This document is an excerpt from the EUR-Lex website
Document 52025PC0447
Recommendation for a COUNCIL DECISION authorising the opening of negotiations on a framework agreement between the European Union and the United States of America on the exchange of information for security screenings and identity verifications relating to border procedures and applications for visa
Rakkomandazzjoni għal DEĊIŻJONI TAL-KUNSILL li tawtorizza l-ftuħ ta’ negozjati dwar ftehim qafas bejn l-Unjoni Ewropea u l-Istati Uniti tal-Amerka dwar l-iskambju ta’ informazzjoni għall-iskrinjar tas-sigurtà u l-verifiki tal-identità relatati mal-proċeduri fuq il-fruntiera u l-applikazzjonijiet għall-viża
Rakkomandazzjoni għal DEĊIŻJONI TAL-KUNSILL li tawtorizza l-ftuħ ta’ negozjati dwar ftehim qafas bejn l-Unjoni Ewropea u l-Istati Uniti tal-Amerka dwar l-iskambju ta’ informazzjoni għall-iskrinjar tas-sigurtà u l-verifiki tal-identità relatati mal-proċeduri fuq il-fruntiera u l-applikazzjonijiet għall-viża
COM/2025/447 final
IL-KUMMISSJONI EWROPEA
Brussell, 23.7.2025
COM(2025) 447 final
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati dwar ftehim qafas bejn l-Unjoni Ewropea u l-Istati Uniti tal-Amerka dwar l-iskambju ta’ informazzjoni għall-iskrinjar tas-sigurtà u l-verifiki tal-identità relatati mal-proċeduri fuq il-fruntiera u l-applikazzjonijiet għall-viża
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Fl-2022, l-Istati Uniti tal-Amerka (l-Istati Uniti) introduċew rekwiżit ġdid għall-pajjiżi kollha li ġew ammessi jew li qed jaspiraw li jissieħbu fil-Programm għall-Eżenzjoni mill-Viża (VWP, Visa Waiver Program) tal-Istati Uniti. Dan il-programm jippermetti liċ-ċittadini tal-pajjiżi parteċipanti jivvjaġġaw lejn l-Istati Uniti mingħajr viża għal massimu ta’ 90 jum għal skopijiet ta’ turiżmu jew negozju. Ir-rekwiżit il-ġdid jinvolvi li tiġi konkluża “Sħubija Msaħħa għas-Sigurtà tal-Fruntieri” (EBSP, Enhanced Border Security Partnership) mad-Dipartiment tas-Sigurtà Interna tal-Istati Uniti (DHS, Department of Homeland Security) bħala kundizzjoni għall-ammissjoni għall-VWP u l-parteċipazzjoni ulterjuri fih, bħala komponent tar-rekwiżit diġà eżistenti għall-iskambju ta’ informazzjoni għall-vjaġġaturi.
Is-sħubijiet tal-VWP jinsabu fuq quddiem nett fil-kooperazzjoni internazzjonali tal-Istati Uniti dwar is-sigurtà tal-fruntieri u tal-immigrazzjoni. Wieħed mill-objettivi tagħhom huwa li jistabbilixxu skambji bilaterali b’saħħithom ta’ informazzjoni biex l-awtoritajiet ikunu jistgħu jawtentikaw b’mod effettiv l-identità tal-vjaġġaturi minn pajjiżi sħab u jiddeterminaw jekk dawn jirrappreżentawx theddida għas-sigurtà tal-Istati Uniti.
Bħala parti mis-sħubijiet tagħhom tal-VWP, l-Istati Uniti kkonkludew ftehimiet bilaterali mal-Istati Membri tal-UE, bħall-Ftehimiet ta’ Tisħiħ ta’ Kooperazzjoni fil-Prevenzjoni u l-Ġlieda kontra r-Reati Serji (Ftehimiet PCSC, Preventing and Combating Serious Crime). Dawn il-ftehimiet stabbilew skambju ta’ informazzjoni, inkluża data bijometrika, dwar individwi li huma suspettati jew ikkundannati għal reati terroristiċi jew reati serji.
Skont l-EBSP, l-Istati Uniti għandhom l-intenzjoni li jistabbilixxu skambju ta’ informazzjoni dwar:
·vjaġġaturi lejn l-Istati Uniti li jista’ jkollhom konnessjoni ma’ pajjiż sieħeb tal-VWP;
·applikanti għall-benefiċċji tal-immigrazzjoni jew għall-protezzjoni umanitarja fl-Istati Uniti;
·individwi li jiltaqgħu magħhom l-uffiċjali tal-infurzar tal-liġi tad-DHS f’kuntest ta’ fruntieri u ta’ immigrazzjoni fl-Istati Uniti.
Tali skambji jkunu jikkonċernaw informazzjoni, inkluża data bijometrika, maħżuna f’bażijiet ta’ data nazzjonali tal-Istati Membri.
Il-ftehimiet tal-EBSP huma mistennija jiġu konklużi sal-31 ta’ Diċembru 2026. Wara din l-iskadenza, id-DHS se jivvaluta l-konformità ta’ kull pajjiż mar-rekwiżit tal-EBSP waqt evalwazzjonijiet għall-parteċipazzjoni inizjali u kontinwa fil-VWP.
B’kont meħud tar-rabta mal-kompetenza esklużiva tal-Unjoni dwar il-politika komuni dwar il-viżi, fit-12 ta’ Ġunju 2024, ir-Rappreżentanti Permanenti tal-Istati Membri fil-Kumitat tal-Kunsill tal-Unjoni Ewropea (Coreper) ikkonfermaw l-appoġġ wiesa’ tal-Istati Membri għal qafas komuni bejn l-UE u l-Istati Uniti għall-iskambju ta’ informazzjoni fil-kuntest tal-EBSP. Huma appellaw ukoll lill-Kummissjoni biex tressaq proposta għal mandat biex tali qafas jiġi nnegozjat f’isem l-Unjoni.
