This document is an excerpt from the EUR-Lex website
Document 52021BP1678
Resolution (EU) 2021/1678 of the European Parliament of 29 April 2021 with observations forming an integral part of the decision on discharge in respect of the implementation of the budget for the Shift2Rail Joint Undertaking for the financial year 2019
Riżoluzzjoni (UE) 2021/1678 tal-Parlament Ewropew tad-29 ta’ April 2021 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Impriża Konġunta Shift2Rail għas-sena finanzjarja 2019
Riżoluzzjoni (UE) 2021/1678 tal-Parlament Ewropew tad-29 ta’ April 2021 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Impriża Konġunta Shift2Rail għas-sena finanzjarja 2019
ĠU L 340, 24.9.2021, p. 503–506
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
24.9.2021 |
MT |
Il-Ġurnal Uffiċjali tal-Unjoni Ewropea |
L 340/503 |
RIŻOLUZZJONI (UE) 2021/1678 TAL-PARLAMENT EWROPEW
tad-29 ta’ April 2021
li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Impriża Konġunta Shift2Rail għas-sena finanzjarja 2019
IL-PARLAMENT EWROPEW,
— |
wara li kkunsidra d-deċiżjoni tiegħu dwar il-kwittanza għall-implimentazzjoni tal-baġit tal-Impriża Konġunta Shift2Rail għas-sena finanzjarja 2019, |
— |
wara li kkunsidra l-Artikolu 100 u l-Anness V tar-Regoli ta' Proċedura tiegħu, |
— |
wara li kkunsidra l-opinjoni tal-Kumitat għat-Trasport u t-Turiżmu, |
— |
wara li kkunsidra r-rapport tal-Kumitat għall-Kontroll tal-Baġit (A9-0111/2021), |
A. |
billi l-Impriża Konġunta Shift2Rail (l-"Impriża Konġunta") ġiet stabbilita f'Ġunju 2014 għal perjodu ta' 10 snin mir-Regolament (UE) Nru 642/2014; |
B. |
billi l-membri fundaturi huma l-Unjoni Ewropea, irrappreżentata mill-Kummissjoni, u s-sħab fl-industrija ferrovjarja (partijiet ikkonċernati ewlenin, inklużi l-manifatturi ta' tagħmir ferrovjarju, il-kumpaniji ferrovjarji, il-maniġers tal-infrastruttura u ċ-ċentri tar-riċerka) bil-possibbiltà li entitajiet oħra jipparteċipaw fl-Impriża Konġunta bħala membri assoċjati; billi l-kontribuzzjonijiet tal-membri minbarra l-Unjoni m'għandhomx ikunu limitati biss biex ikopru l-ispejjeż amministrattivi u l-kofinanzjament meħtieġ biex jitwettqu azzjonijiet ta' riċerka u innovazzjoni, iżda għandhom ikunu relatati wkoll ma' attivitajiet addizzjonali; |
C. |
billi l-objettivi ewlenin tal-Impriża Konġunta huma li tikkontribwixxi għall-kisba taż-Żona Ferrovjarja Unika Ewropea, u li ttejjeb l-attraenza, il-kompetittività, is-sostenibbiltà, u l-integrazzjoni tas-sistema ferrovjarja Ewropea, billi tiffaċilita, fost affarijiet oħra, bidla modali mit-trasport bit-triq u bl-ajru għat-trasport ferrovjarju; |
D. |
billi l-Impriża Konġunta bdiet taħdem b'mod awtonomu f'Mejju 2016; |
Kwistjonijiet ġenerali
1. |
