1.

Il-flus elettroniċi huma flus foloz, jew flus imitattivi? ( 2 )

2.

Dan ir-rinviju għal deċiżjoni preliminari, ippreżentat mil-Lietuvos vyriausiasis administracinis teismas (il-Qorti Amministrattiva Suprema, il-Litwanja), jirrigwarda l-interpretazzjoni tal-Artikolu 5(2) u tal-Artikolu 6(1)(a) tad-Direttiva 2009/110/KE ( 3 ). Huwa ġie ppreżentat fil-kuntest ta’ tilwima bejn “Paysera LT” UAB, qabel “EVP International” UAB (iktar ’il quddiem “Paysera”) u Lietuvos bankas (Bank [Ċentrali] tal-Litwanja), fir-rigward tal-metodi ta’ kalkolu tal-fondi proprji li għandhom japplikaw għal ċerti tranżazzjonijiet ta’ ħlas u tal-klassifikazzjoni ta’ ċerti tranżazzjonijiet bħala servizzi ta’ ħlas “marbuta mal-ħruġ ta’ flus elettroniċi”.

3.

Skont il-premessa 11 tad-Direttiva DME II:

“Hemm bżonn ta’ reġim ta’ kapital inizjali magħqud ma’ wieħed ta’ kapital kurrenti sabiex ikun żgurat livell xieraq ta’ ħarsien tal-konsumatur u l-operat sod u prudenti tal-istituzzjonijiet tal-flus elettroniċi. Minħabba l-ispeċifiċità tal-flus elettroniċi, għandu jsir provvediment għal metodu addizzjonali għall-kalkolu ta’ kapital kurrenti. Għandha tinżamm diskrezzjoni superviżorja sħiħa sabiex ikun żgurat li l-istess riskji jkunu ttrattati bl-istess mod għall-fornituri kollha tas-servizzi tal-ħlas u li jinżamm il-metodu ta’ kalkolu li jinkludi s-sitwazzjoni speċifika tan-negozju ta’ istituzzjoni tal-flus elettroniċi partikulari. Barra minn hekk, għandu jsir provvediment biex l-istituzzjonijiet tal-flus elettroniċi jkunu meħtieġa jżommu l-fondi tad-detenturi tal-flus elettroniċi mifruda minn fondi tal-istituzzjoni tal-flus elettroniċi għal skopijiet ta’ negozju ieħor. Istituzzjonijiet tal-ħlas elettroniku għandhom ukoll ikunu suġġetti għal rekwiżiti effettivi kontra l-ħasil tal-flus u kontra l-finanzjament tat-terroriżmu”.

4.

Skont il-punt (2) tal-Artikolu 2 tad-Direttiva DME II, intitolat “Definizzjonijiet”, il-flus elettroniċi huma “valur monetarju maħżun elettronikament, anke b’mod manjetiku, kif rappreżentat minn pretensjoni fuq l-emittent li tinħareġ malli jiġu rċevuti l-fondi għall-iskop ta’ tranżazzjonijiet ta’ ħlas kif definiti fil-punt 5 tal-Artikolu 4 tad-Direttiva 2007/64/KE u li huwa aċċettat minn persuna ġuridika għajr l-emittent tal-flus elettroniċi”.

5.

L-Artikolu 5(2) u (3) tad-Direttiva DME II, intitolat “Fondi proprji”, jipprovdi:

“2.   Fir-rigward tal-attivitajiet imsemmija fil-punt (a) tal-Artikolu 6(1) li mhumiex marbuta mal-ħruġ tal-flus elettroniċi, ir-rekwiżiti dwar il-fondi proprji ta’ istituzzjoni tal-flus elettroniċi għandhom ikunu kkalkulati skont wieħed minn tliet metodi (A, B jew C) stipulati fl-Artikolu 8(1) u (2) tad-Direttiva 2007/64/KE. Il-metodu x-xieraq għandu jiġi determinat mill-awtoritajiet kompetenti konformement mal-leġiżlazzjoni nazzjonali.

Għall-attività tal-ħruġ ta’ flus elettroniċi, ir-rekwiżit dwar il-fondi proprji ta’ istituzzjoni tal-flus elettroniċi għandhom ikunu kkalkulati skont il-Metodu D stipulat fil-paragrafu 3.

L-istituzzjonijiet tal-flus elettroniċi dejjem għandu jkollhom fondi proprji li jkunu mill-inqas ugwali għas-somma ta’ rekwiżiti msemmija fl-ewwel u t-tieni subparagrafi, jew daqshom.

3.   Metodu D: Il-fondi proprji ta’ istituzzjoni tal-flus elettroniċi għall-attività ta’ ħruġ ta’ flus elettroniċi għandhom jammontaw għal mill-anqas 2 % tal-medja ta’ flus elettroniċi pendenti”.

6.

L-Artikolu 6 tad-Direttiva DME II, intitolat “Attivitajiet” jipprovdi fil-paragrafu 1(a) tiegħu:

“1.   Apparti mill-ħruġ tal-flus elettroniċi, l-istituzzjonijiet tal-flus elettroniċi jkunu intitolati jidħlu għal kwalunkwe waħda mill-attivitajiet li ġejjin:

7.

L-Artikolu 11 tad-Direttiva DME II, intitolat “Ħruġ u rimborżabbiltà” jipprovdi, fil-paragrafi 1 u 2 tiegħu:

“1.   L-Istati Membri għandhom jiżguraw li l-emittenti ta’ flus elettroniċi jemettu l-flus elettroniċi bil-parità kontabbli bħalma jkun hemm fuq l-irċevuta tal-fondi.

2.   L-Istati Membri għandhom jiżguraw li, fuq talba tad-detentur tal-flus elettroniċi, l-emittenti tal-flus elettroniċi jirrimborżaw, f’kull ħin u bil-parità kontabbli, il-valur monetarju tal-flus elettroniċi miżmuma”.

8.

Il-punti 3 u 5 tal-ewwel paragrafu tal-Artikolu 4 tad-Direttiva 2007/64/KE ( 4 ), intitolat “Definizzjonijiet”, jipprevedi wkoll il-kunċetti ta’ “servizzi ta’ ħlas” u ta’ “tranżazzjoni ta’ ħlas”:

[…]

9.

