—

jiffaċilitaw u jinkoraġġixxu l-iskambji volontarji kontinwi (21) dwar l-innovazzjoni tas-sistema tas-saħħa mmirati lejn il-kondiviżjoni tal-għarfien u t-tagħlim reċiproku sabiex jinformaw it-teħid ta’ deċiżjonijiet u jappoġġaw azzjonijiet ta’ politika nazzjonali bbażati fuq il-ħtiġijiet tal-Istati Membri;

—

jirrieżaminaw il-proċess għall-evalwazzjoni, id-diffużjoni u l-implimentazzjoni tal-aħjar prattiki u soluzzjonijiet innovattivi, sabiex jiġu ottimizzati l-applikazzjoni u l-impatt tagħhom, kif xieraq;

—

jiffaċilitaw u jħeġġu l-kollaborazzjoni fost l-Istati Membri għall-evalwazzjoni esterna bejn il-pari ta’ soluzzjonijiet innovattivi;

—

jinkoraġġixxu diskussjonijiet dwar approċċi strateġiċi għat-tisħiħ tar-reżiljenza tas-sistemi tas-saħħa, u b’kont meħud tat-tixjiħ tal-popolazzjonijiet u l-ħtieġa li jiġu promossi politiki tul il-ħajja, f’fora eżistenti jew futuri dwar is-saħħa tal-Istati Membri, bħall-Grupp ta’ Esperti dwar il-Valutazzjoni tal-Prestazzjoni tas-Sistemi tas-Saħħa (HSPA) (22) u l-Grupp ta’ Tmexxija dwar il-Promozzjoni tas-Saħħa, il-Prevenzjoni tal-Mard u l-Ġestjoni tal-Mard mhux Komunikabbli (23);

—

ikomplu u jappoġġaw ħidma ulterjuri tal-Grupp ta’ Esperti dwar l-HSPA fir-rwol tiegħu li jtejjeb il-fehim tagħna dwar kif insaħħu l-effettività tal-kura, inżidu l-aċċessibbiltà u ntejbu l-kwalità tal-kura u s-sikurezza tal-pazjenti u jesploraw il-potenzjal ta’ dan il-grupp biex jindirizza approċċi strateġiċi għall-innovazzjoni u t-trasformazzjoni tas-sistema tas-saħħa;

—

ikomplu u jħeġġu aktar il-kollaborazzjoni b’suċċess fost l-Istati Membri fil-qasam tas-saħħa diġitali, bħan-Network tal-e-Saħħa (24) biex jiġi appoġġat l-użu usa’ ta’ soluzzjonijiet u servizzi diġitali li għandhom potenzjal ċar li jsaħħu l-effettività, l-aċċessibbiltà u r-reżiljenza tas-sistemi tas-saħħa, filwaqt li jiżguraw ir-rispett tal-privatezza;

—

iħeġġu u jippromwovu l-użu tal-Istrument ta’ Appoġġ Tekniku (25) u mekkaniżmi oħra tal-UE biex jitwettqu riformi sabiex tissaħħaħ ir-reżiljenza tas-sistemi tas-saħħa, inkluż permezz tal-innovazzjoni;

—

jappoġġaw ir-riċerka kollaborattiva u s-sħubijiet fost l-Istati Membri dwar it-trasformazzjoni tas-sistemi tas-saħħa u tal-kura biex jiġu żviluppati strateġiji, politiki u modi innovattivi bbażati fuq l-evidenza biex tingħata l-kura u tinżamm is-saħħa tal-popolazzjoni;

—

jinkoraġġixxu kollaborazzjoni u sħubijiet, fejn meħtieġ, ma’ organizzazzjonijiet internazzjonali li jipprovdu appoġġ espert għall-analiżi tas-sistema tas-saħħa, l-iżvilupp tal-innovazzjoni, il-kondiviżjoni tal-għarfien u l-implimentazzjoni ta’ soluzzjonijiet innovattivi;

—

jappoġġaw l-organizzazzjonijiet rilevanti tas-soċjetà ċivili fl-isforzi tagħhom biex jippromwovu s-saħħa u jilħqu gruppi vulnerabbli.

