52021AE6442

Language
- My EUR-Lex
- Sign in
- Register
- My recent searches (0)

This document is an excerpt from the EUR-Lex website

Search tips

Need more search options? Use the Advanced search

EUROPA
EUR-Lex home
EUR-Lex - 52021AE6442 - EN

Document 52021AE6442

Help

Opinjoni tal-Kumitat Ekonomiku u Soċjali Ewropew dwar il-“Proposta għal Direttiva tal-Parlament Ewropew u tal-Kunsill li temenda d-Direttiva 2010/40/UE dwar il-qafas għall-varar ta’ Sistemi ta’ Trasport Intelliġenti fil-qasam tat-trasport bit-triq u għall-interkonnessjonijiet ma’ modi oħrajn ta’ trasport” (COM(2021) 813 final — 2021/0419(COD))

EESC 2021/06442

ĠU C 290, 29.7.2022, p. 126–130 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

HTML

PDF

Official Journal

29.7.2022

Il-Ġurnal Uffiċjali tal-Unjoni Ewropea

C 290/126

(COM(2021) 813 final — 2021/0419(COD))

(2022/C 290/20)

Relatur:

Stefan BACK

Konsultazzjoni	Parlament Ewropew, 27.1.2022 Kunsill, 28.1.2022
Bażi legali	Artikoli 91 u 304 tat-Trattat dwar il-Funzjonament tal-Unjoni Ewropea
Sezzjoni kompetenti	Sezzjoni għat-Trasport, l-Enerġija, l-Infrastruttura u s-Soċjetà tal-Informazzjoni
Adottata fis-sezzjoni	10.3.2022
Adottata fil-plenarja	23.3.2022
Sessjoni plenarja Nru	568
Riżultat tal-votazzjoni (favur/kontra/astensjonijiet)	225/1/5

1. Konklużjonijiet u rakkomandazzjonijiet

1.1.

Il-KESE jilqa’ l-proposta tal-Kummissjoni, li hija kompletament konformi mar-rakkomandazzjonijiet tal-KESE elaborati fl-Opinjoni tiegħu dwar Sistemi tat-Trasport Intelliġenti Kooperattivi, u jara valur miżjud konsiderevoli fil-proposta fir-rigward tat-titjib, is-sigurtà, is-sikurezza u l-effiċjenza.

1.2.

Il-KESE jilqa’ wkoll l-ambitu usa’ tal-informazzjoni li għandha tiġi pprovduta u l-obbligu tal-Istati Membri li jikkooperaw. B’mod partikolari, tista’ tinġibed l-attenzjoni għall-kamp ta’ applikazzjoni mwessa’ għall-iskambju ta’ informazzjoni dwar il-merkanzija, kif ukoll il-mobbiltà kooperattiva, konnessa u awtomatizzata, inkluża l-komunikazzjoni bejn vettura u oħra, li ttejjeb ukoll b’mod sinifikanti s-sikurezza fit-toroq.

1.3.

Il-KESE jinnota li l-effiċjenza mtejba se tikkonċerna kemm it-trasport tal-merkanzija kif ukoll it-trasport tal-passiġġieri, li tippermetti, pereżempju, li jiġi segwit il-progress ta’ kunsinna.

1.4.

Għalkemm japprezza l-ħtieġa li jiġi standardizzat l-iskambju ta’ informazzjoni, il-KESE madankollu jenfasizza l-ħtieġa li jitħalla spazju biżżejjed għal soluzzjonijiet lokali u speċifiċi għall-kumpaniji, fejn ikun debitament ġustifikat u proporzjonat, filwaqt li jitqiesu wkoll l-impatti possibbli fuq is-suq intern.

1.5.

Il-KESE jenfasizza li l-varar tas-sistemi ta’ trasport intelliġenti jrid isir f’kuntest soċjetali wiesa’, jitqiesu elementi li jmorru lil hinn sew minn sempliċi aspetti tekniċi, u li jekk dan ma jsirx, dan jista’ jkollu effetti negattivi, kemm mil-lat tas-sostenibbiltà kif ukoll mil-lat tal-effiċjenza tar-riżorsi. F’dan il-kuntest, il-KESE jenfasizza l-importanza li tingħata biżżejjed attenzjoni u riżorsi għall-ħtiġijiet taż-żoni rurali, inklużi fir-rigward tal-aspetti tas-servizz pubbliku u mezzi alternattivi ta’ mobbiltà bħall-mixi u ċ-ċikliżmu.

