This document is an excerpt from the EUR-Lex website
Document 52024PC0109
Recommendation for a COUNCIL DECISION authorising the opening of negotiations on an agreement between the European Union and the Republic of San Marino on several aspects in the field of border management
Rakkomandazzjoni għal DEĊIŻJONI TAL-KUNSILL li tawtorizza l-ftuħ ta’ negozjati dwar ftehim bejn l-Unjoni Ewropea u r-Repubblika ta’ San Marino dwar diversi aspetti fil-qasam tal-ġestjoni tal-fruntieri
Rakkomandazzjoni għal DEĊIŻJONI TAL-KUNSILL li tawtorizza l-ftuħ ta’ negozjati dwar ftehim bejn l-Unjoni Ewropea u r-Repubblika ta’ San Marino dwar diversi aspetti fil-qasam tal-ġestjoni tal-fruntieri
COM/2024/109 final
IL-KUMMISSJONI EWROPEA
Brussell, 8.3.2024
COM(2024) 109 final
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati dwar ftehim bejn l-Unjoni Ewropea u r-Repubblika ta’ San Marino dwar diversi aspetti fil-qasam tal-ġestjoni tal-fruntieri
MEMORANDUM TA’ SPJEGAZZJONI
1.KUNTEST TAL-PROPOSTA
•Sfond
B’din ir-rakkomandazzjoni, il-Kummissjoni tirrakkomanda li (i) il-Kunsill jawtorizza lill-Kummissjoni, bħala n-negozjatur tal-ftehim, biex tiftaħ u tmexxi negozjati għal ftehim bejn l-Unjoni u r-Repubblika ta’ San Marino, (ii) jistabbilixxi direttivi lin-Negozjatur u (iii) jaħtar kumitat speċjali li f’konsultazzjoni miegħu jridu jsiru n-negozjati.
Ir-Repubblika ta’ San Marino hija Stat sovran indipendenti, li jgawdi relazzjonijiet speċifiċi mal-Istat Membru ġar, l-Italja, minħabba s-sitwazzjoni ġeografika, id-daqs żgħir u l-popolazzjoni tiegħu. B’mod partikolari, San Marino huwa pajjiż mingħajr kosta, imdawwar mit-territorju tal-Italja. Ma hemm l-ebda ajruport internazzjonali fit-territorju ta’ San Marino. F’xi ċirkostanzi eċċezzjonali, hemm servizz ta’ ħelikopter ambulanza għal persuni morda serjament jew midruba li jgħaqqad l-isptar ta’ San Marino mal-isptarijiet ewlenin fir-reġjun Taljan Emilia-Romagna. San Marino għandu mitjar, li jippermetti t-tlugħ u nżul ta’ inġenji tal-ajru rikreattivi ultraħfief u ħfief. Dawn jiġu l-aktar mill-Italja. Perċentwal żgħir ħafna jiġi minn barra ż-żona Schengen, iżda qabel ma jinżlu l-art f’San Marino, kienu jagħmlu waqfa waħda jew aktar fl-Italja, fejn jitwettqu l-verifiki fil-fruntieri. Għalhekk, iċ-ċittadini ta’ pajjiżi terzi jeħtieġ li jivvjaġġaw miż-żona Schengen biex jaslu San Marino fejn jgħaddu minn verifiki fil-fruntieri minn Stat ta’ Schengen u jridu jikkonformaw mal-obbligi li jidħlu fiż-żona Schengen f’konformità mal-acquis ta’ Schengen. Din is-sitwazzjoni ġeografika speċjali u r-relazzjoni distinta li għandha mal-Italja qabel l-istabbiliment tal-Unjoni huma r-raġunijiet għal nuqqas “de facto” ta’ verifiki sistematiċi fil-fruntieri bejn l-Italja u San Marino kif normalment meħtieġ fil-fruntieri esterni tal-Istati ta’ Schengen. 1 San Marino bħalissa lanqas ma joħroġ viżi lil ċittadini ta’ pajjiżi terzi minħabba li l-vjaġġaturi li jeħtieġu viża se jkollhom jgħaddu mill-Italja biex jaslu San Marino u, għalhekk, ikollhom japplikaw għal viża ta’ Schengen mal-awtoritajiet Taljani responsabbli.
•Raġunijiet u objettivi tal-proposta
L-objettiv tar-rakkomandazzjoni huwa li tipprovdi bażi ġuridika xierqa għan-nuqqas “de facto” ta’ kontrolli fil-fruntiera esterna bejn l-Italja u San Marino u, bħala miżura ta’ kumpens, li tinkludi regoli dwar il-permessi ta’ residenza.
