Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62014TN0531

Kawża T-531/14: Rikors ippreżentat fil- 15 ta’ Lulju 2014 – Sotiropoulou et vs Il-Kunsill

ĠU C 351, 6.10.2014, p. 11–12 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

6.10.2014   

MT

Il-Ġurnal Uffiċjali tal-Unjoni Ewropea

C 351/11

Rikors ippreżentat fil-15 ta’ Lulju 2014 – Sotiropoulou et vs Il-Kunsill

(Kawża T-531/14)

2014/C 351/13

Lingwa tal-kawża: il-Grieg

Partijiet

Rikorrenti: Leimonia Sotiropoulou (Patra, il-Greċja) u 63 rikorrent ieħor (rappreżentant: K. Chrisogonos, dikigoros)

Konvenut: Il-Kunsill tal-Unjoni Ewropea

Talbiet tar-rikorrenti

—

tikkundanna lill-konvenut, komplessivament, sabiex jikkumpensa t-telf finanzjarju mġarrab mir-rikorrenti mill-1/1/2013 sal-31/5/2014 minħabba fit-tnaqqis illegali tal-pensjonijiet prinċipali tagħhom permezz tad-deċiżjonijiet tal-Kunsill tal-Unjoni Ewropea ċċitati hawn taħt, għal total ta’ EUR 8 7 0 50  411;

—

tikkundanna lill-konvenut, komplessivament, sabiex iħallas lil kull wieħed u waħda mir-rikorrenti l-ammont ta’ EUR 3  000,00 bħala danni morali mġarrba minħabba fit-tnaqqis illegali tal-pensjonijiet prinċipali tagħhom permezz tad-deċiżjonijiet tal-Kunsill tal-Unjoni Ewropea ċċitati hawn taħt, u

—

tikkundanna lill-konvenut, komplessivament, għall-ħlas tal-ispejjeż tar-rikorrenti.

Motivi u argumenti prinċipali

Ir-rikors jirrigwarda talba għal kumpens, skont l-Artikolu 268 TFUE, għal danni kkawżati lir-rikorrenti minħabba fit-tnaqqis drastiku tal-pensjonijiet prinċipali tagħhom skont il-miżuri u l-azzjonijiet li ttieħdu fir-rigward tas-sistema tal-pensjoni tal-Greċja skont id-deċiżjonijiet tal-Kunsill tal-Unjoni Ewropea 2010/320/UE, tat-8 ta’ Ġunju 2010 (1), 2010/486/UE, tas-7 ta’ Settembru 2010 (2), 2011/57/UE, tal-20 ta’ Diċembru 2010 (3), 2011/257/UE, tas-7 ta’ Marzu 2011 (4), 2011/734/UE, tat-12 ta’ Lulju 2011 (5), 2011/791/UE, tat-8 ta’ Novembru 2011 (6), 2012/211/UE, tat-13 ta’ Marzu 2012 (7), u 2013/6/UE, tal-4 ta’ Diċembru 2012 (8), allegatament illegali.

Insostenn tar-rikors ir-rikorrenti jinvokaw żewġ motivi:

1.

L-ewwel motiv ibbażat fuq il-ksur tal-prinċipji tal-għoti tal-kompetenzi u ta’ sussidjarjetà

