IL-KUMMISSJONI EWROPEA

Brussell, 25.11.2021

COM(2021) 721 final

2021/0376(COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttivi 2011/61/UE u 2009/65/KE fir-rigward tal-arranġamenti ta’ delega, il-ġestjoni tar-riskju tal-likwidità, ir-rapportar superviżorju, il-forniment ta’ servizzi depożitarji u ta’ kustodja u l-oriġinazzjoni tas-self minn fondi ta’ investiment alternattivi

(Test b’rilevanza għaż-ŻEE)

{SEC(2021) 570 final} - {SWD(2021) 340 final} - {SWD(2021) 341 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet għall-proposta u l-objettivi tagħha

Din il-proposta leġiżlattiva tressaq emendi għad-Direttiva dwar Maniġers ta’ Fondi ta’ Investiment Alternattivi (AIFMD – id-Direttiva 2011/61/UE) 1 u, sa fejn huwa rilevanti, għad-Direttiva relatata ma’ impriżi ta’ investiment kollettiv f’titoli trasferibbli (“UCITS”) (UCITSD – id-Direttiva 2009/65/KE) 2 .

Il-Kummissjoni rrieżaminat l-applikazzjoni tal-kamp ta’ applikazzjoni tal-AIFMD kif mandat mill-Artikolu 69 tad-Direttiva. Il-Kummissjoni qieset li għadd ta’ kwistjonijiet enfasizzati fir-rieżami tal-AIFMD huma ugwalment rilevanti għall-attivitajiet tal-UCITS. Konsegwentement, din il-proposta leġiżlattiva għandha l-għan li tindirizza dawn il-kwistjonijiet billi temenda l-AIFMD u l-UCITSD biex tallinja aħjar ir-rekwiżiti tagħhom.

L-AIFMD ġiet adottata fit-8 ta’ Ġunju 2011 bħala parti mir-rispons ta’ politika għall-kriżi finanzjarja globali, li kixfet dgħufijiet u vulnerabbiltajiet f’ċerti attivitajiet ta’ fondi li setgħu jamplifikaw ir-riskji għas-sistema finanzjarja usa’ 3 .

Bħala inizjattiva regolatorja għal wara l-kriżi, l-AIFMD tfittex approċċ superviżorju koerenti għar-riskji li l-attivitajiet tal-Fondi ta’ Investiment Alternattivi (“AIFs”) jistgħu jiġġeneraw jew iwasslu lis-sistema finanzjarja. Id-Direttiva għandha wkoll l-għan li tipprovdi protezzjoni ta’ livell għoli tal-investituri filwaqt li tiffaċilita l-integrazzjoni tal-AIFs fis-suq tal-UE 4 . Il-Maniġers ta’ Fondi ta’ Investiment Alternattivi (“AIFMs”) huma meħtieġa li jimmaniġġjaw b’mod effettiv ir-riskji u li jiżguraw trasparenza adegwata tal-attivitajiet tal-AIFs li jimmaniġġjaw. Hekk kif jissodisfaw dawn ir-rekwiżiti, huma jistgħu jimmaniġġjaw u jikkummerċjalizzaw l-AIFs lil investituri professjonali madwar l-Unjoni b’awtorizzazzjoni unika mis-superviżur domiċiljari tagħhom 5 . L-AIFMD saret pilastru sinifikanti tal-Unjoni tas-Swieq Kapitali (“CMU”) 6 bis-saħħa tal-kapaċità ta’ fondi ta’ investiment li joffru aċċess għal sorsi ta’ finanzjament ibbażati fuq is-suq u li jippermettu lill-investituri jallokaw aħjar it-tfaddil tagħhom matul il-perjodu ta’ żmien magħżul f’konformità mal-preferenzi tagħhom.

Il-valutazzjoni tal-Kummissjoni tal-kamp ta’ applikazzjoni u tal-funzjonament tal-qafas legali tal-AIFMD tikkonkludi li l-istandards tal-AIFMD biex jiġu żgurati livelli għoljin ta’ protezzjoni tal-investituri huma fil-biċċa l-kbira effettivi 7 . Ir-regoli dwar il-kunflitti ta’ interess, id-divulgazzjoni u r-rekwiżiti ta’ trasparenza huma meħtieġa biex jipproteġu lill-investituri. Ir-rekwiżiti dwar il-valutazzjoni, li hija meħtieġa biex jiġi stabbilit is-sehem ta’ kull investitur f’AIF partikolari u għall-monitoraġġ tal-prestazzjoni tal-AIF, żiedu d-dixxiplina u l-istruttura fil-proċess ta’ valutazzjoni tal-assi. Fl-aħħar nett, ir-reġim depożitarju li jistabbilixxi d-dmirijiet u r-responsabbiltà tad-depożitarji, inklużi l-kustodja tal-assi tal-AIF u s-sorveljanza tal-attivitajiet tal-AIF, jissalvagwardja l-interessi tal-investituri. Huwa jappoġġa wkoll il-funzjonament ordnat tas-suq tal-fondi ta’ investiment.

L-istabbiltà finanzjarja u l-integrità tas-suq huma objettivi ewlenin tal-AIFMD 8 . L-AIFMD introduċiet għodod biex ittejjeb il-monitoraġġ u s-superviżjoni makroprudenzjali tar-riskji tal-istabbiltà finanzjarja. L-AIFMs huma meħtieġa jirrapportaw lis-superviżuri dwar l-iskoperturi prinċipali tal-AIF, il-profil tal-likwidità u l-ingranaġġ tagħhom. Ir-rapportar superviżorju appoġġa superviżjoni makroprudenzjali effettiva u huwa ta’ għajnuna għall-monitoraġġ tas-suq iżda l-granularità tad-data rrapportata tista’ tittejjeb. L-AIFMD ħolqot network ta’ kooperazzjoni superviżorja effettiv li huwa kkoordinat mill-Awtorità Ewropea tat-Titoli u s-Swieq (“ESMA”), li qed jikkontribwixxi għall-konverġenza tal-approċċi superviżorji għall-attivitajiet tal-AIF fl-Unjoni Ewropea.

Il-valutazzjoni tal-Kummissjoni tindika li l-AIFMD ġeneralment qed tilħaq l-objettivi tagħha u li l-armonizzazzjoni madwar l-UE tal-istandards regolatorji ffaċilitat l-integrazzjoni tas-suq Ewropew tal-fondi ta’ investiment kollettiv 9 . Is-settur tal-fondi ta’ investiment bejn wieħed u ieħor ittrippla fid-daqs mill-2008 ’il hawn, minn EUR 5,5 triljun f’assi għal aktar minn EUR 15-il triljun f’assi, u l-assi tiegħu bħala perċentwal tal-assi totali tas-settur finanzjarju żdiedu b’mod sinifikanti 10 . Huwa għandu interkonnessjonijiet mas-settur finanzjarju usa’, li jagħmluha importanti li r-riskji sistemiċi potenzjali jiġu ġestiti b’mod xieraq 11 .

L-AIFMD fiha regoli ġenerali dwar il-ġestjoni tal-likwidità, dwar l-użu tal-ingranaġġ u dwar il-valutazzjoni għall-ġestjoni tar-riskji fil-livell tal-fond. Madankollu, dawn ir-rekwiżiti ma humiex speċifiċi biżżejjed biex ikopru bis-sħiħ l-ispeċifiċitajiet tal-ġestjoni tal-attivitajiet ta’ self dirett mill-AIFs u biex jindirizzaw ir-riskji mikro u makro potenzjali. Il-frammentazzjoni regolatorja, fejn jiġu stabbiliti oqfsa nazzjonali biex jirregolaw l-oriġinazzjoni tas-self mill-fondi, twassal għal diffikultajiet fl-identifikazzjoni u fir-reazzjoni effettiva għal effetti potenzjali fis-suq kollu li jistgħu jirriżultaw mill-attivitajiet ta’ tali fondi. Barra minn hekk, approċċi regolatorji nazzjonali diverġenti jfixklu l-istabbiliment ta’ suq intern effiċjenti għall-AIFs li joriġinaw self billi jippromwovu arbitraġġ regolatorju u livelli differenti ta’ protezzjoni tal-investituri.

Barra minn hekk, ir-rieżami enfasizza li d-data tas-suq sottomessa lill-awtoritajiet superviżorji għandha nuqqasijiet jew ma għandhiex dettall meħtieġ, u b’hekk iddgħajjef il-kapaċità li l-awtoritajiet jidentifikaw l-akkumulazzjoni u r-riperkussjoni tar-riskji għas-sistema finanzjarja usa’. Il-proposta leġiżlattiva għandha l-għan li ttejjeb il-ġbir tad-data rilevanti u tneħħi d-duplikazzjonijiet ineffiċjenti tar-rapportar li jistgħu jeżistu taħt partijiet oħra tal-leġiżlazzjoni Ewropea u dik nazzjonali f’konformità mal-istrateġija usa’ dwar id-data superviżorja, kif imħabbar fl-Istrateġija dwar il-Finanzi Diġitali 12 .

L-Għodod għall-Ġestjoni tal-Likwidità (“LMTs”) jippermettu lill-maniġers ta’ fondi miftuħa, li jinkludu AIFs miftuħa u l-fondi kollha tal-UCITS, jindirizzaw il-pressjonijiet tat-tifdija f’kundizzjonijiet tas-suq taħt stress u jipproteġu aħjar l-interessi tal-investituri. Il-Bord Ewropew dwar ir-Riskju Sistemiku (“BERS”) u l-ESMA jirrakkomandaw armonizzazzjoni tar-regoli dwar l-użu tal-LMTs. Bħalissa, l-AIFMD u l-UCITSD ma jipprevedux sett minimu armonizzat ta’ LMTs 13 .

Barra minn hekk, l-interessi tal-investituri jistgħu jitħarsu aħjar jekk ir-regoli tal-AIFMD kellhom jiġu emendati biex jiżdiedu l-effiċjenzi fis-suq tas-servizzi tad-depożitarji. Ir-rekwiżit tal-AIFMD attwali li depożitarju jenħtieġ li jkun jinsab fl-istess Stat Membru bħall-AIF tal-UE li jaħtar huwa diffiċli li jiġi ssodisfat fi swieq iżgħar u aktar ikkonċentrati, fejn hemm inqas fornituri tas-servizzi. In-nuqqas ta’ kompetizzjoni jwassal għal żieda fl-ispejjeż għall-maniġers tal-fondi u għal strutturi ta’ fondi inqas effiċjenti, li jistgħu jaffettwaw ir-redditi tal-investituri. Hemm potenzjal li jiżdied it-titjib fl-effiċjenza fil-ġestjoni tal-fondi ta’ investiment billi titnaqqas il-konċentrazzjoni tas-suq tad-depożitarji f’ċerti swieq nazzjonali filwaqt li jiġi żgurat li l-fornituri tas-servizzi jirrispettaw l-istandards Ewropej.

Hemm evidenza li xi drabi d-depożitarji ma jitħallewx iwettqu d-dmirijiet tagħhom meta l-assi tal-fond ikunu miżmuma minn Depożitarju Ċentrali tat-Titoli (“CSD”) 14 . Is-CSDs ma jitqisux bħala delegati tad-depożitarju 15 . Din is-sitwazzjoni legali ma tiżgurax fluss stabbli ta’ informazzjoni bejn il-kustodju tal-assi tal-AIF jew tal-UCITS u d-depożitarju, fil-każijiet kollha. Konsegwentement, id-depożitarji ma jistgħux jissodisfaw id-dmirijiet tagħhom ta’ sorveljanza b’mod effettiv jekk ma jkun hemm l-ebda fluss stabbli ta’ informazzjoni dwar il-movimenti tal-portafoll. Din is-sitwazzjoni legali tista’ tfixkel il-protezzjoni tal-investituri.

Ir-reġim ta’ delega fl-oqfsa legali għall-AIFMs u l-UCITS jippermetti l-ġestjoni effiċjenti tal-portafolli ta’ investiment u l-akkwist tal-għarfien espert meħtieġ f’suq ġeografiku jew klassi tal-assi partikolari. Dan il-mudell jikkontribwixxi għas-suċċess tat-tikketti tal-fondi u tal-maniġers tal-UE. Fl-istess ħin, l-evalwazzjoni tikkonkludi, kif appoġġat mill-ESMA, li prattiki superviżorji nazzjonali differenti fl-issodisfar tar-rekwiżiti tal-UE għad-delega ta’ ġestjoni tar-riskju jew tal-portafoll lil partijiet terzi joħolqu inkonsistenzi li jistgħu jnaqqsu l-livell ġenerali ta’ protezzjoni tal-investituri 16 . Ċarezza insuffiċjenti tal-istandards regolatorji applikabbli tnaqqas iċ-ċertezza legali, iżżid id-diverġenza fl-eżiti superviżorji u fl-aħħar mill-aħħar tonqos milli tiżgura livell uniformi ta’ protezzjoni tal-investituri madwar l-Unjoni.

Ikunu meħtieġa miżuri addizzjonali sabiex jiġu implimentati r-rekwiżiti tad-Direttiva li jiżguraw li l-AIFMs jużaw ir-riżorsi umani meħtieġa biex iwettqu l-kompiti miżmuma fejn xi wħud mill-funzjonijiet tagħhom jiġu delegati lil partijiet terzi, kif ukoll sabiex parti kbira mir-regoli ta’ implimentazzjoni jiġu trasferiti, kif stabbilit fir-Regolament dwar Maniġers ta’ Fondi ta’ Investiment Alternattivi (“AIFMR”) f’dan il-qasam, għall-qafas regolatorju tal-UCITS 17 . Dawn il-miżuri jiġu stabbiliti fl-atti ta’ implimentazzjoni tal-Kummissjoni ladarba l-mandat biex isir dan jingħata permezz tal-adozzjoni ta’ din il-proposta għall-emendar tad-direttivi.

Qed jiġu proposti bidliet kemm għall-AIFMD kif ukoll għall-UCITSD dwar id-delega, il-ġestjoni tar-riskju tal-likwidità, ir-rapportar tad-data għal skopijiet ta’ monitoraġġ tas-suq u t-trattament regolatorju tal-kustodji, filwaqt li l-AIFMD biss jenħtieġ li jiġi emendat fir-rigward tal-attivitajiet ta’ fondi ta’ investiment li joriġinaw self u l-aċċess għal servizzi tad-depożitarji bejn il-fruntieri.

•Konsistenza mad-dispożizzjonijiet ta’ politika eżistenti fil-qasam ta’ politika

Il-proposti biex tiġi emendata l-leġiżlazzjoni dwar il-fondi Ewropej tal-investiment huma konformi mal-pjan tal-Kummissjoni għal CMU adottat fl-24 ta’ Settembru 2020. L-għan tas-CMU huwa li tippermetti l-fluss tal-kapital madwar l-UE għall-benefiċċju tal-konsumaturi, tal-investituri u tal-kumpaniji, irrispettivament mill-post fejn jinsabu. Il-kriżi tal-Covid-19 għamlitha aktar urġenti li s-CMU titwettaq peress li l-finanzjament ibbażat fuq is-suq huwa essenzjali għall-irkupru tal-ekonomija Ewropea u għar-ritorn għal tkabbir fit-tul. Il-bidliet leġiżlattivi proposti jappoġġaw l-integrazzjoni tas-suq tal-fondi, u b’hekk jgħinu biex jintlaħqu dawk l-objettivi.

F’CMU effiċjenti u sorveljata b’mod effettiv, il-fondi li joriġinaw self jistgħu jipprovdu sors alternattiv ta’ finanzjament lill-korporattivi u lill-SMEs tal-Ewropa li jiftħu l-aċċess tagħhom għal firxa usa’ ta’ għażliet ta’ finanzjament bi prezz kompetittiv 18 . Dawn il-fondi għandhom il-potenzjal li jappoġġaw direttament il-ħolqien tal-impjiegi, it-tkabbir ekonomiku, l-innovazzjoni, it-tranżizzjoni ekoloġika u li jgħinu fl-irkupru mill-pandemija tal-Covid-19. Il-fondi li joriġinaw self jistgħu jservu wkoll bħala garanzija ta’ kontinġenza komuni jew ammortizzatur meta l-likwidità tkun ristretta, billi jkomplu jipprovdu finanzjament ta’ self meta l-mutwanti aktar tradizzjonali ma jkunux għadhom qed jissellfu. Għalhekk, il-proposti leġiżlattivi huma allinjati mal-istrateġija ġenerali tas-CMU li tkompli tibni suq intern għas-servizzi finanzjarji u biex il-finanzjament isir aktar aċċessibbli għall-kumpaniji Ewropej.

Barra minn hekk, l-emendi proposti għall-AIFMD u għall-UCISTD għandhom l-għan li jipproteġu aħjar l-interessi tal-investituri billi jiżguraw li l-maniġers tal-fondi ta’ investiment, li jiddelegaw il-funzjonijiet tagħhom lil partijiet terzi, jaderixxu mal-istess standards għoljin applikabbli madwar l-Unjoni.

Apparti dan, il-proposta emendatorja tal-AIFMD fiha miżuri rigward id-disponibbiltà u l-użu tal-LMTs matul żminijiet ta’ stress fis-suq. Il-possibbiltà li jiġu attivati l-LMTs tista’ tipproteġi l-valur tal-flus tal-investituri, tnaqqas il-pressjoni ta’ likwidità fuq il-fond u ttaffi kontra implikazzjonijiet usa’ ta’ riskju sistemiku f’sitwazzjonijiet ta’ stress fis-suq kollu. Il-proposta ta’ rapportar superviżorju tikkontribwixxi għall-istabbiliment ta’ spazju komuni tad-data fis-settur finanzjarju, li huwa parti mill-Istrateġija dwar il-Finanzi Diġitali 19 . Id-data rrapportata mill-AIFMs u mill-UCITS tkun parti minn sistema integrata għall-ġbir tad-data li twassal data preċiża, komparabbli u f’waqtha lill-awtoritajiet superviżorji Ewropej u nazzjonali, filwaqt li timminimizza l-ispejjeż u l-piż aggregati tar-rapportar għall-partijiet kollha.

Barra minn hekk, ir-rieżami tal-AIFMD ikollu impatt fuq l-AIFMs li jimmaniġġjaw l-AIFs li huma regolati mir-Regolament dwar il-Fondi ta’ Investiment Ewropej fuq Terminu Twil (“ELTIF”) (ELTIFR – ir-Regolament (UE) 2015/760) 20 . L-ELTIFR huwa regolament Ewropew dwar il-prodotti, li jiġi rieżaminat b’mod parallel mal-AIFMD u fl-istess jum bħal din il-proposta tiġi adottata proposta leġiżlattiva biex jiġi emendat l-ELTIFR. L-AIFMs li jimmaniġġjaw l-ELTIFs x’aktarx li jibbenefikaw minn aċċess aktar faċli għas-servizzi tad-depożitarji transfruntieri, jekk dawk il-fondi jkunu jinsabu fi swieq iżgħar. It-titjib tar-rekwiżiti ta’ rapportar superviżorju jkollu wkoll effett pożittiv fuq il-piż regolatorju tal-AIFMs li jimmaniġġjaw l-ELTIFs fuq terminu itwal. L-inklużjoni tas-CSDs fil-katina tal-kustodja jkollha effett pożittiv fuq l-interessi tal-investituri fir-rigward tal-proporzjon tal-investimenti tal-ELTIF, li jistgħu jinżammu f’kustodja mis-CSDs.

Punt ieħor tal-interazzjoni tal-ELTIFR u tal-AIFMD emendata se jikkonċerna l-attivitajiet ta’ oriġinazzjoni tas-self. Id-Direttiva proposta timponi xi prinċipji ġenerali fuq l-AIFMs attivi fis-swieq tal-kreditu. Il-limiti stabbiliti proposti għas-self mill-AIFs lill-istituzzjonijiet finanzjarji huma allinjati mal-limitu stabbilit ta’ diversifikazzjoni applikabbli għal dawk l-ELTIFs li huma kkummerċjalizzati biss lil investituri fil-livell tal-konsumatur. F’każ li jkun hemm diverġenza bejn l-AIFMD u l-ELTIFR, ir-regoli tal-prodotti tal-ELTIFR japplikaw bħala lex specialis.

•Konsistenza ma’ politiki oħrajn tal-Unjoni

Il-ħolqien ta’ suq intern għall-fondi li joriġinaw self huwa mistenni li jżid id-disponibbiltà ta’ sorsi alternattivi ta’ finanzjament għall-ekonomija reali. L-attivitajiet ta’ tali fondi fis-suq tal-kreditu x’aktarx li jiffaċilitaw it-tranżizzjoni għall-futur sostenibbli billi jinvestu fl-ekonomija ekoloġika, u b’hekk jappoġġaw objettivi usa’ tal-Patt Ekoloġiku Ewropew.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

L-Artikolu 53(1) tat-TFUE (ex Artikolu 47(2) KE) huwa l-bażi ġuridika għad-Direttivi 2011/61/UE u 2009/65/KE. Għall-għażliet ta’ politika magħżula u t-tfassil speċifiku tar-regoli, il-bażi ġuridika xierqa hija l-Artikolu 53(1) tat-TFUE dwar il-bidu u t-twettiq ta’ attivitajiet minn persuni li jaħdmu għal rashom. Huwa jintuża biex jiġu regolati l-intermedjarji finanzjarji, kif ukoll is-servizzi u l-attivitajiet ta’ investiment tagħhom.

It-titjib propost għall-AIFMD ifittex li jippromwovi proċessi sodi għall-oriġinazzjoni tas-self mill-AIFs u li jkompli jintegra s-suq f’dan is-segment, filwaqt li jiżgura li, b’mod ġenerali, ir-riskji għall-istabbiltà finanzjarja jiġu mmonitorjati aħjar. Ir-regoli dwar id-disponibbiltà u l-użu ta’ għodod għall-ġestjoni tal-likwidità mill-AIFMs u mill-UCITS jeħtieġ li jiġu armonizzati biex jiġi żgurat li kwalunkwe rispons mill-maniġers tal-fondi ta’ fondi miftuħa jew mis-superviżuri f’sitwazzjonijiet ta’ stress fis-suq ikun aktar effettiv. L-iffaċilitar tal-aċċess għall-forniment transfruntier ta’ servizzi tad-depożitarji għandu l-għan li jkompli jintegra s-suq tal-AIF tal-UE filwaqt li jiġi żgurat livell għoli ta’ protezzjoni tal-investituri. Il-proposta tfittex li tikseb approċċ koerenti għall-attivitajiet ta’ delega mill-maniġers u mis-superviżuri tal-fondi ta’ investiment Ewropej.

L-azzjonijiet unilaterali mill-Istati Membri ma jistgħux jimlew in-nuqqasijiet regolatorji tal-AIFMD u ma jistgħux jilħqu dawn l-objettivi individwalment. Għaldaqstant, l-UE tista’ tadotta miżuri f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea.

•Sussidjarjetà (għall-kompetenzi mhux esklużivi)

It-titjib fl-AIFMD u fil-UCISTD li qed jiġi propost jikkompleta din is-sistema regolatorja b’rekwiżiti u kjarifiki regolatorji addizzjonali, għandu l-għan li jippreserva l-bilanċ bejn l-armonizzazzjoni tal-miżuri ewlenin ta’ kontroll tar-riskju, u li jippreserva l-flessibbiltà tal-Istati Membri biex jimplimentaw l-istandards regolatorji miftiehma.

•Proporzjonalità

L-emendi proposti jirrispettaw il-prinċipju tal-proporzjonalità, kif stabbilit fl-Artikolu 5 tat-Trattat dwar l-Unjoni Ewropea (TUE), u ma jmorrux lil hinn minn dak li huwa meħtieġ biex jintlaħqu l-objettivi għall-ikkompletar ta’ suq uniku għall-AIFs, filwaqt li jiġi żgurat approċċ koerenti għas-sorveljanza makroprudenzjali tas-suq tal-AIF tal-UE u għall-protezzjoni ta’ livell għoli tal-investituri.

Fejn xieraq, ir-rekwiżiti ġodda imposti fuq l-AIFMs li jimmaniġġjaw AIFs li joriġinaw self huma mfassla bħala prinċipji ġenerali. Fejn ir-rekwiżiti regolatorji jkunu speċifiċi, dawn ma jfixklux bla bżonn il-mudelli eżistenti tan-negozju. Fir-rigward tal-protezzjoni tal-investituri, ir-rekwiżiti ta’ divulgazzjoni addizzjonali proposti huma konformi mal-aħjar prattika tas-suq li jenħtieġ li tiġi estiża għall-investituri kollha fl-Unjoni, filwaqt li jiġi żgurat l-istess livell ta’ protezzjoni tal-investituri.

