This document is an excerpt from the EUR-Lex website
Document 52026PC0451
Proposal for a COUNCIL DECISION on the position to be taken on behalf of the European Union within the Council of Members of the International Olive Council with respect to the extension of the date for notifying the acceptance of the amendment of Article 36 of the International Agreement on Olive Oil and Table Olives, 2015
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ rigward l-estensjoni tad-data għan-notifika tal-aċċettazzjoni tal-emenda tal-Artikolu 36 tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ rigward l-estensjoni tad-data għan-notifika tal-aċċettazzjoni tal-emenda tal-Artikolu 36 tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015
COM/2026/451 final
IL-KUMMISSJONI EWROPEA
Brussell, 8.9.2026
COM(2026) 451 final
2026/0251(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ rigward l-estensjoni tad-data għan-notifika tal-aċċettazzjoni tal-emenda tal-Artikolu 36 tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-Kunsill Internazzjonali taż-Żebbuġ b’rabta mal-estensjoni prevista tal-iskadenza għall-aċċettazzjoni tal-emenda tal-Artikolu 36 tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015 sal-24 ta’ Ġunju 2027 (il-“Ftehim”)
2.Kuntest tal-Proposta
2.1.Il-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015
Il-Ftehim għandu l-għan li jippromwovi l-kooperazzjoni internazzjonali, jappoġġa r-riċerka xjentifika u l-innovazzjoni teknika, jistabbilixxi standards ta’ kwalità u kummerċjali, u jħeġġeġ il-konsum tal-prodotti taż-żebbuġ madwar id-dinja. Il-Ftehim daħal fis-seħħ b’mod provviżorju fl-1 ta’ Jannar 2017 u għandu jibqa’ fis-seħħ sal-31 ta’ Diċembru 2026.
L-Unjoni Ewropea hija parti mill-Ftehim 1 u Membru tal-Kunsill Internazzjonali taż-Żebbuġ (“IOC”).
2.2.Il-Kunsill tal-Membri
Il-Kunsill tal-Membri tal-IOC (“il-Kunsill tal-Membri”) huwa l-ogħla awtorità u korp tat-teħid tad-deċiżjonijiet tal-IOC u għandu jeżerċita dawn is-setgħat u l-funzjonijiet kollha li huma meħtieġa biex jinkisbu l-objettivi tal-Ftehim, skont l-Artikolu 7(1)(a) tiegħu. Bħala Parti għall-Ftehim, l-Unjoni Ewropea hija Membru tal-IOC u hija rappreżentata fil-Kunsill tal-Membri. Skont l-Artikolu 32 tal-Ftehim, permezz tal-Kunsill tal-Membri, l-IOC jista’ jemenda dan il-Ftehim b’kunsens. Il-Kunsill tal-Membri għandu jiffissa data sa liema l-membri għandhom jinnotifikaw lid-depożitarju bl-aċċettazzjoni tagħhom tal-emenda inkwistjoni.
2.3.L-att previst tal-Kunsill Internazzjonali taż-Żebbuġ
Il-Ftehim ġie konkluż oriġinarjament għal perjodu ta’ 10 snin sal-31 ta’ Diċembru 2026.
Matul il-119 sessjoni tiegħu f’Ġunju 2024, il-Kunsill tal-Membri adotta b’kunsens l-emenda tal-Artikolu 36 tal-Ftehim sabiex jippermetti l-estensjoni tal-Ftehim għal perjodi ta’ ħames snin 2 . Il-pożizzjoni tal-Unjoni fir-rigward tal-emenda tal-Artikolu 36 tal-Ftehim ġiet stabbilita f’konsultazzjoni mal-Grupp ta’ Ħidma dwar Prodotti Bażiċi (PROBA). Skont l-ippjanar, il-membri kellhom sal-24 ta’ Ġunju 2026 biex jiddepożitaw l-istrument ta’ aċċettazzjoni tagħhom. L-emenda tal-Artikolu 36 tal-Ftehim tkun tidħol fis-seħħ fl-1 ta’ Jannar 2027 bil-kundizzjoni li l-membri kollha jiddepożitaw l-istrument ta’ aċċettazzjoni.
Peress li mhux il-membri kollha kienu ddepożitaw l-istrumenti tagħhom, matul il-123 sessjoni li seħħet f’Ġunju 2026, il-Kunsill tal-Membri ppropona li jestendi l-perjodu li fih il-membri setgħu jiddepożitaw l-istrument ta’ aċċettazzjoni tagħhom sal-24 ta’ Ġunju 2027.
