EUR-Lex Access to European Union law
This document is an excerpt from the EUR-Lex website
Document 62017CJ0465
Judgment of the Court (Third Chamber) of 21 March 2019.#Falck Rettungsdienste GmbH and Falck A/S v Stadt Solingen.#Request for a preliminary ruling from the Oberlandesgericht Düsseldorf.#Reference for a preliminary ruling — Public procurement — Directive 2014/24/EU — Article 10(h) — Specific exclusions for service contracts — Civil defence, civil protection and danger prevention services — Non-profit organisations or associations — Patient transport ambulance services — Transport by qualified ambulance.#Case C-465/17.
Sentenza tal-Qorti tal-Ġustizzja (It-Tielet Awla) tal-21 ta’ Marzu 2019.
Falck Rettungsdienste GmbH u Falck A/S vs Stadt Solingen.
Talba għal deċiżjoni preliminari, imressqa mill-Oberlandesgericht Düsseldorf.
Rinviju għal deċiżjoni preliminari – Kuntratti pubbliċi – Direttiva 2014/24/UE – Artikolu 10(h) – Esklużjonijiet speċifiċi għall-kuntratti ta’ servizzi – Servizzi ta’ difiża ċivili, protezzjoni ċivili, u ta’ prevenzjoni ta’ perikolu – Organizzazzjonijiet jew assoċjazzjonijiet mingħajr skop ta’ qligħ – Servizzi għat-trasport ta’ pazjenti bl-ambulanza – Trasport bl-ambulanza kkwalifikat.
Kawża C-465/17.
Sentenza tal-Qorti tal-Ġustizzja (It-Tielet Awla) tal-21 ta’ Marzu 2019.
Falck Rettungsdienste GmbH u Falck A/S vs Stadt Solingen.
Talba għal deċiżjoni preliminari, imressqa mill-Oberlandesgericht Düsseldorf.
Rinviju għal deċiżjoni preliminari – Kuntratti pubbliċi – Direttiva 2014/24/UE – Artikolu 10(h) – Esklużjonijiet speċifiċi għall-kuntratti ta’ servizzi – Servizzi ta’ difiża ċivili, protezzjoni ċivili, u ta’ prevenzjoni ta’ perikolu – Organizzazzjonijiet jew assoċjazzjonijiet mingħajr skop ta’ qligħ – Servizzi għat-trasport ta’ pazjenti bl-ambulanza – Trasport bl-ambulanza kkwalifikat.
Kawża C-465/17.
Court reports – general – 'Information on unpublished decisions' section
ECLI identifier: ECLI:EU:C:2019:234
SENTENZA TAL-QORTI TAL-ĠUSTIZZJA (It-Tielet Awla)
21 ta’ Marzu 2019 ( *1 )
“Rinviju għal deċiżjoni preliminari – Kuntratti pubbliċi – Direttiva 2014/24/UE – Artikolu 10(h) – Esklużjonijiet speċifiċi għall-kuntratti ta’ servizzi – Servizzi ta’ difiża ċivili, protezzjoni ċivili, u ta’ prevenzjoni ta’ perikolu – Organizzazzjonijiet jew assoċjazzjonijiet mingħajr skop ta’ qligħ – Servizzi għat-trasport ta’ pazjenti bl-ambulanza – Trasport bl-ambulanza kkwalifikat”
Fil-Kawża C‑465/17,
li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Oberlandesgericht Düsseldorf (il-Qorti Reġjonali Superjuri ta’ Düsseldorf, il-Ġermanja), permezz ta’ deċiżjoni tat-12 ta’ Ġunju 2017, li waslet fil-Qorti tal-Ġustizzja fit-2 ta’ Awwissu 2017, fil-proċedura
Falck Rettungsdienste GmbH,
Falck A/S
vs
Stadt Solingen,
fil-preżenza ta’:
Arbeiter-Samariter-Bund Regionalverband Bergisch Land eV,
Malteser Hilfsdienst eV,
Deutsches Rotes Kreuz, Kreisverband Solingen,
IL-QORTI TAL-ĠUSTIZZJA (It-Tielet Awla),
komposta minn M. Vilaras, President tar-Raba’ Awla, li qed jaġixxi bħala President tat-Tielet Awla, J. Malenovský, L. Bay Larsen, M. Safjan u D. Šváby (Relatur), Imħallfin,
Avukat Ġenerali: M. Campos Sánchez-Bordona,
Reġistratur: K. Malacek, Amministratur,
wara li rat il-proċedura bil-miktub u wara s-seduta tal-5 ta’ Settembru 2018,
wara li kkunsidrat l-osservazzjonijiet ippreżentati:
– |
għal Falck Rettungsdienste GmbH u Falck A/S, minn P. Friton u H.-J. Prieß, Rechtsanwälte, |
– |
għal Stadt Solingen, minn H. Glahs, Rechtsanwältin, kif ukoll minn M. Kottmann u M. Rafii, Rechtsanwälte, |
– |
għal Arbeiter-Samariter-Bund Regionalverband Bergisch Land eV, minn J.-V. Schmitz u N. Lenger, Rechtsanwälte, kif ukoll minn J. Wollmann, Rechtsanwältin, |
– |
għal Malteser Hilfsdienst eV, minn W. Schmitz-Rode, Rechtsanwalt, |
– |
għal Deutsches Rotes Kreuz, Kreisverband Solingen, minn R. M. Kieselmann u M. Pajunk, Rechtsanwälte, |
– |
għall-Gvern Ġermaniż, minn T. Henze u J. Möller, bħala aġenti, |
– |
għall-Gvern Rumen, minn C.-R. Canţăr u R. H. Radu kif ukoll minn R. I. Haţieganu u C.-M. Florescu, bħala aġenti, |
– |
għall-Gvern Norveġiż, minn M. R. Norum u K. B. Moen, bħala aġenti, |
– |
għall-Kummissjoni Ewropea, minn A. C. Becker kif ukoll minn P. Ondrůšek, bħala aġenti, |
wara li semgħet il-konklużjonijiet tal-Avukat Ġenerali, ippreżentati fis-seduta tal-14 ta’ Novembru 2018,
tagħti l-preżenti
Sentenza
1 |
It-talba għal deċiżjoni preliminari tirrigwarda l-interpretazzjoni tal-Artikolu 10(h) tad-Direttiva 2014/24/UE tal-Parlament Ewropew u tal-Kunsill tas-26 ta’ Frar 2014 dwar l-akkwist pubbliku u li tħassar id-Direttiva 2004/18/KE (ĠU 2014, L 94, p. 65). |
2 |