L-objettiv tar-rakkomandazzjoni proposta huwa li tipprovdi d-direttivi ta’ negozjar lill-Kummissjoni biex tinnegozja ftehim qafas li se jistabbilixxi l-istruttura legali u l-kundizzjonijiet għall-iskambju ta’ informazzjoni bejn l-awtoritajiet kompetenti tal-Istati Membri tal-UE u tal-Istati Uniti, li abbażi tiegħu l-Istati Membri jingħataw is-setgħa li jistabbilixxu ftehimiet bilaterali għal skambju ta’ informazzjoni mal-Istati Uniti mis-sistemi nazzjonali tagħhom tat-teknoloġija tal-informazzjoni (IT).
Wieħed mill-objettivi ewlenin tal-ftehim qafas huwa li tiġi żgurata r-reċiproċità fl-iskambju ta’ informazzjoni mal-Istati Uniti, u dan jgħin ukoll biex jissaħħu l-protezzjoni tal-fruntieri u s-sigurtà tal-Unjoni kollha kemm hi.
L-ambitu tal-iskambju ta’ informazzjoni (il-kategoriji u t-tip ta’ data, it-tip ta’ persuni, u t-tip ta’ reati) se jiġi stabbilit matul in-negozjati biex jiġi żgurat skambju bbilanċjat u reċiproku ta’ informazzjoni. Bħala minimu, in-negozjati għandhom jimmiraw li jistabbilixxu livell adegwat ta’ skambju ta’ informazzjoni, li ma għandux jaqbeż il-livell ta’ informazzjoni li l-Istati Membri jikkondividu bejniethom.
Abbażi tal-qafas għall-iskambju ta’ informazzjoni stabbilit fil-ftehim qafas, l-Istati Membri jkunu jistgħu jinnegozjaw u jikkonkludu arranġamenti bilaterali li joperazzjonalizzaw l-iskambju ta’ informazzjoni mal-Istati Uniti.
Tali arranġamenti bilaterali jipprovdu dettalji dwar l-iskambju ta’ informazzjoni mal-awtoritajiet kompetenti tal-Istati Uniti meta jitqiesu r-rekwiżiti legali nazzjonali, l-infrastruttura ta’ bażijiet ta’ data nazzjonali, u rekwiżiti jew limitazzjonijiet tekniċi oħra.
Il-ftehim qafas jistabbilixxi salvagwardji biex tiġi żgurata l-konsistenza mal-kapaċitajiet tal-Istati Membri, filwaqt li jibni fuq l-istruttura eżistenti ta’ bażijiet ta’ data nazzjonali.
Il-ftehim qafas ikun japplika għal dawk l-Istati Membri li jgawdu minn status li ma jkollhomx bżonn viża mal-Istati Uniti jew li jixtiequ jissieħbu fil-VWP. L-Istati Membri jitħallew iwaqqfu l-iskambju ta’ informazzjoni kif previst fil-ftehim qafas f’każ li l-istatus tagħhom fil-VWP jinbidel.
Dwar il-kompetenza tal-Unjoni li tikkonkludi ftehim internazzjonali
Il-politika komuni dwar il-viżi tal-Unjoni
L-Unjoni żviluppat politika komuni dwar il-viżi għal soġġorni qosra (sa 90 jum fi kwalunkwe perjodu ta’ 180 jum) ibbażata fuq ir-Regolament 2018/1806 (minn hawn ’il quddiem ir-“Regolament dwar il-Viża”) 1 . Ir-Regolament dwar il-Viża jelenka l-pajjiżi terzi li ċ-ċittadini tagħhom għandu jkollhom viża fil-pussess tagħhom meta jaqsmu l-fruntieri esterni u dawk li ċ-ċittadini tagħhom huma eżenti minn dik il-ħtieġa Bħalissa, iċ-ċittadini tal-Istati Uniti jgawdu minn status li ma jkollhomx bżonn viża fiż-żona Schengen. B’mod parallel, l-Unjoni kkonkludiet ftehimiet dwar l-eżenzjoni mill-viża u dwar il-faċilitazzjoni tal-viża ma’ diversi pajjiżi terzi 2 .
Il-prinċipju tar-reċiproċità huwa wieħed mill-pedamenti tal-politika tal-Unjoni dwar il-viżi ma’ pajjiżi terzi. Ir-reċiproċità tfisser li meta l-Unjoni tkun tat liċ-ċittadini ta’ pajjiż terz aċċess mingħajr il-bżonn ta’ viża biex iżuru ż-żona Schengen, hija tistenna li l-pajjiż terz jirreċiproka billi jippermetti liċ-ċittadini tal-Unjoni jivvjaġġaw lejn dak il-pajjiż terz mingħajr il-ħtieġa ta’ viża wkoll. L-Unjoni għandha l-għan li tikseb reċiproċità sħiħa ma’ pajjiżi terzi li ċ-ċittadini tagħhom huma eżentati mir-rekwiżit tal-viża biex jidħlu fiż-żona Schengen. Fil-fatt inkisbet reċiproċità sħiħa mal-pajjiżi terzi kollha li ma għandhomx bżonn viża, ħlief mal-Istati Uniti. Bl-eċċezzjoni tal-Bulgarija, Ċipru u r-Rumanija, l-Istati Membri kollha jipparteċipaw fil-Programm għall-Eżenzjoni mill-Viża tal-Istati Uniti. Il-kisba ta’ reċiproċità sħiħa mal-Istati Uniti tibqa’ objettiv politiku segwit b’mod attiv mill-Unjoni.
Il-ftehim qafas propost jiżgura approċċ konsistenti għall-Istati Membri kollha li jipparteċipaw fil-VWP fir-rigward tar-rekwiżit tal-EBSP, inklużi s-salvagwardji meħtieġa u xierqa għall-protezzjoni tad-data għal tali skambju ta’ informazzjoni.
