This document is an excerpt from the EUR-Lex website
Document 52021PC0450
Proposal for a COUNCIL DECISION on the position to be taken on behalf of the European Union in the International Grains Council with respect to amending the definition of ‘grain’ or ‘grains’ under the Grains Trade Convention, 1995
Proposta għal DEĊIŻJONI TAL-KUNSILL dwar il-pożizzjoni li għandha tittieħed, f’isem l-Unjoni Ewropea, fil-Kunsill Internazzjonali taċ-Ċereali b’rabta mal-emenda tad-definizzjoni ta’ “ċereal” jew “ċereali” fil-qafas tal-Konvenzjoni dwar il-Kummerċ taċ-Ċereali tal-1995
Proposta għal DEĊIŻJONI TAL-KUNSILL dwar il-pożizzjoni li għandha tittieħed, f’isem l-Unjoni Ewropea, fil-Kunsill Internazzjonali taċ-Ċereali b’rabta mal-emenda tad-definizzjoni ta’ “ċereal” jew “ċereali” fil-qafas tal-Konvenzjoni dwar il-Kummerċ taċ-Ċereali tal-1995
COM/2021/450 final
IL-KUMMISSJONI EWROPEA
Brussell, 5.8.2021
COM(2021) 450 final
2021/0254(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed, f’isem l-Unjoni Ewropea, fil-Kunsill Internazzjonali taċ-Ċereali b’rabta mal-emenda tad-definizzjoni ta’ “ċereal” jew “ċereali” fil-qafas tal-Konvenzjoni dwar il-Kummerċ taċ-Ċereali tal-1995
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni fil-Kunsill Internazzjonali taċ-Ċereali b’konnessjoni maż-żieda prevista tal-bus u l-ħemes fid-definizzjoni ta' “ċereal” jew “ċereali” fil-qafas tal-Konvenzjoni dwar il-Kummerċ taċ-Ċereali, 1995.
2.Il-kuntest tal-proposta
2.1.Il-Konvenzjoni dwar il-Kummerċ taċ-Ċereali, 1995
Il-Konvenzjoni dwar il-Kummerċ taċ-Ċereali tal-1995 (“il-Konvenzjoni”) għandha l-għan li tkompli l-kooperazzjoni internazzjonali fl-aspetti kollha tal-kummerċ taċ-ċereali, li tippromwovi l-espansjoni tal-kummerċ internazzjonali taċ-ċereali u li tiżgura l-aktar fluss ħieles possibbli ta’ dan il-kummerċ. Barra minn hekk, il-Konvenzjoni għandha l-ħsieb li tikkontribwixxi kemm jista’ jkun għall-istabbiltà tas-swieq internazzjonali taċ-ċereali fl-interess tal-membri kollha, biex issaħħaħ is-sigurtà alimentari dinjija u tipprovdi forum għall-iskambju ta’ informazzjoni u diskussjoni dwar it-tħassib tal-membri rigward il-kummerċ fiċ-ċereali.
Il-Konvenzjoni daħlet fis-seħħ fl-1 ta’ Lulju 1995.
L-Unjoni Ewropea hija parti għall-Konvenzjoni 1 .
2.2.Il-Kunsill Internazzjonali taċ-Ċereali
Il-Kunsill Internazzjonali taċ-Ċereali(“IGC”) huwa organizzazzjoni intergovernattiva li tipprova tilħaq l-għanijiet stipulati fl-Artikolu 1 tal-Konvenzjoni. B’mod partikolari, l-IGC għandu l-għan li:
·isaħħaħ il-kooperazzjoni internazzjonali fl-aspetti kollha tal-kummerċ taċ-ċereali;
·iħeġġeġ l-espansjoni, il-ftuħ u l-ekwità tal-kummerċ internazzjonali fis-settur taċ-ċereali;
·jikkontribwixxi għall-istabbiltà tas-suq internazzjonali taċ-ċereali, filwaqt li jtejjeb is-sigurtà tal-ikel fid-dinja u jikkontribwixxi għall-iżvilupp ta’ pajjiżi li l-ekonomiji tagħhom jiddependu fuq il-bejgħ kummerċjali taċ-ċereali.
Dawn l-għanijiet huma mfittxija permezz tat-titjib tat-trasparenza tas-suq permezz tal-qsim tal-informazzjoni, l-analiżi u l-konsultazzjoni dwar l-iżviluppi tas-suq u tal-politika.
