This document is an excerpt from the EUR-Lex website
Document 62015CJ0044
Judgment of the Court (Ninth Chamber) of 26 November 2015.#Hauptzollamt Frankfurt am Main v Duval GmbH & Co. KG.#Request for a preliminary ruling from the Bundesfinanzhof.#Reference for a preliminary ruling — Customs union and Common Customs Tariff — Tariff classification — Combined Nomenclature — Position 9025 — Concept of ‘thermometer’ — Indicators of exposure to a predetermined target temperature to be used on one occasion only.#Case C-44/15.
Sentenza tal-Qorti tal-Ġustizzja (Id-Disa’ Awla) tas-26 ta’ Novembru 2015.
Hauptzollamt Frankfurt am Main vs Duval GmbH & Co. KG.
Talba għal deċiżjoni preliminari mressqa mill-Bundesfinanzhof.
Rinviju għal deċiżjoni preliminari – Unjoni doganali u Tariffa Doganali Komuni – Klassifikazzjoni tariffarja – Nomenklatura Magħquda – Intestatura 9025 – Kunċett ta’ ‘termometru’ – Indikaturi ta’ espożizzjoni għal temperatura ta’ reazzjoni predeterminata li jintużaw darba biss.
Kawża C-44/15.
Sentenza tal-Qorti tal-Ġustizzja (Id-Disa’ Awla) tas-26 ta’ Novembru 2015.
Hauptzollamt Frankfurt am Main vs Duval GmbH & Co. KG.
Talba għal deċiżjoni preliminari mressqa mill-Bundesfinanzhof.
Rinviju għal deċiżjoni preliminari – Unjoni doganali u Tariffa Doganali Komuni – Klassifikazzjoni tariffarja – Nomenklatura Magħquda – Intestatura 9025 – Kunċett ta’ ‘termometru’ – Indikaturi ta’ espożizzjoni għal temperatura ta’ reazzjoni predeterminata li jintużaw darba biss.
Kawża C-44/15.
Court reports – general
ECLI identifier: ECLI:EU:C:2015:783
SENTENZA TAL-QORTI TAL-ĠUSTIZZJA (Id-Disa’ Awla)
26 ta’ Novembru 2015 ( *1 )
“Rinviju għal deċiżjoni preliminari — Unjoni doganali u Tariffa Doganali Komuni — Klassifikazzjoni tariffarja — Nomenklatura Magħquda — Intestatura 9025 — Kunċett ta’ ‘termometru’ — Indikaturi ta’ espożizzjoni għal temperatura ta’ reazzjoni predeterminata li jintużaw darba biss”
Fil-Kawża C‑44/15,
li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Bundesfinanzhof (qorti federali tal-finanzi, il‑Ġermanja), permezz ta’ deċiżjoni tal-11 ta’ Novembru 2014, li waslet fil-Qorti tal-Ġustizzja fil-5 ta’ Frar 2015, fil-proċedura
Hauptzollamt Frankfurt am Main
vs
Duval GmbH & Co. KG,
IL-QORTI TAL-ĠUSTIZZJA (Id-Disa’ Awla),
komposta minn J. Malenovský, li qed jaġixxi bħala President tal-Awla, A. Prechal (Relatur) u K. Jürimäe, Imħallfin
Avukat Ġenerali: P. Mengozzi,
Reġistratur: A. Calot Escobar,
wara li rat il-proċedura bil-miktub,
wara li kkunsidrat l-osservazzjonijiet ippreżentati:
— |
għall-Hauptzollamt Frankfurt am Main, minn A. Vieth, bħala aġent, |
— |
għal Duval GmbH & Co. KG, minn F.‑F. Casper, avukat, |
— |
għall-Kummissjoni Ewropea, minn A. Caeiros u B.‑R. Killmann, bħala aġenti, |
wara li rat id-deċiżjoni, meħuda wara li nstema’ l-Avukat Ġenerali, li l-kawża tinqata’ mingħajr konklużjonijiet,
