This document is an excerpt from the EUR-Lex website
Document 52023PC0487
Proposal for a COUNCIL DECISION on the position to be taken on behalf of the European Union in the Joint Committee established by the Agreement between the European Union and Iceland on the protection of geographical indications for agricultural products and foodstuffs as regards the adoption of its rules of procedure
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kumitat Konġunt stabbilit bil-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel fir-rigward tal-adozzjoni tar-regoli ta’ proċedura tiegħu
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kumitat Konġunt stabbilit bil-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel fir-rigward tal-adozzjoni tar-regoli ta’ proċedura tiegħu
COM/2023/487 final
IL-KUMMISSJONI EWROPEA
Brussell, 14.8.2023
COM(2023) 487 final
2023/0299(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat Konġunt stabbilit bil-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel fir-rigward tal-adozzjoni tar-regoli ta’ proċedura tiegħu
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-Kumitat Konġunt stabbilit mill-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel b’rabta mal-adozzjoni prevista tar-regoli ta’ proċedura tal-Kumitat Konġunt.
2.Kuntest tal-proposta
2.1.Il-Ftehim UE-Iżlanda dwar il-protezzjoni tal-indikazzjonijiet ġeografiċi
Il-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel (“il-Ftehim”) japplika għar-rikonoxximent u l-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel għajr l-inbejjed, il-prodotti tal-inbid aromatizzat u x-xorb spirituż li joriġinaw mit-territorji tal-Partijiet. Il-kompitu ġenerali tal-Kumitat Konġunt huwa li jimmonitorja l-iżviluppi relatati mal-Ftehim u li jintensifika l-kooperazzjoni u d-djalogu dwar l-indikazzjonijiet ġeografiċi. Skont l-Artikolu 10(3) tal-Ftehim, il-Kumitat Konġunt għandu wkoll jieħu ħsieb li dan il-Ftehim jiffunzjona b’mod xieraq u jista’ jikkunsidra kwalunkwe kwistjoni relatata mal-implimentazzjoni u mat-tħaddim tiegħu. B’mod partikolari, huwa għandu jkun responsabbli għall-emendar tal-Annessi I u II tal-Ftehim u għall-iskambju ta’ informazzjoni dwar l-iżviluppi leġiżlattivi u tal-politika, kif ukoll kwalunkwe kwistjoni oħra ta’ interess reċiproku fil-qasam tal-indikazzjonijiet ġeografiċi, u għall-iskambju ta’ informazzjoni dwar l-indikazzjonijiet ġeografiċi bl-għan li tiġi kkunsidrata l-protezzjoni tagħhom f’konformità mal-Ftehim.
Il-Ftehim ġie ffirmat fit-23 ta’ Marzu 2017 u daħal fis-seħħ fl-1 ta’ Mejju 2018 1 .
2.2.Kumitat Konġunt
L-Artikolu 10(1) tal-Ftehim jistabbilixxi Kumitat Konġunt li jikkonsisti minn rappreżentanti tal-Unjoni Ewropea u tal-Iżlanda.
L-Artikolu 10(2) u (3) tal-Ftehim jiddetermina l-funzjonament u r-responsabbiltajiet tal-Kumitat Konġunt.
Il-kompitu ġenerali tal-Kumitat Konġunt huwa li jimmonitorja l-iżviluppi relatati mal-Ftehim u li jintensifika l-kooperazzjoni u d-djalogu dwar l-indikazzjonijiet ġeografiċi. Skont l-Artikolu 10(3) tal-Ftehim, il-Kumitat Konġunt għandu wkoll jieħu ħsieb li dan il-Ftehim jiffunzjona b’mod xieraq u jista’ jikkunsidra kwalunkwe kwistjoni relatata mal-implimentazzjoni u mat-tħaddim tiegħu. B’mod partikolari, huwa għandu jkun responsabbli għall-emendar tal-Annessi I u II tal-Ftehim u għall-iskambju ta’ informazzjoni dwar l-iżviluppi leġiżlattivi u tal-politika, kif ukoll kwalunkwe kwistjoni oħra ta’ interess reċiproku fil-qasam tal-indikazzjonijiet ġeografiċi, u għall-iskambju ta’ informazzjoni dwar l-indikazzjonijiet ġeografiċi bl-għan li tiġi kkunsidrata l-protezzjoni tagħhom f’konformità mal-Ftehim.
