tal-familja ppreżentati skont din id-dispożizzjoni ( 48 ). Minn dan isegwi li l-Qorti tal-Ġustizzja ma għandhiex il-fakultà li tbiddel jew testendi t-test u l-kamp ta’ applikazzjoni tal-Artikolu 10(2) tad-Direttiva 2003/86 billi tibbaża ruħha fuq l-Artikolu 7 jew l-Artikolu 24 tal-Karta ( 49 ).

36.

Għalhekk, il-parir tiegħi lill-Qorti tal-Ġustizzja huwa li, skont l-Artikoli 10(2) u 10(3)(a) tad-Direttiva 2003/86, moqri fid-dawl tal-Artikolu 7 u l-Artikolu 24 tal-Karta, RI ma għandu l-ebda dritt għar-riunifikazzjoni tal-familja ma’ oħtu TY. Estensjoni żbaljata tal-kamp ta’ applikazzjoni ta’ dawn id-dispożizzjonijiet tmur kontra l-ġurisprudenza reċenti tal-Qorti tal-Ġustizzja, tippreġudika l-effettività tad-Direttiva 2003/86 u tfixkel il-bilanċ leġiżlattiv imfassal bir-reqqa li waslu għalih l-Unjoni Ewropea u l-Istati Membri.

37.

Lanqas ma tista’ tiġi applikata, b’analoġija, il-ġurisprudenza tal-Qorti tal-Ġustizzja dwar l-Artikolu 20 TFUE u ċ-ċittadinanza tal-Unjoni, li rreferiet għalihom il-qorti tar-rinviju, sabiex tiġġustifika estensjoni tal-kamp ta’ applikazzjoni tad-Direttiva 2003/86 ( 50 ) Fis-sentenza tagħha Ruiz-Zambrano ( 51 ), il-Qorti tal-Ġustizzja ddeċidiet, inter alia, li l-Artikolu 20 TFUE jipprekludi Stat Membru milli jirrifjuta lil ċittadin ta’ pajjiż terz li huwa responsabbli għal uliedu minuri, ċittadini tal-Unjoni, id-dritt ta’ residenza fl-Istat Membru ta’ residenza ta’ dawn it-tfal li tiegħu għandhom iċ-ċittadinanza, sa fejn tali deċiżjoni ċċaħħad lil dawn it-tfal mit-tgawdija effettiva tal-essenzjal tad-drittijiet marbuta mal-istatus ta’ ċittadin tal-Unjoni. F’din id-deċiżjoni, il-Qorti tal-Ġustizzja enfasizzat li ċ-ċittadinanza tal-Unjoni Ewropea hija “l-istatus fundamentali taċ-ċittadini tal-Istati Membri” ( 52 ). L-istatus ta’ ċittadini ta’ pajjiżi terzi, inklużi refuġjati, ma jistax jitqabbel ma’ dak taċ-ċittadini tal-Unjoni ħlief fejn il-leġiżlazzjoni tal-Unjoni speċifikament tagħtihom obbligi komparabbli ma’ dawk taċ-ċittadini tal-Unjoni Ewropea ( 53 ).

C.   Id‑dritt ta’ tfal adulti mhux miżżewġa għal riunifikazzjoni tal‑familja meta huma inkapaċi li jipprovdu għall‑ħtiġijiet tagħhom stess minħabba l‑istat ta’ saħħithom – Artikolu 4(2)(b) tad‑Direttiva 2003/86

38.

L-Artikolu 4(2)(b) tad-Direttiva 2003/86 jipprovdi li l-Istati Membri jistgħu jawtorizzaw id-dħul u r-residenza tat-tfal adulti mhux miżżewġa tal-isponsor jew tal-konjuġi tiegħu jew tagħha, suġġett għar-rekwiżit li t-tfal inkwistjoni jkunu oġġettivament inkapaċi li jipprovdu għall-ħtiġijiet tagħhom stess minħabba l-istat ta’ saħħithom. F’dan il-kuntest, il-kundizzjonijiet stabbiliti fil-Kapitolu IV tad-Direttiva 2003/86 għandhom jiġu ssodisfatti.

39.