tagħti l-preżenti
Sentenza
1 |
It-talba għal deċiżjoni preliminari tirrigwarda l-interpretazzjoni tal-intestatura 9025 tan-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni [...] (ĠU Edizzjoni Speċjali bil-Malti, Kapitolu 2, Vol. 2, p. 382), kif emendat bir-Regolament tal-Kummissjoni (KE) Nru 1549/2006, tas-17 ta’ Ottubru 2006 (ĠU L 301, p. 1, iktar ’il quddiem in-“NM”). |
2 |
Din it-talba tressqet fil-kuntest ta’ kawża bejn il-Hauptzollamt Frankfurt am Main (awtorità doganali ta’ Frankfurt am Main, iktar ’il quddiem l-“awtorità doganali”) u Duval GmbH & Co. KG (iktar ’il quddiem “Duval”) dwar il-klassifikazzjoni tariffarja ta’ indikaturi tat-temperatura ambjentali. |
Il-kuntest ġuridiku
Id-dritt internazzjonali
3 |
Il-Konvenzjoni Internazzjonali dwar is-sistema armonizzata għad-deskrizzjoni u kodifikazzjoni ta’ merkanzija (iktar ’il quddiem is-“SA”), konkluża fi Brussell fl-14 ta’ Ġunju 1983, u l-Protokoll li jemendaha, tal-24 ta’ Ġunju 1986 (iktar ’il quddiem il-“Konvenzjoni dwar is-SA”) ġew approvati f’isem il-Komunità Ekonomika Ewropea permezz tad-Deċiżjoni tal-Kunsill 87/369/KEE, tas-7 ta’ April 1987 (ĠU L 198, p. 1). |
4 |
Skont l-Artikolu 3(1) tal-Konvenzjoni dwar is-SA, kull parti kontraenti tintrabat li n-nomenklaturi tat-tariffi u l-istatistiċi jkunu konformi mas-SA, li tuża l-intestaturi u s-subintestaturi kollha tagħha, mingħajr żieda jew modifika, kif ukoll il-kodiċijiet konnessi magħhom, u li tiġi segwita l-ordni numerika ta’ din is-sistema. L-istess dispożizzjoni tistipula li kull parti kontraenti tintrabat ukoll li tapplika r-regoli ġenerali għall-interpretazzjoni tas-SA kif ukoll in-noti kollha tat-taqsimiet, tal-kapitoli u tas-subintestaturi tas-SA u li ma tiġix b’hekk immodifikata l-portata tagħhom. |
5 |
Il-Kunsill ta’ Kooperazzjoni Doganali, li sar l-Organizzazzjoni Dinjija tad-Dwana (WCO), stabbilit permezz tal-Konvenzjoni Internazzjonali li tistabbilixxi l-imsemmi Kunsill, konkluża fi Brussell fil-15 ta’ Diċembru 1950, approva, bil-kundizzjonijiet stabbiliti fl-Artikolu 8 tal-Konvenzjoni dwar is-SA, in-noti ta’ spjega adottati mill-Kumitat tas-SA, istanza li l-organizzazzjoni tagħha hija rregolata mill-Artikolu 6 tagħha. |
6 |
Skont in-nota ta’ spjega dwar ir-regola ġenerali 3(a) għall-interpretazzjoni tas-SA li tinsab fin-noti ta’ spjega adottati mill-imsemmi kumitat, fil-verżjoni tagħhom applikabbli għall-fatti fil-kawża prinċipali (iktar ’il quddiem in-“noti ta’ spjega tas-SA”): “[...]
|
7 |
In-noti ta’ spjega tas-SA dwar l-intestatura 9025 tas-SA jinkludu b’mod partikolari l-informazzjoni segwenti: “[...]
|
In-NM
8 |
In-NM fiha, fl-Ewwel Parti, Taqsima 1, A, numru ta’ regoli ġenerali għall-interpretazzjoni ta’ din in-nomenklatura. Din it-taqsima tipprevedi li: “Il-klassifikazzjoni ta’ oġġetti fin-[NM] għanda tkun irregolata mill-prinċipji li ġejjin:
[...]