Jinnota li r-rapport tal-Qorti tal-Awdituri (il-"Qorti") dwar il-kontijiet annwali tal-Impriża Konġunta għas-sena finanzjarja 2019 (ir-"rapport tal-Qorti"), jikkonstata li l-kontijiet annwali huma ppreżentati b'mod ġust, fl-aspetti materjali kollha, fir-rigward tal-pożizzjoni finanzjarja tal-Impriża Konġunta fil-31 ta' Diċembru 2019 u r-riżultati tal-operazzjonijiet tagħha, il-flussi tal-flus tagħha, u l-bidliet fl-assi netti għas-sena li kienet għadha kemm intemmet, b'konformità mar-Regolament Finanzjarju tagħha u mar-regoli kontabilistiċi adottati mill-uffiċjal tal-kontabbiltà tal-Kummissjoni; jinnota li, skont ir-rapport tal-Qorti, it-tranżazzjonijiet sottostanti tal-kontijiet huma, fl-aspetti materjali kollha, legali u regolari; |
2. |
Jinnota li, għall-perjodu stabbilit fir-Regolament, il-kontribuzzjoni massima tal-Unjoni għall-attivitajiet tal-Impriża Konġunta hija ta' EUR 450 000 000 (inklużi l-kontribuzzjonijiet tal-EFTA), li għandhom jitħallsu minn Orizzont 2020; jinnota li l-membri kollha tal-Impriża Konġunta minbarra l-Unjoni (grupp industrijali) għandhom jikkontribwixxu riżorsi ta' mill-inqas EUR 470 000 000, li jikkonsistu f'mill-inqas EUR 350 000 000 f'kontribuzzjonijiet in natura u fi flus għall-ispejjeż operattivi u amministrattivi tal-Impriża Konġunta, u mill-inqas EUR 120 000 000 f'kontribuzzjonijiet in natura għall-attivitajiet addizzjonali tal-Impriża Konġunta; |
3. |
Jinnota li jeżistu proċeduri differenti fost l-Impriżi Konġunti biex jirċievu kontribuzzjoni finanzjarja mill-membri privati tal-Impriża Konġunta; jappella għall-armonizzazzjoni tal-kalkolu tal-kontribuzzjonijiet in natura fost l-Impriżi Konġunti; il-proċedura komuni għandha tipprevedi metodi ta' evalwazzjoni trasparenti u effikaċi li jiżguraw il-valur reali tal-kontribuzzjoni; jistieden lill-Qorti tipprovdi l-iskrutinju tal-awditi mwettqa mill-awdituri indipendenti esterni; jappella wkoll għal qafas ġuridiku xieraq li jiżgura li l-ammont meħtieġ tal-kontribuzzjoni finanzjarja jinkiseb sa tmiem il-programm; jinnota li l-qafas ġuridiku jista' jinkludi rekwiżiti biex il-kontribuzzjoni privata titħallas qabel jew fl-istess mument bħall-kontribuzzjoni korrispondenti tal-Unjoni; |
4. |
Jinnota li, b'kollox, aktar minn 400 entità pubblika u privata, li jirrappreżentaw is-settur ferrovjarju, jipparteċipaw fl-attivitajiet ta' riċerka u innovazzjoni Shift2Rail; |
5. |
Jenfasizza l-kontribut tal-Impriża Konġunta biex jintlaħqu l-objettivi tal-Patt Ekoloġiku Ewropew; jilqa', f'dan ir-rigward, l-isforzi ta' riċerka u innovazzjoni ta' Shift2Rail biex tinkiseb sistema ferrovjarja aktar sostenibbli, diġitali, kompetittiva, affidabbli u attraenti fl-Ewropa; |
6. |
Jappoġġja l-proposta biex tiġi stabbilita Sħubija Ferrovjarja Ewropea għar-riċerka u l-innovazzjoni li tibni fuq is-suċċess tal-Impriża Konġunta; jenfasizza l-ħtieġa li jiġu esplorati opportunitajiet għall-finanzjament ta' programmi u proġetti fl-ambitu ta' programmi tal-Unjoni bħall-Faċilità Nikkollegaw l-Ewropa, il-Pjan Ewropa Diġitali, il-Fond Ewropew għall-Iżvilupp Reġjonali u l-Fond ta' Koeżjoni, kif ukoll li jiġu żviluppati sinerġiji bejn is-Sħubija l-ġdida u l-mekkaniżmi ta' finanzjament eżistenti; |