L-Artikolu 8 tad-Direttiva DSP, intitolat “Il-kalkolu tal-fondi proprji”, jipprovdi fil-paragrafi 1 u 2 tiegħu:

“1.   Minkejja r-rekwiżiti ta’ kapital inizjali stabbiliti fl-Artikolu 6, l-Istati Membri għandhom jirrikjedu li l-istituzzjonijiet tal-ħlas dejjem ikollhom fondi proprji kkalkolati skond wieħed minn dawn it-tliet metodi, kif determinat mill-awtoritajiet kompetenti skond il-leġiżlazzjoni nazzjonali:

Metodu A

Il-fondi proprji ta’ l-istituzzjoni tal-ħlas għandhom jammontaw għal mill-inqas 10 % ta’ l-ispejjeż ġenerali fissi tagħha tas-sena preċedenti. L-awtoritajiet kompetenti jistgħu jaġġustaw dik il-ħtieġa fil-każ ta’ bidla materjali fin-negozju ta’ l-istituzzjoni tal-ħlas mis-sena preċedenti ’l hawn. Fejn istituzzjoni tal-ħlas ma tkunx għadha temmet sena sħiħa ta’ negozju fid-data tal-kalkolu, il-ħtieġa għandha tkun li l-fondi tagħha jammontaw għal mill-inqas 10 % ta’ l-ispejjeż ġenerali fissi korrispondenti kif previst fil-pjan tan-negozju, sakemm l-awtoritajiet kompetenti ma jirrikjedux aġġustament għal dak il-pjan.

Metodu B

Il-fondi proprji ta’ l-istituzzjoni tal-ħlas għandhom jammontaw għal mill-inqas is-somma ta’ l-elementi li ġejjin multiplikati b’fattur ta’ skalar k, stabbilit fil-paragrafu 2, fejn il-volum tal-ħlas (payment volume – PV) jirrappreżenta parti waħda minn tnax ta’ l-ammont totali tat-transazzjonjiet ta’ ħlas mwettqa mill-istituzzjoni tal-ħlas fis-sena preċedenti:

flimkien ma’

flimkien ma’

flimkien ma’

flimkien ma’

Metodu Ċ

Il-fondi proprji ta’ l-istituzzjoni tal-ħlas għandhom jammontaw għal mill-inqas l-indikatur rilevanti kif definit fil-punt (a),suġġett għall-fattur multiplikatur stabbilit fil-punt (b) kif ukoll għall-fattur ta' skalar k stabbilit fil-paragrafu 2.

2.   Il-fattur ta’ scalar k li għandu jintuża fil-Metodi B u Ċ fuq għandu jkun:

10.

L-Anness tad-Direttiva DSP intitolat “Servizzi ta’ ħlas (It-tielet punt ta’ l-Artikolu 4)”, jistabbilixxi l-lista ta’ attivitajiet meqjusa bħala tali:

“1.   Servizzi li jippermettu li flus kontanti jiġu mqiegħda f’kont tal-ħlas kif ukoll l-operazzjonijiet kollha meħtieġa għat-tħaddim ta’ kont tal-ħlas.

2.   Servizzi li jippermettu ġbid ta’ flus kontanti minn kont tal-ħlas kif ukoll l-operazzjonijiet kollha meħtieġa għat-tħaddim ta’ kont tal-ħlas.

3.   Eżekuzzjoni ta’ transazzjonjiet ta’ ħlas, inkluż trasferiment ta’ fondi fuq kont tal-ħlas mal-fornitur ta’ servizzi ta’ ħlas jew ma’ fornitur ta’ servizzi ta’ ħlas ieħor:

4.   Eżekuzzjoni ta’ transazzjonjiet ta’ ħlas fejn il-fondi huma koperti minn linja ta’ kreditu għal utent ta’ servizzi ta’ ħlas:

5.   Il-ħruġ u/jew il-kisba ta’ strumenti tal-ħlas.

6.   Rimessa ta’ flus.

7.   Eżekuzzjoni ta’ transazzjonjiet ta’ ħlas fejn il-kunsens ta’ min iħallas għall-eżekuzzjoni ta’ transazzjoni ta’ ħlas jingħata permezz ta’ kwalunkwe apparat tat-telekomunikazzjoni, diġitali jew ta’ l-IT u l-ħlas isir lill-operatur tat-telekomunikazzjoni, sistema jew operatur tan-network ta’ l-IT, li jaġixxi biss bħala intermedjarju bejn l-utent ta’ servizzi ta’ ħlas u l-fornitur tal-merkanzija jew is-servizzi”.

11.

Paysera hija kumpannija Litwana li għandha liċenzji għall-operat ta’ stabbiliment ta’ flus elettroniċi u ta’ stabbiliment ta’ ħlas mogħtija mill-Bank tal-Litwanja, li jagħtuha d-dritt għall-ħruġ ta’ flus elettroniċi u għall-provvista ta’ servizzi marbuta mal-ħruġ ta’ dawn il-flus, kif ukoll ta’ servizzi ta’ ħlas oħra.

12.

Wara spezzjoni tal-attività tar-rikorrenti fil-kawża prinċipali mwettqa mill-Bord ta’ Sorveljanza tal-Bank tal-Litwanja, ġie kkonstatat, permezz tad-deċiżjoni kkontestata, li din ir-rikorrenti ma kinitx osservat il-metodi ta’ kalkolu tal-fondi proprji, peress li l-Bank tal-Litwanja qies li s-servizzi inkwistjoni ma kinux marbuta mal-ħruġ ta’ flus elettroniċi.

13.

Fil-fatt, is-servizzi marbuta mal-ħruġ ta’ flus elettroniċi huma suġġetti għal obbligi ta’ żamma ta’ fondi proprji kkalkolati skont il-Metodu D, stabbilit fl-Artikolu 5(3) tad-Direttiva DME II, li jeżiġi li dawn l-istabbilimenti jkollhom kapital permanenti inqas minn dak rikjest għal dawk li jipprovdu servizzi ta’ ħlas mhux marbuta mal-ħruġ ta’ flus elettroniċi u li għalihom ir-rekwiżiti dwar fondi proprji huma kkalkolati skont il-Metodi A, B u Ċ, stabbiliti fl-Artikolu 8(1) u (2) tad-Direttiva DSP.

14.

B’mod partikolari, il-Bord ta’ Sorveljanza rrifjuta li jirrikonoxxi bħala servizzi ta’ ħlas marbuta mal-ħruġ ta’ flus elettroniċi l-attivitajiet li ġejjin imwettqa mir-rikorrenti:

15.

Għalhekk, il-qorti tar-rinviju tistaqsi dwar jekk dawn iż-żewġ servizzi għandhomx jiġu kklassifikati bħala servizzi marbuta mal-ħruġ ta’ flus elettroniċi jew bħala servizzi mhux marbuta mal-ħruġ ta’ flus elettroniċi.

16.

F’dawn iċ-ċirkustanzi, il-Lietuvos vyriausiasis administracinis teismas (il-Qorti Amministrattiva Suprema, il-Litwanja) iddeċidiet li tissospendi l-proċeduri quddiemha u tagħmel lill-Qorti tal-Ġustizzja d-domanda preliminari li ġejja:

“L-Artikolu 5(2) moqri flimkien mal-Artikolu 6(1)(a) tad-[Direttiva DME II], għandu jiġi interpretat fis-sens li, fiċ-ċirkustanzi tal-każ ineżami, huma meqjusa bħala servizzi ta’ ħlas marbuta (jew mhux marbuta) mal-ħruġ ta’ flus elettroniċi:

17.