Il-Kunsill Internazzjonali taċ-Ċereali għandu 30 membru, li jinkludu ħafna mill-akbar produtturi taċ-ċereali fid-dinja kif ukoll importaturi. Minbarra l-Unjoni Ewropea u fost oħrajn, il-membri tagħha huma l-Arġentina, l-Awstralja, il-Kanada, l-Eġittu, l-Indja, il-Ġappun, ir-Russja, l-Ukrajna, ir-Renju Unit u l-Istati Uniti. Madankollu, iċ-Ċina u l-Brażil mhumiex membri.
It-30 membru tal-IGC għandhom total ta’ 2,000 vot.
Għal proċeduri baġitarji (ara l-Artikolu 11 tal-Konvenzjoni), jiġifieri għall-iffissar tal-kontribuzzjonijiet finanzjarji annwali tal-membri, fl-2020/21 l-Unjoni għandha 371 vot 2 .
Għat-teħid tad-deċiżjonijiet, jiġifieri meta jkun hemm bżonn jittieħed vot (ara l-Artikolu 12 tal-Konvenzjoni), jitqassmu 1,000 vot għall-11-il membru esportatur (inkluża l-Unjoni b’244 vot) u 1,000 vot għad-19-il membru importatur. Jeħtieġ li jiġi enfasizzat li fil-prinċipju, l-IGC jopera fuq il-bażi ta’ kunsens u hija rari ħafna li l-votazzjoni ssir, fil-verità.
Fil-laqgħat tal-Kunsill Internazzjonali taċ-Ċereali, l-Unjoni Ewropea hija rrappreżentata mill-Kummissjoni Ewropea. L-Istati Membri jistgħu jattendu l-laqgħat tal-IGC, b’mod partikolari s-Sessjonijiet tal-Kunsill.
2.3.L-att previst tal-Kunsill Internazzjonali taċ-Ċereali
Fl-14 ta’ Mejju 2021 il-Kunsill Internazzjonali taċ-Ċereali ippropona li jinkludi l-bus u l-ħemes fid-definizzjoni ta’ “ċereal” jew “ċereali” taħt il-punt (e) tal-Artikolu 2(1) tal-Konvenzjoni (“l-att previst”). Huwa propost li deċiżjoni tal-IGC isir votazzjoni bil-posta (jiġifieri proċedura bil-miktub) b’skadenza fil-31 ta’ Ottubru 2021. F’każ li ma jkun intbagħat oġġezzjoni bil-miktub mil-ebda membru tal-IGC, il-bus u l-ħemes jiġu miżjuda fid-definizzjoni “ċereal” jew “ċereali” taħt il-punt (e) tal-Artikolu 2(1) tal-Konvenzjoni b’effett mill-1 ta’ Novembru 2021.
Skont il-proposta, “Għads, piżelli nixfa, ċiċri, fażola niexfa, bus u ħemes oħrajn u prodotti tagħhom għandhom jiġu inklużi fid-definizzjoni ta’ “ċereal” jew “ċereali” taħt l-Artikolu 2(1)(e) tal-Konvenzjoni dwar il-Kummerċ taċ-Ċereali, 1995”.
L-għan ta’ l-att previst hu li jippermetti lill-Kunsill Internazzjonali taċ-Ċereali li jestendi x-xogħol regolari kif irreferut fl-Artikolu 3 tal-Konvenzjoni għall-bus u l-ħemes. B’mod partikolari, ir-rapporti regolari, l-iskambju tal-informazzjoni u l-istudji speċjali msemmija fl-Artikolu 3 tal-Konvenzjoni jenħtieg li jinkludu l-bus u l-ħemes u l-prodotti tagħhom mill-1 ta’ Novembru 2021. Il-Gvernijiet Membri jenħtieġ li jikkoperaw mas-Segretarjat tal-IGC billi jipprovdu informazzjoni relevanti fuq dawn il-bus u l-ħemes u l-prodotti tagħhom.
Għalkemm il-Konvenzjoni ma tistabbilixxix regoli speċifiċi fuq il-proċedura tal-votazzjoni bil-posta (jew proċedura bil-miktub), l-Artikolu 14 tal-Konvenzjoni jikkonċerna “d-deċiżjonijiet tal-Kunsill” ma jitlobx li dawn id-deċiżjonijiet jittieħdu f’Sessjoni tal-Kunsill.