Skont l-Artikolu 10(2) tal-Ftehim, il-Kumitat Konġunt għandu jadotta d-deċiżjonijiet tiegħu b’kunsens.
2.3.Att previst tal-Kumitat Konġunt
Skont il-Ftehim, il-Kumitat Konġunt għandu jiddetermina r-regoli ta’ proċedura tiegħu stess.
L-għan tal-att previst huwa li jadotta, f’konformità mal-Artikolu 10(2) tal-Ftehim, ir-regoli ta’ proċedura li jirregolaw il-funzjonament tal-Kumitat Konġunt u, b’mod partikolari, li jiddefinixxi fid-dettall il-proċess tat-teħid ta’ deċiżjonijiet tiegħu.
3.Pożizzjoni li għandha tittieħed f’isem l-Unjoni
Jenħtieġ li l-pożizzjoni li għandha tiġi adottata f’isem l-Unjoni tkun tippermetti l-adozzjoni tar-regoli ta’ proċedura tal-Kumitat Konġunt dwar l-Indikazzjonijiet Ġeografiċi.
4.Bażi legali
4.1.Bażi legali proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett tal-“atti li jkollhom effetti legali” jinkludi l-atti li jkollhom effetti legali skont ir-regoli tad-dritt internazzjonali li jirregola s-sede inkwistjoni. Jinkludi wkoll strumenti li ma jkollhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-UE” 2 .
4.1.2.Applikazzjoni għal dan il-każ
Il-Kumitat Konġunt huwa sede stabbilita bi ftehim, jiġifieri bil-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel.
L-att li l-Kumitat Konġunt huwa mitlub jadotta jikkostitwixxi att b’effetti legali. L-att previst se jkun vinkolanti skont id-dritt internazzjonali f’konformità mal-Artikolu 10 tal-Ftehim.
L-att previst la jissupplimenta u lanqas jemenda l-qafas istituzzjonali tal-Ftehim.
Għalhekk, il-bażi legali proċedurali għad-deċiżjoni proposta hija l-Artikolu 218(9) tat-TFUE.
4.2.Bażi legali sostantiva
4.2.1.Prinċipji
Il-bażi legali sostantiva għal deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li fir-rigward tiegħu tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawk l-għanijiet jew il-komponenti jkun jista’ jiġi identifikat bħala dak ewlieni filwaqt li l-ieħor ikun sempliċement inċidentali, id-deċiżjoni skont l-Artikolu 218(9) tat-TFUE trid tissejjes fuq bażi legali sostantiva unika, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għal dan il-każ
L-objettiv ewlieni u l-kontenut tal-att previst huma relatati mal-politika kummerċjali komuni.
Għalhekk, il-bażi legali sostantiva tad-deċiżjoni proposta hija l-Artikolu 207 tat-TFUE.
4.3.Konklużjoni
Jenħtieġ li l-bażi legali tad-deċiżjoni proposta tkun l-Artikolu 207 tat-TFUE, flimkien mal-Artikolu 218(9) tat-TFUE.
5.Pubblikazzjoni tal-att previst
Mhux applikabbli.
2023/0299 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat Konġunt stabbilit bil-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel fir-rigward tal-adozzjoni tar-regoli ta’ proċedura tiegħu
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), l-ewwel subparagrafu, flimkien mal-Artikolu 218(9) tiegħu,
Wara li kkunsidra il-proposta tal-Kummissjoni Ewropea,
Billi:
(1)Il-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel 3 (“il-Ftehim”) ġie konkluż mill-Unjoni bid-Deċiżjoni tal-Kunsill (UE) 2017/1912 4 u daħal fis-seħħ fl-1 ta’ Mejju 2018.
