This document is an excerpt from the EUR-Lex website
Document 52020PC0321
Proposal for a COUNCIL DECISION amending Decision 2003/77/EC laying down multiannual financial guidelines for managing the assets of the ECSC in liquidation and, on completion of the liquidation, the Assets of the Research Fund for Coal and Steel
Proposta għal DEĊIŻJONI TAL-KUNSILL li temenda d-Deċiżjoni 2003/77/KE li tistabbilixxi linji gwida finanzjarji multiannwali għall-amministrazzjoni tal-assi tal-KEFA f’likwidazzjoni u, mat-twettiq tal-likwidazzjoni, l-Assi tal-Fond ta’ Riċerka għall-Faħam u l-Azzar
Proposta għal DEĊIŻJONI TAL-KUNSILL li temenda d-Deċiżjoni 2003/77/KE li tistabbilixxi linji gwida finanzjarji multiannwali għall-amministrazzjoni tal-assi tal-KEFA f’likwidazzjoni u, mat-twettiq tal-likwidazzjoni, l-Assi tal-Fond ta’ Riċerka għall-Faħam u l-Azzar
COM/2020/321 final
IL-KUMMISSJONI EWROPEA
Brussell, 16.7.2020
COM(2020) 321 final
2020/0143(NLE)
Proposta għal
DEĊIŻJONI TAL-KUNSILL
li temenda d-Deċiżjoni 2003/77/KE li tistabbilixxi linji gwida finanzjarji multiannwali għall-amministrazzjoni tal-assi tal-KEFA f’likwidazzjoni u, mat-twettiq tal-likwidazzjoni, l-Assi tal-Fond ta’ Riċerka għall-Faħam u l-Azzar
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
L-Anness tad-Deċiżjoni tal-Kunsill 2003/77/KE tal-1 ta’ Frar 2003 1 jistipula li “(a). l-assi tal-KEFA [il-Komunità Ewropea tal-Faħam u l-Azzar] f’likwidazzjoni [...] għandhom ikunu użati kif meħtieġ biex jintlaħqu l-obbligazzjonijiet li jkun fadal tal-KEFA, skont is-self li jkun għad fadal, tal-obbligi li jirriżultaw mill-baġits operattivi ta’ qabel, u kull responsabbiltà li ma hijiex prevista. (b). sal-limitu li l-assi tal-KEFA f’likwidazzjoni ma jkunux meħtieġa sabiex jintlaħqu obbligazzjonijiet kif deskritti f’(a), dawn għandhom ikunu investiti biex jiġi provdut dħul biex jintuża bħala fond għall-kontinwazzjoni ta’ riċerka fis-setturi relatati mal-faħam u l-industrija tal-azzar. (ċ). L-Assi tal-Fond ta’ Riċerka għall-Faħam u l-Azzar għandhom jiġu investiti biex jipprovdu dħul biex jintuża biex jipprovdu fondi għall-kontinwazzjoni ta’ riċerka fis-setturi relatati mal-faħam u l-industrija tal-azzar.”
Minħabba li ma fadalx self mhux imħallas u t-tnaqqis tal-obbligi tal-KEFA 2 , il-KEFA f’likwidazzjoni tikkonċentra bi grad dejjem aktar predominanti fuq l-attività tal-investiment għall-fini tal-ġenerazzjoni tad-dħul biex jipprovdi fondi għar-riċerka. Id-Deċiżjoni tal-Kunsill 2003/77/KE tipprevedi li l-Kummissjoni għandha tamministra l-assi tal-KEFA f’likwidazzjoni b’tali mod li “jiżgura li jkun hemm fondi disponibbli meta u kif meħtieġ, waqt li xorta jiġġeneraw l-ogħla dħul possibbli, konsistenti maż-żamma ta’ grad għoli ta’ sigurtà u stabbilità fuq medda ta’ żmien twil” (il-punt 3 tal-Anness tad-Deċiżjoni tal-Kunsill 2003/77/KE).
Il-Kummissjoni Ewropea tuża r-rendimenti tal-KEFA f’likwidazzjoni biex issostni proġetti ta’ riċerka fis-setturi tal-azzar u tal-faħam. Fl-aħħar snin, madankollu, b’riżultat tat-tnaqqis sekulari fir-rendimenti tas-swieq finanzjarji, bdiet tinħoloq pressjoni fuq l-abbiltà tal-portafoll li jiġġenera rendimenti suffiċjenti biex jiffinanzja programm sinifikanti ta’ riċerka. Anki qabel id-deterjorament riċenti tas-suq ikkawżat mill-pandemija tal-COVID-19, il-portafoll kien qed jiġġenera rendimenti aktar baxxi minħabba l-ambjent prevalenti wara l-kriżi finanzjarja, ikkaratterizzat minn rati tal-imgħax aktar baxxi. Il-kriżi tal-COVID-19 aggravat dan it-tnaqqis strutturali fit-tul tar-rendimenti mistennija. Bis-saħħa ta’ kompożizzjoni relattivament konservattiva, il-portafoll tal-KEFA kkumbatta relattivament tajjeb il-kontrazzjoni akuta tas-suq wara l-kriżi tal-COVID-19 meta mqabbel ma’ fondi oħra analogi. Madankollu, din il-kriżi se jkollha effetti fit-tul fuq ir-rendimenti mistennija u ssaħħaħ il-ħtieġa li jinstabu mezzi alternattivi biex l-assi tal-fond jaħdmu insostenn tal-politiki tal-UE.
F’dan il-kuntest il-Kummissjoni tixtieq issaħħaħ l-appoġġ għal proġetti ta’ riċerka kollaborattiva fis-settur tal-faħam u tal-azzar, filwaqt li tipproponi li d-Deċiżjoni tal-Kunsill 2008/376 tiġi emendata biex tiġi allinjata mal-objettivi tal-Patt Ekoloġiku. Il-Kummissjoni tixtieq li tappoġġa wkoll proġetti kbar avangardisti li jwasslu għal proċessi ta’ produzzjoni tal-azzar bi (kważi) żero emissjonijiet ta’ karbonju sal-2030, u proġetti ta’ riċerka għall-ġestjoni tat-tranżizzjoni ġusta għas-settur tal-faħam. Għal programm ta’ dan it-tip jitqies adegwat baġit annwali stabbli ta’ EUR [111-il miljun]. Dan huwa meħtieġ biex jingħata appoġġ rilevanti għall-proġetti siewja fuq l-iskala meħtieġa biex tiġi koperta l-ispiża tal-ġestjoni tal-iskema.
Il-proviżjonament ta’ allokazzjonijiet annwali regolari ta’ EUR [111-il miljun] sas-sena 2027 jitlob li jsir tibdil fil-mod kif jintużaw u jiġu investiti r-riżorsi tal-assi tal-KEFA f’likwidazzjoni. Il-bidliet proposti fid-Deċiżjoni attwali se jippermettu dan il-livell ta’ appoġġ għall-proġetti ta’ riċerka kollaborattiva u għall-proġetti ta’ riċerka avangardisti fis-settur tal-azzar u għall-proġetti ta’ riċerka għall-ġestjoni tat-tranżizzjoni ġusta għas-settur tal-faħam. Filwaqt li dawn l-allokazzjonijiet annwali se jnaqqsu gradwalment l-ammont globali tal-assi investiti, xorta se jifdal ammont raġonevoli ta’ assi investibbli għall-perjodu wara l-2027.
•Prestazzjoni riċenti u prospetti għall-assi investiti tal-KEFA f’likwidazzjoni:
Fil-31 ta’ Marzu 2020 il-valur tal-portafoll kien jammonta għal EUR 1,5 biljun. Id-daqs tal-portafoll naqas kemxejn mit-30.6.2012, hekk kif ir-rendimenti totali u l-kontribuzzjonijiet ġodda li daħlu kienu kkumpensati minn flussi ta’ ħruġ biex tiġi ffinanzjata r-riċerka f’setturi konnessi mal-industrija tal-faħam u tal-azzar.
