This document is an excerpt from the EUR-Lex website
Document 52023PC0736
Proposal for a COUNCIL DECISION on the conclusion on behalf of the Union, of the amendment of the Agreement between the European Union and the Kingdom of Norway on administrative cooperation, combating fraud and recovery of claims in the field of value added tax
Proposta għal DEĊIŻJONI TAL-KUNSILL dwar il-konklużjoni, f’isem l-Unjoni, tal-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud
Proposta għal DEĊIŻJONI TAL-KUNSILL dwar il-konklużjoni, f’isem l-Unjoni, tal-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud
COM/2023/736 final
IL-KUMMISSJONI EWROPEA
Brussell, 24.11.2023
COM(2023) 736 final
2023/0419(NLE)
Proposta għal
DEĊIŻJONI TAL-KUNSILL
dwar il-konklużjoni, f’isem l-Unjoni, tal-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Din il-proposta tikkonċerna l-konklużjoni ta’ emenda tal-Ftehim bejn l-Unjoni Ewropea u r-Renju tan-Norveġja (“in-Norveġja”) dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud 1 (“il-Ftehim”).
Il-Ftehim daħal fis-seħħ f’Settembru 2018. Il-Ftehim jippermetti li l-Istati Membri tal-UE u n-Norveġja jikkooperaw b’mod simili skont ir-Regolament tal-Kunsill (UE) Nru 904/2010 2 u d-Direttiva tal-Kunsill 2010/24/UE 3 biex jiġġieldu kontra l-frodi tal-VAT, u jassistu lil xulxin biex jirkupraw talbiet fil-qasam tal-VAT.
Madankollu, sadanittant saru diversi emendi għar-Regolament tal-Kunsill (UE) Nru 904/2010 u ġew introdotti għodod ġodda għall-kooperazzjoni amministrattiva, jiġifieri permezz tar-Regolament tal-Kunsill (UE) 2018/1541 emendatorju 4 . L-għodod il-ġodda jinkludu:
- it-tisħiħ tan-network tal-Eurofisc permezz ta’ governanza msaħħa, l-hekk imsejħa azzjonijiet ta’ segwitu (l-ipproċessar u l-analiżi konġunti tad-data) u l-inkjesti amministrattivi mwettqa b’mod konġunt (l-awditi konġunti);
- il-ħidma ma’ korpi oħra tal-infurzar tal-liġi tal-UE (l-Europol, l-OLAF);
- il-kondiviżjoni ta’ informazzjoni ewlenija dwar l-importazzjonijiet u dwar il-vetturi.
Ġiet introdotta wkoll il-possibbiltà li jintużaw mezzi oħra għall-iskambju ta’ informazzjoni mill-formoli standard.
L-Artikolu 41(5) tal-Ftehim jistabbilixxi l-formalitajiet jekk Parti għall-Ftehim tkun tixtieq tirrevedih. Għalhekk, din il-Parti għandha tressaq proposta lill-Kumitat Konġunt, li għandu jagħmel rakkomandazzjonijiet tiegħu dwarha, b’mod partikolari sabiex jinbdew in-negozjati skont ir-regoli għan-negozjati internazzjonali tal-Partijiet.
Waqt it-tieni laqgħa tal-25 ta’ Novembru 2021 tal-Kumitat Konġunt UE-Norveġja, stabbilit skont l-Artikolu 41(1) tal-Ftehim, ir-Renju tan-Norveġja ppreżenta uffiċjalment talba biex jissupplimenta u jemenda l-Ftehim sabiex:
• jitqiesu l-għodod ta’ kooperazzjoni amministrattiva li għadhom kif ġew introdotti (l-użu ta’ mezzi oħra għall-iskambju ta’ informazzjoni apparti l-formoli standard, l-inkjesti amministrattivi mwettqa b’mod konġunt u l-azzjonijiet ta’ segwitu fil-qafas tal-Eurofisc).
• tiġi aġġornata r-referenza għad-Direttiva 95/46/KE mħassra bir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data 5 u b’mod partikolari, l-introduzzjoni ta’ referenza għad-dispożizzjonijiet tal-Ftehim dwar iż-Żona Ekonomika Ewropea (ŻEE) 6 li huma eqwivalenti għar-Regolament (UE) 2016/679.
Sa issa n-Norveġja pparteċipat b’mod attiv fil-biċċa l-kbira tal-oqsma ta’ ħidma tal-Eurofisc. Matul l-2020 u l-2021, in-Norveġja wissiet lill-Istati Membri dwar il-possibbiltà ta’ frodi u ta’ telf potenzjali tal-VAT li jammontaw għal EUR 5 biljuni fil-qasam tal-krediti ta’ karbonju.