(2)L-Artikolu 10(1) tal-Ftehim jistabbilixxi Kumitat Konġunt.
(3)Skont l-Artikolu 10(2) tal-Ftehim, il-Kunsill Konġunt għandu jistabbilixxi r-regoli ta’ proċedura tiegħu stess.
(4)Huwa xieraq li tiġi stabbilita l-pożizzjoni li għandha tittieħed f’isem l-Unjoni fil-Kumitat Konġunt, fir-rigward tar-regoli ta’ proċedura tiegħu, peress li dawn ir-regoli se jkunu vinkolanti għall-Unjoni.
(5)Il-pożizzjoni tal-Unjoni fi ħdan il-Kumitat Konġunt għandha tkun ibbażata fuq l-abbozz tar-regoli ta’ proċedura mehmuż ma’ din id-Deċiżjoni,
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-Kumitat Konġunt fir-rigward tal-adozzjoni tar-regoli ta’ proċedura tiegħu għandha tkun ibbażata fuq l-abbozz ta’ deċiżjoni ta’ dak il-Kumitat Konġunt li hu mehmuż ma’ din id-Deċiżjoni.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 14.8.2023
COM(2023) 487 final
ANNESS
tal-
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat Konġunt stabbilit bil-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel fir-rigward tal-adozzjoni tar-regoli ta’ proċedura tiegħu
ANNESS
DEĊIŻJONI NRU 1 TAL-KUMITAT KONĠUNT
ta’ JJ XX 2023
dwar l-adozzjoni tar-regoli ta’ proċedura tiegħu
IL-KUMITAT KONĠUNT,
Wara li kkunsidra l-Ftehim bejn l-Unjoni Ewropea u l-Iżlanda dwar il-protezzjoni tal-indikazzjonijiet ġeografiċi għall-prodotti agrikoli u l-oġġetti tal-ikel 1 (minn hawn ’il quddiem imsejjaħ “il-Ftehim”), u b’mod partikolari l-Artikolu 10 tiegħu,
Billi:
(1) Skont l-Artikolu 10(2) tal-Ftehim, il-Kumitat Konġunt għandu jiddetermina r-regoli ta’ proċedura tiegħu.
(2) Ir-regoli ta’ proċedura tal-Kumitat Konġunt tal-Ftehim jenħtieġ li jiġu stabbiliti,
ADOTTA DIN ID-DEĊIŻJONI:
Artikolu 1
Ir-regoli ta’ proċedura tal-Kumitat Konġunt, kif stipulati fl-Anness, huma b’dan adottati.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi …,
Għall-Kumitat Konġunt
|
[TITOLU] Il-Ministeru tal-Industriji u l-Innovazzjoni tal-Iżlanda Kopresident tal-Kumitat Konġunt |
Kap tal-Unità Id-Direttorat Ġenerali għall-Agrikoltura u l-Iżvilupp Rurali tal-Kummissjoni Ewropea Kopresident tal-Kumitat Konġunt |
ANNESS
REGOLI TA’ PROĊEDURA TAL-KUMITAT KONĠUNT
Artikolu 1
Kapijiet tad-Delegazzjoni
(1)L-Unjoni Ewropea u l-Iżlanda (“il-Partijiet”), għandhom jaħtru Kap tad-Delegazzjoni kull wieħed li għandu jkun il-persuna ta’ kuntatt għall-kwistjonijiet kollha marbutin mal-Kumitat.
(2)Kull Kap tad-Delegazzjoni jista’ jiddelega l-funzjonijiet kollha tiegħu ta’ Kap tad-Delegazzjoni jew xi wħud minnhom lil deputat innominat, u f’dan il-każ, kull referenza li ssir lill-Kap tad-Delegazzjoni minn hawn ’il quddiem tkun tapplika bl-istess mod għad-deputat innominat.