L-għan tal-att previst huwa li jżomm il-proċess ta’ aċċettazzjoni miftuħ sabiex il-membri kollha jkunu jistgħu jlestu l-proċeduri interni tagħhom billi jestendi l-iskadenza biex jinnotifikaw lid-depożitarju bl-aċċettazzjoni tagħhom tal-emenda tal-Artikolu 36 tal-Ftehim.
3.Pożizzjoni li għandha tittieħed f’isem l-Unjoni
Il-Ftehim ġie ffirmat f’isem l-Unjoni f’konformità mad-Deċiżjoni tal-Kunsill (UE) 2016/1892 3 fit-18 ta’ Novembru 2016, soġġett għall-konklużjoni tiegħu f’data aktar tard. Il-Ftehim daħal fis-seħħ b’mod provviżorju fl-1 ta’ Jannar 2017 f’konformità mal-Artikolu 31(2) tiegħu u ġie konkluż mill-Unjoni bid-Deċiżjoni tal-Kunsill (UE) 2019/848 4 .
L-Unjoni minn dejjem kienet membru attiv tal-IOC, u huwa fl-interess tagħha li l-Ftehim jiġi estiż. L-Unjoni hija produttur ewlieni taż-żejt taż-żebbuġa kif ukoll sieħba ewlenija fil-kummerċ taż-żejt taż-żebbuġa u taż-żebbuġ tal-mejda għal bosta membri tal-IOC.
L-UE tgħodd bħala membru wieħed fi ħdan il-Ftehim. Għall-proċeduri tal-baġit (ara l-Artikolu 11 tal-Ftehim), jiġifieri biex jiġu stabbiliti l-kontribuzzjonijiet finanzjarji annwali tal-membri, l-għadd tal-voti allokati lill-Unjoni huwa ta’ 622 mit-total ta’ 1 000 vot fl-2026.
Il-Kunsill tal-Membri adotta b’kunsens l-emenda tal-Artikolu 36 tal-Ftehim sabiex jippermetti l-estensjoni tal-Ftehim għal perjodi ta’ 5 snin. Il-membri kellhom sal-24 ta’ Ġunju 2026 biex jiddepożitaw l-istrument ta’ aċċettazzjoni tagħhom.
L-iskop ta’ din il-proposta huwa li tikseb l-awtorizzazzjoni tal-Kunsill sabiex il-Kummissjoni tappoġġa, f’isem l-Unjoni, l-estensjoni tal-iskadenza għall-aċċettazzjoni tal-emenda tal-Artikolu 36 tal-Ftehim sal-24 ta’ Ġunju 2027.
4.Bażi legali
4.1.Bażi legali proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (it-TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi l-atti li jkollhom effetti legali bis-saħħa tar-regoli tad-dritt internazzjonali li jirregolaw il-korp ikkonċernat. Dan jinkludi wkoll l-istrumenti li ma jorbtux skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 5 .
4.1.2.Applikazzjoni għal dan il-każ
Il-Kunsill Internazzjonali taż-Żebbuġ ġie stabbilit bl-Artikoli 3 u 4 tal-Ftehim u jista’ jintalab jadotta ċertu deċiżjonijiet.
L-att previst, li l-Kunsill tal-Membri għandu s-setgħa li jadotta skont l-Artikolu 32(2) tal-Ftehim, għandu l-effett li jestendi l-proċess ta’ aċċettazzjoni sabiex jippermetti lill-membri kollha li jtemmu l-proċessi interni tagħhom. Jekk id-data ma tiġix estiża, l-emenda, diġà approvata mill-Unjoni, tkun titqies irtirata, f’konformità mal-Artikolu 32(3) tal-Ftehim. L-att previst għalhekk għandu effetti legali.
L-att previst la jissupplimenta u lanqas ma jemenda l-qafas istituzzjonali tal-Ftehim.
Għalhekk, il-bażi legali proċedurali għad-deċiżjoni proposta hi l-Artikolu 218(9) tat-TFUE.