Jekk ninjoraw il-fatt li ma huwiex ċar jekk ir-Repubblika tal-Awstrija għażlitx li tagħmel użu mill-possibbiltà mogħtija fl-Artikolu 4(2)(b) tad-Direttiva 2003/86 ( 54 ), din id-dispożizzjoni tirreferi għall-familja nukleari tal-isponsor iktar milli għal ħutu jew ħutha. TY għalhekk ma tistax tibbaża ruħha fuq it-termini tiegħu sabiex issostni dritt għar-riunifikazzjoni tal-familja ma’ RI. Kif jindikaw il-punti 36 u 37 ta’ dawn il-konklużjonijiet, skont il-ġurisprudenza tal-Qorti tal-Ġustizzja, huwa kontra l-għanijiet tad-Direttiva 2003/86 li l-protezzjoni li jagħti l-Artikolu 4(2)(b) tagħha tiġi estiża lil persuni oħra. Il-Karta lanqas ma tista’ topera b’tali mod li tillimita l-għażla tal-Istati Membri dwar jekk jimplimentawx tali fakultà ( 55 ).

40.

Għalkemm RI u oħtu, TY, ma għandhomx dritt għar-riunifikazzjoni tal-familja skont l-Artikolu 4(2)(b) tad-Direttiva 2003/86, il-ġenituri tiegħu, CR u GF, huma intitolati għar-riunifikazzjoni tal-familja ma’ RI skont l-Artikolu 10(3)(a) tagħha. Ladarba l-applikazzjoni tagħhom għar-riunifikazzjoni tal-familja tkun ġiet aċċettata, CR u GF għandhom ukoll id-dritt li jiksbu permess ta’ residenza fir-Repubblika tal-Awstrija skont l-Artikolu 13(2) tad-Direttiva 2003/86. Fis-sentenza O et ( 56 ), il-Qorti tal-Ġustizzja osservat li ċittadini ta’ pajjiżi terzi residenti legalment fi Stat Membru li jfittxu li jibbenefikaw mir-riunifikazzjoni tal-familja għandhom jiġu rikonoxxuti bħala “sponsors” fis-sens tal-Artikolu 2(c) tad-Direttiva 2003/86. CR u GF huma intitolati għar-riunifikazzjoni tal-familja ma’ TY skont l-Artikolu 4(2)(b) tad-Direttiva 2003/86, sakemm ir-Repubblika tal-Awstrija tagħmel użu minn din il-possibbiltà. Ladarba l-Istati Membri jeżerċitaw dik il-possibbiltà huma jimplimentaw id-dritt tal-Unjoni. Il-leġiżlazzjoni nazzjonali għal dan il-għan għandha għalhekk tkun konformi mad-drittijiet fundamentali sanċita fil-Karta u mal-prinċipju ta’ proporzjonalità ( 57 ).

41.

CR, GF u TY applikaw flimkien għar-riunifikazzjoni tal-familja ma’ RI. Fid-dawl tan-natura tar-relazzjoni familjari tagħhom u d-diżabbiltà severa ta’ TY, l-applikazzjonijiet tagħhom għandhom jiġu eżaminati simultanjament ( 58 ) sabiex jiġu aċċertati d-drittijiet u l-obbligi kollha tagħhom skont id-dritt tal-Unjoni, inkluż l-Artikolu 4(2)(b), l-Artikolu 10(3)(a) u l-Artikolu 13 tad-Direttiva 2003/86, moqrija fid-dawl tal-Artikolu 7 u l-Artikolu 24(2) u (3) tal-Karta ( 59 ). F’dan ir-rigward, hija ġurisprudenza stabbilita li l-Artikolu 17 tad-Direttiva 2003/86 jirrikjedi li l-applikazzjonijiet għar-riunifikazzjoni tal-familja għandhom jiġu eżaminati b’mod individwali. L-awtoritajiet nazzjonali kompetenti, meta jimplimentaw id-Direttiva 2003/86 u jeżaminaw tali applikazzjonijiet, għandhom jagħmlu evalwazzjoni bbilanċjata u raġonevoli tal-interessi kollha involuti ( 60 ). Għandhom jittieħdu inkunsiderazzjoni wkoll l-aħjar interessi tat-tfal minuri u ċ-ċirkustanzi speċjali ta’ refuġjati minuri mhux akkumpanjati ( 61 ).

42.

Għaldaqstant, huwa kontra l-għanijiet tad-Direttiva 2003/86 u tal-Artikolu 7 u tal-Artikolu 24(2) u (3) tal-Karta li applikanti bħal CR u/jew GF ( 62 ) ikunu obbligati li jkollhom permess ta’ residenza skont l-Artikolu 13(2) tagħha qabel tiġi eżaminata l-applikazzjoni ta’ TY għar-riunifikazzjoni tal-familja mal-ġenituri tagħha skont l-Artikolu 4(2)(b) tagħha. Tali approċċ frammentat, barra minn hekk, jippreġudika d-dritt ta’ RI għar-riunifikazzjoni tal-familja taħt l-Artikolu 10(3)(a) tad-Direttiva 2003/86.