Skont l-Artikolu 3(2) tat-Trattat dwar il-Funzjonament tal-Unjoni Ewropea (TFUE), l-Unjoni għandha l-kompetenza esklużiva li tikkonkludi ftehim internazzjonali, sa fejn il-konklużjoni tiegħu tista’ tolqot xi regoli komuni jew tbiddel il-kamp tal-applikazzjoni tagħhom.
Il-ħruġ ta’ viżi u l-mekkaniżmu għad-determinazzjoni tar-reċiproċità tal-viża jaqgħu taħt il-kompetenza esklużiva tal-Unjoni. Dan huwa l-każ ukoll għar-regoli tal-Unjoni dwar il-protezzjoni tad-data.
Konsegwentement, il-konklużjoni ta’ ftehim qafas mal-Istati Uniti dwar l-iskambju ta’ informazzjoni kif stabbilit fir-rekwiżiti tal-Programm għall-Eżenzjoni mill-Viża tal-Istati Uniti, jiġifieri sabiex l-Istati Membri jistabbilixxu skambju ta’ informazzjoni bħala parti mill-EBSP, taqa’ taħt il-kompetenza esklużiva tal-Unjoni.
Qafas tal-Unjoni għall-protezzjoni tad-data
L-iskambju ta’ informazzjoni previst fil-qafas tal-EBSP huwa differenti mill-iskambju skont il-ftehimiet PCSC stabbiliti. Meta l-objettiv ta’ skambju ta’ informazzjoni skont il-ftehim PCSC ikun il-ġlieda kontra t-terroriżmu u l-kriminalità serja, l-għan tal-iskambju ta’ informazzjoni taħt l-EBSP huwa potenzjalment usa’ peress li jikkonċerna wkoll l-oqsma tal-ġestjoni tal-fruntieri u l-politika dwar il-viżi.
L-ipproċessar tad-data personali mill-Istati Membri huwa rregolat mir-Regolament (UE) 2016/679 3 (il-“GDPR”), minbarra l-ipproċessar ta’ data minn awtoritajiet tal-infurzar tal-liġi kriminali għall-finijiet tal-prevenzjoni, l-investigazzjoni, is-sejbien jew il-prosekuzzjoni ta’ reati kriminali jew l-eżekuzzjoni ta’ pieni kriminali li huwa kopert mid-Direttiva (UE) 2016/680 4 . Il-Kapitolu V tal-GDPR u d-Direttiva (UE) 2016/680 jinkludu kundizzjonijiet stretti għat-trasferiment ta’ data personali lil pajjiżi terzi. Tali trasferiment irid ikun ibbażat fuq strument ta’ trasferiment, bħal deċiżjoni ta’ adegwatezza mal-imsemmi pajjiż terz, strument li jiżgura salvagwardji xierqa (pereż. ftehim internazzjonali), jew, skont id-Direttiva (UE) 2016/680, valutazzjoni mill-awtorità kompetenti tal-infurzar tal-liġi li tali salvagwardji huma żgurati fil-pajjiż terz, jew, fin-nuqqas ta’ dan ta’ hawn fuq, waħda mir-raġunijiet statutorji għat-trasferimenti tad-data (jew derogi) li jgħoddu għal każijiet speċifiċi, iżda mhux għall-kondiviżjoni sistematika ta’ data personali.
Fil-każ ta’ trasferimenti ta’ data bejn l-awtoritajiet tal-infurzar tal-liġi kriminali għall-prevenzjoni, l-investigazzjoni, is-sejbien jew il-prosekuzzjoni ta’ reati kriminali, inkluż it-terroriżmu, il-Ftehim Komprensiv UE-Stati Uniti jipprevedi ftehim internazzjonali li jiżgura salvagwardji xierqa skont it-tifsira tal-Artikolu 37(1)(a) tad-Direttiva (UE) 2016/680 5 .
Minħabba l-ambitu u l-iskop usa’ tal-iskambju ta’ informazzjoni previst mill-EBSP, u sa fejn l-awtoritajiet għajr l-infurzar tal-liġi kriminali jkunu involuti fit-trasferiment, il-Ftehim Komprensiv UE-Stati Uniti mhuwiex kompletament applikabbli għat-tipi kollha ta’ trasferimenti previsti mill-Istati Uniti fil-qafas tal-EBSP, u dan isaħħaħ il-ħtieġa għal azzjoni tal-Unjoni biex tikkonkludi ftehim internazzjonali addizzjonali.
Il-ftehim qafas jiddefinixxi l-kategoriji ta’ data personali li jistgħu jiġu kondiviżi u l-iskopijiet speċifiċi li għalihom jistgħu jiġu kondiviżi, filwaqt li jqis b’mod partikolari l-livell ta’ reċiproċità.
Il-ftehim qafas għandu jkun fih dispożizzjonijiet dwar trasferimenti ulterjuri ta’ data personali.
Dwar ir-relazzjoni mal-arranġamenti bilaterali eżistenti jew futuri tal-Istati Membri
Filwaqt li l-konklużjoni ta’ dan il-ftehim qafas mal-Istati Uniti taqa’ taħt il-kompetenza esklużiva tal-Unjoni, il-ftehim qafas se jinkludi klawżola li tawtorizza lill-Istati Membri jikkonkludu ftehimiet jew arranġamenti bilaterali supplimentari.
Fir-rigward ta’ ftehimiet bilaterali jew arranġamenti diġà konklużi mill-Istati Membri mal-Istati Uniti qabel id-dħul fis-seħħ ta’ dan il-ftehim qafas, il-ftehim qafas jista’ jinkludi l-kundizzjonijiet li skonthom tali ftehimiet jew arranġamenti jibqgħu applikabbli, b’mod partikolari fir-rigward tal-ftehimiet jew l-arranġamenti bilaterali konklużi mill-Istati Membri li għadhom mhumiex parti mill-VWP.