Din it-talba ġiet ippreżentata fil-kuntest ta’ kawża bejn Falck Rettungsdienste GmbH u Falck A/S, minn naħa, u Stadt Soligen (il-Belt ta’ Solingen, il-Ġermanja), min-naħa l-oħra, fir-rigward tal-għoti dirett tal-kuntratt “Servizzi ta’ salvataġġ f’Solingen — Numru tal-Proġett V16737/128”, Lottijiet 1 u 2 (iktar ’il quddiem il-“kuntratt inkwistjoni”), mingħajr pubblikazzjoni minn qabel ta’ avviż ta’ kuntratt f’Il-Ġurnal Uffiċjali tal-Unjoni Ewropea. |
Il-kuntest ġuridiku
Id-Direttiva 2014/24
3 |
Il-premessi 28, 117 u 118 tad-Direttiva 2014/24 jipprevedu:
[…]
|
4 |
Intitolat “Esklużjonijiet speċifiċi għal kuntratti ta’ servizzi”, l-Artikolu 10(h) ta’ din id-direttiva jipprovdi: “Din id-Direttiva ma għandhiex tapplika għal kuntratti pubbliċi ta’ servizzi għal: […]
[…]” |
5 |
Il-Kapitolu I dwar is-“[s]ervizzi soċjali u servizzi speċifiċi oħrajn” tat-Titolu III, intitolat “[r]eġimi partikolari ta’ akkwisti”, tad-Direttiva msemmija jinkludi l-Artikoli 74 sa 77. |
6 |
Skont l-Artikolu 77 tad-Direttiva 2014/24, intitolat “Kuntratti riżervati għal ċerti servizzi”: “1. L-Istati Membri jistgħu jipprovdu li l-awtoritajiet kontraenti jistgħu jirriżervaw id-dritt li organizzazzjoni tipparteċipa fi proċeduri għall-għoti ta’ kuntratti pubbliċi esklussivament għal dawk is-servizzi ta’ saħħa, dawk soċjali u dawk kulturali kif imsemmijin fl-Artikolu 74, li huma koperti mill-kodiċi CPV 75121000-0, 75122000-7, 75123000-4, 79622000-0, 79624000-4, 79625000-1, 80110000-8, 80300000-7, 80420000-4, 80430000-7, 80511000-9, 80520000-5, 80590000-6, minn 85000000-9 sa 85323000-9, 92500000-6, 92600000-7, 98133000-4, 98133110-8. 2. L-organizzazzjoni msemmija fil-paragrafu 1 għandha tissodisfa l-kondizzjonijiet kollha li ġejjin:
[…]” |
Id-dritt Ġermaniż
7 |
Il-punt 4 tal-Artikolu 107(1) tal-Gesetz gegen Wettbewerbsbeschränkungen (il-Liġi kontra r-restrizzjonijiet fuq il-kompetizzjoni), tas-26 ta’ Ġunju 2013 (BGBl. I, p. 1750), fil-verżjoni tagħha applikabbli għat-tilwima fil-kawża prinċipali (iktar ’il quddiem il-“GWB”), jipprovdi: “Eċċezzjonijiet ġenerali 1. Din [ir-raba’] parti ma hijiex applikabbli għall-kuntratti tal-akkwist pubbliku jew għall-għoti ta’ konċessjonijiet: […]
|
8 |
Skont l-Artikolu 2(1) tal-Gesetz über den Rettungsdienst sowie die Notfallrettung und den Krankentransport durch Unternehmer (Rettungsgesetz NRW – RettG NRW) (il-Liġi tal-Land ta’ Nordrhein-Westfalen dwar is-servizzi tal-emerġenza kif ukoll dwar l-interventi urġenti u t-trasport bl-ambulanza minn impriżi), tal-24 ta’ Novembru 1992, is-servizzi tal-emerġenza jkopru l-interventi urġenti, it-trasport bl-ambulanza u l-kura ta’ numru kbir ta’ persuni mġerrħa jew ma jifilħux f’każijiet ta’ katastrofi ta’ firxa straordinarja. Skont l-ewwel sentenza tal-Artikolu 2(2) ta’ din il-liġi, l-interventi ta’ emerġenza għandhom l-għan li jimplimentaw miżuri, fil-post tal-emerġenza, li jistgħu isalvaw il-ħajja tal-pazjenti f’sitwazzjoni ta’ emerġenza, li jpoġġu lil dawn il-pazjenti f’sitwazzjoni li jiġu ttrasportati kif ukoll li jwassluhom lejn sptar adattat għall-kura ulterjuri tagħhom filwaqt li jinżammu f’kundizzjoni li jiġu ttrasportati u billi jiġi evitat kull aggravament tas-sitwazzjoni tagħhom, b’mod partikolari permezz ta’ vettura ta’ tabib ta’ emerġenza jew permezz ta’ vettura ta’ emerġenza. Skont l-Artikolu 2(3) tal-liġi msemmija, it-trasport bl-ambulanza għandu l-għan li jwassal għajnuna xierqa lill-morda, feruti jew persuni oħrajn fil-bżonn ta’ għajnuna, differenti minn dawk imsemmija fil-paragrafu 2 tal-istess dispożizzjoni u li jittrasportahom, fost oħrajn, bl-ambulanza fil-kuntest ta’ kura minn persunal ikkwalifikat. |
9 |
It-tieni sentenza tal-Artikolu 26(1) taz-Zivilschutz- und Katastrophenhilfegesetz (il-Liġi dwar il-protezzjoni ċivili u l-għajnuna f’każ ta’ diżastru), tal-25 ta’ Marzu 1997 (BGBl. I, p. 726), fil-verżjoni tagħha applikabbli għall-kawża prinċipali (iktar ’il quddiem il-“Liġi dwar il-Protezzjoni Ċivili”), jipprovdi li jistgħu, b’mod partikolari, jipparteċipaw fit-twettiq tal-kompiti previsti minn din il-liġi l-Arbeiter-Samariter-Bund (l-Għaqda tal-Ħaddiema Samaritani), id-Deutsche Lebensrettungsgesellschaft (is-Soċjetà Ġermaniża ta’ salvataġġ), id-Deutsche Rote Kreuz (is-Salib l-Aħmar Ġermaniż), Johanniter-Unfall Hilfe (il-Volontarji ta’ San Ġwann) u l-Malteser-Hilfsdienst (is-Servizz ta’ għajnuna tal-Ordni ta’ Malta). |
10 |