43.

Ir-Repubblika tal-Awstrija tista’ tirrikjedi li r-riunifikazzjoni tal-familja skont l-Artikolu 4(2)(b) tad-Direttiva 2003/86 tkun suġġetta għal konformità mar-rekwiżiti stabbiliti fl-Artikolu 7(1) tagħha. Dawn ir-rekwiżiti japplikaw fir-rigward ta’ TY biss, peress li CR u GF huma eżentati minnha bis-saħħa tal-Artikolu 10(3)(a) tad-Direttiva 2003/86 ( 63 ). Il-Qorti tal-Ġustizzja ddeċidiet li peress li l-awtorizzazzjoni tar-riunifikazzjoni tal-familja hija r-regola ġenerali, il-fakultà mogħtija mill-Artikolu 7(1) tad-Direttiva 2003/86 għandha tiġi interpretata b’mod strett. L-Istati Membri ma għandhomx jużaw il-marġni ta’ diskrezzjoni tagħhom sabiex jimminaw l-għan li tiġi promossa r-riunifikazzjoni tal-familja ( 64 ). Hija l-qorti tar-rinviju li għandha tivverifika jekk l-awtoritajiet kompetenti osservawx jew humiex se josservaw ir-rekwiżiti tal-Artikolu 7(1) tad-Direttiva 2003/86 u tal-ġurisprudenza dwarha.

VI. Konklużjoni

44.

Fid-dawl tal-kunsiderazzjonijiet preċedenti, nipproponi li l-Qorti tal-Ġustizzja tirrispondi għat-tielet domanda magħmula mill-Verwaltungsgericht Wien (il-Qorti Amministrattiva, Vjenna, l-Awstrija) kif ġej:

L-Artikolu 4(2)(b), l-Artikolu 10(3)(a), l-Artikolu 13(2) u l-Artikolu 17 tad-Direttiva tal-Kunsill 2003/86/KE tat‑22 ta’ Settembru 2003 dwar id-dritt għal riunifikazzjoni tal-familja u l-Artikolu 7 u l-Artikolu 24(2) u (3) tal-Karta tad-Drittijiet Fundamentali tal-Unjoni Ewropea għandhom jiġu interpretati bħala li jfissru li aħwa adulti b’diżabbiltà ta’ refuġjat minuri mhux akkumpanjat li, minħabba l-istat ta’ saħħithom jiddependu kompletament mill-ġenituri tagħhom, huma intitolati għal riunifikazzjoni tal-familja mal-ġenituri tagħhom u ma’ ħuthom minuri skont id-dritt tal-Unjoni, sakemm l-Istat Membru inkwistjoni ma jkunx eżerċita l-possibbiltà stipulata fl-Artikolu 4(2)(b) tad-Direttiva 2003/86.

( 1 ) Lingwa oriġinali: l-Ingliż.

( 2 ) Kif definit permezz tal-Artikolu 2(b) u l-Artikolu 2(f) tad-Direttiva tal-Kunsill 2003/86/KE tat‑22 ta’ Settembru 2003 dwar id-dritt għal riunifikazzjoni tal-familja (ĠU Edizzjoni Speċjali bil-Malti, Kapitolu 19, Vol. 6, p. 224).

( 3 ) BGBl. I, Nru 100/2005. Il-verżjoni tal‑14 ta’ Awwissu 2018 tapplika għall-kawża preżenti: BGB1. I, Nru 56/2018.

( 4 ) BGB1. I Nru I 100/2005. Il-verżjoni tat‑18 ta’ Ottubru 2017 tapplika għall-kawża preżenti. BGB1. I, Nru I 145/2017.

( 5 ) Hija twieldet fil‑15 ta’ Awwissu 1988. CR, GF u TY huma ċittadini Sirjani.

( 6 ) Skont l-Artikolu 35 tal-AsylG 2005.

( 7 ) Id-deċiżjoni ta’ ċaħda ta’ dawk l-applikazzjonijiet ġiet innotifikata fid‑29 ta’ Mejju 2018.

( 8 ) Ara l-Artikolu 7(1)(a) tad-Direttiva 2003/86.

( 9 ) Ara l-Artikolu 7(1)(b) tad-Direttiva 2003/86.

( 10 ) Ara l-Artikolu 7(1)(c) tad-Direttiva 2003/86.

( 11 ) Sentenza tat‑8 ta’ Marzu 2011, Ruiz Zambrano (C‑34/09, EU:C:2011:124).