Permezz ta’ din il-proposta għal rakkomandazzjoni tal-Kunsill, il-Kummissjoni tirrakkomanda li l-Kunsill:
(a)jadotta deċiżjoni li tawtorizza lill-Kummissjoni li tiftaħ negozjati għal ftehim qafas bejn l-Unjoni u l-Istati Uniti tal-Amerka,
(b)jinnomina lill-Kummissjoni bħala n-negozjatur tal-Unjoni tal-ftehim qafas,
(c)jistabbilixxi direttivi lin-Negozjatur, u
(d)jaħtar kumitat speċjali li f’konsultazzjoni miegħu jridu jsiru n-negozjati;
2.BAŻI LEGALI, NEĊESSITÀ U PROPORZJONALITÀ
Il-bażijiet legali għal din ir-rakkomandazzjoni huma l-Artikolu 16(2), l-Artikolu 77(2) u l-Artikolu 218(3) u (4) tat-Trattat dwar il-Funzjonament tal-Unjoni Ewropea (TFUE).
L-Unjoni hija kompetenti biex tikkonkludi dan il-ftehim qafas mal-Istati Uniti dwar l-iskambju ta’ informazzjoni fir-rigward tal-qsim tal-fruntieri esterni bejn l-UE u l-Istati Uniti, inkluż dwar il-proċeduri fuq il-fruntiera u l-applikazzjonijiet għall-viża.
Il-ftehim qafas għandu jistabbilixxi livell adegwat ta’ skambju ta’ informazzjoni bejn l-UE u l-Istati Uniti, li ma għandux jaqbeż il-livell ta’ kondiviżjoni tal-informazzjoni fost l-Istati Membri f’kuntest bilaterali jew tal-UE, soġġett ukoll għall-prinċipji tal-proporzjonalità u tan-neċessità.
Il-ftehim qafas għandu jispeċifika l-kundizzjonijiet li jiskattaw tfittxija fuq vjaġġatur. Dawn il-kundizzjonijiet għandhom jevitaw li jsiru tfittxijiet dwar il-persuni f’kull każ, mingħajr ebda suspett preċedenti. Tfittxija ta’ rutina u sistemika dwar il-persuni kollha li jivvjaġġaw bejn l-UE u l-Istati Uniti għandha tiġi eskluża.
Il-ftehim qafas mal-Istati Uniti huwa meħtieġ biex jiżgura l-objettiv komuni tal-politika dwar il-viżi għar-reċiproċità tal-viża u l-applikazzjoni tal-qafas tal-protezzjoni tad-data tal-UE. Għalhekk, id-direttivi ta’ negozjati annessi ma’ din ir-rakkomandazzjoni biex jinfetħu negozjati mal-Istati Uniti dwar ftehim qafas huma bbażati fuq ir-rekwiżiti tal-qafas legali tal-UE applikabbli tal-UE dwar il-protezzjoni tad-data (jiġifieri r-Regolament (UE) 2016/679 u d-Direttiva (UE) 2016/680).
Il-ftehim qafas previst ma jmurx lil hinn minn dak li huwa meħtieġ biex jintlaħqu l-objettivi inkwistjoni, peress li dawn ma jistgħux jinkisbu mill-Istati Membri waħedhom.
•Għażla tal-istrument
L-Artikolu 218(3) TFUE jipprevedi li l-Kummissjoni jew ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà għandhom jippreżentaw rakkomandazzjonijiet lill-Kunsill, li għandu jadotta deċiżjoni li tawtorizza l-ftuħ ta’ negozjati. Minħabba s-suġġett tal-ftehim previst, huwa f’idejn il-Kummissjoni li tippreżenta rakkomandazzjonijiet għal dan il-għan.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
[Peress li dan se jkun ftehim ġdid, ma setgħu jitwettqu l-ebda evalwazzjoni jew kontroll tal-idoneità tal-istrumenti eżistenti. Ma hija meħtieġa l-ebda valutazzjoni tal-impatt għan-negozjar ta’ dan il-ftehim qafas.]
4.PJANIJIET TA’ IMPLIMENTAZZJONI U ARRANĠAMENTI GĦALL-MONITORAĠĠ, L-EVALWAZZJONI U R-RAPPORTAR
Il-Kummissjoni se tiżgura li l-implimentazzjoni tal-ftehim qafas tiġi mmonitorjata kif xieraq.
5.ELEMENTI OĦRA
•L-għażla tan-negozjatur
Peress li l-ftehim previst ikopri esklużivament kwistjonijiet oħra għajr il-Politika Estera u ta’ Sigurtà Komuni, il-Kummissjoni trid tinħatar bħala n-negozjatur skont l-Artikolu 218(3) tat-TFUE.
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati dwar ftehim qafas bejn l-Unjoni Ewropea u l-Istati Uniti tal-Amerka dwar l-iskambju ta’ informazzjoni għall-iskrinjar tas-sigurtà u l-verifiki tal-identità relatati mal-proċeduri fuq il-fruntiera u l-applikazzjonijiet għall-viża
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 16(2), l-Artikolu 77(2) u l-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
Billi:
(1)L-Istati Uniti tal-Amerka introduċew rekwiżit ġdid għall-ammissjoni u l-parteċipazzjoni ulterjuri fil-Programm għall-Eżenzjoni mill-Viża tal-Istati Uniti, li jippermetti liċ-ċittadini tal-pajjiżi parteċipanti jivvjaġġaw lejn l-Istati Uniti mingħajr viża għal massimu ta’ 90 jum għall-fini ta’ turiżmu jew negozju. Ir-rekwiżit il-ġdid jinvolvi l-konklużjoni ta’ “Sħubija Msaħħa għas-Sigurtà tal-Fruntieri” (EBSP, Enhanced Border Security Partnership) mad-Dipartiment tas-Sigurtà Interna tal-Istati Uniti. Hemm bżonn ta’ qafas komuni għall-iskambju ta’ informazzjoni fil-kuntest tal-EBSP. Għalhekk, jenħtieġ li jinfetħu negozjati bil-ħsieb li jiġi konkluż ftehim qafas bejn l-Unjoni u l-Istati Uniti tal-Amerka dwar l-iskambju ta’ informazzjoni għall-iskrinjar u l-verifika tal-identità ta’ ċerti vjaġġaturi li jaqsmu l-fruntieri esterni tal-Istati Membri.