—

issaħħaħ il-koordinazzjoni bejn il-programmi u l-politiki tal-UE biex l-implimentazzjoni tar-riformi tas-sistemi tas-saħħa nazzjonali tiġi appoġġata b’mod aktar effettiv bil-mekkaniżmi kollha disponibbli tal-UE;

—

tesplora l-forniment ta’ servizz ta’ konsulenza b’punt ta’ aċċess uniku biex jassisti lill-Istati Membri fuq talba tagħhom fl-ottimizzazzjoni tal-użu tal-fondi, il-mekkaniżmi u l-istrumenti tal-UE biex jappoġġaw l-ippjanar, il-finanzjament u l-implimentazzjoni tal-bidliet fis-sistemi tal-kura tas-saħħa tagħhom;

—

tippromwovi u tappoġġa l-opportunitajiet għat-tisħiħ tal-kapaċitajiet tal-professjonisti li jaħdmu fuq is-sistemi tas-saħħa, b’mod partikolari għal dawk fl-istadji bikrija tal-karrieri tagħhom; l-opportunitajiet għandhom iżidu l-għarfien u l-ħiliet tagħhom b’rabta mal-ġestjoni u l-finanzjament tas-sistema tas-saħħa, u b’hekk jikkontribwixxu għat-tisħiħ tar-reżiljenza tas-sistemi tas-saħħa u approċċ Saħħa Waħda.

—

isibu modi kif itejbu l-aċċessibbiltà u d-disponibbiltà tal-prodotti mediċinali, b’mod partikolari tal-antimikrobiċi u ta’ prodotti mediċinali bi skop ġdid għat-trattament ta’ ħtiġijiet mediċi mhux issodisfati, fejn nuqqas ta’ interess kummerċjali huwa fattur li jfixkel;

—

jappoġġaw aktar elaborazzjoni u pilotaġġ ta’ mekkaniżmu ta’ attrattiva bbażat fuq l-inċentivi għall-akkwist tal-antibijotiċi fl-UE kif propost mill-Azzjoni Konġunta tal-UE dwar ir-Reżistenza għall-Antimikrobiċi u l-Infezzjonijiet Assoċjati mal-Kura tas-Saħħa (EU-JAMRAI) (34) bħala għażla li għandha tiġi esplorata sabiex jiġu indirizzati l-isfidi persistenti tal-aċċess u d-disponibilità mdewma tal-antimikrobiċi, biex jiġu mifhuma aħjar l-implikazzjonijiet tiegħu għall-Istati Membri, bħall-impatt ta’ dawn l-inċentivi fuq is-sostenibbiltà tas-sistemi tas-saħħa tagħhom u biex tiġi determinata l-possibbiltà tal-parteċipazzjoni, min-naħa ta’ pajjiżi lil hinn mill-UE, filwaqt li tinżamm awtonomija strateġika miftuħa għal materja prima għall-mediċini u l-apparat mediku;

—

jappoġġaw it-taħriġ tal-ħaddiema tas-saħħa fis-setturi tas-saħħa tal-bniedem, tas-saħħa tal-annimali u tal-ambjent f’dak li jirrigwarda r-reżistenza antimikrobika, il-prevenzjoni u l-kontroll tal-infezzjonijiet, l-użu razzjonali tal-antibijotiċi u r-rimi xieraq tal-iskart antibijotiku u jippromwovu s-sensibilizzazzjoni tal-popolazzjoni;

—

jimpenjaw ruħhom, fil-qafas tan-Network tal-Awtoritajiet Kompetenti dwar l-Ipprezzar u r-Rimborż (NCAPR), fl-iskambju tal-aħjar prattiki sabiex jiġi ottimizzat l-aċċess għal prodotti mediċinali bi skop ġdid, b’mod partikolari dawk li huma maħsuba biex jissodisfaw ħtieġa medika mhux issodisfata;

—

jiżguraw li l-kooperazzjoni teknika li ilha għaddejja, fil-qasam tal-HTA fost l-awtoritajiet tal-Istati Membri tittieħed għall-pass li jmiss b’mod effettiv u f’waqtu, f’konformità mal-approċċ immexxi mill-Istati Membri deskritt fir-Regolament futur dwar il-Valutazzjoni tat-Teknoloġija tas-Saħħa;

