This document is an excerpt from the EUR-Lex website
Document 52024PC0559
Proposal for a COUNCIL DECISION on the position to be taken on behalf of the European Union in the EU–Türkiye Customs Cooperation Committee established under the Association Agreement between the European Community and Turkey as regards the adoption of a decision on the use of A.TR movement certificates issued electronically
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kumitat dwar il-Kooperazzjoni Doganali bejn l-UE u t-Turkija stabbilit skont il-Ftehim ta’ Assoċjazzjoni bejn il-Komunità Ewropea u t-Turkija fir-rigward tal-adozzjoni ta’ deċiżjoni dwar l-użu taċ-ċertifikati tal-moviment A.TR maħruġa b’mod elettroniku
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kumitat dwar il-Kooperazzjoni Doganali bejn l-UE u t-Turkija stabbilit skont il-Ftehim ta’ Assoċjazzjoni bejn il-Komunità Ewropea u t-Turkija fir-rigward tal-adozzjoni ta’ deċiżjoni dwar l-użu taċ-ċertifikati tal-moviment A.TR maħruġa b’mod elettroniku
COM/2024/559 final
IL-KUMMISSJONI EWROPEA
Brussell, 29.11.2024
COM(2024) 559 final
2024/0310(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat dwar il-Kooperazzjoni Doganali bejn l-UE u t-Turkija stabbilit skont il-Ftehim ta’ Assoċjazzjoni bejn il-Komunità Ewropea u t-Turkija fir-rigward tal-adozzjoni ta’ deċiżjoni dwar l-użu taċ-ċertifikati tal-moviment A.TR maħruġa b’mod elettroniku
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-Kumitat dwar il-Kooperazzjoni Doganali. Il-Kumitat ġie stabbilit skont il-Ftehim ta’ Assoċjazzjoni bejn il-Komunità Ewropea u t-Turkija, iffirmat f’Ankara fit-12 ta’ Settembru 1963 (Ftehim ta’ Assoċjazzjoni). Il-pożizzjoni li għandha tittieħed mill-UE fil-Kumitat dwar il-Kooperazzjoni Doganali tikkonċerna l-adozzjoni prevista ta’ deċiżjoni tal-Kumitat dwar l-użu ta’ ċertifikati tal-moviment A.TR maħruġa b’mod elettroniku.
2.Kuntest tal-proposta
2.1.L-unjoni doganali bejn l-UE u t-Turkija
Wieħed mill-għanijiet tal-Ftehim ta’ Assoċjazzjoni huwa li jippromwovi t-tisħiħ kontinwu u bbilanċjat tar-relazzjonijiet kummerċjali u ekonomiċi bejn l-Unjoni Ewropea u t-Turkija. Sabiex jintlaħqu l-objettivi tiegħu, il-Ftehim ta’ Assoċjazzjoni jipprevedi unjoni doganali. Ir-regoli għall-implimentazzjoni tal-fażi finali tal-unjoni doganali huma stabbiliti fid-Deċiżjoni Nru 1/95 tal-Kunsill ta’ Assoċjazzjoni KE-Turkija tat-22 ta’ Diċembru 1995 1 (magħrufa bħala d-“Deċiżjoni bażika”), li tistabbilixxi l-kundizzjonijiet għall-moviment liberu tal-merkanzija bejn il-Partijiet.
Id-Deċiżjoni Nru 1/2006 tal-Kumitat dwar il-Kooperazzjoni Doganali tas-26 ta’ Lulju 2006 2 (magħrufa bħala l-“leġiżlazzjoni tranżitorja”) tistabbilixxi d-dispożizzjonijiet doganali ta’ implimentazzjoni għad-Deċiżjoni 1/95, applikabbli għall-kummerċ fil-merkanzija bejn il-Partijiet tal-unjoni doganali u ma’ pajjiżi terzi u tistabbilixxi li l-evidenza dokumentarja li l-kundizzjonijiet għall-implimentazzjoni tad-dispożizzjonijiet dwar iċ-ċirkolazzjoni libera stabbiliti fid-Deċiżjoni bażika huma ssodisfati, għandha tkun iċ-ċertifikat tal-moviment A.TR, li l-mudell tiegħu jinsab fl-Anness I tal-istess Deċiżjoni.