Ebda waħda mill-partijiet fil-kawża prinċipali ma qieset li kien neċessarju li tippreżenta osservazzjonijiet f’din il-proċedura. Il-Gvern Litwan, il-Gvern Pollakk u l-Kummissjoni Ewropea ppreżentaw osservazzjonijiet bil-miktub. Il-Gvern Litwan u l-Kummissjoni pparteċipaw fis-seduta li nżammet fis-27 ta’ Ġunju 2018.

18.

Fl-ewwel lok, il-Gvern Litwan iqis, għall-kuntrarju tal-qorti tar-rinviju, li l-kunċett ta’ “ħruġ ta’ flus elettroniċi” ma jistax jinkludi l-ħruġ u r-rimbors effettiv tal-flus elettroniċi.

19.

L-attività ta’ ħruġ ta’ flus elettroniċi għandha titqies biss bħala l-iskambju ta’ forma nominali ta’ valur monetarju bit-trasferiment ta’ dan il-valur fuq mezz elettroniku sabiex il-persuni, billi jaċċettaw il-flus elettroniċi maħruġa mill-istabbiliment ta’ flus elettroniċi bħala forma ta’ ħlas, ikunu jistgħu jwettqu tranżazzjonijiet bejniethom permezz ta’ dan il-valur. Barra minn hekk, ladarba d-detentur ta’ flus elettroniċi jirrimborsa l-flus elettroniċi li huwa għandu għall-valur monetarju nominali, huwa ma jkunx jista’ jwettaq iktar it-tranżazzjonijiet ta’ ħlas fi flus elettroniċi b’dan il-valur monetarju.

20.

Fit-tieni lok, dwar il-kunċett ta’ servizzi ta’ ħlas marbuta mal-ħruġ ta’ flus elettroniċi, il-Gvern Litwan isostni li l-applikazzjoni ta’ metodi differenti ta’ kalkolu tal-fondi proprji għandha l-effett li r-rekwiżit ta’ kapital permanenti ta’ stabbilimenti ta’ flus elettroniċi li jipprovdu servizzi ta’ ħlas mhux marbuta mal-ħruġ ta’ flus elettroniċi huwa ikbar minn dak tal-istabbilimenti ta’ flus elettroniċi li ma jipprovdux servizzi ta’ ħlas mhux marbuta mal-ħruġ ta’ tali flus.

21.

Il-kriterju prinċipali sabiex jiġi evalwat jekk servizzi ta’ ħlas partikolari għandhomx jitqiesu li huma marbuta mal-ħruġ ta’ flus elettroniċi huwa l-estensjoni tar-riskju potenzjali f’kull każ konkret. Dan huwa kkonfermat mill-proposta tal-Kummissjoni tad-9 ta’ Ottubru 2008 ( 5 ), li tinkludi b’mod partikolari modifika tar-rekwiżiti fil-qasam tal-kapital permanenti fil-proposta ta’ direttiva ġdida, b’metodi ġodda ta’ kalkolu bbażati fuq in-natura tal-istabbilimenti ta’ flus elettroniċi u n-natura tar-riskju.

22.

Ir-rekwiżiti l-iktar rigorużi fil-qasam tal-kalkolu tal-kapital huma għalhekk imposti fuq l-istabbilimenti li jipprovdu servizzi ta’ ħlas mhux marbuta mal-ħruġ ta’ flus elettroniċi, peress li dawn iwettqu firxa iktar wiesgħa ta’ servizzi ta’ ħlas.

23.

Il-Gvern Litwan ifakkar, l-ewwel nett, li kienet l-adozzjoni tad-Direttiva DME II li ppermettiet lill-istabbilimenti ta’ kummerċ elettroniku jiżviluppaw l-attività tagħhom sabiex jipprovdu, minbarra servizzi marbuta strettament mal-ħruġ ta’ flus elettroniċi, servizzi ta’ ħlas elenkati fl-Anness tad-Direttiva DSP, u b’mod partikolari, l-għoti ta’ ċerti krediti.

24.

It-tieni nett, jekk jiġu pprovduti servizzi ta’ ħlas mhux marbuta mal-ħruġ ta’ flus elettroniċi, ir-riskju eventwali jkopri mhux biss id-detenturi ta’ flus elettroniċi, iżda wkoll lit-terzi persuni li ma jipparteċipawx fis-sistema (iċ-ċirku ta’ dawn it-terzi persuni jista’ jkun wiesa’ ħafna u indefinit) u li għalhekk ma kkonkludewx kuntratt ma’ stabbiliment ta’ flus elettroniċi – u konsegwentement, id-difiża tal-interessi tagħhom hija iktar limitata.

25.

Skont il-Gvern Litwan, għandhom jiġu ssodisfatti żewġ kundizzjonijiet kumulattivi sabiex servizz jitqies li huwa marbut mal-ħruġ ta’ flus elettroniċi: i) il-flus elettroniċi għandhom jinħarġu fil-mument tas-servizz; u ii) is-servizz għandu jitwettaq bejn parteċipanti fis-sistema ta’ flus elettroniċi.

26.

Dwar ir-relazzjoni bejn is-servizz I u l-ħruġ ta’ flus elettroniċi, il-Gvern Litwan jiddikjara li ma hemmx dubju dwar il-fatt li qabel ma jibda jitwettaq is-servizz I, il-flus elettroniċi għandhom ikunu diġà nħarġu u huwa jqis li s-servizz I jikkorrispondi għal trasferiment ta’ kreditu kif previst fil-punt 3 tat-tielet inċiż tal-Anness tad-Direttiva DSP.

27.

Sabiex jitwettqu t-trasferimenti ta’ krediti lejn il-kontijiet bankarji, il-klijenti ta’ stabbilimenti ta’ kreditu ma jaċċettawx flus elettroniċi, iżda fondi, li jinġabru ladarba l-flus elettroniċi jiġu kkonvertiti għall-valur monetarju nominali tagħhom. Għalhekk, is-servizz I huwa tranżazzjoni li permezz tagħha l-istabbiliment ta’ flus elettroniċi (l-emittenti) jittrasferixxi, fuq talba tad-detentur ta’ flus elettroniċi, il-flus elettroniċi, wara li jkun ikkonvertihom għall-valur monetarju nominali tagħhom, fil-kont ta’ terzi fi stabbiliment ta’ kreditu.

28.

Għalhekk, it-tranżazzjoni ta’ ħlas titwettaq bejn id-detentur tal-flus elettroniċi u terz. Dan huwa għalhekk ħlas “li joħroġ”. Tali ħlas ma jistax jitqies li huwa marbut mal-ħruġ ta’ flus elettroniċi ħlief jekk isir bejn żewġ parteċipanti fis-sistema ta’ flus elettroniċi.

