IL-KUMMISSJONI EWROPEA

Brussell, 28.5.2026

COM(2026) 255 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

Rapport Annwali dwar l-Attivitajiet ta’ Riċerka u Żvilupp Teknoloġiku tal-Unjoni Ewropea u l-Monitoraġġ ta’ Orizzont Ewropa fl-2025

1.Sfond

Dan ir-rapport jagħti ħarsa ġenerali lejn l-attivitajiet ewlenin ta’ riċerka u innovazzjoni (R&I) tal-UE u lejn il-monitoraġġ ta’ Orizzont Ewropa u l-Programm ta’ Riċerka u Taħriġ tal-Euratom fl-2025.

Ġie abbozzat f’konformità mal-Artikolu 190 tat- Trattat dwar il-Funzjonament tal-Unjoni Ewropea (TFUE) u l-Artikolu 7 tat- Trattat Euratom , flimkien mal-Artikolu 50 tar- Regolament (UE) 2021/695 tal-Parlament Ewropew u tal-Kunsill li jistabbilixxi l-Orizzont Ewropa – il-Programm Qafas għar-Riċerka u l-Innovazzjoni u mal-Artikolu 12 tar- Regolament tal-Kunsill (Euratom) 2021/765 li jistabbilixxi l-Programm ta’ Riċerka u Taħriġ tal-Komunità Ewropea tal-Enerġija Atomika .

2.Kuntest politiku u żviluppi tal-politika

Fl-2025, ir-riċerka u l-innovazzjoni kienu integrali għall-avvanz ta’ inizjattivi ewlenin tal-UE, fejn ġie enfasizzat ir-rwol vitali tagħhom fit-tisħiħ tal-kompetittività. It-taqsima li ġejja tesplora l-impatt trasformattiv ta’ dawn l-iżviluppi fost is-setturi, filwaqt li tafferma l-impenn tal-UE li trawwem ekonomija ffukata fuq l-innovazzjoni.

2.1.Prosperità sostenibbli, suq uniku u kompetittività tal-Ewropa

L-Inizjattiva Agħżel l-Ewropa tnediet f’Mejju u tfittex li tagħmel lill-Ewropa l-aktar destinazzjoni attraenti għar-riċerkaturi. Sadanittant, l- istrateġija tal-UE għall-kumpaniji start-up u scale-up għandha l-għan li tagħmel lill-UE ċ-ċentru ewlieni għall-kumpaniji start-up u scale-up xprunati mit-teknoloġija. Il-Kummissjoni adottat ukoll  l-istrateġija Ewropea għall-infrastrutturi tar-riċerka u tat-teknoloġija biex trawwem infrastruttura tal-ogħla klassi, aċċessibbli u allinjata mal-industrija. 

Is- Semestru Ewropew tal-2025  iffoka fuq il-prijoritajiet tal-Boxxla għall-Kompetittività, inkluż it-tnaqqis tad-diskrepanza fl-innovazzjoni. B’riflessjoni ta’ din il-prijorità, 26 Stat Membru rċevew rakkomandazzjoni speċifika għall-pajjiż dwar ir-riċerka u l-innovazzjoni.

Fil-livell settorjali, il-Kummissjoni ħadmet ma’ assoċjazzjonijiet ta’ sħab rilevanti tat-trasport bit-triq u tal-batteriji permezz ta’ Memorandum ta’ Qbil u r-riżultati tiegħu, biex timplimenta attivitajiet ta’ riċerka u innovazzjoni mill- pjan ta’ azzjoni industrijali ġdid tal-UE għas-settur awtomobilistiku . Ir-riċerka u l-innovazzjoni kkontribwew ukoll għall-proposta l-ġdida tal-Att tal-UE dwar l-Ispazju, bil-għan li jittrawmu l-innovazzjoni u ambjent tan-negozju stabbli. Flimkien ma’ dan, il-Kummissjoni ħarġet Komunikazzjoni li tiddeskrivi viżjoni għall-ekonomija spazjali Ewropea. Il-Kummissjoni adottat il- Viżjoni għall-Agrikoltura u għall-Ikel –– li tenfasizza r-riċerka u l-innovazzjoni bħala katalisti għal sistema agroalimentari attraenti, kompetittiva u ġusta. Il- pjan ta’ azzjoni għall-industrija tas-sustanzi kimiċi  jsaħħaħ il-kompetittività, is-sostenibbiltà u r-reżiljenza tal-industrija billi jagħti spinta lill-innovazzjoni. Il-Kummissjoni adottat strateġija ġdida tal-UE dwar il-bijoekonomija u Att Ewropew dwar il-Bijoteknoloġija , b’aspetti relatati mat-teknoloġiji ekoloġiċi u mal-kompetittività fil-qasam tal-ikel u tas-saħħa.

Barra minn hekk, il-Kummissjoni adottat l- istrateġija għax-xjenzi tal-ħajja , u poġġiet lill-UE bħala ċentru globali għall-innovazzjoni fis-saħħa, fil-bijoteknoloġija, fis-sistemi tal-ikel u fil-manifattura ekoloġika sal-2030.

Ir-riċerka u l-innovazzjoni kkontribwew ukoll għall- Bauhaus Ewropea l-Ġdida  (NEB) li tappoġġa proġetti għat-trasformazzjoni tal-ambjent mibni tal-viċinati.  Il- Komunikazzjoni dwar il-Bauhaus Ewropea l-Ġdida u l- proposta għal Rakkomandazzjoni tal-Kunsill dwar l-NEB jirrikonoxxu l-kontribut tal-proġetti tal-NEB għar-riċerka u l-innovazzjoni.