3.Il-Pożizzjoni li għandha tittieħed f’isem l-Unjoni
Il-Konvenzjoni dwar il-Kummerċ taċ-Ċereali tal-1995 ġiet konkluża mill-Unjoni Ewropea permezz tad-Deċiżjoni tal-Kunsill 96/88/KE 3 sat-30 ta’ Ġunju 1998 u, minn dak iż-żmien ’l hawn, ġiet estiża b’mod regolari. F’kull okkażjoni, il-Konvenzjoni tiġi estiża għal perjodu massimu ta’ sentejn f’konformità mal-Artikolu 33 tal-Konvenzjoni. Ġiet estiża l-aħħar fis-7 ta’ Ġunju tal-2021 permezz ta’ deċiżjoni tal-Kunsill Internazzjonali taċ-Ċereali, u se tibqa’ fis-seħħ sat-30 ta’ Ġunju 2023.
Meta l-Konvenzjoni ġiet konkluża, id-definizzjoni ta’ “ċereal” jew “ċereali” taħt il-punt (e) tal-Artikolu 2(1) kienet tinkludi l-prodotti li ġejjin: “xgħir, qamħirrum, millieġ, ħafur, segala, sorgu, tritikal u qamħ, u l-prodotti tagħhom”.
Imbagħad fl-2008 il-membri tal-Kunsill Internazzjonali taċ-Ċereali iddeċidew li jinkludu r-ross u l-prodotti tiegħu fid-definizzjoni ta’ “ċereal” jew “ċereali” b’effett mill-1 ta’ Lulju 2009. Barra minn hekk, id-definizzjoni ta’ “ċereal” jew “ċereali” kompliet ġiet estiża b’effett mill-1 ta’ Lulju 2013 biex tinkludi wkoll bosta żrieragħ li minnhom jintgħasar iż-żejt, jiġifieri l-kopra, iż-żerriegħa tal-qoton, il-lewż tal-palm, il-karawett, il-kolza/lift, il-fażola tas-sojja u ż-żerriegħa tal-ġirasol u l-prodotti tagħhom.
L-Unjoni Ewropea minn dejjem kienet membru attiv tal-IGC u ssapportjat l-estensjoni tax-xogħol tal-IGC biex tanalizza l-iżviluppi fis-suq u fil-kummerċ tal-bus u l-ħemes ukoll. S’issa dan sar abbażi ad hoc suġġett għall-approvazzjoni tal-programm ta’ ħidma annwali tal-IGC.
L-għan ta’ din il-proposta hu li tinkiseb l-awtorizzazzjoni tal-Kunsill sabiex il-Kummissjoni tivvota, f’isem l-Unjoni Ewropea, favur iż-żieda tal-bus u l-ħemes fid-definizzjoni ta’ “ċereal” jew “ċereali” taħt il-punt (e) tal-Artikolu 2(1) tal-Konvenzjoni b’effett mill-1 ta’ Novembru 2021. Id-deċiżjoni formali tal-Kunsill Internazzjonali taċ-Ċereali dwar il-proposta se ssir permezz ta’ proċedura bil-miktub (votazzjoni bil-posta) bi skadenza stabbilita għall-31 ta’ Ottubru 2021.
4.Bażi ġuridika
4.1.Bażi ġuridika proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “il-pożizzjonijiet li għandhom jiġu adottati f’isem l-Unjoni f’sede stabbilita bi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti ġuridiċi” jinkludi l-atti li jkollhom effetti legali skont ir-regoli tad-dritt internazzjonali li jirregola s-sede kkonċernata. Dan jinkludi wkoll l-istrumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatura tal-Unjoni” 4 .
4.1.2.Applikazzjoni għall-każ preżenti
L-att previst tal-Kunsill Internazzjonali taċ-Ċereali għandu l-effett li jemenda l-Konvenzjoni billi jestendi d-definizzjoni ta’ “ċereal” jew “ċereali” taħt il-punt (e) tal-Artikolu 2(1) tal-Konvenzjoni li hija ftehim internazzjonali li jorbot lill-Unjoni. L-att previst għalhekk għandu effetti legali.
L-att previst la jissupplimenta u lanqas jemenda l-qafas istituzzjonali tal-Ftehim.
Għalhekk, il-bażi ġuridika proċedurali tad-Deċiżjoni proposta hija l-Artikolu 218(9) tat-TFUE.
4.2.Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) tat-TFUE tiddependi primarjament mill-għan u mill-kontenut tal-att previst li dwarhom tiġi adottata pożizzjoni f’isem l-Unjoni Ewropea. Jekk l-att previst ikollu żewġ għanijiet jew ikollu żewġ komponenti, u jekk wieħed minn dawk l-għanijiet jew il-komponenti jkun jista' jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tissejjes fuq bażi ġuridika sostantiva unika, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għall-każ preżenti
L-objettiv u l-kontenut ewlenin tal-att previst jirrigwardaw il-kummerċ fil-prodotti agrikoli.