[...]” |
9 |
Il-Kapitolu 90 tan-NM huwa intitolat “Strumenti u apparat ottiku, fotografiku, ċinematografiku, ta’ kejl, ta’ verifika, ta’ preċiżjoni, mediku jew kirurġiku; bċejjeċ u aċċessorji tagħhom”. Dan il-kapitolu fih b’mod partikolari l-intestatura 9025 li hija fformulata u strutturata kif ġej: |
“9025 |
Idrometri u strumenti simili li jżommu fil-wiċċ, termometri, pirometri, barometri, igrometri u psikrometri, li jirreġistraw jew le, u kull taħlita ta’ dawn l-istrumenti: |
||
|
‑ Termometri u pirometri, mhux imħalltin ma’ strumenti oħrajn: |
||
9025 11 |
‑ ‑ Mimlijin b’ikwidu, għal qari dirett: |
||
9025 11 20 |
‑ ‑ ‑ Termometri kliniċi jew veterinarji |
||
9025 11 80 |
‑ ‑ ‑ Oħrajn |
||
9025 19 |
‑ ‑ Oħrajn: |
||
9025 19 20 |
‑ ‑ ‑ Elettroniċi |
||
9025 19 80 |
‑ ‑ ‑ Oħrajn |
||
[...] |
[...]” |
10 |
Il-Kapitolu 38 tan-NM huwa intitolat “Diversi prodotti kimiċi”. Dan il-kapitolu jinkludi, b’mod partikolari, l-intestatura 3822, intitolata “Reaġenti dijagnostiċi jew ta’ laboratorju fuq rinforz, reaġenti ppreparati dijagnostiċi jew ta’ laboratorju fuq rinforz jew le, ħlief dawk ta’ titlu [intestatura] 3002 jew 3006; materjali ta’ referenza ċertifikati”. L-intestatura 3824 tan-NM hija intitolata “Materjali li jgħaqqdu ppreparati għal forom jew ċentri ta’ funderija; prodotti u preparazzjonijiet kimiċi ta’ l-industriji kimiċi jew li għandhom x’jaqsmu magħhom (inklużi dawk li jikkonsistu f’taħlitiet ta’ prodotti naturali), mhux speċifikati jew inklużi band’ oħra”. Is-subintestatura 3824 90 98 tan-NM hija subintestatura residwa li tkopri l-prodotti li ma jissemmewx u li ma humiex inklużi xi mkien ieħor fl-intestatura 3824 tan-NM. |
11 |
In-nota 3(e) tal-Kapitolu 38 tan-NM tippreċiża b’mod partikolari li: “Titlu [intestatura] 3824 jinkludi dawn l-oġġetti li m’għandhomx ikunu kklassifikati taħt xi titlu ieħor tan-nomeklatura: [...]
|
12 |
Il-Kapitolu 48 tan-NM huwa intitolat “Karta u kartun; oġġetti ta’ polpa tal-karta, tal-karta jew tal-kartun”. L-intestatura 4823 tan-NM hija intitolata “Karta oħra, kartun, materjal artab taċ-ċelluloża u insiġ ta’ fibri ċellulożi, maqtugħin għal qies jew għamla; oġġetti oħrajn ta’ polpa tal-karta, karta, kartun, materjal artab ta’ ċelluloża jew insiġ ta’ fibri cellulożi”. Is-subintestatura 4823 90 85 tan-NM hija subintestatura residwa li tkopri l-prodotti li ma jissemmewx u li ma humiex inklużi xi mkien ieħor fl-intestatura 4823 tan-NM. |
Il-kawża prinċipali u d-domandi preliminari
13 |
Iż-żewġ tipi ta’ prodotti inkwistjoni fil-kawża prinċipali huma deskritti, rispettivament, bil-kliem “thermopapers” u “thermo labels”. L-ewwel prodott huwa kkostitwit minn strixxi tal-karta b’naħa bajda li fuqha hemm indikata temperatura u miksija, fuq in-naħa l-oħra, b’saff iswed sensittiv għat-temperatura. Meta tintlaħaq it-temperatura indikata fuq in-naħa bajda, l-istrixxa indikatriċi tbiddel il-kulur tagħha b’mod irreversibbli minn abjad għal iswed. It-tieni tip ta’ prodott huwa kkostitwit minn strixxi indikaturi li għandhom ħames punti għall-kejl tat-temperatura u miksija b’film tal-plastik. Il-punti ta’ kejl, li fuq kull wieħed minnhom hemm indikazzjoni ta’ temperatura speċifika, ibiddlu l-kulur tagħhom b’mod irreversibbli meta tintlaħaq dik it-temperatura. |