L-emenda tal-Ftehim bl-inklużjoni tal-għodod il-ġodda msemmija hawn fuq għandha tippermetti kooperazzjoni aħjar u ssaħħaħ il-ġlieda kontra l-frodi, u b’hekk iġġib valur miżjud għaż-żewġ partijiet għall-Ftehim (in-Norveġja u l-Istati Membri).
Fis-17 ta’ Ġunju 2022 ġiet adottata Deċiżjoni tal-Kunsill li tawtorizza l-ftuħ ta’ negozjati mar-Renju tan-Norveġja għall-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud 7 .
Ir-Rakkomandazzjoni mill-Kumitat Konġunt biex jinbdew in-negozjati, f’konformità mal-Artikolu 41(5) tal-Ftehim (skambju ta’ ittri), ġiet adottata permezz ta’ proċedura bil-miktub f’Ottubru 2022.
Fit-18 ta’ Novembru 2022 sar ċiklu ta’ negozjati u ntlaħaq ftehim fis-27 ta’ Ġunju 2023.
Il-Kunsill ġie infurmat b’mod konsistenti dwar il-progress fil-Grupp ta’ Ħidma dwar Kwistjonijiet ta’ Taxxa u fil-Grupp ta’ Ħidma ta’ Livell Għoli.
Il-Kummissjoni tqis li ntlaħqu l-objettivi stabbiliti mill-Kunsill fid-direttivi ta’ negozjati tiegħu u li t-test negozjat hu aċċettabbli għall-Unjoni.
L-iffirmar, f’isem l-Unjoni, tal-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud sar fi XXX.
•Konsistenza mad-dispożizzjonijiet eżistenti fil-qasam ta’ politika
L-emenda tal-Ftehim ġiet innegozjata f’konformità mad-direttivi ta’ negozjar komprensivi adottati mill-Kunsill fis-17 ta’ Ġunju 2022.
It-tisħiħ tal-kooperazzjoni amministrattiva tal-VAT ma’ pajjiżi terzi hija waħda mill-azzjonijiet imħabbra bil-Komunikazzjoni tal-Kummissjoni Ewropea tal-2020 għal Tassazzjoni Ġusta u Sempliċi li tappoġġa l-irkupru 8 .
Barra minn hekk, ta’ min wieħed jinnota li l-emenda għandha tkopri l-għodod ta’ kooperazzjoni diġà fis-seħħ u applikati mill-Istati Membri abbażi tar-Regolament (UE) Nru 904/2010.
Għalhekk, din l-inizjattiva hija konformi mal-politika attwali tal-Kummissjoni fil-qasam tal-VAT u għandha tarmonizza l-kooperazzjoni tal-Istati Membri man-Norveġja mal-acquis tal-UE.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-proposta attwali lill-Kunsill hija ppreżentata skont l-Artikolu 218(6) tat-Trattat dwar il-Funzjonament tal-Unjoni Ewropea (TFUE).
L-Artikolu 3(2) tat-TFUE jipprevedi li, minbarra fl-oqsma li fihom l-Unjoni għandha kompetenza esklużiva mniżżlin fl-Artikolu 3(1) tat-TFUE, l-Unjoni “għandha wkoll kompetenza esklużiva li tikkonkludi ftehim internazzjonali meta l-konklużjoni tiegħu tkun prevista f’att leġiżlattiv tal-Unjoni, jew tkun meħtieġa sabiex l-Unjoni tkun tista’ teżerċita l-kompetenza interna tagħha, jew sal-punt fejn il-konklużjoni tiegħu tista’ tolqot xi regoli komuni jew tbiddel il-kamp tal-applikazzjoni tagħhom”.
Skont il-ġurisprudenza konsistenti tal-Qorti tal-Ġustizzja, ftehim jista’ jaffettwa regoli komuni jew ibiddel il-kamp ta’ applikazzjoni tagħhom meta jkopri oqsma fejn hemm miżuri ta’ armonizzazzjoni 9 .
Is-suġġett tar-reviżjoni tal-Ftehim, jiġifieri li jiġu koperti l-għodod il-ġodda ta’ kooperazzjoni amministrattiva introdotti mir-Regolament tal-Kunsill (UE) 2018/1541, jaqa’ taħt il-kompetenza esklużiva tal-Unjoni. L-aġġornament tar-referenzi għad-Direttiva 95/46/KE bir-Regolament (UE) 2016/679 jista’ jsir fil-qafas tal-Kumitat Konġunt skont l-Artikolu 41(2)(k) tal-Ftehim. Madankollu, dak l-aġġornament jista’ jiġi inkluż ukoll fil-ftuħ mill-ġdid tan-negozjati dwar it-test tal-Ftehim.