Mill-2003 sa reċentement, l-assi tal-KEFA f’likwidazzjoni ġġeneraw rendiment pożittiv li, flimkien mar-riżorsi disponibbli permezz ta’ mekkaniżmu ta’ livellar, ippermetta appoġġ annwali ta’ EUR 50 miljun għal proġetti ta’ riċerka. Fi tmiem l-2017, il-prestazzjoni tal-portafoll mill-adozzjoni tad-Deċiżjoni tal-Kunsill 2003/77/KE, kif emendata mid-Deċiżjoni tal-Kunsill 2008/750/KE 3 , kienet pożittiva: l-ammonti kienu żborżati kif u meta mitlubin u r-rendiment tal-portafoll kien sodisfaċenti meta wieħed iqis l-ambjent tas-suq u l-linji gwida ġeneralment restrittivi. Matul il-perjodu mill-1 ta’ Lulju 2012 sal-31 ta’ Diċembru 2017, il-portafoll ipprovda redditu kumulattiv pożittiv ta’ +8,5 %.
Ir-rendiment fuq l-assi investiti konsistentement kien aħjar mill-parametru referenzjarju, u wera li huwa alternattiva superjuri għall-investiment bir-rati tal-imgħax prevalenti mingħajr riskju, li fl-aħħar snin saru negattivi. Tabilħaqq, il-portafoll qatt qabel ma rreġistra prestazzjoni annwali negattiva tul il-ħajja tiegħu, u mill-bidu tiegħu kiseb rendiment akkumulat ta’ 80 %. Madankollu, jekk wieħed iħares ’il quddiem, il-livell attwalment baxx (u spiss negattiv) ta’ rendimenti tal-bonds jantiċipa rendimenti li mistennija jkunu aktar baxxi fiż-żmien qasir għal medju, u se tkun diffiċli biex jinkisbu rendimenti pożittivi.
Barra minn hekk, kif stabbilit fil-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (il-“Ftehim dwar il-Ħruġ”), il-valur tal-portafoll se jkompli jonqos b’madwar EUR [250] miljun 4 .
F’dan il-kuntest ikun xieraq approċċ differenti fl-użu tal-assi tal-KEFA sabiex jintlaħqu l-objettivi ta’ politika. Din il-proposta tippreżenta żewġ bidliet ewlenin:
·F’konformità mal-proposta għal emenda tad-Deċiżjoni 2003/76/KE għandu jkun possibbli li r-riżorsi tal-portafoll jinbiegħu fejn meħtieġ biex ikunu permessi pagamenti relatati ma’ allokazzjoni annwali ta’ EUR [111-il miljun] sal-2027. Skont il-kundizzjonijiet tal-investiment u l-evoluzzjoni tad-daqs tal-portafoll, dan se jwassal għal tnaqqis gradwali tal-volum tal-assi mmaniġġjati;
·Li jiġu ddiversifikati l-investimenti eliġibbli fil-portafoll biex tissaħħaħ il-prestazzjoni tiegħu fir-rigward tar-riskju / rendiment. Qed jiġi propost li jiġi estiż l-univers tal-assi eliġibbli biex jitjiebu r-rendimenti mistennija għal livell partikolari ta’ riskju.
•Bidliet proposti biex jiġi awtorizzat l-użu tal-assi, fejn meħtieġ, biex tiġi pprovduta allokazzjoni annwali ta’ EUR [111-il miljun]
Qed jiġi propost li tiġi modifikata d-Deċiżjoni 2003/77/KE biex mill-1 ta’ Jannar 2021 5 ikunu espliċitament awtorizzati flussi ta’ ħruġ b’rabta ma’ allokazzjoni annwali massima ta’ EUR [111-il miljun] sal-2027 biex jiġu appoġġati proġetti ta’ riċerka fis-setturi tal-azzar u tal-faħam barra mill-programm qafas tar-riċerka. L-allokazzjoni annwali se tiġi stabbilita skont il-kriterji stipulati fid-Deċiżjoni tal-Kunsill 2003/76/KE riveduta. It-talbiet għall-ħlas li jikkonċernaw l-imsemmija allokazzjoni se jiġu onorati billi jsir rikors għad-dħul nett tal-investimenti u bil-ġbid ta’ assi mill-KEFA f’likwidazzjoni.
Jenħtieġ li l-allokazzjoni annwali tiġi espliċitament inkluża fid-Deċiżjoni biex ikun possibbli fluss prevedibbli tar-riżorsi, fi skala suffiċjenti biex tippermetti l-kontinwazzjoni tal-appoġġ mixtieq għal riċerka kollaborattiva fis-setturi tal-azzar u tal-faħam.
Sal-lum, l-assi tal-KEFA f’likwidazzjoni ġew immaniġġjati fuq il-bażi li r-rendiment fuq l-assi investiti jkun il-mezz li bih jiġu ffinanzjati l-proġetti ta’ riċerka. Dan huwa rifless fil-lingwaġġ tat-taqsima 1 (“Użu tal-Fondi”) tal-Anness tad-Deċiżjoni tal-Kunsill 2003/77/KE u tal-premessa 3 tad-Deċiżjoni li tipprevedi li “l-kapital kollu tal-Assi tal-Fond ta’ Riċerka għall-Faħam u l-Azzar [...] għandu jiġi ppreżervat b’mod intatt”.
Minħabba r-raġunijiet imsemmija hawn fuq, jenħtieġ li dan l-approċċ jiġi emendat biex tiġi ssodisfata l-ħtieġa li jiġi pprovdut il-livell meħtieġ ta’ pagament biex tiġi żgurata l-vijabbiltà ta’ programm ta’ riċerka utli għas-setturi tal-azzar u tal-faħam.
Il-premessa li l-assi tal-KEFA f’likwidazzjoni jistgħu jiġġeneraw dħul stabbli biżżejjed biex jiffinanzja l-Fond ta’ Riċerka għall-Faħam u l-Azzar jekk jiġu ppreservati ma għadhiex sostenibbli, b’kont meħud tal-bidliet fit-tul tal-kundizzjonijiet tas-swieq finanzjarji. Għal dan il-għan huwa meħtieġ li d-Deċiżjoni tiġi aġġornata biex tkun tirrefletti aħjar il-ħtiġijiet tal-politika sottostanti li l-KEFA f’likwidazzjoni suppost isservi l-objettivi tagħha, u l-isfidi tal-ġenerazzjoni tar-rendimenti fil-livell meħtieġ fl-isfond tal-kundizzjonijiet attwali tas-suq.
Il-pagamenti jsiru kull sena ladarba jiġu identifikati l-proġetti rilevanti, dejjem fil-limiti tal-allokazzjoni annwali ta’ EUR [111-il miljun]. L-ammont annwali li jista’ jiġi allokat mill-KEFA f’likwidazzjoni jkun EUR [111-il miljun] biex ikun possibbli l-użu sostnut tar-riżorsi għall-finanzjament tar-riċerka fil-futur.
•Bidliet proposti biex tkun tista’ ssir diversifikazzjoni tal-assi eliġibbli:
Tradizzjonalment, l-assi tal-KEFA ġew investiti b’mod predominanti f’dejn sovran u supranazzjonali denominat fl-euro. Dan l-univers tal-investiment dejjem ippermetta li jinkisbu rendimenti pożittivi, filwaqt li jżomm f’livell baxx ir-riskju tal-portafoll. Fl-aħħar snin, il-kundizzjonijiet ekonomiċi u tas-suq inbidlu b’modi li naqqsu b’mod durabbli l-opportunitajiet li jinkisbu rendimenti fuq l-investimenti f’dejn sovran u supranazzjonali. Jekk nagħtu ħarsa ’l quddiem, is-swieq finanzjarji b’mod ġenerali u s-swieq tal-bonds tal-euro b’mod partikolari se jibqgħu diffiċli minħabba rendimenti baxxi ħafna jew negattivi (partikolarment it-titoli minn emittenti bl-ogħla kwalità kreditizja) u tnaqqis fil-likwidità, dovut fost l-oħrajn għall-politika monetarja akkomodanti tal-BĊE u għall-programmi tiegħu tax-xiri tal-bonds. Żieda fir-rati tal-imgħax minn din il-bażi baxxa se twassal għal rivalwazzjoni ’l isfel tal-assi eżistenti, bir-riskju ta’ redditi baxxi ħafna jew negattivi sakemm ir-riinvestimenti b’redditi ogħla gradwalment jikkumpensaw għall-effett inizjali tar-rivalwazzjoni.