14 |
Il-prodotti inkwistjoni fil-kawża prinċipali ġew importati minn Duval matul is-sena 2007. L-awtorità doganali ħarġet avviż tat-taxxa li fih ikklassifikat dawn il-prodotti fis-subintestatura 3824 90 98 tan-NM u applikat ir-rata korrispondenti ta’ 6.5 %. |
15 |
Peress li t-“thermopapers” kellhom jiġu kklassifikati fis-subintestatura 4823 90 85 tan-NM u, għalhekk, ikunu eżenti minn dazji doganali, filwaqt li t-“thermo labels” kellhom jiġu kklassifikati fis-subintestatura 9025 19 80 tan-NM u, għalhekk, ikunu suġġetti għal rata ta’ taxxa ta’ 2.1 %, Duval ippreżentat rikors kontra l-avviż tat-taxxa msemmi iktar ’il fuq quddiem il-Finanzgericht (qorti tal-finanzi). |
16 |
Billi l-imsemmija qorti ddeċidiet li l-prodotti inkwistjoni fil-kawża prinċipali jikkostitwixxu “termometri” fis-sens tal-intestatura 9025 tan-NM u billi, konsegwentement, hija kkundannat lill-awtorità doganali sabiex tirrimborsa lil Duval l-ammonti żejda tad-dazji doganali mħallsa, din l-awtorità ppreżentat appell għar-“Reviżjoni” minn din is-sentenza quddiem il-Bundesfinanzhof (qorti federali tal-finanzi). |
17 |
Billi ssostni li l-kunċett ta’ termometru ma huwiex iddefinit fin-NM u li n-noti ta’ spjega tas-SA jinkludu lista enumerata, li ma tingħatax bħala eżempju, tal-istrumenti li jappartjenu għall-grupp tat-termometri u tal-pirometri, li fiha la ma huma inklużi l-prodotti inkwistjoni fil-kawża prinċipali u lanqas ebda strument ieħor paragunabbli magħmul mill-karta jew b’indikatur tat-temperatura li jintuża darba biss, il-Bundesfinanzhof (qorti federali tal-finanzi) tistaqsi jekk il-kunsiderazzjonijiet ta’ ċertezza legali u ta’ sempliċità tal-proċess ta’ klassifikazzjoni għandhomx iwasslu sabiex jitqies li l-imsemmija lista enumerata hija eżawrjenti u għandha natura vinkolanti. |
18 |
Jekk tali interpretazzjoni ma għandhiex tipprevali, l-imsemmija qorti tosserva, f’dan il-każ, li t-titolu tal-Kapitolu 90 tan-NM jirreferi għal “strumenti ta’ kejl”, li l-kelma “termometru” tinftiehem, kemm fis-sens letterali kif ukoll f’dak kunċettwali, bħala strument ta’ kejl tat-temperatura u li l-kunċett ta’ kejl jinftiehem komunement bħala paragun kwantitattiv bejn il-kwantità mkejla u valur ta’ riferiment. |
19 |
F’dawn iċ-ċirkustanzi, il-qorti tar-rinviju tistaqsi dwar il-possibbiltà eventwali li fin-noti ta’ spjega tas-SA tinstab definizzjoni iktar stretta ta’ “termometru” li tkun tirrikjedi li l-apparat ikkonċernat jissodisfa kundizzjonijiet addizzjonali, meħuda minn varji karatteristiċi komuni, li jidhru li huma preżenti fl-apparati ta’ kejl ikklassifikati mill-imsemmija noti fl-intestatura 9025 tas-SA jew f’intestaturi oħra tal-istess kapitolu tagħhom, bħal manifattura bir-reqqa u grad għoli ta’ preċiżjoni, il-kapaċità li jiġi rriprodott ir-riżultat tal-kejl, l-indikazzjoni kontinwa tal-iżvolġiment tal-kejl, jew, ukoll, il-possibbiltà li l-istrument jintuża diversi drabi. |
20 |