29.

Il-Gvern Litwan jenfasizza wkoll li s-servizz I ma huwiex marbut jew meqjus bħala identiku għal rimbors tal-flus elettroniċi. Fil-fatt, skont l-Artikolu 11(2) tad-Direttiva DME II, rimbors ta’ flus elettroniċi huwa biss il-ħlas lura lid-detentur ta’ flus elettroniċi ta’ riżorsi monetarji bil-valur nominali.

30.

Barra minn hekk, din id-definizzjoni hija koerenti mal-għanijiet tad-Direttiva DME II, stabbiliti fil-preambolu tagħha, intiżi sabiex jippreżervaw u jsaħħu l-fiduċja tad-detenturi ta’ flus elettroniċi li fi kwalunkwe mument jistgħu jirkuprawhom bil-valur nominali tagħhom.

31.

Fil-każ tas-servizz I, il-flus elettroniċi ma jistgħux jitħallsu lura lid-detentur ta’ flus elettroniċi bil-valur nominali tagħhom. L-għan tad-detentur ta’ flus elettroniċi huwa li jwettaq il-ħlasijiet u r-regolamenti fir-rigward ta’ beni u servizzi. Il-mod u l-forma tar-rimbors tal-flus għandhom, barra minn hekk, importanza determinanti sabiex jiġi stabbilit jekk servizz partikolari għandux jitqies bħala rimbors tal-flus elettroniċi jew servizz ta’ ħlas mhux marbut mal-ħruġ ta’ flus elettroniċi.

32.

Dwar ir-relazzjoni bejn is-servizz II u l-ħruġ ta’ flus elettroniċi, il-Gvern Litwan ifakkar li dan huwa pprovdut kif ġej: 1) fuq ordni tal-bejjiegħ, ix-xerrej iħallas għall-beni jew għas-servizzi permezz ta’ trasferiment ta’ fondi fil-kont bankarju tal-applikant u 2) ladarba jiġu riċevuti l-fondi, l-istabbiliment ta’ flus elettroniċi joħroġ mill-ewwel il-flus elettroniċi li huwa jittrasferixxi fil-kont ta’ flus elettroniċi tan-negozjant.

33.

Għalhekk, fl-ewwel lok, ma huwiex ikkontestat li, waqt is-servizz II, il-fondi riċevuti min-naħa tal-klijent jiġu kkonvertiti fi flus elettroniċi u kkreditati lill-kont tad-detentur ta’ flus elettroniċi. Madankollu, il-ħlas innifsu jitwettaq bil-valur nominali u mhux fi flus elettroniċi. It-tranżazzjoni ta’ ħlas titqies kompluta meta l-istabbiliment ta’ flus elettroniċi jirċievi l-fondi fil-kont tiegħu fi stabbiliment ta’ kreditu. Il-flus elettroniċi jinħarġu biss wara. Dan il-ħruġ sussegwenti tal-flus elettroniċi huwa biss ir-riżultat tal-fatt li kuntratt korrispondenti huwa konkluż bejn il-fornitur tal-beni u/jew il-fornitur ta’ servizzi, minn naħa, u l-istabbiliment ta’ flus elettroniċi, min-naħa l-oħra. Is-servizz II lanqas ma jissodisfa t-tieni kriterju stabbilit mill-Gvern Litwan, peress li dan jitwettaq bejn terz u detentur ta’ flus elettroniċi.

34.

Fit-tieni lok, dan il-każ jirrigwarda ħlas “li jidħol” fis-sistema ta’ flus elettroniċi u mhux ħlas “imwettaq” fi ħdan din is-sistema, bejn il-parteċipanti tagħha.

35.

Għalhekk, is-servizz II lanqas ma jista’ jitqies bħala servizz marbut mal-ħruġ ta’ flus elettroniċi.

36.

Il-Gvern Pollakk iqis, qabelxejn, li l-espressjoni “servizzi ta’ ħlas li ma humiex marbuta mal-ħruġ ta’ flus elettroniċi” għandha tinftiehem fis-sens li tirreferi għas-servizzi ta’ ħlas, iċċitati fid-Direttiva DSP u pprovduti minn stabbiliment partikolari, mingħajr ħruġ ta’ flus elettroniċi, għat-twettiq ta’ dawn is-servizzi ta’ ħlas. Għall-kuntrarju, is-servizzi ta’ ħlas marbuta mal-ħruġ ta’ flus elettroniċi huma s-servizzi ta’ ħlas imwettqa bi ħruġ ta’ flus elettroniċi minn stabbiliment ta’ flus elettroniċi partikolari.

37.

Għaldaqstant, stabbiliment ta’ flus elettroniċi li jeżerċita l-attività ta’ ħruġ ta’ flus elettroniċi u ta’ provvista ta’ servizzi ta’ ħlas marbuta ma’ dan il-ħruġ għandu jżomm il-fondi proprji tiegħu, tal-inqas fil-livell ikkalkolat skont il-Metodu D, previst mid-Direttiva DME II.

38.

Madankollu, jekk dan l-istabbiliment jipprovdi wkoll servizzi ta’ ħlas oħra, b’mod partikolari fir-rigward ta’ ħlasijiet fi flus skritturali, il-livelli minimi ta’ fondi proprji meħtieġa għandhom għalhekk jiġu kkalkolati skont il-Metodi A, B jew Ċ, stabbiliti fl-Artikolu 8(1) u (2) tad-Direttiva DSP.

39.

Din l-interpretazzjoni hija kkorroborata mill-Artikolu 2(2) tad-Direttiva DME II li jiddefinixxi l-flus elettroniċi.

40.

L-ewwel nett, il-flus elettroniċi ma jistgħux jiġu assimilati mal-flus skritturali u ma jistgħux jiġu assoċjati magħhom. Fil-fatt, dawn tal-aħħar jikkostitwixxu entrata kontabbli fil-kotba tal-istabbiliment ta’ ħlas jew tal-bank fil-kont bankarju tal-klijent, li tindika l-eżistenza ta’ obbligu tal-istabbiliment ta’ ħlas li jħallas (jirrimborsa) somma ta’ flus partikolari. Il-ħlas imwettaq fi flus skritturali u għalhekk permezz tal-intervent ta’ stabbilimenti ta’ ħlas jew ta’ bank, ma jikkostitwixxix de jure l-provvista ta’ servizz monetarju miftiehem bħala trasferiment ta’ kontroll fuq il-flus kontanti, iżda biss trasferiment tal-pretensjoni tal-ħlas ta’ ammont partikolari fi flus kontanti u tar-regolament marbut miegħu, flimkien mas-sostituzzjoni tad-debitur, jekk il-pagatur u d-destinatarju tal-ħlas joperaw flimkien ma’ stabbilimenti ta’ ħlas jew banek oħra.

41.