Artikolu 2
President
Il-kariga ta’ President tal-Kumitat għandha talterna minn idejn il-Kap tad-Delegazzjoni ta’ waħda mill-Partijiet għal idejn il-Kap tad-Delegazzjoni tal-Parti l-oħra, għal perjodu ta’ sena kalendarja.
Artikolu 3
Laqgħat
(1)Ħlief fejn jiġi maqbul mod ieħor mill-Partijiet, il-Kumitat għandu jiltaqa’ b’mod alternat fl-Unjoni u fl-Iżlanda fuq it-talba ta’ waħda mill-Partijiet, mhux aktar tard minn 90 jum mit-talba.
(2)Kull laqgħa tal-Kumitat għandha tissejjaħ mill-President f’data u f’post li jaqblu fuqhom il-partijiet. L-avviż tas-sejħa għal-laqgħa għandu jinħareġ mill-President mhux aktar tard minn 28 jum kalendarju qabel il-bidu tal-laqgħa, sakemm il-Partijiet ma jaqblux mod ieħor.
(3)Fejn ikun hemm qbil bejn iż-żewġ partijiet, il-laqgħat tal-Kumitat Konġunt jistgħu jattendu għalihom esperti li huma kapaċi jfornu l-informazzjoni speċifika mitluba.
(4)Sakemm, b’mod konġunt, ma jiġix maqbul mod ieħor, il-laqgħat tal-Kumitat ma għandhomx ikunu pubbliċi.
(5)Bħala eċċezzjoni, il-laqgħat tal-Kumitat jistgħu jsiru permezz ta’ kwalunkwe mezz teknoloġiku li l-Partijiet jaqblu fuqu, inkluża l-vidjokonferenza.
Artikolu 4
Delegazzjonijiet
Qabel kull laqgħa, kull Parti għandha tinforma lill-Parti l-oħra, permezz tas-Segretarjat tal-Kumitat previst fl-Artikolu 5, dwar il-kompożizzjoni maħsuba tad-delegazzjoni tagħha.
Artikolu 5
Segretarjat
Għandu jinħatar rappreżentant tal-Kummissjoni Ewropea u rappreżentant tal-Iżlanda mill-Kap tad-Delegazzjoni rispettiv biex jaġixxu b’mod konġunt bħala Segretarji tal-Kumitat u għandhom iwettqu kompiti segretarjali b’mod konġunt u fi spirtu ta’ fiduċja reċiproka u ta’ kooperazzjoni.
Artikolu 6
Korrispondenza
(1)Il-korrispondenza indirizzata lill-Kumitat għandha tintbagħat lis-Segretarju ta’ waħda mill-Partijiet, li min-naħa tiegħu għandu jgħarraf lis-Segretarju l-ieħor.
(2)Is-Segretarjat għandu jiżgura li l-korrispondenza indirizzata lill-Kumitat tiġi mgħoddija lill-President u tiġi ċċirkolata, fejn xieraq.
(3)Il-korrispondenza bejn il-Partijiet tista’ ssir permezz ta’ kwalunkwe mezz bil-miktub, inkluża l-posta elettronika.
Artikolu 7
Aġendi tal-laqgħat
(1)Għal kull laqgħa għandha titfassal aġenda proviżorja mis-Segretarjat tal-Kumitat abbażi tal-proposti magħmula mill-Partijiet. L-aġenda proviżorja għandha tinkludi l-punti li fir-rigward tad-dħul tagħhom fl-aġenda, waħda mill-Partijiet tkun għamlet talba lis-Segretarjat tal-Kumitat sostnuta mid-dokumenti rilevanti u li tasal mhux aktar tard minn 21 jum kalendarju qabel id-data tal-laqgħa.
(2)L-aġenda proviżorja, flimkien mad-dokumenti rilevanti, għandha tiġi ċċirkolata mhux aktar tard minn 15-il jum kalendarju qabel il-bidu tal-laqgħa.
(3)L-aġenda għandha tiġi adottata mill-President u mill-Kap tad-Delegazzjoni l-ieħor fil-bidu ta’ kull laqgħa. Il-punti għajr dawk li jkunu jidhru fl-aġenda proviżorja jistgħu jiddaħħlu fl-aġenda jekk il-Partijiet jaqblu li jsir hekk.
(4)F’konsultazzjoni mal-Partijiet, il-President jista’ jqassar il-perjodi ta’ żmien speċifikati fil-paragrafi 1 u 2 sabiex jitqiesu ċ-ċirkostanzi speċjali.
Artikolu 8
Adozzjoni tal-istrumenti
(1)Id-deċiżjonijiet tal-Kumitat skont it-tifsira tal-Artikolu 10, il-paragrafi (2) u (3), tal-Ftehim għandhom jiġu adottati b’kunsens u indirizzati lill-Partijiet. Id-deċiżjonijiet għandhom ikunu ffirmati mill-President u mill-Kap tad-Delegazzjoni l-ieħor.
(2)Kull deċiżjoni għandha tidħol fis-seħħ fil-jum tal-adozzjoni tagħha sakemm id-deċiżjoni ma tipprevedix mod ieħor.
(3)Kull waħda mill-Partijiet tista’ tiddeċiedi li tippubblika kwalunkwe deċiżjoni adottata mill-Kumitat.
Artikolu 9
Proċedura bil-miktub
Jekk il-Partijiet jaqblu, il-Kumitat jista’ jadotta deċiżjonijiet bi proċedura bil-miktub, wara li jitlestew il-proċeduri interni rispettivi. Il-proċedura bil-miktub għandha tikkonsisti minn skambju ta’ noti bejn iż-żewġ Segretarji, li jaġixxu bi ftehim mal-Partijiet. Il-parti li tipproponi l-użu tal-proċedura bil-miktub għandha tissottometti l-abbozz ta’ deċiżjoni lill-Parti l-oħra, li għandha twieġeb billi tindika jekk taċċettax jew le l-abbozz, tipproponi kwalunkwe emenda, jew titlob aktar żmien għar-riflessjoni. Jekk l-abbozz jiġi adottat, dan għandu jiġi ffinalizzat f’konformità mal-Artikolu 8(1).
Artikolu 10
Minuti
(1)Il-President għandu jfassal l-abbozz tal-minuti ta’ kull laqgħa u jissottomettihom lill-Kap tad-Delegazzjoni l-ieħor fi żmien 20 jum tax-xogħol minn dakinhar tal-laqgħa. L-abbozz tal-minuti għandu jiddikjara r-rakkomandazzjonijiet li saru u jista’ wkoll jinnota kwalunkwe konklużjoni oħra milħuqa. Il-Kap tad-Delegazzjoni l-ieħor għandu jaqbel mal-abbozz jew jissottometti l-emendi li jipproponi. Malli jintlaħaq qbil dwar l-abbozz tal-minuti, għandhom jiġu ffirmati żewġ kopji oriġinali mill-President u mill-Kap tad-Delegazzjoni l-ieħor. Għandha tinżamm kopja oriġinali tal-minuti mill-President u oħra mill-Kap tad-Delegazzjoni l-ieħor.
(2)F’każ li ma jintlaħaqx qbil dwar il-minuti qabel ma tissejjaħ il-laqgħa sussegwenti, il-minuti għandhom jiddokumentaw l-abbozz imfassal mill-President li miegħu għandhom jiġu annessi l-emendi proposti sottomessi mill-Kap tad-Delegazzjoni l-ieħor.
Artikolu 11
Spejjeż
(1)Kull parti għandha tkopri kwalunkwe spiża li ġġarrab b’riżultat tal-parteċipazzjoni tagħha fil-laqgħat tal-Kumitat.
(2)L-ispiża marbuta mal-organizzazzjoni tal-laqgħat u mar-riproduzzjoni tad-dokumenti għandha titħallas mill-Parti li tkun qed tospita l-laqgħa.
Artikolu 12
Kunfidenzjalità
Id-deliberazzjonijiet tal-Kumitat għandhom ikunu kunfidenzjali.