—

Ir-rikorrenti jsostnu li d-deċiżjonijiet ikkontestati tal-Kunsill tal-Unjoni Ewropea, li jirrigwardaw b’mod partikolari l-adozzjoni ta’ miżuri dettaljati, ta’ politika u ta’ azzjonijiet li jikkonċernaw skemi soċjali u dwar is-sistema tal-pensjonijiet, meta ġew adottati mill-Kunsill, dan mar lil hinn mill-poteri li t-Trattat jagħtih u bi ksur tal-prinċipji tal-għoti tal-kompetenzi u ta’ sussidjarjetà skont l-Artikoli 4 u 5 TUE, flimkien mal-Artikoli 2 sa 6 TFUE. Il-Kunsill tal-Unjoni Ewropeafl-adozzjoni ta’ deċiżjonijiet, skont l-Artikoli 126(9) u 136 TFUE, indirizzati lill-Greċja, ma jistax jistabbilixxi fid-dettall il-politika li l-Greċja trid ssegwi fl-oqsma msemmija, li huma r-responsabbiltà unika ta’ din tal-aħħar bħala Stat Membru tal-Unjoni Ewropea. L-imsemmija deċiżjonijiet, flimkien mal-kontenut tagħhom, huma għaldaqstant illegali u jqajjmu r-responsabbiltà mhux kuntrattwali tal-Unjoni Ewropea sabiex hija tikkumpensa lir-rikorrenti d-danni mġarrba minħabba l-fatt li dawn l-istess deċiżjonijiet naqqsu l-pensjonijiet tagħhom.

2.

It-tieni motiv ibbażat fuq il-ksur tad-drittijiet fundamentali skont l-Artikoli 1, 25 u 34 tal-Karta tad-Drittijiet Fundamentali tal-Unjoni Ewropea

—

Ir-rikorrenti jsostnu li d-deċiżjonijiet tal-Kunsill tal-Unjoni Ewropea ċċitati iktar 'il fuq imponew l-adozzjoni ta’ miżuri dwar is-sistema tal-pensjoni li ħarbtu radikalment is-sitwazzjoni ekonomika tar-rikorrenti u wettqu biddla sostanzjali fis-sitwazzjoni li sa dak iż-żmien huma kienu jserrħu fuqha. It-tnaqqis drastiku fil-pensjonijiet impost skont il-miżuri identifikati fid-deċiżjonijiet iċċitati iktar 'il fuq tal-Kunsill tal-Unjoni Ewropea kien ifisser tnaqqis radikali tal-kopertura tal-assigurazzjoni u biddla għall-agħar u f’daqqa fl-istandard ta’ għajxien tal-pensjonanti, li fosthom hemm ir-rikorrenti, li, minħabba fit-tnaqqis tal-pensjoni, ittieħdilhom l-ikbar parti mid-dħul li huma qabel kienu jużufruwixxu minnu. L-adozzjoni u l-implementazzjoni tat-tnaqqis inkwistjoni stabbilew il-ksur dirett tad-drittijiet tar-rikorrenti għad-dinjità tal-bniedem, għal ħajja dinjituża u indipendenti tal-anzjani kif ukoll għal aċċess għas-servizzi ta’ sigurtà soċjali u għas-servizzi soċjali li jiżguraw protezzjoni lill-anzjani, drittijiet stabbiliti direttament fl-Artikoli 1, 25 u 34 tal-Karta tad-Drittijiet Fundamentali tal-Unjoni Ewropea. Dan kollu jwassal għall-konklużjoni li d-deċiżjonijiet huma minnhom innifishom illegali u tqajjem ir-responsabbiltà mhux kuntrattwali tal-Unjoni Ewropea sabiex tikkumpensa lir-rikorrenti għad-danni mġarrba minħabba l-fatt li dawn l-istess deċiżjonijiet naqqsu l-pensjonijiet tagħhom.

(1)  Deċiżjoni tal-Kunsill 2010/320/UE, tat-8 ta’ Ġunju 2010, indirizzata lill-Greċja bil-għan li ssaħħaħ u tapprofondixxi s-sorveljanza fiskali u li tavża lill-Greċja biex tieħu miżuri għat-tnaqqis tad-defiċit, liema miżuri huma meqjusa neċessarji sabiex tiġi rimedjata s-sitwazzjoni ta’ defiċit eċċessiv (ĠU L 145, 11.06.2010, p. 6).