2.2.Il-Kumitat dwar il-Kooperazzjoni Doganali
Il-Kumitat dwar il-Kooperazzjoni Doganali ġie stabbilit bid-Deċiżjoni Nru 2/69 tal-Kunsill ta’ Assoċjazzjoni tal-15 ta’ Diċembru 1969 3 . L-Artikolu 2 ta’ dik id-Deċiżjoni jistipula li l-Kumitat dwar il-Kooperazzjoni Doganali huwa responsabbli biex jiżgura l-kooperazzjoni amministrattiva bejn il-Partijiet bl-għan li jiżgura l-applikazzjoni korretta u uniformi tad-dispożizzjonijiet doganali tal-Ftehim ta’ Assoċjazzjoni u biex iwettaq kwalunkwe kompitu ieħor fil-qasam doganali li l-Kumitat ta’ Assoċjazzjoni jista’ jafda lilu.
2.3.L-att previst tal-Kumitat dwar il-Kooperazzjoni Doganali
Fil-laqgħa li jmiss tiegħu jew bi skambju ta’ ittri, il-Kumitat dwar il-Kooperazzjoni Doganali għandu jadotta deċiżjoni rigward l-użu ta’ ċertifikati tal-moviment .TR maħruġa b’mod elettroniku (“l-att previst”).
Il-fini tal-att previst huwa li jipprovdi lill-awtoritajiet doganali tal-Partijiet b’qafas legali sod għall-aċċettazzjoni ta’ ċertifikati tal-moviment maħruġa b’mod elettroniku meta jiġu ppreżentati waqt l-importazzjoni fil-kuntest tal-unjoni doganali bejn l-UE u t-Turkija.
3.Pożizzjoni li għandha tittieħed f’isem l-Unjoni
Matul il-pandemija tal-COVID-19, il-Kummissjoni ħarġet Nota ta’ informazzjoni Nru 1 bid-data tal-31 ta’ Marzu 2020 li fiha stiednet lill-awtoritajiet doganali tal-Istati Membri tal-UE u tal-pajjiżi sħab tal-UE biex jaċċettaw iċ-ċertifikati tal-moviment maħruġa b’mod elettroniku b’firma, timbru jew cachet diġitali tal-awtoritajiet kompetenti, jew kopja stampata jew elettronika (skennjata jew disponibbli online). Dawn il-miżuri kienu applikabbli wkoll għaċ-ċertifikati tal-moviment A.TR għall-fini taċ-ċirkolazzjoni libera tal-merkanzija fl-unjoni doganali bejn l-UE u t-Turkija.
Peress li ċ-ċirkostanzi eċċezzjonali li wasslu għall-adozzjoni ta’ dawn il-miżuri flessibbli ma baqgħux jitqiesu rilevanti, ġie deċiż li l-miżuri fis-seħħ ma kinux għadhom applikabbli mill-1 ta’ Mejju 2024.
Madankollu, l-UE u t-Turkija jirrikonoxxu li l-esperjenza tal-kummerċ skont il-miżuri adottati minħabba l-pandemija tal-COVID-19 kienet pożittiva u jqisu li huwa xieraq li jiġi stabbilit qafas legali xieraq biex dawn il-prattiki tajba jiġu introdotti mill-ġdid..
Sakemm jiġi adottat l-att previst, il-Partijiet qablu li jaċċettaw iċ-ċertifikati tal-moviment A.TR maħruġa b’mod elettroniku (b’mod partikolari dawk maħruġa mill-awtoritajiet Torok bl-użu tas-sistema MEDOS tagħhom u mingħajr firma bil-linka friska) li jibdew mit-8 ta’ Lulju 2024, dment li l-att li għandu jiġi adottat ikollu effett retroattiv minn dik id-data.
Għalhekk jixraq li tiġi prevista applikazzjoni retroattiva tal-att previst mit-8 ta’ Lulju 2024 biex tiġi żgurata l-kontinwità fil-prattiki tajba stabbiliti mill-ġdid minn dik id-data.