Din il-qorti tistaqsi, bl-istess mod, jekk il-fatt li n-nota 3(e) tal-Kapitolu 38 tan-NM tippreċiża li apparati fużibbli għall-kontroll tat-temperatura ta’ kalkari jaqgħu taħt l-intestatura 3824 tan-NM jew iċ-ċirkustanza li min-noti ta’ spjega tas-SA dwar l-igrometri jirriżulta li apparati li jiffunzjonaw b’mod simili għall-prodotti inkwistjoni fil-kawża prinċipali huma esklużi mill-intestatura 9025 tan-NM, humiex ta’ natura li jaffettwaw il-klassifikazzjoni ta’ dawn tal-aħħar. |
21 |
F’dawn iċ-ċirkustanzi, il-Bundesfinanzhof (qorti federali tal-finanzi) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:
|
Fuq id-domandi preliminari
22 |
Permezz ta’ dawn it-tliet domandi, li għandhom jiġu eżaminati flimkien, il-qorti tar-rinviju tistaqsi, essenzjalment, jekk l-intestatura 9025 tan-NM għandhiex tiġi interpretata fis-sens li tinkludi indikaturi tat-temperatura ambjentali magħmula mill-karta, f’ċerti każijiet miksija b’film tal-plastik, li, bħall-prodotti inkwistjoni fil-kawża prinċipali, jindikaw, permezz ta’ bidla fil-kulur, b’mod irreversibbli u mingħajr il-possibbiltà ta’ użu mill-ġdid sussegwenti, jekk tkun intlaħqet temperatura limitu waħda jew iktar. |
23 |
Għandu jiġi osservat li hija ġurisprudenza stabbilita li, fl-interess taċ-ċertezza legali u tal-faċilità ta’ kontrolli, il-kriterju deċiżiv għall-klassifikazzjoni tariffarja ta’ merkanzija għandu jitfittex, b’mod ġenerali, fil-karatteristiċi u fil-proprjetajiet oġġettivi tagħha, kif iddefiniti mill-kliem tal-intestatura tan-NM u tan-noti tat-taqsima jew tal-kapitolu (ara, b’mod partikolari, is-sentenza Douane Advies Bureau Rietveld, C‑541/13, EU:C:2014:2270, punt 21 u l-ġurisprudenza ċċitata). |
24 |
Il-Qorti tal-Ġustizzja ddeċidiet ukoll li n-noti ta’ spjega għan-NM kif ukoll dawk tas-SA jikkontribwixxu b’mod sinjifikattiv għall-interpretazzjoni tal-portata tad-diversi intestaturi tariffarji mingħajr, madankollu, ma huma legalment vinkolanti. Il-kontenut tal-imsemmija noti għandu jkun konformi mad-dispożizzjonijiet tan-NM u ma jistax jemenda l-portata tagħhom. Jekk jidher li jmorru kontra l-formulazzjoni tal-intestaturi tan-NM u tan-noti tat-taqsima jew tal-kapitolu, in-noti ta’ spjega għan-NM għandhom jiġu mwarrba (ara, b’mod partikolari, is-sentenza JVC France, C‑312/07, EU:C:2008:324, punt 34 u l-ġurisprudenza ċċitata). |
25 |
Barra minn hekk, għandu jitfakkar li l-użu intiż tal-prodott jista’ jikkostitwixxi kriterju oġġettiv għall-klassifikazzjoni sa fejn dan ikun inerenti għall-imsemmi prodott, liema inerenza għandha tkun tali li tkun tista’ tiġi evalwata abbażi tal-karatteristiċi u tal-proprjetajiet oġġettivi tiegħu (ara, b’mod partikolari, is-sentenza Douane Advies Bureau Rietveld, C‑541/13, EU:C:2014:2270, punt 22 u l-ġurisprudenza ċċitata). |
26 |
Għal dak li jirrigwarda l-intestatura 9025 tan-NM, mill-formulazzjoni tagħha jirriżulta li hija tkopri b’mod partikolari t-“termometri”. |
27 |
Għalkemm in-NM ma tiddefinixxix dan il-kunċett, għandu jiġi osservat li, fis-sens komuni tal-kelma, din tirreferi, hekk kif tindika barra minn hekk, f’numru kbir ta’ verżjonijiet lingwistiċi tan-NM, il-kombinazzjoni tal-kliem ta’ oriġini Griega li jikkaratterizzawha, għall-istrumenti ta’ kejl tat-temperatura. |
28 |