Il-bidliet li jmiss li jikkonċernaw l-acquis ta’ Schengen jeħtieġu wkoll aġġustamenti, speċjalment id-dħul fis-seħħ futur tas-sistemi ta’ informazzjoni l-ġodda tal-UE, inkluż is-Sistema ta’ Dħul/Ħruġ (Entry/Exit System, EES) 2 u s-Sistema Ewropea ta’ Informazzjoni u ta’ Awtorizzazzjoni għall-Ivvjaġġar (European Travel Information and Authorisation System, “ETIAS”) 3 . Il-permessi ta’ residenza maħruġa minn San Marino lil ċittadini ta’ pajjiżi terzi attwalment ma jippermettux lid-detenturi tagħhom jivvjaġġaw liberament fiż-żona Schengen. Filwaqt li ċ-ċittadini ta’ San Marino huma eżentati mill-obbligu li jiġu rreġistrati fl-EES u fl-ETIAS 4 , iċ-ċittadini ta’ pajjiżi terzi li jkollhom permess ta’ residenza ta’ San Marino li jgħaddu mill-Istati Membri biex jaċċessaw il-post ta’ residenza tagħhom f’San Marino normalment jiġu rreġistrati fl-EES mad-dħul fiż-żona Schengen (tipikament fl-Italja). Peress li ma jiġux irreġistrati fl-EES li jitilqu miż-żona Schengen mad-dħul f’San Marino, dawn jiġu rreġistrati awtomatikament fl-EES bħala “persuni b’permanenza b’awtorizzazzjoni skaduta” jekk il-preżenza tagħhom taqbeż iż-żmien permess biex jibqgħu fiż-żona Schengen. Is-soġġorn eċċesiv imbagħad ikollu impatt negattiv fuq dawn iċ-ċittadini bona fide ta’ pajjiżi terzi, b’mod partikolari fir-rigward tal-applikazzjonijiet tagħhom għal viża ta’ Schengen, awtorizzazzjoni għall-ivvjaġġar tal-ETIAS, viża għal soġġorn twil jew permess ta’ residenza.
Barra minn hekk, l-objettiv tar-rakkomandazzjoni huwa li tingħalaq lakuna attwali billi jintlaħaq qbil dwar ir-regoli biex San Marino joħroġ permessi ta’ residenza lil ċittadini ta’ pajjiżi terzi. Bħalissa, il-permessi ta’ residenza lil ċittadini ta’ pajjiżi terzi mhuma soġġetti għall-ebda verifika mill-Istati Membri filwaqt li d-detenturi tagħhom jistgħu jaċċessaw “de facto” u jiċċaqilqu liberament fiż-żona Schengen mingħajr ma jkollhom viża ta’ Schengen valida jew awtorizzazzjoni għall-ivvjaġġar tal-ETIAS.
L-għan ta’ dan il-ftehim ikun li jitneħħew il-kontrolli fuq il-fruntieri fuq persuni u jingħata rikonoxximent madwar Schengen tal-permessi ta’ residenza maħruġa minn San Marino lil ċittadini ta’ pajjiżi terzi.
Il-Ftehim għandu għalhekk jinkludi li f’każ li ċittadin ta’ pajjiż terz ikollu l-intenzjoni li jasal direttament f’San Marino, San Marino jiżgura li l-ewwel isirilhom verifiki fuq il-fruntiera mwettqa mill-Italja.
Bl-eżenzjoni tagħhom mill-obbligu li jirreġistraw fl-EES, dan jipprevjeni liċ-ċittadini ta’ pajjiżi terzi bona fide li jkollhom permessi ta’ residenza Sammariniżi milli jiġu rreġistrati bħala “persuni b’permanenza b’awtorizzazzjoni skaduta” fl-EES. Iċ-ċittadini ta’ pajjiżi terzi li jkollhom permessi ta’ residenza Sammariniżi jkollhom aċċess mingħajr viża għaż-żona Schengen sa 90 jum fi kwalunkwe perjodu ta’ 180 jum f’konformità mad-dispożizzjonijiet rilevanti tad-dritt tal-Unjoni u jkunu eżentati mill-obbligu li jirreġistraw fl-EES u mill-obbligu li jkollhom viża jew awtorizzazzjoni għall-ivvjaġġar tal-ETIAS biex jidħlu u jibqgħu fiż-żona Schengen.
Sabiex il-permessi ta’ residenza maħruġa jew imġedda minn San Marino jingħataw effett mifrux ma’ Schengen kollu, huwa essenzjali li l-livell għoli ta’ sigurtà taż-żona Schengen ikun garantit. Għalhekk, il-ftehim jipprevedi li San Marino jimpenja ruħu li l-ħruġ, it-tiġdid jew l-irtirar ta’ permessi ta’ residenza Sammariniżi għal ċittadini ta’ pajjiżi terzi jkun jiddependi fuq valutazzjoni tas-sigurtà li għandha titwettaq mill-Italja. L-Italja twettaq valutazzjoni tas-sigurtà vinkolanti qabel ma San Marino jkun jista’ joħroġ jew iġedded dawk il-permessi ta’ residenza, b’mod partikolari kontrolli fil-bażijiet tad-data rilevanti tal-UE, nazzjonali u internazzjonali inklużi kontrolli li jiżguraw ir-rispett u l-effettività tal-miżuri restrittivi tal-UE. Wara opinjoni pożittiva maħruġa f’perjodu ta’ żmien stabbilit, San Marino joħroġ jew iġedded dak il-permess ta’ residenza fil-format uniformi stabbilit mir-Regolament tal-Kunsill (KE) Nru 1030/2002 tat-13 ta’ Ġunju 2002 li jippreskrivi format uniformi għall-permessi ta’ residenza għaċ-ċittadini ta’ pajjiżi terzi 5 u l-Italja jwettaq l-operazzjonijiet kollha meħtieġa fis-Sistema ta’ Informazzjoni dwar il-Viża 6 . Opinjoni negattiva maħruġa mill-Italja twassal biex San Marino jirrifjuta jew jirtira l-applikazzjoni għal permess ta’ residenza jew l-applikazzjoni għat-tiġdid ta’ permess ta’ residenza. L-Italja jkollha tinnotifika l-permessi ta’ residenza maħruġa minn San Marino lil ċittadini ta’ pajjiżi terzi skont il-Kodiċi tal-Fruntieri ta’ Schengen (l-Artikolu 39) biex tagħtihom effett madwar Schengen kollu.