Din il-proposta għandha l-għan li tagħmel il-portafoll tal-KEFA aktar reżiljenti meta jiltaqa’ ma’ sfidi bħal dawn, billi jwessa’ l-ambitu għal investiment fi klassijiet tal-assi oħra u billi jintużaw tekniki tal-investiment oħra għall-protezzjoni tal-portafoll minn dipendenza esklużiva fuq titoli b’introjtu fiss.
Minkejja l-ġbid previst sal-2027, l-orizzont tal-investiment tal-fondi li jifdal huwa pjuttost fit-tul, u b’hekk hija possibbli diversifikazzjoni addizzjonali. Sal-lum il-portafoll tal-KEFA kien relattivament ħieles minn obbligazzjonijiet materjali u ma kienx soġġett għal flussi ta’ ħruġ fuq skala li biddlu b’mod kwalitattiv l-orizzont tal-investiment jew il-volum tal-assi fil-portafoll. Din is-sitwazzjoni se tinbidel wara l-introduzzjoni ta’ pagamenti b’rabta mal-allokazzjoni annwali biex jiġi ffinanzjat il-programm ta’ riċerka. Madankollu, pagamenti prevedibbli ta’ dan id-daqs jenħtieġ li ma jkollhomx impatt materjali fuq l-orizzont tal-investiment jew fuq it-tolleranza tar-riskju tal-assi li jifdal fil-portafoll, u l-pagamenti se jsiru fuq perjodu ta’ diversi snin.
B’riżultat tal-orizzont itwal tal-investiment, il-portafoll se jkollu kapaċità ikbar biex iżomm l-assi fejn ikun meħtieġ biex jippermetti l-irkupru tal-valuri. Minħabba f’hekk qed jiġi propost li jiġi estiż l-univers tal-investiment tal-linji gwida finanzjarji għall-mitigazzjoni sa fejn possibbli tal-impatt tar-redditi baxxi jew negattivi u biex titjieb id-diversifikazzjoni u r-reżiljenza tal-portafoll waqt li tiġi segwita politika tal-investiment konservattiva li tipprovdi l-preservazzjoni tal-kapital bi grad għoli ta’ fiduċja u ttejjeb ir-redditu fejn possibbli meta dan ikun kompatibbli ma’ dan l-għan. Fuq terminu twil, l-estensjoni tal-klassijiet tal-assi eliġibbli jenħtieġ li tikkontribwixxi biex tippermetti ġestjoni stabbli u prevedibbli tal-portafoll — inklużi l-pagamenti prevedibbli li jkunu saru mill-assi u relatati mal-allokazzjoni annwali — u tnaqqas ir-rata ta’ tnaqqis tar-riżorsi sottostanti permezz tal-ħlas ta’ rati annwali.
Il-Kummissjoni tipproponi li testendi l-linji gwida finanzjarji biex twessa’ l-univers eliġibbli ta’ assi / strumenti disponibbli u l-kombinazzjonijiet possibbli ta’ esponiment għar-riskju (eż. riskji tal-imgħax u tal-kreditu u riskji limitati tas-suq tal-ekwità). Opportunitajiet ġodda ta’ investiment se jippermettu li l-portafoll ikun ġestit b’mod iktar effiċjenti (f’termini ta’ diversifikazzjoni u r-relazzjoni riskju-redditu) u, fuq perjodu medju u twil, titjib tal-perspettivi ta’ redditu.
Jenħtieġ li jiġi enfasizzat li d-diversifikazzjoni tal-portafoll tinvolvi esponiment għal sorsi ġodda ta’ volatilità tas-suq li jaf ikollhom effett fuq il-prestazzjoni matul il-perjodu qasir sa medju. Madankollu, fid-dawl tal-orizzont tal-investiment itwal ta’ parti sinifikanti tal-assi, il-portafoll tal-KEFA jinsab f’pożizzjoni tajba biex jassorbi perjodi qosra ta’ prestazzjoni insuffiċjenti fi klassi tal-assi waħda jew aktar, u jkun jista’, fuq terminu twil, igawdi l-opportunitajiet ta’ redditu superjuri, aġġustat fir-rigward tar-riskju. Jenħtieġ li jiġi mifhum ukoll li d-diversifikazzjoni mhijiex garanzija kontra prestazzjoni potenzjalment negattiva għal ċertu perjodu minħabba li l-benefiċċji tad-diversifikazzjoni jistgħu jiġu kontrobilanċjati mir-riżultati insuffiċjenti fil-klassi tal-assi prinċipali tiegħu (bonds sovrani u supranazzjonali). Dawn ir-riżervi ġenerali huma inerenti għall-immaniġġjar ta’ assi u qed jiġu rrapportati hawnhekk biex tingħata stampa bilanċjata tal-firxa ta’ eżiti possibbli. Kollox ma’ kollox, il-Kummissjoni, bħala l-amministratur responsabbli mill-fondi tal-UE, temmen li l-estensjoni tal-univers tal-investiment eliġibbli tirrappreżenta mod xieraq biex titjieb il-prestazzjoni fit-tul tal-assi investiti tal-KEFA.
Bil-ħsieb ta’ hawn fuq, il-Kummissjoni tippreżenta din il-proposta għal Deċiżjoni tal-Kunsill li temenda d-Deċiżjoni 2003/77/KE li tistabbilixxi linji gwida finanzjarji multiannwali għall-amministrazzjoni tal-assi tal-KEFA f’likwidazzjoni. L-assi għandhom jiġu amministrati f’konformità mar-regoli prudenzjali u mal-prinċipju tal-ġestjoni finanzjarja tajba u f’konformità mar-regoli u mal-proċeduri stabbiliti mill-Uffiċjal tal-Kontabbiltà tal-Kummissjoni.
Kif spjegat hawn fuq, id-Deċiżjoni tipproponi li tibdel id-Deċiżjoni li tirregola l-amministrazzjoni tal-assi tal-KEFA f’likwidazzjoni biex ikun possibbli:
·l-investiment f’firxa usa’ ta’ strumenti tas-swieq monetarji (speċjalment fondi ta’ swieq monetarji);
·l-investiment f’firxa ikbar ta’ titoli relatati mad-dejn u mal-kreditu;
·l-esponiment għas-swieq tal-ekwità u għal prodotti simili għall-ekwità (speċjalment permezz ta’ strumenti xierqa bħall-fondi negozjati fil-borża);
·li jintużaw tekniki standard ta’ investiment bħal kuntratti tal-futur fuq rati tal-imgħax biex tiġi mmaniġġjata l-maturità;
·li jiġi investit f’titoli ħħeġġjati denominati f’USD.
Id-Deċiżjoni ma tkunx timponi xi rikors awtomatiku għal dawn l-assi jew l-istrumenti. Minflok, id-Deċiżjoni tkun qiegħda sempliċiment tawtorizza lill-Kummissjoni biex twettaq tali investimenti meta l-kundizzjonijiet tas-suq ikunu propizji u meta tali investimenti jkunu konformi mal-orizzont tal-investiment tal-portafoll, b’kont meħud tal-pagamenti sal-2027 b’rabta mal-allokazzjoni annwali. Il-Kummissjoni se teżerċita prudenza u diliġenza dovuta fl-użu ta’ dawn il-possibbiltajiet ikbar ta’ investiment biex timmassimizza l-probabbiltà ta’ riżultati pożittivi. Hija se tirrapporta fuq id-deċiżjoni li tuża dawn is-setgħat fir-rapporti annwali tagħha, fejn tispjega r-raġunijiet tal-estensjoni tal-univers tal-investiment u tirrapporta dwar ir-riżultati osservati, ladarba d-data tal-prestazzjoni tkun disponibbli.
L-għażla tal-assi se tinkludi skrinjar doppju: negattiv (lista ta’ attivitajiet esklużi, għal raġunijiet etiċi jew morali, għall-finijiet ta’ investimenti tat-teżor) u pożittiv (biex tiġi favorita l-integrazzjoni ta’ kunsiderazzjonijiet pożittivi ambjentali, soċjali u ta’ governanza fl-għażla tal-investimenti). Il-karatteristiċi ambjentali, soċjali u ta’ governanza (ESG) ta’ investiment dejjem qed isiru aktar importanti u l-Kummissjoni beħsiebha tkun eżemplari f’dan il-qasam.