It-tieni nett, il-flus elettroniċi, għall-kuntrarju tal-flus skritturali, ma humiex entrata kontabbli li tesprimi l-obbligu ta’ ħlas fi flus kontanti, iżda valur monetarju maħruġ u miżmum f’forma elettronika, inkluż manjetika, marbut mal-obbligu ta’ xiri sistematiku, mingħand id-detentur tagħhom, mill-emittenti. Għalhekk, dawn jikkonsistu fi trasferiment tal-kontroll fuq valuri monetarji bejn il-pagatur u d-destinatarju tal-ħlas.

42.

Il-flus elettroniċi huma għalhekk simili għal flus kontanti, li jiffunzjonaw ukoll permezz ta’ trasferiment ta’ kontroll. Id-differenza tinsab fin-natura intanġibbli ta’ dawn il-flus u fl-assenza ta’ obbligu ġenerali li jiġu aċċettati.

43.

Il-valur monetarju jinħareġ inkambju għal flus kontanti jew għal flus skritturali u jwassal għal obbligu ta’ trasferiment tal-valur monetarju. It-trasferiment iseħħ permezz tal-ħlas, fi flus kontanti jew f’valur skritturali, korrispondenti għall-valur tal-flus elettroniċi maħruġa inkambju għar-rimbors tal-valur monetarju maħruġ. Wara l-ħruġ ta’ flus elettroniċi, l-emittenti (l-istabbiliment ta’ flus elettroniċi) effettivament ibigħ il-valur monetarju, jiġifieri jqiegħdu għad-dispożizzjoni tax-xerrej, inkambju għal ħlas ta’ ċerta somma ta’ flus u jintrabat, fl-istess ħin, li jixtri dawn il-valuri monetarji mingħand kull wieħed mid-detenturi tagħhom.

44.

Il-flus elettroniċi jinħarġu għalhekk bil-għan li jitwettqu tranżazzjonijiet ta’ ħlas. Għaldaqstant, il-valuri monetarji maħruġa għall-finijiet oħra jew il-valuri monetarji li permezz tagħhom ma huwiex possibbli li jitwettqu tranżazzjonijiet ta’ ħlas, ma jistgħux jitqiesu bħala flus elettroniċi. Barra minn hekk, il-flus elettroniċi għandhom jiġu aċċettati minn tal-inqas minn żewġ persuni għajr l-emittent.

45.

Għalhekk, jekk il-preżunzjoni ta’ servizz ta’ ħlas partikolari tippresupponi li t-tranżazzjonijiet ta’ ħlas kollha jitwettqu permezz tal-flus skritturali maħluqa wara x-xiri ta’ flus elettroniċi, dan jimplika li s-servizz inkwistjoni ma jistax jitqies bħala servizz marbut mal-ħruġ ta’ flus elettroniċi.

46.

Għalhekk, ma jistgħux jitqiesu bħala servizzi marbuta mal-ħruġ ta’ flus elettroniċi, is-servizzi li huma implimentati permezz tal-użu tal-flus skritturali ġġenerati wara konverżjoni preliminari ta’ flus elettroniċi fi flus bankarji, bil-għan li l-flus skritturali jerġgħu jidhru fuq kont bankarju tad-destinatarju tal-ħlas. Għal raġunijiet simili, lanqas ma jistgħu jitqiesu bħala servizzi marbuta mal-ħruġ ta’ flus elettroniċi s-servizzi ta’ ħlas li jikkonsistu fl-aċċettazzjoni ta’ ħlas fi flus skritturali, segwiti mill-konverżjoni tal-fondi riċevuti fi flus elettroniċi.

47.

Konsegwentement, is-servizzi pprovduti mir-rikorrenti fil-kawża prinċipali ma għandhomx natura ta’ servizzi ta’ ħlas marbuta mal-ħruġ ta’ flus elettroniċi peress li dawn jiġu eżegwiti permezz tal-użu ta’ flus skritturali.

48.

Il-Kummissjoni ssostni, essenzjalment, li għandu jiġi evalwat, każ b’każ, jekk is-servizzi ta’ ħlas inkwistjoni humiex servizzi indipendenti jew anċillari.

49.

Is-servizz I jirrigwarda tranżazzjoni ta’ ħlas li permezz tagħha, fuq ordni tad-detentur tal-flus elettroniċi, l-istabbiliment ta’ flus elettroniċi jirrimborsa l-fondi bil-valur nominali tagħhom u jittrasferixxihom fil-kont bankarju ta’ terz, kif ikkonfermat mill-Artikolu 5(2) tad-Direttiva DME II.

50.

Is-servizz II jirrigwarda servizz ta’ ħlas li permezz tiegħu, fuq ordni tal-bejjiegħ, ix-xerrej tal-beni u/jew tas-servizzi jittrasferixxi fondi fir-rigward ta’ dawn il-beni u/jew servizzi lill-istabbiliment ta’ flus elettroniċi li, wara li jirċievi dawn il-fondi, joħroġ il-flus elettroniċi favur il-bejjiegħ bil-valur nominali tal-fondi riċevuti.

51.

Il-Kummissjoni tqis li l-provvista ta’ servizzi ta’ ħlas, kemm jekk din tkun marbuta mal-ħruġ ta’ flus elettroniċi, kemm jekk le, għandha tiġi evalwata mill-perspettiva tal-istabbiliment ta’ flus elettroniċi. Fil-kuntest tas-servizz II, l-istabbiliment ta’ flus elettroniċi jirċievi mingħand ix-xerrej ta’ beni u/jew servizzi fondi favur id-detentur ta’ flus elettroniċi u joħroġhom mill-ġdid fi flus elettroniċi. Dan is-servizz huwa għalhekk neċessarju sabiex jippermetti l-ħruġ ta’ flus elettroniċi. Ma huwiex servizz indipendenti.

52.

Għalhekk, is-servizzi I u II għandhom jitqiesu bħala servizzi ta’ ħlas marbuta mal-ħruġ ta’ flus elettroniċi.

53.

Bħala introduzzjoni, ser nagħti numru ta’ eżempji magħrufa ta’ flus elettroniċi, bħal Proton fil-Belġju, miniCASH fil-Lussemburgu, Moneo fi Franza jew Geldkarte fil-Ġermanja (kollha fuq mezz ta’ karta) iżda wkoll PayPal fuq livell mondjali (il-flus jinżammu biss fuq netwerk, sa fejn il-materjal huwa “informatiku” jew virtwali) – filwaqt li l-bitcoin ma hijiex flus elettroniċi ( 6 ).

54.

L-għan tad-domanda preliminari huwa l-interpretazzjoni tal-espressjoni “attivitajiet imsemmija fil-punt (a) tal-Artikolu 6(1) [tad-Direttiva DME II] li mhumiex marbuta mal-ħruġ tal-flus elettroniċi”, użata fl-Artikolu 5(2) tal-imsemmija direttiva.

55.