Il-Ftehim previst jenħtieġ li jipprevedi regoli li jirrikjedu li l-permessi ta’ residenza diġà maħruġa minn San Marino lil ċittadini ta’ pajjiżi terzi fiż-żmien tad-dħul fis-seħħ tal-ftehim għandhom jiġu sostitwiti b’permessi ta’ residenza maħruġa f’konformità mal-ftehim fi żmien sentejn mid-dħul fis-seħħ tiegħu. Il-Ftehim jenħtieġ li jipprevedi li l-permessi ta’ residenza eżistenti maħruġa minn San Marino lil ċittadini ta’ pajjiżi terzi jiġu nnotifikati lill-Italja biex twettaq kontrolli fil-bażijiet tad-data rilevanti u, jekk ikun meħtieġ, titlob lil San Marino jirtira dawn il-permessi għal raġunijiet ta’ ordni pubbliku jew sigurtà interna.
Il-Ftehim previst għandu jipprevedi mekkaniżmu ta’ evalwazzjoni. Il-Ftehim jeħtieġ ukoll li jiddefinixxi l-modalitajiet tal-kooperazzjoni bejn l-Italja u San Marino biex jinħarġu jew jiġġeddu permessi ta’ residenza kif ukoll regoli dwar appelli kontra deċiżjonijiet meħuda minn San Marino abbażi ta’ opinjoni negattiva mill-Italja.
Barra minn hekk, jenħtieġ li l-ftehim previst jipprevedi li l-akkwist u ż-żamma tad-dritt ta’ residenza f’San Marino jkunu kundizzjonali fuq l-eżistenza ta’ konnessjoni reali ma’ San Marino li għandha tiġi stabbilita abbażi tal-preżenza fiżika attwali u regolari fuq perjodu xieraq ta’ żmien u ta’ kriterji oġġettivi u verifikabbli oħra bl-esklużjoni tal-investiment fl-ekonomija u l-proprjetà immobbli ta’ San Marino, jew ta’ pagamenti finanzjarji predeterminati lill-awtoritajiet tas-Sammariniżi.
Il-Ftehim previst jenħtieġ li jipprevedi regoli dwar l-iskambju ta’ informazzjoni bejn l-awtoritajiet tal-infurzar tal-liġi ta’ San Marino u l-Italja, inkluż informazzjoni dwar rekords kriminali u informazzjoni dwar persuni u oġġetti mfittxija u neqsin, kemm fuq talba kif ukoll spontanjament, fejn dan ikun rilevanti għall-prevenzjoni, l-identifikazzjoni jew l-investigazzjoni tal-kriminalità f’San Marino jew fl-Italja, is-salvagwardji kontra u l-prevenzjoni ta’ theddid għas-sikurezza pubblika.
Barra minn hekk, sabiex jiġi żgurat il-livell għoli ta’ sigurtà u fiduċja, jenħtieġ li l-ftehim previst ikun fih regoli li jipprevedu l-possibbiltà ta’ kooperazzjoni operazzjonali transfruntiera, bħall-possibbiltà ta’ sorveljanza transfruntiera, “insegwiment transkonfinali” ta’ persuni suspettati kriminali, l-organizzazzjoni ta’ rondi konġunti u operazzjonijiet konġunti oħra. Jenħtieġ li jkun hemm ukoll regoli li jippermettu t-twettiq ta’ kontrolli msaħħa tal-pulizija fiż-żoni qrib il-fruntiera tal-art bejn iż-żona Schengen u t-territorju ta’ San Marino, kemm għal finijiet ta’ infurzar tal-liġi kif ukoll ta’ migrazzjoni.
Fir-rigward ta’ “persuni b’permanenza b’awtorizzazzjoni skaduta” preżunti b’mod falz irreġistrati fl-EES, jiġifieri ċittadini ta’ pajjiżi terzi, li jeħtieġu viża jew li huma eżentati mill-viża u rreġistrati fl-EES mad-dħul fiż-żona Schengen, li s-soġġorn tagħhom fit-territorju ta’ San Marino jiġi kkalkulat awtomatikament bħala soġġorn fiż-żona Schengen minħabba n-nuqqas ta’ verifiki fil-fruntieri, jenħtieġ li l-ftehim previst jipprevedi li, ħlief għar-residenti f’San Marino, iż-żmien imqatta’ f’San Marino jingħadd bħala ħin imqatta’ fiż-żona Schengen għall-fini tal-kalkolu tas-soġġorn awtorizzat.
Barra minn hekk, jenħtieġ li l-ftehim previst jipprevedi wkoll li f’każ li San Marino joħroġ viżi għal soġġorn qasir jew għal soġġorn twil lil ċittadini ta’ pajjiżi terzi fil-futur, il-ftehim ikun jeħtieġ li jiġi rivedut kif xieraq.
Il-Ftehim previst jenħtieġ li jipprevedi mekkaniżmu li permezz tiegħu l-iżviluppi rilevanti futuri tad-dritt tal-Unjoni, fejn meħtieġ, jiġu riflessi fl-adattamenti għall-ftehim. Il-Ftehim previst jenħtieġ li jinkludi wkoll dispożizzjoni li permezz tagħha l-ftehim jiġi tterminat mill-Unjoni f’każ li l-adattament ma jsirx.
Relazzjoni ma’ ftehimiet eżistenti jew futuri tal-Unjoni
F’Diċembru 2023, l-UE u San Marino ffinalizzaw in-negozjati dwar ftehim ta’ assoċjazzjoni li ser iwassal biex San Marino japplika d-Direttiva 2004/38/KE tal-Parlament Ewropew u tal-Kunsill 7 għaċ-ċittadini tal-Unjoni u l-membri tal-familja tagħhom, inklużi ċittadini ta’ pajjiżi terzi. Madankollu, il-kwistjonijiet li jistgħu potenzjalment jaqgħu taħt din ir-rakkomandazzjoni mhumiex fil-kamp ta’ applikazzjoni tan-negozjati dwar ftehim ta’ assoċjazzjoni.