(2)Jenħtieġ li l-ftehim qafas ikun jirrispetta d-drittijiet fundamentali u josserva l-prinċipji rikonoxxuti b’mod partikolari mill-Karta tad-Drittijiet Fundamentali tal-Unjoni Ewropea, b’mod partikolari d-dritt għal-libertà u s-sigurtà rikonoxxut mill-Artikolu 6 tal-Karta, id-dritt għall-ħajja privata u familjari, rikonoxxut fl-Artikolu 7 tal-Karta, id-dritt għall-protezzjoni tad-data personali rikonoxxut fl-Artikolu 8 tal-Karta u d-dritt għal rimedju effettiv u għal proċess ġust rikonoxxut fl-Artikolu 47 tal-Karta. Il-ftehim qafas jenħtieġ li jiġi applikat f’konformità ma’ dawk id-drittijiet u l-prinċipji u filwaqt li jqis b’mod xieraq il-prinċipju tal-proporzjonalità f’konformità mal-Artikolu 52(1) tal-Karta.
(3)Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill u ta opinjoni fi [XX].
(4)Il-ftehim qafas jenħtieġ li jippermetti l-konklużjoni ta’ arranġamenti bilaterali bejn l-Istati Uniti tal-Amerka u l-Istati Membri dwar il-kwistjonijiet koperti minnu, dment li d-dispożizzjonijiet ta’ tali arranġamenti bilaterali jkunu kompatibbli ma’ dawk tal-ftehim qafas u mal-liġi tal-Unjoni.
(5)Jenħtieġ li l-Kummissjoni tinħatar bħala negozjatur tal-Unjoni.
(6)F’konformità mal-Artikoli 1 u 2 tal-Protokoll Nru 22 dwar il-Pożizzjoni tad-Danimarka anness mat-Trattat dwar l-Unjoni Ewropea u mat-TFUE, id-Danimarka mhijiex qiegħda tieħu sehem fl-adozzjoni ta’ din ir-Rakkomandazzjoni u mhijiex marbuta biha jew soġġetta għall-applikazzjoni tagħha.
(7)Din ir-Rakkomandazzjoni tikkostitwixxi żvilupp tad-dispożizzjonijiet tal-acquis ta’ Schengen li fihom l-Irlanda mhijiex qiegħda tieħu sehem, f’konformità mad-Deċiżjoni tal-Kunsill 2002/192/KE (8); għaldaqstant l-Irlanda mhijiex qiegħda tieħu sehem fl-adozzjoni tagħha u mhijiex marbuta biha jew soġġetta għall-applikazzjoni tagħha.
ADOTTA DIN ID-DEĊIŻJONI:
Artikolu 1
Il-Kummissjoni hija b’dan awtorizzata tinnegozja, f’isem l-Unjoni, ftehim qafas bejn l-Unjoni u l-Istati Uniti tal-Amerka dwar l-iskambju ta’ informazzjoni għall-iskrinjar tas-sigurtà u l-verifiki tal-identità relatati mal-proċeduri fuq il-fruntiera u l-applikazzjonijiet għall-viża.
Artikolu 2
Id-direttivi ta’ negozjati huma stabbiliti fl-Anness.
Artikolu 3
In-negozjati għandhom jitwettqu b’konsultazzjoni ma’ [l-isem tal-kumitat speċjali li għandu jiddaħħal mill-Kunsill].
Artikolu 4
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 23.7.2025
COM(2025) 447 final
ANNESS
tar-
Rakkomandazzjoni għal Deċiżjoni tal-Kunsill
li tawtorizza l-ftuħ ta' negozjati dwar ftehim qafas bejn l-Unjoni Ewropea u l-Istati Uniti tal-Amerka dwar l-iskambju ta' informazzjoni għall-iskrinjar tas-sigurtà u l-verifiki tal-identità relatati mal-proċeduri fuq il-fruntiera u l-applikazzjonijiet għall-viża
ANNESS
DIRETTIVI TA’ NEGOZJATI TA’ FTEHIM QAFAS BEJN
l-Unjoni Ewropea u l-Istati Uniti tal-Amerka dwar l-iskambju ta’ informazzjoni għall-iskrinjar tas-sigurtà u l-verifiki tal-identità relatati mal-proċeduri fuq il-fruntiera u l-applikazzjonijiet għall-viża
Matul in-negozjati, il-Kummissjoni għandha timmira li tikseb l-għanijiet stabbiliti fid-dettall hawn taħt.
I. L-ISKOP U L-KAMP TA’ APPLIKAZZJONI TAL-FTEHIM QAFAS PREVIST
1.L-għan tal-ftehim qafas huwa li jipprevedi struttura legali għall-iskambju bilaterali ta’ informazzjoni tal-Istati Membri bejn l-awtoritajiet kompetenti tagħhom u l-awtoritajiet kompetenti tal-Istati Uniti tal-Amerka (U.S.) fil-kuntest tas-Sħubija Msaħħa għas-Sigurtà tal-Fruntieri (EBSP) tal-Istati Uniti.