Il-kawża inkwistjoni tqajjem għalhekk il-kwistjoni dwar jekk abbażi ta’ din id-dispożizzjoni: (i) tranżazzjoni ta’ ħlas li permezz tagħha, fuq talba tad-detentur ta’ flus elettroniċi lill-istabbiliment ta’ flus elettroniċi, il-flus elettroniċi (ammonti li għandhom jiġu rrimborsati) jiġu ttrasferiti bil-valur nominali tagħhom fil-kont bankarju ta’ terz; u (ii) tranżazzjoni ta’ ħlas li permezz tagħha, fuq ordni tal-bejjiegħ, ix-xerrej ta’ beni u/jew ta’ servizzi jittrasferixxi, fir-rigward ta’ beni u/jew servizzi mixtrija, fondi lill-istabbiliment ta’ flus elettroniċi (emittenti ta’ flus elettroniċi) li wara li jirċievi tali fondi, joħroġ il-flus elettroniċi favur il-bejjiegħ (detentur ta’ dawn il-flus) bil-valur nominali tal-fondi riċevuti, għandhiex titqies bħala attività “marbuta mal-ħruġ ta’ flus elettroniċi”.

56.

Ir-riskji huma kbar ħafna peress li, skont jekk il-provvista tkunx marbuta mal-ħruġ ta’ flus elettroniċi mill-istabbiliment inkwistjoni jew le, ir-rekwiżiti fil-qasam ta’ fondi proprji jvarjaw, skont l-Artikolu 5(2) tad-Direttiva DME II.

57.

Għalhekk, l-istabbilimenti ta’ flus elettroniċi li għandhom attivitajiet ta’ servizzi marbuta mal-ħruġ ta’ flus elettroniċi għandhom jikkalkolaw il-fondi proprji tagħhom skont il-Metodu D ( 7 ), filwaqt li għal dawk li jeżerċitaw attivitajiet li ma humiex marbuta mal-ħruġ ta’ flus elettroniċi r-rekwiżiti tagħhom fil-qasam ta’ fondi proprji huma kkalkolati skont il-Metodi A, B u Ċ ( 8 ), li jimponu rekwiżiti fil-qasam ta’ fondi proprji iktar rigorużi mill-Metodu D.

58.

Id-domandi tal-qorti tar-rinviju huma marbuta mal-fatt li l-Artikolu 5(2) u l-Artikolu 6(1)(a) tad-Direttiva DME II ma jiddefinixxux ( 9 )“l-attivitajiet [...] li ma humiex marbuta mal-ħruġ tal-flus elettroniċi” (Artikolu 5(2)) u lanqas l-“attivitajiet marbuta” f’dan ir-rigward, u lanqas “is-servizzi ta’ ħlas” [Artikolu 6(1)(a)] li jistgħu jipprovdu l-istabbilimenti ta’ flus elettroniċi, u l-aħħar dispożizzjoni tirreferi biss għal lista li tinsab fl-Anness tad-Direttiva DSP ( 10 ).

59.

Ninnota biss li t-test jitkellem dwar attivitajiet “marbuta” jew le, li jidhirli li jeskludi l-argument tal-Gvern Litwan li, sabiex jaqgħu taħt l-Artikolu 5(2) tad-Direttiva DME II, it-tranżazzjonijiet inkwistjoni għandhom jiġu “integrati” totalment fis-sistema ta’ flus elettroniċi.

60.

Hemm artikoli oħra tad-Direttiva DME II li jistħoqqilhom analiżi.

61.

L-Artikolu 1(1) tad-Direttiva DME II, li jiddefinixxi l-kamp ta’ applikazzjoni tagħha (kif ukoll il-portata leġiżlattiva tagħha) jipprovdi li dan l-att tal-Unjoni jistabbilixxi “r-regoli dwar [il]-ħruġ tal-flus elettroniċi”. L-Artikolu 11(1) ta’ din l-istess direttiva, li jinsab fit-Titolu III intitolat “Emessjoni u rimborżabbiltà ta’ flus elettroniċi”, jeżiġi l-ħruġ ta’ flus elettroniċi bil-valur nominali malli jirċievu l-fondi. Min-naħa tiegħu, l-Artikolu 11(2) tal-imsemmija direttiva jeżiġi r-rimbors tal-flus elettroniċi bil-valur nominali fi kwalunkwe mument fuq talba tad-detentur ta’ dawn il-flus.

62.

Sabiex dawn id-dispożizzjonijiet tal-Artikolu 11 jitqiegħdu fil-kuntest ta’ dispożizzjonijiet oħra tad-Direttiva DME II, jiena tal-fehma li l-qorti tar-rinviju kienet korretta li taħseb li “l-ħruġ ta’ flus elettroniċi” fis-sens tal-imsemmija direttiva jinkludi, fost oħrajn, il-ħruġ ta’ dawn il-flus u r-rimbors tagħhom.

63.

Fil-fatt, wieħed jista’ jqis ukoll li l-għan tal-flus elettroniċi (li jista’ jiġi dedott mid-definizzjoni mogħtija fl-Artikolu 2(2) tad-Direttiva DME II, jiġifieri li jitwettqu tranżazzjonijiet ta’ ħlas) ma jfissirx li huma biss it-tranżazzjonijiet ta’ ħlas permezz ta’ flus elettroniċi li huma marbuta mas-servizzi ta’ ħlas marbuta mal-ħruġ ikkonċernat ta’ flus elettroniċi. Huwa evidenti li l-ħruġ ta’ dawn il-flus u r-rimbors tagħhom normalment iseħħu fil-forma ta’ tranżazzjonijiet ta’ ħlas magħmula minn fondi oħra ( 11 ).

64.

Naħseb (bħall-Kummissjoni) li mill-kunċett ta’ flus elettroniċi ddefinit fl-Artikolu 2(2) tad-Direttiva DME II li jirreferi għal tranżazzjonijiet ta’ ħlas iddefiniti fl-Artikolu 4(5) tad-Direttiva DSP ( 12 ), jirriżulta wkoll li s-servizzi ta’ ħlas marbuta mal-flus elettroniċi jinkludu s-servizzi marbuta mhux biss mal-ħruġ, iżda wkoll mar-rimbors tal-flus elettroniċi.

65.

Il-Gvern Litwan isostni li l-Artikolu 11(1) u (2) tad-Direttiva DME II jagħmel distinzjoni ċara bejn il-ħruġ u r-rimbors u għalhekk ma jistgħux jitqiesu li huma marbuta.

66.

Dan l-argument ma jistax jintlaqa’.

67.

Fil-fatt, għandu jiġi enfasizzat li ċertament, il-ħruġ u r-rimbors huma tabilħaqq żewġ atti distinti u għalhekk huma rregolati mill-Artikolu 11(1) u(2) tad-Direttiva DME II rispettivament. Madankollu, huwa ċar li l-volontà tal-leġiżlatur tal-Unjoni kienet li madankollu dawn ikunu strettament marbuta.