Il-konklużjoni tal-ftehim ta’ assoċjazzjoni issa hija soġġetta għall-proċeduri interni taż-żewġ partijiet. Ladarba l-ftehim ta’ assoċjazzjoni jiġi konkluż u jkun daħal fis-seħħ, iċ-ċittadini ta’ pajjiżi terzi li huma membri tal-familja ta’ ċittadini tal-Unjoni li għalihom tapplika d-Direttiva 2004/38/KE u li jkollhom karta ta’ residenza skont id-Direttiva 2004/38/KE maħruġa minn San Marino jkunu eżentati mill-obbligu li jiġu rreġistrati fl-EES 8 , fl-ETIAS 9 , u li jkollhom viża 10 . B’konsegwenza ta’ dan, id-dispożizzjonijiet tar-Regolament dwar l-EES rigward il-kalkolu tat-tul tas-soġġorn awtorizzat u l-ġenerazzjoni ta’ twissijiet lill-Istati Membri meta jiskadi s-soġġorn awtorizzat ma japplikawx għal ċittadini ta’ pajjiżi terzi li jkunu membri tal-familja ta’ ċittadin tal-Unjoni li għalihom tapplika d-Direttiva 2004/38/KE u li ma jkollhomx karta ta’ residenza skont id-Direttiva 2004/38/KE. Bl-istess mod, il-membri tal-familja ta’ ċittadini ta’ San Marino li għalihom tapplika d-Direttiva 2004/38/KE jaqgħu fil-kamp ta’ applikazzjoni tal-acquis rilevanti tal-UE li jirreferi għall-membri tal-familja ta’ ċittadin ta’ pajjiż terz li jgawdi d-dritt ta’ moviment liberu ekwivalenti għal dak taċ-ċittadini tal-Unjoni skont ftehim bejn l-Unjoni u l-Istati Membri tagħha, minn naħa waħda, u pajjiż terz, min-naħa l-oħra.
Fid-dawl ta’ dan ta’ hawn fuq, ladarba l-ftehim ta’ assoċjazzjoni jkun daħal fis-seħħ, il-membri tal-familja taċ-ċittadini tal-Unjoni li għalihom tapplika d-Direttiva 2004/38/KE jenħtieġ li ma jkunux koperti mid-dispożizzjonijiet tal-ftehim previst applikabbli għall-ħruġ ta’ permessi ta’ residenza minn San Marino lil ċittadini ta’ pajjiżi terzi.
Min-naħa l-oħra, jekk il-ftehim previst minn din ir-rakkomandazzjoni jidħol fis-seħħ qabel il-ftehim ta’ assoċjazzjoni, il-ftehim previst ikun japplika għall-membri tal-familja taċ-ċittadin tal-Unjoni li huma ċittadini ta’ pajjiżi terzi sakemm jibda japplika l-ftehim ta’ assoċjazzjoni.
2.BAŻI LEGALI, SUSSIDJARJETÀ U PROPORZJONALITÀ
Il-bażi legali għal din l-inizjattiva hija l-Artikolu 218(3) u (4) TFUE.
Il-bażi legali sostantiva definita għall-iffirmar u l-konklużjoni tal-ftehim il-ġdid tista’ tiġi ddeterminata biss fi tmiem in-negozjati, fid-dawl tal-kontenut tiegħu.
L-Unjoni hija kompetenti biex tikkonkludi dan il-ftehim internazzjonali ma’ San Marino, dwar l-aspetti tal-ġestjoni tal-fruntieri koperti minn din ir-rakkomandazzjoni inkluż l-għoti tal-effett tal-permessi ta’ residenza maħruġa minn San Marino lil ċittadini ta’ pajjiżi terzi madwar Schengen.
Dan il-ftehim previst huwa meħtieġ biex jissolvew kwistjonijiet ta’ permanenza b’awtorizzazzjoni skaduta preżunta b’mod falz u biex jingħalqu l-lakuni identifikati fis-sigurtà. Il-Ftehim previst ma jmurx lil hinn minn dak li huwa meħtieġ biex jintlaħqu l-objettivi inkwistjoni peress li dawn ma jistgħux jinkisbu mill-Istati Membri waħedhom.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
Billi dan se jkun ftehim ġdid, ma setgħet titwettaq l-ebda evalwazzjoni jew kontroll tal-idoneità tal-istrumenti eżistenti. Mhi meħtieġa l-ebda valutazzjoni tal-impatt għan-negozjar ta’ dan il-ftehim.
4.IL-PJANIJIET GĦALL-IMPLIMENTAZZJONI U L-ARRANĠAMENTI TA’ MONITORAĠĠ, TA’ EVALWAZZJONI U TA’ RAPPURTAR
Il-Kummissjoni se tiżgura l-monitoraġġ xieraq tal-implimentazzjoni tal-ftehim.
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati dwar ftehim bejn l-Unjoni Ewropea u r-Repubblika ta’ San Marino dwar diversi aspetti fil-qasam tal-ġestjoni tal-fruntieri
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 218(3) u (4) tiegħu,
Wara li kkunsidra r-rakkomandazzjoni mill-Kummissjoni Ewropea,
Billi:
(1)Ftehim huwa meqjus neċessarju biex jipprovdi l-bażi legali għan-nuqqas ta’ kontroll fuq il-fruntiera bejn l-Italja u San Marino.