( 12 ) Sentenza tal‑15 ta’ Novembru 2011, Dereci et (C‑256/11, EU:C:2011:734).

( 13 ) Sentenzi tal‑1 ta’ Awwissu 2022, Bundesrepublik Deutschland (Riunifikazzjoni tal-familja ta’ wild li sar maġġorenni) (C‑279/20, EU:C:2022:618) u tal-1 ta’ Awwissu 2022, Bundesrepublik Deutschland (Riunifikazzjoni tal-familja ma’ refuġjat minuri), (C‑273/20 u C‑355/20, EU:C:2022:617).

( 14 ) Peress li t-tielet u s-sitt domanda jikkoinċidu parzjalment, ser nindirizza s-sitt domanda tal-qorti tar-rinviju sal-punt meħtieġ sabiex ngħin lill-Qorti tal-Ġustizzja fid-deliberazzjonijiet tagħha.

( 15 ) It-tielet domanda hija bbażata fuq il-premessa li l-ġenituri ċittadini ta’ pajjiż terz (CR u GF) ta’ refuġjat (RI) li applika għal ażil u ngħata dan bħala minuri mhux akkumpanjat qabel sar maġġorenni jista’ juża l-Artikolu 2(f) tad-Direttiva 2003/86, moqri flimkien mal-Artikolu 10(3)(a) tagħha, anki jekk dak ir-refuġjat sar maġġorenni wara li ngħata l-ażil iżda matul il-proċedura ta’ riunifikazzjoni tal-familja.

( 16 ) L-Artikolu 13(2) tad-Direttiva 2003/86 jipprovdi li hekk kif applikazzjoni għal riunifikazzjoni tal-familja tiġi aċċettata: “l-Istati Membri kkonċernati għandhom jagħtu lill-membri tal-familja l-ewwel permess ta’ residenza għal tul ta’ mill-inqas sena. Il-permess ta’ residenza għandu jiġġedded.” L-Artikolu 13(1) tad-Direttiva 2003/86 jipprovdi wkoll li hekk kif jaċċettaw applikazzjoni għal riunifikazzjoni tal-familja “l-Istati Membri kkonċernati għandhom jawtorizzaw id-dħul tal-membru jew membri tal-familja”.

( 17 ) Li jirreferu għalih il-premessa 4 u l-Artikolu 1 tad-Direttiva 2003/86.

( 18 ) Sentenza tal‑1 ta’ Awwissu 2022, Bundesrepublik Deutschland (Riunifikazzjoni tal-familja ma’ refuġjat minuri) (C‑273/20 u C‑355/20, EU:C:2022:617, punti 35 u 39).

( 19 ) Ara l-premessa 2 tad-Direttiva 2003/86.

( 20 ) Sa fejn l-Artikolu 7 tal-Karta fih drittijiet li jikkorrispondu għal dawk id-drittijiet iggarantiti mill-Artikolu 8(1) KEDB, it-tifsira u l-kamp ta’ applikazzjoni tagħhom huma l-istess (sentenza tal‑15 ta’ Novembru 2011, Dereci et (C‑256/11, EU:C:2011:734, punt 70 u l-ġurisprudenza ċċitata).

( 21 ) Sentenza tat‑13 ta’ Marzu 2019, E. (C‑635/17, EU:C:2019:192, punti 55 u 56 u l-ġurisprudenza ċċitata).

( 22 ) Sentenza tat‑12 ta’ Diċembru 2019, Bevándorlási és Menekültügyi Hivatal (Riunifikazzjoni tal-familja – Oħt rifuġjat) (C‑519/18, EU:C:2019:1070, punt 35). L-Artikolu 4 tad-Direttiva 2003/86 ma huwiex eżawrjenti. Ara, pereżempju, l-Artikolu 10(2) tad-Direttiva 2003/86.

( 23 ) Ara l-premessa 9 tad-Direttiva 2003/86. Fis-sentenza tas‑6 ta’ Diċembru 2012, O et (C‑356/11 u C‑357/11, EU:C:2012:776, punti 64 u 65), il-Qorti tal-Ġustizzja ddeċidiet li l-Artikolu 4(1) tad-Direttiva 2003/86 jaderixxi għal kunċett wiesa’ ta’ “familja nukleari”. Hija ġurisprudenza stabbilita li l-Artikolu 4(1) tad-Direttiva 2003/86 jimponi obbligi pożittivi speċifiċi fuq l-Istati Membri, bi drittijiet individwali korrispondenti definiti b’mod ċar, peress li jobbligahom, fil-każijiet irregolati minn din id-direttiva, jawtorizzaw ir-riunifikazzjoni tal-familja ta’ ċerti membri tal-familja tal-isponsor mingħajr ma jkollhom ebda marġni ta’ diskrezzjoni f’dan ir-rigward (sentenza tal‑20 ta’ Novembru 2019, Belgische Staat (Sistema ta’ deċiżjoni ta’ aċċettazzjoni impliċita) (C‑706/18, EU:C:2019:993, punt 29 u l-ġurisprudenza ċċitata).