1.6.

Il-KESE jqajjem ukoll il-kwistjoni tal-kondiviżjoni tar-riżorsi tal-mobbiltà, u jixtieq jiġbed l-attenzjoni għall-ħtieġa possibbli ta’ att delegat dwar l-appoġġ għas-sistemi ta’ trasport intelliġenti għal dan il-għan, li jindirizza, pereżempju, id-disponibbiltà tar-riżorsi u l-kapaċità tat-trasport, kif ukoll l-aggregazzjoni tal-ħtiġijiet tal-ivvjaġġar, u jiddefinixxi l-possibbiltajiet ta’ tqabbil biex jiġi ottimizzat l-użu tal-kapaċità.

1.7.

L-ottimizzazzjoni tal-użu tar-riżorsi disponibbli, biż-żieda fl-għadd ta’ vetturi b’emissjonijiet żero, se ttejjeb is-sostenibbiltà.

1.8.

Il-KESE jqis il-proposta bħala pass sinifikanti lejn Spazju Komuni Ewropew tad-Data dwar il-Mobbiltà, jiġifieri valur miżjud permezz ta’ effiċjenza mtejba, kif ukoll il-ħolqien ta’ prerekwiżiti għal kundizzjonijiet tax-xogħol imtejba fis-settur tat-trasport, pereżempju l-iffaċilitar tal-konformità mal-leġiżlazzjoni dwar il-ħinijiet tax-xogħol u l-perjodi ta’ mistrieħ, kif ukoll is-sejbien u l-aċċess għal żoni ta’ mistrieħ.

1.9.

Il-KESE jiġbed l-attenzjoni għall-importanza li tissaħħaħ il-fiduċja sabiex sistema mibnija fuq il-kondiviżjoni tar-riżorsi u tal-informazzjoni tiġi aċċettata mill-pubbliku u tiffunzjona tajjeb. Dan ifisser li, fost l-oħrajn, il-privatezza u l-protezzjoni tad-data kif ukoll il-protezzjoni tas-sigrieti kummerċjali jridu jkunu sodisfaċenti. Għalhekk, il-KESE qed jistenna bil-ħerqa l-qafas ta’ governanza mħabbar mill-Kummissjoni fil-Komunikazzjoni tagħha dwar Strateġija Ewropea għad-Data.

1.10.

Fir-rigward tad-data ta’ ġol-vettura, il-KESE jindika wkoll il-ħtieġa li jiġu żgurati kemm il-protezzjoni tal-konsumatur kif ukoll il-kompetizzjoni ġusta, kif żviluppat aktar fil-punt 3.18.

1.11.

Il-KESE jappella għal regolamentazzjoni urġenti speċifika għas-settur fir-rigward tal-aċċess għad-data, il-funzjonijiet u r-riżorsi ta’ ġol-vetturi. S’issa, il-Kummissjoni ma ppreżentatx proposta dwar il-kwistjoni. Dan id-dewmien huwa partikolarment ta’ ħsara għall-konsumaturi.

1.12.

Il-KESE jiġbed l-attenzjoni wkoll għall-ħtieġa li tittejjeb l-inklużjoni tal-persuni b’mobbiltà mnaqqsa, u jitlob li r-rekwiżiti ta’ aċċessibbiltà skont id-Direttiva (UE) 2019/882 jiġu inklużi fir-rekwiżiti tas-sistemi ta’ trasport intelliġenti, possibbilment fil-forma ta’ att delegat.

1.13.

Fl-aħħar nett, il-KESE jtenni l-offerta li għamel fl-Opinjoni msemmija hawn fuq dwar Sistemi tat-Trasport Intelliġenti Kooperattivi, biex jgħin lill-Kummissjoni fl-attivitajiet ta’ implimentazzjoni tagħha billi jservi ta’ rabta mas-soċjetà ċivili.

2. Sfond

2.1.

Il-proposta tal-Kummissjoni hija parti mill-implimentazzjoni tal-Istrateġija għal Mobbiltà Sostenibbli u Intelliġenti (l-Istrateġija) tal-Kummissjoni tal-2020 u t-trasformazzjoni tas-sistema Ewropea tat-trasport. Hija tiddefinixxi s-setturi fejn id-diġitalizzazzjoni għandha rwol ewlieni biex is-sistema tat-trasport issir bla xkiel u aktar effiċjenti.