(2)Jidher ta’ benefiċċju li jiġi konkluż tali ftehim fid-dawl tal-prossimità ġeografika u l-interdipendenza ekonomika ta’ San Marino mal-Unjoni.
(3)Huwa meħtieġ li jiġi żgurat it-trattament ġust ta’ ċittadini ta’ pajjiżi terzi li jkollhom permessi ta’ residenza maħruġa minn San Marino fil-fruntieri esterni tal-Unjoni.
(4)Il-ħruġ ta’ tali permessi ta’ residenza minn San Marino għandu jkun kundizzjonali fuq opinjoni vinkolanti mill-Italja bbażata fuq il-valutazzjoni tas-sigurtà tagħha.
(5)Il-ftehim jenħtieġ li jippermetti l-konklużjoni ta’ arranġamenti amministrattivi implimentattivi ta’ natura operattiva bejn l-Italja u San Marino dwar kwistjonijiet koperti minn dan il-ftehim sakemm id-dispożizzjonijiet tagħhom ikunu kompatibbli ma’ dawk tal-ftehim u mal-liġi tal-Unjoni.
(6)Għalhekk jenħtieġ li jinfetħu negozjati bil-ħsieb li jiġi konkluż ftehim bejn l-Unjoni Ewropea, minn naħa waħda, u San Marino, min-naħa l-oħra. Jenħtieġ li l-Kummissjoni li tiġi nnominata bħala n-negozjatur tal-Unjoni.
ADOTTA DIN ID-DEĊIŻJONI:
Artikolu 1
Il-Kummissjoni hija b’dan awtorizzata tinnegozja, f’isem l-Unjoni, ftehim mar-Repubblika ta’ San Marino dwar diversi aspetti fil-qasam tal-ġestjoni tal-fruntieri.
Artikolu 2
Id-direttivi ta’ negozjati huma stabbiliti fl-Anness.
Artikolu 3
In-negozjati għandhom isiru b’konsultazzjoni ma’ [isem il-kumitat speċjali li għandu jiddaħħal mill-Kunsill].
Artikolu 4
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 8.3.2024
COM(2024) 109 final
ANNESSI
tar-
Rakkomandazzjoni għal Deċiżjoni tal-Kunsill
li tawtorizza l-ftuħ ta' negozjati dwar ftehim bejn l-Unjoni Ewropea u r-Repubblika ta' San Marino dwar diversi aspetti fil-qasam tal-ġestjoni tal-fruntieri
ANNESS
DIRETTIVI GĦAN-NEGOZJAR TA’ FTEHIM BEJN
l-Unjoni Ewropea u r-Repubblika ta’ San Marino dwar diversi aspetti fil-qasam tal-ġestjoni tal-fruntieri
I. Għan u kamp ta’ applikazzjoni tal-ftehim
1.L-għan tal-ftehim huwa li (i) jipprovdi bażi legali xierqa għan-nuqqas ta’ kontroll tal-fruntieri bejn l-Italja u San Marino; (ii) jistabbilixxi soluzzjonijiet legali relatati mal-konsegwenzi tad-dħul fis-seħħ li jmiss tas-sistemi ta’ informazzjoni l-ġodda tal-UE, inkluż is-Sistema ta’ Dħul/Ħruġ (Entry/Exit System, “EES”) 1 u s-Sistema Ewropea ta’ Informazzjoni u ta’ Awtorizzazzjoni għall-Ivvjaġġar (European Travel Information and Authorisation System, “ETIAS”) 2 , fid-dawl tas-sitwazzjoni ġeografika partikolari ta’ San Marino u r-relazzjoni speċjali tagħha mal-Italja; (iii) ittejjeb is-sigurtà u l-fiduċja fir-rigward tal-permessi ta’ residenza maħruġa minn San Marino lil ċittadini ta’ pajjiżi terzi.
2.Il-kamp ta’ applikazzjoni tal-ftehim jinkludi regoli relatati mal-ġestjoni tal-fruntieri bejn l-Italja u San Marino għall-fini deskritt fil-paragrafu (1) ta’ dan l-anness, kif ukoll is-salvagwardji relatati u meħtieġa.
II. Kontenut tal-ftehim
Prinċipji ġenerali
3.Il-ftehim previst bejn l-Unjoni u San Marino jenħtieġ li jkun mingħajr preġudizzju għall-kwistjonijiet ta’ sovranità u ġurisdizzjoni.
4.Il-ftehim previst bejn l-Unjoni u San Marino jenħtieġ li jiġi nnegozjat b’rispett sħiħ għall-integrità territorjali tal-Istati Membri tagħha kif garantita mill-Artikolu 4(2) tat-Trattat dwar l-Unjoni Ewropea.
5.Il-ftehim jenħtieġ li ma jipprevjenix il-konklużjoni ta’ arranġamenti amministrattivi implimentattivi ta’ natura operazzjonali bejn l-Italja u San Marino dwar kwistjonijiet koperti minn dan il-ftehim sa fejn id-dispożizzjonijiet tagħhom ikunu kompatibbli ma’ dawk tal-ftehim u mal-liġi tal-Unjoni.
Bażi għall-koperazzjoni
6.Ir-rispett u s-salvagwardja tad-drittijiet tal-bniedem u l-libertajiet fundamentali, il-prinċipji demokratiċi, l-istat tad-dritt inkluż l-impenn kontinwu ta’ San Marino li jirrispetta l-Konvenzjoni Ewropea dwar id-Drittijiet tal-Bniedem (KEDB) għandhom jikkostitwixxu elementi essenzjali għar-relazzjoni prevista.