7. |
Jemmen li s-suċċessur ta' Shift2Rail għandu jinkludi fil-programm ta' riċerka ħidma konġunta ma' modi oħra ta' trasport sabiex titwitta t-triq lejn trasport mingħajr xkiel u integrat; jirrimarka li l-awtomatizzazzjoni u d-diġitalizzazzjoni tas-settur ferrovjarju għandhom ikunu waħda mill-prijoritajiet tas-suċċessur ta' Shift2Rail; |
8. |
Jistieden lill-Kummissjoni tassigura li l-programm futur ta' attivitajiet tal-Impriża Konġunta jirrispetta r-rekwiżiti u l-objettivi previsti mid-dritt tal-Unjoni f'dak li għandu x'jaqsam mal-mitigazzjoni tat-tibdil fil-klima u li jsegwi l-istrateġiji fil-qasam imfassla kemm mill-Kummissjoni kif ukoll mill-industrija; |
Ġestjoni baġitarja u finanzjarja
9. |
Jinnota li l-baġit finali disponibbli fl-2019, inklużi l-approprjazzjonijiet mhux użati li ddaħħlu mill-ġdid mis-snin preċedenti, id-dħul assenjat u r-riallokazzjonijiet għas-sena ta' wara, kien jinkludi approprjazzjonijiet ta' impenn ta' EUR 83 071 000 u approprjazzjonijiet ta' pagament ta' EUR 81 563 000; jinnota li fl-2019, ir-rati ta' utilizzazzjoni għall-approprjazzjonijiet ta' impenn u ta' pagament disponibbli kienu 97 % u 86 % rispettivament; |
10. |
Jinnota li l-baġit attiv ta' Orizzont 2020 tal-Impriża Konġunta disponibbli fl-2019 kien ta' EUR 80 197 000 f'approprjazzjonijiet ta' impenn u ta' EUR 78 569 000 f'approprjazzjonijiet ta' pagament; jinnota, barra minn hekk, mir-rapport tal-Qorti, li fi tmiem l-2019, l-Impriża Konġunta implimentat 100 % tal-approprjazzjonijiet ta' impenn u 88 % tal-approprjazzjonijiet ta' pagament disponibbli għall-proġetti ta' Orizzont 2020, u li l-pagamenti ta' prefinanzjament għall-proġetti ta' Orizzont 2020 magħżula fl-ambitu tas-sejħa għall-proposti tal-2019 ammontaw għal 65 % tal-valur tal-pagamenti operattivi li saru matul is-sena; |
11. |
Jinnota li għal Orizzont 2020 fi tmiem l-2019, il-membri tal-industrija għamlu total ta' EUR 76 827 000 f'kontribuzzjonijiet validati, li jinkludu total ta' EUR 68 645 000 f'kontribuzzjonijiet in natura validati, u addizzjonalment kontribuzzjoni in natura totali għal attivitajiet addizzjonali ta' EUR 182 506 000, meta mqabbla mal-kontribuzzjoni fi flus totali tal-Unjoni ta' EUR 221 743 000; |
12. |
Jinnota li, fl-2019, l-Impriża Konġunta żammet u ffirmat 17-il ftehim ta' għotja (minn 48 proposta li rċeviet) li rriżultaw mis-sejħa għall-proposti tal-2019, u li suġġett wieħed ma kienx kopert; barra minn hekk, jinnota li, b'kollox, l-għotjiet mogħtija u ffirmati se jiffinanzjaw attivitajiet ta' riċerka u innovazzjoni sa EUR 74 760 000 minn valur totali ta' EUR 148 551 000, u li f'dan ir-rigward, il-membri l-oħra (il-membri fundaturi minbarra l-Unjoni u l-membri assoċjati) qablu li jillimitaw it-talbiet tagħhom għall-finanzjament għal 44,44 % tal-ispiża totali tal-proġett (jiġifieri nett ta' 41,44 % għal membru ieħor wara li jitqiesu l-obbligi tiegħu); jinnota li fis-sejħa tal-2019, ħadu sehem 90 intrapriża żgħira u ta' daqs medju (SMEs) (20 %) u li 40 SME nżammu għall-finanzjament (44,4 %), u barra minn hekk li l-SMEs jirrappreżentaw 30 % tal-entitajiet magħżula fil-proġetti ta' sejħiet miftuħa; jinnota li żewġ għotjiet relatati mas-sejħa tal-2018 ġew iffirmati fl-ewwel trimestru tal-2019; |