L-att previst jikkostitwixxi bażi legali għall-aċċettazzjoni taċ-ċertifikati tal-moviment A.TR maħruġa b’mod elettroniku. Madankollu, ma jistabbilixxi l-ebda obbligu għall-Partijiet li joħorġu ċertifikati tal-moviment A.TR b’mod elettroniku. Bħalissa l-UE ma għandha l-ebda sistema elettronika għall-ħruġ taċ-ċertifikati, għalhekk l-Istati Membri tal-UE se jkomplu joħorġu ċertifikati A.TR fuq il-karta. Għalhekk, anki jekk ċertifikat A.TR jinħareġ elettronikament, is-sottomissjoni tiegħu lill-Istat Membru tal-UE bħala pajjiż importatur xorta se ssir fuq karta jew tintbagħat elettronikament f’format pdf. Il-validità u l-awtentiċità ta’ dawn iċ-ċertifikati għandhom jiġu vverifikati manwalment mill-uffiċjali tad-dwana.
Id-DĠ TAXUD jipprevedi li jiżviluppa soluzzjoni ċentrali għad-diġitalizzazzjoni tal-proċeduri kollha bbażati fuq il-karta li jippermettu lill-Operaturi Ekonomiċi u lill-Awtoritajiet Doganali jipproċedu bil-ħruġ ta’ ċertifikati ta’ moviment b’mod diġitali. Ladarba s-sistema tal-UE ta’ ċertifikat elettroniku tal-provi tal-oriġini tiġi żviluppata u varata mill-Kummissjoni, l-Istati Membri huma mistennija li jikkollegaw mas-sistema permezz tas-CSW-CERTEX tal-UE biex jissimplifikaw il-ħidma tal-uffiċjali doganali. Hija meħtieġa bażi legali għall-istabbiliment ta’ soluzzjoni ċentrali tal-IT għall-ħruġ u l-validazzjoni ta’ ċertifikati mill-Istati Membri tal-UE.
Din il-pożizzjoni tkun konsistenti mal-pożizzjoni li trid tittieħed mill-UE fil-Kumitat Konġunt tal-Konvenzjoni Reġjonali dwar ir-regoli preferenzjali tal-oriġini pan-Ewro-Mediterranji (“Kumitat Konġunt tal-PEM”) b’rabta mal-adozzjoni prevista ta’ Rakkomandazzjoni tal-Kumitat Konġunt tal-PEM fir-rigward tal-użu taċ-ċertifikati tal-moviment maħruġa b’mod elettroniku. Il-pożizzjoni tal-UE fil-Kumitat Konġunt tal-PEM kienet ibbażata fuq l-istess suppożizzjonijiet u kienet qed issegwi l-istess objettivi.
Il-pożizzjoni li għandha tittieħed mill-Unjoni Ewropea fil-Kumitat dwar il-Kooperazzjoni Doganali jenħtieġ li tiġi stabbilita mill-Kunsill.
4.Bażi legali
4.1.Bażi legali proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi d-deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim”.
Il-kunċett ta’ “atti li jkollhom effetti legali” jinkludi l-atti li jkollhom effett legali bis-saħħa tar-regoli tad-dritt internazzjonali li jirregolaw il-korp ikkonċernat. Jinkludi wkoll l-istrumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 4 .
4.1.2.Applikazzjoni għall-każ preżenti
Il-Kumitat dwar il-Kooperazzjoni Doganali huwa korp stabbilit bi ftehim, jiġifieri l-Ftehim ta’ Assoċjazzjoni bejn il-Komunità Ewropea u t-Turkija.
L-att li l-Kumitat dwar il-Kooperazzjoni Doganali huwa mitlub jadotta huwa att b’effetti legali. L-att previst se jsir applikabbli fil-Partijiet f’konformità mal-Artikolu 24 tal-Ftehim ta’ Assoċjazzjoni u mal-Artikolu 28, il-paragrafi 1 u 3 tad-Deċiżjoni Nru 1/95 tal-Kunsill ta’ Assoċjazzjoni KE-Turkija tat-22 ta’ Diċembru 1995.
L-att previst ma jissupplimentax jew ma jemendax il-qafas istituzzjonali tal-Ftehim.
Għaldaqstant, il-bażi legali proċedurali għad-deċiżjoni proposta hija l-Artikolu 218(9) TFUE.
4.2.Bażi legali sostantiva
4.2.1.Prinċipji
Il-bażi legali sostantiva biex tittieħed deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li dwarhom għandha tittieħed pożizzjoni f’isem l-Unjoni.