2.2.Awtonomija, difiża u sigurtà strateġiċi

Bħall-kompetittività, is-sigurtà u r-reżiljenza huma imperattivi tal-politika marbuta mill-qrib mal-innovazzjoni. L-istrateġiji ta’ politika li ġejjin, imressqa mill-Kummissjoni fl-2025, jidentifikaw ir-riċerka, l-innovazzjoni u t-teknoloġija b’użu doppju bħala aspetti ewlenin:

·l- Istrateġija Ewropea għal Unjoni tal-Preparatezza

· ProtectEU – Strateġija Ewropea ta’ Sigurtà Interna  

·il- White Paper dwar id-Difiża tal-UE – Prontezza 2030 , segwita mill- Pjan Direzzjonali għall-Prontezza tad-Difiża 2030

·il- Pjan Direzzjonali għat-Trasformazzjoni tad-Difiża Ewropea  

Dawn jenfasizzaw l-importanza li r-riċerka ċivili usa’ tal-Ewropa u l-ekosistema tal-innovazzjoni fit-teknoloġija profonda jiġu sfruttati għall-prontezza tad-difiża.

Bil- mini-omnibus dwar id-difiża , il-koleġiżlaturi qablu b’mod provviżorju li jestendu l-kamp ta’ applikazzjoni tal- Pjattaforma tat-Teknoloġiji Strateġiċi għall-Ewropa (STEP) biex ikopru t-teknoloġiji tad-difiża u jippermettu lill- Aċċelleratur tal-EIC jappoġġa l-innovazzjoni b’użu doppju u fid-difiża. Ir-rieżami ta’ nofs it-terminu tal-2025 tal-politika ta’ koeżjoni saħħaħ l-appoġġ għal investimenti STEP u ħoloq opportunitajiet ġodda biex il-prijoritajiet emerġenti tar-riċerka u l-innovazzjoni jiġu integrati fil-programmi ta’ koeżjoni.

2.3.Tranżizzjoni ekoloġika

Il-Kummissjoni avvanzat it-tranżizzjoni ekoloġika tal-UE permezz ta’ inizjattivi industrijali, ambjentali u ta’ riċerka kkoordinati biex id-dekarbonizzazzjoni tinbidel fi xprunatur tal-kompetittività. Fi Frar, il-Kummissjoni nediet il- Patt għal Industrija Nadifa , li jistabbilixxi azzjoni għal industriji intensivi fl-enerġija, għal teknoloġiji nodfa u għaċ-ċirkolarità. B’mod parallel, il-Fond tar-Riċerka għall-Faħam u l-Azzar ġie riformat biex jissimplifika u jaċċellera l-investimenti fir-riċerka u l-innovazzjoni li jappoġġaw id-dekarbonizzazzjoni tas-setturi tal-faħam u tal-azzar.

Il-bijodiversità, l-ilma, l-oċeani u t-tniġġis ġew indirizzati permezz ta’ approċċi integrati u xprunati mill-innovazzjoni. Eżempju wieħed fil-bijodiversità kien il- Liġi dwar il-Monitoraġġ tal-Ħamrija l-ġdida, li tappoġġa l-objettiv ta’ ħamrija b’saħħitha sal-2050. L- Istrateġija Ewropea għar-Reżiljenza tal-Ilma tippromwovi s-sigurtà tal-ilma permezz tar-restawr taċ-ċiklu tal-ilma, ta’ ekonomija intelliġenti fl-użu tal-ilma u ta’ aċċess għal ilma nadif u affordabbli għal kulħadd. Il- Patt Ewropew għall-Oċeani jagħti prijorità lir-riċerka, lill-ħiliet u lill-innovazzjoni dwar l-oċeani.

Il-politiki dwar il-klima u l-enerġija komplew jiddependu ħafna fuq ix-xjenza u l-innovazzjoni. Inizjattivi ġodda fl-2025 inkludew il-pubblikazzjoni ta’ aġenda strateġika tar-riċerka u l-innovazzjoni dwar is-saħħa u t-tibdil fil-klima . Fl-enerġija, il- Pjan ta’ Azzjoni għal Enerġija Affordabbli , it- 2025 progress report on competitiveness of clean energy technologies , il- Communication on innovative renewable energy technologies , u l- Pakkett dwar il-Grilji Ewropej kollha saħħew ir-rwol tal-innovazzjoni fl-aċċellerazzjoni tal-varar kosteffettiv tal-enerġija nadifa.

2.4.L-IA u t-tranżizzjoni diġitali

F’Ottubru, il-Kummissjoni adottat l- istrateġija tagħha għall-IA fix-xjenza . Proġett ewlieni huwa dak tal-ħolqien tal-istitut virtwali tar-Riżorsa għax-Xjenza tal-IA fl-Ewropa (RAISE), li se jiġbor flimkien u jallinja t-talent xjentifiku u l-eċċellenza, il-qawwa komputazzjonali, id-data xjentifika u l-finanzjament tar-riċerka Ewropea.

L-iżviluppi li ġejjin fit-teknoloġija diġitali ggwidaw ukoll il-ħidma fuq ir-riċerka u l-innovazzjoni.

·Dwar l-IA, il-Kummissjoni għaddiet mir-regolamentazzjoni għall-implimentazzjoni u adottat il- Pjan ta’ Azzjoni tal-Kontinent tal-IA u l- Istrateġija għall-Applikazzjoni tal-AI . Wara t-tħabbira tal- InvestAI , l-UE espandiet in-network tal-Fabbriki tal-IA , filwaqt li saħħet l-ambizzjoni tagħha għal “Kontinent tal-IA”, u b’hekk wittiet it-triq għal Gigafabbriki tal-IA futuri.

·Dwar it-teknoloġija kwantistika, il-Kummissjoni nediet l- Istrateġija Kwantistika tal-UE , bil-għan li sal-2030, l-Ewropa tiġi ppożizzjonata bħala mexxejja globali fil-qasam. 

·Il-Cloud tal-Wirt Kulturali ġie estiż u issa jinvolvi 187 organizzazzjoni sieħba li jkopru l-Istati Membri kollha u l-pajjiżi assoċjati ma’ Orizzont Ewropa.

·Il-prototip tat- Tewmi Diġitali Ewropew tal-Oċean ġie ppreżentat mill-President von der Leyen fil-Konferenza dwar l-Oċeani f’Ġunju.

·L- Istrateġija Diġitali Internazzjonali ġiet adottata, bil-għan li tagħti spinta lill-kompetittività teknoloġika u lill-kapaċità tal-innovazzjoni tal-UE f’kollaborazzjoni mas-sħab u mal-alleati.

2.5.Sħubija mal-Istati Membri

Fir-rigward tal-miżuri tar-riċerka u l-innovazzjoni fil-Faċilità għall-Irkupru u r-Reżiljenza (RRF), intlaħqu 351 stadju importanti u l-miri relatati mar-riċerka u l-innovazzjoni. Il-mudell tal-RRF qed juri li huwa effettiv biex jixpruna l-investimenti fir-riċerka u l-innovazzjoni u fir-riformi trasformattivi madwar l-UE, skont studju ddedikat dwar ir-riċerka u l-innovazzjoni fl-RRF  . F’termini ta’ sinerġiji mal-politika ta’ koeżjoni, f’Malta u fil-Litwanja qed jiġu implimentati trasferimenti baġitarji mill-Fond Ewropew għall-Iżvilupp Reġjonali għal Orizzont Ewropa.

Id-diskussjonijiet bilaterali bejn il-Kummissjoni u l-Istati Membri ġew approfonditi matul is-sena permezz ta’ djalogi msaħħa mad-Danimarka, mal-Bulgarija, mal-Portugall, mal-Finlandja u ma’ Spanja. Barra minn hekk, il-Faċilità ta’ Appoġġ għall-Politiki kompliet tgħin lill-Istati Membri u lill-pajjiżi assoċjati biex jirriformaw is-sistemi tagħhom tar-riċerka u l-innovazzjoni. Ġew konklużi attivitajiet speċifiċi għall-pajjiż għall-Bulgarija, għaċ-Ċekja, għall-Finlandja u għall-Ukrajna. Saru eżerċizzji ta’ apprendiment reċiproku dwar is-suġġetti tal-karrieri fir-riċerka, il-politiki nazzjonali għall-IA fix-xjenza, it-tnaqqis tad-diskrepanza bejn ix-xjenza u l-politika, u l-involviment pubbliku fir-riċerka u l-innovazzjoni, b’għadd kbir ta’ pajjiżi involuti. Barra minn hekk, ir- rapport “She Figures” ta’ kull 3 snin ġie ppubblikat biex jappoġġa lill-Istati Membri u lill-partijiet ikkonċernati fit-titjib tal-ugwaljanza bejn il-ġeneri fiż-Żona Ewropea tar-Riċerka.

Tnieda s- Science, Technology and Innovation Policy Compass tal-Kummissjoni Ewropea–l-OECD, u b’hekk id-data dwar l-inizjattivi u x-xejriet tal-politika tar-riċerka u l-innovazzjoni ġiet aggregata fi pjattaforma waħda.

2.6.Ewropa globali

L-UE kompliet tappoġġa l-irkupru tal-Ukrajna billi nediet il-Koalizzjoni Internazzjonali għax-Xjenza, ir-Riċerka u l-Innovazzjoni fl-Ukrajna, flimkien mal-Ukrajna, mal-Italja u mal-UNESCO.

Is-sħubijiet mal-Afrika u mal-Mediterran ġew imsaħħa wkoll, b’mod partikolari permezz ta’ negozjati għal Ftehim dwar ix-Xjenza u t-Teknoloġija bejn l-UE u n-Niġerja u t-tiġdid tal-ftehimiet PRIMA mal-Ġordan, mal-Libanu u mal-Marokk. Ġiet approfondita l-kooperazzjoni strateġika mas-sħab globali ewlenin, inkluż permezz tal-Kunsill tal-Kummerċ u t-Teknoloġija bejn l-UE u l-Indja. Il-kooperazzjoni mal-Amerka Latina u mal-Karibew kisbet momentum bl-ewwel laqgħa Ministerjali UE-CELAC dwar ir-riċerka u l-innovazzjoni.

Filwaqt li s-sena bdiet bit-tiġdid b’suċċess tal-Ftehim dwar ix-Xjenza u t-Teknoloġija bejn l-UE u l-Istati Uniti, bidliet sussegwenti fil-politika tal-Istati Uniti affettwaw oqsma ewlenin bħalma huma l-azzjoni klimatika. F’dan il-kuntest, l-UE żammet djalogu miftuħ u saħħet inizjattivi multilaterali, b’mod partikolari fl-osservazzjoni tal-klima u tal-oċeani.

Dan l-impenn għall-multilateraliżmu ġie rifless fl-adozzjoni tal-Pakkett Tshwane tal-G20, li jippromwovi l-innovazzjoni miftuħa, u r-rwol imsaħħaħ tal-UE fid-diplomazija dwar ix-xjenza globali. Barra minn hekk, il-Kummissjoni kkopresediet il-Forum Globali 2025 tal-Grupp dwar l-Osservazzjonijiet tad-Dinja u ppresediet l- Alleanza għar-Riċerka u l-Innovazzjoni dwar l-Oċean Atlantiku. Il-Kummissjoni organizzat il-forum tal-Alleanza f’Settembru, li fih tnedew in- Network Atlantiku ta’ Siti Beacon għal Reżiljenza Kostali u l- Programm Interġenerazzjonali Blu . Fi ħdan il-Missjoni Innovazzjoni, l-UE aċċellerat it-tranżizzjoni lejn enerġija nadifa, u identifikat 101 proġett ta’ Widien tal-Idroġenu madwar 38 pajjiż.

Orizzont Ewropa għandu rwol kruċjali fl-appoġġ ta’ oqsma prijoritarji tal- Global Gateway .

2.7.Azzjonijiet diretti mhux nukleari implimentati miċ-Ċentru Konġunt tar-Riċerka (JRC) tal-Kummissjoni

Il-JRC ipproduċa 824 pubblikazzjoni rieżaminata bejn il-pari u 917-il output tekniku u ta’ xjenza għall-politika. Il-punti ewlenin jinkludu dawn li ġejjin:

· rapport ta’ prospettiva dwar l-IA ġenerattiva li jipprovdi analiżi li tħares ’il quddiem tal-potenzjal trasformattiv tagħha fl-UE, inkluż l-impatt soċjoekonomiku fuq il-kura tas-saħħa, l-edukazzjoni, l-impjiegi u lil hinn; 

·it-tnedija ta’  Laboratorju ġdid tal-JRC għas-Sigurtà tal-Fruntieri , network ta’ laboratorji li jaħdmu mill-qrib mal-aġenziji tal-infurzar tal-liġi tal-UE;

·edizzjoni ġdida tal- Atlas of Migration , li toffri ħarsa ġenerali armonizzata dwar il-migrazzjoni dinjija;

·rapport tax-xjenza għall-politika dwar l-isfruttament tal-potenzjal tat-tranżizzjoni tal-ekonomija ċirkolari fl-industriji intensivi fl-enerġija ;

·it-tnedija taċ- Ċentru tal-Faqar tat-Trasport , li jippermetti l-interventi u l-monitoraġġ tal-progress lejn sistemi tat-trasport tal-UE aktar inklużivi.

· żewġ atlases ġodda dwar materja partikolata fina (PM2,5)  – li għall-ewwel darba jkopru l-bliet fil-pajjiżi tat-tkabbir.

3.Implimentazzjoni u Monitoraġġ ta’ Orizzont Ewropa u tal-Euratom

3.1.Orizzont Ewropa fl-2025 – punti ewlenin u karatteristiċi ġodda

L-2025 kienet ikkaratterizzata minn żviluppi kbar ta’ programmazzjoni għall-aħħar 3 snin ta’ Orizzont Ewropa 2021–2027. Il-programm ta’ ħidma “prinċipali” ta’ Orizzont Ewropa għall-2025 ġie adottat f’Mejju, segwit mill-programm ta’ ħidma “prinċipali” għall-2026–2027 f’Diċembru. Iż-żewġ programmi ta’ ħidma għamlu enfasi qawwija fuq is-simplifikazzjoni, fejn dan tal-aħħar jintroduċi wkoll l-użu ta’ sejħiet orizzontali f’oqsma strateġiċi.

Assoċjazzjoni ta’ pajjiżi terzi ma’ Orizzont Ewropa

L-għadd ta’ pajjiżi assoċjati laħaq it-22. Ġew iffirmati diversi ftehimiet ta’ assoċjazzjoni matul is-sena: filwaqt li l-Iżvizzera u l-Eġittu ssieħbu f’Orizzont Ewropa fit-totalità tiegħu, ir-Repubblika tal-Korea ssieħbet fil-Pilastru II tiegħu. Il-kontribuzzjoni operazzjonali kkombinata mill-pajjiżi assoċjati fl-2025 kienet ta’ EUR 3,3 biljuni, b’aktar minn 15 500 parteċipazzjoni mill-bidu ta’ dan il-programm qafas.

3.2.Is-simplifikazzjoni ta’ Orizzont Ewropa

Is-sena 2025 kienet mument deċiżiv għas-simplifikazzjoni tax-xenarju ta’ appoġġ għar-riċerka u l-innovazzjoni tal-UE.

Orizzont Ewropa wassal għar-riformi prattiċi li ġejjin li naqqsu l-amministrazzjoni u aċċelleraw l-eżiti tal-innovazzjoni.

·Il-finanzjament b’somma f’daqqa ġie implimentat gradwalment, u b’hekk naqqas il-ħtieġa li jiġu rrapportati l-kostijiet reali u ffaċilita l-parteċipazzjoni, b’mod partikolari għall-SMEs u għall-parteċipanti l-ġodda. L-objettivi ewlenin huma li titnaqqas il-kumplessità amministrattiva għall-benefiċjarji u li jitnaqqsu l-iżbalji finanzjarji.

·Il-programmi ta’ ħidma pproponew inqas suġġetti, b’deskrizzjonijiet iqsar, u test imqassar tal-programm ta’ ħidma. Huma introduċew ukoll aktar suġġetti miftuħin, filwaqt li żammew direzzjoni strateġika.

·Ir-rekwiżiti tal-proposti ġew issimplifikati, b’inqas informazzjoni meħtieġa bil-quddiem dwar diversi aspetti relatati mal-politika, u dan irriżulta f’formola ta’ proposta iqsar.

·Intużat evalwazzjoni f’żewġ stadji għal 29 suġġett, li ppermettiet lill-applikanti li l-ewwel jissottomettu proposti iqsar u l-proposti sħaħ jippreparawhom biss jekk jintgħażlu għat-tieni stadju. Ħafna minn dawn il-proposti qosra jiġu evalwati mingħajr ma l-evalwatur ikun jaf minn issottomettihom, bħala mod kif jiġi evitat ir-riskju potenzjali ta’ preġudizzju.

·It-trasparenza ġiet imsaħħa billi t-testi tal-abbozzi tal-programmi ta’ ħidma saru aċċessibbli għall-pubbliku.

Id-djalogi dwar l-implimentazzjoni u l-kontrolli tar-realtà ppermettew feedback dirett minn start-ups, riċerkaturi u innovaturi dwar l-ostakli fis-sottomissjoni tal-proposti, fl-evalwazzjoni u fil-ġestjoni tal-għotjiet, u dan għen biex jiġu identifikati l-prijoritajiet għal aktar simplifikazzjoni.

L-implimentazzjoni ġiet issimplifikata permezz ta’ għodod diġitali mtejba. Il-faċilità għall-utent u l-funzjonalità tal-Portal tal-UE għall-Finanzjament u għall-Offerti ġew imsaħħa aktar u ġiet introdotta l-applikazzjoni għall-apparat mobbli l-ġdida “EU funding & me”, fi proċess infurmat minn stħarriġ fost 30 000 applikant u benefiċjarju.

3.3.Data ta’ monitoraġġ ta’ Orizzont Ewropa

Opportunitajiet ta’ finanzjament

Sors: Sistemi ta’ monitoraġġ intern tal-Kummissjoni, 6 ta’ Jannar 2026

Is-787 sejħa għal proposti taħt il-programmi ta’ ħidma 2021–2025 koprew total ta’ 3 061 suġġett ta’ riċerka b’baġit ta’ EUR 67,9 biljun.

Proposti għal proġetti u rati ta’ suċċess

Sors: Sistemi ta’ monitoraġġ intern tal-Kummissjoni, 5 ta’ Jannar 2026

L-interess fil-programm baqa’ b’saħħtu, b’148 884 proposta eliġibbli sottomessi 1 matul il-perjodu 2021–2025. Il-kwalità ġenerali tagħhom baqgħet stabbli, b’aktar minn nofs il-proposti eliġibbli (57 %) jilħqu l-limitu minimu tal-punteġġ ta’ evalwazzjoni.

Sa Jannar 2026, intgħażlu 21 329 proposta għall-finanzjament għal kontribuzzjoni totali stmata tal-UE ta’ EUR 57,4 biljun. Ir-rata ta’ suċċess tal-proposti naqset għal 14 % meta mqabbla ma’ 15,3 % f’Jannar 2025 iżda b’mod ġenerali baqgħet ogħla minn dik taħt Orizzont 2020 (11,9 %).

Madwar 70 % tal-proposti li qabżu l-limitu għall-finanzjament ma ġewx iffinanzjati. Huwa stmat li kienu jkunu meħtieġa EUR 118,5-il biljun ta’ finanzjament addizzjonali biex jiġu ffinanzjati dawn il-proposti kollha sottomessi matul l-2021–2025.

Proġetti ffinanzjati

Sa tmiem l-2025, ingħataw EUR 52,8 biljun permezz ta’ 19 456 għotja. Id-daqs medju tal-għotjiet baqa’ stabbli għal EUR 2,7 miljun, ogħla minn dak taħt Orizzont 2020 (EUR 2,3 miljun 2 ), b’medja ta’ sitt parteċipanti għal kull proġett.

Il-Kunsill Ewropew tal-Innovazzjoni (EIC) jinkludi wkoll strument ta’ investiment ta’ ekwità, il-Fond tal-EIC, immirat lejn l-aktar start-ups u scale-ups innovattivi. Minbarra ċ-ċifri ppreżentati fit-tabella ta’ hawn taħt, il-Fond tal-EIC approva aktar minn EUR 2,3 biljuni f’investimenti ta’ ekwità għall-benefiċjarji ta’ Orizzont Ewropa, li minnhom s’issa ntnefqu EUR 931,9 miljun. 3

Tabella 1 Proposti u għotjiet iffirmati għal kull parti tal-programm, matul l-2021–2025 (Sors: Dashboards tal-Proposti u tal-Proġetti Orizzont, iffriżati fil-5 ta’ Jannar 2026)

L-Indirizzar tal-prijoritajiet tal-politika tal-UE

Sors: Dikjarazzjoni tal-Programm tal-Prestazzjoni ta’ Orizzont Ewropa

Ir-Riċerka u l-Innovazzjoni għandhom rwol ċentrali fl-aċċellerazzjoni tat-tranżizzjoni ekoloġika. S’issa, Orizzont Ewropa jinsab fit-triq it-tajba biex jilħaq il-mira tiegħu ta’ 35 % tal-infiq allokat biex jindirizza t-tibdil fil-klima, filwaqt li se tkun meħtieġa aktar ħidma biex tintlaħaq il-mira ta’ nfiq ta’ 10 % għall-bijodiversità għall-2026-2027.

Fl-2025, ġew allokati wkoll madwar EUR 58,7 miljun għal proġetti li l-objettiv prinċipali tagħhom huwa li jtejbu l-ugwaljanza bejn il-ġeneri u EUR 1 848 miljun għal proġetti li se jikkontribwixxu għall-ugwaljanza bejn il-ġeneri.

Applikanti u benefiċjarji

Sors: Sistemi ta’ monitoraġġ intern tal-Kummissjoni, 5 ta’ Jannar 2026

Il-proġetti ffirmati fl-ewwel 5 snin tal-programm jinvolvu 31 006 parteċipanti uniċi minn 175 pajjiż differenti, inkluż il-parteċipazzjoni ta’ 35 % 5 minn SMEs. Bħala medja, kull parteċipant jieħu sehem fi 3,9 proġetti.

Il-parteċipanti l-ġodda fil-programm jirrappreżentaw 55 % tal-parteċipanti kollha, meta mqabbla ma’ 54 % sena ilu. Ir-rata ta’ parteċipazzjoni tal-parteċipanti l-ġodda (jiġifieri l-għadd medju ta’ proġetti li fihom ikun issieħeb kull parteċipant) hija aktar baxxa minn dik ta’ parteċipanti li ma humiex ġodda (1,2 kontra 5). Il-parteċipanti l-ġodda jiġu prinċipalment mis-settur privat – u ħafna minnhom huma SMEs – u s’issa ngħataw 16,7 % tal-finanzjament kollu ta’ Orizzont Ewropa.

L-ogħla ishma ta’ parteċipanti jiġu minn istituzzjonijiet tal-edukazzjoni għolja (35 %), li jirċievu l-ogħla kontribuzzjoni finanzjarja (EUR 19-il biljun). L-entitajiet tas-settur privat u l-organizzazzjonijiet tar-riċerka jirrappreżentaw 30 % u 22 % tal-parteċipazzjoni u jirċievu EUR 13,5-il biljun u EUR 14-il biljun rispettivament.

Il-parteċipanti mill-Istati Membri jammontaw għal 80 % tal-applikazzjonijiet eliġibbli kollha sottomessi, u 19 % huma minn pajjiżi “tat-twessigħ”. B’mod ġenerali, l-Istati Membri ngħataw EUR 47,3 biljun jew 89,6 % tal-fondi. L-Istati Membri tat-twessigħ 6 ingħataw 13,1 % tal-fondi, sehem ogħla milli għall-istess pajjiżi taħt Orizzont 2020.

Il-metodu ta’ rapportar għall-pajjiżi assoċjati ma’ Orizzont Ewropa ġie adattat fit-tabella ta’ hawn taħt biex jirrifletti d-data ta’ meta sar effettiv il-ftehim ta’ assoċjazzjoni.

Tabella 2: Il-pajjiż ta’ oriġini tal-applikanti u tal-benefiċjarji

Direzzjonijiet ewlenin tal-impatt

Sors: Dashboard tal-KIPs iffriżati fil-5 ta’ Jannar 2026

F’Orizzont Ewropa, ġew introdotti direzzjonijiet ewlenin tal-impatt (KIPs) biex jiġi segwit l-impatt tal-programm permezz ta’ indikaturi fuq perjodu ta’ żmien qasir, medju u twil.

Id-data hija bbażata l-aktar fuq is-sistema ta’ rapportar perjodiku tal-proġett. 2 664 proġett (14 %) ingħalqu fiż-żmien ta’ din l-analiżi u 40 % tal-proġetti kienu lestew mill-inqas rapport perjodiku wieħed. Peress li l-biċċa l-kbira tal-indikaturi fuq perjodu ta’ żmien medju u aktar fit-tul jeħtieġu li jkunu ntemmu għadd sinifikanti ta’ proġetti qabel ma jagħtu riżultati sinifikattivi, din it-taqsima tiffoka fuq indikaturi fuq perjodu ta’ żmien qasir biss.

Impatt xjentifiku

·Il-proġetti ta’ Orizzont Ewropa s’issa rrapportaw 18 478 pubblikazzjoni rieżaminati bejn il-pari (KIP 1).

·Orizzont Ewropa jinvolvi 126 407 riċerkatur fi stadju bikri tal-karriera (KIP 2), li 44 % minnhom huma nisa.

·80,8 % tal-outputs tar-riċerka prodotti mill-programm (pubblikazzjonijiet, settijiet ta’ data, software) saru disponibbli b’aċċess miftuħ permezz tal-benefiċjarji (KIP 3).

Impatt fuq is-soċjetà

·Aktar minn 99 % tal-outputs kollha ta’ Orizzont Ewropa huma mmarkati bħala rilevanti għal waħda mill-prijoritajiet tal-politika tal-UE –– jew il-prijoritajiet tal-Kummissjoni tal-2019–2024, l-Għanijiet ta’ Żvilupp Sostenibbli, jew l-għanijiet ta’ adattament/mitigazzjoni tat-tibdil fil-klima (KIP 4) 7 .

·Il-proġetti tal-Missjoni tal-UE pproduċew 206 pubblikazzjoni rieżaminati bejn il-pari u 284 riżultat innovattiv (KIP 5).

·41 % tal-proġetti għandhom mekkaniżmi strutturati biex jinvolvu lill-pubbliku jew lill-utenti finali fil-kokreazzjoni ta’ kontenut tar-riċerka u l-innovazzjoni (KIP 6).

Impatt ekonomiku/teknoloġiku

·Il-proġetti rrapportaw 7 645 output innovattiv (prodotti, proċessi, metodi, eċċ.). Barra minn hekk, il-benefiċjarji diġà ddikjaraw 283 output mhux kunfidenzjali ta’ drittijiet tal-proprjetà intellettwali, li minnhom 94 applikazzjoni għal privattiva –– għadd li huwa mistenni li jiżdied ladarba titneħħa l-kunfidenzjalità mill-biċċa l-kbira tal-applikazzjonijiet (KIP 7).

·Il-proġetti ffinanzjati jappoġġaw mill-inqas 95 798 impjieg (impjegati ekwivalenti għall-full-time) f’entitajiet legali parteċipanti (KIP 8).

·Flimkien mal-investiment inizjali mill-UE, il-parteċipanti tal-proġetti għamlu koinvestimenti diretti ta’ mill-inqas EUR 12,9-il biljun (KIP 9).

Fokus fuq is-sħubijiet Ewropej

Sors: Dashboard tal-Proġetti Orizzont iffriżati fil-5 ta’ Jannar 2026

Sa tmiem l-2025, kien hemm attivi 54 sħubija Ewropea, bi tnejn li kellhom jiġu ffirmati f’Jannar 2026 u erbgħa oħra li kellhom jiġu ffirmati aktar tard. Fis-sħubijiet kollha ġew iffirmati total ta’ 1 345 għotja, li kienu jinvolvu 9 568 parteċipant uniku u li rrappreżentaw kontribuzzjoni tal-UE ta’ EUR 12,5-il biljun.

Mill-2021, 10 impriżi konġunti attivi 8 ffirmaw 701 għotja li jammontaw għal total ta’ EUR 6,7 biljuni u li jinvolvu 5 350 parteċipant uniku. Barra minn hekk, EUR 4,3 biljuni minn Orizzont Ewropa appoġġaw lil 11-il sħubija koprogrammata, b’635 għotja lil 4 944 organizzazzjoni distinta. Fir-rigward tas-sħubijiet kofinanzjati, ġew iffirmati 18-il ftehim ta’ għotja għal total ta’ EUR 1,5 biljun, li jinvolvu 754 parteċipant uniku.

Fokus fuq il-missjonijiet tal-UE

Sors: Dashboards tal-Proposti u tal-Proġetti Orizzont, iffriżati fil-5 ta’ Jannar 2026

Fil-programm ta’ ħidma tal-2025, tnedew disa’ sejħiet għal missjonijiet. Bejn l-2021 u l-2025, is-sejħiet relatati mal-missjonijiet attiraw 1 515-il proposta eliġibbli. Ġew iffirmati 321 għotja, li involvew 3 845 benefiċjarju u li ammontaw għal EUR 2,48 biljuni.

3.4.Analiżi fil-fond: Monitoraġġ rapidu ta’ Orizzont Ewropa u studji oħra

Fl-2025, ġew ippubblikati diversi rapporti tematiċi dwar l-implimentazzjoni u l-prestazzjoni ta’ Orizzont Ewropa:

·monitoraġġ rapidu li jippreżenta ħarsa ġenerali lejn l-ugwaljanza bejn il-ġeneri fil-programmi tar-riċerka u l-innovazzjoni tal-UE ;

·monitoraġġ rapidu li jippreżenta l- kontribut ta’ Orizzont Ewropa għall-ħames missjonijiet tal-UE ;

·studju li jiżviluppa kwantifikazzjoni tal-benefiċċji ambjentali ta’ Orizzont Ewropa , b’mod partikolari permezz tal-iffrankar tal-enerġija jew tar-riżorsi;

·studju li jivvaluta l- impatt makroekonomiku ta’ Orizzont Ewropa fuq il-PDG u l-impjiegi;

·monitoraġġ rapidu dwar l- użu tal-livelli tat-tħejjija teknoloġika f’Orizzont Ewropa ;

·studju li jqis 20 sena ta’ riċerka dwar is-sigurtà ffinanzjata mill-UE (ċivili) .

Evalwazzjoni interim ta’ Orizzont Ewropa

F’April, il-Kummissjoni ppubblikat l- evalwazzjoni interim ta’ Orizzont Ewropa. Inħarġet ukoll Komunikazzjoni lill-Parlament Ewropew u lill-Kunsill, li tipprovdi t- tagħlimiet meħuda u proposti għal azzjoni futura . Is-sejbiet ewlenin juru l-impatt qawwi ta’ Orizzont Ewropa permezz ta’ innovazzjonijiet tanġibbli u l-eċċellenza xjentifika tiegħu. Il-programm jamplifika l-impatt tal-innovazzjoni, fejn kull euro investit permezz tal-Fond tal-EIC jattira aktar minn 3 euro f’investiment privat. Il-parteċipazzjoni mill-Istati Membri tat-twessigħ żdiedet ukoll għal 58 % minn 47 % taħt Orizzont 2020.

Valutazzjoni tal-impatt u proposta għall-Orizzont Ewropa futur u għall-Fond Ewropew għall-Kompetittività

Il-Kummissjoni ppubblikat ukoll valutazzjoni tal-impatt għall-Orizzont Ewropa futur (2028–2034) u għall-Fond Ewropew għall-Kompetittività ġdid . Sussegwentement adottat proposti għaż-żewġ programmi interkonnessi, li se jappoġġaw il-vjaġġ kollu tal-innovazzjoni mil-laboratorju għas-suq. Wara l-adozzjoni tagħhom mill-Kummissjoni f’Lulju, il-proposti issa qed jiġu nnegozjati mill-koleġiżlaturi.

3.5.Disseminazzjoni u sfruttament

Il-Kummissjoni kompliet tmexxi u tiżviluppa l- Pjattaforma tar-Riżultati ta’ Orizzont u s-servizz Booster biex tappoġġa lill-benefiċjarji ta’ Orizzont Ewropa fid-disseminazzjoni u fl-isfruttament tar-riżultati tagħhom. Il-Pjattaforma tar-Riżultati ta’ Orizzont rat 569 riżultat ġdid imtellgħin u appoġġat b’mod attiv lil 25 kumpanija fil-vjaġġ tagħhom lejn is-suq b’finanzjament iddedikat u opportunitajiet biex jipparteċipaw f’avvenimenti għall-investituri. Il-Booster ipprovda 764 servizz għal 1 602 benefiċjarji li jvarjaw minn disseminazzjoni għal appoġġ għad-dħul fis-suq.

Il-Kummissjoni pproduċiet diversi pubblikazzjonijiet CORDIS , inkluż 20 Pakkett Tematiku, 10 vidjows “Riżultati fil-Qosor” u 10 episodji tal-podcast CORDIScovery.

3.6.Implimentazzjoni u monitoraġġ tal-Programm Euratom

Wara l- proposta tal-Kummissjoni, il-Kunsill adotta estensjoni tal-programm ta’ riċerka u taħriġ tal-Euratom għall-2026 u l-2027, sostnut mill- evalwazzjoni interim tal-programm għall-2021–2025.

Il-programm tal-2021–2025 għandu baġit totali ta’ EUR 1,38 biljun. Dan jiġi implimentat permezz ta’ azzjonijiet diretti u indiretti, li jammontaw għal 38,5 % u 61,5 % tal-baġit rispettivament. Taħt il-fergħa ta’ azzjonijiet indiretti, sa tmiem l-2025 ġew iffirmati 61 għotja għal proġetti, inklużi erba’ sħubijiet kofinanzjati. Dawn laqqgħu flimkien lil 578 parteċipant uniku u rrappreżentaw EUR 816-il miljun f’kontribuzzjonijiet tal-Euratom.

F’Settembru, il-Kummissjoni żvelat il-proposta tagħha għall-programm ta’ riċerka u taħriġ tal-Euratom li jmiss (2028–2032).

a)Azzjonijiet diretti nukleari implimentati mill-JRC

Fl-2025, il-JRC ippreżenta 102 artikli rieżaminati bejn il-pari dwar suġġetti ta’ riċerka nukleari, 90 rapport tekniku, tliet punti ta’ materjal ta’ referenza u tliet metodi vvalidati inkorporati f’libreriji nukleari internazzjonali, erba’ sistemi tekniċi mmirati lejn it-tisħiħ tas-salvagwardji nukleari u kontribut wieħed għall-istandards internazzjonali.

Il-JRC ikkontribwixxa għall- pjan ta’ azzjoni strateġiku dwar ir-reatturi modulari żgħar (SMR) , approvat mill-Alleanza Industrijali Ewropea dwar l-SMR, li għandu l-għan li jiffaċilita l-iżvilupp u l-użu siguri tagħhom sal-2030.

b)Azzjonijiet indiretti tal-Programm ta’ riċerka u taħriġ tal-Euratom

Il-Kummissjoni nediet inizjattivi biex tindirizza n-nuqqas ta’ ħiliet nukleari speċjalizzati, b’mod partikolari fis-sikurezza nukleari, fit-teknoloġiji innovattivi u fil-protezzjoni radjoloġika. Il- proġett Skills4Nuclear jappoġġa l-iżvilupp ta’ forza tax-xogħol kwalifikata għat-teknoloġiji nukleari eżistenti u dawk emerġenti. B’mod parallel, is- sħubija kofinanzjata PIANOFORTE , b’108 sieħba minn madwar 26 pajjiż, nediet it-tielet sejħa miftuħa tranżnazzjonali tagħha, u għażlet sitt proġetti ġodda. Is- sħubija kofinanzjata EURAD 2 kompliet issaħħaħ il-kapaċitajiet Ewropej permezz tat-tnedija tal-programm ta’ mobbiltà tagħha.

4.Il-Prospetti għall-2026

Fl-2026, il-Kummissjoni għandha l-għan li ssaħħaħ l-ekosistema tar-riċerka u l-innovazzjoni tal-Ewropa permezz tal-Att Ewropew għall-Innovazzjoni u l-Att dwar iż-Żona Ewropea tar-Riċerka. Dawn se jaċċelleraw l-adozzjoni mis-suq tal-innovazzjoni, jallinjaw il-prijoritajiet tal-UE u dawk nazzjonali, u jgħinu biex tintlaħaq il-mira ta’ investiment ta’ 3 % tal-PDG fir-riċerka u l-innovazzjoni madwar l-UE. Dawn l-inizjattivi se jgħinu biex jitqiegħdu fis-suq ideat innovattivi fis-setturi kollha, titnaqqas il-frammentazzjoni, u se jsaħħu ċ-ċirkolazzjoni libera tar-riċerkaturi, tal-għarfien u tat-teknoloġija.

Fl-2026 se jitnedew il- Fond Scale-up Europe b’diversi biljuni ta’ euro biex jappoġġa lill-kumpaniji tat-teknoloġija strateġika l-aktar promettenti tal-Ewropa, u l- Att dwar il-Materjali Avvanzati , li għandu l-għan li jaċċellera l-innovazzjoni u l-espansjoni ta’ materjali avvanzati. Se jitnedew ukoll inizjattivi ġodda ta’ riċerka u innovazzjoni f’oqsma li jinkludu l-IA, il-batteriji, l-aċċess għad-data, is-saħħa, il-klima, l-agrikoltura, l-iżvilupp rurali, il-bijodiversità, ir-reżiljenza tal-oċeani u tal-ilma, fost oħrajn.

(1) L-għadd ta’ proposti eliġibbli sottomessi biss taħt is-sejħiet li huma magħluqin u evalwati bis-sħiħ.

(2) L-istrument tal-SMEs mhux inkluż.

(3) Għal aktar informazzjoni dwar l-impriżi appoġġati mill-Fond tal-EIC, ara r- Rapport tal-Impatt tal-EIC 2025 .

(4) Iċ-ċifra tirreferi biss għall-għotjiet li jibdew il-Komunitajiet ta’ Konoxxenza u Innovazzjoni tal-EIT, li mbagħad ikunu inkarigati milli jimplimentaw l-attivitajiet.

(5) Ta’ parteċipanti uniċi.

(6) Stati Membri biss (il-Bulgarija, iċ-Ċekja, l-Estonja, il-Greċja, il-Kroazja, Ċipru, il-Latvja, il-Litwanja, l-Ungerija, Malta, il-Polonja, il-Portugall, ir-Rumanija, is-Slovenja u s-Slovakkja).

(7) Il-JRC u l-EIT ma humiex inklużi fil-kalkolu.

(8) Sħubijiet istituzzjonalizzati bbażati fuq l-Artikolu 187 tat-TFUE.