13. |
Jinnota li fi tmiem l-2019, kienu għaddejjin 72 proġett (32 sejħa għall-membri u 40 sejħa miftuħa): tqassmu 56 proġett fuq is-6 programmi ta' innovazzjoni, 10 proġetti fuq l-attivitajiet trasversali, u 6 proġetti fil-Programm ta' Innovazzjoni X; |
Prestazzjoni
14. |
Jinnota li l-Impriża Konġunta tuża l-indikaturi ewlenin tal-prestazzjoni speċifiċi għal Orizzont 2020 għall-monitoraġġ tal-prestazzjoni u l-kwistjonijiet trażversali, kif ukoll indikaturi ewlenin tal-prestazzjoni speċifiċi għall-Impriża Konġunta, bħal dawk għall-effiċjenza tas-sistema tat-trasport ferrovjarju; jinnota li, matul l-2019, l-Impriża Konġunta kompliet il-ħidma fuq il-verżjoni li jmiss tal-mudell tal-indikaturi ewlenin tal-prestazzjoni (ippreżentata fl-2018 bħala Verżjoni 1), u li l-Verżjoni 2.0 tal-għodda bbażata fuq il-web tal-mudell tal-indikaturi ewlenin tal-prestazzjoni ġiet ippreżentata waqt il-laqgħa tal-bord tat-tmexxija f'Novembru 2019; |
15. |
Jitlob li l-Impriża Konġunta teżamina mill-ġdid l-istrateġija ta' komunikazzjoni tagħha biex tiżgura li l-partijiet ikkonċernati rilevanti jkunu konxji mill-missjoni, l-attivitajiet u l-kisbiet tagħha. |
16. |
Jistieden lill-Kummissjoni u lill-Qorti jiżviluppaw metodu approfondit li jsegwi l-prestazzjoni bl-għan li jiġi evalwat il-valur miżjud tal-Impriża Konġunta u li jinkludi l-impatt soċjali u fuq l-impjiegi kif ukoll l-impatt fuq is-suq; ir-riżultati tal-evalwazzjoni għandhom jintużaw għall-futur jew għat-tqassim mill-ġdid tal-finanzjament tal-Unjoni; |
17. |
Jinnota li, sa tmiem l-2019, twettaq aktar minn 50 % tal-Programm tal-Impriża Konġunta dwar l-attivitajiet ta' riċerka u innovazzjoni bl-għan li jinkiseb il-Livell 6/7 ta' Tħejjija Teknoloġika fir-rigward tad-dimostrazzjonijiet operattivi (ippjanati li jiġu konklużi fl-2022), u li b'mod ġenerali, il-proġetti kollha wettqu l-attivitajiet ippjanati, bi 8 dimostraturi teknoloġiċi/oqsma ta' ħidma biss li wettqu inqas minn 80 % tal-attivitajiet ippjanati tagħhom fis-sena (li minnhom dimostratur teknoloġiku wieħed kien taħt il-50 %), u barra minn hekk li l-Impriża Konġunta bdiet l-attivitajiet ta' riċerka u innovazzjoni tas-sejħa tal-2019; |
18. |