F’konformità mat-Trattati, il-Kummissjoni tagħmel proposta għall-konklużjoni ta’ ftehim tal-Unjoni.
•Proporzjonalità
L-istrumenti ta’ kooperazzjoni li għandhom jiġu inklużi fl-emenda tal-Ftehim se jirrispettaw il-prinċipju tal-proporzjonalità u mhux se jmorru lil hinn minn dak li huwa meħtieġ biex jintlaħaq l-objettiv li jiġi pprovdut qafas komuni għall-kooperazzjoni amministrattiva bejn l-Unjoni Ewropea u r-Renju tan-Norveġja fil-qasam tal-VAT. Din l-emenda tal-Ftehim se tippermetti lill-awtoritajiet tal-Istati Membri responsabbli għall-applikazzjoni tal-leġiżlazzjoni tal-VAT jikkooperaw mal-awtoritajiet tat-taxxa Norveġiżi bl-istess mod li jikkooperaw bejniethom fl-UE u abbażi tal-acquis tal-UE.
3.RIŻULTATI TAL-VALUTAZZJONIJIET TAL-IMPATT
•Valutazzjoni tal-impatt
Skont l-għodda 7 tar-Regolamentazzjoni Aħjar 10 , il-valutazzjoni tal-impatt mhijiex meħtieġa meta l-impatt ma jkunx jista’ jiġi identifikat b’mod ċar ex ante, l-impatti jkunu żgħar jew il-Kummissjoni ftit li xejn ikollha għażla fil-kwistjoni.
L-emenda għandha l-għan li tallinja kemm jista’ jkun mal-leġiżlazzjoni tal-UE fil-qasam tal-kooperazzjoni amministrattiva tal-VAT u l-protezzjoni tad-data mal-ftehim diġà fis-seħħ bejn l-UE u n-Norveġja dwar il-kooperazzjoni tal-VAT. Fil-prattika, l-eżitu tal-proposta prevista mhux se jkun att legali ġdid, iżda biss emenda tal-Ftehim bejn l-UE u n-Norveġja.
•Drittijiet fundamentali
Il-Ftehim previst se jirrispetta l-valuri ewlenin tal-Unjoni Ewropea kif stabbiliti fl-Artikolu 2 tat-Trattat dwar il-Funzjonament tal-Unjoni Ewropea u l-Karta tad-Drittijiet Fundamentali tal-Unjoni Ewropea.
4.IMPLIKAZZJONIJIET BAĠITARJI
Il-proposta ma għandha l-ebda implikazzjoni fuq il-baġit tal-UE.
5.ELEMENTI OĦRA
•Spjegazzjoni fid-dettall tad-dispożizzjonijiet speċifiċi tal-proposta
L-emendi previsti se jipprovdu lill-Istati Membri, sa fejn ikun possibbli u sa fejn ikun meħtieġ, b’għodod ġodda ta’ kooperazzjoni man-Norveġja, simili għal dawk introdotti fir-Regolament 904/2010 bir-Regolament (UE) 2018/1541, immedjatament wara l-iffirmar u l-konklużjoni tal-Ftehim bejn l-UE u n-Norveġja. Barra minn hekk, l-emenda taġġorna r-referenza għad-Direttiva 95/46/KE mħassra b’referenza għar-regoli nazzjonali adottati skont il-punt 5e tal-Anness XI tal-Ftehim ŻEE u r-Regolament (UE) 2016/679 dwar il-protezzjoni tad-data personali. Minbarra dan, ġie ċċarat li l-Kumitat Konġunt ma jiġix ikkonsultat għal tilwim fil-qasam tar-regoli dwar il-protezzjoni tad-data personali msemmija fil-punt 5e tal-Anness XI tal-Ftehim ŻEE.
B’mod partikolari, l-emenda tkopri:
1. Inkjesti amministrattivi mwettqa b’mod konġunt (l-hekk imsejħa Awditi Konġunti):
L-Artikolu 13(2)a għandu jintroduċi l-possibbiltajiet ta’ inkjesti amministrattivi mwettqa b’mod konġunt — kif diġà previst għall-kooperazzjoni fost l-Istati Membri skont l-Artikolu 28 (2a) tar-Regolament (UE) Nru 904/2010. Dan l-Artikolu għandu jippermetti li uffiċjali awtorizzati mill-awtoritajiet kompetenti ta’ Stat wieħed ikunu preżenti waqt inkjesti amministrattivi mwettqa minn uffiċjali ta’ Stat ieħor u li jipparteċipaw f’inkjesti amministrattivi mwettqa b’mod konġunt.