Il-proposti li jippermettu l-aċċess transfruntier għas-servizzi tad-depożitarji jilħqu l-bilanċ tajjeb bejn il-ħtiġijiet tal-AIFs u dawk tal-investituri, filwaqt li jiġu evitati r-riskji li jistgħu jinħolqu jekk ma jkun hemm l-ebda regolamentazzjoni komprensiva tas-servizzi depożitarji fil-livell tal-UE. Barra minn hekk, l-inklużjoni tas-CSDs fil-katina tal-kustodja hija meħtieġa biex jitneħħew in-nuqqasijiet regolatorji li jfixklu l-kapaċità tad-depożitarji li jwettqu dmirijiethom u li huwa potenzjalment ta’ detriment għall-investituri tal-AIF u tal-UCITS. Miżura proposta hija proporzjonata u tqis l-istatus ta’ entitajiet diġà liċenzjati.

Il-kjarifiki proposti għar-reġimi ta’ delega jippreservaw il-karatteristiċi siewja ta’ dawn l-attivitajiet filwaqt li jiżguraw li jintużaw biżżejjed riżorsi umani biex jissorveljaw li d-delegat u l-funzjonijiet ewlenin jinżammu mill-maniġer ta’ AIF jew UCITS.

Konsegwentement, il-proposta leġiżlattiva hija proporzjonata għall-objettivi segwiti.

•Għażla tal-istrument

3.IR-RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

Il-Kummissjoni wettqet evalwazzjoni tal-AIFMD u kkonkludiet li l-AIFMD ġeneralment ħadmet tajjeb u fil-biċċa l-kbira laħqet l-objettivi tagħha li tistabbilixxi qafas superviżorju effettiv għall-AIFMs, fejn żgurat livelli għoljin ta’ protezzjoni tal-investituri u li tiffaċilita l-ħolqien tas-suq tal-AIF tal-UE. Madankollu, sabiex jitqiesu l-iżviluppi ġodda fis-suq mid-dħul fis-seħħ tal-AIFMD, hija tista’ tibbenefika minn titjib immirat lejn dawk l-elementi tal-qafas li ma kinux indirizzati biżżejjed fil-bidu tad-Direttiva.

L-approċċi nazzjonali diverġenti jagħmluha diffiċli li jiġu pprovduti servizzi fi Stat Membru ieħor u jimpedixxu l-iżvilupp tas-suq intern għall-AIFs. Il-provvista insuffiċjenti ta’ servizzi tad-depożitarji u standards regolatorji nazzjonali differenti għall-AIFs li joriġinaw self ifixklu l-kundizzjonijiet ekwivalenti ta’ kompetizzjoni għall-AIFs. Barra minn hekk, ir-regoli nazzjonali differenti dwar l-AIFs li joriġinaw self u l-aċċessibbiltà insuffiċjenti tad-data tas-suq għas-superviżuri joħolqu diffikultajiet biex is-superviżuri jimmonitorjaw ir-riskju għall-istabbiltà finanzjarja u jippreservaw l-integrità tas-suq. Bl-istess mod, id-disponibbiltà diverġenti ta’ għodod għall-ġestjoni tal-likwidità tillimita l-effettività ta’ rispons possibbli mill-maniġers tal-fondi ta’ fondi miftuħa jew mis-superviżuri f’sitwazzjonijiet ta’ stress fis-suq. Fl-aħħar nett, il-fehim differenti tar-regoli tad-delega mis-superviżuri jfixkel iċ-ċertezza legali għall-maniġers tal-fondi u l-livell għoli ta’ protezzjoni tal-investituri, b’mod partikolari fejn l-entitajiet Ewropej jiddelegaw il-ġestjoni tar-riskju jew tal-portafoll barra mill-Unjoni Ewropea.

•Konsultazzjonijiet mal-partijiet ikkonċernati

Fit-22 ta’ Ottubru 2020, tnediet konsultazzjoni pubblika dwar ir-rieżami tal-AIFMD b’102 mistoqsijiet dwar diversi aspetti tar-rieżami tal-AIFMD. Hija ngħalqet fid-29 ta’ Jannar 2021 b’132 tweġiba.

Ftit aktar minn nofs ir-rispondenti għall-konsultazzjoni pubblika ma kellhomx opinjoni dwar jekk hemmx bżonn li jiġu armonizzati r-rekwiżiti għall-AIFMs li jimmaniġġjaw l-AIFs li joriġinaw self. Dan il-grupp kien jinkludi l-akbar assoċjazzjonijiet tal-industrija. 23 % tar-rispondenti kienu tal-fehma li ma hemm bżonn tal-ebda regola oħra, filwaqt li fost l-awtoritajiet pubbliċi, 7 minn 10 Stati Membri li wieġbu għall-konsultazzjoni pubblika, qablu li r-rekwiżiti għall-AIFMs li jimmaniġġjaw l-AIFs li joriġinaw self kellhom jiġu armonizzati fil-livell tal-UE. Huma qiesu li r-regoli tal-UE huma meħtieġa biex jiġu livellati l-kundizzjonijiet u jiġu indirizzati r-riskji li jistgħu jinħolqu minħabba din l-attività. Il-proposta toħloq bilanċ tajjeb bejn dak li huwa meħtieġ għall-preservazzjoni tal-istabbiltà finanzjarja u għall-iffaċilitar tal-iżvilupp tas-suq tal-AIFs li joriġinaw self fl-Unjoni.

Bl-istess mod, il-maġġoranza tal-awtoritajiet pubbliċi li wieġbu għall-konsultazzjoni pubblika appoġġaw il-proposta biex jiġu ċċarati r-regoli tad-delega tal-AIFMD u l-UCITSD. B’kuntrast ma’ dan, il-maġġoranza l-kbira tar-rispondenti mill-industrija tqis li r-regoli tad-delega huma ċari biżżejjed biex jipprevjenu l-ħolqien ta’ entità kaxxa tal-ittri fl-UE. Madankollu, xi rispondenti riedu kjarifika ulterjuri dwar jekk prattika tan-negozju taqax fil-kamp ta’ applikazzjoni tad-delega, peress li l-Istati Membri varjaw b’mod sinifikanti fl-interpretazzjoni tagħhom. Il-proposta tipprovdi l-kjarifiki meħtieġa filwaqt li tippreserva l-benefiċċji tar-reġimi ta’ delega taħt l-AIFMD u l-UCITSD.

Hemm appoġġ wiesa’ fost il-partijiet ikkonċernati tas-settur privat u pubbliku għall-armonizzazzjoni tal-għodod għall-ġestjoni tal-likwidità fil-livell tal-UE (28/40 kumplessivament, 8/9 awtoritajiet pubbliċi, 15/23 industrija). Hemm ukoll appoġġ għat-titjib tal-kooperazzjoni fost l-Awtoritajiet Nazzjonali Kompetenti (NCAs) f’każ li jiġu attivati l-LMTs (15/40 kumplessivament, 5/9 awtoritajiet pubbliċi, 6/23 industrija), b’mod partikolari f’sitwazzjonijiet b’implikazzjonijiet transfruntieri. Huma jappoġġaw il-proposta li twessa’ d-disponibbiltà tal-LMTs madwar l-Unjoni u li tagħti s-setgħa lill-maniġers tal-fondi kif ukoll lis-superviżuri biex jużaw l-LMTs f’kundizzjonijiet ta’ stress fis-suq.

Il-maġġoranza tal-partijiet ikkonċernati (madwar 70 %) u l-ESMA (fl-opinjoni tagħha) jappoġġaw li s-CSDs jidħlu fil-katina tal-kustodja. Il-proposta hija proporzjonata peress li ma teħtieġx li d-depożitarji jwettqu diliġenza dovuta fuq is-CSDs Ewropej.

Dwar il-kwistjoni ta’ swieq depożitarji iżgħar, l-awtoritajiet pubbliċi mill-Istati Membri fir-rispons tagħhom għall-konsultazzjoni pubblika indikaw li jappoġġaw l-għażla miżmuma biex l-NCAs jingħataw is-setgħa li jippermettu l-akkwist ta’ servizzi tad-depożitarji bejn il-fruntieri. Il-maġġoranza tar-rispondenti ma appoġġawx l-introduzzjoni tal-passaport tad-depożitarju minħabba r-riskju ta’ konċentrazzjoni tas-suq tad-depożitarji, il-protezzjoni aktar baxxa tal-investituri u sfidi superviżorji. Il-Kummissjoni, għalhekk, qed tipproponi miżura biex jinfetaħ l-aċċess għas-servizzi tad-depożitarji bejn il-fruntieri, fejn dan ikun meħtieġ saż-żmien meta jiġu osservati żviluppi regolatorji pożittivi f’dan il-qasam.

Il-maġġoranza tal-partijiet ikkonċernati ppreferew approċċ inkrementali għal bidliet potenzjali fir-rekwiżiti ta’ rapportar superviżorju għall-AIFMs u għall-UCITS. Dan l-approċċ huwa adottat fil-proposta, billi jiġi awtorizzat studju ta’ fattibbiltà fil-fond mis-superviżuri li jinkludi l-esplorazzjoni ta’ sinerġiji potenzjali bejn ir-rekwiżiti ta’ rapportar superviżorju eżistenti skont liġijiet differenti tal-UE.

•Ġbir u użu tal-għarfien espert

Fir-rieżami tal-AIFMD, il-Kummissjoni bbażat fuq il-ħidma preparatorja estensiva minn kuntrattur estern, li wettaq stħarriġ ġenerali u pproduċa studju bbażat fuq l-evidenza dwar l-effettività tal-AIFMD 21 . Il-Kummissjoni qieset ukoll l-eżiti minn konferenza virtwali dwar ir-rieżami tal-AIFMD li ġiet organizzata fil-25 ta’ Novembru 2020 u li kienet tinvolvi Membru tal-Parlament Ewropew, superviżuri nazzjonali, il-BERS, l-ESMA, rappreżentanti tal-interessi tal-industrija u tal-investituri. Barra minn hekk, il-Kummissjoni qagħdet fuq data minn Morningstar u fuq informazzjoni ppreżentata f’rapporti mill-ESMA, mill-Bord għall-Istabbiltà Finanzjarja (FSB) u mill-Organizzazzjoni Internazzjonali tal-Kummissjonijiet tat-Titoli (IOSCO), minbarra rapporti, studji, stħarriġ, dokumenti ta’ pożizzjoni u dokumenti rilevanti oħra disponibbli għall-pubbliku mfassla minn partijiet ikkonċernati privati u pubbliċi. Il-Kummissjoni qieset il-kontribut minn workshops, laqgħat bilaterali u konsultazzjonijiet mal-Istati Membri u mal-partijiet ikkonċernati tal-industrija, inklużi maniġers tal-assi, manifatturi tal-prodotti, rappreżentanti tal-investituri fil-livell tal-konsumatur u fondi ta’ investiment attivi f’investiment alternattiv. Fl-aħħar nett, ġiet rieżaminata l-letteratura akkademika, b’mod partikolari l-letteratura dwar l-effetti tal-AIFMD fuq is-swieq, l-istabbiltà finanzjarja u l-protezzjoni tal-investituri.

•Valutazzjoni tal-impatt

Fis-16 ta’ Lulju 2021, il-Bord tal-Iskrutinju Regolatorju (“RSB”) ħareġ opinjoni pożittiva dwar il-valutazzjoni tal-impatt (IA) sottomessa għar-rieżami tal-AIFMD u talab aktar kjarifiki.

Bl-istess mod, tqiesu livelli differenti ta’ intervent għall-ġestjoni tar-riskju tal-likwidità biex tiġi żgurata l-istabbiltà finanzjarja. L-għażla magħżula hija l-inqas waħda preskrittiva. Il-maniġers tal-fondi ta’ fondi miftuħa jkunu jistgħu jissospendu r-riakkwist jew it-tifdija tal-unitajiet jew tal-ishma tal-AIF jew tal-UCITS temporanjament. Huma jkunu meħtieġa wkoll jagħżlu mill-inqas għodda waħda oħra għall-ġestjoni tal-likwidità, mingħajr ma jiġi impost liema waħda, u b’hekk id-deċiżjoni finali titħalla f’idejn il-maniġers tal-fondi, li jistgħu jattivaw jekk iċ-ċirkostanzi jirrikjedu dan. Din il-miżura tappoġġa l-istabbiltà tas-sistema finanzjarja.

•Idoneità regolatorja u simplifikazzjoni

L-approċċ ġenerali meħud fir-rieżami tal-AIFMD huwa li jiġu proposti miżuri, li huma strettament meħtieġa fl-interess tal-istabbiltà finanzjarja, tal-integrazzjoni tas-suq jew tal-protezzjoni tal-investituri, u li jiġu indirizzati kwistjonijiet fejn hemm tħassib ċar fir-rigward tal-partijiet ikkonċernati.

L-emenda proposta li tippermetti li s-servizzi tad-depożitarji jiġu akkwistati bejn il-fruntieri hija mistennija li tiġġenera ffrankar kemm għad-depożitarji kif ukoll għall-utenti tas-servizzi depożitarji, inklużi l-AIFMs iżgħar. It-tariffi ta’ darba għal liċenzja ġdida u t-tariffi annwali tal-liċenzja għad-depożitarji jvarjaw rispettivament bejn EUR 6000 u EUR 9200, skont l-Istat Membru u bejn EUR 4,400 – EUR 9,400, skont l-Istat Membru. Iż-żieda fil-kompetizzjoni bejn il-fornituri tas-servizzi depożitarji x’aktarx li teżerċita pressjoni ’l isfel fuq il-prezz tas-servizz.

L-approċċ previst għad-data superviżorja se jissimplifika l-obbligi attwali ta’ rapportar. Dan se jinvolvi ffrankar fuq terminu twil minħabba li għandu l-għan li jnaqqas l-għadd ta’ awtoritajiet pubbliċi, li għalihom AIFM jirrapporta data li tikkoinċidi. L-approċċ jiżgura wkoll li l-ispejjeż ta’ darba li jirriżultaw mill-emendi jitnaqqsu kemm jista’ jkun, billi jipprovdi ppjanar minn qabel xieraq u perspettiva sħiħa għar-rapportar superviżorju f’biċċiet differenti tal-leġiżlazzjoni tal-UE, filwaqt li jitqiesu l-iżviluppi fl-ambjent diġitali.

•Drittijiet fundamentali

4.IMPLIKAZZJONIJIET BAĠITARJI

5.ELEMENTI OĦRA

•Pjanijiet ta’ implimentazzjoni u arranġamenti ta’ monitoraġġ, ta’ evalwazzjoni u ta’ rapportar

•Spjegazzjoni fid-dettall tad-dispożizzjonijiet speċifiċi tal-proposta

Emendi għad-Direttiva 2011/61/UE

L-Artikolu 15(4a)(4b)(4c) jiddaħħal biex jitnaqqas ir-riskju għas-sistema finanzjarja billi jiġi ristrett is-self lil mutwatarju wieħed, meta dan il-mutwatarju jkun istituzzjoni finanzjarja.

L-Artikolu 15(4d) jiddaħħal biex jiġu evitati kunflitti ta’ interess potenzjali billi l-AIF jew il-persunal tiegħu, id-depożitarju tiegħu jew id-delegat tiegħu ma jitħallewx jisilfu.

L-Artikolu 15(4e) jiddaħħal biex jiġu evitati sitwazzjonijiet ta’ periklu morali fejn is-self ikun oriġina biex jinbiegħ immedjatament fis-suq sekondarju. Għal dan, qed jiġi propost li l-AIFs ikunu meħtieġa jżommu interess ekonomiku ta’ 5 % tal-valur nozzjonali tas-self li jkunu taw u biegħu.

L-Artikolu 16(2a) jiddaħħal biex jiġu evitati diskrepanzi fil-maturità li jistgħu joħolqu riskji finanzjarji. Għalhekk, huwa propost li jintalab li l-AIFs jadottaw struttura magħluqa meta jinvolvu ruħhom f’oriġinazzjoni tas-self b’mod sinifikanti (60 %).

Sabiex jiġu indirizzati b’mod effettiv ir-riskji mikroprudenzjali u dawk makroprudenzjali, l-Artikolu 16 huwa ssupplimentat bil-paragrafi (2b) u (2c) sabiex jippermetti lill-AIFMs li jimmaniġġjaw l-AIFs miftuħa jaċċessaw l-għodod meħtieġa għall-ġestjoni tar-riskju tal-likwidità f’ċirkostanzi eċċezzjonali. Minbarra li jistgħu jissospendu t-tifdijiet, huwa propost li tali AIFMs ikunu meħtieġa jagħżlu mill-inqas LMT wieħed ieħor mill-Anness V, li jarmonizza l-lista minima li jenħtieġ li tkun disponibbli fi kwalunkwe post fl-Unjoni. L-Artikolu 16(2e) jirrikjedi li l-Istati Membri jiżguraw li dan ikun il-każ fil-ġurisdizzjonijiet tagħhom. Jiżdied il-paragrafu (2d) li jirrikjedi li l-AIFMs jinnotifikaw lill-awtoritajiet kompetenti dwar l-attivazzjoni jew id-diżattivazzjoni ta’ LMT.

L-Artikolu 16(2g) u (2h) ifittex li jiżgura applikazzjoni koerenti tal-paragrafi (2b) u (2c) fl-istess Artikolu. Għalhekk, l-ESMA għandha l-kompitu li tiżviluppa abbozzi ta’ standards tekniċi regolatorji biex tipprovdi definizzjonijiet u tispeċifika l-karatteristiċi tal-LMTs stabbiliti fl-Anness u għandha l-kompitu li tiżviluppa standards tekniċi regolatorji dwar l-għażla u l-użu ta’ LMTs xierqa mill-AIFMs.

Il-punt (j) fil-paragrafu (2) tal-Artikolu 46 huwa emendat, u jagħti s-setgħa lill-awtoritajiet kompetenti li jirrikjedu li AIFM jattiva jew jiddiżattiva LMT rilevanti. Din is-setgħa hija estiża biex tkopri lill-AIFMs mhux tal-UE wkoll billi jiżdied il-punt (d) fil-paragrafu (4) tal-Artikolu 47. Il-paragrafi (5a) sa (5g) proposti tal-Artikolu 50 jitolbu li l-awtoritajiet kompetenti jinnotifikaw lill-awtoritajiet rilevanti l-oħra, lill-ESMA u lill-BERS qabel ma jeħtieġu l-attivazzjoni jew id-diżattivazzjoni ta’ għodda għall-ġestjoni tal-likwidità. Il-paragrafi proposti jistabbilixxu wkoll il-prinċipji ta’ kooperazzjoni f’każijiet bħal dawn. Il-paragrafu (7) propost fl-Artikolu 50 jagħti s-setgħa lill-ESMA biex tiżviluppa standards tekniċi regolatorji li jindikaw meta l-intervent tal-awtoritajiet kompetenti jkun ġustifikat.

L-Artikolu 20(1) huwa emendat biex jiċċara li l-arranġamenti ta’ delega japplikaw għall-funzjonijiet kollha elenkati fl-Anness I u għas-servizzi anċillari permessi skont l-Artikolu 6(4). Il-lingwa li tirreferi għas-servizzi u mhux għall-funzjonijiet biss hija introdotta kif xieraq fil-punt (f) tal-Artikolu 20(1) u fil-paragrafi 3, 4 u 6 tal-Artikolu 20.

L-aħħar inċiż tal-Artikolu 21(11) huwa emendat biex iġib lid-depożitorji ċentrali tat-titoli (CSDs) fil-katina tal-kustodja fejn ikunu qed jipprovdu servizzi ta’ kustodja f’kompetizzjoni, u b’hekk jinħolqu kundizzjonijiet ekwivalenti fost il-kustodji u jiġi żgurat li d-depożitarji jkollhom aċċess għall-informazzjoni meħtieġa biex iwettqu dmirijiethom. Huwa propost li d-depożitarji jinħelsu mir-rekwiżit li jwettqu diliġenza dovuta ex-ante meta l-kustodju jkun CSD minħabba li jkun ġie eżaminat biżżejjed meta jkun qed ifittex li jiġi awtorizzat bħala tali.

Sabiex tiġi żgurata superviżjoni aħjar, l-Artikolu 21(16) huwa emendat sabiex id-depożitarji jikkooperaw mhux biss mal-awtoritajiet kompetenti tagħhom, iżda wkoll mal-awtoritajiet kompetenti tal-AIF li jkun ħatru bħala depożitarju u mal-awtoritajiet kompetenti tal-AIFM li jimmaniġġa l-AIF.

L-Artikolu 23 huwa supplimentat fil-paragrafi (1) u (4) biex tittejjeb it-trasparenza tal-attivitajiet tal-AIFM għall-investituri, b’divulgazzjonijiet addizzjonali li l-AIFM irid jiżgura, jiġifieri kundizzjonijiet għall-użu tal-LMTs u tariffi li jitħallsu mill-AIFM jew mill-affiljati tiegħu u r-rapportar perjodiku fuq it-tariffi u l-imposti diretti u indiretti kollha li jkunu ġew imposti jew allokati direttament jew indirettament lill-AIF jew lil kwalunkwe wieħed mill-investimenti tiegħu. L-AIFMs huma meħtieġa wkoll jirrapportaw lill-investituri l-kompożizzjoni tal-portafoll ta’ self oriġinat.

L-Artikolu 24(1) huwa emendat u l-punt (d) fl-Artikolu 24(2) jitħassar u b’hekk jitneħħew il-limitazzjonijiet fil-paragrafu (1) dwar id-data li l-awtoritajiet kompetenti jenħtieġ li jkunu jistgħu jirċievu mingħand l-AIFMs dwar l-AIFs immaniġġati tiegħu. Qed jiġi propost li l-ESMA tiżviluppa abbozzi ta’ standards tekniċi regolatorji u abbozzi ta’ standards tekniċi ta’ implimentazzjoni biex tissostitwixxi l-mudell ta’ rapportar superviżorju attwali stabbilit fl-Anness IV tal-AIFMD li tissupplimenta l-AIFMR.

Bl-inklużjoni tal-Artikolu 38a, l-ESMA hija meħtieġa twettaq regolarment rieżami bejn il-pari tal-prattiki superviżorji fl-applikazzjoni tar-regoli dwar id-delega b’enfasi partikolari fuq il-prevenzjoni tal-ħolqien ta’ entitajiet kaxxa tal-ittri. Artikolu 69b ġdid ikun jeħtieġ li l-Kummissjoni tirrieżamina r-reġim ta’ delega stabbilit fid-Direttiva 2011/61/UE u l-miżuri ta’ implimentazzjoni tagħha bil-għan li jiġu proposti l-emendi meħtieġa biex tiġi prekluża l-formazzjoni ta’ entitajiet kaxxa tal-ittri. Jenħtieġ li tiġi evalwata wkoll il-possibbiltà li jiġu introdotti l-passaport depożitarju u l-funzjonament tar-regoli għal AIFMDs li jimmaniġġjaw AIFs li joriġinaw self.

Il-kooperazzjoni superviżorja hija msaħħa billi jiddaħħal il-paragrafu (5a sa 5g) fl-Artikolu 50. L-awtorità kompetenti ta’ Stat Membru ospitanti tal-AIFM tista’ titlob lill-awtorità kompetenti tal-Istat Membru domiċiljari tal-AIFM teżerċita s-setgħat superviżorji tagħha filwaqt li tispeċifika r-raġunijiet għat-talba tagħha u tinnotifika lill-ESMA u lill-BERS, jekk ikun hemm riskji għall-istabbiltà finanzjarja. L-emendi għall-paragrafu (5) fl-Artikolu 50 ibaxxu l-piż tal-provi għall-awtoritajiet kompetenti billi jitolbu li l-awtoritajiet riċeventi jieħdu azzjoni xierqa. Barra minn hekk, l-ESMA għandha s-setgħa li titlob lil awtorità kompetenti biex tippreżenta każ quddiem il-kumitat permanenti tagħha, li jista’ jkollu implikazzjonijiet transfruntieri jew impatt fuq l-istabbiltà finanzjarja jew il-protezzjoni tal-investituri. Barra minn hekk, l-Artikolu 50(7) jagħti mandat lill-ESMA biex tabbozza standards tekniċi regolatorji li jindikaw f’liema sitwazzjonijiet l-awtoritajiet kompetenti jistgħu jeżerċitaw is-setgħat fir-rigward tal-LMTs.

Qed jiġi propost li jiġi emendat il-paragrafu (5) tal-Artikolu 61, li jippermetti lill-awtoritajiet kompetenti jippermettu li s-servizzi tad-depożitarji jiġu akkwistati fi Stati Membri oħra sakemm jittieħdu l-miżuri wara rieżami tal-ħtieġa li jiġi introdott passaport depożitarju.