2.2.

Is-sistemi ta’ trasport intelliġenti għandhom rwol ewlieni fil-ħolqien ta’ sistema ta’ mobbiltà multimodali konnessa u awtomatizzata li se ttejjeb l-effiċjenza, is-sikurezza u s-sostenibbiltà tat-trasport.

2.3.

F’konformità mal-Komunikazzjoni tagħha dwar Strateġija Ewropea għad-Data (COM(2020) 66), il-Kummissjoni ppreżentat din il-proposta biex tikkontribwixxi għall-implimentazzjoni tal-objettivi tal-Patt Ekoloġiku u tlesti lill-Ewropa għall-era diġitali.

2.4.

Id-Direttiva dwar sistemi ta’ trasport intelliġenti (2010/40/UE) teħtieġ aġġornament biex tilqa’ l-isfidi tal-iżvilupp tekniku fis-sistemi ta’ trasport intelliġenti, u b’mod partikolari, biex ittejjeb il-kooperazzjoni fost il-partijiet ikkonċernati kif ukoll id-disponibbiltà tas-servizzi tas-sistemi ta’ trasport intelliġenti.

2.5.

Il-proposta biex tiġi aġġornata d-Direttiva dwar sistemi ta’ trasport intelliġenti hija parti minn pakkett leġiżlattiv li jiffoka fuq l-għanijiet tat-tnaqqis tal-emissjonijiet tas-CO2, tad-diġitalizzazzjoni, u tar-reżiljenza mtejba tal-infrastruttura tat-trasport. Pereżempju, kemm il-proposta għal rieżami tar-Regolament TEN-T (1) kif ukoll il-Komunikazzjoni dwar il-qafas il-ġdid għall-mobbiltà urbana (2), jinkludu dispożizzjonijiet rigward il-varar tas-servizzi ta’ sistemi ta’ trasport intelliġenti bħall-forniment ta’ informazzjoni relatata mas-sikurezza u l-iżvilupp tal-mobbiltà urbana.

2.6.

Id-Direttiva dwar sistemi ta’ trasport intelliġenti se tkun element importanti fl-implimentazzjoni tal-ispazju komuni Ewropew tad-data dwar il-mobbiltà, li huwa wieħed mill-ispazji tad-data ppjanati għal setturi strateġiċi skont l-Istrateġija Ewropea għad-Data.

2.7.

Il-proposta temenda d-Direttiva dwar sistemi ta’ trasport intelliġenti billi żżid id-disponibbiltà tad-data u l-varar tas-servizzi ta’ sistemi ta’ trasport intelliġenti fil-kamp ta’ applikazzjoni tad-Direttiva. L-oqsma ta’ prijorità għall-azzjoni ġew ristrutturati biex jaqblu aħjar mad-diversi tipi ta’ servizzi ta’ sistemi ta’ trasport intelliġenti.

—	Qed jiġi stabbilit Punt ta’ Aċċess Nazzjonali f’kull Stat Membru għall-iskambju tad-data. L-iskambju/il-forniment tad-data qed isir obbligatorju f’għadd ta’ oqsma, u fil-biċċa l-kbira d-data se tintbagħat ukoll lill-partijiet ikkonċernati.

—	L-Istati Membri għandhom jikkooperaw ukoll, fejn meħtieġ, mal-partijiet ikkonċernati rilevanti dwar l-aspetti operazzjonali tal-implimentazzjoni.

—	Taqsima ġdida fl-Anness I dwar l-oqsma ta’ prijorità tinkludi dispożizzjonijiet dwar rwol għad-data fl-intraċċar u t-traċċar tal-merkanzija, u taqsima ġdida dwar is-servizzi ta’ mobbiltà kooperattivi, konnessi u awtomatizzati.

—	Hemm ukoll dispożizzjonijiet dwar il-protezzjoni u l-integrità tad-data.

—	Element importanti huwa li l-Kummissjoni għandha tingħata s-setgħa li tadotta atti delegati biex taġġorna ċerti rekwiżiti ta’ informazzjoni.

—	L-Istati Membri għandhom jirrapportaw regolarment lill-Kummissjoni dwar l-implimentazzjoni tad-Direttiva.

3. Kummenti ġenerali

3.1.