—

jikkunsidraw li jipproponu leġiżlazzjoni li tappoġġa sforzi għall-għoti ta’ skop ġdid biex tinkiseb evidenza ċara tas-sikurezza u l-effikaċja tal-prodott mediċinali, anke f’każijiet fejn ma jkun hemm ebda interess kummerċjali dirett. Ir-rekwiżiti legali għad-detenturi ta’ awtorizzazzjoni għat-tqegħid fis-suq jistgħu jinkludu bidliet fit-tikkettar għal prodotti mediċinali bi skop ġdid biex ikopru indikazzjonijiet addizzjonali wara valutazzjoni pożittiva tad-data klinika ppreżentata minn partijiet terzi;

—

jesploraw il-potenzjal għal dipendenza fuq provi fuq pjattaformi adattivi, disinji ta’ provi innovattivi għar-riċerka klinika fl-għoti ta’ skop ġdid biex jiġu kkomplementati l-isforzi tar-riċerka klinika, inkluż billi titqies l-Evidenza tad-Dinja Reali, filwaqt li jiġi żgurat li d-data ġġenerata fil-provi kliniċi tkun ta’ kwalità għolja, affidabbli u robusta;

—

jikkunsidraw li jindirizzaw il-ħtieġa li jingħata skop ġdid lil prodotti mediċinali f’indikazzjonijiet pedjatriċi sabiex jiġi evitat l-użu mhux skont it-tikketta, għall-benefiċċju ta’ din il-parti tal-popolazzjoni li hi l-aktar vulnerabbli;

—

isaħħu l-governanza marbuta mal-implimentazzjoni tar-regolamenti l-ġodda għall-MD u l-IVMD u jiżviluppaw il-kompetenza esperta Ewropea f’dan il-qasam għall-benefiċċju tal-pazjenti tal-UE.

—

tinkludi qafas regolatorju komprensiv ottimizzat komplet ta’ proposti olistiċi, ibbażati fuq l-evidenza u validi għall-futur fil-kuntest tal-Istrateġija Farmaċewtika għall-Ewropa, bil-għan li jittejbu l-affordabbiltà, id-disponibbiltà u l-aċċessibbiltà tal-prodotti mediċinali u, b’mod partikolari, l-antimikrobiċi, il-prodotti mediċinali personalizzati u ta’ terapija avvanzata, it-terapiji għal gruppi żgħar (ħafna) ta’ pazjenti u l-prodotti mediċinali bi skop ġdid, filwaqt li tirrispetta bis-sħiħ il-kompetenza tal-Istati Membri;

—

tiżviluppa kapaċitajiet speċifiċi ta’ riċerka konġunta tal-UE li jiffaċilitaw ukoll il-kooperazzjoni mal-istituzzjonijiet nazzjonali/akkademiċi tar-riċerka u toffri appoġġ biex is-sejbiet tar-riċerka jitfissru fl-iżvilupp tal-antimikrobiċi għall-prattika klinika, filwaqt li ssaħħaħ ukoll l-użu ta’ networks ta’ provi kliniċi u pjattaformi ta’ kondiviżjoni ta’ data fl-Unjoni kollha u, kif xieraq, tikseb tagħlim minn, pereżempju, il-proġett tal-Inizjattiva dwar Mediċini Innovattivi ENABLE (35);

—

tanalizza dak li hu meħtieġ biex ikunu żgurati d-disponibbiltà u l-iżvilupp tal-mediċini u t-terapiji tal-lum u ta’ għada fl-UE u tivvaluta l-ispejjeż u l-benefiċċji potenzjali kif ukoll l-implikazzjonijiet tas-suq tal-organizzazzjoni ta’ faċilitajiet ta’ manifattura fil-livell tal-UE flimkien ma’ arranġamenti finanzjarji eżistenti, inkluż faċilitajiet ta’ manifattura ffinanzjati pubblikament jew mingħajr skop ta’ qligħ, filwaqt li żżomm preżenti l-effetti potenzjali tagħhom ta’ distorsjoni tas-suq u l-limitazzjonijiet magħrufa sew tagħhom, biex tkun żgurata d-disponibbiltà tal-antimikrobiċi fil-każ ta’ nuqqas ta’ interess kummerċjali, jew f’sitwazzjonijiet ta’ emerġenza, u tivvaluta l-ispejjeż u l-benefiċċji ta’ inizjattivi oħra possibbli identifikati waqt il-ħidma fil-qafas tal-Istrateġija Farmaċewtika, minbarra l-mekkaniżmi li jappoġġaw l-innovazzjoni, li jwasslu għal metodi ta’ manifattura rivoluzzjonarji li jirriżultaw fi produzzjoni sostenibbli ta’ mediċini affordabbli;