L-ewwel sentenza tal-Artikolu 18(1), u l-Artikolu 18(2) tal-Gesetz über den Brandschutz, die Hilfeleistung und den Katastrophenschutz (il-Liġi dwar il-protezzjoni kontra n-nar, l-għajnuna u d-difiża ċivili), tas-17 ta’ Diċembru 2015 (iktar ’il quddiem il-“Liġi dwar il-protezzjoni kontra n-nar”), jaqraw kif ġej: “(1) L-organizzazzjonijiet privati ta’ għajnuna pubblika għandhom jikkollaboraw f’każijiet ta’ inċidenti u ta’ emerġenza pubblika, skjeramenti u diżastri kbar, jekk dawn ikunu ddikjaraw mal-ogħla awtorità ta’ sorveljanza li jinsabu disposti li jikkollaboraw u jekk din tal-aħħar tkun ivverifikat l-adegwatezza ġenerali tagħhom biex jagħmlu dan u l-ħtieġa f’dan is-sens (organizzazzjonijiet ta’ għajnuna pubblika rrikonoxxuti). […] 2. Għall-organizzazzjonijiet imsemmija fit-tieni sentenza tal-Artikolu 26(1) tal-[Liġi dwar il-protezzjoni ċivili] la għandha tkun meħtieġa d-dikjarazzjoni li jinsabu disposti li jikkollaboraw u lanqas il-verifika tal-adegwatezza ġenerali.” |
Il-kawża prinċipali u d-domandi preliminari
11 |
Il-belt ta’ Solingen iddeċidiet, f’Marzu 2016, li ġġedded il-kuntratt tas-servizzi ta’ emerġenza għal perjodu ta’ ħames snin. L-abbozz ta’ kuntratt kien b’mod partikolari jikkonċerna l-użu ta’ vetturi ta’ emerġenza muniċipali, minn naħa, għall-interventi ta’ emerġenza, bil-kompitu prinċipali tal-kura tal-pazjenti f’sitwazzjonijiet ta’ emerġenza minn ħaddiem tas-salvataġġ assistit minn paramediku u, min-naħa l-oħra, għat-trasport bl-ambulanza, bil-kompitu prinċipali tal-kura ta’ pazjenti minn paramediku assistit minn paramediku awżiljarji. |
12 |
Il-belt ta’ Solingen ma ppubblikat ebda avviż ta’ kuntratt f’Il-Ġurnal Uffiċjali tal-Unjoni Ewropea. Min-naħa l-oħra, fil-11 ta’ Mejju 2016, hija talbet lil erba’ assoċjazzjonijiet ta’ utilità pubblika, fosthom it-tliet intervenjenti quddiem il-qorti tar-rinviju, biex jagħmlu offerta. |
13 |
Wara li waslu l-offerti, l-Arbeiter-Samariter-Bund Regionalverband Bergisch Land eV u l-Malteser Hilfsdienst eV ġew allokati kull waħda minnhom wieħed miż-żewġ lottijiet li jikkostitwixxu l-kuntratt inkwistjoni. |
14 |
Falck Rettungsdienste, li hija fornitur ta’ servizzi tal-emerġenza u tas-saħħa, kif ukoll Falck Rettungsdienste li tappartjeni għall-grupp Falck A/S (iktar ’il quddiem, flimkien, “Falck et”) jilmentaw li l-belt ta’ Solingen attribwixxiet il-kuntratt inkwistjoni mingħajr pubblikazzjoni minn qabel ta’ avviż ta’ kuntratt f’Il-Ġurnal Uffiċjali tal-Unjoni Ewropea. Għalhekk, Falck et ippreżentaw, quddiem il-Vergabekammer Rheinland (il-Bord tal-kuntratti pubbliċi ta’ Rheinland, il-Ġermanja), rikors intiż sabiex jiġi kkonstatat li l-attribuzzjoni kienet effettivament tikser id-drittijiet tagħhom u li l-belt ta’ Solingen kienet marbuta, jekk iżżomm l-intenzjoni tagħha li tagħti l-kuntratt inkwistjoni, li tattribwixxi dan wara proċedura ta’ sejħa għall-offerti konformi mad-dritt tal-Unjoni. |
15 |
Permezz ta’ deċiżjoni tad-19 ta’ Awwissu 2016, din il-Bord ċaħad dan ir-rikors bħala inammissibbli. |
16 |
Falck et ippreżentaw appell mid-deċiżjoni tal-Bord tal-kuntratti pubbliċi ta’ Rheinland quddiem l-Oberlandesgericht Düsseldorf (il-Qorti Reġjonali Superjuri ta’ Düsseldorf, il-Ġermanja). Dawn jikkritikaw lil dan il-Bord talli ma interpretax l-ewwel sentenza tal-punt 4 tal-Artikolu 107(1) tal-GWB, li l-kliem tiegħu jikkoinċidi fil-punti kollha mal-Artikolu 10(h) tad-Direttiva 2014/24, b’mod konformi mal-imsemmija direttiva. |
17 |
Quddiem l-Oberlandesgericht Düsseldorf (il-Qorti Reġjonali Superjuri ta’ Düsseldorf), Falck et isostnu li s-servizzi ta’ emerġenza inkwistjoni fil-kawża prinċipali ma jikkostitwixxux servizzi ta’ prevenzjoni tal-perikoli. Il-kunċett ta’ “prevenzjoni tal-perikoli” jirreferi biss għall-prevenzjoni tal-perikoli marbuta mal-folol kbar f’sitwazzjonijiet estremi, b’mod li dan ma għandux tifsira proprja u ma jestendix ruħu għall-prevenzjoni tal-perikoli għall-ħajja u għas-saħħa tal-individwi meħuda individwalment. Minn dan isegwi li t-trasport bl-ambulanza kkwalifikat, li jinkludi, minbarra l-provvista ta’ trasport, il-kura minn paramediku assistit minn assistent mediku (iktar ’il quddiem it-“trasport bl-ambulanza kkwalifikat”), ma huwiex kopert mill-esklużjoni prevista fl-Artikolu 10(h) tad-Direttiva 2014/24, għaliex jikkostitwixxi biss servizz tal-ambulanza għat-trasport ta’ pazjenti. |
18 |
Barra minn hekk, il-leġiżlatur nazzjonali ma jistax jiddeċiedi li t-tliet intervenjenti quddiem il-qorti tar-rinviju huma organizzazzjonijiet jew assoċjazzjonijiet mingħajr skop ta’ profitt minħabba l-fatt biss li huma rrikonoxxuti mil-liġi nazzjonali bħala assoċjazzjonijiet ta’ utilità pubblika, skont it-tieni sentenza tal-punt 4 tal-Artikolu 107(1) tal-GWB. Fil-fatt, il-kundizzjonijiet li għalihom id-dritt tal-Unjoni jissuġġetta l-klassifikazzjoni bħala “organizzazzjoni mingħajr skop ta’ qligħ” huma iktar eżiġenti fid-dawl tas-sentenzi tal-11 ta’ Diċembru 2014, Azienda sanitaria locale n. 5 Spezzinoet (C‑113/13, EU:C:2014:2440) kif ukoll tat-28 ta’ Jannar 2016, CASTA et (C‑50/14, EU:C:2016:56), jew, tal-inqas, tal-Artikolu 77(1) tad-Direttiva 2014/24. |
19 |