7.Fid-dawl tal-importanza tal-flussi tad-data, jenħtieġ li l-ftehim jafferma l-impenn tal-Partijiet li jiżguraw livell għoli ta’ protezzjoni tad-data personali, u jirrispettaw bis-sħiħ, fuq bażi ta’ allinjament dinamiku, ir-regoli tal-Unjoni dwar il-protezzjoni tad-data personali, inkluż ir-Regolament (UE) 2016/679 dwar il-protezzjoni ta’ persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data u d-Direttiva (UE) 2016/680 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-awtoritajiet kompetenti għall-finijiet tal-prevenzjoni, l-investigazzjoni, is-sejbien jew il-prosekuzzjoni ta’ reati kriminali jew l-eżekuzzjoni ta’ pieni kriminali, u dwar il-moviment liberu ta’ tali data, u l-interpretazzjoni u s-superviżjoni tagħha mill-Bord Ewropew għall-Protezzjoni tad-Data u mill-Qorti tal-Ġustizzja tal-Unjoni Ewropea.
Ċirkolazzjoni ta’ persuni
8.Skont il-ftehim, il-Partijiet jenħtieġ li jiżguraw li l-liġijiet tagħhom jippermettu l-qsim bejn iż-żona Schengen u San Marino mingħajr kontrolli f’punt ta’ qsim tal-fruntiera u l-għoti tal-effett ta’ Schengen kollha ta’ permessi ta’ residenza maħruġa lil ċittadini ta’ pajjiżi terzi minn San Marino. Jenħtieġ li l-ftehim ma jipprevedix il-parteċipazzjoni ta’ San Marino fl-acquis ta’ Schengen jew l-assoċjazzjoni tiegħu mal-implimentazzjoni, l-applikazzjoni u l-iżvilupp tiegħu. Jenħtieġ li l-awtoritajiet tas-Sammariniżi ma jkollhomx aċċess għal bażijiet tad-data riżervati skont id-dritt tal-Unjoni għall-Istati Membri jew għall-pajjiżi assoċjati mal-acquis ta’ Schengen jew ta’ Dublin.
9.Il-ftehim jenħtieġ li jipprevedi li f’każ li ċittadin ta’ pajjiż terz ikollu l-intenzjoni li jasal direttament f’San Marino, San Marino jiżgura li l-ewwel isirilhom verifiki fuq il-fruntiera mwettqa mill-Italja.
10.Jenħtieġ li l-ftehim jipprevedi li ċ-ċittadini ta’ pajjiżi terzi li huma legalment residenti f’San Marino jkollhom aċċess mingħajr viża għaż-żona Schengen sa 90 jum fi kwalunkwe perjodu ta’ 180 jum f’konformità mad-dispożizzjonijiet rilevanti tad-dritt tal-Unjoni u se jkunu eżentati mir-rekwiżiti skont ir-Regolamenti dwar l-EES u l-ETIAS. Jenħtieġ li ċ-ċ-ċittadini ta’ pajjiżi terzi residenti legalment fl-Unjoni jibbenefikaw ukoll minn faċilitazzjoni ekwivalenti f’San Marino.
11.It-tneħħija tal-obbligu legali li jitwettqu kontrolli fil-fruntieri fuq persuni meta jaqsmu l-fruntiera bejn it-territorju ta’ San Marino u ż-żona Schengen teħtieġ, bħala kundizzjoni, salvagwardji komprensivi sabiex jiġu ppreservati s-sigurtà u l-integrità taż-żona Schengen.
12.F’termini ta’ salvagwardji:
[Permessi ta’ residenza]
(a)Jenħtieġ li l-ftehim jipprevedi li l-akkwist u ż-żamma tad-dritt ta’ residenza f’San Marino jkunu kundizzjonali fuq l-eżistenza ta’ konnessjoni reali ma’ San Marino li għandha tiġi stabbilita abbażi tal-preżenza fiżika attwali u regolari fuq perjodu xieraq ta’ żmien u ta’ kriterji oġġettivi u verifikabbli oħra bl-esklużjoni tal-investiment fl-ekonomija u l-proprjetà immobbli ta’ San Marino, jew ta’ pagamenti finanzjarji predeterminati lill-awtoritajiet tas-Sammariniżi.
(b)Jenħtieġ li l-ftehim jipprevedi li San Marino jimpenja ruħu li joħroġ jew iġedded biss permessi ta’ residenza lil ċittadini ta’ pajjiżi terzi fuq l-opinjoni pożittiva tal-Italja maħruġa f’perjodu ta’ żmien stabbilit. L-Italja tkun kompetenti biex toħroġ opinjoni vinkolanti bbażata fuq il-valutazzjoni tas-sigurtà tagħha, b’mod partikolari abbażi ta’ verifiki f’bażijiet tad-data nazzjonali jew tal-Unjoni inklużi miżuri restrittivi tal-UE, qabel il-ħruġ jew it-tiġdid ta’ permess ta’ residenza għal ċittadini ta’ pajjiżi terzi validu għal San Marino wara talba mill-awtoritajiet Sammariniżi għal persuni li jissodisfaw il-kundizzjonijiet rilevanti skont il-liġi applikabbli fit-territorju ta’ San Marino u dment li tiġi ssodisfata l-kundizzjoni prevista fil-punt (a) ta’ dan il-paragrafu. Jenħtieġ li l-ftehim jispeċifika li l-permessi ta’ residenza lil ċittadini ta’ pajjiżi terzi jinħarġu f’format uniformi mmarkat b’mod ċar bħala validu għal San Marino u li jeħtieġ li jiġu nnotifikati lill-Kummissjoni mill-Italja skont l-Artikolu 39 tar-Regolament (UE) 2016/399 tal-Parlament Ewropew u tal-Kunsill tad-9 ta’ Marzu 2016 dwar Kodiċi tal-Unjoni dwar ir-regoli li jirregolaw il-moviment ta’ persuni min-naħa għall-oħra tal-fruntiera. 3
(c)Jenħtieġ li l-ftehim jipprevedi li San Marino jirtira l-permessi ta’ residenza maħruġa lil ċittadini ta’ pajjiżi terzi fuq talba tal-Italja wara l-valutazzjoni tas-sigurtà mwettqa mill-Italja, b’mod partikolari kontrolli f’bażijiet tad-data nazzjonali jew tal-Unjoni, inkluż miżuri restrittivi tal-UE. Jenħtieġ li San Marino jinforma lill-Italja b’dan mingħajr dewmien.