Qed jiġi propost li jiġi emendat l-Anness I billi jiżdied il-punt (3) biex is-self jiġi rikonoxxut bħala attività leġittima tal-AIFMs. Dan ifisser li l-AIFs jistgħu jestendu s-self fi kwalunkwe post fl-Unjoni, inkluż b’mod transfruntier. Il-punt (4) jiżdied mal-Anness I biex jilleġittima l-għoti ta’ servizzi ta’ entitajiet bi skop speċjali ta’ titolizzazzjoni (“SSPEs”) mill-AIFMs.

Qed jiġu proposti emendi għall-Artikoli 21(6)(c), 35(2)(b), 36(1)(c), 37(7)(e), 40(2)(b) u 42(1)(c) li jaġġornaw ir-rekwiżiti għall-entitajiet ta’ pajjiżi terzi li ma għandhomx jiġu stabbiliti fil-ġurisdizzjonijiet identifikati bħala pajjiżi b’riskju għoli skont l-aktar liġijiet Ewropej reċenti kontra l-ħasil tal-flus.

L-Artikoli 36(1) u 42(1) huma kkomplementati bil-punti (d) u (d) rispettivi li jipprevedu li l-AIFs mhux tal-UE jew l-AIFMs mhux tal-UE li huma soġġetti għal regoli nazzjonali u li huma attivi fi Stati Membri individwali jenħtieġ li jissodisfaw ir-rekwiżit li ma jkunux jinsabu f’pajjiż terz li jitqies li ma jikkooperax fi kwistjonijiet fiskali.

Qed jiġu proposti emendi għall-Artikoli 21(6)(d), 35(2)(c), 37(7)(f) u 40(2)(c) biex jiġu aġġornati r-rekwiżiti għal entitajiet ta’ pajjiżi terzi li jkollhom aċċess għas-suq intern biss jekk ikunu stabbiliti f’pajjiżi terzi li ma humiex elenkati fil-lista tal-UE ta’ ġurisdizzjonijiet li ma jikkooperawx għal finijiet tat-taxxa.

L-Artikolu 47(3) huwa emendat biex jippermetti lill-ESMA tiddivulga d-data tas-suq għad-dispożizzjoni tagħha f’forma aggregata jew fil-qosor, u għalhekk inaqqas l-istandard ta’ kunfidenzjalità.

Iddaħħlet klawżola ta’ rieżami - l-Artikolu 69b - li tagħti mandat lill-Kummissjoni biex tibda rieżami tad-dispożizzjonijiet relatati mad-delega, mas-servizzi depożitarji u mal-użu tal-LMTs. Hija tagħti wkoll mandat lill-ESMA biex toħroġ rapport immirat lejn is-simplifikazzjoni tar-rekwiżiti ta’ rapportar superviżorju għall-AIFMs u tieħdu bħala bażi għall-iżvilupp ta’ abbozzi ta’ standards tekniċi regolatorji għar-rapportar superviżorju skont l-Artikolu 24 tal-AIFMD.

Emendi għad-Direttiva 2009/65/KE

Fl-aħħar inċiż tal-Artikolu 22a, ir-raba’ paragrafu huwa emendat biex iqis lid-depożitorji ċentrali tat-titoli (CSDs) bħala delegati tad-depożitarju fejn ikunu qed jipprovdu servizzi ta’ kustodja kompetituri. Dan joħloq kundizzjonijiet ekwivalenti fost il-kustodji u jiżgura li d-depożitarji jkollhom aċċess għall-informazzjoni meħtieġa biex iwettqu dmirijiethom.

L-Artikolu 13(1) jiċċara li l-arranġamenti ta’ delega japplikaw għall-funzjonijiet kollha elenkati fl-Anness II u għas-servizzi anċillari permessi skont l-Artikolu 6(3). Il-lingwa li tirreferi għas-servizzi u mhux għall-funzjonijiet biss hija introdotta kif xieraq fil-punti (b), (g), (h) u (i) tal-Artikolu 13(1).

Sabiex l-oqfsa legali tad-Direttivi 2011/61/UE u 2009/65/KE jiġu allinjati aħjar għad-delega u sabiex l-awtoritajiet superviżorji jkunu jistgħu jirrieżaminaw ir-raġunijiet għad-delega, qed jiġi propost li l-UCITS tintalab tiġġustifika l-istruttura tad-delega kollha tagħha abbażi ta’ raġunijiet oġġettivi, billi jiddaħħal il-punt (j) fl-Artikolu 13(1).

Qed jiġi propost li jiżdied l-Artikolu 18a (1 u 2) sabiex, minbarra li jkunu jistgħu jissospendu t-tifdijiet, il-kumpaniji tal-maniġment tal-UCITS ikollhom jagħżlu mill-inqas LMT wieħed ieħor mill-Anness IIa, li jarmonizza l-lista minima li jenħtieġ li tkun disponibbli fi kwalunkwe post fl-UE. L-Artikolu 18a il-ġdid jirrikjedi li l-Istati Membri jiżguraw li dan ikun il-każ fil-ġurisdizzjonijiet tagħhom. L-Anness IIa huwa propost bil-lista minima ta’ dawn l-għodod. Sabiex tiġi żgurata l-informazzjoni tajba tal-investituri, huwa ssuġġerit li jiġu ċċarati l-proċeduri u l-kundizzjonijiet għar-riakkwist jew it-tifdija tal-unitajiet fl-Iskeda A tal-Anness I, il-punt 1.13, u li jiġu ċċarati ċ-ċirkostanzi li fihom ir-riakkwist jew it-tifdija jistgħu jiġu sospiżi jew jistgħu jiġu attivati jew diżattivati LMTs oħra.

L-Artikolu 18a (3 sa 5) ifittex li jiżgura applikazzjoni koerenti tad-dispożizzjonijiet preċedenti. Għalhekk, l-ESMA għandha l-kompitu li tiżviluppa abbozzi ta’ standards tekniċi regolatorji biex tipprovdi definizzjonijiet u tispeċifika l-karatteristiċi tal-LMTs stabbiliti fl-Anness.

L-Artikolu 20a ġdid jipproponi li jintroduċi obbligu ta’ rapportar superviżorju perjodiku għall-kumpaniji tal-maniġment fis-swieq u fl-istrumenti li fihom jinnegozjaw f’isem il-UCITS.

L-Artikolu 20b l-ġdid jipproponi li l-ESMA tingħata mandat, f’kooperazzjoni ma’ ASE oħrajn u mal-BĊE, biex tipproduċi rapport ta’ fattibbiltà dwar it-tiftix ta’ effiċjenzi fl-ispazju ta’ rapportar superviżorju. Ir-rapport jinforma dwar it-tfassil potenzjali ta’ mudell ta’ rapportar superviżorju għall-kumpaniji tal-maniġment tal-UCITS, u l-ESMA hija meħtieġa tiżviluppa standards tekniċi regolatorji u tabbozza standards tekniċi ta’ implimentazzjoni abbażi tas-sejbiet tagħha.

L-Artikolu 22a(2) huwa emendat sabiex id-depożitarji jinħelsu mir-rekwiżit li jwettqu diliġenza dovuta ex-ante meta l-kustodju jkun CSD minħabba li jkun ġie eżaminat biżżejjed meta jkun qed ifittex li jiġi awtorizzat bħala tali.

Sabiex jiġu indirizzati b’mod effettiv ir-riskji mikroprudenzjali u dawk makroprudenzjali, qed jiġi propost li tiġi emendata modifika fl-Artikolu 84(3) biex il-kumpaniji tal-maniġment tal-UCITS jintalbu jinnotifikaw lill-awtoritajiet kompetenti dwar l-attivazzjoni jew id-diżattivazzjoni ta’ LMT. L-emenda tal-punt (b) fil-paragrafu 2 tal-Artikolu 84 tagħti s-setgħa lill-awtoritajiet kompetenti biex jieħdu azzjoni u jirrikjedu lill-kumpaniji tal-maniġment tal-UCITS sabiex jattivaw jew jiddiżattivaw LMT rilevanti. Il-paragrafi (3a) sa (3c) proposti fl-Artikolu 84 jitolbu li l-awtoritajiet kompetenti jinnotifikaw lil awtoritajiet rilevanti oħra, lill-ESMA u lill-BERS, qabel ma jeħtieġu attivazzjoni jew diżattivazzjoni ta’ LMT, u li f’każijiet bħal dawn huma jistabbilixxu l-prinċipji ta’ kooperazzjoni. Il-paragrafu (3f) propost fl-Artikolu 84 jagħti s-setgħa lill-ESMA biex tiżviluppa standards tekniċi regolatorji li jindikaw meta l-intervent tal-awtoritajiet kompetenti jkun ġustifikat.

L-Artikolu 84(5) jipproponi li l-ESMA tingħata s-setgħa li tiżviluppa abbozzi ta’ standards tekniċi regolatorji dwar l-għażla u l-użu ta’ LMTs xierqa mill-UCITS.

L-Artikolu 98 huwa kkomplementat bil-paragrafi (3) u (4) biex tissaħħaħ il-kooperazzjoni superviżorja. L-awtorità kompetenti tal-Istat Membru ospitanti tal-UCITS tista’ titlob lill-awtorità kompetenti tal-Istat Membru domiċiljari tal-UCITS teżerċita s-setgħat superviżorji tagħha filwaqt li tispeċifika r-raġunijiet għat-talba tagħha u tinnotifika lill-ESMA u lill-BERS jekk ikun hemm riskji għall-istabbiltà finanzjarja. Barra minn hekk, l-ESMA għandha s-setgħa li titlob lil awtorità kompetenti biex tippreżenta każ quddiem l-ESMA, li jista’ jkollu implikazzjonijiet transfruntieri jew impatt fuq l-istabbiltà finanzjarja jew il-protezzjoni tal-investituri.

Qed jiġi propost l-Artikolu 101a l-ġdid li jirrikjedi li l-ESMA twettaq, fuq bażi regolari, rieżami bejn il-pari tal-prattiki superviżorji fl-applikazzjoni tar-regoli dwar id-delega b’enfasi partikolari fuq il-prevenzjoni tal-ħolqien ta’ entitajiet kaxxa tal-ittri. Artikolu 110a l-ġdid ikun jeħtieġ li l-Kummissjoni tirrieżamina r-reġim ta’ delega stabbilit f’din id-Direttiva u l-miżuri ta’ implimentazzjoni tagħha bil-għan li jiġu proposti l-emendi meħtieġa biex tiġi prekluża l-formazzjoni ta’ entitajiet kaxxa tal-ittri.

Artikoli dwar it-traspożizzjoni u d-dħul fis-seħħ

L-Artikolu 3 tal-proposta jiddikjara li l-Istati Membri għandhom 24 xahar wara d-dħul fis-seħħ tad-Direttiva emendatorja biex jadottaw u jippubblikaw il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma’ dik id-Direttiva. L-Istati Membri għandhom jikkomunikaw il-miżuri ta’ traspożizzjoni lill-Kummissjoni:

Huwa propost li d-Direttiva emendatorja tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

2021/0376 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttivi 2011/61/UE u 2009/65/KE fir-rigward tal-arranġamenti ta’ delega, il-ġestjoni tar-riskju tal-likwidità, ir-rapportar superviżorju, il-forniment ta’ servizzi depożitarji u ta’ kustodja u l-oriġinazzjoni tas-self minn fondi ta’ investiment alternattivi

(Test b’rilevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA

Wara li kkunsidraw it-Trattat dwar il-Funzjonament tal-Unjoni Ewropea u, b’mod partikolari, l-Artikolu 53(1) tiegħu,

Wara li kkunsidraw il-proposta mill-Kummissjoni Ewropea,

Wara t-trażmissjoni tal-abbozz tal-att leġiżlattiv lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 24 ,

Filwaqt li aġixxew f’konformità mal-proċedura leġiżlattiva ordinarja,

Billi:

(1)F’konformità mal-Artikolu 69 tad-Direttiva 2011/61/UE tal-Parlament Ewropew u tal-Kunsill 25 , il-Kummissjoni rrieżaminat l-applikazzjoni u l-kamp ta’ applikazzjoni ta’ dik id-Direttiva u kkonkludiet li l-objettivi tal-integrazzjoni tas-suq tal-Unjoni għal fondi ta’ investiment alternattivi (“AIF”), tal-iżgurar ta’ livell għoli ta’ protezzjoni tal-investituri u tal-protezzjoni tal-istabbiltà finanzjarja fil-biċċa l-kbira ġew issodisfati. Madankollu, f’dak ir-rieżami, il-Kummissjoni kkonkludiet ukoll li hemm il-ħtieġa li jiġu armonizzati r-regoli għall-maniġers ta’ fondi ta’ investiment alternattivi (“AIFMs”) li jimmaniġġjaw AIFs li joriġinaw self, biex jiġu ċċarati l-istandards applikabbli għall-AIFMs li jiddelegaw il-funzjonijiet tagħhom lil partijiet terzi, biex jiġi żgurat trattament ugwali tal-kustodji, biex jittejjeb l-aċċess transfruntier għas-servizzi tad-depożitarji, biex jiġi ottimizzat il-ġbir tad-data superviżorja u biex jiġi ffaċilitat l-użu ta’ għodod għall-ġestjoni tal-likwidità (LMTs) madwar l-Unjoni. Għalhekk, huma meħtieġa emendi biex jiġu indirizzati dawk in-nuqqasijiet regolatorji biex jittejjeb il-funzjonament tad-Direttiva 2011/61/UE.

(2)Reġim robust ta’ delega, trattament ugwali tal-kustodji, koerenza tar-rapportar superviżorju u approċċ armonizzat għall-użu tal-LMTs huma ugwalment meħtieġa għall-ġestjoni tal-impriżi għall-investiment kollettiv f’titoli trasferibbli (“UCITS”). Għalhekk, huwa xieraq li tiġi emendata wkoll id-Direttiva 2009/65/KE tal-Parlament Ewropew u tal-Kunsill 26 , li tistabbilixxi regoli dwar l-awtorizzazzjoni u l-operat tal-UCITS, fl-oqsma tad-delega, is-salvagwardja tal-assi, ir-rapportar superviżorju u l-ġestjoni tar-riskju tal-likwidità.

(3)Biex tiżdied l-effiċjenza tal-attivitajiet tal-AIFM, il-lista ta’ servizzi anċillari awtorizzati stabbilita fl-Artikolu 6(4) tad-Direttiva 2011/61/UE jenħtieġ li tiġi estiża biex tinkludi l-amministrazzjoni ta’ parametri referenzjarji regolata mir-Regolament (UE) 2016/1011 tal-Parlament Ewropew u tal-Kunsill 27 u s-servizzjar tal-kreditu regolat mid-Direttiva 2021/…./UE tal-Parlament Ewropew u tal-Kunsill 28 .

(4)Sabiex tiġi żgurata ċertezza legali, jenħtieġ li jiġi ċċarat li l-AIFMs li jipprovdu servizzi anċillari li jinvolvu strumenti finanzjarji huma soġġetti għar-regoli stabbiliti fid-Direttiva 2014/65/UE tal-Parlament Ewropew u tal-Kunsill 29 . Fir-rigward ta’ assi oħrajn, li ma humiex strumenti finanzjarji, l-AIFMs jenħtieġ li jkunu meħtieġa jikkonformaw mar-rekwiżiti tad-Direttiva 2011/61/UE.

(5)Sabiex tiġi żgurata l-applikazzjoni uniformi tar-rekwiżiti stabbiliti fl-Artikoli 7 u 8 tad-Direttiva 2011/61/UE għar-riżorsi umani meħtieġa tal-AIFMs, jenħtieġ li jiġi ċċarat li fiż-żmien tal-applikazzjoni għal awtorizzazzjoni, l-AIFMs jenħtieġ li jipprovdu lill-awtoritajiet kompetenti b’informazzjoni dwar ir-riżorsi umani u tekniċi li l-AIFM ikun se juża biex iwettaq il-funzjonijiet tiegħu, u fejn applikabbli, biex jissorvelja lid-delegati. Mill-inqas żewġ maniġers superjuri jenħtieġ li jiġu impjegati jew iwettqu n-negozju tal-AIFM fuq bażi full-time u jkunu residenti fl-Unjoni.

(6)Biex tiġi żviluppata ħarsa ġenerali affidabbli tal-attivitajiet ta’ delega fl-Unjoni rregolati mill-Artikolu 20 tad-Direttiva 2011/61/UE u biex jiġu infurmati deċiżjonijiet ta’ politika futuri jew azzjonijiet superviżorji, l-awtoritajiet kompetenti jenħtieġ li jipprovdu lill-Awtorità Ewropea tat-Titoli u s-Swieq (“ESMA”) b’notifiki ta’ delega meta AIFM jiddelega aktar ġestjoni tal-portafoll, jew funzjonijiet tal-ġestjoni tar-riskju tal-AIF, milli jimmaniġġa hu stess għal entitajiet li jinsabu f’pajjiżi terzi.

(7)Sabiex tiġi żgurata armonizzazzjoni konsistenti tal-proċess ta’ notifika fil-qasam tad-delega, jenħtieġ li l-Kummissjoni tingħata s-setgħa li tadotta standards tekniċi regolatorji permezz ta’ atti delegati skont l-Artikolu 290 tat-Trattat dwar il-Funzjonament tal-Unjoni Ewropea (TFUE) f’konformità mal-Artikoli 10 sa 14 tar-Regolament (UE) Nru 1095/2010 tal-Parlament Ewropew u tal-Kunsill 30 , biex jiġu speċifikati l-kontenut, il-formoli u l-proċeduri biex jiġi standardizzat il-proċess ta’ notifika tal-arranġamenti ta’ delega tal-AIFMs. Il-formola ta’ notifika jenħtieġ li jkun fiha kampijiet tad-data li jindikaw l-attivitajiet li jiffurmaw il-funzjonijiet tal-ġestjoni tar-riskju u tal-portafoll sabiex jiġi ddeterminat jekk AIFM ikunx iddelega aktar minn tali funzjonijiet milli jkun żamm. Dawk l-istandards tekniċi regolatorji jenħtieġ li jiġu adottati abbażi ta’ abbozz żviluppat mill-ESMA.

(8)Sabiex tissaħħaħ l-applikazzjoni uniformi tad-Direttiva 2011/61/UE, jenħtieġ li jiġi ċċarat li r-regoli tad-delega stabbiliti fl-Artikolu 20 japplikaw għall-funzjonijiet kollha elenkati fl-Anness I ta’ dik id-Direttiva u għas-servizzi anċillari msemmija fl-Artikolu 6(4) ta’ dik id-Direttiva.

(9)Jenħtieġ li jiġu stabbiliti wkoll regoli komuni biex jitwaqqaf suq intern effiċjenti għall-AIFs li joriġinaw self, biex jiġi żgurat livell uniformi ta’ protezzjoni tal-investituri fl-Unjoni, sabiex l-AIFs ikunu jistgħu jiżviluppaw l-attivitajiet tagħhom permezz ta’ self oriġinarju fl-Istati Membri kollha tal-Unjoni u biex jiġi ffaċilitat l-aċċess għal finanzjament mill-kumpaniji tal-UE, li huwa objettiv ewlieni tal-Unjoni tas-Swieq Kapitali (“CMU”) 31 . Madankollu, minħabba s-suq tal-kreditu privat li qed jikber b’rata mgħaġġla, huwa meħtieġ li jiġu indirizzati r-riskji mikro u r-riskji makroprudenzjali potenzjali li l-AIFs li joriġinaw is-self jistgħu joħolqu u jifirxu għas-sistema finanzjarja usa’. Ir-regoli applikabbli għall-AIFMs li jimmaniġġjaw fondi li joriġinaw self jenħtieġ li jiġu armonizzati sabiex itejbu l-ġestjoni tar-riskju fis-suq finanzjarju kollu u jżidu t-trasparenza għall-investituri.

(10)Sabiex jappoġġaw il-ġestjoni professjonali tal-AIFs u jtaffu r-riskji għall-istabbiltà finanzjarja, l-AIFMs li jimmaniġġjaw l-AIFs li jinvolvu ruħhom f’attivitajiet ta’ self, inkluż ix-xiri ta’ self fis-suq sekondarju, jenħtieġ li jkollhom politiki, proċeduri u proċessi effettivi għall-għoti ta’ self, il-valutazzjoni tar-riskju ta’ kreditu u l-amministrazzjoni u l-monitoraġġ tal-portafoll ta’ kreditu tiegħu, li jenħtieġ li jiġu rieżaminati perjodikament.

(11)Sabiex jiġi kkontrollat ir-riskju ta’ interkonnettività fost l-AIFs li joriġinaw self u parteċipanti oħra fis-suq finanzjarju, l-AIFMs ta’ dawk l-AIFs jenħtieġ li, meta mutwatarju jkun istituzzjoni finanzjarja, ikunu meħtieġa jiddiversifikaw ir-riskju tagħhom u jagħmlu l-iskopertura tagħhom soġġetta għal limiti speċifiċi.

(12)Sabiex jiġi limitat il-kunflitt ta’ interess, l-AIFMs u l-persunal tagħhom jenħtieġu li ma jirċevux self minn AIFs li joriġinaw self li huma jimmaniġġjaw. Bl-istess mod, id-depożitarju tal-AIF u l-persunal tiegħu jew id-delegat tal-AIFM u l-persunal tiegħu jenħtieġ li jkunu pprojbiti milli jirċievu self mill-AIFs assoċjati.

(13)Id-Direttiva 2011/61/UE jenħtieġ li tirrikonoxxi d-dritt tal-AIFs li joriġinaw self u li jinnegozjaw dak is-self fis-suq sekondarju. Sabiex jiġi evitat il-periklu morali u tinżamm il-kwalità tal-kreditu ġenerali tas-self li joriġina mill-AIFs, self bħal dan jenħtieġ li jkun soġġett għal rekwiżiti tar-ritenzjoni tar-riskju sabiex jiġu evitati sitwazzjonijiet li fihom is-self ikun oriġina bl-iskop uniku li jinbiegħ.

(14)Self illikwidu fuq terminu twil, li jkun miżmum mill-AIFs jista’ joħloq diskrepanzi fil-likwidità jekk l-istruttura miftuħa tal-AIFs tippermetti lill-investituri jifdu l-unitajiet jew l-ishma ta’ fondi tagħhom fuq bażi frekwenti. Għalhekk, huwa meħtieġ li jittaffew ir-riskji relatati mat-trasformazzjoni tal-maturità billi tiġi imposta struttura magħluqa għal AIFs li joriġinaw self, minħabba li l-fondi magħluqa ma jkunux vulnerabbli għad-domandi ta’ tifdija u jistgħu jżommu self oriġinat sal-maturità.

(15)Jenħtieġ li jiġi ċċarat li fejn AIFM ikun soġġett għar-rekwiżiti stabbiliti fid-Direttiva 2011/61/UE fir-rigward tal-attivitajiet ta’ self tal-AIFs immaniġġati tiegħu u għar-rekwiżiti stabbiliti fir-Regolamenti (UE) 345/2013 32 , (UE) 346/2013 33 u (UE) 2015/760 34 tal-Parlament Ewropew u tal-Kunsill, ir-regoli speċifiċi dwar il-prodott stabbiliti fl-Artikolu 3 tar-Regolamenti (UE) 345/2013 u l-Artikolu 3 tar-Regolament (UE) 346/2013, il-Kapitolu II tar-Regolament (UE) 2015/760, jenħtieġ li jieħdu preċedenza fuq regoli aktar ġenerali stabbiliti fid-Direttiva 2011/61/UE.

(16)Sabiex jiġi appoġġat il-monitoraġġ tas-suq mill-awtoritajiet superviżorji, il-ġbir u l-kondiviżjoni tal-informazzjoni permezz ta’ rapportar superviżorju jistgħu jittejbu. Rekwiżiti ta’ rapportar duplikati li jeżistu skont il-leġiżlazzjoni tal-Unjoni u dik nazzjonali, b’mod partikolari r-Regolament (UE) Nru 600/2014 tal-Parlament Ewropew u tal-Kunsill 35 , ir-Regolament (UE) 2019/834 tal-Parlament Ewropew u tal-Kunsill 36 , ir-Regolament (UE) Nru 1011/2012 tal-Bank Ċentrali Ewropew 37 u r-Regolament (UE) Nru 1073/2013 tal-Bank Ċentrali Ewropew 38 , jistgħu jiġu eliminati biex tittejjeb l-effiċjenza u jitnaqqsu l-piżijiet amministrattivi għall-AIFMs. L-awtoritajiet superviżorji Ewropej (“ASE”) u l-Bank Ċentrali Ewropew (BĊE), bl-appoġġ tal-awtoritajiet nazzjonali kompetenti, fejn ikun meħtieġ, jenħtieġ li jivvalutaw il-ħtiġijiet tad-data tal-awtoritajiet superviżorji differenti sabiex il-bidliet fil-mudell tar-rapportar superviżorju għall-AIFMs ikunu effettivi.