•Konsistenza ma’ politiki oħra tal-Unjoni
Il-proposta hija marbuta mad-Deċiżjoni 2003/76/KE li tistabbilixxi l-miżuri neċessarji għall-implimentazzjoni tal-Protokoll, anness mat-Trattat li tistabbilixxi l-Komunità, fuq il-konsegwenzi finanzjarji tad-data tal-għeluq tat-Trattat tal-KEFA u fuq il-Fond tar-Riċerka tal-Faħam u l-Azzar. Il-Kunsill reċentement iddeċieda dwar il-possibbiltà tar-riużu tal-ammonti diżimpenjati għar-riċerka 6 . Id-Deċiżjoni tal-Kunsill 2003/76/KE se tiġi emendata b’mod parallel, u tqis il-modifiki proposti tad-Deċiżjoni tal-Kunsill 2003/77/KE.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-bażi ġuridika li tagħti lill-UE d-dritt li taġixxi hija t-Trattat dwar il-Funzjonament tal-Unjoni Ewropea u l-Protokoll anness mat-Trattati tal-UE dwar il-konsegwenzi finanzjarji tal-iskadenza tat-Trattat tal-KEFA u dwar il-Fond tar-Riċerka għall-Faħam u l-Azzar, u partikolarment it-tieni paragrafu tal-Artikolu 2 tiegħu.
•Sussidjarjetà (għall-kompetenza mhux esklużiva)
Il-miżuri li jimplimentaw il-Protokoll huma stabbiliti f’deċiżjoni tal-Kunsill, li r-reviżjoni tagħha tappartjeni għad-dritt esklużiv tal-Kummissjoni ta’ inizjattiva.
•Proporzjonalità
Il-proposta fiha dispożizzjonijiet anċillari u għalhekk hija meħtieġa għall-funzjonament tal-immaniġġjar ta’ assi mwettaq mill-Kummissjoni għall-KEFA f’likwidazzjoni u sussegwentement l-assi tal-Fond ta’ Riċerka għall-Faħam u l-Azzar.
•Għażla tal-istrument
Deċiżjoni tal-Kunsill li temenda d-Deċiżjoni tal-Kunsill 2003/77/KE eżistenti hija “miżura li tistabbilixxi l-linji gwida finanzjarji pluriennali għall-immaniġġar tal-patrimonju tal-Fond ta’ Riċerka tal-faħam u l-azzar” kif prevista fil-paragrafu 2 tal-Artikolu 2 tal-Protokoll Nru 37.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Il-proposta hija bbażata fuq ir-riżultati tar-rapport ta’ kull ħames snin, li jipprevedi rieżami regolari tal-adegwatezza tal-linji gwida. Ir-rapport ta’ kull ħames snin l-aktar reċenti kien ippubblikat fit-2 ta’ Marzu 2018 (COM(2018) 84 final).
•Konsultazzjonijiet mal-partijiet ikkonċernati
Mhux applikabbli. Il-partijiet ikkonċernati prinċipali huma l-Istati Membri, li se jiġu kkonsultati waqt il-proċess leġiżlattiv fil-Kunsill.
•Ġbir u użu tal-għarfien espert
Fl-2014 il-Bank Dinji wettaq evalwazzjoni bejn il-pari tal-operazzjonijiet ta’ mmaniġġjar ta’ assi mill-Kummissjoni (inkluż il-portafoll tal-KEFA f’likwidazzjoni). Fl-abbozzar ta’ din il-proposta għal reviżjoni tqiesu r-riżultati minn din l-evalwazzjoni bejn il-pari fir-rigward tal-qafas tal-linji gwida.
Reċentement, rieżami mill-Qorti tal-Awdituri dwar il-Komunità Ewropea tal-Faħam u l-Azzar li ġie ppubblikat f’Settembru 2019 7 ikkonkluda li l-finanzjament tal-Fond ta’ Riċerka għall-Faħam u l-Azzar mhuwiex sostenibbli jekk isir biss fuq il-bażi tad-dħul mill-immaniġġjar ta’ assi fl-ambjent attwali ta’ rati tal-imgħax.
•Valutazzjoni tal-impatt
Mhijiex meħtieġa valutazzjoni tal-impatt għar-reviżjoni proposta, billi l-impatt ekonomiku, ambjentali jew soċjali mistenni x’aktarx ma jkunx sinifikanti.
•Idoneità regolatorja u simplifikazzjoni
Il-proposta hija bbażata fuq ir-riżultati tar-rapport ta’ kull ħames snin, li jipprevedi rieżami regolari tal-adegwatezza tal-linji gwida.
•Drittijiet fundamentali
Il-proposta hi konformi mal-protezzjoni tad-drittijiet fundamentali.
4.IMPLIKAZZJONIJIET BAĠITARJI
Il-proposta ma toħloqx obbligazzjonijiet ġodda li għandhom jiġġarrbu mill-baġit ġenerali skont il-qafas finanzjarju pluriennali.
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
Kif previst fil-Punt 7 tal-linji gwida finanzjarji, il-Kummissjoni qed tirrapporta dwar l-operazzjonijiet ta’ mmaniġġjar imwettqa fil-qafas ta’ dawn il-linji gwida finanzjarji lill-Istati Membri kull sitt xhur.
Barra minn hekk, kull sena jitfassal Rapport Finanzjarju li jiġi akkumpanjat mir-rapporti finanzjarji awditjati, u li jirrapporta dwar ir-riżultati tas-sena sħiħa.
Finalment, il-Kummissjoni tirrapporta kull ħames snin speċifikament fuq l-applikazzjoni tal-linji gwida finanzjarji (l-Artikolu 2).
•Dokumenti ta’ spjegazzjoni (għad-direttivi)
Mhux applikabbli
•Spjegazzjoni fid-dettall tad-dispożizzjonijiet speċifiċi tal-proposta biex tkun possibbli aktar diversifikazzjoni tal-assi eliġibbli
Il-linji gwida finanzjarji attwali jimplementaw approċċ relattivament restrittiv għad-definizzjoni ta’ assi eliġibbli. Pereżempju, dawn jirreferu għal ammonti limiti assoluti u nominali (pereżempju massimu ta’ EUR 250 miljun għal kull Stat Membru tal-UE), klassifikazzjoni tal-kreditu (pereżempju minimu ta’ klassifikazzjoni tal-kreditu ta’ AA, ħlief għal Stati Membri tal-UE u għall-Istituzzjonijiet tal-UE) jew maturità massima (pereżempju jifdal massimu ta’ 10,5 snin max-xiri).
Dawn ir-restrizzjonijiet jeliminaw porzjonijiet kbar tas-swieq finanzjarji.
Pereżempju,
·ir-restrizzjonijiet tal-klassifikazzjoni jeskludu kważi kompletament is-suq tal-bonds korporattivi u finanzjarji, li jistgħu joffru diversifikazzjoni u redditi ogħla u li jistgħu jimmitigaw l-impatt tar-rati negattivi 8 fl-ambjent attwali;
·kunsiderazzjonijiet simili jirriżultaw fir-rigward tar-restrizzjonijiet tal-maturità, li jipprevjenu investimenti f’bonds b’dati itwal li jistgħu joffru benefiċċji simili 9 . Il-modifika ta’ dawn ir-restrizzjonijiet tippermetti allokazzjonijiet diversifikati tal-assi b’redditi ogħla mistennija għall-portafoll, filwaqt li r-riskju kumplessiv tal-portafoll jinżamm f’livelli simili ta’ kif jinsab fil-preżent bis-saħħa tal-effetti ta’ korrelazzjoni favorevoli.
Wara l-kriżi finanzjarja tal-2008, il-kundizzjonijiet tas-suq għall-maniġers tal-assi bi dħul fiss saru aktar diffiċli minħabba l-ambjent ta’ rati tal-imgħax baxxi u spiss negattivi li beda jipprevali, speċjalment għall-investimenti b’riskju ta’ kreditu baxx. F’dan il-kuntest huwa diffiċli ħafna għall-maniġers tal-assi ta’ dħul fiss li jiġġeneraw prestazzjoni pożittiva, speċjalment fl-orizzonti tal-investiment fuq perjodu medju / twil. Fl-2020 is-sitwazzjoni kompliet tiddeterjora minħabba l-kriżi tal-coronavirus, li jaf testendi l-ambjent tar-rati baxxi / negattivi aktar fil-futur.