Fil-punt 34 tas-sentenza Raytek u Fluke Europe (C‑134/13, EU:C:2015:82), il-Qorti tal-Ġustizzja ddeċidiet b’mod partikolari, għal dak li jirrigwarda regolament tal-Kummissjoni Ewropea li kklassifika kameras termali li jaħdmu bl-infrared taħt il-kodiċi 9025 19 20 tan-NM, li din l-istituzzjoni setgħet validament tqis li billi l-imsemmija apparati setgħu jkejlu t-temperatura u jirrappreżentaw l-valuri mkejla f’ċifri, dawn wettqu funzjoni li hija koperta mill-intestatura 9025 tan-NM u kellhom jiġu kklassifikati bħala termometri fis-sens ta’ din l-intestatura. |
29 |
Fil-punt 35 tal-istess sentenza, il-Qorti tal-Ġustizzja reġgħet enfasizzat li s-sempliċi kejl tat-temperatura kien jikkostitwixxi l-karatteristika speċifika koperta mill-imsemmija intestatura. |
30 |
Issa, għandu jiġi kkonstatat, f’dan ir-rigward, li prodotti bħal dawk inkwistjoni fil-kawża prinċipali huma, permezz tal-karatteristiċi u tal-proprjetajiet oġġettivi tagħhom, intiżi sabiex jintużaw esklużivament bħala strumenti ta’ kejl tat-temperatura. Fil-fatt, billi l-uniku skop tagħhom huwa li jindikaw, permezz tal-kejl tat-temperatura ambjentali, jekk ikun intlaħaqx livell ta’ temperatura speċifiku u predeterminat, billi juru, f’dan il-każ, permezz ta’ bidla fil-kulur, ir-riżultat f’dan is-sens ta’ dak il-kejl, tali prodotti għandhom, għalhekk, jiġu kklassifikati bħala termometri taħt il-kodiċi 9025 tan-NM. |
31 |
Kuntrarjament għal dak li ssostni l-Kummissjoni, din il-konklużjoni ma tistax tiġi affettwata min-nota 3(e) li tinsab fil-Kapitolu 38 tan-NM, li tipprevedi li “apparat taċ-ċeramika għall-prova tan-nar, fużibbli (per eżempju, koni Seger)” huwa inkluż fl-intestatura 3824 tan-NM u mhux f’intestatura oħra tan-NM. Fil-fatt, minbarra ċ-ċirkustanza li l-imsemmija nota tkopri biss il-kategorija ta’ merkanzija speċifika ħafna li għaliha għalhekk tirreferi u li għaliha ma jikkorrispondux manifestament prodotti bħal dawk inkwistjoni fil-kawża prinċipali, għandu jiġi osservat li, għad-differenza ta’ dawn il-prodotti tal-aħħar, u, b’mod iktar ġenerali, ta’ termometri, il-funzjoni ta’ tali apparati fużibbli ma tikkonsistix fis-sempliċi kejl preċiż tat-temperatura ambjentali. Fil-fatt, dawn l-apparati fużibbli, imsejħa wkoll “koni pirometriċi”, li jintużaw fil-kalkari taċ-ċeramika, għandhom il-funzjoni li jippermettu, billi jdubu u jitgħawġu gradwalment taħt l-effett tas-sħana, il-kontroll tal-iżvilupp tal-ħami ta’ oġġetti taċ-ċeramika u li jiġi ddeterminat meta dawn tal-aħħar ikunu waslu fl-istat ta’ ħami mixtieq. |
32 |
Għal dak li jirrigwarda l-fatt li l-enumerazzjoni tal-istrumenti li jaqgħu taħt il-grupp ta’ merkanzija kklassifikata bħala termometri u pirometri li hija inkluża, fit-Taqsima B, fin-noti ta’ spjega tas-SA relatati mal-intestatura 9025 tagħha ma ssemmix prodotti bħal dawk inkwistjoni fil-kawża prinċipali, għandu jiġi enfasizzat li, hekk kif jirriżulta mill-formulazzjoni stess ta’ dawn in-noti u mill-ġurisprudenza mfakkra fil-punt 28 ta’ din is-sentenza, l-imsemmija enumerazzjoni ma hija bl-ebda mod eżawrjenti. Barra minn hekk, għandu jitfakkar li, hekk kif jirriżulta mill-ġurisprudenza ċċitata fil-punt 24 ta’ din is-sentenza, tali noti ta’ spjega ma jistgħux, f’kull każ, ikollhom l-effett li jirrestrinġu l-portata ta’ intestatura tan-NM kif stabbilita mill-kliem ta’ dik l-intestatura. |