(17)Bi tħejjija għall-bidliet futuri għall-obbligi ta’ rapportar superviżorju, l-ambitu tad-data li tista’ tkun meħtieġa mill-AIFMs jenħtieġ li jitwessa’ billi jitneħħew il-limitazzjonijiet, li jiffokaw fuq negozji u skoperturi kbar jew kontropartijiet. Jekk l-ESMA tiddetermina li divulgazzjoni sħiħa tal-portafoll lis-superviżuri fuq bażi perjodika tkun iġġustifikata, id-dispożizzjonijiet tad-Direttiva 2011/61/UE jenħtieġ li jakkomodaw it-twessigħ meħtieġ tal-ambitu tar-rapportar.

(18)Sabiex tiġi żgurata armonizzazzjoni konsistenti tal-obbligi ta’ rapportar superviżorju, jenħtieġ li l-Kummissjoni tiġi ddelegata s-setgħa li tadotta standards tekniċi regolatorji permezz ta’ atti delegati skont l-Artikolu 290 tat-Trattat dwar il-Funzjonament tal-Unjoni Ewropea (TFUE) f’konformità mal-Artikoli 10 sa 14 tar-Regolament (UE) Nru 1095/2010 tal-Parlament Ewropew u tal-Kunsill 39 , biex jiġu stabbiliti l-kontenut, il-formoli u l-proċeduri biex jiġi standardizzat il-proċess ta’ rapportar superviżorju mill-AIFMs. L-istandards tekniċi regolatorji jenħtieġ li jistabbilixxu l-kontenut, il-formoli u l-proċeduri biex jiġi standardizzat il-proċess ta’ rapportar superviżorju, u b’hekk jissostitwixxu l-mudell ta’ rapportar stabbilit fir-Regolament Delegat tal-Kummissjoni (UE) 231/2013 40 . Dawk l-istandards tekniċi regolatorji u ta’ implimentazzjoni jenħtieġ li jiġu adottati abbażi ta’ abbozz żviluppat mill-ESMA.

(19)Sabiex jiġi standardizzat il-proċess ta’ rapportar superviżorju, il-Kummissjoni jenħtieġ li tingħata s-setgħa wkoll li tadotta standards tekniċi ta’ implimentazzjoni żviluppati mill-ESMA fir-rigward tal-formoli u l-istandards tad-data, il-frekwenza tar-rapportar u t-twaqqit tar-rapportar mill-AIFMs. Il-Kummissjoni jenħtieġ li tadotta dawk l-istandards tekniċi ta’ implimentazzjoni, permezz ta’ atti ta’ implimentazzjoni skont l-Artikolu 291 tat-TFUE u f’konformità mal-Artikolu 15 tar-Regolament (UE) Nru 1095/2010.

(20)Sabiex jiġi żgurat rispons aktar effettiv għall-pressjonijiet tal-likwidità fi żminijiet ta’ stress fis-suq u sabiex l-investituri jiġu protetti aħjar, jenħtieġ li jiġu stabbiliti regoli fid-Direttiva 2011/61/UE biex jiġu implimentati r-rakkomandazzjonijiet tal-Bord Ewropew dwar ir-Riskju Sistemiku (BERS) 41 .

(21)Sabiex il-maniġers tal-AIFs miftuħa bbażati fi kwalunkwe Stat Membru jkunu jistgħu jittrattaw il-pressjonijiet tat-tifdija taħt kundizzjonijiet ta’ stress fis-suq, jenħtieġ li jkunu meħtieġa jagħżlu mill-inqas LMT wieħed mil-lista armonizzata stabbilita fl-Anness, apparti l-possibbiltà li jiġu sospiżi t-tifdijiet. Meta AIFM jieħu deċiżjoni biex jattiva jew jiddiżattiva l-LMT, jenħtieġ li jinnotifika lill-awtoritajiet superviżorji. Dan jippermetti lill-awtoritajiet superviżorji jittrattaw aħjar it-tixrid potenzjali tat-tensjonijiet tal-likwidità fis-suq usa’.

(22)Sabiex ikunu jistgħu jieħdu deċiżjoni dwar l-investiment f’konformità mal-ħtiġijiet tagħhom ta’ predispożizzjoni għar-riskju u l-likwidità, l-investituri jenħtieġ li jiġu informati dwar il-kundizzjonijiet għall-użu tal-LMTs.

(23)Sabiex tiġi żgurata armonizzazzjoni konsistenti fil-qasam tal-ġestjoni tar-riskju tal-likwidità mill-maniġers ta’ fondi miftuħa, jenħtieġ li l-Kummissjoni tingħata s-setgħa li tadotta standards tekniċi regolatorji permezz ta’ atti delegati skont l-Artikolu 290 tat-Trattat dwar il-Funzjonament tal-Unjoni Ewropea (TFUE) f’konformità mal-Artikoli 10 sa 14 tar-Regolament (UE) Nru 1095/2010 tal-Parlament Ewropew u tal-Kunsill 42 , sabiex jiġi speċifikat il-proċess għall-għażla u l-użu tal-LMTs biex tiġi ffaċilitata l-konverġenza tas-suq u dik superviżorja. Dawk l-istandards tekniċi regolatorji jenħtieġ li jiġu adottati abbażi ta’ abbozz żviluppat mill-ESMA.

(24)Sabiex tiġi żgurata l-protezzjoni tal-investituri u jiġu indirizzati r-riskji tal-istabbiltà finanzjarja, jenħtieġ li l-awtoritajiet kompetenti jkunu jistgħu jitolbu li maniġer ta’ fond miftuħ jattiva jew jiddiżattiva l-LMT xierqa.

(25)Id-depożitarji għandhom rwol importanti għas-salvagwardja tal-interessi tal-investituri u jenħtieġ li jkunu jistgħu jwettqu dmirijiethom irrispettivament mit-tip ta’ kustodju li jkollu fil-kustodja tiegħu l-assi tal-fondi. Għalhekk, huwa meħtieġ li fil-katina tal-kustodja jiġu inklużi d-depożitorji ċentrali tat-titoli (CSDs) meta jipprovdu servizzi ta’ kustodja lill-AIFs sabiex jiġi żgurat li, fil-każijiet kollha, ikun hemm fluss ta’ informazzjoni stabbli bejn il-kustodju tal-assi tal-AIFs u d-depożitarju. Sabiex jiġu evitati sforzi superfluwi, id-depożitarji jenħtieġ li ma jwettqux diliġenza dovuta ex-ante meta jkollhom l-intenzjoni li jiddelegaw il-kustodja lis-CSDs.

(26)Sabiex jittejbu l-kooperazzjoni u l-effettività superviżorji, l-awtoritajiet kompetenti ospitanti jenħtieġ li jkunu jistgħu jindirizzaw talba motivata lill-awtorità kompetenti ta’ AIFM biex tittieħed azzjoni superviżorja kontra AIFM partikolari.

(27)Barra minn hekk, sabiex tittejjeb il-kooperazzjoni superviżorja, l-ESMA jenħtieġ li tkun tista’ titlob li awtorità kompetenti tippreżenta każ quddiem l-ESMA, fejn dak il-każ ikollu implikazzjonijiet transfruntieri u jkun jista’ jaffettwa l-protezzjoni tal-investituri jew l-istabbiltà finanzjarja. L-analiżijiet tal-ESMA ta’ każijiet bħal dawn se jagħtu lill-awtoritajiet kompetenti l-oħra fehim aħjar tal-kwistjonijiet diskussi u se jikkontribwixxu biex fil-futur jiġu evitati każijiet simili u biex l-integrità tas-suq tal-AIF tiġi protetta.

(28)Biex tappoġġa l-konverġenza superviżorja fil-qasam tad-delega, l-ESMA jenħtieġ li twettaq rieżami bejn il-pari dwar il-prattiki superviżorji b’enfasi partikolari fuq il-prevenzjoni tal-ħolqien ta’ entitajiet kaxxa tal-ittri. L-analiżi tal-ESMA tar-rieżamijiet bejn il-pari se tikkontribwixxi għar-rieżami tal-miżuri adottati f’din id-Direttiva u tinforma lill-Parlament Ewropew, lill-Kunsill u lill-Kummissjoni bi kwalunkwe miżura addizzjonali li tista’ tkun meħtieġa biex tappoġġa l-effettività tar-reġimi ta’ delega stabbiliti fid-Direttiva 2011/61/UE.

(29)Xi swieq ikkonċentrati ma għandhomx provvista kompetittiva ta’ servizzi tad-depożitarji. Sabiex jiġi indirizzat dan in-nuqqas ta’ fornituri ta’ servizzi li jista’ jwassal għal spejjeż akbar għall-AIFMs u suq tal-AIF inqas effiċjenti, l-awtoritajiet kompetenti jenħtieġ li jkunu jistgħu jippermettu lill-AIFMs jew lill-AIFs jakkwistaw servizzi tad-depożitarji li jinsabu fi Stati Membri oħra filwaqt li l-Kummissjoni tivvaluta, fil-kuntest tar-rieżami tagħha tad-Direttiva 2011/61/UE, jekk ikunx xieraq li jiġu proposti miżuri biex jinkiseb suq aktar integrat.

(30)Il-possibbiltà li jinħatar depożitarju fi Stat Membru ieħor jenħtieġ li tkun akkumpanjata minn żieda fil-livell superviżorju. Għalhekk, id-depożitarju jenħtieġ li jkun meħtieġ jikkoopera mhux biss mal-awtoritajiet kompetenti tiegħu, iżda wkoll mal-awtoritajiet kompetenti tal-AIF li jkun ħatru, u mal-awtoritajiet kompetenti tal-AIFM li jimmaniġġa l-AIF, jekk dawk l-awtoritajiet kompetenti jkunu jinsabu fi Stat Membru differenti minn dak tad-depożitarju.

(31)Sabiex l-investituri jiġu protetti aħjar, il-fluss tal-informazzjoni mill-AIFMs għall-investituri tal-AIF jenħtieġ li jiżdied. Biex l-investituri tal-AIFs ikunu permessi jittraċċaw aħjar l-ispejjeż tal-fond ta’ investiment, l-AIFMs jenħtieġ li jidentifikaw tariffi li jkunu se jitħallsu mill-AIFM jew mill-affiljati tiegħu, kif ukoll jirrapportaw perjodikament dwar it-tariffi u l-imposti kollha li jkunu allokati direttament jew indirettament lill-AIF jew lil kwalunkwe wieħed mill-investimenti tiegħu. Jenħtieġ li l-AIFMs ikunu meħtieġa wkoll jirrapportaw lill-investituri dwar il-kompożizzjoni tal-portafoll ta’ self oriġinat.

(32)Sabiex tiżdied it-trasparenza tas-suq u tintuża b’mod effettiv id-data disponibbli tas-suq tal-AIF, l-ESMA jenħtieġ li titħalla tiddivulga d-data tas-suq għad-dispożizzjoni tagħha f’forma aggregata jew fil-qosor u għalhekk l-istandard ta’ kunfidenzjalità jenħtieġ li jiġi llaxkat biex jiġi permess tali użu tad-data.

(33)Ir-rekwiżiti għal entitajiet ta’ pajjiżi terzi b’aċċess għas-suq intern jenħtieġ li jiġu allinjati mal-istandards stabbiliti fil-konklużjonijiet tal-Kunsill tal-2020 dwar il-lista riveduta tal-UE dwar ġurisdizzjonijiet li ma jikkooperawx għall-finijiet tat-taxxa 43 u d-Direttiva (UE) 2015/849 tal-Parlament Ewropew u tal-Kunsill 44 . Barra minn hekk, l-AIFs mhux tal-UE jew l-AIFMs mhux tal-UE li huma soġġetti għal regoli nazzjonali u li huma attivi fi Stati Membri individwali jenħtieġ li jissodisfaw ir-rekwiżit li ma jkunux jinsabu f’pajjiż terz li jitqies bħala mhux kooperattiv fi kwistjonijiet fiskali.

(34)Għall-kumpaniji tal-maniġment tal-UCITS, id-Direttiva 2009/65/KE jenħtieġ li tiżgura kundizzjonijiet komparabbli fejn ma jkun hemm l-ebda raġuni għaż-żamma tad-differenzi regolatorji għall-UCITS u l-AIFMs. Dan jikkonċerna r-reġim ta’ delega, it-trattament regolatorju tal-kustodji, ir-rekwiżiti ta’ rapportar superviżorju u d-disponibbiltà u l-użu tal-LMTs.

(35)Sabiex tiġi żgurata l-applikazzjoni uniformi tar-rekwiżiti tal-preżenza għall-kumpaniji tal-maniġment tal-UCITS, jenħtieġ li jiġi ċċarat li fiż-żmien tal-applikazzjoni għall-awtorizzazzjoni, jenħtieġ li l-kumpaniji tal-maniġment jipprovdu lill-awtoritajiet kompetenti b’informazzjoni dwar ir-riżorsi umani u tekniċi li jkunu se jimpjegaw biex iwettqu l-funzjonijiet tagħhom, u fejn applikabbli, jissorveljaw lid-delegati. Jenħtieġ li tal-anqas żewġ maniġers superjuri jiġu impjegati jew iwettqu n-negozju tal-kumpanija tal-maniġment fuq bażi full-time u jkunu residenti fl-Unjoni.

(36)Sabiex tiġi żgurata applikazzjoni uniformi tad-Direttiva 2009/65/KE, jenħtieġ li jiġi ċċarat li r-regoli tad-delega stabbiliti fl-Artikolu 13 ta’ dik id-Direttiva japplikaw għall-funzjonijiet kollha elenkati fl-Anness II ta’ dik id-Direttiva u għas-servizzi anċillari msemmija fl-Artikolu 6(3) ta’ dik id-Direttiva.

(37)Sabiex jiġu allinjati l-oqfsa legali tad-Direttivi 2011/61/UE u 2009/65/KE fir-rigward tad-delega, jenħtieġ li jkun meħtieġ li l-kumpaniji tal-maniġment tal-UCITS jiġġustifikaw lill-awtoritajiet kompetenti d-delega tal-funzjonijiet tagħhom u jipprovdu raġunijiet oġġettivi għad-delega.

(38)Biex tiġi żviluppata ħarsa ġenerali affidabbli tal-attivitajiet ta’ delega fl-Unjoni rregolati mill-Artikolu 13 tad-Direttiva 2009/65/KE u biex jiġu infurmati deċiżjonijiet ta’ politika jew azzjonijiet superviżorji futuri, l-awtoritajiet kompetenti jenħtieġ li jipprovdu lill-ESMA b’notifiki ta’ delega meta kumpanija tal-maniġment tal-UCITS tiddelega aktar funzjonijiet ta’ ġestjoni tal-portafoll jew ta’ ġestjoni tar-riskju lil entitajiet li jinsabu f’pajjiżi terzi, milli timmaniġġa hi stess.

(39)Sabiex tiġi żgurata armonizzazzjoni konsistenti tal-proċess ta’ notifika fil-qasam tad-delega, jenħtieġ li l-Kummissjoni tingħata s-setgħa li tadotta standards tekniċi regolatorji permezz ta’ atti delegati skont l-Artikolu 290 tat-Trattat dwar il-Funzjonament tal-Unjoni Ewropea (TFUE) f’konformità mal-Artikoli 10 sa 14 tar-Regolament (UE) Nru 1095/2010 tal-Parlament Ewropew u tal-Kunsill 45 biex jiġu speċifikati l-kontenut, il-formoli u l-proċeduri biex jiġi standardizzat il-proċess ta’ notifika tal-arranġamenti ta’ delega tal-UCITS. Il-formola ta’ notifika jenħtieġ li jkun fiha kampijiet tad-data li jindikaw l-attivitajiet li jiffurmaw il-funzjonijiet tal-ġestjoni tar-riskju u tal-portafoll sabiex jiġi ddeterminat jekk kumpanija tal-maniġment tal-UCITS tkunx iddelegat aktar minn tali funzjonijiet milli tkun żammet. Dawk l-istandards tekniċi regolatorji jenħtieġ li jiġu adottati abbażi ta’ abbozz żviluppat mill-ESMA.

(40)Sabiex jiġu allinjati aktar ir-regoli dwar id-delega applikabbli għall-AIFMs u l-UCITS u sabiex tinkiseb applikazzjoni aktar uniformi tad-Direttivi 2011/61/UE u 2009/65/KE, is-setgħa li jiġu adottati atti f’konformità mal-Artikolu 290 tat-TFUE jenħtieġ li tiġi ddelegata lill-Kummissjoni fir-rigward tal-ispeċifikazzjoni tal-kundizzjonijiet għad-delega minn kumpanija tal-maniġment tal-UCITS lil parti terza, u l-kundizzjonijiet li taħthom kumpanija tal-maniġment tal-UCITS tista’ titqies bħala entità kaxxa tal-ittri u b’hekk ma tkunx tista’ tibqa’ titqies bħala l-maniġer tal-UCITS. B’mod partikolari huwa importanti li l-Kummissjoni twettaq konsultazzjonijiet xierqa waqt il-ħidma preparatorja tagħha, inkluż fil-livell tal-esperti, u li dawn il-konsultazzjonijiet isiru f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet 46 . B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(41)Din id-Direttiva timplimenta r-rakkomandazzjonijiet tal-BERS 47 biex jiġu armonizzati l-LMTs u l-użu tagħhom mill-maniġers ta’ fondi miftuħa, li jinkludu l-UCITS, biex jiġi permess rispons aktar effettiv għall-pressjonijiet tal-likwidità fi żminijiet ta’ stress fis-suq u protezzjoni aħjar tal-investituri.

(42)Sabiex il-kumpaniji tal-maniġment tal-UCITS ibbażati fi kwalunkwe Stat Membru jkunu jistgħu jittrattaw il-pressjonijiet tat-tifdija taħt kundizzjonijiet ta’ stress fis-suq, jenħtieġ li jkunu meħtieġa jagħżlu mill-inqas LMT wieħed mil-lista armonizzata stabbilita fl-Anness, apparti l-possibbiltà li jiġu sospiżi t-tifdijiet. Meta kumpanija tal-maniġment tieħu deċiżjoni biex jattiva jew jiddiżattiva l-LMT, jenħtieġ li jinnotifika lill-awtoritajiet superviżorji. Dan jippermetti lill-awtoritajiet superviżorji jittrattaw aħjar it-tixrid potenzjali tat-tensjonijiet tal-likwidità fis-suq usa’.

(43)Sabiex ikunu jistgħu jieħdu deċiżjoni dwar l-investiment f’konformità mal-ħtiġijiet tagħhom ta’ predispożizzjoni għar-riskju u l-likwidità, l-investituri tal-UCITS jenħtieġ li jiġu informati dwar il-kundizzjonijiet għall-użu tal-LMTs.

(44)Sabiex tiġi żgurata l-protezzjoni tal-investituri u jiġu indirizzati r-riskji tal-istabbiltà finanzjarja, l-awtoritajiet kompetenti jenħtieġ li jkunu jistgħu jitolbu li kumpanija tal-maniġment tal-UCITS tattiva jew tiddiżattiva l-LMT xierqa.

(45)Sabiex tiġi żgurata armonizzazzjoni konsistenti fil-qasam tal-ġestjoni tar-riskju tal-likwidità mill-maniġers tal-UCITS, jenħtieġ li l-Kummissjoni tingħata s-setgħa li tadotta standards tekniċi regolatorji permezz ta’ atti delegati skont l-Artikolu 290 tat-Trattat dwar il-Funzjonament tal-Unjoni Ewropea (TFUE) f’konformità mal-Artikoli 10 sa 14 tar-Regolament (UE) Nru 1095/2010 tal-Parlament Ewropew u tal-Kunsill 48 , sabiex jiġi speċifikat il-proċess għall-għażla u l-użu tal-LMTs biex tiġi ffaċilitata l-konverġenza tas-suq u dik superviżorja. Dawk l-istandards tekniċi regolatorji jenħtieġ li jiġu adottati abbażi ta’ abbozz żviluppat mill-ESMA.

(46)Sabiex jiġi appoġġat il-monitoraġġ tas-suq mill-awtoritajiet superviżorji, jenħtieġ li l-ġbir u l-kondiviżjoni tal-informazzjoni permezz ta’ rapportar superviżorju jittejbu billi l-UCITS tiġi soġġetta għall-obbligi ta’ rapportar superviżorju. Jenħtieġ li l-ASE u l-BĊE jintalbu, bl-appoġġ tal-awtoritajiet nazzjonali kompetenti, fejn ikun meħtieġ, jivvalutaw il-ħtiġijiet tad-data tal-awtoritajiet superviżorji differenti li jikkunsidraw ir-rekwiżiti ta’ rapportar eżistenti skont leġiżlazzjoni oħra tal-Unjoni u dik nazzjonali, b’mod partikolari r-Regolament (UE) Nru 600/2014, ir-Regolament (UE) Nru 2019/834, ir-Regolament (UE) Nru 1011/2012 u r-Regolament (UE) Nru 1073/2013. L-eżitu ta’ din il-ħidma preparatorja jippermetti deċiżjoni ta’ politika infurmata dwar sa liema punt u f’liema forma l-UCITS jenħtieġ li jkunu qed jirrapportaw lill-awtoritajiet kompetenti dwar in-negozji tagħhom.

(47)Sabiex tiġi żgurata armonizzazzjoni konsistenti tal-obbligi ta’ rapportar superviżorju, jenħtieġ li l-Kummissjoni tiġi ddelegata s-setgħa li tadotta standards tekniċi regolatorji permezz ta’ atti delegati skont l-Artikolu 290 tat-Trattat dwar il-Funzjonament tal-Unjoni Ewropea (TFUE) f’konformità mal-Artikoli 10 sa 14 u l-Artikolu 15 tar-Regolament (UE) Nru 1095/2010 tal-Parlament Ewropew u tal-Kunsill 49 , biex jiġu stabbiliti l-kontenut, il-formoli u l-proċeduri biex jiġi standardizzat il-proċess ta’ rapportar superviżorju mill-UCITS. Dawk l-istandards tekniċi regolatorji jenħtieġ li jiġu adottati abbażi ta’ abbozz żviluppat mill-ESMA.

(48)Sabiex jiġi standardizzat il-proċess ta’ rapportar superviżorju, il-Kummissjoni jenħtieġ li tingħata s-setgħa wkoll li tadotta standards tekniċi ta’ implimentazzjoni żviluppati mill-ESMA fir-rigward tal-formoli u l-istandards tad-data, il-frekwenza tar-rapportar u t-twaqqit tar-rapportar mill-UCITS. Il-Kummissjoni jenħtieġ li tadotta dawk l-istandards tekniċi ta’ implimentazzjoni, permezz ta’ atti ta’ implimentazzjoni skont l-Artikolu 291 tat-TFUE u f’konformità mal-Artikolu 15 tar-Regolament (UE) Nru 1095/2010.

(49)Sabiex tiġi żgurata l-protezzjoni tal-investituri, u b’mod partikolari biex jiġi żgurat li fil-każijiet kollha jkun hemm fluss stabbli ta’ informazzjoni bejn il-kustodju tal-assi tal-UCITS u d-depożitarju, ir-reġim tad-depożitarju jenħtieġ li jiġi estiż biex jinkludi lis-CSDs fil-katina tal-kustodja meta jipprovdu servizzi ta’ kustodja lill-UCITS. Sabiex jiġu evitati sforzi superfluwi, id-depożitarji jenħtieġ li ma jwettqux diliġenza dovuta ex-ante meta jkollhom l-intenzjoni li jiddelegaw il-kustodja lis-CSDs.

(50)Biex tappoġġa l-konverġenza superviżorja fil-qasam tad-delega, l-ESMA jenħtieġ li twettaq rieżamijiet bejn il-pari dwar il-prattiki superviżorji b’enfasi partikolari fuq il-prevenzjoni tal-ħolqien ta’ entitajiet kaxxa tal-ittri. L-analiżi tal-ESMA tar-rieżamijiet bejn il-pari tikkontribwixxi għar-rieżami tal-miżuri adottati f’din id-Direttiva u tinforma lill-Parlament Ewropew, lill-Kunsill u lill-Kummissjoni bi kwalunkwe miżura addizzjonali li tista’ tkun meħtieġa biex tappoġġa l-effettività tar-reġim ta’ delega stabbilit fid-Direttiva 2009/65/KE.

(51)Sabiex jittejbu l-kooperazzjoni u l-effettività superviżorji, l-awtoritajiet kompetenti tal-Istat Membru ospitanti jenħtieġ li jkunu jistgħu jindirizzaw talba motivata lill-awtorità kompetenti tal-Istat Membru domiċiljari tal-UCITS biex tieħu azzjoni superviżorja kontra UCITS partikolari.