2. Eurofisc – l-azzjonijiet ta’ segwitu (FUA)
L-Artikolu 15(1)a għandu jippermetti l-azzjonijiet ta’ segwitu – kif diġà possibbli fost l-Istati Membri skont l-Artikolu 33(2)(d) tar-Regolament (UE) Nru 904/2010 – fil-qafas tal-Eurofisc bil-parteċipazzjoni tan-Norveġja. Fil-qafas tal-Eurofisc, l-Istati Membri u n-Norveġja jkunu jistgħu jikkoordinaw l-inkjesti amministrattivi tal-Istati parteċipanti dwar il-frodi identifikati mill-uffiċjali ta’ kollegament tal-Eurofisc.
3. Aġġornament tar-referenza legali għad-Direttiva 95/46/KE
Billi r-Regolament Ġenerali dwar il-Protezzjoni tad-Data (UE) 2016/679 ġie traspost b’aġġustament fil-Ftehim ŻEE, l-emendi proposti tal-Artikolu 6 jissostitwixxu r-referenza għad-Direttiva 95/46/KE b’referenza għar-Regolament (UE) 2016/679 u l-punt 5e tal-Anness XI tal-Ftehim ŻEE.
Fl-aħħar nett, minħabba li l-Artikolu 6 propost ikun jinkludi referenza għall-punt 5e tal-Anness XI tal-Ftehim ŻEE, ikun meħtieġ li jiġi emendat l-Artikolu 42 tal-Ftehim sabiex ikun ċar li l-Kumitat Konġunt mhuwiex kompetenti għal tilwim ġenerali dwar il-protezzjoni tad-data.
2023/0419 (NLE)
Proposta għal
DEĊIŻJONI TAL-KUNSILL
dwar il-konklużjoni, f’isem l-Unjoni, tal-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 113 flimkien mal-Artikolu 218(6), it-tieni subparagrafu, il-punt (b), tiegħu,
Wara li kkunsidra l-proposta mill-Kummissjoni Ewropea,
Wara li kkunsidra l-opinjoni tal-Parlament Ewropew ( 11 ),
Billi:
(1)Il-qafas ta’ kooperazzjoni skont il-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud 12 (“il-Ftehim”) diġà wera eżitu pożittiv ħafna;
(2)Għodod ġodda għall-kooperazzjoni ġew introdotti fil-leġiżlazzjoni tal-UE bl-emenda tar-Regolament tal-Kunsill (UE) Nru 904/2010 permezz tar-Regolament tal-Kunsill (UE) 2018/1541 13 ;
(3)Għalhekk il-Ftehim jeħtieġ li jiġi emendat biex l-Istati Membri jingħataw għodod ġodda ta’ kooperazzjoni man-Norveġja;
(4)It-test tal-emenda tal-Ftehim, li jirriżulta min-negozjati, jirrifletti kif xieraq id-direttivi ta’ negozjar maħruġa mill-Kunsill.
(5)Skont id-Deċiżjoni tal-Kunsill (UE) XXXX( 14 ) , l-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud (“il-Ftehim”) ġie ffirmat fi xxxx [soġġett għall-konklużjoni tiegħu f’data aktar tard]. Il-Kontrollur Ewropew għall-Protezzjoni tad-Data ġie kkonsultat f’konformita mal-Artikolu 42(1) tar-Regolament (KE) Nru 2018/1725 tal-Parlament Ewropew u tal-Kunsill 15 .
(6)Jenħtieġ li l-Ftehim jiġi approvat f’isem l-Unjoni Ewropea,
ADOTTA DIN ID-DEĊIŻJONI:
Artikolu 1
L-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud huwa b’dan approvat f’isem l-Unjoni.
It-test tal-emenda tal-Ftehim huwa mehmuż ma’ din id-Deċiżjoni.
Artikolu 2
Il-President tal-Kunsill għandu jinnomina l-persuna awtorizzata biex tipproċedi, f’isem l-Unjoni Ewropea, biex tibgħat notifika, kif previst fl-Artikolu 44(4) tal-Ftehim, sabiex jiġi espress il-kunsens tal-Unjoni Ewropea li tintrabat bil-Ftehim.
