L-ewwel nett, hija tikkunsidra li l-Kunsill ma kellux kompetenza sabiex jaġixxi taħt it-tielet subparagrafu tal-Artikolu 108(2) TFUE peress li l-għajnuna li approva kienet għajnuna eżistenti li l-Litwanja kienet intrabtet li telimina sa tmiem l-2009 meta aċċettat il-miżuri xierqa proposti lilha mill-Kummissjoni.

It-tieni nett, hija ssostni li l-Kunsill abbuża mill-poteri tiegħu, meta fittex li jinnewtralizza l-konstatazzjoni li miżuri ta’ għajnuna li l-Litwanja setgħet iżżomm fis-seħħ sa tmiem l-2009, iżda mhux wara dik id-data, setgħu jinżammu fis-seħħ sal-2013.

It-tielet nett, id-deċiżjoni kkontestata ġiet adottata bi ksur tal-prinċipju ta’ kooperazzjoni leali li tapplika għall-Istati Membri u wkoll bejn l-istituzzjonijiet. Bid-deċiżjoni tiegħu, il-Kunsill ħeles lill-Litwanja mill-obbligu tagħha ta’ kooperazzjoni mal-Kummissjoni fir-rigward tal-miżuri xierqa aċċettati minn dan l-Istat Membru fir-rigward tal-għajnuna eżistenti għax-xiri ta’ art agrikola proprjetà tal-Istat fil-kuntest tal-kooperazzjoni stabbilita fl-Artikolu 108(1) TFUE.

Fl-aħħar nett, il-Kummissjoni ssostni li l-Kunsill għamel żball manifest ta’ evalwazzjoni inkwantu sab li kienu jeżistu ċirkustanzi eċċezzjonali li jiġġustifikaw l-adozzjoni tal-miżura approvata. Il-Kummissjoni ssostni li, sa fejn kienu jeżistu ċirkustanzi eċċezzjonali, id-deċiżjoni kkontestata tapprova għajnuna li jew ma tistax tindirizza dawk iċ-ċirkustanzi eċċezzjonali jew tmur lil hinn minn dak li huwa neċessarju sabiex jissolvew, bi ksur tal-prinċipju ta’ proporzjonalità.