(52)Barra minn hekk, sabiex tittejjeb il-kooperazzjoni superviżorja, l-ESMA jenħtieġ li tkun tista’ titlob li awtorità kompetenti tippreżenta każ quddiem l-ESMA, fejn dak il-każ ikollu implikazzjonijiet transfruntieri u jkun jista’ jaffettwa l-protezzjoni tal-investituri jew l-istabbiltà finanzjarja. L-analiżijiet tal-ESMA ta’ każijiet bħal dawn se jagħtu lill-awtoritajiet kompetenti l-oħra fehim aħjar tal-kwistjonijiet diskussi u se jikkontribwixxu biex fil-futur jiġu evitati każijiet simili u biex l-integrità tas-swieq tal-UCITS tiġi protetta.

ADOTTAW DIN ID-DIRETTIVA

Artikolu 1

Emendi għad-Direttiva 2011/61/UE

Id-Direttiva 2011/61/UE hija emendata kif ġej:

(1)fl-Artikolu 4(1), jiżdied il-punt (ap) li ġej:

“(ap) depożitorju ċentrali tat-titoli” tfisser depożitorju ċentrali tat-titoli kif iddefinit fl-Artikolu 2(1), il-punt (1), tar-Regolament (UE) Nru 909/2014 tal-Parlament Ewropew u tal-Kunsill*

* Ir-Regolament (UE) Nru 909/2014 tal-Parlament Ewropew u tal-Kunsill tat-23 ta’ Lulju 2014 dwar titjib fis-saldu tat-titoli fl-Unjoni Ewropea u dwar depożitorji ċentrali tat-titoli u li jemenda d-Direttivi 98/26/KE u 2014/65/UE u r-Regolament (UE) Nru 236/2012 (ĠU L 257, 28.8.2014, p. 1)”;

(2)l-Artikolu 6 huwa emendat kif ġej:

(a)fil-paragrafu 4, jiżdiedu l-punti (c) u (d) li ġejjin:

“(c) amministrazzjoni ta’ parametri referenzjarji f’konformità mar-Regolament (UE) 2016/1011;

(d) l-isservizzjar tal-kreditu f’konformità mad-Direttiva 2021/… tal-Parlament Ewropew u tal-Kunsill;”;

(b)il-paragrafu 6 huwa sostitwit b’dan li ġej:

“6. L-Artikoli 2(2), l-Artikolu 15, l-Artikolu 16 ħlief għall-ewwel subparagrafu tal-paragrafu (5), u l-Artikoli 23, 24 u 25 tad-Direttiva 2014/65/UE għandhom japplikaw meta s-servizzi msemmija fil-paragrafu 4, il-punti (a) u (b), jiġu pprovduti mill-AIFMs.”;

(3)l-Artikolu 7 huwa emendat kif ġej:

(a)il-paragrafu 2 huwa sostitwit b’dan li ġej:

“2. L-Istati Membri għandhom jeħtieġu li AIFM li japplika għal awtorizzazzjoni jipprovdi l-informazzjoni relatata mal-AIFM lill-awtoritajiet kompetenti tal-Istat Membru domiċiljari tiegħu:

(a)informazzjoni dwar il-persuni li effettivament iwettqu n-negozju tal-AIFM, b’mod partikolari fir-rigward tal-funzjonijiet imsemmija fl-Anness I, inkluż:

(i) deskrizzjoni dettaljata tar-rwol, it-titolu u l-livell ta’ superjorità tagħhom;

(ii) deskrizzjoni tal-linji ta’ rapportar u tar-responsabbiltajiet tagħhom fl-AIFM u barra mill-AIFM;

(iii) ħarsa ġenerali tal-ħin allokat għal kull responsabbiltà tagħhom;

(iv) deskrizzjoni tar-riżorsi tekniċi u umani li jappoġġaw l-attivitajiet tagħhom;

(b)informazzjoni dwar l-identitajiet tal-azzjonisti jew il-membri tal-AIFM, kemm jekk humiex persuni diretti jew indiretti, persuni fiżiċi jew ġuridiċi, li jkollhom parteċipazzjoni kwalifikanti u dwar l-ammonti ta’ dawk il-parteċipazzjonijiet;

(c)programm ta’ attività li jistabbilixxi l-istruttura organizzazzjonali tal-AIFM, inkluża informazzjoni dwar kif l-AIFM ikun biħsiebu jikkonforma mal-obbligi tiegħu skont il-Kapitoli II, III, IV, u fejn applikabbli, il-Kapitoli V, VI, VII u VIII u deskrizzjoni dettaljata tar-riżorsi umani u tekniċi xierqa li jkunu se jintużaw mill-AIFM għal dan il-għan;

(d)informazzjoni dwar il-politiki u l-prattiċi ta’ rimunerazzjoni skont l-Artikolu 13;

(e)informazzjoni dwar l-arranġamenti magħmula għad-delega u s-subdelega lil partijiet terzi ta’ funzjonijiet kif imsemmi fl-Artikolu 20 u deskrizzjoni dettaljata tar-riżorsi umani u tekniċi li għandhom jintużaw mill-AIFM għall-monitoraġġ u l-kontroll tad-delegat.”;

(b)il-paragrafu 5 huwa sostitwit b’dan li ġej:

“5. L-awtoritajiet kompetenti għandhom jinformaw lill-ESMA, fuq bażi trimestrali, bl-awtorizzazzjonijiet mogħtija jew irtirati f’konformità ma’ dan il-Kapitolu.

L-ESMA għandha żżomm reġistru pubbliku ċentrali li jidentifika kull AIFM awtorizzat skont din id-Direttiva, lista tal-AIFs immaniġġati u/jew ikkummerċjalizzati fl-Unjoni mit-tali AIFMs u l-awtorità kompetenti għal kull tali AIFM. Ir-reġistru għandu jkun disponibbli f’format elettroniku.

Meta AIFM jiddelega aktar funzjonijiet ta’ ġestjoni tal-portafoll jew ta’ ġestjoni tar-riskju lil entitajiet li jinsabu f’pajjiżi terzi milli jżomm, l-awtoritajiet kompetenti għandhom, fuq bażi annwali, jinnotifikaw lill-ESMA dwar dawn id-delegazzjonijiet kollha (“notifiki ta’ delega”).

In-notifiki ta’ delega għandhom jinkludu dan li ġej:

(a)informazzjoni dwar l-AIFM u l-AIF ikkonċernati;

(b)informazzjoni dwar id-delegat, li tispeċifika d-domiċilju tad-delegat u jekk huwiex entità regolata jew le;

(c)deskrizzjoni tal-funzjonijiet iddelegati tal-ġestjoni tal-portafoll u tal-ġestjoni tar-riskju;

(d)deskrizzjoni tal-funzjonijiet miżmuma tal-ġestjoni tal-portafoll u tal-ġestjoni tar-riskju;

(e)kwalunkwe informazzjoni oħra meħtieġa biex jiġu analizzati l-arranġamenti ta’ delega;

(f)deskrizzjoni tal-attivitajiet superviżorji tal-awtoritajiet kompetenti, inklużi rieżamijiet ibbażati fuq id-dokumentazzjoni u spezzjonijiet fuq il-post u r-riżultati ta’ dawn l-attivitajiet;

(g)kwalunkwe dettall dwar il-kooperazzjoni bejn l-awtorità kompetenti tal-AIFM u l-awtorità superviżorja tad-delegat.”

(c)jiżdiedu l-paragrafi 8 u 9 li ġejjin:

“8. L-ESMA għandha tiżviluppa abbozzi ta’ standards tekniċi regolatorji biex tiddetermina l-kontenut tan-notifiki ta’ delega u l-formoli, il-mudelli u l-proċeduri standard għat-trażmissjoni tan-notifiki ta’ delega f’lingwa abitwali għall-isfera tal-finanzi. Il-formoli u l-mudelli standard għandhom jinkludu kampijiet ta’ informazzjoni li jkopru l-informazzjoni kollha msemmija fir-raba’ subparagrafu tal-paragrafu 5.

Il-Kummissjoni qed tiġi ddelegata s-setgħa li tadotta l-istandards tekniċi regolatorji msemmijin fl-ewwel subparagrafu f’konformità mal-Artikoli 10 sa 14 tar-Regolament (UE) Nru 1095/2010.

9. L-ESMA għandha tipprovdi lill-Parlament Ewropew, lill-Kunsill u lill-Kummissjoni b’rapporti regolari, tal-anqas kull sentejn, li janalizzaw il-prattiki tas-suq fir-rigward tad-delega lil entitajiet li jinsabu f’pajjiżi terzi u l-konformità mal-Artikoli 7 u 20.”;

(4)fl-Artikolu 8(1), il-punt (c) huwa sostitwit b’dan li ġej:

“(c) il-persuni li effettivament iwettqu n-negozju tal-AIFM ikunu ta’ reputazzjoni tajba biżżejjed u jkunu esperjenzati biżżejjed ukoll fir-rigward tal-istrateġiji ta’ investiment segwiti mill-AIF immaniġġat mill-AIFM, l-ismijiet ta’ dawk il-persuni u ta’ kull persuna li tieħu posthom warajhom fil-kariga jiġu kkomunikati minnufih lill-awtoritajiet kompetenti tal-Istati Membri domiċiljari tal-AIFM u t-twettiq tan-negozju tal-AIFM jiġi deċiż minn mill-inqas żewġ persuni fiżiċi li jew ikunu impjegati full-time minn dak l-AIFM jew li jkunu impenjati full-time biex iwettqu n-negozju ta’ dak l-AIFM u li jkunu residenti fl-Unjoni li jissodisfaw tali kundizzjonijiet;”;

(5)l-Artikolu 15 huwa emendat kif ġej:

(a)fil-paragrafu 3, jiżdied il-punt (d) li ġej:

“(d) għal attivitajiet ta’ għoti ta’ self, jimplimentaw politiki, proċeduri u proċessi effettivi għall-għoti ta’ kreditu, għall-valutazzjoni tar-riskju ta’ kreditu u għall-amministrazzjoni u l-monitoraġġ tal-portafoll tal-kreditu tagħhom, iżommu dawk il-politiki, il-proċeduri u l-proċessi aġġornati u effettivi u jirrieżaminawhom regolarment u mill-inqas darba fis-sena.”;

(b)il-paragrafi 4a sa 4e li ġejjin jiddaħħlu bejn il-paragrafi 4 u 5:

“4a. AIFM għandu jiżgura li self li joriġina lil kwalunkwe mutwatarju uniku mill-AIF li jimmaniġġa ma jaqbiżx l-20 % tal-kapital tal-AIF meta l-mutwatarju jkun wieħed minn dawn li ġejjin:

(a)impriża finanzjarja skont it-tifsira tal-Artikolu 13(25) tad-Direttiva 2009/138/KE;

(b)impriża ta’ investiment kollettiv skont it-tifsira tal-Artikolu 4(1), il-punt (a), ta’ din id-Direttiva jew skont it-tifsira tal-Artikolu 1(2) tad-Direttiva 2009/65/KE.”

Ir-restrizzjoni stabbilita fl-ewwel subparagrafu għandha tkun mingħajr preġudizzju għal-limiti, ir-restrizzjonijiet u l-kundizzjonijiet stabbiliti fir-Regolamenti (UE) 2015/760 50 , (UE) 345/2013 51 u (UE) 346/2013 52 .

4b. Il-limitu ta’ investiment ta’ 20 % stabbilit fil-paragrafu 4a għandu:

(a)japplika sad-data speċifikata fir-regoli jew fl-istrumenti ta’ inkorporazzjoni tal-AIF;

(b)ma jibqax japplika ladarba l-AIF jibda jbigħ l-assi sabiex jirrimborża l-unitajiet jew l-ishma tal-investituri wara tmiem ħajjet l-AIF;

(c)jiġi sospiż temporanjament sa 12-il xahar meta l-AIF jgħolli kapital addizzjonali jew inaqqas il-kapital eżistenti tiegħu.

4c. Id-data tal-applikazzjoni msemmija fil-paragrafu 4b, il-punt (a), għandha tqis il-karatteristiċi partikolari tal-assi li għandhom jiġu investiti mill-AIF, u ma għandhiex tkun aktar tard minn nofs il-ħajja tal-AIF kif indikat fid-dokumenti kostituttivi tal-AIF. F’ċirkostanzi eċċezzjonali, l-awtorità kompetenti tal-AIFM, meta jiġi ppreżentat pjan ta’ investiment debitament ġustifikat, tista’ tapprova estensjoni ta’ dan il-limitu ta’ żmien b’mhux iktar minn sena addizzjonali.

4d. L-AIF ma għandux jagħti self lill-entitajiet li ġejjin:

(a)l-AIFM tiegħu jew il-persunal tal-AIFM tiegħu;

(b)id-depożitarju tiegħu;

(c)l-entità li lilha l-AIFM tiegħu jkun iddelega l-funzjonijiet f’konformità mal-Artikolu 20.

4e. AIFM għandu jiżgura li l-AIF li jimmaniġġa jżomm, fuq bażi kontinwa, 5 % tal-valur nozzjonali tas-self li jkun oriġina u sussegwentement biegħ fis-suq sekondarju.

Ir-rekwiżit stabbilit fl-ewwel subparagrafu ma japplikax għas-self li l-AIF ikun xtara fis-suq sekondarju.”;

(6)fl-Artikolu 16, jiddaħħlu l-paragrafi 2a u 2h li ġejjin:

“2a. AIFM għandu jiżgura li l-AIF li jimmaniġġa jkun magħluq jekk il-valur nozzjonali tas-self oriġinarju tiegħu jaqbeż is-60 % tal-valur nett tal-assi tiegħu.

Ir-rekwiżit stabbilit fl-ewwel subparagrafu għandu jkun mingħajr preġudizzju għal-limiti, ir-restrizzjonijiet jew il-kundizzjonijiet stabbiliti fir-Regolamenti (UE) 345/2013, (UE) 346/2013 u (UE) 2015/760.

2b. Wara li jivvaluta l-adegwatezza fir-rigward tal-istrateġija ta’ investiment segwita, il-profil tal-likwidità u l-politika ta’ tifdija, AIFM li jimmaniġġa AIF miftuħ għandu jagħżel tal-anqas għodda xierqa waħda għall-ġestjoni tal-likwidità mil-lista stabbilita fl-Anness V, il-punti 2 sa 4, għal użu possibbli fl-interess tal-investituri tal-AIF. L-AIFM għandu jimplimenta politiki u proċeduri dettaljati għall-attivazzjoni u d-diżattivazzjoni ta’ kwalunkwe għodda magħżula għall-ġestjoni tal-likwidità u l-arranġamenti operazzjonali u amministrattivi għall-użu ta’ din l-għodda.

2c. AIFM li jimmaniġġa AIF miftuħ jista’, fl-interess tal-investituri tal-AIF, jissospendi temporanjament ir-riakkwist jew it-tifdija tal-unitajiet tal-AIF jew jattiva għodod oħra għall-ġestjoni tal-likwidità magħżula mil-lista stabbilita fl-Anness V, il-punti 2 sa 4, u inklużi fir-regoli tal-fond jew fl-istrumenti ta’ inkorporazzjoni tal-AIFM.

Is-sospensjoni temporanja msemmija fl-ewwel subparagrafu tista’ tiġi prevista biss f’każijiet eċċezzjonali meta ċ-ċirkostanzi jeħtieġu hekk, u fejn is-sospensjoni hija ġġustifikata fir-rigward tal-interessi tal-investituri tal-AIF.

2d. AIFM għandu, mingħajr dewmien, jinnotifika lill-awtoritajiet kompetenti tal-Istat Membru domiċiljari tiegħu meta jattiva jew jiddiżattiva għodda għall-ġestjoni tal-likwidità msemmija f’2b.

L-awtoritajiet kompetenti tal-Istat Membru domiċiljari tal-AIFM għandhom jinnotifikaw, mingħajr dewmien, lill-awtoritajiet kompetenti ta’ Stat Membru ospitanti tal-AIFM, tal-ESMA u tal-BERS bi kwalunkwe notifika riċevuta f’konformità ma’ dan il-paragrafu.

2e. L-Istati Membri għandhom jiżguraw li tal-anqas l-għodod għall-ġestjoni tal-likwidità stabbiliti fl-Anness V ikunu disponibbli għall-AIFMs li jimmaniġġjaw AIFs miftuħa.

2f. L-ESMA għandha tiżviluppa abbozzi ta’ standards tekniċi regolatorji biex tispeċifika l-karatteristiċi tal-għodod għall-ġestjoni tal-likwidità stabbiliti fl-Anness V.

2g. L-ESMA għandha tiżviluppa abbozzi ta’ standards tekniċi regolatorji dwar il-kriterji għall-għażla u l-użu ta’ għodod xierqa għall-ġestjoni tal-likwidità mill-AIFMs għall-ġestjoni tar-riskju tal-likwidità, inkluż divulgazzjonijiet xierqa lill-investituri, filwaqt li titqies il-kapaċità ta’ dawn l-għodod biex jitnaqqsu l-vantaġġi mhux dovuti għall-investituri li jifdu l-investimenti tagħhom l-ewwel, u biex jittaffew ir-riskji tal-istabbiltà finanzjarja.

2h. Il-Kummissjoni tingħata s-setgħa biex tadotta l-istandards tekniċi regolatorji msemmija fil-paragrafi 2f u 2g ta’ dan l-Artikolu f’konformità mal-Artikoli 10 sa 14 tar-Regolament (UE) Nru 1095/2010.”;

(7)l-Artikolu 20 huwa emendat kif ġej:

(a)il-paragrafu 1 huwa emendat kif ġej:

(a)il-frażi introduttorja hija sostitwita b’dan li ġej:

“1. L-AIFMs, li jkollhom l-intenzjoni li jiddelegaw lil partijiet terzi l-kompitu li jwettqu, f’isimhom, waħda jew aktar mill-funzjonijiet elenkati fl-Anness I jew tas-servizzi msemmija fl-Artikolu 6(4), għandhom jinnotifikaw lill-awtoritajiet kompetenti tal-Istat Membru domiċiljari tagħhom qabel ma l-arranġamenti tad-delega jsiru effettivi. Il-kundizzjonijiet li ġejjin għandhom jiġu ssodisfati:”;

(b)il-punt (f) huwa sostitwit b’dan li ġej:

“(f) l-AIFM irid ikun jista’ juri li d-delegat huwa kwalifikat u kapaċi jeżegwixxi l-funzjonijiet u jipprovdi s-servizzi kkonċernati, li ntgħażel bl-attenzjoni dovuta kollha u li l-AIFM huwa f’pożizzjoni li jissorvelja b’mod effettiv u fi kwalunkwe ħin l-attività ddelegata, li jagħti fi kwalunkwe ħin istruzzjonijiet ulterjuri lid-delegat u li jirtira d-delega b’effett immedjat meta dan ikun fl-interess tal-investituri.”;

(b)il-paragrafu 3 huwa sostitwit b’dan li ġej:

“3. Ir-responsabbiltà tal-AIFM lejn il-klijenti tiegħu, l-AIF u l-investituri tiegħu ma għandhiex tiġi affettwata mill-fatt li l-AIFM ikun iddelega l-funzjonijiet tiegħu lil parti terza, jew minn kwalunkwe sottodelega ulterjuri, lanqas ma għandu l-AIFM jiddelega l-funzjonijiet tiegħu, sa fejn, essenzjalment, ma jkunx jista’ jibqa’ jitqies bħala l-maniġer tal-AIF jew il-fornitur tas-servizzi, u sa fejn jsir entità li sservi biss bħala kaxxa tal-ittri.”;

(c)fil-paragrafu 4, il-frażi introduttorja hija sostitwita b’dan li ġej:

“4. Il-parti terza tista’ tissottodelega kwalunkwe waħda mill-funzjonijiet u l-għoti ta’ servizzi delegati lilha sakemm jiġu ssodisfati l-kundizzjonijiet li ġejjin:”;

(8)l-Artikolu 21 huwa emendat kif ġej:

(a)fil-paragrafu 6, il-punti (c) u (d) huma sostitwiti b’dan li ġej:

“(c) il-pajjiż terz fejn ikun stabbilit id-depożitarju ma jiġix identifikat bħala pajjiż terz b’riskju għoli skont l-Artikolu 9(2) tad-Direttiva (UE) 2015/849;”;

(d) l-Istati Membri fejn hu intenzjonat li jiġu kkummerċjalizzati l-unitajiet jew l-ishma tal-AIF mhux tal-UE, u, fil-każ li jkun differenti, l-Istat Membru domiċiljari tal-AIFM, ikunu ffirmaw ftehim mal-pajjiż terz fejn ikun stabbilit id-depożitarju li jikkonforma bis-sħiħ mal-istandards stabbiliti fl-Artikolu 26 tal-Mudell ta’ Konvenzjoni dwar it-Taxxa tal-OECD fuq id-Dħul u l-Kapital u li jiżgura skambju ta’ informazzjoni effikaċi fil-kwistjonijiet fiskali, inklużi, jekk ikun hemm, il-ftehimiet fiskali multilaterali u l-pajjiż terz ma jissemmiex fl-Anness I tal-konklużjonijiet tal-Kunsill tal-2020 dwar il-lista riveduta tal-UE dwar ġuriżdizzjonijiet mhux kooperattivi għal finijiet tat-taxxa 53 ;”;

(b)il-paragrafu 11 huwa emendat kif ġej:

(i) fit-tieni subparagrafu, il-punt (c) huwa sostitwit b’dan li ġej:

“(c) id-depożitarju jkun eżerċita l-ħila, l-attenzjoni u d-diliġenza kollha dovuti fl-għażla u l-ħatra ta’ kwalunkwe parti terza li lilha jrid jiddelega partijiet mill-kompiti tiegħu, ħlief meta dik il-parti terza tkun depożitorju ċentrali tat-titoli li jaġixxi fil-kapaċità ta’ CSD emittent kif definit fl-Artikolu 1, il-punt (e), tar-Regolament Delegat tal-Kummissjoni (UE) 2017/392*, u jibqa’ jeżerċita l-ħila, l-attenzjoni u d-diliġenza kollha dovuta fir-rieżami perjodiku u l-monitoraġġ kontinwu ta’ kwalunkwe parti terza li lilha jkun iddelega partijiet mill-kompiti tiegħu u tal-arranġamenti tal-parti terza fir-rigward tal-materji ddelegati lilha;

* Ir-Regolament Delegat tal-Kummissjoni (UE) 2017/392 tal-11 ta’ Novembru 2016 li jissupplimenta r-Regolament (UE) Nru 909/2014 tal-Parlament Ewropew u tal-Kunsill fir-rigward ta’ standards tekniċi regolatorji dwar ir-rekwiżiti ta’ awtorizzazzjoni, superviżorji u operazzjonali għal depożitarji ċentrali tat-titoli (ĠU L 65, 10.3.2017, p. 48)”;

(ii) il-ħames subparagrafu huwa sostitwit b’dan li ġej:

“Għall-finijiet ta’ dan il-paragrafu, l-għoti ta’ servizzi minn depożitorju ċentrali tat-titoli li jaġixxi fil-kapaċità ta’ CSD emittent, kif definit fl-Artikolu 1, il-punt (e) tar-Regolament Delegat tal-Kummissjoni (UE) 2017/392, ma għandux jitqies bħala delega tal-funzjonijiet ta’ kustodja tad-depożitarju. ”;

(c)il-paragrafu 16 huwa sostitwit b’dan li ġej:

“16. Id-depożitarju għandu jagħmel disponibbli għall-awtoritajiet kompetenti tiegħu, għall-awtoritajiet kompetenti tal-AIF li jkun ħatru bħala depożitarju u lill-awtoritajiet kompetenti tal-AIFM li jimmaniġġa dak l-AIF, fuq talba, l-informazzjoni kollha li jkun kiseb waqt it-twettiq tad-dmirijiet tiegħu u li tista’ tkun meħtieġa għall-awtoritajiet kompetenti tal-AIF jew tal-AIFM. Jekk l-awtoritajiet kompetenti tal-AIF jew l-AIFM ikunu differenti minn dawk tad-depożitarju, l-awtoritajiet kompetenti tad-depożitarju għandhom jaqsmu l-informazzjoni li jirċievu bla dewmien mal-awtoritajiet kompetenti tal-AIF jew l-AIFM.”;

(9)l-Artikolu 23 huwa emendat kif ġej:

(a)il-paragrafu 1 huwa emendat kif ġej:

(i) il-punt (h) huwa ssostitwit b’dan li ġej:

“(h) deskrizzjoni tal-ġestjoni tar-riskju tal-likwidità tal-AIF, inklużi d-drittijiet tat-tifdija kemm f’ċirkostanzi normali kif ukoll f’ċirkostanzi eċċezzjonali, li tiddivulga l-possibbiltà u l-kundizzjonijiet għall-użu tal-għodod għall-ġestjoni tal-likwidità magħżula f’konformità mal-Artikolu 16(2b), u l-arranġamenti eżistenti ta’ tifdija mal-investituri.”;

(ii) jiddaħħal il-punt (ia):

“(ia) lista ta’ tariffi u imposti li jiġu applikati b’rabta mal-operat tal-AIF u li jitħallsu mill-AIFM jew mill-affiljati tiegħu.”;

(b)fil-paragrafu 4, jiżdiedu l-punti (d), (e) u (f) li ġejjin:

“(d) portafoll ta’ self oriġinat;

(e) fuq bażi trimestrali, it-tariffi u l-imposti diretti u indiretti kollha li jkunu ġew imposti jew allokati direttament jew indirettament lill-AIF jew lil kwalunkwe wieħed mill-investimenti tiegħu;

(f) fuq bażi trimestrali, kwalunkwe kumpanija omm, sussidjarja jew entità bi skop speċjali stabbilita b’rabta mal-investimenti tal-AIF mill-AIFM, il-persunal tal-AIFM jew tal-affiljati diretti jew indiretti tal-AIFM.”;

(10) l-Artikolu 24 huwa emendat kif ġej:

(a)il-paragrafu 1 huwa sostitwit b’dan li ġej:

“1. L-AIFM għandu jirrapporta regolarment lill-awtoritajiet kompetenti tal-Istat Membru domiċiljari tiegħu dwar is-swieq u l-istrumenti li fihom jinnegozja f’isem l-AIF li jimmaniġġa.