Il-KESE jilqa’ l-proposta tal-Kummissjoni, li hija kompletament konformi mal-iżviluppi rakkomandati mill-KESE fl-Opinjoni tiegħu dwar Sistemi tat-Trasport Intelliġenti u Kooperattivi (3). Iqis li hemm valur miżjud konsiderevoli fis-sistemi aġġornati ta’ trasport intelliġenti li qed jiġu proposti mill-Kummissjoni, kemm bħala kwistjoni ta’ sigurtà u sikurezza mtejba, kif ukoll ta’ effiċjenza mtejba, mhux biss fir-rigward ta’ flussi tat-traffiku mtejba u aktar sikuri, iżda wkoll bħala funzjoni ta’ appoġġ għal loġistika effiċjenti.

3.2.

Għalhekk, il-KESE jilqa’ wkoll l-ambitu usa’ tal-informazzjoni li għandha tiġi pprovduta u l-fatt li l-Istati Membri ser ikunu obbligati jikkooperaw. Huwa japprezza b’mod partikolari l-kamp ta’ applikazzjoni mwessa’ tad-dispożizzjonijiet dwar l-iskambju ta’ informazzjoni rigward il-merkanzija u l-estensjoni tal-informazzjoni koperta biex tinkludi l-mobbiltà kooperattiva, konnessa u awtomatizzata.

3.3.

Huwa jassumi li s-sistema ta’ informazzjoni proposta tkopri wkoll il-komunikazzjoni bejn vettura u oħra, kif diġà intalab fl-Opinjoni tiegħu dwar l-Istrateġija Ewropea dwar is-Sistemi tat-Trasport Intelliġenti u Kooperattivi. Il-KESE jfakkar fil-kontribut ewlieni tal-komunikazzjoni bejn vettura u oħra fil-prevenzjoni tal-inċidenti fit-toroq.

3.4.

Il-KESE jassumi li s-sistema ta’ skambju ta’ informazzjoni aġġornata li qed tiġi proposta issa se twassal għal valur miżjud fil-forma ta’ effiċjenza mtejba fit-trasport kemm tal-passiġġieri kif ukoll tal-merkanzija, kif ukoll li l-progress ta’ kunsinna, pereżempju, issa se jkun faċli li jiġi segwit minn dawk ikkonċernati, peress li l-informazzjoni rilevanti issa se tintbagħat ukoll lill-partijiet ikkonċernati rilevanti.

3.5.

Huwa jinnota li l-informazzjoni li għandha tiġi skambjata f’dan l-istadju hija fil-biċċa l-kbira standardizzata u għalhekk itenni l-fehma tiegħu li huwa importanti li jitħalla spazju raġonevoli għal soluzzjonijiet lokali u speċifiċi għall-kumpaniji, fejn dan ikun debitament ġustifikat u proporzjonat, filwaqt li jitqiesu wkoll l-impatti possibbli fuq is-suq intern. Il-KESE jassumi li dan ma joħloqx problema sakemm l-informazzjoni li tiddaħħal fis-sistema proposta tkun konformi mal-istandards stabbiliti.

3.6.

Il-KESE jinnota li l-varar ta’ sistemi ta’ trasport intelliġenti jrid isir f’kuntest soċjetali wiesa’ u ma jwassalx awtomatikament għal sistema tat-trasport li ma tagħmilx ħsara lill-klima. Id-diġitalizzazzjoni tal-modi tat-trasport fiha nnifisha (eż. mobbiltà awtomatizzata bil-karozza) tista’ saħansitra tkun kontroproduttiva f’termini ta’ politika ambjentali. Sistemi ta’ trasport intelliġenti għandhom jiġu żviluppati, promossi u użati b’tali mod li jiżviluppaw valur miżjud li ma jagħmilx ħsara lill-klima.

3.7.

Sistema effiċjenti tat-trasport pubbliku bħala parti mis-servizzi ta’ interess (ekonomiku) ġenerali, ikkomplementata miċ-ċikliżmu u l-mixi, hija essenzjali għall-mobbiltà sostenibbli. Il-KESE jirrakkomanda li jiġu promossi sistemi ta’ trasport intelliġenti biex jissaħħaħ u jiġi kkomplementat it-trasport pubbliku.

3.8.