(2)  Deċiżjoni tal-Kunsill 2010/486/UE, tas-7 ta’ Settembru 2010, li temenda d-Deċiżjoni 2010/320/UE indirizzata lill-Greċja bil-ħsieb li ssaħħaħ u tapprofondixxi s-sorveljanza fiskali u li tagħti notifika lill-Greċja biex jittieħdu miżuri għat-tnaqqis tal-iżbilanċ meqjusa bħala meħtieġa biex tissewwa l-qagħda ta’ żbilanċ eċċessiv (ĠU L 241, 14.09.2010, p. 12).

(3)  Deċiżjoni tal-Kunsill 2011/57/UE, tal-20 ta’ Diċembru 2010, li temenda d-Deċiżjoni 2010/320/UE indirizzata lill-Greċja bil-ħsieb li ssaħħaħ u tapprofondixxi s-sorveljanza fiskali u li tagħti notifika lill-Greċja biex jittieħdu miżuri għat-tnaqqis tad-defiċit meqjusa bħala meħtieġa biex tissewwa l-qagħda ta’ żbilanċ eċċessiv (ĠU L 26, 29.01.2011, p. 15).

(4)  Deċiżjoni tal-Kunsill 2011/257/UE, tas-7 ta’ Marzu 2011, li temenda d-Deċiżjoni 2010/320/UE indirizzata lill-Greċja bil-għan li ssaħħaħ u tapprofondixxi s-sorveljanza fiskali u li tavża lill-Greċja biex tieħu miżuri għat-tnaqqis tad-defiċit, liema miżuri huma meqjusa neċessarji sabiex tiġi rimedjata s-sitwazzjoni ta’ defiċit eċċessiv (ĠU L 110, 29.04.2011, p. 26).

(5)  Deċiżjoni tal-Kunsill 2011/734/UE, tat-12 ta’ Lulju 2011, indirizzata lill-Greċja bl-għan li ssaħħaħ u tapprofondixxi s-sorveljanza fiskali u li tavża lill-Greċja biex tieħu miżuri għat-tnaqqis tad-defiċit, liema miżuri huma meqjusa neċessarji sabiex tiġi rimedjata s-sitwazzjoni ta’ defiċit eċċessiv (riformulazzjoni) (ĠU L 296, 15.11.2011, p. 38).

(6)  Deċiżjoni tal-Kunsill 2011/791/UE, tat-8 ta’ Novembru 2011, li temenda d-Deċiżjoni 2011/734/UE indirizzata lill-Greċja bil-għan li ssaħħaħ u tapprofondixxi s-sorveljanza fiskali u li tavża lill-Greċja biex tieħu miżuri għat-tnaqqis tad-defiċit liema miżuri huma meqjusa neċessarji sabiex tiġi rimedjata s-sitwazzjoni ta’ defiċit eċċessiv (ĠU L 320, 3.12.2011, p. 28).

(7)  Deċiżjoni tal-Kunsill 2012/211/UE, tat-13 ta’ Marzu 2012, li temenda d-Deċiżjoni 2011/734/UE indirizzata lill-Greċja bil-ħsieb li ssaħħaħ u tapprofondixxi s-sorveljanza fiskali u li tinnotifika lill-Greċja sabiex tieħu miżuri għat-tnaqqis tad-defiċit li huma meqjusa neċessarji sabiex tiġi rimedjata s-sitwazzjoni ta’ defiċit eċċessiv (ĠU L 113, 25.04.2012, p. 8).

(8)  Deċiżjoni tal-Kunsill 2013/6/UE, tal-4 ta’ Diċembru 2012, li temenda d-Deċiżjoni 2011/734/UE indirizzata lill-Greċja bl-għan li ssaħħaħ u tapprofondixxi s-sorveljanza fiskali u li tavża lill-Greċja biex tieħu miżuri għat-tnaqqis tad-defiċit liema miżuri huma meqjusa neċessarji sabiex tiġi rimedjata s-sitwazzjoni ta’ defiċit eċċessiv (ĠU L 4, 9.01.2013, p. 40).

Top