(d)F’każ li San Marino jirtira permess ta’ residenza maħruġ lil ċittadin ta’ pajjiż terz fuq inizjattiva tiegħu stess, jenħtieġ li jinforma lill-Italja b’dan mingħajr dewmien.
(e)Jenħtieġ li l-ftehim jipprevedi li l-ħruġ jew it-tiġdid ta’ permess ta’ residenza għal ċittadin ta’ pajjiż terz validu għal San Marino ma jobbligax lil Stat Membru jirtira twissija għall-finijiet ta’ rifjut ta’ dħul mis-Sistema ta’ Informazzjoni ta’ Schengen.
(f)Jenħtieġ li l-ftehim jipprevedi li l-permessi ta’ residenza diġà maħruġa minn San Marino lil ċittadini ta’ pajjiżi terzi residenti legalment f’San Marino fiż-żmien tad-dħul fis-seħħ ta’ dan il-ftehim jiġu sostitwiti b’permessi ta’ residenza maħruġa skont il-ftehim fi żmien sentejn mid-dħul fis-seħħ tiegħu. Jenħtieġ li l-ftehim jipprevedi li l-permessi ta’ residenza eżistenti maħruġa minn San Marino lil ċittadini ta’ pajjiżi terzi jiġu nnotifikati lill-Italja, li jenħtieġ li twettaq kontrolli fil-bażijiet tad-data rilevanti nazzjonali u tal-Unjoni u tista’ titlob lill-awtoritajiet kompetenti f’San Marino biex jirtiraw dawn il-permessi għal raġunijiet ta’ ordni pubbliku jew ta’ sigurtà interna. F’każ bħal dan San Marino jintrabat li jirtira l-permess ta’ residenza.
[Viżi]
(g)Jenħtieġ li l-ftehim jipprevedi wkoll li f’każ li San Marino joħroġ viżi għal soġġorn qasir jew għal soġġorn twil lil ċittadini ta’ pajjiżi terzi fil-futur, il-ftehim ikun jeħtieġ li jiġi rivedut kif xieraq.
[Ċittadini ta’ pajjiżi terzi mhux residenti]
(h)Jenħtieġ li l-ftehim jipprevedi li, ħlief għar-residenti f’San Marino, iż-żmien li ċittadini ta’ pajjiżi terzi jqattgħu f’San Marino jingħaddu bħala ħin imqatta’ fiż-żona Schengen għall-fini tal-kalkolu tas-soġġorn awtorizzat fiż-żona Schengen.
13.Soġġett għad-dħul fis-seħħ tal-ftehim ma’ San Marino li abbażi tiegħu San Marino japplika d-Direttiva 2004/38/KE tal-Parlament Ewropew u tal-Kunsill 4 , id-dispożizzjonijiet deskritti fil-punt 12 ma għandhomx japplikaw għal ċittadini ta’ pajjiżi terzi li għalihom tapplika d-Direttiva 2004/38/KE.
14.Jenħtieġ li l-ftehim jipprevedi regoli dwar l-iskambju ta’ informazzjoni bejn l-awtoritajiet tal-infurzar tal-liġi ta’ San Marino u l-Italja, inkluż informazzjoni dwar rekords kriminali u informazzjoni dwar persuni u oġġetti mfittxija u neqsin, kemm fuq talba kif ukoll fuq inizjattiva tagħhom stess, fejn dan ikun rilevanti għall-prevenzjoni, l-identifikazzjoni jew l-investigazzjoni tal-kriminalità f’San Marino jew fl-Italja, is-salvagwardji kontra u l-prevenzjoni ta’ theddid għas-sikurezza pubblika.
15.Barra minn hekk, sabiex jiġi żgurat livell għoli ta’ sigurtà u fiduċja, il-ftehim jenħtieġ li jkun fih regoli li jipprevedu l-possibbiltà ta’ kooperazzjoni operazzjonali transfruntiera, bħall-possibbiltà ta’ sorveljanza transfruntiera, “insegwiment transkonfinali” ta’ persuni suspettati kriminali, l-organizzazzjoni ta’ rondi konġunti u operazzjonijiet konġunti oħra. Jenħtieġ li jkun hemm ukoll regoli li jippermettu t-twettiq ta’ kontrolli msaħħa tal-pulizija fiż-żoni qrib il-fruntiera tal-art bejn iż-żona Schengen u t-territorju ta’ San Marino, kemm għal finijiet ta’ infurzar tal-liġi kif ukoll ta’ migrazzjoni.