Huwa għandu jipprovdi informazzjoni dwar l-istrumenti li jinnegozja fihom, dwar is-swieq li huwa membru tagħhom jew li jinnegozja attivament fihom, u l-esponimenti ta’ kull AIF li jimmaniġġa.”;

(b)fil-paragrafu 2, jitħassar il-punt (d);

(c)il-paragrafu 6 huwa sostitwit b’dan li ġej:

“6. L-ESMA għandha tiżviluppa abbozzi ta’ standards tekniċi regolatorji li jispeċifikaw id-dettalji li għandhom jiġu rrapportati skont il-paragrafi 1 u 2. L-ESMA għandha tqis rekwiżiti oħra ta’ rapportar li għalihom huma soġġetti l-AIFMs u r-rapport maħruġ f’konformità mal-paragrafu 2 tal-Artikolu 69b.

L-ESMA għandha tissottometti dawk l-abbozzi ta’ standards tekniċi regolatorji lill-Kummissjoni sa [Jekk jogħġbok daħħal id-data = 36 xahar wara d-dħul fis-seħħ ta’ din id-Direttiva].

Il-Kummissjoni tiġi ddelegata s-setgħa li tadotta l-istandards tekniċi regolatorji msemmijin fl-ewwel subparagrafu f’konformità mal-Artikoli 10 sa 14 tar-Regolament (UE) Nru 1095/2010.”;

(d)jiżdied il-paragrafu 7 li ġej:

“7. L-ESMA għandha tiżviluppa abbozzi ta’ standards tekniċi ta’ implimentazzjoni li jispeċifikaw:

(a)l-istandards tal-format u tad-data għar-rapporti msemmija fil-paragrafi 1 u 2;

(b)il-frekwenza u t-twaqqit tar-rapportar.

L-ESMA għandha tissottometti dawk l-abbozzi ta’ standards tekniċi ta’ implimentazzjoni lill-Kummissjoni sa [Jekk jogħġbok daħħal id-data = 36 xahar wara d-dħul fis-seħħ ta’ din id-Direttiva].

Il-Kummissjoni tiġi ddelegata s-setgħa li tadotta l-istandards tekniċi ta’ implimentazzjoni msemmijin fl-ewwel subparagrafu f’konformità mal-Artikolu 15 tar-Regolament (UE) Nru 1095/2010.”;

(11)fl-Artikolu 35(2), il-punti (b) u (c) huma sostitwiti b’dan li ġej:

“(b) il-pajjiż terz fejn ikun stabbilit l-AIF mhux tal-UE ma jiġix identifikat bħala pajjiż terz b’riskju għoli skont l-Artikolu 9(2) tad-Direttiva (UE) 2015/849;

(c) il-pajjiż terz fejn hu stabbilit l-AIF mhux tal-UE ikun iffirma ftehim mal-Istat Membru domiċiljari tal-AIFM awtorizzat u ma’ kull Stat Membru ieħor fejn ikun intiż li jiġu kkummerċjalizzati l-unitajiet jew l-ishma tal-AIF mhux tal-UE, li jikkonforma bis-sħiħ mal-istandards stabbiliti fl-Artikolu 26 tal-Mudell ta’ Konvenzjoni dwar it-Taxxa tal-OECD fuq id-Dħul u l-Kapital u li jiżgura skambju ta’ informazzjoni effettiv fil-kwistjonijiet fiskali, inkluż kwalunkwe ftehim fiskali multilaterali, u l-pajjiż terz ma jissemmiex fl-Anness I tal-konklużjonijiet tal-Kunsill tal-2020 dwar il-lista riveduta tal-UE dwar ġuriżdizzjonijiet mhux kooperattivi għal finijiet tat-taxxa 54 .”;

(12)l-Artikolu 36(1) huwa emendat kif ġej:

(a)il-punt (c) huwa sostitwit b’dan li ġej:

“(c) il-pajjiż terz fejn ikun stabbilit l-AIF mhux tal-UE ma jiġix identifikat bħala pajjiż terz b’riskju għoli skont l-Artikolu 9(2) tad-Direttiva (UE) 2015/849.”;

(b)jiżdied il-punt (d) li ġej:

(c) il-pajjiż terz fejn hu stabbilit l-AIF mhux tal-UE ikun iffirma ftehim mal-Istat Membru domiċiljari tal-AIFM awtorizzat u ma’ kull Stat Membru ieħor fejn ikun intiż li jiġu kkummerċjalizzati l-unitajiet jew l-ishma tal-AIF mhux tal-UE, li jikkonforma bis-sħiħ mal-istandards stabbiliti fl-Artikolu 26 tal-Mudell ta’ Konvenzjoni dwar it-Taxxa tal-OECD fuq id-Dħul u l-Kapital u li jiżgura skambju ta’ informazzjoni effettiv fil-kwistjonijiet fiskali, inkluż kwalunkwe ftehim fiskali multilaterali, u l-pajjiż terz ma jissemmiex fl-Anness I tal-konklużjonijiet tal-Kunsill tal-2020 dwar il-lista riveduta tal-UE dwar ġuriżdizzjonijiet mhux kooperattivi għal finijiet tat-taxxa.”;

(13)fl-Artikolu 37(7), il-punti (e) u (f) huma sostitwiti b’dan li ġej:

“(e) il-pajjiż terz fejn ikun stabbilit l-AIFM mhux tal-UE ma jiġix identifikat bħala pajjiż terz b’riskju għoli skont l-Artikolu 9(2) tad-Direttiva (UE) 2015/849;

(f) il-pajjiż terz fejn ikun stabbilit l-AIFM mhux tal-UE jkun iffirma ftehim mal-Istat Membru ta’ referenza, li jikkonforma bis-sħiħ mal-istandards stabbiliti fl-Artikolu 26 tal-Mudell ta’ Konvenzjoni dwar it-Taxxa tal-OECD fuq id-Dħul u l-Kapital u jiżgura skambju effettiv ta’ informazzjoni fi kwistjonijiet fiskali, inkluż kwalunkwe ftehim multilaterali dwar it-taxxa u l-pajjiż terz ma jissemmiex fl-Anness I tal-konklużjonijiet tal-Kunsill tal-2020 dwar il-lista riveduta tal-UE dwar ġurisdizzjonijiet li ma jikkooperawx għal finijiet tat-taxxa.”;

(14)jiddaħħal l-Artikolu 38a li ġej:

“Artikolu 38a

Rieżami bejn il-pari tal-applikazzjoni tar-reġim ta’ delega

1.L-ESMA għandha, fuq bażi regolari u mill-inqas kull sentejn, twettaq analiżi tar-rieżami bejn il-pari tal-attivitajiet superviżorji tal-awtoritajiet kompetenti fir-rigward tal-applikazzjoni tal-Artikolu 20. Dik l-analiżi tar-rieżami bejn il-pari għandha tiffoka fuq il-miżuri meħuda biex jiġi evitat li l-AIFMs, li jiddelegaw il-prestazzjoni tal-ġestjoni tal-portafoll jew il-ġestjoni tar-riskju lil partijiet terzi li jinsabu f’pajjiżi terzi, isiru entitajiet kaxxa tal-ittri.

2.Meta twettaq l-analiżi tar-rieżami bejn il-pari, l-ESMA għandha tuża metodi trasparenti biex tiżgura valutazzjoni u tqabbil oġġettivi bejn l-awtoritajiet kompetenti rieżaminati.”;

(15) fl-Artikolu 40(2), il-punti (b) u (c) huma sostitwiti b’dan li ġej:

“(b) il-pajjiż terz fejn ikun stabbilit l-AIF mhux tal-UE ma jiġix identifikat bħala pajjiż terz b’riskju għoli skont l-Artikolu 9(2) tad-Direttiva (UE) 2015/849;

(c) il-pajjiż terz fejn hu stabbilit l-AIF mhux tal-UE ikun iffirma ftehim mal-Istat Membru ta’ referenza u ma’ kull Stat Membru ieħor fejn ikun intiż li jiġu kkummerċjalizzati l-unitajiet jew l-ishma tal-AIF mhux tal-UE, li jikkonforma bis-sħiħ mal-istandards stabbiliti fl-Artikolu 26 tal-Mudell ta’ Konvenzjoni dwar it-Taxxa tal-OECD fuq id-Dħul u l-Kapital u li jiżgura skambju ta’ informazzjoni effettiv fil-kwistjonijiet fiskali, inkluż kwalunkwe ftehim fiskali multilaterali, u l-pajjiż terz ma jissemmiex fl-Anness I tal-konklużjonijiet tal-Kunsill tal-2020 dwar il-lista riveduta tal-UE dwar ġuriżdizzjonijiet mhux kooperattivi għal finijiet tat-taxxa.”;

(16)l-Artikolu 42(1) huwa emendat kif ġej:

(a)il-punt (c) huwa sostitwit b’dan li ġej:

“(c) il-pajjiż terz fejn ikun stabbilit l-AIFM mhux tal-UE jew l-AIF mhux tal-UE ma jiġix identifikat bħala pajjiż terz b’riskju għoli skont l-Artikolu 9(2) tad-Direttiva (UE) 2015/849.”;

(b)jiżdied il-punt (d) li ġej:

“(d) il-pajjiż terz fejn hu stabbilit l-AIF mhux tal-UE jew l-AIFM mhux tal-UE jkun iffirma ftehim mal-Istat Membru fejn ikun intiż li jiġu kkummerċjalizzati l-unitajiet jew l-ishma tal-AIF mhux tal-UE, li jikkonforma bis-sħiħ mal-istandards stabbiliti fl-Artikolu 26 tal-Mudell ta’ Konvenzjoni dwar it-Taxxa tal-OECD fuq id-Dħul u l-Kapital u li jiżgura skambju ta’ informazzjoni effettiv fil-kwistjonijiet fiskali, inkluż kwalunkwe ftehim fiskali multilaterali, u dak il-pajjiż terz ma jissemmiex fl-Anness I tal-konklużjonijiet tal-Kunsill tal-2020 dwar il-lista riveduta tal-UE dwar ġuriżdizzjonijiet mhux kooperattivi għal finijiet tat-taxxa.”;

(17)fl-Artikolu 46(2), il-punt (j) huwa sostitwit b’dan li ġej:

“(j) fl-interess tal-investituri jew tal-pubbliku, jeħtieġu li l-AIFMs jattivaw jew jiddiżattivaw għodda għall-ġestjoni tal-likwidità msemmija fil-punt 1 jew 2 tal-Anness V jew magħżula mill-AIFM f’konformità mal-Artikolu 16(2b), skont liema tkun l-aktar xierqa meta jitqies it-tip ta’ AIF miftuħ jew grupp ta’ AIFs miftuħa kkonċernati u r-riskji għall-protezzjoni tal-investituri jew għall-istabbiltà finanzjarja li jeħtieġu dan ir-rekwiżit.”;

(18)l-Artikolu 47 huwa emendat kif ġej:

(a)il-paragrafu 3 huwa sostitwit b’dan li ġej:

“3. L-informazzjoni kollha skambjata skont din id-Direttiva bejn l-ESMA, l-awtoritajiet kompetenti, l-EBA, l-Awtorità Superviżorja Ewropea (l-Awtorità Ewropea tal-Assigurazzjoni u l-Pensjonijiet tax-Xogħol) stabbilita bir-Regolament (UE) Nru 1094/2010 tal-Parlament Ewropew u tal-Kunsill* u l-BERS, għandha titqies bħala kunfidenzjali, ħlief:

(a)meta l-ESMA jew l-awtorità kompetenti jew awtorità jew korp oħra kkonċernati fil-mument tal-komunikazzjoni jiddikjaraw li tali informazzjoni tista’ tiġi ddivulgata;

(b)meta d-divulgazzjoni tkun meħtieġa għal proċedimenti ġudizzjarji;

(c)meta l-informazzjoni ddivulgata tintuża f’sommarju jew f’forma aggregata li fiha l-parteċipanti individwali fis-swieq finanzjarji ma jkunux jistgħu jiġu identifikati.

*Ir-Regolament (UE) Nru 1094/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol), u li jemenda d-Deċiżjoni Nru 716/2009/KE u li jħassar id-Deċiżjoni tal-Kummissjoni 2009/79/KE (ĠU L 331, 15.12.2010, p. 48).”;

(b)fil-paragrafu 4, jiżdied il-punt (d) li ġej:

“(d) ir-rekwiżit li l-AIFMs mhux tal-UE li jikkummerċjalizzaw fl-AIFs tal-Unjoni li jimmaniġġjaw, jew l-AIFMs tal-UE li jimmaniġġjaw l-AIFs mhux tal-UE, jattivaw jew jiddiżattivaw għodda għall-ġestjoni tal-likwidità msemmija fil-punt 1 jew 2 tal-Anness V jew magħżula mill-AIFM, skont liema tkun l-aktar xierqa meta jitqies it-tip ta’ AIF miftuħ ikkonċernat u r-riskji għall-protezzjoni tal-investituri jew għall-istabbiltà finanzjarja li jeħtieġu dan ir-rekwiżit.”;

(19) l-Artikolu 50 huwa emendat kif ġej:

(a)il-paragrafu 5 huwa sostitwit b’dan li ġej:

“5.   Meta l-awtoritajiet kompetenti ta’ Stat Membru jkollhom raġunijiet razzjonali sabiex jissuspettaw li jkunu qegħdin jitwettqu jew twettqu atti kontra d-dispożizzjonijiet ta’ din id-Direttiva, minn AIFM li mhux suġġetti għas-superviżjoni ta’ dawk l-awtoritajiet kompetenti, huma għandhom jinnotifikaw lill-AETS u lill-awtoritajiet kompetenti tal-Istat Membru ta’ domiċilju u tal-Istat Membru ospitanti tal-AIFM kkonċernat b’mod kemm jista’ jkun speċifiku. L-awtoritajiet riċeventi għandhom jieħdu azzjoni xierqa, għandhom jinfurmaw lill-ESMA u lill-awtoritajiet kompetenti notifikanti bl-eżitu ta’ dik l-azzjoni, u sa fejn ikun possibbli, bl-iżviluppi interim sinifikanti. Dan il-paragrafu għandu jkun mingħajr pregudizzju għall-kompetenza tal-awtorità kompetenti li tinnotifika.”;

(b)jiddaħħlu l-paragrafi 5a sa 5g li ġejjin:

“5a. L-awtoritajiet kompetenti tal-Istat Membru domiċiljari ta’ AIFM għandhom jinnotifikaw lill-awtoritajiet kompetenti tal-Istat Membru ospitanti tal-AIFM, lill-ESMA u lill-BERS qabel ma jeżerċitaw is-setgħat skont l-Artikolu 46(2), il-punt (j), jew l-Artikolu 47(4), il-punt (d).

5b. L-awtorità kompetenti tal-Istat Membru ospitanti ta’ AIFM tista’ titlob lill-awtorità kompetenti tal-Istat Membru domiċiljari tal-AIFM biex teżerċita s-setgħat stabbiliti fl-Artikolu 46(2), il-punt (j) jew fl-Artikolu 47(4), il-punt (d), filwaqt li tispeċifika r-raġunijiet għat-talba u tinnotifika lill-ESMA u lill-BERS dwarha.

5c. Meta l-awtorità kompetenti tal-Istat Membru domiċiljari tal-AIFM ma taqbilx mat-talba msemmija fil-paragrafu 5b, hija għandha tinforma lill-awtorità kompetenti tal-Istat Membru ospitanti tal-AIFM, lill-ESMA u lill-BERS dwar dan, filwaqt li tiddikjara r-raġunijiet tagħha.

5d. Abbażi tal-informazzjoni riċevuta f’konformità mal-paragrafi 5b u 5c, l-ESMA għandha toħroġ opinjoni lill-awtoritajiet kompetenti tal-Istat Membru domiċiljari tal-AIFM dwar l-eżerċitar tas-setgħat stabbiliti fl-Artikolu 46(2), il-punt (j) jew l-Artikolu 47(4), il-punt (d).

5e. Meta l-awtorità kompetenti ma taġixxix f’konformità mal-opinjoni tal-ESMA msemmija fil-paragrafu 5d, jew ma jkollhiex l-intenzjoni li tikkonforma magħha, hija għandha tinforma lill-ESMA, filwaqt li tiddikjara r-raġunijiet tagħha għan-nuqqas ta’ konformità jew għall-intenzjoni. L-ESMA tista’ tippubblika l-fatt li awtorità kompetenti ma tikkonformax jew ma hijiex biħsiebha tikkonforma mal-parir tagħha. L-ESMA tista’ tiddeċiedi wkoll, skont il-każ individwali, li tippubblika r-raġunijiet mogħtija mill-awtorità kompetenti f’dan ir-rigward. L-ESMA għandha tagħti lill-awtoritajiet kompetenti avviż bil-quddiem dwar tali pubblikazzjoni.

5f. L-awtorità kompetenti tal-Istat Membru ospitanti ta’ AIFM tista’ titlob lill-awtorità kompetenti tal-Istat Membru domiċiljari tal-AIFM biex teżerċita, mingħajr dewmien, is-setgħat stabbiliti fl-Artikolu 46(2), filwaqt li tispeċifika r-raġunijiet għat-talba tagħha u tinnotifika lill-ESMA, u jekk ikun hemm riskji potenzjali għall-istabbiltà u l-integrità tas-sistema finanzjarja, lill-BERS dwarha.

L-awtorità kompetenti tal-Istat Membru domiċiljari tal-AIFM għandha, mingħajr dewmien, tinforma lill-awtorità kompetenti tal-Istat Membru ospitanti tal-AIFM, lill-ESMA, u jekk ikun hemm riskji potenzjali għall-istabbiltà u l-integrità tas-sistema finanzjarja, lill-BERS dwar is-setgħat eżerċitati u s-sejbiet tagħha.

5g. L-ESMA tista’ titlob lill-awtorità kompetenti tissottometti spjegazzjonijiet lill-ESMA fir-rigward ta’ każijiet speċifiċi, li jkollhom implikazzjonijiet transfruntieri, jikkonċernaw kwistjonijiet ta’ protezzjoni tal-investituri jew joħolqu riskji għall-istabbiltà finanzjarja.”;

(c)jiżdied il-paragrafu 7 li ġej:

“7. L-ESMA għandha tiżviluppa abbozzi ta’ standards tekniċi regolatorji li jindikaw f’liema sitwazzjonijiet l-awtoritajiet kompetenti jistgħu jeżerċitaw is-setgħat stabbiliti fl-Artikolu 46(2), fil-punt (j) u f’liema sitwazzjonijiet jistgħu jressqu t-talbiet imsemmija fil-paragrafi 5b u 5f. Meta tiżviluppa dawk l-istandards, l-ESMA għandha tikkunsidra l-implikazzjonijiet potenzjali ta’ tali intervent superviżorju għall-protezzjoni tal-investituri u l-istabbiltà finanzjarja fi Stat Membru ieħor jew fl-Unjoni.

Il-Kummissjoni tiġi ddelegata s-setgħa li tadotta l-istandards tekniċi regolatorji msemmijin fl-ewwel subparagrafu f’konformità mal-Artikoli 10 sa 14 tar-Regolament (UE) Nru 1095/2010.”;

(20)fl-Artikolu 61, il-paragrafu 5 huwa sostitwit b’dan li ġej:

“5.  L-awtoritajiet kompetenti tal-Istat Membru domiċiljari tal-AIF, jew fil-każ meta l-AIF ma jkunx regolat, l-awtoritajiet kompetenti tal-Istat Membru domiċiljari ta’ AIFM, jistgħu jippermettu l-istituzzjonijiet imsemmija fil-punt (a) tal-Artikolu 21(3) u stabbiliti fi Stat Membru ieħor li jinħatru bħala depożitarji. Din id-dispożizzjoni għandha tkun bla ħsara għall-applikazzjoni sħiħa tal-Artikolu 21, ħlief għall-punt (a) tal-paragrafu 5 ta’ dak l-Artikolu dwar il-post fejn id-depożitarju se jkun stabbilit.”;

(21)jiddaħħal l-Artikolu 69b li ġej:

“Artikolu 69b

Rieżami

1.Sa [Jekk jogħġbok daħħal id-data = 60 xahar wara d-dħul fis-seħħ ta’ din id-Direttiva] u wara r-rieżamijiet bejn il-pari mill-ESMA msemmija fl-Artikolu 38a u r-rapporti prodotti mill-ESMA f’konformità mal-Artikolu 7(9), il-Kummissjoni għandha tibda rieżami tal-funzjonament tar-regoli stabbiliti f’din id-Direttiva u l-esperjenza miksuba fl-applikazzjoni tagħhom. Dan ir-rieżami għandu jinkludi valutazzjoni tal-aspetti li ġejjin:

(a)l-impatt fuq l-istabbiltà finanzjarja tad-disponibbiltà u l-attivazzjoni tal-għodod għall-ġestjoni tal-likwidità mill-AIFMs;

(b)l-effettività tar-rekwiżiti tal-awtorizzazzjoni tal-AIFM fl-Artikoli 7 u 8 u r-reġim ta’ delega stabbilit fl-Artikolu 20 ta’ din id-Direttiva fir-rigward tal-prevenzjoni tal-ħolqien ta’ entitajiet kaxxa tal-ittri fl-Unjoni;

(c)l-adegwatezza tar-rekwiżiti applikabbli għall-AIFMs li jimmaniġġjaw AIFs li joriġinaw self stabbiliti fl-Artikolu 15;

(d)l-adegwatezza li dan ir-Regolament jiġi komplementat b’passaport depożitarju;

2.Sa [Jekk jogħġbok daħħal id-data = 24 xahar wara d-dħul fis-seħħ ta’ din id-Direttiva], l-ESMA għandha tissottometti lill-Kummissjoni rapport għall-iżvilupp ta’ ġbir ta’ data superviżorja integrata, li għandu jiffoka fuq kif:

(a)jitnaqqsu l-partijiet fejn ikun hemm duplikazzjonijiet u inkonsistenzi bejn l-oqfsa ta’ rapportar fis-settur tal-ġestjoni tal-assi u f’setturi oħra tal-industrija finanzjarja;

(b)tiġi standardizzata d-data u kif ikun hemm kondiviżjoni u użu effiċjenti tad-data diġà rrapportata fi ħdan kwalunkwe qafas ta’ rapportar tal-Unjoni minn kwalunkwe awtorità kompetenti rilevanti, kemm fil-livell tal-Unjoni kif ukoll dak nazzjonali.

3.Meta tħejji r-rapport imsemmi fil-paragrafu 2, l-ESMA għandha taħdem f’kooperazzjoni mill-qrib mal-Bank Ċentrali Ewropew (BĊE), mal-Awtoritajiet Superviżorji Ewropej l-oħra, u fejn rilevanti, mal-awtoritajiet nazzjonali kompetenti.

4.Wara r-rieżami msemmi fil-paragrafu 1, u wara konsultazzjoni mal-ESMA, il-Kummissjoni għandha tissottometti rapport lill-Parlament Ewropew u lill-Kunsill li jippreżenta l-konklużjonijiet ta’ dak ir-rieżami.”;

(22)L-Anness I huwa emendat kif stabbilit fl-Anness I ta’ din id-Direttiva;

(23)It-test fl-Anness II ta’ din id-Direttiva jiżdied bħala l-Anness V.