Sabiex jiġu limitati l-konsegwenzi negattivi ta’ dawn il-fatturi, huwa importanti li l-maniġers tal-assi jkollhom aċċess għall-aktar univers tal-investiment wiesa’ possibbli. B’dan il-mod il-maniġers tal-assi jistgħu jtejbu d-diversifikazzjoni u jibbenefikaw minn klassijiet tal-assi b’mudelli ta’ redditu differenti u inqas korrelazzjonijiet. Għall-orizzonti tal-investiment twal, portafolli diversifikati ħafna x’aktarx ikollhom prestazzjoni aħjar mill-portafolli inqas diversifikati, b’livelli ta’ riskju simili.
Għaldaqstant qed jiġi propost li l-linji gwida finanzjarji attwali jinbidlu b’dawn il-modi li ġejjin.
A. Naġġustaw ir-restrizzjonijiet assoluti fuq il-limiti, il-gradazzjonijiet u l-maturità
Huwa propost li jiġi adottat approċċ iktar dinamiku fir-rigward tal-aspetti tekniċi ta’ implimentazzjoni li jridu iżjed flessibilità (bħalma huma d-determinazzjoni tal-limiti tar-riskju, il-maturità u l-konċentrazzjoni).
Dan l-approċċ, li jippermetti kalibrar aktar regolari skont l-evoluzzjoni tal-kundizzjonijiet tas-suq, jibni fuq il-linji gwida adottati reċentement mill-Kummissjoni għall-Fond ta’ Proviżjonament Komuni 10 , wieħed mill-portafolli ewlenin l-oħra mmaniġġjati mill-Kummissjoni. L-assi għandhom jiġu mmaniġġjati fuq il-bażi ta’ strateġija tal-investiment li tkun espressa fil-forma ta’ allokazzjoni strateġika tal-assi, li tirrifletti l-objettivi tal-investiment u t-tolleranza tar-riskju. L-istrateġija tal-investiment għandha tkun riflessa f’parametru referenzjarju strateġiku. Il-parametru referenzjarju għandu jiġi stabbilit f’konformità mal-prattiki tal-industrija.
It-tolleranza tar-riskju tista’ wkoll tkun definita f’termini usa’ (pereżempju billi jkunu elenkati l-kategoriji tal-assi eliġibbli u l-parametri speċifiċi tar-riskju bħall-valur fir-riskju). Il-limiti jistgħu jiġu espressi f’termini tas-suq iktar milli ta’ valur nozzjonali u definiti bħala skoperturi ta’ persentaġġ tal-portafoll totali skont il-valur tas-suq. Dan jiddefinixxi b’mod iktar preċiż l-iskoperturi, għaliex minħabba l-ambjent ta’ rendiment baxx jew negattiv ħafna titoli jiġu pprezzati ħafna ogħla mill-valur ta’ parità (100 %) u l-valuri nominali jistgħu ma jkunux għadhom jirriflettu l-valur ekonomiku reali ta’ tali skoperturi. Raġuni oħra għaliex approċċ ta’ limitu bbażat fuq il-persentaġġ għall-valur tas-suq sar iktar relevanti hija f’każ ta’ tibdil fil-valur tas-suq tal-portafoll totali, jew minħabba valwazzjoni tas-suq jew ikkawżata minn flussi ta’ dħul jew ta’ ħruġ.
Il-limiti ta’ konċentrazzjoni jistgħu jiġu rfinati biex jippermettu d-differenzjazzjoni bejn skoperturi ta’ kreditu aktar sikuri u dawk aktar riskjużi, pereżempju billi skoperturi akbar ikunu possibbli biss għal emittenti tal-ogħla kwalità (ta’ grad għoli 11 ).
Huwa propost li l-istrumenti eliġibbli jiġu ddefiniti fil-linji gwida tal-immaniġġar ta’ assi filwaqt li l-parametru referenzjarju u l-limiti speċifiċi tal-investiment jiġu ddefiniti fid-dokumenti interni tal-Kummissjoni Ewropea.
B. Nippermettu investimenti f’muniti oħra
Attwalment, il-Linji Gwida Finanzjarji ma jgħidu xejn dwar l-eliġibbiltà ta’ investimenti f’munita barranija. F’dan il-kuntest ta’ min jinnota li investimenti denominati f’euro jirrappreżentaw biss madwar 25 % tas-suq dinji tal-bonds.
Għalhekk qed jiġi propost li jkunu permessi espliċitament investimenti f’titoli ħħeġġjati denominati f’USD, maħruġa minn entitajiet sovrani, supranazzjonali, sottosovrani u aġenziji.
B’mod partikolari, l-investiment (parzjali) f’bonds b’likwidità għolja denominati f’dollari Amerikani maħruġa minn tali entitajiet jippermetti aċċess għal swieq likwidi u kbar, bħas-suq tad-dejn tal-gvern tal-Istati Uniti. Dan jista’ jkun utli minħabba restrizzjonijiet tal-likwidità msemmija hawn fuq fis-swieq ta’ bonds tal-euro. Barra minn hekk, dan ikun jippermetti li jinkisbu skoperturi b’kurva tar-rendiment differenti, possibbilment b’aktar opportunitajiet ta’ carry / roll down.
Ir-riskju tat-telf minħabba l-flutwazzjoni tar-rata tal-kambju jista’ jiġi ħħeġġjat. Jeżistu strumenti għall-iħħeġġjar tar-riskju tal-munita, iżda l-Linji Gwida Finanzjarji attwali ma jgħidu xejn dwar din it-tip ta’ operazzjoni. Il-Kummissjoni tista’ tiddeċiedi, bil-qbil tal-Uffiċċjal tal-Kontabbiltà, li l-investimenti ħħeġġjati f’muniti oħra (għajr USD) jistgħu jsiru espliċitament eliġibbli skont il-kriterji stabbiliti fl-Anness tad-Deċiżjoni. L-użu attwali ta’ dawn l-istrumenti jkollu ambitu limitat u jkun iqis il-kostijiet rilevanti u l-kundizzjonijiet tas-suq prevalenti.
C. Inwessgħu l-ambitu ta’ veikoli ta’ investiment kollettiv
Fl-2014, twettqet evalwazzjoni tal-attivitajiet tat-teżor u tal-immaniġġjar tal-assi tal-Kummissjoni minn tim ta’ speċjalisti mill-Bank Dinji. Il-Bank Dinji rrieżamina fid-dettall il-proċessi użati mill-Kummissjoni, u kkonkluda li l-Kummissjoni tilħaq l-objettivi tagħha fl-immaniġġjar tal-portafolli taħt ir-responsabbiltà tagħha, f’konformità ma’ standards b’saħħithom tal-industrija. Il-Bank Dinji ppropona wkoll xi rakkomandazzjonijiet biex jittejbu iktar il-proċess ta’ investiment u r-redditi.
B’mod partikolari, għal fondi fuq terminu twil, il-Bank Dinji ssuġġerixxa li ċertu persentaġġ minn dawn il-fondi jiġi investit f’parteċipazzjonijiet fil-kapital, possibbilment permezz ta’ fondi ta’ investiment kollettiv. Dawn l-istrumenti, jekk magħżula bir-reqqa, jippermettu l-ksib ta’ skopertura tal-ekwità diversifikata sew. Minħabba li l-ekwitajiet għandhom korrelazzjoni relattivament iktar baxxa ma’ investimenti bi dħul fiss, dawn itejbu l-profil tar-riskju / redditu tal-portafoll fuq perjodu twil. Min-naħa l-oħra, l-allokazzjonijiet għal ekwitajiet jistgħu jżidu l-volatilità tar-redditi tal-portafoll fuq perjodu ta’ żmien qasir sa medju.