Il-qorti tar-rinviju tqis li l-appell ippreżentat minn Falck et jista’ jintlaqa’ jekk mill-inqas waħda mill-kundizzjonijiet li jikkostitwixxu l-esklużjoni prevista fil-punt 4 tal-Artikolu 107(1) tal-GWB ma kinitx issodisfatta. Konsegwentement, għandu jiġi ddeterminat, l-ewwel nett, jekk il-kuntratt inkwistjoni jirrigwardax servizzi ta’ prevenzjoni tal-perikoli, it-tieni nett, minn meta għandhom jitqiesu li ġew sodisfatti l-kundizzjonijiet meħtieġa sabiex jinkiseb l-istatus ta’ organizzazzjoni jew ta’ assoċjazzjoni mingħajr skop ta’ qligħ u, it-tielet nett, in-natura tas-servizzi li huma koperti mill-espressjoni “servizzi tat-trasport tal-pazjenti bl-ambulanzi” użat f’din id-dispożizzjoni. |
20 |
Skont il-qorti tar-rinviju, filwaqt li d-difiża ċivili tkopri d-diżastri maġġuri imprevedibbli li jseħħu fi żmien ta’ paċi, il-protezzjoni ċivili hija intiża għall-protezzjoni tal-popolazzjoni ċivili fi żminijiet ta’ gwerra. Il-kunċett ta’ “servizzi ta’ prevenzjoni tal-perikoli” jista’ madankollu jinkludi s-servizzi għall-prevenzjoni tal-perikoli tas-saħħa u l-ħajja tal-persuni, meħuda individwalment, meta dawn jiġu mobilizzati kontra theddida immedjata marbuta ma’ riskji komuni bħal nirien, mard jew inċidenti. Din l-interpretazzjoni tal-kunċett ta’ “prevenzjoni tal-perikoli” hija iktar neċessarja minħabba l-fatt li l-kunċett restrittiv sostnut minn Falck et ma jagħtih ebda kontenut leġiżlattiv, peress li dan jiġi konfuż kemm mal-kunċett ta’ “difiża ċivili” kif ukoll ma’ dak ta’ “protezzjoni ċivili”. |
21 |
Barra minn hekk, l-iskop tal-esklużjoni prevista fl-Artikolu 10(h) tad-Direttiva 2014/24, kif iċċarat mill-ewwel sentenza tal-premessa 28 ta’ din id-direttiva, huwa li jippermetti lill-organizzazzjonijiet mingħajr skop ta’ qligħ li jkomplu jaħdmu fis-settur tas-servizzi ta’ emerġenza għall-benesseri taċ-ċittadini mingħajr ir-riskju li jiġu esklużi mis-suq minħabba kompetizzjoni kbira wisq minn impriżi kummerċjali. Issa, peress li l-organizzazzjonijiet jew l-assoċjazzjonijiet mingħajr skop ta’ qligħ huma essenzjalment attivi fis-settur tas-servizzi ta’ emerġenza ta’ kuljum lil individwi, din l-esklużjoni ma tilħaqx l-għan tagħha kieku kienet tapplika biss għas-servizzi ta’ prevenzjoni ta’ diżastri kbar. |
22 |
Il-qorti tar-rinviju tistaqsi wkoll jekk ir-regola stabbilita fit-tieni sentenza tal-punt 4 tal-Artikolu 107(1) tal-GWB hijiex kompatibbli mal-kunċett ta’ organizzazzjonijiet jew ta’ assoċjazzjonijiet mingħajr skop ta’ qligħ li tinsab fl-Artikolu 10(h) tad-Direttiva 2014/24 sa fejn ir-rikonoxximent legali, skont il-liġi nazzjonali, tal-istatus ta’ organizzazzjoni ta’ protezzjoni u ta’ difiża ċivili ma jiddependix neċessarjament mill-punt jekk l-organizzazzjoni hijiex mingħajr skop ta’ qligħ. |
23 |
F’dan ir-rigward, il-qorti tar-rinviju tesprimi dubji fir-rigward tal-argument ta’ Falck et li jgħid li organizzazzjoni mingħajr skop ta’ qligħ għandha tissodisfa kundizzjonijiet oħra li jirriżultaw mill-Artikolu 77(2) tad-Direttiva 2014/24, kif ukoll mis-sentenzi tal-11 ta’ Diċembru 2014, Azienda sanitaria locale n. 5 Spezzinoet (C‑113/13, EU:C:2014:2440), kif ukoll tat-28 ta’ Jannar 2016, CASTA et (C‑50/14, EU:C:2016:56). |
24 |
Il-qorti tar-rinviju tosserva wkoll li s-servizzi ta’ prevenzjoni tal-perikoli, koperti mill-kodiċi CPV 85143000–3 (servizzi tal-ambulanza), huma kkonċernati mill-esklużjoni prevista fl-Artikolu 10(h) tad-Direttiva 2014/24 (iktar ’il quddiem l-“eċċezzjoni”), suġġett għas-“servizzi tat-trasport tal-pazjenti bl-ambulanzi” (iktar ’il quddiem il-“kontra-eċċezzjoni”). F’dan ir-rigward, tqum il-kwistjoni jekk din il-kontra-eċċezzjoni tirreferix biss għat-trasport ta’ pazjent bl-ambulanza mingħajr ebda kura medika jew jekk tinkludix ukoll it-trasport bl-ambulanza kkwalifikat, fejn il-pazjent jibbenefika minn assistenza medika. |
25 |
Huwa f’dawn iċ-ċirkustanzi li l-Oberlandesgericht Düsseldorf (il-Qorti Reġjonali Superjuri ta’ Düsseldorf) iddeċidiet li tissospendi l-proċedura u li tagħmel lill-Qorti tal-Ġustizzja d-domandi preliminari li ġejjin:
|
Fuq id-domandi preliminari
Fuq l-ewwel u r-raba’ domanda
26 |
Preliminarjament, għandu jiġi enfasizzat, kif għamlet il-qorti tar-rinviju, li l-kura tal-pazjenti f’sitwazzjonijiet ta’ emerġenza f’vettura ta’ emerġenza permezz ta’ tekniku mediku/paramediku u t-trasport bl-ambulanza kkwalifikat ma jikkostitwixxu la “servizzi ta’ difiża ċivili” u lanqas “servizzi ta’ protezzjoni ċivili”. |
27 |