—

tkompli tagħti prijorità lill-implimentazzjoni tal-MDR u l-IVDR, inkluż permezz tal-għoti ta’ appoġġ immirat lill-Istati Membri, biex tiżgura implimentazzjoni bla xkiel u b’hekk tikkontribwixxi għall-aċċessibbiltà u d-disponibbiltà tal-MDs u l-IVDs għall-benefiċċju tal-pazjenti tal-UE;

—

tindirizza l-aspetti li għandhom impatt fuq il-kompetittività tal-industrija farmaċewtika Ewropea bil-ħsieb li jittaffa t-tħassib dwar is-sigurtà tal-provvista u li tiġi promossa awtonomija strateġika miftuħa fl-UE, b’mod partikolari għall-produzzjoni ta’ APIs u prodotti mediċinali li skaditilhom il-privattiva;

—

tikkunsidra, f’kooperazzjoni mal-Istati Membri, u b’kont meħud ukoll tal-eżiti tal-proġett pilota tal-qafas tal-għoti ta’ skop ġdid ta’ STAMP, koordinatur ċentrali għall-għoti ta’ skop ġdid fil-livell tal-UE biex jappoġġa l-kooperazzjoni u l-koordinazzjoni fost il-partijiet ikkonċernati differenti u biex jassisti fl-iżvilupp tal-argumenti xjentifiċi meħtieġa biex tinkiseb l-approvazzjoni regolatorja għal prodotti mediċinali mogħtija skop ġdid u li mhumiex attraenti mil-lat finanzjarju;

—

tikkunsidra b’mod speċifiku l-potenzjal ta’ għoti ta’ skop ġdid għal ħtiġijiet mediċi mhux issodisfati fil-kuntest tal-Ispazju Ewropew tad-Data dwar is-Saħħa mħabbar, filwaqt li jittieħed vantaġġ sħiħ mill-Intelliġenza Artifiċjali u l-Big Data affidabbli b’mod responsabbli, anke bil-għan li tiġi appoġġata l-għażla b’suċċess tal-kandidati;

—

tikkunsidra li toħloq possibbiltajiet għall-għoti ta’ skop ġdid lil prodotti mediċinali eżistenti u li tappoġġahom billi tiffaċilita l-ġbir ta’ data dwar l-użu mhux skont it-tikketta ta’ prodotti mediċinali f’kanċers rari, inkluż kanċers pedjatriċi, fil-kuntest taċ-Ċentru tal-Għarfien dwar il-Kanċer (36).

—

iħeġġu l-implimentazzjoni tal-proġett pilota previst tal-qafas tal-għoti ta’ skop ġdid ta’ STAMP, li ddewwem minħabba l-pandemija tal-COVID-19.

—

jikkooperaw u jikkondividu d-data disponibbli dwar prodotti abbandunati li ma għadhomx protetti minn privattivi ma’ istituzzjonijiet akkademiċi u organizzazzjonijiet mingħajr skop ta’ qligħ fl-interess li jingħataw skop ġdid sabiex jiġu indirizzati ħtiġijiet mediċi mhux issodisfati.

—

tiżgura, kif xieraq, implimentazzjoni effettiva tal-azzjonijiet fil-Pjan Ewropew biex Jingħeleb il-Kanċer, u tappoġġa lill-Istati Membri fl-implimentazzjoni ta’ azzjonijiet effettivi għall-kontroll tal-kanċer, permezz ta’ strumenti u għodod xierqa;

—

tieħu approċċ komprensiv għall-promozzjoni tas-saħħa u l-prevenzjoni tal-kanċer, sabiex jiġi żgurat li l-aħjar prattiki żviluppati fil-prevenzjoni u l-kontroll tal-kanċer jistgħu jkunu ta’ benefiċċju għal mard ieħor li ma jitteħidx;

—

tikkunsidra li tippreżenta proposta għal aġġornament tar-rakkomandazzjoni tal-Kunsill dwar l-iskrinjar tal-kanċer (38).