4.2.Bażi legali sostantiva
4.2.1.Prinċipji
Il-bażi legali sostantiva għal deċiżjoni skont l-Artikolu 218(9) tat-TFUE tiddependi primarjament fuq l-objettiv u l-kontenut tal-att previst li fir-rigward tiegħu tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawk l-għanijiet jew minn dawk il-komponenti jkun jista’ jiġi identifikat bħala dak ewlieni, filwaqt li l-ieħor ikun sempliċement wieħed inċidentali, id-deċiżjoni skont l-Artikolu 218(9) tat-TFUE trid tissejjes fuq bażi legali sostantiva unika, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għal dan il-każ
L-objettiv ewlieni u l-kontenut tal-att previst huma marbuta mal-politika kummerċjali komuni (il-kummerċ fi prodotti agrikoli).
Għalhekk, il-bażi legali sostantiva tad-deċiżjoni proposta hija l-Artikolu 207(4), l-ewwel subparagrafu tat-TFUE.
4.3.Konklużjoni
Il-bażi legali tad-Deċiżjoni proposta għandha tkun l-Artikolu 207(4), l-ewwel subparagrafu tat-TFUE, flimkien mal-Artikolu 218(9) tat-TFUE.
5.Pubblikazzjoni tal-att previst
Peress li l-att previst se jkollu effetti legali, jixraq li dan jiġi ppubblikat f’Il-Ġurnal Uffiċjali tal-Unjoni Ewropea wara l-adozzjoni tiegħu.
2026/0251 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill tal-Membri tal-Kunsill Internazzjonali taż-Żebbuġ rigward l-estensjoni tad-data għan-notifika tal-aċċettazzjoni tal-emenda tal-Artikolu 36 tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), l-ewwel subparagrafu, flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015 6 (“il-Ftehim”) ġie ffirmat f’isem l-Unjoni f’konformità mad-Deċiżjoni tal-Kunsill (UE) 2016/1892 7 fit-18 ta’ Novembru 2016, soġġett għall-konklużjoni tiegħu f’data aktar tard. Il-Ftehim daħal fis-seħħ b’mod provviżorju fl-1 ta’ Jannar 2017 f’konformità mal-Artikolu 31(2) tiegħu u ġie konkluż mill-Unjoni bid-Deċiżjoni tal-Kunsill (UE) 2019/848 8 . Il-Ftehim jibqa’ fis-seħħ sal-31 ta’ Diċembru 2026, f’konformità mal-Artikolu 36(1) tiegħu.
(2)Il-Kunsill Internazzjonali taż-Żebbuġ, li aġixxa permezz tal-Kunsill tal-Membri fil-119-il sessjoni tiegħu f’Ġunju 2024, emenda l-Artikolu 36 tal-Ftehim b’kunsens, skont l-Artikolu 32(1) tiegħu, sabiex jippermetti l-estensjoni tal-Ftehim għal perjodi suċċessivi ta’ mhux aktar minn 5 snin f’kull okkażjoni 9 . Il-Kunsill tal-Membri ddeċieda li l-Membri kellhom jinnotifikaw lid-depożitarju bl-aċċettazzjoni tagħhom tal-emenda sal-24 ta’ Ġunju 2026. L-emenda kienet maħsuba biex tidħol fis-seħħ fl-1 ta’ Jannar 2027 bil-kundizzjoni li l-Membri kollha jkunu għamlu tali notifika.
(3)Fil-123 sessjoni tiegħu f’Ġunju 2026, il-Kunsill tal-Membri ppropona li jestendi d-data sa meta l-membri kellhom jinnotifikaw lid-depożitarju bl-aċċettazzjoni tagħhom tal-emenda tal-Artikolu 36 tal-Ftehim sal-24 ta’ Ġunju 2027.
(4)Jixraq li tiġi stabbilita l-pożizzjoni li għandha tittieħed f’isem l-Unjoni fil-Kunsill tal-Membri, peress li l-estensjoni tad-data sa meta l-Membri għandhom jinnotifikaw lid-depożitarju bl-aċċettazzjoni tagħhom tal-emenda tal-Artikolu 36 tal-Ftehim hija fl-interess tal-Unjoni,
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fi ħdan il-Kunsill tal-Membri tal-Kunsill Internazzjonali taż-Żebbuġ matul sessjoni fil-ġejjieni tiegħu, jew fil-qafas ta’ proċedura għall-adozzjoni ta’ deċiżjonijiet mill-Kunsill tal-Membri permezz ta’ skambju ta’ korrispondenza, għandha tkun li jappoġġa l-estensjoni tad-data sa meta l-Membri għandhom jinnotifikaw lid-depożitarju bl-aċċettazzjoni tagħhom tal-emenda tal-Artikolu 36 tal-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda tal-2015 sal-24 ta’ Ġunju 2027.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President