Għaldaqstant, għandu jitqies li, permezz tal-ewwel u tar-raba’ domandi tagħha, li għandhom jiġu eżaminati flimkien, il-qorti tar-rinviju tistaqsi, essenzjalment, jekk l-Artikolu 10(h) tad-Direttiva 2014/24 għandux jiġi interpretat fis-sens li, minn naħa, it-trattament ta’ pazjenti f’sitwazzjonijiet ta’ emerġenza f’vettura ta’ emerġenza permezz ta’ tekniku mediku/paramediku u, min-naħa l-oħra, it-trasport bl-ambulanza kkwalifikat jaqgħux taħt il-kunċett ta’ “servizzi ta’ prevenzjoni tal-perikoli” u rispettivament taħt il-kodiċijiet CPV 75252000–7 (servizzi ta’ emerġenza) u 85143000–3 (servizzi tal-ambulanzi) u, għaldaqstant, huma esklużi mill-kamp ta’ applikazzjoni ta’ din id-Direttiva, jew jekk dawn is-servizzi huma “servizzi tat-trasport tal-pazjenti bl-ambulanzi, bħala tali, suġġetta għar-reġim speċjali stipulat għal servizzi soċjali u servizzi speċifiċi oħrajn. |
28 |
Għandu jiġi enfasizzat li d-Direttiva 2014/24 ma tiddefinixxix il-kunċett ta’ “prevenzjoni tal-perikoli” u li, skont ġurisprudenza stabbilita, kemm mir-rekwiżiti kemm tal-applikazzjoni uniformi tad-dritt tal-Unjoni kif ukoll mill-prinċipju ta’ ugwaljanza jirriżulta li l-kliem ta’ dispożizzjoni tad-dritt tal-Unjoni li ma tinkludi ebda riferiment espress għad-dritt tal-Istati Membri sabiex jiġu ddeterminati t-tifsira u l-portata tagħha, għandhom normalment jingħataw, fl-Unjoni Ewropea kollha, interpretazzjoni awtonoma u uniformi li għandha tiġi mfittxija billi jittieħed inkunsiderazzjoni l-kuntest tad-dispożizzjoni u l-għan imfittex mil-leġiżlazzjoni inkwistjoni (ara, b’mod partikolari, is-sentenzi tat-18 ta’ Jannar 1984, Ekro, 327/82, EU:C:1984:11, punt 11, u tad-19 ta’ Settembru 2000, Linster, C‑287/98, EU:C:2000:468, punt 43). |
29 |
Għalkemm huwa minnu li l-kunċetti ta’ “protezzjoni ċivili” u ta’ “difiża ċivili” jirreferu għal sitwazzjonijiet fejn għandu jiġi indirizzat dannu kollettiv, bħal, pereżempju, terremot, tsunami jew gwerra, ma jirriżultax neċessarjament li l-kunċett ta’ “prevenzjoni tal-perikoli”, li jissemma wkoll fl-Artikolu 10(h) tad-Direttiva 2014/24, għandu jkollu tali dimensjoni kollettiva. |
30 |
Fil-fatt, minn interpretazzjoni kemm litterali kif ukoll kuntestwali tal-Artikolu 10(h) tad-Direttiva 2014/24 jirriżulta li l-“prevenzjoni tal-perikoli” tikkonċerna kemm ir-riskji kollettivi kif ukoll ir-riskji individwali. |
31 |
L-ewwel nett, il-kliem stess ta’ din id-dispożizzjoni jirreferi għal diversi kodiċijiet CPV li jsemmu riskji li jistgħu ikunu kollettivi jew individwali mingħajr distinzjoni. Dan japplika b’mod partikolari għall-kodiċijiet CPV 75250000–3 (servizzi tat-tifi tan-nar u tas-salvataġġ), 75251000–0 (servizzi ta’ nar), 75251100–1 (servizzi tat-tifi tan-nar), 75251110–4 (servizzi ta’ prevenzjoni ta’ nirien) u, b’mod iktar partikolari, fid-dawl tas-suġġett tal-kawża prinċipali, il-kodiċijiet 75252000–7 (servizzi ta’ emerġenza/salvataġġ) u 85143000–3 (servizzi tal-ambulanzi). |
32 |
It-tieni nett, il-ħtieġa li l-prevenzjoni tal-perikoli jkollha dimensjoni kollettiva ċċaħħad lil din l-espressjoni minn kull kontenut proprju minħabba li dan il-kunċett jitħallat b’mod sistematiku jew mal-protezzjoni ċivili jew mad-difiża ċivili. Għalhekk, meta dispożizzjoni tad-dritt tal-Unjoni jista’ jkollha iktar minn interpretazzjoni waħda, għandha tingħata prijorità lil dik li għandha n-natura li tissalvagwardja l-effett utli tagħha (sentenza tal-24 ta’ Frar 2000, Il‑Kummissjoni vs Franza, C‑434/97, EU:C:2000:98, punt 21). |
33 |
It-tielet nett, fuq il-pjan kuntestwali, din l-interpretazzjoni tal-Artikolu 10(h) tad-Direttiva 2014/24 hija kkonfermata mill-premessa 28 tagħha. Din il-premessa tispjega fil-fatt, fl-ewwel sentenza tagħha, li “[d]in id-Direttiva m’għandhiex tapplika għal ċerti servizzi ta’ emerġenza fejn dawn jitwettqu minn organizzazzjonijiet jew assoċjazzjonijiet mingħajr skop ta’ qligħ, minħabba li n-natura partikolari ta’ dawk l-organizzazzjonijiet hija diffiċli biex tiġi ppreservata jekk il-fornituri tas-servizzi jkollhom jintgħażlu skont il-proċeduri stabbiliti f’din id-Direttiva”. F’dan ir-rigward, għandu jiġi enfasizzat li l-esklużjoni tal-applikazzjoni ta’ din id-direttiva ma hijiex limitata biss għas-servizzi ta’ emerġenza mwettqa meta jseħħu riskji kollettivi. Barra minn hekk, għandu jiġi kkonstatat li, hekk kif jirriżulta mid-deċiżjoni tar-rinviju, l-essenzjal tal-attività ċentrali tal-assoċjazzjonijiet ta’ utilità pubblika inkwistjoni fil-kawża prinċipali jirreferi għal servizzi ta’ emerġenza li, bħala regola ġenerali, jirrigwardaw interventi ta’ natura individwali u ta’ kuljum. Fil-fatt, huwa preċiżament minħabba l-esperjenza hekk miksuba bl-eżerċizzju ta’ dawn is-servizzi ta’ emerġenza ta’ kuljum li tali organizzazzjonijiet jew assoċjazzjonijiet mingħajr skop ta’ qligħ huma f’pożizzjoni, skont il-qorti tar-rinviju, li jkunu operattivi meta jkollhom jipprovdu servizzi ta’ “protezzjoni ċivili” u ta’ “difiża ċivili”. |
34 |