4.2.2.Applikazzjoni għall-każ preżenti
L-objettiv u l-kontenut ewlenin tal-att previst huma relatati mal-politika kummerċjali komuni u mal-implimentazzjoni tal-unjoni doganali bejn l-UE u t-Turkija. L-att previst huwa għalhekk maħsub biex jiffaċilita l-kummerċ bejn il-Partijiet billi jistabbilixxi miżuri flessibbli relatati mal-użu taċ-ċertifikati tal-moviment A.TR maħruġa b’mod elettroniku meta jiġu ppreżentati mal-importazzjoni.
Il-bażi legali tad-Deċiżjoni proposta jenħtieġ li tkun l-Artikolu 207(4), l-ewwel subparagrafu, flimkien mal-Artikolu 218(9) tat-TFUE.
4.3.Konklużjoni
Il-bażi legali tad-Deċiżjoni proposta għandha tkun l-Artikolu 207(4), l-ewwel subparagrafu tat-TFUE, flimkien mal-Artikolu 218(9) tat-TFUE.
5.Pubblikazzjoni tal-att previst
Billi l-att tal-Kumitat dwar il-Kooperazzjoni Doganali se jkun applikabbli miż-żewġ Partijiet, inklużi l-UE u l-Istati Membri tagħha, huwa xieraq li dan jiġi ppubblikat f’Il-Ġurnal Uffiċjali tal-Unjoni Ewropea wara l-adozzjoni tiegħu.
2024/0310 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat dwar il-Kooperazzjoni Doganali bejn l-UE u t-Turkija stabbilit skont il-Ftehim ta’ Assoċjazzjoni bejn il-Komunità Ewropea u t-Turkija fir-rigward tal-adozzjoni ta’ deċiżjoni dwar l-użu taċ-ċertifikati tal-moviment A.TR maħruġa b’mod elettroniku
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), l-ewwel subparagrafu, flimkien mal-Artikolu 218(9) tiegħu,
Wara li kkunsidraw il-proposta tal-Kummissjoni Ewropea,
Billi:
(1)Il-Ftehim li jistabbilixxi Assoċjazzjoni bejn il-Komunità Ewropea u t-Turkija, iffirmat f’Ankara fit-12 ta’ Settembru 1963 5 (Ftehim ta’ Assoċjazzjoni), jiddefinixxi l-kamp ta’ applikazzjoni u l-kontenut tar-relazzjoni ta’ assoċjazzjoni, filwaqt li l-aħħar fażi tal-unjoni doganali hija ddefinita fid- Deċiżjoni Nru 1/95 tal-Kunsill ta’ Assoċjazzjoni , stabbilit bl-Artikolu 6 tal-Ftehim ta’ Assoċjazzjoni, tat-22 ta’ Diċembru 1995 6 , li daħal fis-seħħ fl-31 ta’ Diċembru 1995.
(2)Skont l-Artikolu 24 tal-Ftehim ta’ Assoċjazzjoni, il-Kunsill ta’ Assoċjazzjoni jista’ jiddeċiedi li jistabbilixxi kumitati biex jassistu fit-twettiq tal-kompiti tiegħu.
(3)Id-Deċiżjoni Nru 2/69 tal-Kunsill ta’ Assoċjazzjoni tal-15 ta’ Diċembru 1969 7 stabbiliet il-Kumitat dwar il-Kooperazzjoni Doganali.
(4)L-Artikolu 28, il-paragrafi 1 u 3 tad-Deċiżjoni Nru 1/95 tal-Kunsill ta’ Assoċjazzjoni inkariga lill-Kumitat dwar il-Kooperazzjoni Doganali biex jistabbilixxi l-miżuri xierqa biex jiġu implimentati d-dispożizzjonijiet doganali li jinsabu fl-istess Deċiżjoni.
(5)L-Artikolu 6.1 tad-Deċiżjoni Nru 1/2006 tal-Kumitat dwar il-Kooperazzjoni Doganali tas-26 ta’ Lulju 2006 8 jistabbilixxi li ċ-ċertifikat tal-moviment A.TR jikkostitwixxi dokument ta’ sostenn li l-kundizzjonijiet għall-implementazzjoni tad-dispożizzjonijiet dwar iċ-ċirkolazzjoni libera stabbiliti fid-Deċiżjoni 1/95 huma ssodisfati.