Artikolu 2

Emendi għad-Direttiva 2009/65/KE

Id-Direttiva 2009/65/KE hija emendata kif ġej:

(1)fl-Artikolu 2(1), jiżdied il-punt (u) li ġej:

“(u) depożitorju ċentrali tat-titoli” tfisser depożitorju ċentrali tat-titoli kif iddefinit fl-Artikolu 2(1), il-punt (1), tar-Regolament (UE) Nru 909/2014 tal-Parlament Ewropew u tal-Kunsill*.”

* Ir-Regolament (UE) Nru 909/2014 tal-Parlament Ewropew u tal-Kunsill tat-23 ta’ Lulju 2014 dwar titjib fis-saldu tat-titoli fl-Unjoni Ewropea u dwar depożitorji ċentrali tat-titoli u li jemenda d-Direttivi 98/26/KE u 2014/65/UE u r-Regolament (UE) Nru 236/2012 (ĠU L 257, 28.8.2014, p. 1);”

(2)l-Artikolu 7(1) huwa emendat kif ġej:

(a) il-punti (b) u (c) huma sostitwiti b’dan li ġej:

“(b) il-persuni li effettivament iwettqu n-negozju ta’ kumpanija tal-maniġment ikunu ta’ reputazzjoni tajba biżżejjed u jkunu esperjenzati biżżejjed ukoll fir-rigward tat-tip ta’ UCITS immaniġġata mill-kumpanija tal-maniġment, l-ismijiet ta’ dawk il-persuni u ta’ kull persuna li tieħu posthom warajhom fil-kariga jiġu kkomunikati minnufih lill-awtoritajiet kompetenti u t-twettiq tan-negozju ta’ kumpanija tal-maniġment jiġi deċiż minn mill-inqas żewġ persuni fiżiċi li jew ikunu impjegati full-time minn dik il-kumpanija tal-maniġment jew li jkunu impenjati full-time biex iwettqu n-negozju ta’ dik il-kumpanija tal-maniġment u li jkunu residenti fl-Unjoni li jissodisfaw dawn il-kundizzjonijiet;

(c) l-applikazzjoni għall-awtorizzazzjoni tkun akkumpanjata minn programm ta’ attività li jistabbilixxi, tal-anqas, l-istruttura organizzazzjonali tal-kumpanija tal-maniġment, li jispeċifika r-riżorsi tekniċi u umani li jkunu se jintużaw biex jitwettaq in-negozju tal-kumpanija tal-maniġment, informazzjoni dwar il-persuni li effettivament iwettqu n-negozju ta’ dik il-kumpanija tal-maniġment, inkluż:

(i) deskrizzjoni dettaljata tar-rwol, it-titolu u l-livell ta’ superjorità tagħhom;

(ii) deskrizzjoni tal-linji tar-rapportar u tar-responsabbiltajiet tagħhom ġewwa u barra l-kumpanija tal-maniġment;

(iii) ħarsa ġenerali tal-ħin allokat għal kull responsabbiltà tagħhom;”;

(b)jiżdied il-punt (e) li ġej:

“(e) l-informazzjoni tiġi pprovduta mill-kumpanija tal-maniġment dwar l-arranġamenti magħmula għad-delega lil partijiet terzi ta’ funzjonijiet f’konformità mal-Artikolu 13 u preżentazzjoni dettaljata tar-riżorsi umani u tekniċi li għandhom jintużaw mill-kumpanija tal-maniġment għall-monitoraġġ u l-kontroll tad-delegat.”;

(3)l-Artikolu 13 huwa emendat kif ġej:

(a)il-paragrafu 1 huwa emendat kif ġej:

(i) il-frażi introduttorja hija sostitwita b’dan li ġej:

“1. Il-kumpaniji tal-maniġment, li jkollhom l-intenzjoni li jiddelegaw lil partijiet terzi l-kompitu li jwettqu, f’isimhom, waħda jew aktar mill-funzjonijiet elenkati fl-Anness II jew tas-servizzi msemmija fl-Artikolu 6(3), għandhom jinnotifikaw lill-awtoritajiet kompetenti tal-Istat Membru domiċiljari tagħhom qabel ma l-arranġamenti tad-delega jsiru effettivi. Il-kundizzjonijiet li ġejjin għandhom jiġu ssodisfati:”;

(ii) il-punt (b) huwa sostitwit b’dan li ġej:

“(b) il-mandat ma jridx jipprevjeni l-effettività ta’ superviżjoni fuq il-kumpanija tal-maniġment u b’mod partikolari ma jridx jipprevjeni lill-kumpanija tal-maniġment milli taġixxi, jew lill-UCITS milli tiġi mmaniġġata, fl-aħjar interessi tal-investituri u tal-klijenti tagħha.”;

(iii) il-punti (g), (h) u (i) huma sostitwiti b’dawn li ġejjin:

“(g) il-mandat ma jridx jipprevjeni lill-persuni li jwettqu n-negozju tal-kumpanija tal-maniġment milli jagħtu, fi kwalunkwe ħin, iktar struzzjonijiet lill-impriża li lilha jkunu delegati funzjonijiet, jew l-għoti ta’ servizzi, u milli jirtiraw il-mandat b’effett immedjat meta dan ikun fl-interess tal-investituri u tal-klijenti.

(h) wara li titqies in-natura tal-funzjonijiet u l-għoti ta’ servizzi li għandhom jiġu delegati, l-impriża li lilha jkunu se jiġu delegati funzjonijiet jew għoti ta’ servizzi trid tkun kwalifikata u kapaċi twettaq il-funzjonijiet jew is-servizzi inkwistjoni; u

(i) il-prospetti tal-UCITS iridu jelenkaw is-servizzi u l-funzjonijiet li l-kumpanija tal-maniġment kellha l-permess li tiddelega f’konformità ma’ dan l-Artikolu.”;

(iv) jiżdied il-punt (j) li ġej:

“(j) il-kumpanija tal-maniġment trid tkun tista’ tiġġustifika l-istruttura ta’ delega tagħha kollha kemm hi b’raġunijiet oġġettivi.”;

(b)il-paragrafu 2 huwa sostitwit b’dan li ġej:

“2. Ir-responsabbiltà tal-kumpanija tal-maniġment jew tad-depożitarju ma għandhiex tiġi affettwata minn delega lil partijiet terzi ta’ kwalunkwe funzjoni jew ta’ għoti ta’ servizzi mill-kumpanija tal-maniġment. Il-kumpanija tal-maniġment ma għandhiex tiddelega l-funzjonijiet jew l-għoti ta’ servizzi tagħha sal-punt li, essenzjalment, ma tkunx tista’ tibqa’ titqies bħala l-maniġer tal-UCITS u sal-punt li ssir entità kaxxa tal-ittri.”;

(c)jiżdiedu l-paragrafi 3, 4, 5 u 6 li ġejjin:

“3. Meta kumpanija tal-maniġment tiddelega aktar funzjonijiet ta’ ġestjoni tal-portafoll jew ta’ ġestjoni tar-riskju lil entitajiet li jinsabu f’pajjiżi terzi milli jżomm, l-awtoritajiet kompetenti għandhom, fuq bażi annwali, jinnotifikaw lill-ESMA dwar dawn id-delegazzjonijiet kollha (“notifiki ta’ delega”).

In-notifiki ta’ delega għandhom jinkludu dan li ġej:

(a)informazzjoni dwar il-UCITS u l-kumpanija tal-maniġment kkonċernata tagħha;

(b)informazzjoni dwar id-delegat, li tispeċifika d-domiċilju tad-delegat u jekk huwiex entità regolata jew le;

(c)deskrizzjoni tal-funzjonijiet iddelegati tal-ġestjoni tal-portafoll u tal-ġestjoni tar-riskju;

(d)deskrizzjoni tal-funzjonijiet miżmuma tal-ġestjoni tal-portafoll u tal-ġestjoni tar-riskju;

(e) kwalunkwe informazzjoni oħra meħtieġa biex jiġu analizzati l-arranġamenti ta’ delega;

(f)deskrizzjoni tal-attivitajiet superviżorji tal-awtoritajiet kompetenti, inklużi rieżamijiet ibbażati fuq id-dokumentazzjoni u spezzjonijiet fuq il-post u r-riżultati ta’ dawn l-attivitajiet;

(g)kwalunkwe dettall dwar il-kooperazzjoni bejn l-awtorità kompetenti u l-awtorità superviżorja tad-delegat.

4. L-ESMA għandha tiżviluppa abbozzi ta’ standards tekniċi regolatorji biex tiddetermina l-kontenut tan-notifiki ta’ delega u l-formoli, il-mudelli u l-proċeduri standard għat-trażmissjoni tan-notifiki ta’ delega f’lingwa abitwali għall-isfera tal-finanzi. Il-formoli u l-mudelli standard għandhom jinkludu kampijiet ta’ informazzjoni li jkopru l-informazzjoni kollha msemmija fil-paragrafu 3.

Il-Kummissjoni qed tiġi ddelegata s-setgħa li tadotta l-istandards tekniċi regolatorji msemmijin fl-ewwel subparagrafu f’konformità mal-Artikoli 10 sa 14 tar-Regolament (UE) Nru 1095/2010.

5. L-ESMA għandha tipprovdi lill-Parlament Ewropew, lill-Kunsill u lill-Kummissjoni b’rapporti regolari, tal-anqas kull sentejn, li janalizzaw il-prattiki tas-suq fir-rigward tad-delega lil entitajiet li jinsabu f’pajjiżi terzi u l-konformità mal-Artikoli 7 u 13.

6. Il-Kummissjoni, permezz ta’ atti ddelegati skont l-Artikolu 112a, għandha tadotta miżuri li jispeċifikaw:

(a)il-kundizzjonijiet biex jiġu sodisfatti r-rekwiżiti stabbiliti fil-paragrafu 1;

(b)il-kundizzjonijiet skont liema l-kumpanija tal-maniġment tal-UCITS għandha tiġi meqjusa li tkun iddelegat il-funzjonijiet tagħha sa fejn issir entità kaxxa tal-ittri u ma tkunx tista’ tibqa’ titqies bħala l-maniġer tal-UCITS kif stabbilit fil-paragrafu 2.”;

(4)jiddaħħal l-Artikolu 18a li ġej:

“Artikolu 18a

1.L-Istati Membri għandhom jiżguraw li tal-anqas l-għodod għall-ġestjoni tal-likwidità stabbiliti fl-Anness IIA jkunu disponibbli għall-UCITS.

2.Wara li tivvaluta l-adegwatezza fir-rigward tal-istrateġija ta’ investiment segwita, il-profil tal-likwidità u l-politika ta’ tifdija, kumpanija tal-maniġment għandha tagħżel mill-inqas għodda xierqa waħda għall-ġestjoni tal-likwidità mil-lista stabbilita fl-Anness IIA, il-punti 2 sa 4, u tinkludi fir-regoli tal-fond jew fl-istrumenti ta’ inkorporazzjoni tal-kumpanija ta’ investiment għal użu possibbli fl-interess tal-investituri tal-UCITS. Il-kumpanija tal-maniġment għandha timplimenta politiki u proċeduri dettaljati għall-attivazzjoni u d-diżattivazzjoni ta’ kwalunkwe għodda magħżula għall-ġestjoni tal-likwidità u l-arranġamenti operazzjonali u amministrattivi għall-użu ta’ din l-għodda.

3.L-ESMA għandha tiżviluppa abbozzi ta’ standards tekniċi regolatorji biex tiddefinixxi u tispeċifika l-karatteristiċi tal-għodod għall-ġestjoni tal-likwidità stabbiliti fl-Anness IIA.

4.L-ESMA għandha tiżviluppa abbozzi ta’ standards tekniċi regolatorji dwar il-kriterji għall-għażla u l-użu ta’ għodod xierqa għall-ġestjoni tal-likwidità mill-kumpaniji tal-maniġment għall-ġestjoni tar-riskju tal-likwidità, inkluż divulgazzjonijiet xierqa lill-investituri, filwaqt li titqies il-kapaċità ta’ dawn l-għodod biex jitnaqqsu l-vantaġġi mhux dovuti għall-investituri li jifdu l-investimenti tagħhom l-ewwel, u biex jittaffew ir-riskji tal-istabbiltà finanzjarja.

5.Il-Kummissjoni tiġi ddelegata s-setgħa li tadotta l-istandards tekniċi regolatorji msemmijin fil-paragrafi 3 u 4 f’konformità mal-Artikoli 10 sa 14 tar-Regolament (UE) Nru 1095/2010.”;

(5)jiddaħħlu l-Artikoli 20a u 20b li ġejjin:

“Artikolu 20a

1.Kumpanija tal-maniġment għandha tirrapporta regolarment lill-awtoritajiet kompetenti tal-Istat Membru domiċiljari tagħha dwar is-swieq u l-istrumenti li fihom tinnegozja f’isem il-UCITS li timmaniġġa.

2.L-ESMA għandha tiżviluppa abbozz ta’ standards tekniċi regolatorji li jispeċifikaw id-dettalji li għandhom jiġu rrapportati f’konformità mal-paragrafu 1. L-ESMA għandha tqis rekwiżiti oħra ta’ rapportar li għalihom huma soġġetti l-kumpaniji tal-maniġment u r-rapport maħruġ f’konformità mal-Artikolu 20b.

L-ESMA għandha tissottometti dawk l-abbozzi ta’ standards tekniċi regolatorji lill-Kummissjoni sa [Jekk jogħġbok daħħal id-data = 36 xahar wara d-dħul fis-seħħ ta’ din id-Direttiva].

Il-Kummissjoni qed tiġi ddelegata s-setgħa li tadotta l-istandards tekniċi regolatorji msemmijin fl-ewwel subparagrafu f’konformità mal-Artikoli 10 sa 14 tar-Regolament (UE) Nru 1095/2010.

3.L-ESMA għandha tiżviluppa abbozzi ta’ standards tekniċi ta’ implimentazzjoni li jispeċifikaw:

(a)l-istandards tal-format u tad-data għar-rapporti msemmija fil-paragrafu 1;

(b)    il-frekwenza u t-twaqqit tar-rapportar.

L-ESMA għandha tissottometti dawk l-abbozzi ta’ standards tekniċi ta’ implimentazzjoni lill-Kummissjoni sa [Jekk jogħġbok daħħal id-data = 36 xahar wara d-dħul fis-seħħ ta’ din id-Direttiva].

Il-Kummissjoni tiġi ddelegata s-setgħa li tadotta l-istandards tekniċi ta’ implimentazzjoni msemmijin fl-ewwel subparagrafu f’konformità mal-Artikolu 15 tar-Regolament (UE) Nru 1095/2010.

Artikolu 20b

1.Sa [Jekk jogħġbok daħħal id-data = 24 xahar wara d-dħul fis-seħħ ta’ din id-Direttiva], l-ESMA għandha tissottometti lill-Kummissjoni rapport għall-iżvilupp ta’ ġbir ta’ data superviżorja integrata, li għandu jiffoka fuq kif:

(b)jitnaqqsu l-partijiet fejn ikun hemm duplikazzjonijiet u inkonsistenzi bejn l-oqfsa ta’ rapportar fis-settur tal-ġestjoni tal-assi u f’setturi oħra tal-industrija finanzjarja u

(c)jittejbu l-istandardizzazzjoni tad-data u l-kondiviżjoni u l-użu effiċjenti tad-data diġà rrapportata fi ħdan kwalunkwe qafas ta’ rapportar tal-Unjoni minn kwalunkwe awtorità kompetenti rilevanti, kemm fil-livell tal-Unjoni kif ukoll dak nazzjonali.

2.Meta tħejji r-rapport imsemmi fil-paragrafu 1, l-ESMA għandha taħdem f’kooperazzjoni mill-qrib mal-Bank Ċentrali Ewropew (BĊE), mal-Awtoritajiet Superviżorji Ewropej l-oħra, u fejn rilevanti, mal-awtoritajiet nazzjonali kompetenti.”;

(6)l-Artikolu 22 a huwa emendat kif ġej:

(a)fil-paragrafu 2, il-punt (c) huwa sostitwit b’dan li ġej:

“(c) id-depożitarju jkun eżerċita l-ħila, l-attenzjoni u d-diliġenza kollha dovuti fl-għażla u l-ħatra ta’ kwalunkwe parti terza li lilha jkollu l-intenzjoni jiddelega partijiet mill-kompiti tiegħu, ħlief meta dik il-parti terza tkun depożitorju ċentrali tat-titoli li jaġixxi fil-kapaċità ta’ CSD emittent kif definit fl-Artikolu 1, il-punt (e), tar-Regolament Delegat tal-Kummissjoni (UE) 2017/392*, u jkompli jeżerċita l-ħila, l-attenzjoni u d-diliġenza kollha dovuta fir-rieżami perjodiku u l-monitoraġġ kontinwu ta’ kwalunkwe parti terza li lilha jkun iddelega partijiet mill-kompiti tiegħu u tal-arranġamenti tal-parti terza fir-rigward tal-materji ddelegati lilha.            

* Ir-Regolament Delegat tal-Kummissjoni (UE) 2017/392 tal-11 ta’ Novembru 2016 li jissupplimenta r-Regolament (UE) Nru 909/2014 tal-Parlament Ewropew u tal-Kunsill fir-rigward ta’ standards tekniċi regolatorji dwar ir-rekwiżiti ta’ awtorizzazzjoni, superviżorji u operazzjonali għal depożitarji ċentrali tat-titoli (ĠU L 65, 10.3.2017, p. 48)”;

(b)il-paragrafu 4 huwa sostitwit b’dan li ġej:

“4. Għall-finijiet ta’ dan il-paragrafu, l-għoti ta’ servizzi minn depożitorju ċentrali tat-titoli li jaġixxi fil-kapaċità ta’ CSD emittent, kif definit fl-Artikolu 1, il-punt (e) tar-Regolament Delegat tal-Kummissjoni (UE) 2017/392, ma għandux jitqies bħala delega tal-funzjonijiet ta’ kustodja tad-depożitarju. ”;

(7)fl-Artikolu 29(1), il-punt (b) huwa ssostitwit b’dan li ġej:

“(b) id-diretturi tal-kumpanija ta’ investiment iridu jkunu ta’ reputazzjoni tajba biżżejjed u ta’ esperjenza biżżejjed ukoll fir-rigward tat-tip ta’ negozju mwettaq mill-kumpanija ta’ investiment u, għal dak l-għan: l-ismijiet tad-diretturi u ta’ kull persuna li tieħu posthom warajhom fil-kariga jridu jiġu kkomunikati mill-ewwel lill-awtoritajiet kompetenti; it-twettiq tan-negozju ta’ kumpanija ta’ investiment irid jiġi deċiż minn tal-anqas żewġ impjegati full-time jew żewġ persuni fiżiċi impenjati full-time li jwettqu n-negozju ta’ dik il-kumpanija tal-maniġment u residenti fl-Unjoni li jissodisfaw dawn il-kundizzjonijiet; u "diretturi" għandha tfisser dawk il-persuni li, skont il-liġi jew l-istrumenti ta’ inkorporazzjoni, jirrappreżentaw il-kumpanija ta’ investiment, jew li effettivament jiddeterminaw il-politika tal-kumpanija;”;

(8)fl-Artikolu 84, il-paragrafi 2 u 3 huma sostitwiti b’dawn li ġejjin:

“2. Permezz ta’ deroga mill-paragrafu 1:

(a)UCITS tista’, fl-interess tat-titolari tal-unitajiet tagħha, tissospendi temporanjament ir-riakkwist jew it-tifdija tal-unitajiet tagħha jew tattiva għodda oħra għall-ġestjoni tal-likwidità magħżula f’konformità mal-Artikolu 18a(2);

(b)fl-interess tat-titolari tal-unitajiet jew tal-pubbliku, l-awtoritajiet kompetenti ta’ Stat Membru domiċiljari tal-UCITS jistgħu jirrikjedu li UCITS tattiva għodda għall-ġestjoni tal-likwidità msemmija fil-punti 1 jew 2 tal-Anness IIa, jew magħżula u nnotifikata mill-UCITS f’konformità mal-Artikolu 18a(2), skont liema tkun l-aktar xierqa meta jitqies it-tip ta’ UCITS u r-riskji li jeħtieġu t-teħid ta’ din il-miżura.

Is-sospensjoni temporanja msemmija fil-punt (a) tal-ewwel subparagrafu għandha tiġi prevista biss f’każijiet eċċezzjonali meta ċ-ċirkostanzi jeħtieġu hekk, u fejn is-sospensjoni hija ġġustifikata fir-rigward tal-interessi tat-titolari tal-unitajiet.

3. Il-UCITS għandha tinnotifika, mingħajr dewmien, lill-awtoritajiet kompetenti tal-Istat Membru domiċiljari tagħha u lill-awtoritajiet kompetenti tal-Istati Membri kollha li fihom tikkummerċjalizza l-unitajiet tagħha, meta tattiva jew tiddiżattiva għodda għall-ġestjoni tal-likwidità msemmija fil-paragrafu 2, il-punt (a).

L-awtoritajiet kompetenti tal-Istat Membru domiċiljari tal-UCITS għandhom jinformaw, mingħajr dewmien, lill-ESMA u lill-BERS dwar kwalunkwe notifika riċevuta f’konformità ma’ dan il-paragrafu.

3a. L-awtoritajiet kompetenti tal-Istat Membru domiċiljari tal-UCITS għandhom jinnotifikaw lill-awtoritajiet kompetenti tal-Istati Membri kollha li fihom il-UCITS tikkummerċjalizza l-unitajiet tagħha, lill-ESMA u lill-BERS qabel ma jeżerċitaw is-setgħat skont il-paragrafu 2, il-punt (b).

3b. L-awtorità kompetenti tal-Istati Membri li fihom UCITS tikkummerċjalizza l-unitajiet tagħha tista’ titlob lill-awtorità kompetenti tal-Istat Membru domiċiljari tal-UCITS biex teżerċita s-setgħat stabbiliti fil-paragrafu 2, il-punt (b), filwaqt li tispeċifika r-raġunijiet għat-talba u tinnotifika lill-ESMA u lill-BERS dwarha.

3c. Meta l-awtorità kompetenti tal-Istat Membru domiċiljari tal-UCITS ma taqbilx mat-talba msemmija fil-paragrafu 3b, hija għandha tinforma lill-awtorità kompetenti rikjedenti, lill-ESMA u lill-BERS dwar dan, filwaqt li tiddikjara r-raġunijiet għan-nuqqas ta’ qbil.

3d. Fuq il-bażi tal-informazzjoni riċevuta f’konformità mal-paragrafi 3b u 3c, l-ESMA għandha tibgħat opinjoni lill-awtoritajiet kompetenti tal-Istat Membru domiċiljari tal-UCITS dwar l-eżerċitar tas-setgħat stabbiliti fil-paragrafu 2, il-punt (b).

3e. Meta l-awtorità kompetenti ma taġixxix f’konformità mal-opinjoni tal-ESMA msemmija fil-paragrafu 3d, jew ma jkollhiex l-intenzjoni li tikkonforma magħha, hija għandha tinforma lill-ESMA, filwaqt li tiddikjara r-raġunijiet għan-nuqqas ta’ konformità jew għall-intenzjoni. L-ESMA tista’ tippubblika l-fatt li awtorità kompetenti ma tikkonformax jew ma hijiex biħsiebha tikkonforma mal-parir tagħha. L-ESMA tista’ tiddeċiedi wkoll, skont il-każ individwali, li tippubblika r-raġunijiet mogħtija mill-awtorità kompetenti f’dan ir-rigward. L-ESMA għandha tagħti lill-awtoritajiet kompetenti avviż bil-quddiem dwar tali pubblikazzjoni.”

3f. L-ESMA għandha tiżviluppa abbozzi ta’ standards tekniċi regolatorji li jindikaw f’liema sitwazzjonijiet l-awtoritajiet kompetenti jistgħu jeżerċitaw is-setgħat stabbiliti fil-paragrafu 2, il-punt (b). Meta tiżviluppa dawk l-istandards, l-ESMA għandha tikkunsidra l-implikazzjonijiet potenzjali ta’ tali intervent superviżorju għall-protezzjoni tal-investituri u l-istabbiltà finanzjarja fi Stat Membru ieħor jew fl-Unjoni.

Il-Kummissjoni tiġi ddelegata s-setgħa li tadotta l-istandards tekniċi regolatorji msemmijin fl-ewwel subparagrafu f’konformità mal-Artikoli 10 sa 14 tar-Regolament (UE) Nru 1095/2010.”;

(9)fl-Artikolu 98, jiżdiedu l-paragrafi 3 u 4 li ġejjin:

“3. L-awtorità kompetenti tal-Istat Membru ospitanti tal-UCITS tista’ titlob lill-awtorità kompetenti tal-Istat Membru domiċiljari tal-UCITS teżerċita, mingħajr dewmien, is-setgħat stabbiliti fil-paragrafu 2, filwaqt li tispeċifika r-raġunijiet għat-talba tagħha u tinnotifika lill-ESMA, u jekk ikun hemm riskji potenzjali għall-istabbiltà u l-integrità tas-sistema finanzjarja, il-BERS dwarha.