Il-veikoli ta’ investiment kollettiv huma diġà msemmija fil-linji gwida attwali, iżda huma assoċjati ma’ rekwiżit ta’ klassifikazzjoni tal-kreditu ta’ mhux anqas minn AA li de facto l-iktar jimplika biss veikoli kollettivi bi dħul fiss fuq terminu qasir, bl-esklużjoni tal-maġġoranza tal-fondi ta’ dħul fiss u ta’ ekwità li ma għandhomx klassifikazzjoni tal-kreditu.
Għalhekk huwa propost li jiġi ċċarat l-ambitu tal-klassijiet tal-assi eliġibbli u tal-veikoli ta’ investiment kollettiv biex ikunu possibbli investimenti fl-ekwità u investimenti usa’ bi dħul fiss, anki f’dawk il-veikoli diversifikati sew.
Fil-qosor, huwa propost li bosta tipi tal-veikoli ta’ investiment kollettiv isiru eliġibbli (pereżempju fondi tas-suq monetarju, fondi negozjati fil-borża jew fondi mutwi). Sa livelli varji, dawn jistgħu joffru skopertura diversifikata għal indiċijiet wiesgħa tas-suq, ċerti setturi ġeografiċi partikolari u / jew klassijiet ta’ assi partikolari bħal introjtu fiss u / jew ekwitajiet.
D. Nippermettu li strumenti għall-iħħeġġjar oħra jimmaniġġjaw ir-riskju taċ-ċaqliq fir-rata tal-imgħax
Id-derivattivi tar-rati tal-imgħax jirrappreżentaw għodda biex ikun immaniġġjat b’mod effiċjenti r-riskju tar-rata tal-imgħax u llum il-ġurnata spiss jintużaw minn istituzzjonijiet finanzjarji pubbliċi. Tipikament, dawn is-swieq ikunu wkoll likwidi — pereżempju, matul il-kriżi finanzjarja, is-suq tal-futuri baqa’ likwidu ħafna, b’kuntrast mas-suq tal-kontanti tal-bonds tal-gvern. L-użu ta’ dawn l-istrumenti jkun inkwadrat bi proċeduri tar-riskju u sistemi tal-IT robusti biex jiġu mmonitorjati u mmaniġġjati l-flussi ta’ ħidma operazzjonali relatati u r-riskju intrinsiku ta’ dan is-suq.
Kif spjegat hawn fuq, id-Deċiżjoni ma tkunx timponi xi rikors awtomatiku għal dawk l-assi jew l-istrumenti. Minflok, id-Deċiżjoni tkun qiegħda sempliċement tawtorizza lill-Kummissjoni biex twettaq tali investimenti meta l-kundizzjonijiet tas-suq ikunu propizji. Il-Kummissjoni se teżerċita prudenza u diliġenza dovuta fl-użu ta’ dawn is-setgħat ikbar ta’ investiment biex timmassimizza l-probabbiltà ta’ riżultati pożittivi. Hija se tirrapporta fuq id-deċiżjoni li tuża dawn is-setgħat fir-rapporti annwali tagħha, fejn tispjega r-raġunijiet tal-estensjoni tal-univers tal-investiment u tirrapporta dwar ir-riżultati osservati, ladarba d-data tal-prestazzjoni tkun disponibbli.
E. Integrazzjoni tal-kriterji ambjentali, soċjali u ta’ governanza
Hekk kif il-karatteristiċi ambjentali, soċjali u ta’ governanza (ESG) ta’ investiment dejjem qed isiru aktar importanti u l-Kummissjoni trid tkun eżemplari f’dan il-qasam, id-Deċiżjoni tkun qed tenfasizza l-importanza tagħhom fil-proċess tal-għażla tal-assi. Din tkun tinkludi skrinjar doppju: pożittiv (biex tiġi favorita l-integrazzjoni ta’ kunsiderazzjonijiet pożittivi ambjentali, soċjali u ta’ governanza fl-għażla tal-investimenti) u negattiv (lista ta’ attivitajiet esklużi, għal raġunijiet etiċi jew morali, għall-finijiet ta’ investimenti tat-teżor).
2020/0143 (NLE)
Proposta għal
DEĊIŻJONI TAL-KUNSILL
li temenda d-Deċiżjoni 2003/77/KE li tistabbilixxi linji gwida finanzjarji multiannwali għall-amministrazzjoni tal-assi tal-KEFA f’likwidazzjoni u, mat-twettiq tal-likwidazzjoni, l-Assi tal-Fond ta’ Riċerka għall-Faħam u l-Azzar
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra l-Protokoll Nru 37 dwar il-konsegwenzi finanzjarji tal-iskadenza tat-Trattat tal-KEFA u dwar il-Fond tar-Riċerka għall-Faħam u l-Azzar, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea 12 , u b’mod partikolari t-tieni paragrafu tal-Artikolu 2 tiegħu,
Wara li kkunsidra l-proposta tal-Kummissjoni Ewropea,
Wara li kkunsidra l-opinjoni tal-Parlament Ewropew 13 ,
Billi:
(1)Sabiex tkun newtrali għall-klima sal-2050, l-Unjoni Ewropea teħtieġ “klima u riżorsi minn ta’ quddiem” biex tiżviluppa l-ewwel applikazzjonijiet kummerċjali ta’ teknoloġiji rivoluzzjonarji f’setturi industrijali ewlenin sal-2030, u proċess ta’ produzzjoni tal-azzar bi (kważi) żero emissjonijiet ta’ karbonju sal-2030.
(2)Skont id-Deċiżjoni tal-Kunsill 2003/76/KE 14 , il-Kummissjoni għandha tamministra l-assi tal-Komunità Ewropea tal-Faħam u l-Azzar (KEFA) f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar b’tali mod li tiżgura redditu fit-tul. Id-Deċiżjoni tal-Kunsill 2003/77/KE 15 tistabbilixxi l-linji gwida finanzjarji multiannwali għall-amministrazzjoni ta’ dawn l-assi. Skont l-Artikolu 2 tad-Deċiżjoni 2003/77/KE, il-Kummissjoni għandha tirrieżamina jew tissupplimenta dawk il-linji gwida u terġa’ tivvaluta l-operat u l-effikaċja tagħhom.
(3)Sabiex jiġi pprovdut appoġġ sinifikanti għal proġetti ta’ riċerka kollaborattiva siewja li jkollhom il-massa kritika u l-valur miżjud tal-Unjoni biex itejbu s-sostenibbiltà, il-kompetittività, is-saħħa u l-kundizzjonijiet tax-xogħol fis-setturi relatati mal-industrija tal-faħam u tal-azzar, jeħtieġ li jiġi żgurat li jiġu pprovduti l-pagamenti relatati mal-allokazzjoni annwali definita u stabbilita fl-[Artikolu 2 tad-]Deċiżjoni 2003/76/KE sal-2027 biex jiġu ffinanzjati dawn il-proġetti. Jenħtieġ li dawn il-pagamenti jiġu ffinanzjati mid-dħul nett mill-investimenti u mir-rikavati ġġenerati mill-bejgħ ta’ parti mill-assi sal-ammont annwali stabbilit mis-servizz deżinjat tal-Kummissjoni fuq il-bażi tad-Deċiżjoni 2003/76/KE u d-Deċiżjoni 2008/376/KE.
(4)L-esperjenza miksuba fil-perjodu ta’ ħames snin l-aktar reċenti tal-implimentazzjoni tal-linji gwida finanzjarji (2012–2017) u l-iżviluppi fil-kundizzjonijiet tas-swieq finanzjarji juru l-ħtieġa li dawn il-linji gwida jiġu adattati.
(5)Jenħtieġ li l-assi li jifdal wara l-ġbid sal-2027 b’rabta mal-allokazzjoni annwali stabbilita bid-Deċiżjoni 2003/76/KE jiġu amministrati fuq il-bażi ta’ orizzont tal-investiment fit-tul, li jippermetti aktar diversifikazzjoni.
(6)Bħala medja, l-investiment ta’ parti kbira tal-assi għal perjodu twil huwa konsistenti mal-istennija ta’ redditi ogħla, b’kont meħud tal-possibbiltajiet ta’ fluttwazzjonijiet miżjuda fuq perjodu ta’ żmien qasir. Minkejja dan, jenħtieġ li l-investimenti jimmiraw li jiżguraw ammont suffiċjenti ta’ assi likwidi għall-pagamenti annwali mitluba mis-servizz deżinjat tal-Kummissjoni fuq il-bażi tad-Deċiżjoni 2003/76/KE u tad-Deċiżjoni 2008/376/KE.
