Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 62017TN0722

    Kawża T-722/17: Rikors ippreżentat fis-17 ta’ Ottubru 2017 – WO Technopromexport vs Il-Kunsill

    ĠU C 424, 11.12.2017, p. 57–58 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

    11.12.2017   

    MT

    Il-Ġurnal Uffiċjali tal-Unjoni Ewropea

    C 424/57

    Rikors ippreżentat fis-17 ta’ Ottubru 2017 – WO Technopromexport vs Il-Kunsill

    (Kawża T-722/17)

    (2017/C 424/82)

    Lingwa tal-kawża: il-Ġermaniż

    Partijiet

    Rikorrenti: OOO WO Technopromexport (Moska, ir-Russja) (rappreżentant: N. Meyer, Rechtsanwalt)

    Konvenut: Il-Kunsill tal-Unjoni Ewropea

    Talbiet

    —

    tannulla d-deċiżjoni kkontestata tal-Kunsill (PESK) 2017/1418 (1) tal-4 ta’ Awwissu 2017;

    —

    sussidjarjament, u f’kull każ, tannulla d-deċiżjoni kkontestata tal-Kunsill (PESK) 2017/1418 sa fejn, b’din id-deċiżjoni, ir-rikorrenti ġiet inkluża taħt in-Nru 39 fil-lista ta’ persuni u entitajiet imsemmija fl-Artikolu 1 tad-Deċiżjoni; u

    —

    tgħaqqad din il-proċedura mal-proċedura parallela rigward S. Topor-Gilka skont l-Artikolu 68(1) tar-Regoli tal-Proċedura tal-Qorti Ġenerali.

    Motivi u argumenti prinċipali

    Insostenn tar-rikors tagħha, ir-rikorrenti tinvoka tliet motivi.

    1.

    L-ewwel motiv, ibbażat fuq diversi żbalji manifesti ta’ evalwazzjoni

    —

    Invokazzjoni tar-Regolament tal-Kunsill (UE) Nru 1351/2014 (2).

    Dan ir-regolament jikkonċerna kategorija ta’ persuni li ma tagħmilx parti minnha r-rikorrenti, u għaldaqstant ma huwiex xieraq sabiex jiġġustifika l-inklużjoni tar-rikorrenti fil-lista inkwistjoni.

    —

    Allegazzjoni ta’ ksur ta’ kuntratt

    Il-Kunsill jibbaża d-deċiżjoni li jżid lir-rikorrenti fil-lista inkwistjoni, fost l-oħrajn, fuq il-fatt li ġew ikkunsinnati turbini ta’ gass lill-Krimea, b’tali mod li nkisru d-dispożizzjonijiet tal-kuntratt ta’ provvista oriġinali ma’ Siemens Gas Turbine Technology OOO. L-evalwazzjoni dwar jekk hemmx effettivament ksur ta’ kuntratt għandha ssir taħt id-dritt Russu. Il-partijiet fil-kuntratt ta’ provvista ressqu l-kwistjoni quddiem it-tribunal ta’ arbitraġġ ta’ Moska. Qabel ma dan it-tribunal ta’ arbitraġġ jiddeċiedi dwar il-kawża, l-allegazzjoni ta’ ksur ta’ kuntratt ma tikkostitwixxix bażi fattwali suffiċjentement solida u għaldaqstant ma hijiex xierqa bħala motivazzjoni għad-Deċiżjoni 2017/1418 (PESK).

    —

    Trasport ta’ turbini ta’ gass lejn il-Krimea

    L-allegazzjoni kontra r-rikorrenti hija li hija kkunsinnat turbini ta’ gass lejn il-Krimea. L-istqarrijiet għall-istampa ppubblikati ma humiex ċari u huma bbażati fuq sorsi anonimi. Huma l-awtoritajiet kompetenti tal-Unjoni li għandhom jistabbilixxu li l-motivi huma fondati, u mhux l-impriża kkonċernata li għandha tipproduċi l-prova negattiva, jiġifieri li dawn il-motivi ma humiex fondati.

    —

    Ksur tal-prinċipji tad-dritt internazzjonali umanitarju

    Ir-Russja hija obbligata, taħt id-dritt internazzjonali, li terġa’ tistabbilixxi u żżomm l-ordni pubbliku fil-Krimea, u f’dawn iż-żminijiet dan jinkludi l-garanzija u l-konsistenza tal-provvista ta’ enerġija. Il-bżonnijiet umanitarji għal tali provvista ta’ enerġija ma humiex ikkunsidrati fil-motivazzjoni għad-Deċiżjoni 2017/1418 (PESK), bħalma lanqas ma huma r-regoli tad-dritt internazzjonali umanitarju.

    2.

    It-tieni motiv, ibbażat fuq ksur tal-obbligu ta’ motivazzjoni taħt it-tieni paragrafu tal-Artikolu 296 TFUE

    Id-Deċiżjoni 2017/1418 tikser l-obbligu ta’ motivazzjoni skont it-tieni paragrafu tal-Artikolu 296 TFUE. Il-motivazzjoni msemmija fin-Nru 39 tal-Anness tad-Deċiżjoni hija, b’mod ġenerali, vaga u mhux suffiċjentement iddettaljata. Hija ma ssemmiex il-motivi konkreti għalfejn il-Kunsill iddeċieda, fl-eżerċizzju tas-setgħa diskrezzjonali tiegħu, li japplika l-miżuri restrittivi għar-rikorrenti u konsegwentement, meħuda b’mod sħiħ, ma tissodisfax ir-rekwiżiti tal-obbligu ta’ motivazzjoni taħt it-tieni paragrafu tal-Artikolu 296 TFUE.

    3.

    It-tielet motiv, ibbażat fuq ksur tad-drittijiet għad-difiża u tad-dritt għal protezzjoni ġudizzjarja effettiva

    Peress li l-Kunsill ma ssodisfax l-obbligu ta’ motivazzjoni skont it-tieni paragrafu tal-Artikolu 296 TFUE, huwa kiser id-drittijiet tar-rikorrenti għad-difiża u għal protezzjoni ġudizzjarja effettiva, għaliex ir-rikorrenti, peress li ma kellhiex għarfien tal-motivi prinċipali li għalihom hija ġiet miżjuda fil-lista inkwistjoni, ma setgħetx tifformula l-aħjar difiża possibbli.

    (1)  Deċiżjoni tal-Kunsill (PESK) 2017/1418, tal-4 ta’ Awwissu 2017, li temenda d-Deċiżjoni 2014/145/PESK dwar miżuri restrittivi fir-rigward ta’ azzjonijiet li jipperikolaw jew jheddu l-integrità territorjali, is-sovranità u l-indipendenza tal-Ukrajna (ĠU 2017, L 2031, p. 5).

    (2)  Regolament tal-Kunsill (UE) Nru 1351/2014, tat-18 ta’ Diċembru 2014 li jemenda r-Regolament (UE) Nru 692/2014 dwar miżuri restrittivi b’reazzjoni għall-annessjoni illegali tal-Krimea u Sevastopol (ĠU 2014, L 365, p. 46).

    Top