( 24 ) Sentenza tat‑12 ta’ April 2018, A u S (C‑550/16, EU:C:2018:248, punt 34).

( 25 ) Ara l-Kapitolu V tad-Direttiva 2003/86 intitolat “Riunifikazzjoni tal-familja ta’ refuġjati”. Il-premessa 8 tad-Direttiva 2003/86 tipprovdi “[a]ttenzjoni speċjali għandha tingħata lis-sitwazzjoni ta’ refuġjati minħabba r-raġunijiet li jobbligawhom jaħarbu pajjiżhom u jimpeduhom milli jgħixu ħajja tal-familja normali hemm. Kondizzjonijiet iktar favorevoli għandhom għalhekk ikunu preskritti għall-eżerċizzju tad-dritt tagħhom għar-riunifikazzjoni tal-familja.”

( 26 ) Sentenza tat‑12 ta’ April 2018, A u S (C‑550/16, EU:C:2018:248, punt 44).

( 27 ) L-Artikolu 10(3)(a) tad-Direttiva 2003/86 jirreferi għal qraba tal-ewwel grad fil-linja diretta axxendenti.

( 28 ) L-Artikolu 10(3)(b) tad-Direttiva 2003/86.

( 29 ) Dik id-dispożizzjoni tuża t-terminu “għandu”. Id-dritt għar-riunifikazzjoni tal-familja ta’ refuġjati minuri mhux akkumpanjati mal-ġenituri tagħhom skont l-Artikolu 10(3)(a) tad-Direttiva 2003/86 għalhekk ma huwiex suġġett għal marġni ta’ diskrezzjoni min-naħa tal-Istati Membri (sentenza tat‑12 ta’ April 2018, A u S, C‑550/16, EU:C:2018:248, punt 43).

( 30 ) Il-Gvern Awstrijak jikkunsidra li l-kundizzjonijiet fl-Artikolu 7(1) tad-Direttiva 2003/86 japplikaw għar-riunifikazzjoni tal-familja skont l-Artikolu 10(3)(a) tagħha. Huwa jenfasizza li l-ewwel subparagrafu tal-Artikolu 12(1) tad-Direttiva 2003/86 speċifikament jirreferi u jeskludi l-applikazzjoni tar-rekwiżiti stabbiliti fl-Artikolu 7(1) tagħha. Skont dan il-gvern, l-Artikolu 10(3)(a) tad-Direttiva 2003/86 ma jirreferix espliċitament, u għalhekk jeskludi, l-applikazzjoni tal-Artikolu 7(1) tagħha.

( 31 ) Sentenza tat‑12 ta’ April 2018, A u S (C‑550/16, EU:C:2018:248, punt 34).

( 32 ) Permezz tal-Artikolu 12(1) tad-Direttiva 2003/86, l-Istati Membri ma għandhomx jirrikjedu li r-refuġjat u/jew il-membru/membri tal-familja nukleari tiegħu jew tagħha jissodisfaw ir-rekwiżiti stabbiliti fl-Artikolu 7 tagħha. L-Artikolu 10(3)(a) tad-Direttiva 2003/86 għalhekk jipprovdi protezzjoni iktar estensiva lir-refuġjati minuri mhux akkumpanjati milli l-ewwel subparagrafu tal-Artikolu 12(1) tad-Direttiva 2003/86, li l-applikazzjoni tiegħu hija limitata għar-refuġjati u l-membri. tal-familja nukleari tagħhom.

( 33 ) Sentenza tat‑12 ta’ Diċembru 2019, Bevándorlási és Menekültügyi Hivatal (Riunifikazzjoni tal-familja – Oħt refuġjat) (C‑519/18, EU:C:2019:1070, punt 69).

( 34 ) Din id-dispożizzjoni hija marbuta b’mod inseparabbli mal-kunċett ta’ “familja nukleari” kif previst mid-Direttiva 2003/86.