16.Jenħtieġ li l-ftehim jipprevedi mekkaniżmu li permezz tiegħu żviluppi rilevanti futuri tad-dritt tal-Unjoni, fejn meħtieġ, jiġu riflessi fl-adattamenti għall-ftehim. Jenħtieġ li l-ftehim jinkludi wkoll dispożizzjoni li permezz tagħha l-ftehim jiġi tterminat mill-Unjoni f’każ li l-adattament ma jsirx.
17.Jenħtieġ li l-ftehim jipprevedi mekkaniżmu biex tiġi evalwata l-implimentazzjoni tiegħu.
18.Jenħtieġ li l-ftehim jipprevedi li l-Unjoni tkun tista’ tissospendi unilateralment id-dispożizzjonijiet kollha relatati maċ-ċirkolazzjoni ta’ persuni bejn l-Unjoni u San Marino f’każ ta’ nuqqas ta’ rispett tas-salvagwardji previsti fil-ftehim.
Dispożizzjonijiet istituzzjonali
19.Jenħtieġ li l-ftehim jippermetti r-rieżami perjodiku tiegħu.
20.Jenħtieġ li l-ftehim jiġi stabbilit għal perjodu ta’ żmien indefinit u jista’ jiġi tterminat fuq talba ta’ waħda mill-Partijiet, b’avviż minn qabel lill-Parti l-oħra ta’ tliet xhur. F’każ bħal dan, ikun jeħtieġ li jiġi introdott il-kontroll fuq il-fruntiera bejn l-Italja u San Marino.
21.Sabiex jiġi żgurat il-funzjonament tajjeb tal-ftehim, jenħtieġ li jistabbilixxi arranġamenti effiċjenti u effettivi għall-ġestjoni, is-superviżjoni, l-implimentazzjoni u r-rieżami tiegħu, u għas-soluzzjoni tat-tilwim u l-infurzar, b’rispett sħiħ tal-awtonomija tal-ordnijiet ġuridiċi rispettivi tal-Partijiet.
22.Jenħtieġ li l-ftehim jipprevedi l-possibbiltà ta’ miżuri awtonomi, inkluża s-sospensjoni tal-applikazzjoni tal-ftehim, kif ukoll kwalunkwe ftehim supplimentari, kompletament jew parzjalment fil-każ ta’ ksur ta’ elementi essenzjali.
23.Jenħtieġ li l-ftehim jistabbilixxi korp ta’ tmexxija responsabbli għall-ġestjoni u s-superviżjoni tal-implimentazzjoni u l-operat tal-ftehim, li jiffaċilita r-riżoluzzjoni tat-tilwim. Jenħtieġ li huwa jieħu deċiżjonijiet u jagħmel rakkomandazzjonijiet rigward l-evoluzzjoni tiegħu. Jenħtieġ li l-korp ta’ tmexxija jkun jinkorpora r-rappreżentanti tal-Partijiet f’livell xieraq, li jasal għal deċiżjonijiet b’kunsens reċiproku u li jiltaqa’ skont kemm ikun hemm bżonn biex iwettaq il-kompiti tiegħu. Jekk ikun neċessarju, jenħtieġ li dan il-korp jistabbilixxi wkoll sottokumitati biex jassistuh fit-twettiq tal-kompiti tiegħu.
24.Jenħtieġ li l-ftehim jinkludi arranġamenti xierqa għas-soluzzjoni tat-tilwim minn bord indipendenti ta’ arbitraġġ li d-deċiżjonijiet tiegħu huma vinkolanti fuq il-Partijiet u l-infurzar, inklużi dispożizzjonijiet għas-soluzzjoni rapida tal-problemi.
25.Jenħtieġ li l-ftehim jipprevedi li jekk tilwima tqajjem kwistjoni ta’ interpretazzjoni tad-dritt tal-Unjoni, li tista’ tiġi indikata wkoll minn kwalunkwe Parti, il-bord ta’ arbitraġġ jenħtieġ li jirreferi l-kwistjoni lill-Qorti tal-Ġustizzja tal-Unjoni Ewropea (QĠUE) bħala l-uniku arbitru tad-dritt tal-Unjoni, għal deċiżjoni vinkolanti. Il-Bord ta’ arbitraġġ jenħtieġ li jieħu deċiżjoni dwar it-tilwim f’konformità mad-deċiżjoni mogħtija mill-QĠUE.
26.Jenħtieġ li l-ftehim jipprevedi li meta Parti tonqos milli tieħu l-miżuri meħtieġa biex tikkonforma mas-soluzzjoni vinkolanti ta’ tilwima f’perjodu ta’ żmien raġonevoli, il-Parti l-oħra tkun intitolata titlob kumpens finanzjarju jew tieħu miżuri proporzjonati u temporanji, inkluża s-sospensjoni tal-obbligi tagħha fil-kamp ta’ applikazzjoni tal-ftehim.
27.Jenħtieġ li l-ftehim jipprevedi li f’każ ta’ allegat nuqqas minn Parti waħda li tikkonforma mal-obbligi tagħha skont il-ftehim, il-Parti l-oħra tkun intitolata għal miżuri interim ta’ rimedju, inkluża s-sospensjoni ta’ parti mill-ftehim jew tal-ftehim kollu, li jkunu proporzjonati għall-allegat nuqqas u l-impatt ekonomiku u soċjetali tiegħu, u dment li din il-Parti tibda proċedura għas-soluzzjoni tat-tilwim rigward l-allegat ksur.
28.Il-ftehim, li jenħtieġ li jkun awtentiku bl-istess mod fil-lingwi uffiċjali kollha tal-Unjoni, jenħtieġ li jinkludi klawżola lingwistika għal dak l-għan.