(7)Il-linji gwida finanzjarji jenħtieġ li jippermettu approċċ aktar flessibbli fir-rigward tal-aspetti tekniċi tal-implimentazzjoni u jenħtieġ li jiddeterminaw strumenti tal-investiment xierqa biex jiksbu l-objettivi tal-investiment.
(8)Jenħtieġ li kull klassi tal-assi ma titqiesx waħedha, iżda bir-rwol tagħha f’portafoll diversifikat. Storikament, id-diversifikazzjoni bejn il-klassijiet tal-assi twassal għal iżjed redditi bl-istess livell ta’ riskju. Il-korrelazzjoni bejn l-assi hija importanti fit-teħid ta’ deċiżjonijiet b’rabta mal-allokazzjoni tal-assi fil-kuntest tar-riskju ta’ investiment ġenerali u r-redditu.
(9)L-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar jenħtieġ li jiġu amministrati fuq il-bażi ta’ strateġija tal-investiment li jenħtieġ li tkun espressa fil-forma ta’ allokazzjoni strateġika tal-assi / parametru referenzjarju, b’riflessjoni tal-objettivi tal-investiment u t-tolleranza tar-riskju tal-assi. Il-parametru referenzjarju jipprovdi gwida għall-investiment ta’ terminu twil lill-maniġers tal-portafolli, fil-forma ta’ allokazzjonijiet lil klassijiet tal-assi differenti.
(10)Il-linji gwida finanzjarji jenħtieġ li jippermettu investimenti f’bonds likwidi ħafna denominati f’dollari Amerikani, maħruġa minn entitajiet sovrani, supranazzjonali, sottosovrani u aġenziji tal-gvern, biex itejbu d-diversifikazzjoni, filwaqt li jiġu ħħeġġjati — bi grad xieraq — ir-riskji tat-telf minħabba l-flutwazzjoni tar-rata tal-kambju. Jenħtieġ li l-Kummissjoni tkun tista’ tiddeċiedi, bi qbil mal-Uffiċċjal tal-Kontabbiltà tal-Kummissjoni, dwar investimenti f’assi oħra li huma denominati f’muniti ta’ ekonomiji avvanzati oħra u / jew ta’ Stati Membri oħra. Jenħtieġ li dawn id-deċiżjonijiet ikunu bbażati fuq dimostrazzjoni sostanzjata b’mod sħiħ tal-vantaġġi tal-investiment inkwistjoni għall-prestazzjoni tal-assi. Jenħtieġ li l-linji gwida finanzjarji jwessgħu l-ambitu tal-investimenti eliġibbli biex joffru l-possibbiltà ta’ skopertura diversifikata għal indiċijiet wiesgħa tas-suq, ċerti setturi ġeografiċi u klassijiet tal-assi partikolari.
(11)Jenħtieġ li l-linji gwida finanzjarji jippermettu strumenti finanzjarji oħra, bħal kuntratti tal-futuri, kuntratti forward u swaps biex jiġu ġestiti r-riskji u l-iskoperturi bħar-riskju tar-rata tal-imgħax u tal-kambju.
(12)Il-karatteristiċi ambjentali, soċjali u ta’ governanza (ESG) ta’ investiment dejjem qed isiru aktar importanti u jenħtieġ li jitqiesu fid-deċiżjonijiet tal-investiment. Jenħtieġ li d-Deċiżjoni 2003/77/KE tiġi emendata wkoll biex jiġu introdotti l-karatteristiċi ESG bl-inklużjoni ta’ skrinjar pożittiv li jiffavorixxi l-integrazzjoni ta’ kunsiderazzjonijiet ambjentali, soċjali u ta’ governanza fl-għażla tal-investimenti, u skrinjar negattiv li fih lista ta’ attivitajiet esklużi, għal raġunijiet etiċi jew morali, għall-finijiet ta’ investimenti tat-teżor.
(13)Jenħtieġ li r-rapport annwali tal-Kummissjoni lill-Istati Membri dwar l-operazzjonijiet ta’ mmaniġġjar imwettqa fil-qafas tal-linji gwida finanzjarji, ikun jipprovdi informazzjoni dwar l-allokazzjoni fil-klassijiet tal-assi differenti. Jenħtieġ li r-rapport annwali jispjega kwalunkwe bidla kbira fl-allokazzjoni strateġika tal-assi.
(14)Għalhekk, jenħtieġ li d-Deċiżjoni 2003/77/KE tiġi emendata skont dan.
(15)Fid-dawl tal-konnessjoni strutturali mad-Deċiżjoni 2003/76/KE, din l-emenda jenħtieġ li tapplika biss mid-data li fiha tibda tapplika d-Deċiżjoni [XXXX/XX] li temenda d-Deċiżjoni 2003/76/KE li tistabbilixxi l-miżuri neċessarji għall-implimentazzjoni tal-Protokoll, anness mat-Trattat li tistabbilixxi l-Komunità, fuq il-konsegwenzi finanzjarji tad-data tal-għeluq tat-Trattat tal-KEFA u fuq il-Fond tar-Riċerka tal-Faħam u l-Azzar 16 . B’kont meħud tal-Artikolu 145 tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika 17 , ikun xieraq li din l-emenda tapplika biss mill-1 ta’ Jannar 2021,
ADOTTA DIN ID-DEĊIŻJONI:
Artikolu 1
Id-Deċiżjoni 2003/77/KE hija emendata kif ġej:
(1)jiddaħħal l-Artikolu 1a li ġej:
“Artikolu 1a
L-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar għandhom ikunu amministrati biex jipprovdu pagamenti annwali fil-limiti tal-allokazzjoni annwali ta’ EUR [111-il miljun] għall-finanzjament ta’ riċerka kollaborattiva fis-setturi relatati mal-industrija tal-faħam u tal-azzar. Il-pagamenti annwali għandhom jiġu ffinanzjati mid-dħul nett mill-investimenti u mir-rikavati ġġenerati mill-bejgħ ta’ parti mill-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar, sal-ammont annwali stabbilit mis-servizz deżinjat tal-Kummissjoni fuq il-bażi tad-Deċiżjoni 2003/76/KE u d-Deċiżjoni 2008/376/KE.”;
(2)L-Anness huwa sostitwit bit-test fl-Anness ta’ din id-Deċiżjoni.
L-Artikolu 2
Din id-Deċiżjoni għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Hi għandha tapplika mid-data li fiha tibda tapplika d-Deċiżjoni [XXXX/XX] li temenda d-Deċiżjoni 2003/76/KE li tistabbilixxi l-miżuri neċessarji għall-implimentazzjoni tal-Protokoll, anness mat-Trattat li tistabbilixxi l-Komunità, fuq il-konsegwenzi finanzjarji tad-data tal-għeluq tat-Trattat tal-KEFA u fuq il-Fond tar-Riċerka tal-Faħam u l-Azzar 18 , jew mill-1 ta’ Jannar 2021, skont liema data tkun l-iżjed tard.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 16.7.2020
COM(2020) 321 final
ANNESS
tad-
DEĊIŻJONI TAL-KUNSILL
li temenda d-Deċiżjoni 2003/77/KE li tistabbilixxi linji gwida finanzjarji multiannwali għall-amministrazzjoni tal-assi tal-KEFA f’likwidazzjoni u, mat-twettiq tal-likwidazzjoni, l-Assi tal-Fond ta’ Riċerka għall-Faħam u l-Azzar
ANNESS
Linji gwida finanzjarji multiannwali għall-amministrazzjoni tal-assi tal-KEFA f’likwidazzjoni u, mat-twettiq tal-likwidazzjoni, l-Assi tal-Fond ta’ Riċerka għall-Faħam u l-Azzar
1.UŻU TAL-FONDI
L-assi tal-KEFA f’likwidazzjoni, inklużi kemm il-portafoll ta’ self tagħha u l-investimenti tagħha, għandhom jintużaw kif meħtieġ biex jiġu ssodisfati l-obbligazzjonijiet li jifdal tal-KEFA, f’termini ta’ self pendenti, tal-impenji tagħha li jirriżultaw mill-baġits operattivi preċedenti, u kull obbligazzjoni li ma hijiex prevista.