Il-KESE jirrimarka li perspettiva orjentata biss lejn it-teknoloġija biex jiġu żviluppati sistemi ta’ trasport intelliġenti tista’ twassal għal nuqqas ta’ kontribut biex jintlaħqu l-għanijiet u r-riżultati stabbiliti — pereżempju, il-kontribut ta’ sistemi ta’ car-sharing f’agglomerazzjonijiet urbani li diġà għandhom sistemi ta’ trasport pubbliku żviluppati sew. Is-sewqan awtomatizzat tal-karozzi jista’ ma jkunx soluzzjoni li tħares ’il quddiem għall-bliet, speċjalment fejn ikun hemm konġestjoni u nuqqas ta’ spazju pubbliku. Għalhekk, il-KESE jsostni li l-innovazzjonijiet kbar fil-mobbiltà tal-elettrifikazzjoni, l-awtomatizzazzjoni u l-kondiviżjoni se jagħtu l-aħjar valur miżjud jekk jiġu kkonċepiti u stabbiliti b’kunsiderazzjoni adegwata tal-ħtiġijiet tas-soċjetà, bħall-aċċessibbiltà, l-effiċjenza u l-aspetti tas-servizz pubbliku.

3.9.

Il-konsultazzjonijiet mal-partijiet ikkonċernati żvelaw ħafna tħassib dwar il-kopertura territorjali. Il-KESE jiddispjaċih li l-proposta ma ssemmix l-iżvilupp ta’ sistemi ta’ trasport intelliġenti biex ikopru l-ħtiġijiet taż-żoni rurali, bħala kwistjoni apparti mill-iżvilupp tagħhom fiż-żoni urbani. Il-KESE jirrakkomanda li l-Kummissjoni tagħti attenzjoni speċjali lill-estensjoni tas-sistemi ta’ trasport intelliġenti għaż-żoni rurali, peress li l-ħajja f’dawn iż-żoni tiddependi ħafna fuq id-disponibbiltà ta’ servizzi pubbliċi u infrastruttura ta’ kwalità. Komunikazzjoni separata tal-Kummissjoni bit-titolu Viżjoni fit-tul għaż-żoni rurali tal-UE (4) tafferma wkoll li s-servizzi bażiċi u l-infrastruttura relatata f’dawn l-oqsma huma essenzjali biex tiġi żgurata l-inklużjoni soċjali u ekonomika. Għalhekk għandu jkun ta’ tħassib fil-livell tal-UE li ż-żoni rurali jkunu jistgħu jibbenefikaw mis-soluzzjonijiet ipprovduti minn sistemi ta’ trasport intelliġenti.

3.10.

Dan jista’ jkun ta’ interess partikolari fl-użu effiċjenti tal-kapaċitajiet tat-trasport fiż-żoni rurali. Il-ħsara kkawżata mit-trasport hija riflessa mhux biss fl-emissjonijiet iżda wkoll fl-użu tar-riżorsi tat-trasport. Nirrakkomandaw li l-Kummissjoni tikkunsidra, fejn adatt, li tadotta atti delegati biex tindirizza l-kondiviżjoni tar-riżorsi appoġġjati minn sistemi ta’ trasport intelliġenti. Dan għandu jinkludi aggregazzjoni intelliġenti u appoġġjata b’mod diġitali tal-ħtiġijiet tal-ivvjaġġar u tal-kondiviżjoni ta’ kapaċità żejda (ara ride-pooling), li tkun partikolarment meħtieġa f’żoni rurali, fejn il-kapaċità tat-trasport disponibbli qed issir dejjem aktar limitata u fejn qed isir dejjem aktar diffiċli li tinbena kapaċità ġdida minħabba distanzi. Tali sistemi intelliġenti għandhom jippermettu l-kondiviżjoni ta’ informazzjoni dwar l-użu tal-vettura u l-kapaċità li s-sistema eżistenti tiġi rifornuta b’passiġġieri jew merkanzija addizzjonali.

3.11.

Il-KESE jilqa’ l-fatt li, minbarra l-proliferazzjoni ta’ vetturi b’emissjonijiet żero, il-proposta se tikkontribwixxi wkoll għal trasport aktar sostenibbli permezz ta’ servizzi ta’ mobbiltà kondiviżi, li jwassalna għal emissjonijiet żero netti sal-2050. Billi nagħmlu t-traffiku fit-toroq aktar faċli u nnaqqsu l-konġestjonijiet tat-traffiku, qed nilħqu l-għanijiet ambjentali tagħna b’għadd ta’ modi.

3.12.