Artikolu 3
Din id-Deċiżjoni għandha tidħol fis-seħħ fit-tielet jum wara dak tal-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 24.11.2023
COM(2023) 736 final
ANNESS
tal-
Proposta għal Deċiżjoni tal-Kunsill
dwar il-konklużjoni, f’isem l-Unjoni, tal-emenda tal-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud
L-EMENDA TAL-FTEHIM BEJN L-UNJONI EWROPEA U R-RENJU TAN-NORVEĠJA DWAR IL-KOOPERAZZJONI AMMINISTRATTIVA, IL-ĠLIEDA KONTRA L-FRODI U L-IRKUPRU TAT-TALBIET FIL-QASAM TAT-TAXXA FUQ IL-VALUR MIŻJUD
L-UNJONI EWROPEA, minn hawn ’il quddiem imsejħa “l-Unjoni”,
kif ukoll
IR-RENJU TAN-NORVEĠJA, minn hawn ’il quddiem imsejjaħ “in-Norveġja”,
minn hawn ’il quddiem “il-Partijiet”,
FILWAQT LI JIRRIKONOXXU li l-qafas ta’ kooperazzjoni skont il-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud 1 (“il-Ftehim”) diġà wera eżitu pożittiv ħafna,
BILLI għodod ġodda għall-kooperazzjoni ġew introdotti fil-leġiżlazzjoni tal-UE bl-emenda tar-Regolament tal-Kunsill (UE) Nru 904/2010 permezz tar-Regolament tal-Kunsill (UE) 2018/1541 2 ;
FILWAQT LI JIRRIKONOXXU li l-Istati Membri u n-Norveġja jibbenefikaw minn estensjoni tal-għodod ta’ kooperazzjoni li jippermettu kooperazzjoni aktar effettiva, b’mod partikolari fir-rigward tal-inkjesti amministrattivi mwettqa b’mod konġunt u l-azzjonijiet ta’ segwitu tal-Eurofisc,
BILLI sabiex jiġi żgurat il-monitoraġġ effettiv u effiċjenti tal-VAT fuq it-tranżazzjonijiet transfruntiera, il-possibilità ta’ inkjesti amministrattivi mwettqa b’mod konġunt, li jippermettu lill-uffiċjali minn żewġ stati jew aktar jiffurmaw tim wieħed u jieħdu sehem b’mod attiv f’inkjesta amministrattiva mwettqa b’mod konġunt se tgħin biex jiġi żgurat infurzar xieraq tal-VAT u jiġi evitat xogħol doppju u piż amministrattiv kemm tal-awtoritajiet tat-taxxa kif ukoll tan-negozji,
BILLI sabiex jiġu miġġielda l-aktar frodi transfruntiera serji, jeħtieġ li tissaħħaħ il-ħidma tal-uffiċjali ta’ kollegament tal-Eurofisc biex jaċċessaw, jiskambjaw, jipproċessaw u janalizzaw l-informazzjoni kollha meħtieġa malajr u jikkoordinaw kwalunkwe azzjoni ta’ segwitu,
BILLI r-referenzi legali għad-Direttiva 95/46/KE 3 tal-Parlament Ewropew u tal-Kunsill dwar il-protezzjoni ta’ individwi fir-rigward tal-ipproċessar ta’ data personali u dwar il-moviment liberu ta’ dik id-data jenħtieġ li jiġu aġġornati bir-referenzi meħtieġa għar-Regolament (UE) Nru 2016/679 4 tal-Parlament Ewropew u tal-Kunsill dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data,
FILWAQT LI JINNOTAW li r-Regolament (UE) 2016/679 tal-Parlament Ewropew u tal-Kunsill dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data ġie inkorporat b’adattamenti fl-Anness XI tal-Ftehim ŻEE, huwa soġġett għall-qafas istituzzjonali tal-Ftehim ŻEE 5 u n-Norveġja aġġustat il-leġiżlazzjoni tagħha biex tikkonforma ma’ dawk id-dispożizzjonijiet tal-anqas fl-oqsma koperti mill-kamp ta’ applikazzjoni wiesa’ tal-Ftehim ŻEE,
FILWAQT LI JINNOTAW li r-Regolament (KE) Nru 2018/1725 6 tal-Parlament Ewropew u tal-Kunsill japplika għall-ipproċessar ta’ data personali mill-istituzzjonijiet u l-korpi tal-Unjoni għall-fini ta’ dan il-Ftehim
QABLU KIF ĠEJ:
ARTIKOLU 1
Jenħtieġ li jiddaħħlu l-emendi li ġejjin għall-Ftehim bejn l-Unjoni Ewropea u r-Renju tan-Norveġja dwar il-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tat-taxxa fuq il-valur miżjud:
(1) Il-5 premessa għall-preambolu huwa sostitwit b’dan li ġej:
KONXJI li l-istati jenħtieġ japplikaw regoli dwar il-kunfidenzjalità skont il-liġi nazzjonali u l-protezzjoni tad-data personali skont il-punt 5e tal-Anness XI tal-Ftehim ŻEE,
(2) L-Artikolu 6 huwa emendat kif ġej:
(a)il-paragrafu 1 huwa sostitwit b’dan li ġej:
1. Kwalunkwe informazzjoni miksuba minn Stat skont dan il-Ftehim għandha tiġi ttrattata bħala kunfidenzjali u protetta bl-istess mod bħall-informazzjoni miksuba skont il-liġi domestika tiegħu għall-protezzjoni tad-data personali, f’konformità mal-punt 5e tal-Anness XI tal-Ftehim ŻEE.