(6)Fil-bidu tal-2020, minħabba l-pandemija tal-COVID-19, il-kuntatti bejn l-awtoritajiet doganali tal-pajjiżi sħab tal-UE u l-operaturi ekonomiċi ġew sospiżi f’għadd ta’ pajjiżi. Għalhekk tqies xieraq li jiġu adottati l-miżuri eċċezzjonali applikabbli fuq bażi reċiproka, bl-għan li jiġu aċċettati ċ-ċertifikati tal-moviment maħruġa b’mod elettroniku b’firma, timbru jew cachet diġitali tal-awtoritajiet kompetenti, jew kopja stampata jew elettronika (skennjata jew disponibbli online).
(7)Dawk il-miżuri kienu applikabbli wkoll għaċ-ċertifikati tal-moviment A.TR għall-fini taċ-ċirkolazzjoni libera tal-merkanzija fl-unjoni doganali bejn l-UE u t-Turkija.
(8)Peress li ċ-ċirkostanzi eċċezzjonali li wasslu għall-adozzjoni ta’ dawn il-miżuri flessibbli ma baqgħux jitqiesu rilevanti, ġie deċiż li l-miżuri fis-seħħ ma kinux għadhom applikabbli mill-1 ta’ Mejju 2024.
(9)L-Unjoni Ewropea u t-Turkija rrikonoxxew li l-esperjenza tal-kummerċ skont il-miżuri eċċezzjonali adottati minħabba l-pandemija tal-COVID-19 kienet pożittiva u qiesu li kien xieraq li jiġi stabbilit qafas legali xieraq biex dawn il-prattiki tajba jiġu introdotti mill-ġdid. Għal dan l-għan, deċiżjoni tal-Kumitat dwar il-Kooperazzjoni Doganali tikkostitwixxi bażi legali xierqa.
(10)Mit-8 ta’ Lulju 2024, il-Partijiet qablu li jaċċettaw iċ-ċertifikati tal-moviment A.TR maħruġa b’mod elettroniku dment li tiġi adottata deċiżjoni ad hoc tal-Kumitat dwar il-Kooperazzjoni Doganali bejn l-UE u t-Turkija, b’effett retroattiv mit-8 ta’ Lulju 2024, biex tiġi żgurata l-kontinwità tal-prattiki tajba stabbiliti mill-ġdid minn dik id-data, mingħajr preġudizzju għall-azzjonijiet meħuda mill-amministrazzjonijiet doganali taż-żewġ partijiet matul il-perjodu mill-1 ta’ Mejju 2024 sat-8 ta’ Lulju 2024, u li ma jaffettwawx id-drittijiet mogħtija lill-individwi matul l-istess perjodu.
(11)Il-Kumitat dwar il-Kooperazzjoni Doganali huwa mistenni jadotta deċiżjoni dwar l-użu taċ-ċertifikati tal-moviment A.TR maħruġa b’mod elettroniku.
(12)Huwa xieraq li tiġi stabbilita l-pożizzjoni li trid tittieħed f’isem l-Unjoni Ewropea fi ħdan il-Kumitat dwar il-Kooperazzjoni Doganali, peress li d-deċiżjoni ser issir applikabbli fl‐Unjoni,
ADOTTA DIN ID-DEĊIŻJONI:
Artikolu 1
Il-pożizzjoni li għandha tiġi adottata f’isem l-Unjoni Ewropea fi ħdan il-Kumitat dwar il-Kooperazzjoni Doganali bejn l-UE u t-Turkija skont il-Ftehim ta’ Assoċjazzjoni bejn il-Komunità Ewropea u t-Turkija għandha tkun ibbażata fuq l-abbozz tad-deċiżjoni tal-Kumitat dwar il-Kooperazzjoni Doganali mehmuż ma’ din id-Deċiżjoni.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 29.11.2024
COM(2024) 559 final
ANNESS
ta'
Proposta għal Deċiżjoni tal-Kunsill
dwar il-pożizzjoni li għandha tittieħed f’isem l-Unjoni Ewropea fil-Kumitat dwar il-Kooperazzjoni Doganali bejn l-UE u t-Turkija stabbilit skont il-Ftehim ta’ Assoċjazzjoni bejn il-Komunità Ewropea u t-Turkija fir-rigward tal-adozzjoni ta’ deċiżjoni dwar l-użu taċ-ċertifikati tal-moviment A.TR maħruġa b’mod elettroniku
ANNESS
TA'0.0.0
DEĊIŻJONI Nru
TAL-KUMITAT DWAR IL-KOOPERAZZJONI DOGANALI BEJN L-UE U T-TURKIJA
ta’ …..