Għalhekk, il-bażi ġuridika sostantiva tad-deċiżjoni proposta hija l-Artikolu 207(3), l-ewwel subparagrafu tat-TFUE.
4.3.Konklużjoni
Il-bażi ġuridika tad-Deċiżjoni proposta jenħtieġ li tkun l-Artikolu 207(3), l-ewwel subparagrafu tat-TFUE, flimkien mal-Artikolu 218(9) tat-TFUE.
5.Il-pubblikazzjoni tal-att previst
Peress li l-att tal-Kunsill Internazzjonali taċ-Ċereali se jemenda l-Konvenzjoni billi jżid id-definizzjoni ta’ “ċereal” jew “ċereali” taħt il-punt (e) tal-Artikolu 2(1), tal-Konvenzjoni, huwa xieraq li wara li tiġi adottata, id-Deċiżjoni tal-Kunsill tiġi ppubblikata f’Il-Ġurnal Uffiċjali tal-Unjoni Ewropea.
2021/0254 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed, f’isem l-Unjoni Ewropea, fil-Kunsill Internazzjonali taċ-Ċereali b’rabta mal-emenda tad-definizzjoni ta’ “ċereal” jew “ċereali” fil-qafas tal-Konvenzjoni dwar il-Kummerċ taċ-Ċereali tal-1995
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(3) l-ewwel subparagrafu flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Konvenzjoni dwar il-Kummerċ taċ-Ċereali tal-1995 (“il-Konvenzjoni”) ġiet konkluża mill-Unjoni bid-Deċiżjoni tal-Kunsill 96/88/KE 5 u daħlet fis-seħħ fl-1 ta’ Lulju 1995. Il-Konvenzjoni ġiet konkluża għal perjodu ta’ tliet snin.
(2)Il-punt (e) tal-Artikolu 2(1) tal-Konvenzjoni jiddefinixxi t-tifsira ta’ “ċereal” jew “ċereali” għall-finijiet tal-Konvenzjoni. Il-membri tal-Kunsill Internazzjonali taċ-Ċereali jistgħu jiddeċiedu li jemendaw id-definizzjoni skont l-Artikolu 32 tal-Konvenzjoni.
(3)Fl-14 ta’ Mejju 2021, is-Segretarjat tal-Kunsill Internazzjonali taċ-Ċereali ippropona ż-żieda tal-bus u l-ħemes fid-definizzjoni ta’ “ċereal” jew “ċereali” taħt il-punt (e) tal-Artikolu 2(1) tal-Konvenzjoni b’effett mill-1 ta’ Novembru 2021. Skont il-proposta, “Għads, piżelli niexfa, ċiċri, fażola niexfa, bus u ħemes oħrajn u prodotti tagħhom għandhom jiġu inklużi fid-definizzjoni ta’ “ċereal” jew “ċereali” taħt l-Artikolu 2(1)(e) tal-Konvenzjoni dwar il-Kummerċ taċ-Ċereali, 1995” 6 .
(4)Huwa xieraq li tiġi stabbilita l-pożizzjoni li għandha tittieħed f’isem l-Unjoni fil-Kunsill Internazzjonali taċ-Ċereali b’konnessjoni mal-emenda tad-definizzjoni “ċereal” jew “ċereali” taħt il-punt (e) tal-Artikolu 2(1) tal-Konvenzjoni, minħabba li jekk tiġi estiża l-kopertura tal-prodott tal Kunsill Internazzjonali taċ-Ċereali biż-żieda tal bus u l-ħemes fid-definizzjoni ta’ “ċereal” jew “ċereali”, dan ikun fl-interess tal-Unjoni,
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fil-Kunsill Internazzjonali taċ-Ċereali għandha tkun li tivvota favur l-emenda tal-punt (e) tal-Artikolu 2(1) tal-Konvenzjoni dwar il-Kummerċ taċ-Ċereali billi jiżdied il bus u l-ħemes fid-definizzjoni ta’ “ċereal” jew “ċereali” f’konformità mal-proposta ippreżentata mis-Segretarjat tal-Kunsill Internazzjonali taċ-Ċereali tal-14 ta’ Mejju 2021.
Artikolu 2
Din id-deċiżjoni hija indirizzata lill-Kummissjoni.
Magħmul fi Brussell,
Lill-Kunsill
Il-President