33 |
Għaldaqstant, iċ-ċirkustanza, imsemmija mill-qorti tar-rinviju, li l-prodotti hekk enumerati fl-imsemmija taqsima tan-noti ta’ spjega tas-SA għandhom, minbarra l-karatteristika komuni speċifika msemmija fil-punti 27 sa 29 ta’ din is-sentenza u li tikkonsisti fil-kejl tat-temperatura, karatteristiċi oħra komuni b’mod partikolari li jirrigwardaw il-mod tekniku tal-funzjonament tagħhom, il-fatt li jistgħu jintużaw diversi drabi u b’mod irrepetut jew il-fatt li jippermettu indikazzjoni kontinwa tal-iżvilupp tat-temperatura, ma tistax twassal għal interpretazzjoni restrittiva tal-kunċett ta’ termometru li jinsab fl-intestatura 9025 tan-NM billi jiġu stabbiliti tali karatteristiċi addizzjonali bħala parti mill-elementi li jikkostitwixxu l-imsemmi kunċett. |
34 |
Għal dak li jirrigwarda l-kriterju dwar il-possibbiltà ta’ indikazzjoni kontinwa tal-iżvilupp tat-temperatura, għandu jiġi osservat ukoll, barra minn hekk, li, hekk kif enfasizzat il-Kummissjoni, in-noti ta’ spjega tas-SA dwar l-intestatura 9025 tagħha jippreċiżaw espressament fit-Taqsima B1 li t-termometri mimlija b’likwidu magħrufa bħala “ta’ massimu” u “ta’ minimu” intiżi sabiex jirrekordjaw it-temperaturi estremi li għalihom huma esposti jaqgħu taħt l-imsemmija intestatura. |
35 |
Fl-aħħar nett, għal dak li jirrigwarda l-informazzjoni li tinsab fit-Taqsima D tal-istess noti ta’ spjega tas-SA li tipprevedi li l-karti mimlija b’sustanzi kimiċi li l-kulur tagħhom ivarja skont l-umdità atmosferika jaqgħu taħt l-intestatura 3822 tan-NM, għandu jiġi enfasizzat, l-ewwel nett, li l-imsemmija informazzjoni tirrigwarda l-grupp ta’ merkanzija kklassifikat bħala igrometri u mhux dak tat-termometri, billi dan il-grupp ma fihx informazzjoni korrispondenti għal dak li jikkonċerna prodotti bħal dawk inkwistjoni fil-kawża prinċipali. It-tieni nett, għandu jitfakkar li, fis-sentenza Douane Advies Bureau Rietveld (C‑541/13, EU:C:2014:2270), li kienet tirrigwarda prodotti analogi għal dawk inkwistjoni fil-kawża prinċipali, il-Qorti tal-Ġustizzja ddeċidiet li l-intestatura 3822 tan-NM kellha tiġi interpretata fis-sens li tali prodotti ma jaqgħux taħt din l-intestatura. |
36 |
Minn dak kollu li ntqal jirriżulta li ċ-ċirkustanza li l-prodotti inkwistjoni fil-kawża prinċipali huma magħmula mill-karta, eventwalment miksija b’film tal-plastik, u li għandhom funzjoni iktar sempliċi minn ċerti strumenti ta’ kejl oħra li jużaw mekkaniżmi iktar sofistikati, jew il-fatt li jippermettu biss il-kejl ta’ ċerti temperaturi limiti predeterminati, jew ukoll iċ-ċirkustanza li ma jistgħux jintużaw diversi drabi fid-dawl tan-natura irreversibbli tal-indikazzjoni li sseħħ meta jintlaħqu tali temperaturi limiti ma jipprekludux li tali prodotti jiġu kklassifikati fl-intestatura 9025 tan-NM. |
37 |
Barra minn hekk, u għal dak li jirrigwarda s-subintestatura 3824 90 98 tan-NM imsemmija mill-awtorità doganali fl-avviż tat-taxxa inkwistjoni fil-kawża prinċipali, għandu jitfakkar li, skont il-formulazzjoni tagħha, l-intestatura 3824 tan-NM tirrigwarda b’mod partikolari l-“prodotti u preparazzjonijiet kimiċi ta’ l-industriji kimiċi jew li għandhom x’jaqsmu magħhom [...] mhux speċifikati jew inklużi band’oħra” u li s-subintestatura 90 98 hija, fi ħdan l-intestatura 3824, subintestatura residwa li tkopri l-prodotti kimiċi li ma jissemmewx u li ma humiex inklużi xi mkien ieħor fl-imsemmija intestatura. |