68.

L-Artikolu 11(2) tad-Direttiva DME II jipprovdi li “[l]-Istati Membri għandhom jiżguraw li […] l-emittenti tal-flus elettroniċi jirrimborżaw, f’kull ħin […] il-valur monetarju tal-flus elettroniċi miżmuma”. Għalhekk, id-dritt li jiġu rrimborsati jinħoloq awtomatikament u huwa inkundizzjonat. Għalhekk, dan ma huwiex att awtonomu.

69.

Isegwi li sabiex ikun “marbut”, is-servizz ta’ ħlas inkwistjoni għandu jkun indispensabbli għall-ħruġ jew għar-rimbors ta’ flus elettroniċi.

70.

Jiena naqbel mal-Kummissjoni li mid-Direttiva DME II jirriżulta li s-servizzi ta’ ħlas – marbuta jew le – jistgħu jiġu pprovduti lil hinn mis-sistema ta’ flus elettroniċi.

71.

Huwa normali li kemm il-ħruġ kif ukoll ir-rimbors tal-flus elettroniċi jkollhom dejjem ċerta rabta ma’ kont bankarju klassiku. Kuntrarjament għal dak li jsostni l-Gvern Litwan, f’dan ir-rigward huwa għalhekk irrilevanti jekk il-persuna titlifx il-possibbiltà li tħallas fi flus elettroniċi.

72.

Għalhekk, il-ħruġ tal-flus elettroniċi u r-rimbors tagħhom huma atti separati, iżda mhux awtonomi.

73.

Fil-fatt, il-kunċett ta’ “rimborsabbiltà” għandu jinftiehem bħala l-possibbiltà, għall-konsumatur, li jirkupra l-flus elettroniċi tiegħu fi kwalunkwe mument permezz ta’ trasferiment ta’ kreditu jew fi flus kontanti ( 13 ).

74.

Fi kliem ieħor, il-ħruġ ta’ flus elettroniċi jikkostitwixxi biss parti mill-proċess, bil-parti l-oħra tikkorrispondi għar-rimbors ta’ dawn il-flus ( 14 ).

75.

Din id-duwalità hija spjegata sew minn P. Storrer li jikteb (b’mod partikolari fir-rigward tat-traspożizzjoni tad-Direttiva DME II fid-dritt Franċiż) li “[l]-unitajiet ta’ flus elettroniċi huma msejħa unitajiet ta’ valur, u kull waħda tikkostitwixxi kreditu inkorporat f’titolu […] il-kunċett ta’ kreditu fuq l-emittent huwa karatteristika tal-flus elettroniċi u jippermetti li ssir distinzjoni mill-flus skritturali inseparabbli mir-repożitorju tagħhom, il-kont […] [huwa sempliċement] żewġ aspetti tal-istess titolu [ta’] kreditu – il-pretensjoni għal flus elettroniċi għandha żewġ aspetti, u tiddependi minn jekk tikkonċernax id-detentur: pretensjoni għal rimbors […], jew l-aċċettant: pretensjoni għal konverżjoni […] Naħseb […] li l-flus elettroniċi huma rimborsabbli min-natura, rimbors barra minn hekk suġġett għal sistema dettaljata li tikkostitwixxi aspett essenzjali tad-dritt kuntrattwali tal-flus elettroniċi […] [J]idhirli li l-flus elettroniċi huma pjuttost rimborsabbli min-natura milli skont is-sistema tagħhom. Din ir-rimborsabbiltà żżid kriterju supplimentari għall-identifikazzjoni ta’ prodott ta’ flus elettroniċi iktar milli hija konsegwenza tal-klassifikazzjoni tiegħu” ( 15 ).

76.

Nerġa’ nirreferi għall-Artikolu 11(2) tad-Direttiva DME II, li jeżiġi li l-Istati Membri jiżguraw li l-emittenti ta’ flus elettroniċi jirrimborsaw, fuq talba tad-detentur ta’ flus elettroniċi, fi kwulunkwe mument u bil-valur nominali, il-valur monetarju tal-flus elettroniċi miżmuma (regola analoga hija imposta għall-ħruġ ta’ dawn il-flus permezz tal-paragrafu 1 tal-imsemmi artikolu). Barra minn hekk, il-ħruġ ta’ flus elettroniċi li r-rimbors tagħhom jitwettaq permezz ta’ tranżazzjonijiet ta’ ħlas minn fondi oħra (pereżempju titwettaq tranżazzjoni permezz ta’ karta tal-ħlas jew tranżazzjoni frekwenti ta’ trasferimenti ta’ krediti).

77.

Għalhekk, is-servizzi ta’ ħlas “li ma humiex [marbuta] mal-ħruġ ta’ flus elettroniċi” imsemmija fl-Artikolu 5(2) tad-Direttiva DME II għandhom jinkludu wkoll is-servizzi ta’ ħlas mhux marbuta mar-rimbors tal-flus elettroniċi.

78.

Sa fejn is-servizzi ta’ ħlas marbuta mal-ħruġ (jew mar-rimbors) ta’ flus elettroniċi ma humiex iddefiniti mod ieħor fid-Direttiva DME II, naħseb (bħall-Kummissjoni) li hemm lok li jitqiesu bħala servizzi ta’ ħlas “marbuta mal-ħruġ ta’ flus elettroniċi” (Artikolu 5(2) tad-Direttiva DME II) is-servizzi kollha ta’ ħlas li huma neċessarji sabiex jippermettu l-ħruġ jew ir-rimbors tal-flus elettroniċi. Fi kliem ieħor, dawn is-servizzi għandu jkollhom natura sussidjarja fil-ħruġ ta’ flus elettroniċi.

79.

Għalhekk, għandu jiġi evalwat każ b’każ jekk is-servizzi ta’ ħlas ikkunsidrati humiex servizzi indipendenti jew sussidjarji. Jekk is-servizz ta’ ħlas huwa pprovdut bil-għan li jippermetti l-ħruġ jew ir-rimbors tal-flus elettroniċi, dan is-servizz għandu jitqies bħala marbut miegħu.

80.

L-ewwel każ imqajjem fid-domanda preliminari jirrigwarda tranżazzjoni ta’ ħlas li permezz tagħha, fuq ordni tad-detentur tal-flus elettroniċi, l-istabbiliment ta’ flus elettroniċi jirrimborsa l-fondi bil-valur nominali tagħhom u jittrasferixxihom b’dan il-valur fil-kont bankarju ta’ terz.

81.

It-trasferiment ta’ fondi minn rimbors imwettaq minn stabbiliment ta’ flus elettroniċi huwa strettament marbut mal-ħruġ ta’ flus elettroniċi, li bħalma diġà indikajt, għandu jinkludi wkoll ir-rimbors.

82.