2.Il-ftehim qafas għandu jipprovdi regoli ċari u preċiżi dwar l-iskambju ta’ informazzjoni bejn l-Istati Membri u l-Istati Uniti dwar vjaġġaturi li jaqsmu l-fruntieri esterni rispettivi tagħhom biex jiġu ffaċilitati l-iskrinjar u l-verifika tal-identità tal-vjaġġaturi li huma meħtieġa biex jiġi ddeterminat jekk id-dħul jew is-soġġorn tagħhom joħloqx xi riskju għas-sigurtà pubblika jew l-ordni pubbliku, u biex l-awtoritajiet kompetenti jiġu appoġġati fil-prevenzjoni, is-sejbien, l-investigazzjoni u l-prosekuzzjoni ta’ reati u reati terroristiċi.
3.L-objettiv tal-ftehim qafas huwa li jipprovdi l-bażi legali u l-kundizzjonijiet għat-trasferiment u l-iskambju ta’ data personali bejn l-awtoritajiet kompetenti tal-Istati Membri u tal-Istati Uniti rispettivament. B’mod partikolari, il-ftehim qafas għandu jipprovdi regoli u proċeduri ċari u preċiżi biex tiġi skattata tfittxija fuq vjaġġatur, biex jiġi prekluż ipproċessar sistematiku, ġeneralizzat u mhux immirat tad-data għall-vjaġġaturi kollha.
4.Il-ftehim qafas għandu jkun fih definizzjonijiet ta’ termini ewlenin, b’mod partikolari definizzjoni ta’ data personali.
5.L-iskambju ta’ informazzjoni skont dan il-ftehim qafas għandu jkun iggwidat mill-prinċipju ta’ reċiproċità.
6.L-iskambju tal-informazzjoni fl-ambitu tal-ftehim qafas għandu jkun ibbażat fuq l-iskambju tal-informazzjoni dwar l-identità inkluża fid-dokument tal-ivvjaġġar, u l-marki tas-swaba’ ta’ vjaġġatur. Meta jkun rilevanti u b’salvagwardji xierqa, il-Partijiet għandhom ikunu jistgħu wkoll jiskambjaw informazzjoni supplimentari rilevanti għall-individwu partikolari.
7.L-iskambju ta’ informazzjoni skont il-ftehim qafas għandu jinkludi ċittadini ta’ pajjiżi terzi fir-rigward tal-qsim tal-fruntieri esterni tal-Istati Membri u tal-Istati Uniti, u fil-kuntest tal-prevenzjoni, is-sejbien, l-investigazzjoni u l-prosekuzzjoni ta’ reati u reati terroristiċi.
8.L-iskambju ta’ informazzjoni jista’ jinkludi skambji dwar ċittadini u l-membri tal-familja, kif ukoll residenti permanenti, f’każijiet fejn tali skambju ta’ informazzjoni jkun strettament meħtieġ u proporzjonat għall-prevenzjoni, is-sejbien, l-investigazzjoni u l-prosekuzzjoni ta’ reati u reati terroristiċi u sa fejn tali skambju ta’ informazzjoni jkun reċiproku.
II. KONTENUT TAL-FTEHIM QAFAS
KWISTJONIJIET SPEĊIFIĊI
9.Il-ftehim qafas għandu jistabbilixxi definizzjoni ta’ data personali li tkun konformi mad-definizzjonijiet fir-Regolamenti (UE) 2016/679 u 2018/1725 1 , u fid-Direttiva (UE) 2016/680 2 ;
10.Il-ftehim qafas għandu jidentifika t-tipi ta’ bażijiet tad-data u t-tip(i) ta’ data li taqa’ taħt il-kamp ta’ applikazzjoni tal-Ftehim qafas u li se tkun soġġetta għal aċċess fil-kuntest tal-EBSP.
11.Il-ftehim qafas għandu jispjega b’mod ċar u preċiż is-salvagwardji u l-garanziji meħtieġa fir-rigward tal-protezzjoni tad-data personali kif ukoll id-drittijiet fundamentali u l-libertajiet tal-individwi, irrispettivament min-nazzjonalità u l-post ta’ residenza tagħhom, fl-iskambju ta’ data personali mal-Istati Uniti fil-kuntest tal-EBSP. B’mod partikolari, għandu japplika dan li ġej:
(a)L-iskopijiet tal-ipproċessar tad-data personali fil-kuntest tal-ftehim qafas għandu jiġi deskritt b’mod ċar u preċiż mill-Partijiet. Kwalunkwe proċessar ta’ data personali għandu jkun limitat għal dak li huwa meħtieġ u proporzjonat f’każijiet individwali biex jiġu identifikati r-riskji għas-sigurtà pubblika jew għall-ordni pubbliku, u għandu jikkontribwixxi għall-prevenzjoni, is-sejbien, l-investigazzjoni u l-prosekuzzjoni ta’ reati kriminali u terroristiċi.
(b)Id-data personali trasferita lill-Istati Uniti mill-Istati Membri għandha tiġi pproċessata b’mod ġust, fuq bażi leġittima u biss għall-finijiet li għalihom tkun ġiet trasferita. Kwalunkwe pproċessar ulterjuri ta’ data inkompatibbli mal-iskop inizjali għandu jkun ipprojbit (limitazzjoni tal-iskop). Il-ftehim qafas għandu jkun akkumpanjat minn anness li jkun fih lista eżawrjenti tal-awtoritajiet kompetenti tal-Istati Uniti li lilhom l-Istati Membri jistgħu jittrasferixxu data personali kif ukoll deskrizzjoni qasira tal-kompetenzi tagħhom.