—

jikkollaboraw b’mod effettiv dwar l-implimentazzjoni tal-Pjan Ewropew biex Jingħeleb il-Kanċer u jagħmlu l-aħjar użu mill-finanzjament disponibbli tal-UE;

—

jinvestu fil-prevenzjoni sostenibbli tal-kanċer billi jindirizzaw il-fatturi determinanti tas-saħħa li jixprunaw il-kanċer bħala sfida intersettorjali permezz tas-“Saħħa fil-Politiki Kollha” u l-“approċċ Saħħa Waħda”; jiżviluppaw u jimplimentaw interventi kosteffettivi mmirati lejn l-użu tat-tabakk, l-użu tal-alkoħol, in-nuqqas ta’ attività fiżika u dieti ħżiena għas-saħħa billi jiżviluppaw u jimplimentaw azzjonijiet strateġiċi kif ukoll jiffaċilitaw il-kooperazzjoni bejn l-Istati Membri, l-aġenziji u l-fora eżistenti tal-UE bħall-Grupp ta’ Tmexxija dwar il-Promozzjoni tas-Saħħa, il-Prevenzjoni tal-Mard u l-Ġestjoni tal-Mard li ma Jitteħidx (SGPP);

—

jippromwovu t-tilqim, l-identifikazzjoni bikrija, u l-iskrinjar ibbażati fuq evidenza u rakkomandazzjonijiet Ewropej għall-assigurazzjoni tal-kwalità tal-programmi ta’ skrinjar;

—

jesploraw approċċi innovattivi fil-promozzjoni tas-saħħa u l-integrazzjoni ta’ attivitajiet ta’ prevenzjoni bħala parti integrali mit-twassil tas-servizzi tal-kura tas-saħħa;

—

jinkoraġġixxu rwol attiv tal-professjonisti tas-saħħa, gruppi ta’ pazjenti u organizzazzjonijiet mhux governattivi rilevanti oħra u partijiet ikkonċernati oħra fil-proċess ta’ implimentazzjoni tal-Pjan Ewropew biex Jingħeleb il-Kanċer;

—

jiġu implimentati approċċi komprensivi għall-isfidi tas-sopravivenza relatati mal-kwalità tal-ħajja tas-superstiti tal-kanċer, b’attenzjoni speċjali għat-tfal u ż-żgħażagħ u b’referenza għad-dritt stabbilit li għandu jintesa;

—

jibnu fuq il-konklużjonijiet u r-rakkomandazzjonijiet mill-Azzjoni Konġunta tas-Sħubija Innovattiva għal Azzjoni Kontra l-Kanċer (iPAAC) (39), kif adatt, fl-attivitajiet li ġejjin tal-implimentazzjoni tal-Pjan tal-Ewropa biex Jingħeleb il-Kanċer. Dan japplika b’mod partikolari għar-rakkomandazzjonijiet għal programmi ġodda ta’ skrinjar, għal rakkomandazzjonijiet aġġornati dwar l-iskrinjar, settijiet ta’ data emendati dwar ir-reġistri tal-kanċer tal-popolazzjoni, approċċi għal trattamenti kumplessi għall-kanċer kif ukoll kwistjonijiet ta’ governanza, bħal ċentri komprensivi tal-kanċer, indikaturi tal-kwalità, networks komprensivi tal-kura tal-kanċer u mogħdijiet ta’ kura tal-pazjenti. Għandu jittieħed kont tan-networks u l-għarfien espert eżistenti bħan-Network Ewropew ta’ Referenza (ERN) biex jiġu evitati d-duplikazzjoni u t-trikkib;

—

isaħħu l-kooperazzjoni bejn il-Kummissjoni u l-Istati Membri permezz ta’ azzjonijiet transsettorjali li jibnu pontijiet bejn l-objettivi tas-sistemi tas-saħħa u dawk ta’ sistemi tal-ikel sostenibbli u tajbin għas-saħħa. L-għan komuni tagħna huwa li niżguraw nutrizzjoni tajba għas-saħħa u tnaqqis fil-mard li ma jitteħidx relatat mad-dieta f’konformità mal-objettivi tal-Pjan Ewropew biex Jingħeleb il-Kanċer u r-rakkomandazzjonijiet mill-Azzjoni Konġunta dwar l-Implimentazzjoni tal-Aħjar Prattiki Vvalidati fin-Nutrizzjoni (BestReMap) (40);