38 |
F’dawn iċ-ċirkustanzi, biżżejjed jiġi osservat li, anki fil-każ li prodotti bħal dawk inkwistjoni fil-kawża prinċipali huma a priori ta’ natura li jistgħu jiġu kklassifikati wkoll fl-intestatura 3824 tan-NM, xorta jibqa’ l-fatt li, skont ir-regola ġenerali 3(a) tan-NM, l-intestatura l-iktar speċifika għandha tingħata prijorità fuq l-intestaturi ta’ portata iktar ġenerali. Issa, hekk kif ġie ppreċiżat fil-punti 28 sa 30 ta’ din is-sentenza, il-kejl tat-temperatura jikkostitwixxi l-karatteristika speċifika tal-merkanzija indikata bħala termometri fl-intestatura 9025 tan-NM u l-prodotti inkwistjoni fil-kawża prinċipali għandhom din il-karatteristika speċifika. Min-naħa l-oħra, l-intestatura 3824 tan-NM, li tirrigwarda l-prodotti u l-preparazzjonijiet kimiċi mhux speċifikati jew inklużi band’oħra, għandha portata ħafna iktar ġenerali. |
39 |
L-istess kunsiderazzjonijiet japplikaw għal dak li jirrigwarda s-subintestatura 4823 90 85 tan-NM li fuqha bbażat ruħha Duval, għal dak li jikkonċerna t-“thermo labels”, insostenn tar-rikors tagħha kontra l-avviż tat-taxxa inkwistjoni fil-kawża prinċipali. Fil-fatt, għandu jitfakkar li, skont il-formulazzjoni tagħha, l-intestatura 4823 tan-NM tirrigwarda “karta oħra, kartun, materjal artab taċ-ċelluloża u insiġ ta’ fibri ċellulożi, maqtugħin għal qies jew għamla; oġġetti oħrajn ta’ polpa tal-karta, karta, kartun, materjal artab ta’ ċelluloża jew insiġ ta’ fibri cellulożi” u li s-subintestatura 90 85 hija, fi ħdan l-intestatura 4823, subintestatura residwa li tkopri l-prodotti li ma jissemmewx u li ma humiex inklużi xi mkien ieħor fl-imsemmija intestatura. |
40 |
Fid-dawl ta’ dak kollu li ntqal, ir-risposta li għandha tingħata għad-domandi preliminari magħmula hija li l-intestatura 9025 tan-NM għandha tiġi interpretata fis-sens li tinkludi indikaturi tat-temperatura ambjentali magħmula mill-karta, f’ċerti każijiet miksija b’film tal-plastik, li, bħall-prodotti inkwistjoni fil-kawża prinċipali, jindikaw, permezz ta’ bidla fil-kulur, b’mod irreversibbli u mingħajr il-possibbiltà ta’ użu mill-ġdid sussegwenti, jekk tkun intlaħqet temperatura limitu waħda jew iktar. |
Fuq l-ispejjeż
41 |
Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura. |
Għal dawn il-motivi, Il-Qorti tal-Ġustizzja (Id-Disa’ Awla) taqta’ u tiddeċiedi: |
L-intestatura 9025 tan-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni [...], kif emendat bir-Regolament (KE) Nru 1549/2006, tas-17 ta’ Ottubru 2006, għandha tiġi interpretata fis-sens li tinkludi indikaturi tat-temperatura ambjentali magħmula mill-karta, f’ċerti każijiet miksija b’film tal-plastik, li, bħall-prodotti inkwistjoni fil-kawża prinċipali, jindikaw, permezz ta’ bidla fil-kulur, b’mod irreversibbli u mingħajr il-possibbiltà ta’ użu mill-ġdid sussegwenti, jekk tkun intlaħqet temperatura limitu waħda jew iktar. |
Firem |
( *1 ) Lingwa tal-kawża: il-Ġermaniż.