( 35 ) Sentenza tal‑20 ta’ Novembru 2019, Belgische Staat (Sistema ta’ deċiżjoni ta’ aċċettazzjoni impliċita) (C‑706/18, EU:C:2019:993, punti 35 u 37 u l-ġurisprudenza ċċitata).

( 36 ) Ara l-Artikolu 3(5) tad-Direttiva 2003/86.

( 37 ) Ara l-premessa 16 tad-Direttiva 2003/86.

( 38 ) Għal dan il-għan, ara l-konklużjonijiet tal-Avukat Ġenerali Pikamäe f’Commissaire général aux réfugiés et aux apatrides (Unità tal-familja – Protezzjoni diġà mogħtija) (C‑483/20, EU:C:2021:780, punt 53) u tal-Avukat Ġenerali Hogan fil-Konklużjonijiet 1/19 (Il-Konvenzjoni ta’ Istanbul) (EU:C:2021:198, nota ta’ qiegħ il-paġna 81).

( 39 ) Sentenza tat‑12 ta’ Diċembru 2019, Bevándorlási és Menekültügyi Hivatal (Riunifikazzjoni tal-familja – Oħt refuġjat) (C‑519/18, EU:C:2019:1070, punt 43). Ara, b’analoġija, is-sentenza tat‑13 ta’ Marzu 2019, E. (C‑635/17, EU:C:2019:192, punti 32 sa 43), li tinterpreta l-Artikolu 3(2)(c) tad-Direttiva 2003/86 hekk sabiex teskludi mill-kamp ta’ applikazzjoni tagħha membri tal-familja ta’ pajjiż terz ta’ benefiċjarju ta’ protezzjoni sussidjarja. Filwaqt li dawk il-membri tal-familja ma jaqgħux fil-qasam ta’ applikazzjoni tad-dritt tal-Unjoni, Stat Membru jista’ jagħtihom trattament iktar favorevoli skont id-dritt nazzjonali (sentenza tas‑7 ta’ Novembru 2018, K u B (C‑380/17, EU:C:2018:877, punti 34 u 37).

( 40 ) Ara, b’analoġija, is-sentenza tad‑19 ta’ Novembru 2019, TSN u AKT (C‑609/17 u C‑610/17, EU:C:2019:981, punti 34 u 49). Ara, ukoll b’analoġija, is-sentenza tal‑15 ta’ Lulju 2021, The Department for Communities in Northern Ireland (Id-Dipartiment għall-Komunitajiet fl-Irlanda ta’ Fuq) (C‑709/20, EU:C:2021:602, punti 82 u 83) fir-rigward tad-Direttiva 2004/38/KE tal-Parlament Ewropew u tal-Kunsill tad‑29 ta’ April 2004 dwar id-drittijiet taċ-ċittadini tal-Unjoni u tal-membri tal-familja tagħhom biex jiċċaqilqu u jgħixu liberament fit-territorju tal-Istati Membri u li temenda r-Regolament (KEE) Nru 1612/68 u li tħassar id-Direttivi 64/221/KEE, 68/360/KEE, 72/194/KEE, 73/148/KEE, 75/34/KEE, 75/35/KEE, 90/364/KEE, 90/365/KEE u 93/96/KEE (ĠU Edizzjoni Speċjali bil-Malti, Kapitolu 5, Vol. 5, p. 46).

( 41 ) Ara, b’analoġija, is-sentenza tal‑10 ta’ Ġunju 2021, Land Oberösterreich (Għajnuna għall-akkomodazzjoni) (C‑94/20, EU:C:2021:477, punti 60 sa 63).

( 42 ) Ara wkoll il-premessa 2 tad-Direttiva 2003/86.

( 43 ) B’analoġija mal-interpretazzjoni contra legem tad-dritt nazzjonali ara s-sentenza tad‑19 ta’ April 2016, DI (C‑441/14, EU:C:2016:278, punt 32 u l-ġurisprudenza ċċitata). Il-prinċipji deskritti mill-ġurisprudenza japplikaw għall-interpretazzjoni tad-dritt tal-Unjoni u nazzjonali. Ara, ukoll b’analoġija, Lenaerts, K., u Gutiérrez-Fons, J. To Say What the Law of the EU Is: Methods of Interpretation and the European Court of Justice, EUI AEL 2013/09, paġna 16 fejn l-awturi jsostnu li “where a provision of EU law is open to several interpretations, preference must be given to that interpretation which ensures that the provision retains its effectiveness … It goes without saying that that general principle of interpretation must not trespass on the limit of ‘contra legem’” (“meta dispożizzjoni tad-dritt tal-Unjoni tkun miftuħa għal diversi interpretazzjonijiet, għandha tingħata preferenza lil dik l-interpretazzjoni li tiżgura li d-dispożizzjoni żżomm l-effettività tagħha […] Huwa ovvju li dan il-prinċipju ġenerali ta’ interpretazzjoni ma għandux imur kontra l-limitu ta’ ‘contra legem’”) [traduzzjoni libera].

( 44 ) Ara, b’analoġija, is-sentenza tat‑13 ta’ Marzu 2019, E. (C‑635/17, EU:C:2019:192, punt 48).

( 45 ) Sentenza tat‑12 ta’ Diċembru 2019, Bevándorlási és Menekültügyi Hivatal (Riunifikazzjoni tal-familja – Oħt refuġjat) (C‑519/18, EU:C:2019:1070, punti 39 u 40). Il-premessa 10 tad-Direttiva 2003/86 tiddikjara li “huwa għall-Istati Membri li jiddeċiedu jekk jixtiequx jawtorizzaw riunifikazzjoni tal-familja għal qraba f’linja diretta axxendenti, tfal adulti mhux miżżewġa […]”

( 46 ) Filwaqt li r-rikorrenti ddikjaraw waqt is-seduta li RI jibgħat madwar EUR 100 fix-xahar lill-familja tiegħu fis-Sirja, ma hemm ebda prova li TY hija dipendenti fuq RI.

( 47 ) Sentenza tat‑12 ta’ Diċembru 2019, Bevándorlási és Menekültügyi Hivatal (Riunifikazzjoni tal-familja – Oħt refuġjat) (C‑519/18, EU:C:2019:1070, punt 42). Il-premessa 6 tad-Direttiva 2003/86 tiddikjara li “il-kondizzjonijiet materjali biex ikun eżerċitat id-dritt għar-riunifikazzjoni tal-familja għandhom ikunu ddeterminati fuq il-bażi ta’ kriterji komuni”. Ara wkoll, b’analoġija, is-sentenza tas‑7 ta’ Novembru 2018, K u B (C‑380/17, EU:C:2018:877, punti 48 u 49), fejn il-Qorti ddikjarat li t-tielet subparagrafu tal-Artikolu 12(1) tad-Direttiva 2003/86 jitneħħewlu l-effikaċja u ċ-ċarezza tiegħu jekk Stat Membru ma jitħalliex jimponi terminu għall-preżentata ta’ applikazzjoni għal riunifikazzjoni tal-familja skont dan.

( 48 ) Sentenza tat‑12 ta’ Diċembru 2019, Bevándorlási és Menekültügyi Hivatal (Riunifikazzjoni tal-familja – Oħt refuġjat) (C‑519/18, EU:C:2019:1070, punt 65).

( 49 ) L-Artikolu 51(1) tal-Karta jipprovdi li d-dispożizzjonijiet tagħha huma indirizzati lill-Istati Membri biss meta jkunu qegħdin jimplimentaw id-dritt tal-Unjoni. Skont l-Artikolu 51(2) tagħha, il-Karta ma testendix il-kamp ta’ applikazzjoni tad-dritt tal-Unjoni lil hinn mill-kompetenzi tal-Unjoni Ewropea jew ma tistabbilixxi ebda setgħa jew kompitu ġdid għall-Unjoni Ewropea, u ma timmodifikax il-kompetenzi u l-kompiti definiti fit-Trattati. Ara, f’dan is-sens, is-sentenza tal‑15 ta’ Lulju 2021, The Department for Communities in Northern Ireland (Id-Dipartiment għall-Komunitajiet fl-Irlanda ta’ Fuq) (C‑709/20, EU:C:2021:602, punt 85).

( 50 ) Sentenzi tat‑8 ta’ Marzu 2011, Ruiz Zambrano (C‑34/09, EU:C:2011:124); tal‑15 ta’ Novembru 2011, Dereci et (C‑256/11, EU:C:2011:734) u s-sentenza tal‑10 ta’ Mejju 2017, Chavez-Vilchez et (C‑133/15, EU:C:2017:354). Ara wkoll is-sentenza tal‑15 ta’ Lulju 2021, The Department for Communities in Northern Ireland (Id-Dipartiment għall-Komunitajiet fl-Irlanda ta’Fuq) (C‑709/20, EU:C:2021:602).

( 51 ) Sentenza tat-8 ta’ Marzu 2011 (C‑34/09, EU:C:2011:124).