Ir-raba’ nett u kif sostna l-Gvern Ġermaniż fl-osservazzjonijiet bil-miktub tiegħu, kieku l-prevenzjoni tal-perikoli u, għaldaqstant, l-esklużjoni ġenerali msemmija fl-Artikolu 10(h) tad-Direttiva 2014/24, kienet limitata biss għall-interventi ta’ emerġenza fil-każ ta’ sitwazzjonijiet estremi, il-leġiżlatur tal-Unjoni ma kellux għalfejn isemmi s-sempliċi trasport bl-ambulanza fil-kontra-eċċezzjoni. F’dan ir-rigward, hekk kif irrileva l-Avukat Ġenerali fil-punt 48 tal-konklużjonijiet tiegħu, għandu jitqies li jekk il-leġiżlatur tal-Unjoni qies utli li jirreferi għas-“servizzi tat-trasport tal-pazjenti bl-ambulanzi”, dan kien minħabba l-fatt li, f’każ kuntrarju, dawn is-servizzi kien ikollhom jitqiesu bħala koperti mill-eċċezzjoni prevista f’din id-dispożizzjoni. |
35 |
Minn dan isegwi li l-għan imsemmi fil-premessa 28 tad-Direttiva 2014/24 ma jintlaħaqx jekk il-kunċett ta’ “prevenzjoni tal-perikoli” kellu jinftiehem bħala li jirreferi biss għall-prevenzjoni tal-perikoli kollettivi. |
36 |
Fid-dawl tal-kunsiderazzjonijiet preċedenti, għandu jiġi konkluż li, kemm il-kura tal-pazjenti f’sitwazzjonijiet ta’ emerġenza f’vettura ta’ emerġenza permezz ta’ tekniku mediku/paramediku kif ukoll it-trasport bl-ambulanza kkwalifikat jaqgħu taħt il-kunċett ta’ “prevenzjoni tal-perikoli” fis-sens tal-Artikolu 10(h) tad-Direttiva 2014/24. |
37 |
Għalhekk, għad irid jiġi ddeterminat jekk dawn iż-żewġ servizzi humiex koperti minn xi wieħed mill-kodiċijiet CPV elenkati f’din id-dispożizzjoni. |
38 |
Preliminarjament, għandha tissemma’ l-istruttura tal-Artikolu 10(h) tad-Direttiva 2014/24, li tinkludi eċċezzjoni u kontra-eċċezzjoni. Fil-fatt, din id-dispożizzjoni teskludi mill-kamp tar-regoli klassiċi ta’ għoti ta’ kuntratti pubbliċi lill-kuntratti pubbliċi għal servizzi li jirrigwardaw servizzi ta’ difiża ċivili, ta’ protezzjoni ċivili u ta’ prevenzjoni tal-perikolu, bil-kundizzjoni doppja li tali servizzi jikkorrispondu għall-kodiċijiet CPV msemmija f’din id-dispożizzjoni u li jiġu pprovduti minn organizzazzjonijiet jew assoċjazzjonijiet mingħajr skop ta’ profitt. Madankollu, din l-eċċezzjoni għall-applikazzjoni tar-regoli dwar l-għoti ta’ kuntratti pubbliċi tinkludi kontra-eċċezzjoni, fis-sens li din ma tibbenefikax lis-servizzi ta’ trasport ta’ pazjenti bl-ambulanza, li jaqgħu taħt l-iskema ssimplifikata għall-għoti ta’ kuntratti pubbliċi previsti fl-Artikoli 74 sa 77 tad-Direttiva 2014/24. |
39 |
L-għan tal-eċċezzjoni huwa, kif jirriżulta mill-premessa 28 ta’ din id-direttiva, li tiġi ppreżervata n-natura partikolari tal-organizzazzjonijiet jew assoċjazzjonijiet mingħajr skop ta’ profitt, billi jiġi evitat lilhom li jkunu suġġetti għall-proċeduri stabbiliti fid-Direttiva msemmija. Madankollu, din l-istess premessa tipprovdi li din l-eċċezzjoni ma għandhiex tmur lil hinn minn dak li huwa strettament neċessarju. |
40 |
F’dan il-kuntest, u hekk kif indika essenzjalment l-Avukat Ġenerali fil-punt 64 tal-konklużjonijiet tiegħu, ma hemm l-ebda dubju li l-kura tal-pazjenti f’sitwazzjoni ta’ emerġenza li hija, barra minn hekk, żgurata f’vettura ta’ emerġenza permezz ta’ tekniku mediku/paramediku hija koperta mill-kodiċi CPV 75252000–7 (servizzi tal-emerġenza). |
41 |
Għalhekk, għandu jiġi evalwat jekk it-trasport bl-ambulanza kkwalifikat jistax ukoll jaqa’ taħt l-istess kodiċi jew taħt il-kodiċi CPV 85143000–3 (servizzi tal-ambulanza). |
42 |
F’dan ir-rigward, jidher li mill-formulazzjoni tal-ewwel domanda preliminari jirriżulta li t-trasport bl-ambulanza kkwalifikat ma jikkorrispondix għat-trasport tal-pazjenti f’sitwazzjonijiet ta’ emerġenza. Fil-fatt, hekk kif irrileva l-Avukat Ġenerali fil-punt 33 tal-konklużjonijiet tiegħu, il-qorti tar-rinviju għamlet distinzjoni bejn il-kura ta’ pazjenti f’sitwazzjoni ta’ emerġenza f’vettura ta’ emerġenza u l-kura ta’ pazjenti f’ambulanzi, minn paramediku/assistent mediku. Għaldaqstant, għandu jiġi kkonstatat li din l-aħħar kura, li l-qorti tar-rinviju tikkwalifika bħala trasport bl-ambulanza kkwalifikat, ma ssirx permezz ta’ vettura ta’ emerġenza, bit-tagħmir mediku speċjalizzat kollu li din tinvolvi, iżda permezz ta’ ambulanza li tista’ sempliċiment tikkonsisti minn vettura tat-trasport. |
43 |
Issa, mill-Artikolu 10(h) tad-Direttiva 2014/24, moqri fid-dawl tal-premessa 28 tagħha, jirriżulta li l-esklużjoni mir-regoli tal-għoti ta’ kuntratti pubbliċi prevista f’din id-dispożizzjoni favur is-servizzi ta’ prevenzjoni tar-riskji tista’ tibbenefika biss lil ċerti servizzi ta’ emerġenza pprovduti minn organizzazzjonijiet jew assoċjazzjonijiet mingħajr skop ta’ profitt, u li din ma għandhiex tmur lil hinn minn dak li huwa strettament neċessarju. |
44 |
Minn dan isegwi li l-inapplikabbiltà tar-regoli tal-għoti ta’ kuntratti pubbliċi prevista fl-Artikolu 10(h) ta’ din id-direttiva hija intrinsikament marbuta mal-eżistenza ta’ servizz ta’ emerġenza. |