—

jikkollaboraw biex jiżguraw il-provvista futura ta’ isotopi radjuattivi mediċi, sabiex ikunu awtosuffiċjenti fl-UE u jagħmlu użu sħiħ mill-potenzjal tal-mediċina nukleari għad-dijanjożi u t-trattament ta’ pazjenti Ewropej bil-kanċer f’konformità mad-Dokument ta’ Ħidma tal-Persunal tal-Kummissjoni dwar Aġenda Strateġika għall-Applikazzjonijiet tar-Radjazzjoni Medika Jonizzanti (SAMIRA) (41) adottat fil-5 ta’ Frar 2021. Approċċ aktar koordinat u finanzjament sostenibbli tal-kapaċità tal-produzzjoni Ewropea huma partikolarment importanti fid-dawl tal-infrastruttura tal-produzzjoni Ewropea li qed tixjieħ.

—

jesploraw aktar kif l-UE, fil-kuntest ta’ Unjoni Ewropea tas-Saħħa aktar b’saħħitha, jista’ jkollha approċċ aktar strateġiku fis-saħħa globali, inkluż permezz ta’ Azzjoni Konġunta ġdida possibbli dwar is-saħħa globali;

—

juru rwol ta’ tmexxija fis-saħħa globali, u fin-negozjati ta’ wara l-pandemija fil-livell globali inkluż permezz tan-negozjar ta’ strument importanti dwar it-tħejjija u r-rispons għall-pandemiji;

—

jesploraw kif itejbu aktar il-mekkaniżmi eżistenti ta’ koordinazzjoni biex jappoġġaw l-iskambju regolari ta’ informazzjoni, u b’mod partikolari bejn ir-rappreżentanti tal-UE u tal-Istati Membri u l-esperti bbażati fil-bliet kapitali nazzjonali, Brussell, Ġinevra u New York, biex jippermettu l-kooperazzjoni fl-istabbiliment tal-pożizzjonijiet tal-UE dwar kwistjonijiet tas-saħħa b’mod f’waqtu u effiċjenti;

—

jinkoraġġixxu kollaborazzjoni dwar kwistjonijiet mhux tas-saħħa li għandhom impatt fuq is-saħħa globali u l-benesseri tal-popolazzjoni, inkluż diskussjonijiet tematiċi dwar kwistjonijiet transsettorjali rilevanti għas-saħħa globali;

—

jippromwovu u jappoġġaw opportunitajiet edukattivi fil-qasam tas-saħħa globali u d-diplomazija tas-saħħa globali;

—

jinkoraġġixxu kooperazzjoni aktar mill-qrib u involviment attiv tal-partijiet ikkonċernati rilevanti, inkluż is-soċjetà ċivili u l-organizzazzjonijiet mhux governattivi biex jikkontribwixxu għas-saħħa globali, inkluż is-sigurtà tas-saħħa u “approċċ Saħħa Waħda” komprensiv;

—

jinkoraġġixxu l-użu ta’ mekkaniżmi u strumenti eżistenti tal-UE bħall-EU4Health, biex jissaħħaħ ir-rwol tal-UE fis-Saħħa Globali kif ukoll biex jittieħdu benefiċċji mill-kooperazzjoni internazzjonali, b’mod partikolari fil-qasam tat-tħejjija u r-rispons għall-pandemiji, inkluż ir-reżistenza għall-antimikrobiċi;

—

iħejju rieżami tal-mekkaniżmi u l-istrumenti li permezz tagħhom l-UE, l-Istati Membri tagħha u l-atturi mhux statali jappoġġaw it-tisħiħ tas-sistemi tas-saħħa globalment sabiex jgħinu fl-identifikazzjoni tal-lakuni u jsaħħu r-rwol tal-UE fis-saħħa globali u s-sigurtà tas-saħħa;

—

ikomplu u jinkoraġġixxu sħubijiet u networks li jipprovdu appoġġ fit-tisħiħ globali tas-sistemi tas-saħħa f’termini ta’ tħejjija, bini tal-kapaċità, promozzjoni tas-saħħa, riċerka u żvilupp tas-saħħa, u saħħa diġitali;

—

iżommu f’moħħhom l-importanza li tiġi evitata d-duplikazzjoni u t-trikkib bla bżonn mal-ħidma ta’ atturi u istituzzjonijiet internazzjonali oħra u li jiġu żgurati l-koerenza u l-komplementarjetà mal-mekkaniżmi u l-inizjattivi eżistenti.