(c)Id-data personali trasferita għandha tkun adegwata, rilevanti u limitata għal dak li huwa meħtieġ għall-iskop li għalih tkun ġiet trasferita. Għandha tkun preċiża u aġġornata. Ma għandhiex tinżamm għal aktar żmien milli jkun meħtieġ għall-iskop li għalih tkun ġiet trasferita iżda, fi kwalunkwe każ, il-ftehim qafas għandu jistabbilixxi regoli dwar il-ħżin, inkluż il-limitazzjoni tal-ħżin, ir-rieżami, il-korrezzjoni u t-tħassir ta’ data personali. B’mod partikolari, il-ftehim qafas għandu jillimita ż-żamma tad-data personali tal-vjaġġaturi, wara t-tluq tagħhom mill-ġuriżdizzjoni, għal dik tal-vjaġġaturi li fir-rigward tagħhom hemm evidenza oġġettiva li minnha jista’ jiġi dedott li hemm riskju kontinwu għas-sigurtà pubblika jew l-ordni pubbliku, u l-ħtieġa li tinżamm data li tikkontribwixxi għall-prevenzjoni, is-sejbien, l-investigazzjoni u l-prosekuzzjoni ta’ reati u reati terroristiċi.
(d)Il-ftehim qafas għandu jispeċifika l-kriterji li abbażi tagħhom għandhom jiġu indikati l-affidabbiltà tas-sors u l-preċiżjoni tad-data.
(e)It-trasferiment ta’ data personali li tiżvela l-oriġini razzjali jew etnika, l-opinjonijiet politiċi, it-twemmin reliġjuż jew filosofiku, is-sħubija fi trade union, data ġenetika, data bijometrika għall-fini ta’ identifikazzjoni unika ta’ persuna fiżika, u data dwar is-saħħa u l-ħajja sesswali jew l-orjentazzjoni sesswali ta’ persuna, għandu jkun permess biss fejn strettament meħtieġ u b’mod proporzjonat fil-każijiet individwali għall-prevenzjoni jew il-ġlieda kontra reati kriminali u terroristiċi kif imsemmi fil-ftehim qafas, u soġġett għal salvagwardji xierqa li jindirizzaw ir-riskji speċifiċi tal-ipproċessar tad-data. Il-ftehim qafas għandu jkun fih salvagwardji speċifiċi li jirregolaw it-trasferiment ta’ data personali dwar minuri u dwar vittmi ta’ reati kriminali, xhieda jew persuni oħra li jistgħu jipprovdu informazzjoni dwar reati kriminali.
(f)Il-ftehim qafas għandu jistabbilixxi regoli dwar l-informazzjoni li għandha titqiegħed għad-dispożizzjoni tal-individwi u għandu jiżgura d-drittijiet infurzabbli tal-individwi li d-data personali tagħhom tiġi proċessata, fil-forma ta’ regoli dwar id-dritt għall-informazzjoni, l-aċċess, ir-rettifika u t-tħassir, inklużi r-raġunijiet speċifiċi li jistgħu jippermettu kwalunkwe restrizzjoni meħtieġa u proporzjonata għal dawk id-drittijiet. Il-ftehim qafas għandu wkoll jiżgura drittijiet infurzabbli ta’ rimedju amministrattiv u ġudizzjarju għal kwalunkwe persuna li d-data tagħha tiġi pproċessata skont il-ftehim qafas, u għandu jiggarantixxi rimedji effettivi.
(g)Il-ftehim qafas għandu jistabbilixxi regoli dwar iż-żamma ta’ rekords għall-finijiet ta’ reġistrazzjoni u dokumentazzjoni, kif ukoll dwar l-informazzjoni li tkun disponibbli għall-individwi.
(h)Il-ftehim qafas għandu jipprevedi salvagwardji fir-rigward tal-ipproċessar awtomatizzat ta’ data personali, inkluż dwar it-tfassil ta’ profili u għandu jipprojbixxi deċiżjonijiet ibbażati unikament fuq l-ipproċessar awtomatizzat ta’ data personali mingħajr involviment uman.
(i)Il-ftehim qafas għandu jinkludi l-obbligu li jiżgura s-sigurtà tad-data personali permezz ta’ miżuri tekniċi u organizzattivi xierqa, inkluż billi jippermetti li persuni awtorizzati biss ikollhom aċċess għad-data personali. Għandu jinkludi wkoll l-obbligu li l-awtoritajiet kompetenti u, fejn meħtieġ u possibbli, is-suġġetti tad-data jiġu nnotifikati fil-każ ta’ ksur tad-data personali li jaffettwa data trasferita skont il-ftehim qafas. Il-ftehim qafas għandu jinkludi wkoll l-obbligu li jiġu implimentati miżuri għall-protezzjoni tad-data diġà mit-tfassil tiegħu u b’mod predefinit, sabiex il-prinċipji tal-protezzjoni tad-data jiġu implimentati b’mod effettiv.
(j)Trasferimenti ulterjuri ta’ data personali mill-awtoritajiet kompetenti tal-Istati Uniti, lejn awtoritajiet oħra fl-Istati Uniti, għandhom ikunu permessi biss għall-finijiet tal-ftehim qafas, għandhom ikunu soġġetti għal kundizzjonijiet xierqa, inkluż l-awtorizzazzjoni espliċita tal-fornitur tal-informazzjoni, u għandhom jiġu permessi biss fir-rigward tal-awtoritajiet li jiżguraw livell essenzjalment ekwivalenti ta’ protezzjoni tad-data personali kif żgurat skont il-ftehim qafas, sakemm it-trasferiment ulterjuri ma jkunx meħtieġ għall-prevenzjoni u l-investigazzjoni ta’ theddida serja u imminenti għas-sigurtà pubblika jew għall-protezzjoni tal-interessi vitali ta’ kwalunkwe persuna fiżika. It-trasferimenti ulterjuri ta’ data personali lejn pajjiżi terzi jew organizzazzjonijiet internazzjonali għandhom ikunu pprojbiti.
(k)Il-ftehim qafas għandu jiżgura sistema ta’ sorveljanza tal-użu ta’ data personali minn korp indipendenti wieħed jew aktar responsabbli għall-protezzjoni tad-data fl-Istati Uniti b’setgħat ta’ investigazzjoni u ta’ intervent effettivi. B’mod partikolari, il-korp jew korpi għandu jkollhom is-setgħat li jisimgħu lmenti minn individwi dwar l-użu tad-data personali tagħhom. Il-ftehim qafas għandu jipprevedi d-dmir ta’ kooperazzjoni bejn tali korpi ta’ sorveljanza, minn naħa, u l-awtoritajiet superviżorji rilevanti tal-Unjoni, min-naħa l-oħra.