(b) il-paragrafu 2 huwa sostitwit b’dan li ġej:
2. Tali informazzjoni tista’ tiġi żvelata lill-persuni jew lill-awtoritajiet involuti fl-applikazzjoni tal-liġijiet tal-VAT (fosthom il-qrati u l-korpi amministrattivi jew il-korpi ta’ sorveljanza) tal-istati kkonċernati mill-applikazzjoni tal-liġijiet tal-VAT u għall-fini li ssir valutazzjoni korretta tal-VAT jew li jsir il-ġbir jew il-kontroll amministrattiv tat-taxxa għall-fini li tiġi stabbilita l-valutazzjoni, tal-VAT kif ukoll għall-fini li jiġi applikat l-infurzar b’rabta mat-talbiet tal-VAT, inkluż miżuri ta’ rkupru jew ta’ prekawzjoni.
(c) il-paragrafu 6 huwa sostitwit b’dan li ġej:
6. L-informazzjoni li stat jagħti lil stat ieħor tista’ tintbagħat minn dan l-istat tal-aħħar lil stat ieħor, soġġett għall-kunsens minn qabel mill-awtorità kompetenti tal-istat minn fejn tkun oriġinat l-informazzjoni. L-istat tal-oriġini tal-informazzjoni jista’ jopponi t-tali kondiviżjoni tal-informazzjoni fi żmien għaxart ijiem tax-xogħol minn meta jirċievi t-talba tal-istat li jkun jixtieq jikkondividi dik l-informazzjoni.
(d) jiżdied il-paragrafu 6.a:
6.a Kull ħażna, ipproċessar jew skambju ta’ informazzjoni msemmija f’dan il-Ftehim huma soġġetti għar-regoli nazzjonali adottati skont il-punt 5e tal-Anness XI tal-Ftehim ŻEE kif ukoll għar-rekwiżiti speċifiċi għall-ipproċessar ta’ data personali stabbiliti f’dan il-Ftehim. Madankollu, għall-fini tal-applikazzjoni korretta ta’ dan il-Ftehim, l-Istati Membri jistgħu jirrestrinġu l-kamp ta’ applikazzjoni tal-obbligazzjonijiet u d-drittijiet previsti fl-Artikoli 12 sa 15, 17, 21 u 22 tar-Regolament (UE) 2016/679. Tali restrizzjonijiet għandhom ikunu limitati għal dak li huwa strettament meħtieġ biex jiġu ssalvagwardjati l-interessi msemmija fid-dispożizzjonijiet tal-Ftehim ŻEE ekwivalenti għall-punt (e) tal-Artikolu 23(1) tar-Regolament (UE) 2016/679, b’mod partikolari li:
(a) l-awtoritajiet kompetenti tal-istati jkunu jistgħu jissodisfaw il-kompiti tagħhom b’mod tajjeb għall-finijiet ta’ dan il-Ftehim; jew
(b) jiġi evitat li l-inkjesti, l-analiżi, l-investigazzjonijiet jew il-proċeduri uffiċjali jew legali jiġu ostakolati għall-finijiet ta’ dan il-Ftehim u jkun żgurat li l-prevenzjoni, l-investigazzjoni u l-individwazzjoni tal-evażjoni tat-taxxa u tal-frodi tat-taxxa ma jiġux ipperikolati.
L-ipproċessar u l-ħażna ta’ informazzjoni msemmijin f’dan il-Ftehim għandhom jitwettqu biss għall-finijiet imsemmijin fl-Artikolu 1ta’ dan il-Ftehim u l-informazzjoni m’għandhiex tiġi pproċessata ulterjorment f’mod li huwa inkompatibbli ma’ dawk il-finijiet.
L-ipproċessar tad-data personali abbażi ta’ din id-Direttiva għal kwalunkwe fini ieħor bħal finijiet kummerċjali, għandu jkun projbit.
(e) il-paragrafu 7 huwa sostitwit b’dan li ġej:
7. L-istati jistgħu jibagħtu l-informazzzjoni li jiksbu skont dan il-Ftehim lil pajjiżi terzi bil-kundizzjonijiet li ġejjin:
(a)it-trasferiment ta’ data personali huwa soġġett għad-dispożizzjonijiet tal-Ftehim ŻEE ekwivalenti għar-Regolament (UE) 2016/679;
(b)l-awtorità kompetenti li tkun bagħtet l-informazzjoni oriġinarjament tkun qablet mat-tali trażmissjoni;
(c)it-trażmissjoni hija permessa permezz ta’ arranġamenti ta’ assistenza legalment vinkolanti u infurzabbli bejn l-istat li jittrażmetti l-informazzjoni u dak il-pajjiż terz partikolari.