L-awtorità kompetenti tal-Istat Membru domiċiljari tal-UCITS għandha, mingħajr dewmien, tinforma lill-awtorità kompetenti tal-Istat Membru ospitanti tal-UCITS, lill-ESMA, u jekk ikun hemm riskji potenzjali għall-istabbiltà u l-integrità tas-sistema finanzjarja, lill-BERS dwar is-setgħat eżerċitati u s-sejbiet tagħha.”

4. L-ESMA tista’ titlob lill-awtorità kompetenti tissottometti spjegazzjonijiet lill-ESMA fir-rigward ta’ każijiet speċifiċi, li jkollhom implikazzjonijiet transfruntieri, jikkonċernaw kwistjonijiet ta’ protezzjoni tal-investituri jew joħolqu riskji għall-istabbiltà finanzjarja.”;

(10)jiddaħħal l-Artikolu 101a li ġej:

“Artikolu 101a

1.L-ESMA għandha, fuq bażi regolari u mill-inqas kull sentejn, twettaq analiżi tar-rieżami bejn il-pari tal-attivitajiet superviżorji tal-awtoritajiet kompetenti fir-rigward tal-applikazzjoni tal-Artikolu 13. Dik l-analiżi tar-rieżami bejn il-pari għandha tiffoka fuq il-miżuri meħuda biex jiġi evitat li l-kumpaniji tal-maniġment, li jiddelegaw il-prestazzjoni tal-ġestjoni tal-portafoll jew il-ġestjoni tar-riskju lil partijiet terzi li jinsabu f’pajjiżi terzi, isiru entitajiet kaxxa tal-ittri.

2.Meta twettaq l-analiżi tar-rieżami bejn il-pari, l-ESMA għandha tuża metodi trasparenti biex tiżgura valutazzjoni u tqabbil oġġettivi bejn l-awtoritajiet kompetenti rieżaminati.”;

(11)jiddaħħal l-Artikolu 110a li ġej:

“Artikolu 110a

Sa [Jekk jogħġbok daħħal id-data = 30 xahar wara d-dħul fis-seħħ ta’ din id-Direttiva] u wara r-rieżamijiet bejn il-pari u l-analiżi msemmija fl-Artikolu 101a u r-rapport prodott mill-ESMA f’konformità mal-Artikolu 13(4), il-Kummissjoni għandha tibda rieżami tar-reġim ta’ delega stabbilit fl-Artikolu 13 fir-rigward tal-prevenzjoni tal-ħolqien ta’ entitajiet kaxxa tal-ittri fl-Unjoni.”;

(12) l-Artikolu 112a huwa emendat kif ġej:

(a) fil-paragrafu 1, jiżdied is-subparagrafu li ġej:

“Il-Kummissjoni tingħata s-setgħa li tadotta l-atti delegati msemmija fl-Artikolu 13 għal perjodu ta’ erba’ snin minn [Jekk jogħġbok daħħal id-data tad-dħul fis-seħħ ta’ din id-Direttiva.]”;

(b)fil-paragrafu 3, l-ewwel sentenza hija sostitwita b’dan li ġej:

“Id-delega tas-setgħa msemmija fl-Artikoli 12, 13, 14, 18a, 20a, 26b, 43, 50a, 51, 60, 61, 62, 64, 75, 78, 81, 95 u 111 tista’ tiġi revokata f’kull mument mill-Parlament Ewropew jew mill-Kunsill. Deċiżjoni li tirrevoka għandha ttemm id-delega tas-setgħa speċifikata f’dik id-deċiżjoni. Din għandha ssir effettiva l-għada tal-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fiha. Hija ma għandhiex taffettwa l-validità ta’ kwalunkwe att delegat diġà fis-seħħ.”;

(c)fil-paragrafu 5, l-ewwel sentenza hija sostitwita b’dan li ġej:

“Att delegat adottat skont l-Artikoli 12, 13, 14, 18a, 20a, 26b, 43, 50a, 51, 60, 61, 62, 64, 75, 78, 81, 95 u 111 għandu jidħol fis-seħħ biss jekk ma tkun saret ebda oġġezzjoni mill-Parlament Ewropew jew mill-Kunsill fi żmien tliet xhur min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, kemm il-Parlament Ewropew kif ukoll il-Kunsill ikunu t-tnejn li huma informaw lill-Kummissjoni li ma jkunux se joġġezzjonaw. Dak il-perjodu għandu jiġi estiż bi tliet xhur fuq l-inizjattiva tal-Parlament Ewropew jew tal-Kunsill.”;

(13)L-Anness I huwa emendat kif stabbilit fl-Anness III ta’ din id-Direttiva;

(14)It-test fl-Anness IV ta’ din id-Direttiva jiżdied bħala l-Anness IIA.

Artikolu 3

Traspożizzjoni

1.L-Istati Membri għandhom jadottaw u jippubblikaw, sa mhux aktar tard minn [Jekk jogħġbok daħħal id-data - 24 xahar wara d-dħul fis-seħħ ta’ din id-Direttiva], il-liġijiet, ir-regolamenti u d-dispożizzjonijiet amminstrattivi neċessarji sabiex jikkonformaw ma’ din id-Direttiva. Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.

2.Huma għandhom japplikaw dawk id-dispożizzjonijiet minn [...].

3.Meta l-Istati Membri jadottaw dawn id-dispożizzjonijiet, dawn għandhom jinkludu referenza għal din id-Direttiva jew ikunu akkumpanjati minn tali referenza fl-okkażjoni tal-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

4.L-Istati Membri għandhom jikkomunikaw lill-Kummissjoni t-test tal-miżuri prinċipali tal-liġi nazzjonali li jadottaw fil-qasam kopert minn din id-Direttiva.

Artikolu 4

Dħul fis-seħħ

Din id-Direttiva għandha tidħol fis-seħħ fl-20 jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 5

Destinatarji

Din id-Direttiva hija indirizzata lill-Istati Membri.

Magħmul fi Brussell,

(1)    Id-Direttiva 2011/61/UE tal-Parlament Ewropew u tal-Kunsill tat-8 ta’ Ġunju 2011 dwar Maniġers ta’ Fondi ta’ Investiment Alternattivi u li temenda d-Direttivi 2003/41/KE u 2009/65/KE u r-Regolamenti (KE) Nru 1060/2009 u (UE) Nru 1095/2010, ĠU L 174, 1.7.2011, p. 1 (AIFMD).

(2)    Id-Direttiva 2009/65/KE tal-Parlament Ewropew u tal-Kunsill tat-13 ta’ Lulju 2009 dwar il-koordinazzjoni ta’ liġijiet, regolamenti u dispożizzjonijiet amministrattivi fir-rigward tal-impriżi ta’ investiment kollettiv f’titoli trasferibbli (UCITS) (tfassil mill-ġdid), (ĠU L 302, 17.11.2009, p. 32).

(3)    Supra 1.

(4)    Il-premessi 2 - 4 u 94 tal-AIFMD.

(5)    L-Artikolu 32(1) tal-AIFMD.

(6)    Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, Unjoni tas-Swieq Kapitali għall-persuni u n-negozji - pjan ta’ azzjoni ġdid (COM/2020/590 final).

(7)    Ir-Rapport tal-Kummissjoni lill-Parlament Ewropew u lill-Kunsill li jevalwa l-applikazzjoni u l-ambitu tad-Direttiva 2011/61/UE tal-Parlament Ewropew u tal-Kunsill dwar Maniġers ta’ Fondi ta’ Investiment Alternattivi (COM/2020/232 final).

(8)    L-AIFMs huma meħtieġa jaħtru depożitarju uniku għal kull AIF li jimmaniġġjaw għall-kustodja tal-assi tal-AIF, jimmonitorjaw il-flussi tal-flus u jiżguraw il-konformità tal-AIF mar-regolamenti u r-regoli tal-fond rilevanti.

(9)    Supra 7.

(10)    Sors: Dokument ta’ Ħidma tal-Persunal tal-BĊE. Fl-2008, l-assi tal-fondi ta’ investiment taż-żona tal-euro kienu madwar 13 % tal-assi totali tas-settur finanzjarju, meta mqabbla ma’ kważi 20 % fl-2020 (sors: Bullettin Makroprudenzjali tal-BĊE April 2021).

(11)    Ara eż. il-Monitor tal-2020 tal-entitajiet mhux bankarji tal-BERS, p. 59, 62-63 (sors: https://www.esrb.europa.eu/pub/pdf/reports/nbfi_monitor/esrb.202010_eunon-bankfinancialintermediationriskmonitor2020~89c25e1973.en.pdf?588be9e8391cfb17584d2a283dfe0abe).

(12)    Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar Strateġija għall-Finanzi Diġitali għall-UE (COM/2020/591 final).

(13)    Barra minn hekk, in-nuqqas ta’ sett minimu ta’ LMTs jista’ jwassal għal differenzi bejn l-Istati Membri minn perspettiva ta’ integrazzjoni tas-suq.

(14)    Bħala parti mill-infrastrutturi ta’ wara n-negozjar, is-CSDs joperaw sistemi ta’ saldu tat-titoli, jipparteċipaw fil-kontroll tal-integrità ta’ kwistjoni li xxekkel il-ħolqien jew it-tnaqqis mhux dovuti ta’ titoli maħruġa, u huma involuti fl-iżgurar ta’ kollateral għal operazzjonijiet ta’ politika monetarja kif ukoll fl-iżgurar ta’ kollateral bejn l-istituzzjonijiet tal-kreditu. Is-CSDs iżommu wkoll it-titoli tal-parteċipanti tagħhom.

(15)    L-aħħar inċiż tal-Artikolu 21(11) tal-AIFMD.

(16)    Ittra tal-ESMA lill-Kummissjoni Ewropea tal-18 ta’ Awwissu 2020 dwar ir-rieżami tal-AIFMD (sors: esma34-32-551_esma_letter_on_aifmd_review.pdf (europa.eu) .

(17)    Ir-Regolament ta’ Delega tal-Kummissjoni (UE) Nru 231/2013 tad-19 ta’ Diċembru 2012 (AIFMR) li jissupplimenta d-Direttiva 2011/61/UE tal-Parlament Ewropew u tal-Kunsill fir-rigward tal-eżenzjonijiet, il-kundizzjonijiet ġenerali tal-operat, id-depożitarji, l-ingranaġġ, it-trasparenza u s-superviżjoni, inklużi rekwiżiti ta’ rapportar superviżorju dettaljat mill-AIFs (ĠU L 83, 22.3.2013, p. 1-95).

(18)    Supra 6.

(19)    Supra 12.

(20)    Ir-Regolament (UE) 2015/760 tal-Parlament Ewropew u tal-Kunsill tad-29 ta’ April 2015 dwar il-Fondi ta’ Investiment Ewropej fuq Terminu Twil (ĠU L 123, 19.5.2015, p. 98-121).

(21)    Report on the Operation of the Alternative Investment Fund Managers Directive (AIFMD) - Directive 2011/61/EU, (Rapport tal-KPMG, Diċembru 2018).

(22)    Ir-Regolament (UE) Nru 909/2014 tal-Parlament Ewropew u tal-Kunsill tat-23 ta’ Lulju 2014 dwar titjib fis-saldu tat-titoli fl-Unjoni Ewropea u dwar depożitorji ċentrali tat-titoli u li jemenda d-Direttivi 98/26/KE u 2014/65/UE u r-Regolament (UE) Nru 236/2012 (ĠU L 257, 28.8.2014, p. 1).

(23)    Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014).

(24)    ĠU C , , p. .

(25)    Id-Direttiva 2011/61/UE tal-Parlament Ewropew u tal-Kunsill tat-8 ta’ Ġunju 2011 dwar Maniġers ta’ Fondi ta’ Investiment Alternattivi u li temenda d-Direttivi 2003/41/KE u 2009/65/KE u r-Regolamenti (KE) Nru 1060/2009 u (UE) Nru 1095/2010 (ĠU L 174, 1.7.2011, p. 1).

(26)    Id-Direttiva 2009/65/KE tal-Parlament Ewropew u tal-Kunsill tat-13 ta’ Lulju 2009 dwar il-koordinazzjoni ta’ liġijiet, regolamenti u dispożizzjonijiet amministrattivi fir-rigward tal-impriżi ta’ investiment kollettiv f’titoli trasferibbli (UCITS) (tfassil mill-ġdid), (ĠU L 302, 17.11.2009, p. 32).

(27)    Ir-Regolament (UE) 2016/1011 tal-Parlament Ewropew u tal-Kunsill tat-8 ta’ Ġunju 2016 dwar l-indiċi użati bħala parametri referenzjarji fi strumenti finanzjarji u kuntratti finanzjarji jew dwar il-kejl tal-prestazzjoni ta’ fondi ta’ investiment u li jemenda d-Direttivi 2008/48/KE u 2014/17/UE u r-Regolament (UE) Nru 596/2014 (ĠU L 171, 29.6.2016, p. 1-65).

(28)    ĠUC , , p. .

(29)    Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, p. 349).

(30)    Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(31)    Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, Unjoni tas-Swieq Kapitali għall-persuni u n-negozji - pjan ta’ azzjoni ġdid (COM/2020/590 final).

(32)    Ir-Regolament (UE) Nru 345/2013 tal-Parlament Ewropew u tal-Kunsill tas-17 ta’ April 2013 dwar fondi Ewropej ta’ kapital ta’ riskju (ĠU L 115, 25.4.2013, p. 1-17).

(33)    Ir-Regolament (UE) Nru 346/2013 tal-Parlament Ewropew u tal-Kunsill tas-17 ta’ April 2013 dwar fondi Ewropej ta’ kapital ta’ riskju (ĠU L 115, 25.4.2013, p. 18-38).

(34)    Ir-Regolament (UE) 2015/760 tal-Parlament Ewropew u tal-Kunsill tad-29 ta’ April 2015 dwar il-Fondi ta’ Investiment Ewropej fuq Terminu Twil (ĠU L 123, 19.5.2015, p. 98-121).

(35)    Ir-Regolament (UE) Nru 600/2014 tal-Parlament Ewropew u tal-Kunsill tal-15 ta’ Mejju 2014 dwar is-swieq tal-istrumenti finanzjarji u li jemenda r-Regolament (UE) Nru 648/2012 Test b’relevanza għaż-ŻEE (ĠU L 173, 12.6.2014, p. 84).

(36)    Ir-Regolament (UE) 2019/834 tal-Parlament Ewropew u tal-Kunsill tal-20 ta’ Mejju 2019 li jemenda r-Regolament (UE) Nru 648/2012 fir-rigward tal-obbligu tal-ikklerjar, is-sospensjoni tal-obbligu tal-ikklerjar, ir-rekwiżiti tar-rapportar, it-tekniki tal-mitigazzjoni tar-riskju għal kuntratti tad-derivattivi OTC mhux ikklerjati minn kontroparti ċentrali, ir-reġistrazzjoni u s-superviżjoni ta’ repożitorji tat-tranżazzjonijiet u r-rekwiżiti għar-repożitorji tat-tranżazzjonijiet (ĠU L 141, 28.5.2019, p. 42).

(37)    Ir-Regolament (UE) Nru 1011/2012 tal-Bank Ċentrali Ewropew tas-17 ta’ Ottubru 2012 dwar statistika fuq investimenti f’titoli (ĠU L 305, 1.11.2012, p. 6).

(38)    Ir-Regolament (UE) Nru 1073/2013 tal-Bank Ċentrali Ewropew tat-18 ta’ Ottubru 2013 dwar statistika dwar l-attiv u l-passiv ta’ fondi ta’ investiment (ĠU L 297, 7.11.2013, p. 73).

(39)    Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(40)    Ir-Regolament Delegat tal-Kummissjoni (UE) Nru 231/2013 tad-19 ta’ Diċembru 2012 li jissupplimenta d-Direttiva 2011/61/UE tal-Parlament Ewropew u tal-Kunsill fir-rigward tal-eżenzjonijiet, il-kundizzjonijiet ġenerali tal-operat, id-depożitarji, l-ingranaġġ, it-trasparenza u s-superviżjoni (ĠU L 83, 22.3.2013, p. 1-95).

(41)    Ir-Rakkomandazzjoni tal-Bord Ewropew dwar ir-Riskju Sistemiku tas-7 ta’ Diċembru 2017 dwar il-likwidità u r-riskji tal-lieva finanzjarja fil-fondi ta’ investiment BERS/2017/6, 2018/C 151/01.

(42)    Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(43)    ĠU C 64, 27.2.2020, p.8.

(44)    Id-Direttiva (UE) 2015/849 tal-Parlament Ewropew u tal-Kunsill tal-20 ta’ Mejju 2015 dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, li temenda r-Regolament (UE) Nru 648/2012 tal-Parlament Ewropew u tal-Kunsill, u li tħassar id-Direttiva 2005/60/KE tal-Parlament Ewropew u tal-Kunsill u d-Direttiva tal-Kummissjoni 2006/70/KE (ĠU L 141, 5.6.2015, p. 73).

(45)    Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(46)    ĠU L 123, 12.5.2016, p. 1.

(47)    Ir-Rakkomandazzjoni tal-Bord Ewropew dwar ir-Riskju Sistemiku tas-7 ta’ Diċembru 2017 dwar il-likwidità u r-riskji tal-lieva finanzjarja fil-fondi ta’ investiment BERS/2017/6, 2018/C 151/01.

(48)    Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(49)    Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(50)    Ir-Regolament (UE) 2015/760 tal-Parlament Ewropew u tal-Kunsill tad-29 ta’ April 2015 dwar il-Fondi ta’ Investiment Ewropej fuq Terminu Twil (ĠU L 123, 19.5.2015, p. 98-121).

(51)    Ir-Regolament (UE) Nru 345/2013 tal-Parlament Ewropew u tal-Kunsill tas-17 ta’ April 2013 dwar fondi Ewropej ta’ kapital ta’ riskju (ĠU L 115, 25.4.2013, p. 1-17).

(52)    Ir-Regolament (UE) Nru 346/2013 tal-Parlament Ewropew u tal-Kunsill tas-17 ta’ April 2013 dwar fondi Ewropej ta’ kapital ta’ riskju (ĠU L 115, 25.4.2013, p. 18-38).

(53)    ĠU C 64, 27.2.2020, p. 8.

(54)    ĠU C 64, 27.2.2020, p. 8.

IL-KUMMISSJONI EWROPEA

Brussell, 25.11.2021

COM(2021) 721 final

ANNESSI

tal-

Proposta għal Direttiva tal-Parlament Ewropew u tal-Kunsill

li temenda d-Direttivi 2011/61/UE u 2009/65/KE fir-rigward tal-arranġamenti ta’ delega, il-ġestjoni tar-riskju tal-likwidità, ir-rapportar superviżorju, il-forniment ta’ servizzi depożitarji u ta’ kustodja u l-oriġinazzjoni tas-self minn fondi ta’ investiment alternattivi

{SEC(2021) 570 final} - {SWD(2021) 340 final} - {SWD(2021) 341 final}

ANNESS I

Fl-Anness I, jiżdiedu l-punti 3 u 4 li ġejjin:

“3. Self oriġinarju.

4. Servizzjar ta’ entitajiet bi skop speċjali ta’ titolizzazzjoni.”

ANNESS II

“ANNESS V

STRUMENTI TAL-ĠESTJONI TAL-LIKWIDITÀ DISPONIBBLI GĦALL-AIFMs LI JIMMANIĠĠAW AIFs MIFTUĦA

(1)Sospensjoni ta’ tifdijiet u sottoskrizzjonijiet: is-sospensjoni tat-tifdijiet u s-sottoskrizzjonijiet timplika li l-investituri temporanjament ma jistgħux jifdu jew jixtru l-ishma tal-fond.

(2)Il-limiti ta’ tifdija: limitu ta’ tifdija huwa restrizzjoni temporanja tad-dritt tal-azzjonisti li jifdu l-ishma tagħhom. Din ir-restrizzjoni tista’ tkun sħiħa, fejn l-investituri ma jkunux jistgħu jifdu l-ishma tagħhom, jew parzjali, fejn l-investituri jkunu jistgħu jifdu biss ċertu porzjon tal-ishma tagħhom.

(3)Perjodi ta’ avviż: perjodu ta’ avviż jirreferi għall-perjodu ta’ avviż bil-quddiem li l-investituri jridu jagħtu lill-maniġers ta’ fondi meta jifdu l-ishma tagħhom.

(4)Tariffi ta’ tifdija: tariffa ta’ tifdija hija tariffa imposta fuq l-investituri meta jifdu l-ishma tal-fond tagħhom.

(5)Aġġustar tal-valur tal-likwidazzjoni: l-aġġustar tal-valur tal-likwidazzjoni jista’ jintuża biex jiġi aġġustat il-prezz tal-ishma f’fond ta’ investiment sabiex jirrifletti l-kost tat-tranżazzjonijiet tal-fondi li jirriżultaw minn attività tal-investituri.

(6)Imposta kontra d-dilwizzjoni: imposta kontra d-dilwizzjoni hija imposta applikata għal investituri individwali li jagħmlu tranżazzjonijiet, pagabbli lill-fond, biex l-investituri li jifdal jiġu protetti milli jġorru l-kostijiet assoċjati max-xiri jew il-bejgħ ta’ assi minħabba flussi kbar ta’ dħul jew ħruġ. Imposta kontra d-dilwizzjoni ma tinvolvi l-ebda aġġustament għall-valur tal-ishma tal-fond.

(7)Tifdijiet in natura: it-tifdijiet in natura jippermettu lill-maniġer tal-fond jissodisfa talba ta’ tifdija billi jittrasferixxi titoli miżmuma mill-fond, minflok flus, lill-azzjonisti li jifdu.

(8)Side pockets: side pockets jippermettu li l-investimenti mhux likwidi jiġu sseparati mill-investimenti likwidi li jifdal tal-fond ta’ investiment.”

ANNESS III

Fl-Anness I, l-Iskeda A, it-tabella, il-punt 1.13 huwa sostitwit b’dan li ġej:

ANNESS IV

“ANNESS IIA

STRUMENTI TAL-IMMANIĠĠAR TAL-LIKWIDITÀ DISPONIBBLI GĦALL-UCITS

(1)Sospensjoni ta’ tifdijiet u sottoskrizzjonijiet: is-sospensjoni tat-tifdijiet u s-sottoskrizzjonijiet timplika li l-investituri temporanjament ma jistgħux jifdu jew jixtru l-ishma tal-fond.

(2)Il-limiti ta’ tifdija: limitu ta’ tifdija huwa restrizzjoni temporanja tad-dritt tal-azzjonisti li jifdu l-ishma tagħhom. Din ir-restrizzjoni tista’ tkun sħiħa, fejn l-investituri ma jkunux jistgħu jifdu l-ishma tagħhom, jew parzjali, fejn l-investituri jkunu jistgħu jifdu biss ċertu porzjon tal-ishma tagħhom.

(3)Perjodi ta’ avviż: perjodu ta’ avviż jirreferi għall-perjodu ta’ avviż bil-quddiem li l-investituri jridu jagħtu lill-maniġers ta’ fondi meta jifdu l-ishma tagħhom.

(4)Tariffi ta’ tifdija: tariffa ta’ tifdija hija tariffa imposta fuq l-investituri meta jifdu l-ishma tal-fond tagħhom.

(5)Aġġustar tal-valur tal-likwidazzjoni: l-aġġustar tal-valur tal-likwidazzjoni jista’ jintuża biex jiġi aġġustat il-prezz tal-ishma f’fond ta’ investiment sabiex jirrifletti l-kost tat-tranżazzjonijiet tal-fondi li jirriżultaw minn attività tal-investituri.

(6)Imposta kontra d-dilwizzjoni: imposta kontra d-dilwizzjoni hija imposta applikata għal investituri individwali li jagħmlu tranżazzjonijiet, pagabbli lill-fond, biex l-investituri li jifdal jiġu protetti milli jġorru l-kostijiet assoċjati max-xiri jew il-bejgħ ta’ assi minħabba flussi kbar ta’ dħul jew ħruġ. Imposta kontra d-dilwizzjoni ma tinvolvi l-ebda aġġustament għall-valur tal-ishma tal-fond.

(7)Tifdijiet in natura: it-tifdijiet in natura jippermettu lill-maniġer tal-fond jissodisfa talba ta’ tifdija billi jittrasferixxi titoli miżmuma mill-fond, minflok flus, lill-azzjonisti li jifdu.

(8)Side pockets: side pockets jippermettu li l-investimenti mhux likwidi jiġu sseparati mill-investimenti likwidi li jifdal tal-fond ta’ investiment.”