Qafas għall-iskambju ta’ informazzjoni
12.Il-ftehim qafas għandu jiddeskrivi l-kundizzjonijiet ġenerali, il-kriterji, il-bażijiet tad-data u l-kategoriji tad-data fl-ambitu tal-iskambju ta’ informazzjoni bejn l-awtoritajiet kompetenti tal-Istati Membri u l-Istati Uniti, bħala parti minn arranġamenti bilaterali. Tali skambju ta’ informazzjoni għandu jikkonsisti f’konferma ta’ informazzjoni dwar l-identità jew il-marki tas-swaba’, u informazzjoni addizzjonali assoċjata mal-individwu suġġett għat-tfittxija u għandu jkun limitat għal dawk li huwa strettament meħtieġ u proporzjonat biex jinkiseb ir-riżultat meħtieġ.
13.Skont il-ftehim qafas, il-Partijiet għandhom jiżguraw li l-limitazzjonijiet tekniċi tal-Partijiet fir-rigward tal-iskambju ta’ informazzjoni jkunu rispettati.
14.Il-ftehim qafas għandu jiddeskrivi l-konsegwenzi tas-sospensjoni tas-sħubija mill-VWP, jew il-limitazzjoni tal-validità tal-ESTA, fuq l-iskambju tal-informazzjoni skont il-ftehim qafas.
15.Il-ftehim qafas għandu jipprevedi mudell b’diversi saffi għar-rispons għat-tfittxijiet, li jiddistingwi bejn informazzjoni miksuba awtomatikament mat-twettiq ta’ tfittxija u informazzjoni addizzjonali li tista’ tiġi kondiviża mal-Parti rikjedenti biss bl-awtorizzazzjoni espliċita ta’ dik il-Parti.
16.Il-ftehim qafas għandu jinkludi klawżola li tawtorizza lill-Istati Membri jikkonkludu ftehimiet jew arranġamenti bilaterali biex jimplimentaw l-iskambju ta’ informazzjoni skont l-EBSP bħala rekwiżit skont il-Programm għall-Eżenzjoni mill-Viża (VWP). Il-ftehim qafas għandu jispeċifika l-elementi li għandhom ikunu inklużi fil-ftehimiet jew l-arranġamenti bilaterali li joperazzjonalizzaw l-iskambju ta’ informazzjoni u l-kundizzjonijiet proċedurali u sostanzjali li magħhom għandhom jikkonformaw il-ftehimiet jew l-arranġamenti bilaterali.
17.Il-ftehim qafas għandu jistabbilixxi ċ-ċirkostanzi li fihom l-Istati Membri jistgħu jżommu l-ftehimiet jew l-arranġamenti bilaterali konklużi mal-Istati Uniti qabel id-dħul fis-seħħ tal-ftehim qafas.
Dispożizzjonijiet istituzzjonali
18.Il-ftehim qafas għandu jistabbilixxi korp governattiv responsabbli għall-ġestjoni u s-superviżjoni tal-implimentazzjoni u l-operat tal-ftehim, li jiffaċilita r-riżoluzzjoni tat-tilwim.
19.Il-ftehim qafas għandu jipprevedi mekkaniżmu effettiv għas-soluzzjoni ta’ tilwim rigward l-interpretazzjoni u l-applikazzjoni tiegħu biex jiżgura li l-Partijiet josservaw ir-regoli miftiehma reċiprokament.
20.Il-ftehim qafas għandu jinkludi dispożizzjonijiet dwar il-monitoraġġ u l-evalwazzjoni perjodika tal-ftehim qafas.
21.Il-ftehim qafas għandu jinkludi dispożizzjoni dwar id-dħul fis-seħħ u l-validità tal-ftehim u dispożizzjoni li biha Parti tista’ ttemm jew tissospendih, b’mod partikolari meta l-Istati Uniti ma jibqgħux jiżguraw b’mod effettiv il-livell ta’ protezzjoni tad-drittijiet u l-libertajiet fundamentali meħtieġa skont il-ftehim qafas. Fil-każ ta’ terminazzjoni jew sospensjoni, il-ftehim qafas għandu jispeċifika wkoll jekk tistax tkompli tiġi pproċessata d-data personali li taqa’ fil-kamp ta’ applikazzjoni tiegħu u li tiġi trasferita qabel is-sospensjoni jew it-terminazzjoni tiegħu. L-ipproċessar kontinwu ta’ data personali, jekk dan ikun permess, għandu fi kwalunkwe każ ikun f’konformità mad-dispożizzjonijiet tal-ftehim qafas kif applikabbli fil-ħin ta’ sospensjoni jew terminazzjoni.
22.Il-ftehim qafas jista’ jinkludi klawżola li tindirizza l-applikazzjoni territorjali tiegħu, jekk ikun meħtieġ.
23.Il-ftehim qafas previst għandu jipprevedi mekkaniżmu li permezz tiegħu l-iżviluppi rilevanti futuri tad-dritt tal-Unjoni, fejn meħtieġ, jiġu riflessi permezz ta’ adattamenti għall-ftehim qafas. Il-ftehim qafas għandu jinkludi wkoll dispożizzjoni li permezz tagħha l-ftehim qafas jiġi tterminat mill-Unjoni f’każ li tali adattamenti ma jitwettqux.
24.Il-ftehim qafas jipprevedi mekkaniżmu biex jevalwa l-implimentazzjoni tiegħu.
25.Il-ftehim qafas għandu jkun awtentiku bl-istess mod bil-lingwi uffiċjali kollha tal-Unjoni u għandu jinkludi klawżola lingwistika għal dan il-għan.