Appell ippreżentat fl-4 ta’ Awwissu 2016 minn Wolf Oil Corp. mis-sentenza mogħtija mill-Qorti Ġenerali (Imħallef uniku) fl-1 ta’ Ġunju 2016 fil-Kawża T-34/15 – Wolf Oil Corp. vs L-Uffiċċju tal-Proprjetà Intellettwali tal-Unjoni Ewropea

(Kawża C-437/16 P)

(2016/C 428/05)

Lingwa tal-kawża: l-Ingliż

Partijiet

Appellanti: Wolf Oil Corp. (rappreżentanti: P. Maeyaert, J. Muyldermans, advocaten)

Parti oħra fil-proċedura: L-Uffiċċju tal-Proprjetà Intellettwali tal-Unjoni Ewropea

Talbiet

Aggravji u argumenti prinċipali

Bl-appell tagħha, l-appellanti (Wolf Oil) titlob li l-Qorti tal-Ġustizzja tannulla s-sentenza tal-Qorti Ġenerali tal-1 ta’ Ġunju 2016, Wolf Oil vs EUIPO – SCT Lubricants (CHEMPIOIL) (T-34/15, mhux ippubblikata, EU:T:2016:330) (is-“sentenza appellata”) permezz ta’ liema l-Qorti Ġenerali ċaħdet ir-rikors ippreżentat minn Wolf Oil kontra d-deċiżjoni mogħtija mill-Ħames Bord tal-Appell tal-Uffiċċju tal-Proprjetà Intellettwali tal-Unjoni Ewropea (“EUIPO”) fil-31 ta’ Ottubru 2014 (Kawża R 1596/2013-5). L-appell huwa bbażat fuq żewġ aggravji.

Bl-ewwel aggravju tagħha, Wolf Oil issostni li s-sentenza appellata ma hijiex motivata suffiċjentement u li żnaturat il-provi, sa fejn ma tinkludix risposta għal ċertu numru ta’ argumenti u ta’ inkoerenzi invokati minn Wolf Oil insostenn tal-motiv skont liema l-EUIPO ma applikatx korrettament il-probabbiltà ta’ konfużjoni [Artikolu 8(1)(b) tar-Regolament dwar it-trade mark tal-Unjoni Ewropea (1) (kif emendata reċentement permezz tar-Regolament 2015/2424 (2))].

Bit-tieni aggravju tagħha, Wolf Oil tallega li s-sentenza appellata kisret l-Artikolu 8(1)(b) tar-Regolament dwar it-trade mark tal-Unjoni Ewropea, billi applikat b’mod żbaljat il-prinċipji marbuta mal-probabbiltà ta’ konfużjoni. L-aggravju huwa maqsum fi tliet partijiet. L-ewwel żewġ partijiet tat-tieni aggravju huma bbażati fuq interpretazzjoni żbaljata tar-regola stabbilita sew fil-ġurisprudenza tal-Qorti Ġenerali u tal-Qorti tal-Ġustizzja li tgħid li differenzi kunċettwali bejn żewġ trade marks jistgħu, sa ċertu punt, jinnewtralizzaw ix-xebh fuq il-livell viżiv u fonetiku tal-imsemmija trade marks. It-tielet parti tat-tieni aggravju tikkontesta s-sentenza appellata sa fejn, fl-evalwazzjoni globali tal-probabbiltà ta’ konfużjoni, l-użu reali mit-trade mark fis-suq ma tteħidx inkunsiderazzjoni.

(1)  Regolament tal-Kunsill (KE) Nru 207/2009, tas-26 ta’ Frar 2009, dwar it-trade mark Komunitarja (ĠU L 78, p. 1).

(2)  Regolament (UE) 2015/2424 tal-Parlament Ewropew u tal-Kunsill, tas-16 ta’ Diċembru 2015, li jemenda r-Regolament tal-Kunsill (KE) Nru 207/2009 dwar it-trade mark Komunitarja u r-Regolament tal-Kummissjoni (KE) Nru 2868/95 li jimplimenta r-Regolament tal-Kunsill (KE) Nru 40/94 dwar it-trade mark tal-Komunità, u li jħassar ir-Regolament tal-Kummissjoni (KE) Nru 2869/95 dwar id-drittijiet pagabbli lill-Uffiċċju tal-Armonizzazzjoni fis-Suq Intern (Trademarks u Disinji) (ĠU L 341, p. 21).