—

tannulla l-Artikoli 5 u 6 tad-Deċiżjoni tal-Kummissjoni Ewropea (UE) 2018/628 tal-11 ta’ Novembru 2016 dwar l-Għajnuna mill-Istat SA.24221(2011/C) (ex 2011/NN) implimentata mill-Awstrija għall-ajruport ta’ Klagenfurt, għal Ryanair u linji tal-ajru oħrajn li jużaw l-ajruport (ĠU 2018, L 107, p. 1), u l-Artikoli 9, 10 u 11 tal-imsemmija deċiżjoni sa fejn jikkonċernaw lir-rikorrenti;

—

tikkundanna lill-konvenuta għall-ispejjeż.

1.

L-ewwel motiv ibbażat fuq il-fatt li d-Deċiżjoni kkontestata tikser id-dispożizzjonijiet dwar il-preskrizzjoni tal-Artikolu 15 tar-Regolament tal-Kunsill (KE) Nru 659/1999 li jistabbilixxi regoli dettaljati għall-applikazzjoni ta’ l-Artikolu 93 tat-Trattat tal-KE (1) u tal-Artikolu 17 tar-Regolament tal-Kunsill (UE) 2015/1589 li jistabblixxi regoli dettaljati għall-applikazzjoni tal-Artikolu 108 tat-Trattat dwar il-Funzjonament tal-Unjoni Ewropea (2) u tonqos milli tagħti raġunijiet għalfejn il-perijodu ta’ limitazzjoni ta’ għaxar snin kien japplika għal żewġ ftehimiet mill-2002 li madankollu kienu indirizzati fid-Deċiżjoni.

2.

It-tieni motiv ibbażat fuq il-fatt li d-Deċiżjoni kkontestata tikser l-Artikolu 41 tal-Karta tad-Drittijiet Fundamentali tal-Unjoni Ewropea, il-prinċipju ta’ amministrazzjoni tajba u d-drittijiet ta’ difiża tar-rikorrenti, peress li l-Kummissjoni naqset milli tippermetti lir-rikorrenti l-aċċess għall-fajl tal-investigazzjoni u li tqiegħdhom f’pożizzjoni fejn setgħu effettivament jgħarrfu l-fehmiet tagħhom.

3.

It-tielet motiv ibbażat fuq il-fatt li d-Deċiżjoni kkontestata tikser l-Artikolu 107(1) TFUE peress li l-Kummissjoni b’mod żbaljat attribwiet il-konklużjoni tal-ftehim mal-applikanti lill-Istat.

4.

Ir-raba’ motiv ibbażat fuq il-fatt li d-Deċiżjoni kkontestata tikser l-Artikolu 107(1) TFUE, peress li l-Kummissjoni naqset milli tistabbilixxi selettività.

5.

Il-ħames motiv ibbażat fuq ksur tal-Artikolu 107(1) TFUE peress li l-Kummissjoni kkonkludiet b’mod żbaljat li l-arranġamenti bejn l-ajruport u r-rikorrenti taw vantaġġ lir-rikorrenti. Il-Kummissjoni ċaħdet b’mod żbaljat il-possibbiltà li parti mis-servizzi ta’ kummerċjalizzazzjoni setgħu inxtraw għal skopijiet ta’ interess ġenerali, irrifjutat b’mod żbaljat li taċċetta l-analiżi komparattiva proposta mir-rikorrenti, wettqet żbalji manifesti ta’ evalwazzjoni u naqset milli tiddikjara r-raġunijiet tagħha fl-analiżi tal-profittabbiltà, peress li bbażat il-konklużjonijiet tagħha fuq data mhux kompluta, mhux affidabbli u mhux xierqa; hija naqset ukoll milli tattribwixxi valur xieraq għas-servizzi pprovduti taħt il-ftehimiet tas-servizzi tal-kummerċjalizzazzjoni, ċaħdet b’mod żbaljat ir-raġuni wara d-deċiżjoni tal-ajruport li tixtri servizzi ta’ kummerċjalizzazzjoni u b’mod żbaljat ma kkunsidratx il-benefiċċji usa tal-operazzjonijiet ta’ Ryanair għall-ajruport.

6.

Is-sitt motiv ibbażat, sussidjarjament, fuq ksur tal-Artikoli 107(1) u 108(2) TFUE peress li l-Kummissjoni wettqet żball manifest ta’ evalwazzjoni u żball ta’ liġi meta stabbilixxiet l-ammont tal-għajnuna li tista’ tiġi rkuprata, fl-istruzzjonijiet tagħha lill-Istat Membru li jimplikaw li l-aġġustament tal-ammont tal-għajnuna li tista’ tiġi rkuprata huwa fakultattiv, u minħabba f’kontradizzjoni bejn ir-raġunijiet tad-Deċiżjoni kkontestata u d-dispożittiv tagħha.