Jinnota li l-attivitajiet attwali tal-Impriża Konġunta mixjin 'il quddiem lejn id-dimostrazzjonijiet tagħhom fl-2022, li huma l-elementi kostitwenti ta' trasformazzjoni ferrovjarja aktar sistemika li hija mmexxija strateġikament mill-Aġenda ta' Diġitalizzazzjoni u l-Patt Ekoloġiku tal-Kummissjoni, u li f'Settembru 2019, ġiet organizzata l-ewwel sessjoni ta' skambju ta' ideat dwar is-sħubija li jmiss u l-ambizzjoni tas-settur ferrovjarju bil-Kummissjoni li tipparteċipa bħala osservatur; barra minn hekk, jinnota li l-Impriża Konġunta kkontribwiet għall-valutazzjoni tal-impatt ta' Shift2Rail ikkoordinata mid-Direttorat Ġenerali għar-Riċerka u l-Innovazzjoni u għall-"Analiżi ta' appoġġ għad-definizzjoni tas-sħubija futura tar-riċerka u l-innovazzjoni ferrovjarja fil-qafas finanzjarju pluriennali li jmiss" ikkoordinata mid-Direttorat Ġenerali għall-Mobilità u t-Trasport, u appoġġjat l-iżvilupp ta' dokument ta' livell għoli dwar is-suċċessur ta' Shift2Rail; jinnota li f'Ottubru 2019, l-Impriża Konġunta ppreżentat il-Katalgu tas-Soluzzjonijiet, li jenfasizza l-benefiċċji tas-soluzzjonijiet Shift2Rail għall-utenti finali, l-operaturi, il-maniġers u/jew il-fornituri tal-infrastruttura, kif ukoll jispeċifika d-dati ta' konsenja; |
19. |
Jinnota li, matul l-2019, l-Impriża Konġunta għamlet progress biex tilħaq il-miri tagħha, twettaq l-implimentazzjoni tal-Programm Shift2Rail u tiżgura ġestjoni finanzjarja tajba li tkun effikaċi u effiċjenti; jinnota li huwa stmat li l-ispiża totali tal-proġett tal-attivitajiet imwettqa fl-2019 hija ta' EUR 117,5-il miljun (li minnhom EUR 98,9 miljun ġew ipprovduti minn membri oħra); |
20. |
Jinnota li, skont ir-rapport tal-Qorti, fi tmiem l-2019, ir-rata ta' implimentazzjoni tal-programm Orizzont 2020 kienet ta' 78 % fir-rigward tal-proċeduri tas-sejħiet għall-attivitajiet assenjati lill-Impriża Konġunta; |
21. |
Iqis li jeħtieġ li l-kwistjoni tad-Drittijiet tal-Proprjetà Intellettwali tiġi indirizzata fil-kuntratti kollha li jistgħu jipproduċu eżitu jew riżultat intiż tal-prestazzjoni; l-għan tagħha huwa li tissalvagwardja d-drittijiet tal-kreaturi individwali, iżda tipprovdi wkoll dettalji dwar kif id-drittijiet se jintużaw fil-futur; peress li l-attività hija ffinanzjata wkoll bi flejjes pubbliċi, ir-riżultati għandhom ikunu trasparenti, aċċessibbli għall-pubbliku u suġġetti għal rekwiżiti speċjali, pereżempju l-interoperabbiltà, jekk ikun meħtieġ; jitlob lill-Kummissjoni għal qafas ġuridiku fir-rigward tad-drittijiet tal-proprjetà intellettwali u tal-implimentazzjoni tagħhom fis-suq, inklużi rekwiżiti speċjali u tqassim tal-profitti; |
Persunal u akkwist
22. |
Jinnota li fil-31 ta' Diċembru 2019, imtlew 24 pożizzjoni tal-persunal, li kienu jinkludu 3 esperti nazzjonali sekondati, 5 aġenti temporanji, u 16-il aġent kuntrattwali skont it-tabella tal-persunal, u, barra minn hekk, sabiex tiġi żgurata l-kontinwità tal-operazzjonijiet, l-Impriża Konġunta wettqet proċess ta' reklutaġġ eċċezzjonali għal aġent kuntrattwali għal sena biex tissostitwixxi aġent temporanju assenti fit-tul, kif previst fir-Regolament tal-Persunal; jinnota d-dawran għoli tal-persunal tal-Impriża Konġunta u li dan huwa dovut għall-fatt li, għall-kuntrarju ta' kważi l-Istituzzjonijiet, l-Aġenziji u l-Impriżi Konġunti l-oħra kollha tal-Unjoni, l-Impriża Konġunta għandha Tabella tal-Persunal li tipprevedi li 25 % tal-pożizzjonijiet ikunu aġenti temporanji u 75 % tal-pożizzjonijiet ikunu aġenti kuntrattwali; |