45 |
Isegwi li l-preżenza ta’ persunal ikkwalifikat abbord ambulanza ma huwiex biżżejjed, waħdu, sabiex tiġi stabbilita l-eżistenza ta’ servizz tal-ambulanza kopert mill-kodiċi CPV 85143000–3. |
46 |
Minkejja kollox, l-urġenza tista’ tiġi stabbilita, għall-inqas potenzjalment, meta jkun hemm bżonn it-trasport ta’ pazjent li għalih hemm riskju ta’ deterjorament tal-istat ta’ saħħa tiegħu matul l-imsemmi trasport. Huwa biss f’dawn iċ-ċirkustanzi li it-trasport bl-ambulanza kkwalifikat jista’ jidħol fil-kamp ta’ applikazzjoni tal-eċċezzjoni mill-applikazzjoni tar-regoli tal-għoti ta’ kuntratti pubbliċi prevista fl-Artikolu 10(h) tad-Direttiva 2014/24. |
47 |
F’dan ir-rigward, għandu jiġi enfasizzat li, waqt is-seduta quddiem il-Qorti tal-Ġustizzja, kemm il-belt ta’ Solingen kif ukoll il-Gvern Ġermaniż sostnew, essenzjalment, li t-trasport bl-ambulanza kkwalifikat huwa kkaratterizzat mill-fatt li, minħabba l-istat ta’ saħħa tal-pazjent, tista’ tinqala’ sitwazzjoni ta’ emerġenza f’kull ħin fil-vettura tat-trasport. |
48 |
Għalhekk, huwa minħabba li jeżisti riskju ta’ degradazzjoni fl-istat ta’ saħħa tal-pazjent matul it-trasport tiegħu li persunal imħarreġ fl-ewwel għajnuna għandu jkun jinsab abbord il-vettura, sabiex ikun jista’ jieħdu ħsieb lill-pazjent u, jekk ikun il-każ, sabiex jagħtih il-kura medika ta’ emerġenza li jista’ jkollu bżonn. |
49 |
Barra minn hekk, għandu jiġi ċċarat li r-riskju ta’ deterjorament tal-istat ta’ saħħa tal-pazjent għandu, fil-prinċipju, ikun jista’ jiġi evalwat b’mod oġġettiv. |
50 |
Minn dan isegwi li t-trasport bl-ambulanza kkwalifikat jista’ biss jikkostitwixxi “servizz tal-ambulanza” kopert mill-kodiċi CPV 85143000–3, imsemmi fl-Artikolu 10(h) tad-Direttiva 2014/24, meta, minn naħa, effettivament jitwettaq minn persunal imħarreġ fl-ewwel għajnuna u, min-naħa l-oħra, ikun jirreferi għal pazjent li għalih jeżisti riskju ta’ deterjorament tal-istat ta’ saħħa tiegħu matul l-imsemmi trasport. |
51 |
Għaldaqstant, ir-risposta għall-ewwel u għar-raba’ domanda għandha tkun li l-Artikolu 10(h) tad-Direttiva 2014/24 għandu jiġi interpretat fis-sens li l-eċċezzjoni għall-applikazzjoni tar-regoli tal-għoti ta’ kuntratti pubbliċi stabbilita minnu tkopri l-kura ta’ pazjenti f’sitwazzjonijiet ta’ emerġenza f’vettura ta’ emerġenza permezz ta’ tekniku mediku/paramediku koperta mill-kodiċi CPV 75252000–7 (servizzi tal-emerġenza) kif ukoll it-trasport bl-ambulanza kkwalifikat, kopert bil-kodiċi CPV 85143000–3 (servizzi tal-ambulanza), sa fejn, fir-rigward tat-trasport bl-ambulanza kkwalifikat, dan effettivament jitwettaq minn persunal imħarreġ fl-ewwel għajnuna u jkun jirreferi għal pazjent li għalih jeżisti riskju ta’ deterjorament tal-istat ta’ saħħa tiegħu matul dan it-trasport. |
Fuq it-tieni u t-tielet domanda
52 |
Permezz tat-tieni u tat-tielet domanda tagħha, li għandhom jiġu eżaminati flimkien, il-qorti tar-rinviju essenzjalment tistaqsi jekk l-Artikolu 10(h) tad-Direttiva 2014/24 għandux jiġi interpretat fis-sens, minn naħa, li jipprekludi li assoċjazzjonijiet ta’ utilità pubblika rrikonoxxuti mil-liġi nazzjonali bħala organizzazzjonijiet ta’ protezzjoni u ta’ difiża ċivili jitqiesu bħala “organizzazzjonijiet jew assoċjazzjonijiet mingħajr skop ta’ profitt” fis-sens ta’ din id-dispożizzjoni, sa fejn ir-rikonoxximent tal-istatus ta’ assoċjazzjoni ta’ utilità pubblika ma huwiex suġġett fil-liġi nazzjonali għan-nuqqas ta’ skop ta’ profitt, u, min-naħa l-oħra, li l-organizzazzjonijiet jew l-assoċjazzjonijiet li għandhom l-għan li jassumu kompiti soċjali, li huma nieqsa minn kull skop kummerċjali, u li jerġgħu jinvestu l-profitti eventwali bil-għan li jinkiseb l-għan tal-organizzazzjoni jew tal-assoċjazzjoni jikkostitwixxu “organizzazzjonijiet jew assoċjazzjonijiet mingħajr skop ta’ profitt” skont l-imsemmija dispożizzjoni. |
53 |
Fl-ewwel lok, huwa biżżejjed li jiġi kkonstatat li mid-deċiżjoni tar-rinviju nnifisha jirriżulta li r-rikonoxximent legali, mid-dritt Ġermaniż abbażi tal-ewwel sentenza tal-punt 4 tal-Artikolu 107(1) tal-GWB, tal-istatus ta’ organizzazzjoni għall-protezzjoni u d-difiża ċivili mhux neċessarjament jiddependi mill-punt jekk l-organizzazzjoni kkonċernata tkun mingħajr skop ta’ profitt. |
54 |
Fil-fatt, it-tieni sentenza tal-Artikolu 26(1) tal-Liġi dwar il-Protezzjoni Ċivili tillimita ruħha biex issostni li huma adatti, b’mod partikolari, biex jipparteċipaw fit-twettiq tal-kompiti previsti minn din il-liġi l-Unjoni tal-Ħaddiema Samaritani, is-soċjetà ta’ salvataġġ Ġermaniża, is-Salib l-Aħmar Ġermaniż, il-volontarji ta’ San Ġwann u s-servizz ta’ għajnuna tal-Ordni ta’ Malta. Iċ-ċertifikat hekk maħruġ lil dawn il-ħames assoċjazzjonijiet ta’ utilità pubblika jeżentahom, skont l-Artikolu 18(2) tal-Liġi dwar il-protezzjoni kontra n-nirien, milli juru l-kapaċità ġenerali tagħhom biex jipparteċipaw fl-operazzjonijiet ta’ salvataġġ jew ta’ assistenza f’każ ta’ inċidenti u ta’ emerġenzi pubbliċi, ta’ interventi fuq skala kbira u ta’ diżastri. |