Il-KESE japprezza li t-tisħiħ tas-sistema ta’ trasport intelliġenti kif qed tiġi proposta bħalissa jista’ jitqies bħala l-ewwel pass lejn Spazju Komuni Ewropew tad-Data dwar il-Mobbiltà, li jfisser valur miżjud konsiderevoli f’termini ta’ effiċjenza mtejba.

3.13.

Huwa ċar li l-ħolqien ta’ spazju bħal dan jiffaċilita l-forniment tal-mobbiltà bħala servizz fir-rigward kemm tal-passiġġieri kif ukoll tal-merkanzija u jista’ jtejjeb il-kundizzjonijiet tax-xogħol fis-settur tat-trasport.

3.14.

Il-KESE jilqa’ s-sistemi ta’ trasport intelliġenti għal parkeġġ sikur għas-sewwieqa professjonali fin-Network Trans-Ewropew tal-Awtostradi. L-applikazzjonijiet telematiċi għall-parkeġġ sikur jistgħu jiffaċilitaw il-konformità mal-ħinijiet legali tas-sewqan u tal-perjodi ta’ mistrieħ. Madankollu, il-KESE jirrimarka li l-problema bażika kemm għall-kumpaniji kif ukoll għas-sewwieqa professjonali hija l-infrastruttura inadegwata taż-żoni ta’ mistrieħ tal-awtostrada, li twassal biex is-sewwieqa jqattgħu ljieli iktar milli suppost fiż-żoni ta’ parkeġġ. L-iżvilupp tal-infrastruttura għandu jimxi id f’id mas-servizzi bbażati fuq sistemi ta’ trasport intelliġenti (eż. parkeġġ riżervat).

3.15.

F’dan il-kuntest, il-KESE jerġa’ jenfasizza l-importanza li tissaħħaħ il-fiduċja u l-fatt li l-ebda obbligu li tingħata informazzjoni m’għandu jaffettwa l-kunfidenzjalità tan-negozju, il-privatezza jew il-protezzjoni tad-data.

3.16.

Fir-rigward tad-dritt tal-Kummissjoni li tadotta atti delegati biex taġġorna obbligi speċifiċi ta’ informazzjoni, il-KESE jinnota l-ħtieġa ta’ kundizzjonijiet ekwivalenti u fiduċja fir-rigward ta’ dawk kollha involuti fil-“kondiviżjoni tad-data”. Il-KESE jappoġġja l-kamp ta’ applikazzjoni mwessa’ tad-Direttiva dwar is-sistemi ta’ trasport intelliġenti u l-valur miżjud li ġġib magħha. Il-KESE jieħu nota wkoll tal-eżistenza ta’ problemi ta’ fiduċja fir-rigward tal-kondiviżjoni tad-data u l-ħtieġa li jiġi stabbilit qafas ta’ governanza tal-Ispazji Ewropej tad-Data, b’mod partikolari f’oqsma strateġiċi bħall-mobbiltà, kif deskritt fil-Komunikazzjoni tal-Kummissjoni dwar strateġija Ewropea għad-Data (5).

3.17.

Il-KESE jenfasizza wkoll li huwa importanti li l-informazzjoni fis-sistema tintuża biss għal finijiet ta’ sistemi ta’ trasport intelliġenti u mhux għal finijiet oħra. Il-KESE jtenni l-importanza tal-privatezza effettiva u l-protezzjoni tad-data fil-kuntest tal-użu ta’ sistemi ta’ trasport intelliġenti. Madankollu, ir-Regolament Ġenerali dwar il-Protezzjoni tad-Data ma jipprovdix protezzjoni suffiċjenti meta jintużaw teknoloġiji (eż. xejriet ta’ mobbiltà ta’ data tal-vetturi, rikonoxximent tal-wiċċ, eċċ.) li jippermettu li jinsiltu konklużjonijiet dwar individwi jew saħansitra jiddiskriminaw permezz ta’ algoritmi meta d-data tiġi anonimizzata. Fir-rigward tal-użu ta’ data personali fuq il-post tax-xogħol, il-ħaddiema, ir-rappreżentanti tagħhom u t-trade unions jeħtieġ li jingħataw vuċi u veto. Il-KESE jenfasizza li l-Artikolu 10 tal-proposta (dispożizzjonijiet dwar il-protezzjoni tad-data u l-privatezza) għandu jeskludi dan ir-riskju potenzjali. Dan huwa partikolarment importanti biex tissaħħaħ il-fiduċja fis-sistema u l-aċċettazzjoni fis-soċjetà inġenerali.