23. |
Jinnota li, skont ir-rapport ta' attività annwali tal-2019 tal-Impriża Konġunta, l-indikaturi ewlenin tal-prestazzjoni li jirrigwardaw il-bilanċ bejn is-sessi għal dik is-sena juru perċentwal baxx ħafna ta' nisa - 16 % biss - fuq il-bord, filwaqt li kienu jirrappreżentaw 33 % tar-rappreżentanti tal-Impriża Konġunta u 33 % tal-Kumitat Xjentifiku; |
24. |
Jinnota li fl-2019 l-Impriża Konġunta ħarġet sejħiet għall-offerti għall-operaturi ferrovjarji u s-servizzi ta' appoġġ tal-Impriża Konġunta, b'konformità mal-prinċipji tar-Regolament Finanzjarju u l-gwida mogħtija mill-Kummissjoni, u li fi tmiem l-2019, żewġ offerti kienu għadhom iridu jiġu finalizzati; |
Awditu intern
25. |
Jinnota li fl-2019 is-servizz tal-awditjar intern wettaq awditu dwar il-proċess ta' għotja mill-identifikazzjoni tas-suġġetti tas-sejħiet sal-iffirmar tal-ftehim ta' għotja, u li, wara r-Rapport tal-Awditjar Finali f'Ottubru 2019, is-servizz tal-awditjar intern irrikonoxxa l-isforzi kontinwi li saru mill-Impriża Konġunta biex tissorvelja b'mod strett it-tul tal-fażi ta' tħejjija tal-għotja biex jiġi żgurat li l-mira ta' "żmien għall-għotja" tal-Orizzont 2020 tiġi rrispettata; jinnota li l-Impriża Konġunta bdiet timplimenta attivitajiet ta' rimedju kif definiti fil-Pjan ta' Azzjoni għall-erba' rakkomandazzjonijiet importanti lill-maniġment; |
26. |
Jinnota li sa tmiem l-2019, l-Impriża Konġunta rrapportat ir-rakkomandazzjonijiet kollha, li rriżultaw mir-rieżami limitat tal-implimentazzjoni tal-istandards ta' kontroll intern tal-2018, bħala implimentati; |
Kontrolli interni
27. |
Jinnota li, skont ir-rapport tal-Qorti, l-Impriża Konġunta waqqfet proċeduri ta' kontroll ex ante affidabbli bbażati fuq eżamijiet dokumentarji finanzjarji u operattivi u li hija obbligata timplimenta l-qafas ta' kontroll intern il-ġdid tal-Kummissjoni bbażat fuq 17-il prinċipju ta' kontroll intern; jinnota, barra minn hekk, li, skont ir-rapport tal-Qorti, fi tmiem l-2019, l-Impriża Konġunta diġà lestiet analiżi tal-lakuni bbażata fuq is-sistema ta' kontroll intern eżistenti u żviluppat indikaturi għall-valutazzjoni tal-effettività tal-prinċipji l-ġodda tal-kontroll intern u l-karatteristiċi relatati; |
28. |
Jinnota li f'April 2019, l-Impriża Konġunta vvalutat l-attivitajiet tagħha ta' riċerka u innovazzjoni permezz tat-tielet eżerċizzju ta' kontroll li kkunsidra r-riżultati tanġibbli u r-rapporti ppreżentati fil-kuntest tar-Rieżami Annwali tal-Proġetti tal-2015-2016 u tal-2017 ikkoordinati mill-membri l-oħra, filwaqt li jiżgura wkoll li r-rakkomandazzjonijiet li saru matul il-valutazzjoni preċedenti ta' kontroll ġew applikati kif suppost; jinnota, barra minn hekk, li l-kwalità ta' xi riżultati tanġibbli ppreżentati ma kinitx ta' standard xieraq, li l-Impriża