dwar l-użu taċ-ċertifikati tal-moviment A.TR maħruġa b’mod elettroniku
IL-KUMITAT DWAR IL-KOOPERAZZJONI DOGANALI,
Wara li kkunsidra d-Deċiżjoni Nru 1/95 tal-Kunsill ta’ Assoċjazzjoni KE-Turkija tat-22 ta’ Diċembru 1995 dwar l-implimentazzjoni tal-fażi finali tal-unjoni doganali 1 , u b’mod partikolari l-Artikolu 3(6) tagħha,
Billi:
(1)Fil-bidu tal-2020, il-pajjiżi sħab tal-UE li kellhom ftehim ta’ kummerċ ħieles mal-Unjoni ġew ikkonfrontati bl-impossibbiltà li jipprovdu ċ-ċertifikati tal-moviment f’forma xierqa (jiġifieri ffirmati bl-idejn, ittimbrati b’linka friska jew fil-format tajjeb tal-karta), meta jitqies li, minħabba l-pandemija tal-COVID-19, f’għadd ta’ pajjiżi l-kuntatti bejn l-awtoritajiet doganali tal-pajjiżi sħab tal-UE u l-operaturi ekonomiċi ġew sospiżi. Għalhekk tqies xieraq li jiġu adottati miżuri eċċezzjonali applikabbli fuq bażi reċiproka, biex tiġi żgurata l-implimentazzjoni sħiħa tal-kummerċ preferenzjali.
(2)L-awtoritajiet doganali tal-Istati Membri tal-UE u tal-pajjiżi sħab tal-UE ġew mistiedna jaċċettaw iċ-ċertifikati tal-moviment maħruġa b’mod elettroniku, b’firma, timbru jew cachet diġitali tal-awtoritajiet kompetenti, jew kopja stampata jew elettronika (skennjata jew disponibbli online) 2 .
(3)Dawn il-miżuri kienu applikabbli wkoll għaċ-ċertifikati tal-moviment A.TR għall-fini taċ-ċirkolazzjoni libera tal-merkanzija fl-Unjoni Doganali bejn l-UE u t-Turkija. Din il-prattika kienet ibbażata fuq il-flessibbiltà prevista fl-Artikolu 10, il-paragrafu 1 tad-Deċiżjoni Nru 1/2006 tal-Kumitat dwar il-Kooperazzjoni Doganali KE–Turkija, tas-26 ta’ Lulju 2006 li tistabbilixxi regoli dettaljati għall-applikazzjoni tad-Deċiżjoni Nru 1/95 tal-Kunsill ta’ Assoċjazzjoni bejn il-KE u t-Turkija 3 . Skont din id-dispożizzjoni, iċ-ċertifikati tal-moviment A.TR għandhom jiġu ppreżentati lill-awtoritajiet doganali tal-Istat importatur f’konformità mal-proċeduri applikabbli f’dak l-Istat.
(4)Iċ-ċirkostanzi eċċezzjonali li wasslu għall-adozzjoni ta’ dawn il-miżuri flessibbli ma baqgħux jitqiesu rilevanti. B’hekk ġie deċiż li l-miżuri fis-seħħ ma kinux għadhom applikabbli mill-1 ta’ Mejju 2024.
(5)L-UE u t-Turkija rrikonoxxew li l-esperjenza tal-kummerċ skont il-miżuri eċċezzjonali adottati minħabba l-pandemija tal-COVID-19 kienet pożittiva u jqisu xieraq li jinżammu l-prattiki tajba introdotti fiċ-ċirkostanzi eċċezzjonali matul il-pandemija sabiex l-operaturi ekonomiċi jibbenefikaw minn diġitalizzazzjoni taċ-ċertifikati tal-moviment A.TR.
(6)Is-sistema mfassla u żviluppata għall-ħruġ elettroniku taċ-ċertifikati tal-moviment A.TR toffri l-possibbiltà għall-awtoritajiet doganali li jivverifikaw l-awtentiċità tagħhom minnufih u mingħajr preġudizzju għall-Artikolu 16 tad-Deċiżjoni Nru 1/2006 dwar il-proċeduri għall-verifiki sussegwenti. Għandhom jiġu stabbiliti arranġamenti dettaljati dwar l-implimentazzjoni tal-kontrolli tal-awtentiċità. L-istess funzjonalità għandha tiġi attivata ladarba tiġi stabbilita sistema ta’ diġitalizzazzjoni taċ-ċertifikati tal-moviment A.TR għall-ħruġ elettroniku ta’ tali ċertifikati fl-Unjoni Ewropea.