3.18.

Il-KESE jinnota li l-konsumaturi jrid ikollhom kontroll fuq id-data li qed tiġi kondiviża: l-informazzjoni personali tagħhom meta jibbukkjaw servizzi jew jixtru biljetti, kif ukoll id-data li l-karozzi tagħhom jikkondividu mal-fornituri tas-servizzi jew mal-infrastruttura. Fiċ-ċirkostanzi kollha, il-konsumaturi jeħtiġilhom ikunu fil-qalba tal-kwistjoni u jkollhom id-data tagħhom protetta, f’konformità sħiħa mal-GDPR.

3.19.

L-aċċess għad-data ta’ ġol-vettura jrid finalment jiġi rregolat favur il-protezzjoni tad-data u tal-konsumatur, kif ukoll il-kompetizzjoni ġusta. Jekk id-data ta’ ġol-vettura titħalla f’idejn il-manifatturi tal-karozzi, dan iwassal għal monopolji u pożizzjonijiet dominanti fis-suq u riskju ta’ abbuż. Il-Kummissjoni ilha li ntalbet tippreżenta proposta regolatorja u tat sinjali pożittivi f’dan ir-rigward, pereżempju fl-Istrateġija għad-Data msemmija hawn fuq, madankollu s’issa għadha ma ħadet l-ebda passi biex tippreżenta proposta. Dan id-dewmien huwa partikolarment ta’ ħsara għall-interessi tal-konsumatur u għall-possibbiltajiet tal-konsumaturi li jikkontrollaw id-data u jagħmlu għażliet alternattivi u infurmati.

3.20.

Id-diġitalizzazzjoni tista’ tnaqqas in-nuqqas ta’ inklużjoni li jaffettwa lill-persuni b’mobbiltà mnaqqsa fil-ħajja tagħhom ta’ kuljum. F’dan is-sens, ir-rekwiżiti espliċiti ta’ aċċessibbiltà skont id-Direttiva (UE) 2019/882 għandhom jiġu stabbiliti b’mod programmatiku f’din id-Direttiva għas-setturi kollha tas-sistemi ta’ trasport intelliġenti. Il-fatt li dan is-suġġett jissemma biss fi premessa li fiha l-prospett li jiġu żviluppati karatteristiċi ta’ aċċessibbiltà għal persuni b’mobbiltà mnaqqsa fis-servizzi multimodali diġitali huwa ftit wisq.

3.21.

Il-KESE jilqa’ l-iskambju u d-disponibbiltà ppjanati tad-data dwar it-toroq u l-awtostradi (projbizzjonijiet fuq is-sewqan, limiti tal-veloċità, data f’ħin reali dwar l-għeluq tat-toroq, xogħlijiet fit-toroq, eċċ.), kif previst fl-Anness III. F’dan il-kuntest, il-KESE jħeġġeġ li jiġu żviluppati sistemi intelliġenti ta’ ġestjoni tat-traffiku li jistgħu jassimilaw it-traffiku tat-trasport (ta’ tranżitu) bit-triq fl-awtostradi f’termini ta’ ħin u b’hekk jiżguraw is-sikurezza u l-fluwidità tat-traffiku.

3.22.

F’dan ir-rigward, il-KESE jinnota li l-Kummissjoni, fil-ħidma tagħha biex taġġorna l-lista ta’ informazzjoni obbligatorja, beħsiebha titlob il-kontribut tal-Grupp Konsultattiv Ewropew dwar is-Sistemi ta’ Trasport Intelliġenti. Għaldaqstant, il-KESE jtenni l-offerta li huwa għamel fl-Opinjoni msemmija hawn fuq biex jgħin lill-Kummissjoni billi jservi ta’ rabta mas-soċjetà ċivili.

Brussell, it-23 ta’ Marzu 2022.

Christa SCHWENG

Il-President tal-Kumitat Ekonomiku u Soċjali Ewropew

(1) Ir-Regolament (UE) Nru 1315/2013.

(2) COM(2021) 1811.

(3) ĠU C 288, 31.8.2017, p. 85 u COM(2016) 766.

(4) Viżjoni fit-tul għaż-żoni rurali tal-UE — Lejn żoni u komunitajiet rurali aktar b’saħħithom, konnessi, reżiljenti u prosperużi sal-2040 — COM(2021) 345.

(5) COM(2020) 66.

Top