( 52 ) Sentenza tat‑8 ta’ Marzu 2011, Ruiz Zambrano (C‑34/09, EU:C:2011:124, punt 41 u l-ġurisprudenza ċċitata).

( 53 ) Ara, pereżempju, il-premessa 3 u l-Artikolu 13 tad-Direttiva 2003/86. Ara, ukoll b’analoġija, id-Direttiva tal-Kunsill 2003/109/KE tal‑25 ta’ Novembru 2003 dwar l-istatus ta’ ċittadini ta’ pajjiżi terzi li jkunu residenti għat-tul (ĠU 2004 L 16, p. 44). Il-limitazzjonijiet għall-estensjoni tal-kamp ta’ applikazzjoni tad-Direttiva 2003/86 ikkonfermati mill-ġurisprudenza msemmija fil-punti 36 u 37 ta’ dawn il-konklużjonijiet japplikaw mutatis mutandis għar-riunifikazzjoni tal-familja skont l-Artikolu 10(3)(a) tad-Direttiva 2003/86.

( 54 ) Il-Gvern Olandiż indika waqt is-seduta, mingħajr ma ġie kontradett mill-Gvern Awstrijak, li r-Repubblika tal-Awstrija kienet eżerċitat il-possibbiltà taħt l-Artikolu 4(2)(b) tad-Direttiva 2003/86.

( 55 ) Ara, b’analoġija, is-sentenza tat‑12 ta’ Diċembru 2019, Bevándorlási és Menekültügyi Hivatal (Riunifikazzjoni tal-familja – Oħt refuġjat) (C‑519/18, EU:C:2019:1070, punti 42 u 65).

( 56 ) Sentenza tas‑6 ta’ Diċembru 2012, O et (C‑356/11 u C‑357/11, EU:C:2012:776, punt 68).

( 57 ) Ara, b’analoġija, is-sentenza tat‑12 ta’ Diċembru 2019, Bevándorlási és Menekültügyi Hivatal (Riunifikazzjoni tal-familja – Oħt refuġjat) (C‑519/18, EU:C:2019:1070, punti 61 sa 67).

( 58 ) Il-Gvern Awstrijak ikkonferma waqt is-seduta li l-applikazzjonijiet inkwistjoni kollha kienu qegħdin jiġu eżaminati simultanjament.

( 59 ) Ara, b’analoġija, l-Artikolu 16(1) tar-Regolament (UE) Nru 604/2013 tal-Parlament Ewropew u tal-Kunsill tas‑26 ta’ Ġunju 2013 li jistabbilixxi l-kriterji u l-mekkaniżmi biex ikun iddeterminat liema hu l-Istat Membru responsabbli biex jeżamina applikazzjoni għall-protezzjoni internazzjonali iddepożitata għand wieħed mill-Istati Membri minn ċittadin ta’ pajjiż terz jew persuna apolida (tfassil mill-ġdid) (ĠU 2013 L 180, p. 31). L-Artikolu 16(1) tar-Regolament Nru 604/2013 jipprovdi, inter alia, li fejn persuna b’diżabbiltà severa tkun tiddependi fuq l-assistenza tal-ġenitur(i) tagħha legalment residenti fi Stat Membru, dan l-Istat Membru għandu normalment iħalli jew iġib flimkien l-applikant ma’ dak il-ġenitur. Skont il-premessa 17 ta’ dan ir-regolament, dik id-dispożizzjoni għandha l-għan li tippermetti lill-Istati Membri jġibu flimkien “membri tal-familja” meta dan ikun meħtieġ fuq bażijiet umanitarji. Ara, ukoll b’analoġija, is-sentenza tas‑6 ta’ Novembru 2012, K (C‑245/11, EU:C:2012:685, punti 26 sa 54).

( 60 ) Sentenza tal‑21 ta’ April 2016, Khachab (C‑558/14, EU:C:2016:285, punt 43 u l-ġurisprudenza ċċitata).

( 61 ) Ara, b’analoġija, is-sentenza tas‑7 ta’ Novembru 2018, K u B (C‑380/17, EU:C:2018:877, punti 26 sa 36).

( 62 ) CR u GF għandhom dritt għar-riunifikazzjoni tal-familja ma’ RI skont l-Artikolu 10(3)(a) tad-Direttiva 2003/86 u għalhekk huma intitolati għal permess ta’ residenza skont l-Artikolu 13(2) tagħha.

( 63 ) Ara l-punt 26 ta’ dawn il-konklużjonijiet.

( 64 ) Sentenza tal‑4 ta’ Marzu 2010, Chakroun (C‑578/08, EU:C:2010:117, punt 43).

Top