55 |
Barra minn hekk, jidher li la t-tieni sentenza tal-Artikolu 26(1) tal-Liġi dwar il-Protezzjoni Ċivili u lanqas l-Artikolu 18(2) tal-Liġi dwar il-protezzjoni kontra n-nirien ma tindika jekk, u sa liema punt jittieħed inkunsiderazzjoni n-nuqqas ta’ skop ta’ profitt tal-attività u jekk dan huwiex kundizzjoni għar-rikonoxximent tal-istatus ta’ assoċjazzjoni ta’ utilità pubblika. |
56 |
F’dawn iċ-ċirkustanzi, l-għoti mid-dritt Ġermaniż tal-istatus ta’ “organizzazzjoni ta’ protezzjoni u ta’ difiża ċivili” ma jistax jiżgura b’ċertezza li l-entitajiet benefiċjarji ta’ dan l-istatus ma għandux skop ta’ profitt. |
57 |
Madankollu, għandu jiġi enfasizzat li, fl-osservazzjonijiet bil-miktub tagħha, l-Arbeiter-Samariter-Bund Regionalverband Bergisch-Land (l-Assoċjazzjoni Reġjonali tal-Land ta’ Bergisch tal-Unjoni tal-Ħaddiema Samaritani) sostniet li, taħt piena li jitneħħilha l-istatus tagħha bħala organizzazzjoni mingħajr skop ta’ profitt, persuna għandha, konformement mal-Artikolu 52 tal-Abgabenordnung (il-Kodiċi tat-Taxxi), teżerċita, b’mod kostanti, attività maħsuba biex tipprovdi b’mod diżinteressat lill-kollettività benefiċċji fil-qasam materjali, spiritwali jew morali. |
58 |
F’dan ir-rigward, hija l-qorti tar-rinviju li għandha tevalwa jekk it-tieni sentenza tal-punt 4 tal-Artikolu 107(1) tal-GWB, moqri flimkien mal-Artikolu 52 tal-Kodiċi tat-taxxi, jistax jiġi interpretat b’mod konformi mar-rekwiżiti li jirriżultaw mill-Artikolu 10(h) tad-Direttiva 2014/24. |
59 |
Fit-tieni lok, jikkostitwixxu “organizzazzjonijiet jew assoċjazzjonijiet mingħajr skop ta’ profitt” fis-sens tal-Artikolu 10(h) tad-Direttiva 2014/24, l-organizzazzjonijiet jew l-assoċjazzjonijiet li għandhom bħala skop li jadottaw kompiti soċjali, li ma għandhomx skop kummerċjali u li jerġgħu jinvestu l-profitti eventwali bil-għan li jiksbu l-għanijiet tal-organizzazzjoni jew tal-assoċjazzjoni. |
60 |
F’dan ir-rigward, għandu jiġi kkonstatat, hekk kif irrileva l-Avukat Ġenerali fil-punti 74 sa 77 tal-konklużjonijiet tiegħu, li l-organizzazzjonijiet jew l-assoċjazzjonijiet mingħajr skop ta’ profitt imsemmija fil-premessa 28 tad-Direttiva 2014/24 ma għandhomx jissodisfaw, barra minn hekk, ir-rekwiżiti stabbiliti fl-Artikolu 77(2) ta’ din id-Direttiva. Fil-fatt, ma hemmx ekwivalenza bejn, minn naħa, dawn l-organizzazzjonijiet jew l-assoċjazzjonijiet kkonċernati mill-imsemmija premessa 28 u, min-naħa l-oħra, l-“organizzazzjonijiet li huma bbażati fuq is-sjieda tal-impjegat jew il-parteċipazzjoni attiva tal-impjegat fit-tmexxija tagħhom”, kif ukoll l-“organizzazzjonijiet eżistenti bħal kooperattivi”, li ssemmi l-premessa 118 ta’ din l-istess direttiva. Għaldaqstant, lanqas ma jista’ jkun hemm ekwivalenza bejn l-Artikolu 10(h) tad-Direttiva 2014/24, li jeskludi ċerti attivitajiet tal-organizzazzjonijiet jew tal-assoċjazzjonijiet mingħajr skop ta’ profitt mill-kamp ta’ din id-direttiva, u l-Artikolu 77 tal-imsemmija Direttiva, li jissuġġetta ċerti attivitajiet tal-organizzazzjonijiet ibbażati fuq is-sjieda tal-ishma mill-impjegati jew fuq il-parteċipazzjoni attiva tagħhom fil-governanza tal-organizzazzjoni u tal-organizzazzjonijiet eżistenti, bħall-kooperattivi, għal sistema inqas stretta prevista fl-Artikoli 74 sa 77 tad-Direttiva 2014/24. |
61 |
Għalhekk, ir-risposta għat-tieni u għat-tielet domanda għandha tkun li l-Artikolu 10(h) tad-Direttiva 2014/24 għandu jiġi interpretat fis-sens, minn naħa, li jipprekludi li assoċjazzjonijiet ta’ utilità pubblika rrikonoxxuti mil-liġi nazzjonali bħala organizzazzjonijiet ta’ protezzjoni u ta’ difiża ċivili jitqiesu bħala “organizzazzjonijiet jew assoċjazzjonijiet mingħajr skop ta’ profitt”, fis-sens ta’ din id-dispożizzjoni, sa fejn ir-rikonoxximent tal-istatus ta’ assoċjazzjoni ta’ utilità pubblika ma huwiex suġġett fil-liġi nazzjonali għan-nuqqas ta’ skop ta’ profitt, u, min-naħa l-oħra, li l-organizzazzjonijiet jew l-assoċjazzjonijiet li għandhom l-għan li jassumu kompiti soċjali, li huma nieqsa minn kull skop kummerċjali, u li jerġgħu jinvestu l-profitti eventwali bil-għan li jinkiseb l-għan tal-organizzazzjoni jew tal-assoċjazzjoni, jikkostitwixxu “organizzazzjonijiet jew assoċjazzjonijiet mingħajr skop ta’ profitt” skont l-imsemmija dispożizzjoni. |
Fuq l-ispejjeż
62 |
Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura. |
Għal dawn il-motivi, Il-Qorti tal-Ġustizzja (It-Tielet Awla) taqta’ u tiddeċiedi: |
|
|
Firem |
( *1 ) Lingwa tal-kawża: il-Ġermaniż.