(7)Fil-kuntest tal-kummerċ preferenzjali fiż-żona Pan-Ewro-Mediterranja (PEM), li tinkludi kemm l-UE kif ukoll it-Turkija, il-Kumitat Konġunt tal-Konvenzjoni Reġjonali tar-regoli preferenzjali tal-oriġini pan-Ewro-Mediterranji ħareġ ir-Rakkomandazzjoni 1/2023 4 dwar l-użu taċ-ċertifikati tal-moviment EUR.1 u EUR-MED maħruġa b’mod elettroniku.
(8)Għal prattika armonizzata dwar l-użu taċ-ċertifikati tal-moviment u wara li jitqiesu l-Artikolu 9 u l-Anness II tad-Deċiżjoni Nru 1/2006, huwa xieraq li ċ-ċertifikati tal-moviment A.TR maħruġa b’mod elettroniku skont il-qafas tal-Unjoni Doganali bejn l-UE u t-Turkija, jiġu aċċettati mill-awtoritajiet doganali tal-Istati Membri tal-UE u tat-Turkija.
(9)Mit-8 ta’ Lulju 2024, il-Partijiet qablu li jaċċettaw iċ-ċertifikati tal-moviment A.TR maħruġa b’mod elettroniku. Għalhekk huwa xieraq li tiġi prevista applikazzjoni retroattiva mit-8 ta’ Lulju 2024 biex tiġi żgurata l-kontinwità tal-prattiki tajba introdotti matul il-pandemija tal-COVID-19 u stabbiliti mill-ġdid minn dik id-data, mingħajr preġudizzju għall-azzjonijiet meħuda mill-amministrazzjonijiet doganali taż-żewġ partijiet matul il-perjodu interim mill-1 ta’ Mejju 2024 sat-8 ta’ Lulju 2024 u li ma jaffettwawx id-drittijiet mogħtija lill-individwi matul l-istess perjodu,
ADOTTA DIN ID-DEĊIŻJONI:
Artikolu 1
1. Mingħajr preġudizzju għad-dispożizzjonijiet stabbiliti fid-Deċiżjoni Nru 1/2006 tal-Kumitat dwar il-Kooperazzjoni Doganali KE–Turkija, l-awtoritajiet doganali tal-Istati Membri tal-UE u tat-Turkija għandhom jaċċettaw iċ-ċertifikati tal-moviment A.TR maħruġa b’mod elettroniku meta jiġu ppreżentati mal-importazzjoni, meta jiġu ssodisfati l-kundizzjonijiet kollha li ġejjin:
(a)il-mudell li jinsab fl-Anness I tad-Deċiżjoni Nru 1/2006 tal-Kumitat dwar il-Kooperazzjoni Doganali KE-Turkija jintuża bħala l-bażi għaċ-ċertifikati tal-moviment A.TR maħruġa b’mod elettroniku;
(b)l-awtoritajiet doganali tal-Istat esportatur jipprevedu sistema online bbażata fuq l-internet biex tiġi verifikata l-awtentiċità taċ-ċertifikati tal-moviment A.TR maħruġa b’mod elettroniku;
(c)iċ-ċertifikati tal-moviment A.TR maħruġa b’mod elettroniku jkollhom numru tas-serje uniku, u jekk ikunu disponibbli, karatteristiċi tas-sigurtà li bihom jistgħu jiġu identifikati.
2.L-UE u t-Turkija jistgħu jiddeċiedu li jissospendu li jaċċettaw iċ-ċertifikati tal-moviment A.TR maħruġa b’mod elettroniku meta l-kundizzjonijiet elenkati skont hawn fuq ma jkunux issodisfati, u għandhom jinnotifikaw lil xulxin b’dan minn qabel. Iż-żewġ partijiet għandhom jiżguraw il-pubblikazzjoni tan-notifiki skont il-proċeduri tagħhom stess, filwaqt li jindikaw id-data tal-bidu tas-sospensjoni.
Artikolu 2
Għandha tapplika mit-8 ta’ Lulju 2024.
Magħmul fi Brussell,
Għall-Kumitat dwar il-Kooperazzjoni Doganali
Il-President
Matthias PETSCHKE