Konġunta talbet diversi sottomissjonijiet mill-ġdid ta' riżultati tanġibbli u ssospendiet rapporti tekniċi u finanzjarji, u li dan il-proċess għadu partikolarment eżiġenti peress li ma jista' jsir l-ebda ppjanar minn qabel; jinnota li fl-2019, l-Impriża Konġunta mexxiet, f'xi proġetti, proċess ġdid ta' rieżami kontinwu għar-riżultati tanġibbli flimkien ma' kontroll fil-mument tar-rieżami annwali, li kien meqjus bħala suċċess; jistieden lill-Impriża Konġunta tirrapporta dwar kwalunkwe żvilupp f'dak ir-rigward; |
29. |
Jinnota li l-Impriża Konġunta kompliet timplimenta l-Istrateġija Shift2Rail Kontra l-Frodi 2017-2020 li tikkomplementa l-istrateġija Orizzont 2020; jinnota, barra minn hekk, li ħames indikaturi jintużaw biex isir rappurtar dwar ir-riżultati tal-attivitajiet ta' prevenzjoni u identifikazzjoni tal-frodi, u li l-Pjan ta' azzjoni għall-implimentazzjoni, li jkopri l-istadji differenti taċ-ċiklu ta' kontra l-frodi (prevenzjoni, identifikazzjoni, investigazzjoni u miżuri korrettivi) ġie rivedut fl-2019; |
30. |
Jinnota li, skont ir-rapport tal-Qorti, is-Servizz tal-Awditjar Komuni tal-Kummissjoni (CAS) huwa responsabbli għall-awditu ex post tal-pagamenti ta' Orizzont 2020 magħmula mill-Impriża Konġunta u li abbażi tar-riżultati tal-awditu ex post disponibbli fi tmiem l-2019, l-Impriża Konġunta rrapportat rata ta' żball rappreżentattiva ta' 1,54 % u rata ta' żball residwu ta' 0,91 % għall-proġetti ta' Orizzont 2020 (ikklirjar u pagamenti finali); jinnota mill-proposta tal-Kummissjoni għal regolament dwar Orizzont 2020 li riskju ta' żball, fuq bażi annwali, f'firxa ta' bejn 2 % u 5 % huwa objettiv realistiku, filwaqt li jitqiesu l-ispiża tal-kontrolli, il-miżuri ta' simplifikazzjoni proposti biex titnaqqas il-kumplessità tar-regoli u r-riskju inerenti relatat assoċjat mar-rimborż tal-ispejjeż tal-proġett ta' riċerka, u li l-għan aħħari għal-livell ta' żball residwu fl-għeluq tal-programmi wara li jitqies l-impatt finanzjarju tal-awditi, il-korrezzjoni u l-miżuri ta' rkupru kollha, huwa l-kisba ta' livell li jkun viċin kemm jista' jkun it-2 %; |
31. |
Jinnota li l-Qorti, bħala parti mill-kontrolli tal-pagamenti operattivi, awditjat b'mod aleatorju l-pagamenti li saru fl-2019 fl-ambitu ta' Orizzont 2020, fil-livell tal-benefiċjarji finali biex jikkorroboraw ir-rati ta' żball tal-awditjar, u li l-awditi dettaljati żvelaw żbalji kwantifikabbli żgħar relatati mal-ispejjeż iddikjarati tal-persunal, bis-sorsi ewlenin tal-iżbalji jkunu s-sigħat tax-xogħol iddikjarati fil-btajjel, u l-użu tar-rati ta' unità, inklużi l-elementi stmati li ddevjaw b'mod sinifikanti mir-rati ta' unità attwali; |
32. |
Jinnota li s-CVs u d-dikjarazzjonijiet ta' interess tal-bord tat-tmexxija mhumiex ippubblikati; jistieden lill-Impriża Konġunta tippubblika s-CVs u d-dikjarazzjonijiet ta' interess tal-bord tat-tmexxija fid-dawl tal-qafas ta' trasparenza u tiggarantixxi aċċess faċli għalihom. |