(f) il-paragrafu 9 huwa sostitwit b’dan li ġej:
9. Kull stat għandu minnufih jinnotifika lill-istati l-oħra kkonċernati dwar kwalunkwe ksur tal-kunfidenzjalità, kwalunkwe ksur ta’ data personali u kwalunkwe sanzjoni u azzjoni ta’ rimedju konsegwentement imposta.
(g) il-paragrafu 10 huwa sostitwit b’dan li ġej:
10. Persuni debitament akkreditati mill-Awtorità ta’ Akkreditazzjoni ta’ Sigurtà tal-Kummissjoni Ewropea jista’ jkollhom aċċess għal din l-informazzjoni biss sa fejn ikun meħtieġ għall-kura, għall-manutenzjoni u għall-iżvilupp tas-sistemi elettroniċi ospitati mill-Kummissjoni u użati mill-istati biex jimplimentaw dan il-Ftehim. Kwalunkwe aċċess għal data personali għandu jiġi ttrattat f’konformità mar-Regolament (UE) 2018/1725.
(3) L-Artikolu 13 huwa emendat kif ġej:
(a) il-paragrafu 1 huwa sostitwit b’dan li ġej:
1. Bi ftehim bejn l-awtorità rikjedenti u l-awtorità rikjesta, u f’konformità mal-arranġamenti stabbiliti minn din tal-aħħar, uffiċjali awtorizzati mill-awtorità rikjedenti jistgħu, bil-għan li jiskambjaw l-informazzjoni msemmija fl-Artikolu 2(1)a, ikunu preżenti fl-uffiċċji tal-awtoritajiet amministrattivi tal-Istat rikjest, jew kwalunkwe post ieħor, fejn dawk l-awtoritajiet iwettqu l-ħidma tagħhom. Meta l-informazzjoni mitluba tkun tinsab fid-dokumentazzjoni li għaliha jkollhom aċċess l-uffiċjali tal-awtorità rikjesta, l-uffiċjali tal-awtorità rikjedenti għandhom jingħataw kopji tagħha.
(b) il-paragrafu 2 huwa sostitwit b’dan li ġej:
2. Bi ftehim bejn l-awtorità rikjedenti u l-awtorità rikjesta, u f’konformità mal-arranġamenti stabbiliti minn din tal-aħħar, l-uffiċjali awtorizzati mill-awtorità rikjedenti jistgħu, bil-għan li jiskambjaw l-informazzjoni msemmija fl-Artikolu 2(1)a, ikunu preżenti waqt l-inkjesti amministrattivi mwettqa fit-territorju tal-Istat rikjest. Tali inkjesti amministrattivi għandhom jitwettqu esklużivament mill-uffiċjali tal-awtorità rikjesta. L-uffiċjali tal-awtorità rikjedenti ma għandhomx jeżerċitaw is-setgħat ta’ spezzjoni mogħtija lill-uffiċjali tal-awtorità rikjesta. Huma jistgħu, madankollu, ikollhom aċċess għall-istess bini u dokumenti bħal dawn tal-aħħar, permezz tal-intermedjazzjoni tal-uffiċjali tal-awtorità rikjesta u għall-iskop waħdieni li titwettaq l-inkjesta amministrattiva.
(c) jiżdied il-paragrafu 2.a:
2a. Bi ftehim bejn l-awtoritajiet rikjedenti u l-awtorità rikjesta, u f’konformità mal-arranġamenti stabbiliti minn din tal-aħħar, uffiċjali awtorizzati mill-awtoritajiet rikjedenti, bil-għan li jiġbru u jiskambjaw l-informazzjoni msemmija fl-Artikolu 2(1)a, jistgħu jieħdu sehem fl-inkjesti amministrattivi mwettqa fit-territorju tal-istat rikjest. Tali inkjesti amministrattivi għandhom jitwettqu b’mod konġunt mill-uffiċjali tal-awtoritajiet rikjedenti u tal-awtoritajiet rikjesti u għandhom jitwettqu taħt id-direzzjoni u skont il-leġiżlazzjoni tal-istat rikjest.
L-uffiċjali tal-awtoritajiet rikjedenti għandu jkollhom aċċess għall-istess bini u dokumenti bħall-uffiċjali tal-awtorità rikjesta u, sa fejn ikun permess mil-leġiżlazzjoni tal-istat rikjest għall-uffiċjali tagħha, għandhom ikunu jistgħu jintervistaw persuni taxxabbli.