Madankollu, it-trasferiment ta’ dawn il-fondi rrimborsati għandu jifforma parti minn tranżazzjoni waħda u unika imwettqa mill-istabbiliment ta’ flus elettroniċi. Fl-eventwalità li t-trasferiment ta’ fondi rrimborsati fuq kont bankarju ieħor ma jkunx l-għan ta’ tranżazzjoni waħda u unika, l-imsemmi trasferiment għandu jitqies bħala servizz ta’ ħlas indipendenti.

83.

Skont l-Artikolu 7(1) tad-Diretttiva DME II, l-istabbiliment ta’ flus elettroniċi għandu jissalvagwardja, skont l-Artikolu 9(1) u (2) tad-Direttiva DSP, il-fondi li huwa jirċievi inkambju għall-flus elettroniċi maħruġa.

84.

Jiena naqbel mal-opinjoni tal-Kummissjoni li dan ifisser li l-istabbiliment ta’ flus elettroniċi għandu l-obbligu ( 16 ) li jissalvagwardja dawn il-fondi korrispondenti sal-livell ta’ ammonti ta’ flus elettroniċi ddepożitati fil-kontijiet tal-istabbiliment. Min-naħa l-oħra, ma jeżistix obbligu simili għas-salvagwardja tal-fondi ladarba l-flus elettroniċi jiġu rrimborsati. Din ir-regola tista’ tkun ibbażata fuq il-fatt li t-trasferiment ta’ fondi għandu jseħħ immedjatament wara li l-istabbiliment ta’ flus elettroniċi jirrimborsa l-fondi lid-detentur tal-flus elettroniċi. Jekk il-fondi rrimborsati jinżammu għal żmien itwal mill-istabbiliment ta’ flus elettroniċi, l-Artikolu 7(3) tad-Direttiva DME II jipprovdi li r-rekwiżiti fil-qasam ta’ protezzjoni previsti fl-Artikolu 9 tad-Direttiva DSP japplikaw. Isegwi li l-fondi għandhom jiġu ssalvagwardjati sabiex ikun jista’ jiġi pprovdut servizz ta’ ħlas indipendenti skont id-dispożizzjonijiet tad-Direttiva DSP.

85.

Għalhekk, il-qorti tar-rinviju hija korretta meta tikkonkludi fid-digriet tar-rinviju li, sa fejn il-ħruġ tal-flus elettroniċi jinkludi wkoll ir-rimbors tal-flus previst fl-Artikolu 11(2) tad-Direttiva DME II, is-servizz ta’ ħlas ikkonċernat (servizz I) għandu jitqies bħala tranżazzjoni ta’ ħlas “marbuta mal-ħruġ ta’ flus elettroniċi” fis-sens tal-Artikoli 5 u 6 ta’ din id-direttiva, meta l-fondi rrimborsati jiġu ttrasferiti fuq talba tad-detentur tal-flus elettroniċi fil-kont bankarju ta’ terz.

86.

It-tieni każ imqajjem mill-qorti tar-rinviju jirrigwarda s-servizz ta’ ħlas li permezz tiegħu, fuq ordni tal-bejjiegħ, ix-xerrej ta’ beni u/jew servizzi (il-pagatur) jittrasferixxi fondi fir-rigward ta’ dawn il-beni u/jew servizzi lill-istabbiliment ta’ flus elettroniċi (emittent ta’ flus elettroniċi), li wara li jirċievi dawn il-fondi, joħroġ il-flus elettroniċi favur il-bejjiegħ (detentur tal-flus elettroniċi) bil-valur nominali tal-fondi riċevuti.

87.

Kif ġustament tirrileva l-Kummissjoni, il-provvista ta’ servizzi ta’ ħlas, kemm jekk dawn huma marbuta mal-ħruġ ta’ flus elettroniċi, kemm jekk le, għandha titqies mill-perspettiva tal-istabbiliment ta’ flus elettroniċi.

88.

Fil-każ inkwistjoni, l-istabbiliment ta’ flus elettroniċi jirċievi fondi tax-xerrej ta’ beni jew servizzi u jittrasferixxihom lill-bejjiegħ billi joħroġ il-flus elettroniċi. F’dan il-każ, is-servizz ta’ ħlas li fil-kuntest tiegħu l-istabbiliment ta’ flus elettroniċi jirċievi fondi u joħroġ il-flus elettroniċi huwa neċessarju sabiex jippermetti l-ħruġ innifsu ta’ flus elettroniċi; għalhekk ma huwiex servizz indipendenti.

89.

Għaldaqstant, naqbel ukoll mal-qorti tar-rinviju dwar il-fatt li huwa irrilevanti li x-xerrej ta’ beni u/jew ta’ servizzi (il-pagatur) jittrasferixxi (iħallas) il-fondi lir-rikorrenti (l-istabbiliment ta’ flus elettroniċi), mhux sabiex joħroġ il-flus elettroniċi, iżda sabiex iħallas għal beni u/jew servizzi. Dawn ix-xerrejja (il-pagaturi) iwettqu l-ħlas ikkonċernat lir-rikorrenti fir-rigward ta’ beni u/jew servizzi mixtrija fuq ordni tal-operatur (klijent tar-rikorrenti) u dan tal-aħħar ikun ikkonkluda kuntratt mar-rikorrenti, li wara li jirċievi l-fondi kkonċernati min-naħa tax-xerrejja, joħroġ immedjatament il-flus elettroniċi, bil-valur nominali tal-fondi riċevuti. Konsegwentement, l-għan tax-xerrejja ma jipprekludix l-eżistenza ta’ rabta diretta bejn it-tranżazzjoni ta’ ħlas u l-ħruġ ta’ flus elettroniċi.

90.

Għalhekk, jiena tal-opinjoni li t-tieni servizz ta’ ħlas ikkonċernat (servizz II) għandu jitqies ukoll bħala attività “marbuta mal-ħruġ ta’ flus elettroniċi”.

91.

Għal dawn ir-raġunijiet, nipproponi lill-Qorti tal-Ġustizzja tirrispondi kif ġej għad-domanda preliminari magħmula mil-Lietuvos vyriausiasis administracinis teismas (il-Qorti Amministrattiva Suprema, il-Litwanja):

L-Artikolu 5(2) tad-Direttiva 2009/110/KE tal-Parlament Ewropew u tal-Kunsill tas-16 ta’ Settembru 2009 dwar il-bidu, l-eżerċizzju u s-superviżjoni prudenzjali tan-negozju tal-istituzzjonijiet tal-flus elettroniċi li temenda d-Direttivi 2005/60/KE u 2006/48/KE u li tħassar id-Direttiva 2000/46/KE, għandu jiġi interpretat fis-sens li, fiċ-ċirkustanzi tal-kawża prinċipali, jitqiesu bħala servizzi ta’ ħlas marbuta mal-ħruġ ta’ flus elettroniċi, is-servizzi ta’ ħlas: