IL-KUMMISSJONI EWROPEA

Brussell, 15.12.2025

COM(2025) 755 final

2025/0388(NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tittieħed f’isem l-Unjoni Ewropea fil-Kunsill ta’ Assoċjazzjoni UE-Ukrajna fir-rigward tal-istabbiliment tas-Sottokumitat għar-Riforma tal-Amministrazzjoni Pubblika skont il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna min-naħa l-oħra, u dwar l-approvazzjoni tal-istabbiliment tal-Kumitat Konsultattiv Konġunt bejn il-Kumitat Ewropew tar-Reġjuni u l-Ukrajna

2025/0388 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tittieħed f’isem l-Unjoni Ewropea fil-Kunsill ta’ Assoċjazzjoni UE-Ukrajna fir-rigward tal-istabbiliment tas-Sottokumitat għar-Riforma tal-Amministrazzjoni Pubblika skont il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna min-naħa l-oħra, u dwar l-approvazzjoni tal-istabbiliment tal-Kumitat Konsultattiv Konġunt bejn il-Kumitat Ewropew tar-Reġjuni u l-Ukrajna

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 217, flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)Il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra 1 (il-“Ftehim”) daħal fis-seħħ fl-1 ta’ Settembru 2017.

(2)Il-Preambolu tal-Ftehim jirrikonoxxi l-impenn tal-Partijiet li javvanzaw ir-riformi u l-proċessi ta’ approssimazzjoni ’l quddiem fl-Ukrajna, abbażi ta’ valuri komuni, jiġifieri inkluż ir-rispett għal governanza tajba.

(3)L-Artikolu 4 tal-Ftehim jirreferi għall-għan tad-djalogu politiku, li huwa li jissaħħaħ ir-rispett għall-governanza tajba, li huwa ċentrali għat-tisħiħ tar-relazzjoni bejn il-Partijiet.

(4)L-Artikolu 6 tal-Ftehim dwar id-djalogu u l-kooperazzjoni dwar ir-riforma domestika, jitlob lill-Partijiet tal-Ftehim jikkooperaw sabiex jiżguraw li l-politiki interni tagħhom ikunu bbażati fuq prinċipji komuni, b’mod partikolari l-istabbiltà u l-effettività tal-istituzzjonijiet demokratiċi.

(5)L-Artikolu 346 tal-Ftehim jiffoka fuq it-tisħiħ tal-kooperazzjoni fil-qasam tal-ġestjoni tal-finanzi pubbliċi filwaqt li jiżgura l-iżvilupp tal-politika baġitarja u sistemi sodi ta’ kontroll intern pubbliku u awditjar estern, allinjati mal-prinċipji fundamentali tal-akkontabilità, it-trasparenza, l-ekonomija, l-effiċjenza u l-effettività.

(6)L-Artikolu 446 tal-Ftehim jiddeskrivi l-għan li jiġu promossi l-fehim reċiproku u l-kooperazzjoni bilaterali fil-qasam tal-politika reġjonali, dwar metodi ta’ formulazzjoni u implimentazzjoni ta’ politiki reġjonali, inklużi governanza u sħubija fuq diversi livelli, b’enfasi speċjali fuq l-iżvilupp ta’ żoni żvantaġġati u l-koperazzjoni territorjali, biex b’hekk jistabbilixxu mezzi ta’ komunikazzjoni u jitqawwa l-iskambju ta’ informazzjoni bejn l-awtoritajiet nazzjonali, reġjonali u lokali, l-atturi soċjoekonomiċi u s-soċjetà ċivili.

(7)L-Artikolu 450 tal-Ftehim jippermetti lill-Ukrajna tipparteċipa fl-aġenziji tal-UE rilevanti għall-implimentazzjoni tal-Ftehim, fejn il-Kumitat Ewropew tar-Reġjuni huwa korp konsultattiv tal-UE.

(8)L-Artikolu 463(1) tal-Ftehim jagħti s-setgħa lill-Kunsill ta’ Assoċjazzjoni biex jieħu deċiżjonijiet bl-għan li jintlaħqu l-objettivi tal-Ftehim.

(9)L-Artikolu 466(2) tal-Ftehim jipprevedi li l-Kunsill ta’ Assoċjazzjoni jistabbilixxi kwalunkwe kumitat jew korp speċjali f’oqsma speċifiċi meħtieġa għall-implimentazzjoni tal-Ftehim.

(10)Il-Kunsill ta’ Assoċjazzjoni se jiddeċiedi dwar l-istabbiliment tas-Sottokumitat għar-Riforma tal-Amministrazzjoni Pubblika u japprova l-istabbiliment tal-Kumitat Konsultattiv Konġunt bejn il-Kumitat Ewropew tar-Reġjuni u l-Ukrajna.

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed f’isem l-Unjoni fil-Kunsill ta’ Assoċjazzjoni stabbilit mill-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra, se tappoġġa l-ħolqien tas-Sottokumitat għar-Riforma tal-Amministrazzjoni Pubblika u tapprova l-istabbiliment tal-Kumitat Konsultattiv Konġunt bejn il-Kumitat Ewropew tar-Reġjuni u l-Ukrajna, u għandha tkun ibbażata fuq l-abbozz tal-att tal-Kunsill ta’ Assoċjazzjoni tal-UE mal-Ukrajna mehmuż ma’ din id-Deċiżjoni.

Artikolu 2

Din id-Deċiżjoni hija indirizzata lill-Kummissjoni.

Magħmul fi Brussell,

(1)    ĠU L 161, 29.5.2014, pp. 3–2137

IL-KUMMISSJONI EWROPEA

Brussell, 15.12.2025

COM(2025) 755 final

ANNESS

ta'

Proposta' għal Deċiżjoni tal-Kunsill

dwar il-pożizzjoni li għandha tittieħed f’isem l-Unjoni Ewropea fil-Kunsill ta’ Assoċjazzjoni UE-Ukrajna fir-rigward tal-istabbiliment tas-Sottokumitat għar-Riforma tal-Amministrazzjoni Pubblika skont il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna min-naħa l-oħra, u dwar l-approvazzjoni tal-istabbiliment tal-Kumitat Konsultattiv Konġunt bejn il-Kumitat Ewropew tar-Reġjuni u l-Ukrajna

ATTI LEĠIŻLATTIVI U STRUMENTI OĦRA    

DEĊIŻJONI Nru X/2025

TAL-KUNSILL TA’ ASSOĊJAZZJONI UE-UKRAJNA

ta’ … [data]

fir-rigward tal-istabbiliment tas-Sottokumitat għar-Riforma tal-Amministrazzjoni Pubblika skont il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna min-naħa l-oħra, u l-approvazzjoni tal-istabbiliment tal-Kumitat Konsultattiv Konġunt bejn il-Kumitat Ewropew tar-Reġjuni u l-Ukrajna

IL-KUNSILL TA’ ASSOĊJAZZJONI UE-UKRAJNA,

Wara li kkunsidra l-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra (“il-Ftehim”), u b’mod partikolari l-Artikolu 463 flimkien mal-Artikolu 466 tiegħu,

Filwaqt LI JIRRIKONOXXI li r-Riforma tal-Amministrazzjoni Pubblika (PAR, Public Administration Reform) hija pilastru fundamentali tal-proċess tat-tkabbir, u t-tisħiħ tal-kapaċitajiet tal-istituzzjonijiet pubbliċi se jkun kruċjali għall-Ukrajna biex tavvanza fit-triq tagħha lejn l-integrazzjoni fl-UE, u li d-djalogu u l-kooperazzjoni bejn l-awtoritajiet lokali fl-Unjoni Ewropea u dawk fl-Ukrajna jistgħu jipprovdu kontribut integrali għall-iżvilupp tar-relazzjonijiet tagħhom u għall-integrazzjoni tal-Ukrajna fl-Unjoni,

Filwaqt LI JIRRIKONOXXI li l-istabbiliment ta’ Sottokumitat PAR annwali jirrappreżenta pass importanti ’l quddiem fit-tisħiħ tar-relazzjonijiet bejn l-UE u l-Ukrajna u t-tisħiħ tad-djalogu ta’ politika f’dan il-qasam kruċjali, u li l-approvazzjoni tal-istabbiliment tal-Kumitat Konsultattiv Konġunt (JCC, Joint Consultative Committee) bejn il-Kumitat Ewropew tar-Reġjuni (KtR) u l-Ukrajna u l-awtoritajiet lokali u reġjonali (LRAs, local and regional authorities) eletti tal-Ukrajna ssaħħaħ id-djalogu dirett bejniethom,

Filwaqt LI JINNOTA li s-Sottokumitat PAR se jservi ta’ pjattaforma għal djalogu ta’ politika strateġika u se jiffaċilita d-diskussjonijiet u l-koordinazzjoni dwar riformi ewlenin fil-qasam tal-amministrazzjoni pubblika u li se jkollu rwol ċentrali fil-monitoraġġ tal-implimentazzjoni tal-pjan direzzjonali PAR u jipprovdi gwida biex jiġi żgurat l-allinjament mal-istandards Ewropej u l-aħjar prattiki; u li l-JCC iservi ta’ pjattaforma biex jiġu kondiviżi l-aħjar prattiki tal-UE dwar il-governanza lokali u reġjonali u kwistjonijiet marbuta mal-implimentazzjoni tal-Ftehim ta’ Assoċjazzjoni fil-livell territorjali, u b’hekk jipprovdi forma konsistenti u stabbli ta’ kooperazzjoni mal-LRAs Ukreni u jippermettilhom li jkollhom rwol attiv billi jmexxu b’mod konġunt il-JCC u jfasslu l-aġenda tiegħu b’mod konġunt, u joħorġu rakkomandazzjonijiet.

Billi:

(1)Skont l-Artikolu 463 tal-Ftehim, il-Kunsill ta’ Assoċjazzjoni għandu s-setgħa li jieħu deċiżjonijiet għall-finijiet tal-ilħuq tal-objettivi tal-Ftehim.

(2)Skont l-Artikolu 466(2) tal-Ftehim, il-Kunsill ta’ Assoċjazzjoni jista’ jiddeċiedi li jistabbilixxi kwalunkwe kumitat jew korp speċjali f’oqsma speċifiċi meħtieġa għall-implimentazzjoni ta’ dan il-Ftehim, u għandu jiddeċiedi dwar il-kompożizzjoni, il-kompiti u l-funzjonament ta’ tali korpi.

(3)Sabiex jippermettu diskussjonijiet fil-livell ta’ esperti dwar l-oqsma ewlenin li jaqgħu fil-kamp ta’ applikazzjoni tal-applikazzjoni tal-Ftehim, jenħtieġ li jiġu stabbiliti s-Sottokumitat PAR u l-JCC.

IDDEĊIEDA KIF ĠEJ:

Artikolu 1

Sottokumitat għar-Riforma tal-Amministrazzjoni Pubblika

1.Is-Sottokumitat għar-Riforma tal-Amministrazzjoni Pubblika huwa b’dan stabbilit.

2.Ir-Regoli ta’ Proċedura tas-Sottokumitat għar-Riforma tal-Amministrazzjoni Pubblika għandhom jiġu rregolati u applikati mutatis mutandis f’konformità mal-Artikolu 16 tar-Regoli ta’ Proċedura tal-Kumitat ta’ Assoċjazzjoni stabbiliti fl-Anness II tad-Deċiżjoni Nru 1/2014 tal-15 ta’ Diċembru 2014 tal-Kunsill ta’ Assoċjazzjoni UE-Ukrajna.

3.Il-kamp ta’ applikazzjoni tas-Sottokumitat għar-Riforma tal-Amministrazzjoni Pubblika stabbilit jista’, bi qbil reċiproku tal-Partijiet, jiġi emendat jew modifikat b’xi mod ieħor.

Artikolu 2

Kumitat Konsultattiv Konġunt

1.L-istabbiliment tal-Kumitat Konsultattiv Konġunt bejn il-Kumitat Ewropew tar-Reġjuni u l-Ukrajna, magħmul minn għadd ugwali ta’ rappreżentanti tal-Kumitat Ewropew tar-Reġjuni, minn naħa waħda, u rappreżentanti eletti tal-awtoritajiet lokali u reġjonali tal-Ukrajna, min-naħa l-oħra, huwa b’dan approvat.

2.Il-Kumitat Konsultattiv Konġunt mal-Ukrajna għandu, fuq inizjattiva tiegħu stess, iwettaq l-attivitajiet tiegħu bl-għan li jippromovi d-djalogu u jrawwem il-kooperazzjoni bejn l-awtoritajiet lokali u reġjonali.

3.Il-Kumitat Konsultattiv Konġunt mal-Ukrajna għandu jadotta r-Regoli ta’ Proċedura tiegħu stess.

4.Il-Kumitat Konsultattiv Konġunt mal-Ukrajna jista’ jippreżenta rakkomandazzjonijiet lill-Kunsill ta’ Assoċjazzjoni.

5.In-nefqa relatata mal-laqgħat tal-Kumitat Konsultattiv Konġunt mal-Ukrajna, inklużi l-arranġamenti organizzattivi, il-parteċipazzjoni tad-delegati tagħhom u l-persunal ta’ appoġġ, kif ukoll l-ispejjeż tal-ivvjaġġar u tas-sussistenza, għandhom jitħallsu mill-Kumitat Ewropew tar-Reġjuni u mill-Gvern tal-Ukrajna.

Artikolu 3

Din id-Deċiżjoni għandha tidħol fis-seħħ fid-data tal-adozzjoni tagħha.

Magħmul fi …,

Għall-Kunsill ta’ Assoċjazzjoni Il-President