Meta jkun permess mil-leġiżlazzjoni tal-istat rikjest, l-uffiċjali tal-istati rikjedenti għandhom jeżerċitaw l-istess setgħat ta’ spezzjoni bħal dawk mogħtija lill-uffiċjali tal-istat rikjest. Is-setgħat ta’ spezzjoni tal-uffiċjali tal-awtoritajiet rikjedenti għandhom jiġu eżerċitati għall-fini unika li titwettaq l-inkjesta amministrattiva.
Bi ftehim bejn l-awtoritajiet rikjedenti u l-awtorità rikjesta, u f’konformità mal-arranġamenti stabbiliti minn din tal-aħħar, l-awtoritajiet parteċipanti jistgħu jabbozzaw rapport ta’ inkjesta komuni.
(d) il-paragrafu 3 huwa sostitwit b’dan li ġej:
3. L-uffiċjali tal-awtorità rikjedenti preżenti fi Stat ieħor f’konformità mal-paragrafi 1, 2 u 2a jridu f’kull waqt ikunu jistgħu juru l-awtorizzazzjoni bil-miktub li tiddikjara l-identità u l-kariga uffiċjali tagħhom.
(4) L-Artikolu 15 huwa emendat kif ġej:
(a) il-paragrafu 1 huwa sostitwit b’dan li ġej:
1. Sabiex tiġi promossa u ffaċilitata l-kooperazzjoni multilaterali fil-ġlieda kontra l-frodi tal-VAT u għall-koordinazzjoni ta’ kwalunkwe azzjoni ta’ segwitu, in-Norveġja għandha tiġi mistiedna tieħu sehem fin-netwerk imsejjaħ “Eurofisc”, previst fil-Kapitolu X tar-Regolament tal-Kunsill (UE) Nru 904/2010 dwar il-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud, bil-kundizzjonijiet stabbiliti f’dan il-Kapitolu.
(b) jiżdied il-paragrafu 1a:
1a. Fil-qafas tal-Eurofisc, l-istati għandhom jikkoordinaw l-inkjesti amministrattivi tal-istati parteċipanti dwar frodi identifikati mill-uffiċjali ta’ kollegament tal-Eurofisc kif imsemmi fl-Artikolu 16(1) mingħajr is-setgħa li jitolbu lill-istati jwettqu inkjesti amministrattivi.
(5) L-Artikolu 42 huwa sostitwit b’dan li ġej:
Soluzzjoni tat-tilwim
Kwalunkwe tilwima bejn il-Partijiet relatata mal-interpretazzjoni jew l-applikazzjoni ta’ dan il-Ftehim, bl-eċċezzjoni ta’ tilwim relatat mal-applikazzjoni tal-punt 5e tal-Anness XI tal-Ftehim ŻEE, għandha tiġi solvuta permezz ta’ konsultazzjonijiet fi ħdan il-Kumitat Konġunt. Il-Partijiet għandhom jibagħtu l-informazzjoni rilevanti kollha li hemm bżonn biex il-kwistjoni tiġi eżaminata bir-reqqa lill-Kumitat Konġunt bil-ħsieb li jissolva t-tilwim.
ARTIKOLU 2
Dħul fis-seħħ
Dan il-Ftehim għandu jidħol fis-seħħ fl-ewwel jum tat-tieni xahar ta’ wara d-data meta l-Partijiet ikunu għarrfu lil xulxin li lestew il-proċeduri legali interni tagħhom imsemmijin fil-paragrafu 1 tal-Ftehim.
https://eur-lex.europa.eu/resource.html?uri=cellar:ff32b4af-c53e-11ec-b6f4-01aa75ed71a1.0002.02/DOC_1&format=PDF
Ir-Regolament tal-Kunsill (UE) 2018/1541 tat-2 ta’ Ottubru 2018 li jemenda r-Regolamenti (UE) Nru 904/2010 u (UE) 2017/2454 dwar il-kooperazzjoni amministrattiva fil-qasam tat-taxxa fuq il-valur miżjud (ĠU L 259/1, 16.10.2018, p. 1–11)
Id-Direttiva tal-Parlament Ewropew u tal-Kunsill 95/46/KE tal-24 ta’ Ottubru, 1995 dwar il-protezzjoni ta’ individwi fir-rigward tal-ipproċessar ta’ data personali u dwar il-moviment liberu ta’ dik id-data (ĠU L 281, 23.11.2016, p. 31–50)
Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (Test b’rilevanza għaż-ŻEE) (ĠU L 119, 4.5.2016, p. 1–88)
https://www.efta.int/eea/eea-agreement
Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (Test b’rilevanza għaż-ŻEE) (ĠU L 295, 21.11.2018, p. 39–98)