Sal-limitu li l-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar ma jkunux meħtieġa sabiex jiġu ssodisfati l-obbligazzjonijiet kif deskritti fl-ewwel subparagrafu, dawk l-assi għandhom jiġu investiti b’mod prudenti f’konformità mal-orizzont tal-investiment magħżul biex jinkisbu redditi li jistgħu jintużaw biex tkompli tiġi ffinanzjata r-riċerka fis-setturi relatati mal-industrija tal-faħam u tal-azzar.
L-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar għandhom jintużaw biex jipprovdu pagamenti annwali fil-limiti tal-allokazzjoni annwali ta’ EUR [111-il miljun] għar-riċerka fis-setturi relatati mal-industrija tal-faħam u tal-azzar. Dawk il-pagamenti għandhom jiġu ġġenerati mid-dħul nett mill-investimenti. Fejn dak id-dħul nett ikun insuffiċjenti biex tiġi onorata l-allokazzjoni annwali, dan għandu jiġu ssupplimentat bir-rikavati ġġenerati mill-bejgħ ta’ parti mill-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar. Wara l-2027, l-Assi tal-Fond ta’ Riċerka għall-Faħam u l-Azzar għandhom jiġu investiti b’tali mod li jipprovdu dħul li jista’ jintuża biex tiġi ffinanzjata l-kontinwazzjoni tar-riċerka fis-setturi relatati mal-industrija tal-faħam u tal-azzar.
2.ORIZZONT TAL-INVESTIMENT, OBJETTIV U TOLLERANZA TAR-RISKJU
L-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar, għandhom jiġu investiti bl-objettiv li jiġi ppreservat u, fejn possibbli, jittejjeb il-valur ta’ dawk l-assi (l-“objettiv tal-investiment”). L-objettiv tal-investiment għandu jiġi segwit matul l-orizzont tal-investiment, u jitwassal b’livell ta’ affidabbiltà għoli.
L-assi għandhom jiġu amministrati f’konformità mar-regoli prudenzjali u mal-prinċipju tal-ġestjoni finanzjarja tajba u f’konformità mar-regoli u mal-proċeduri stabbiliti mill-Uffiċjal tal-Kontabbiltà tal-Kummissjoni.
L-objettiv tal-investiment għandu jkun moqdi permezz tal-implimentazzjoni ta’ strateġija tal-investiment prudenti fuq il-bażi ta’ grad għoli ta’ diversifikazzjoni fost il-klassijiet tal-assi eliġibbli, żoni ġeografiċi, emittenti u maturitajiet (l-“istrateġija tal-investiment”). L-istrateġija tal-investiment għandha tiġi stipulata billi jitqies l-orizzont tal-investiment u b’mod li jiġi żgurat li l-fondi neċessarji jkunu disponibbli f’forma likwida biżżejjed kif u meta meħtieġ.
L-istrateġija tal-investiment għandha tiġi espressa fil-forma ta’ allokazzjoni strateġika tal-assi, li għandha tistabbilixxi l-allokazzjonijiet indikattivi fil-mira għal kategoriji differenti ta’ assi finanzjarji eliġibbli.
Il-Kummissjoni għandha tirrifletti l-allokazzjoni strateġika tal-assi f’parametru referenzjarju strateġiku (il-“parametru referenzjarju”), li miegħu għandha titqabbel il-prestazzjoni tal-assi tal-KEFA f’likwidazzjoni u, mat-twettiq tal-likwidazzjoni, tal-assi tal-Fond ta’ Riċerka għall-Faħam u l-Azzar.
L-istrateġija tal-investiment u l-parametru referenzjarju għandhom jiġu proposti mill-Kummissjoni u maqbula mal-Uffiċjal tal-Kontabbiltà tal-Kummissjoni, wara konsultazzjoni mal-uffiċjali awtorizzanti b’delega tal-Kummissjoni.
L-istrateġija tal-investiment u l-parametru referenzjarju jistgħu jiġu mmodifikati mill-Kummissjoni f’każ ta’ bidla debitament ddokumentata u motivata fil-kundizzjonijiet ekonomiċi, bidla sostanzjali fil-ħtiġijiet u fis-sitwazzjoni tal-istrumenti ta’ kontribuzzjoni jew ta’ bidla sinifikanti fl-istimi tal-flussi tad-dħul / tal-ħruġ. Il-proċedura għal modifika tal-istrateġija ta’ investiment għandha tkun l-istess bħal dik għall-adozzjoni inizjali tagħha.
L-istrateġija tal-investiment għandha tiġi stabbilita filwaqt li jitqies l-orizzont tal-investiment u t-tolleranza tar-riskju tal-assi tal-KEFA f’likwidazzjoni u, mat-twettiq tal-likwidazzjoni, tal-assi tal-Fond ta’ Riċerka għall-Faħam u l-Azzar.
3.PRINĊIPJI TAL-ALLOKAZZJONI TAL-ASSI U INVESTIMENTI ELIĠIBBLI
Għandha tiġi żgurata diversifikazzjoni suffiċjenti fost il-klassijiet tal-assi kollha biex jonqsu r-riskji ta’ investiment. Fil-prinċipju, aktar ma assi jkun riskjuż u / jew inqas ma jkun likwidu, jenħtieġ li inqas tkun ikkonċentrata l-iskopertura.
L-iskopertura għall-klassijiet tal-assi differenti tista’ tinkiseb ukoll permezz ta’ investimenti f’impriżi ta’ investiment kollettiv jew fi prodotti negozjati fil-borża.
L-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar għandhom ikunu investiti biss fil-prodotti li ġejjin:
(a) assi tas-suq monetarju ddenominati f’euro;
(b) titoli b’introjtu fiss, u;
(c) investimenti kollettivi regolati f’dejn u ekwità.
L-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar għandhom jiksbu skopertura għall-klassijiet tal-assi msemmija fis-subparagrafu preċedenti permezz ta’ investiment fl-istrumenti li ġejjin jew b’involviment fl-operazzjonijiet li ġejjin:
(a) depożiti;
(b) strumenti tas-suq monetarju u fondi tas-suq monetarju li joffru likwidità ta’ kuljum, regolati bir-Regolament (UE) 2017/1131 tal-Parlament Ewropew u tal-Kunsill 1 ;
(c) strumenti ta’ dejn, bħal bonds, kambjali tat-teżor u obbligazzjonijiet, u strumenti titolizzati skont il-kriterji Sempliċi, Trasparenti u Standardizzati (STS) stabbiliti fir-Regolament (UE) 2017/2402 tal-Parlament Ewropew u tal-Kunsill 2 ;
(d) impriżi ta’ investiment kollettiv koperti mid-Direttiva 2009/65/KE tal-Parlament Ewropew u tal-Kunsill 3 li jinkludu fondi negozjati fil-borża li jinvestu f’ekwità jew fi strumenti ta’ dejn fejn it-telf massimu ma jistax jaqbeż l-ammonti investiti;
(e) ftehimiet ta’ riakkwist f’konformità mal-prinċipji stabbiliti fl-Artikolu 212(2) tar-Regolament Finanzjarju 4 ;
(f) ftehimiet ta’ riakkwist invers;
(g) operazzjonijiet ta’ self ta’ titoli b’sistemi tal-ikklirjar rikonoxxuti bħal Clearstream u Euroclear, jew ma’ istituzzjonijiet finanzjarji ewlenin li jispeċjalizzaw f’dawn it-tip ta’ operazzjonijiet.
Derivattivi, fil-forma ta’ kuntratti forward u tal-futuri u swaps, għandhom jintużaw biss għall-finijiet ta’ mmaniġġjar effiċjenti tal-portafoll u mhux għal skopijiet ta’ spekulazzjoni jew ingranaġġ ta’ pożizzjonijiet. Dawn id-derivattivi jistgħu jintużaw għall-aġġustament tad-durata, għall-mitigazzjoni tar-riskju ta’ kreditu jew ta’ riskji rilevanti oħra jew għal bidliet fl-allokazzjoni tal-assi b’mod konsistenti mal-politika ta’ investiment.
L-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar jistgħu jiġu investiti f’bonds likwidi ħafna denominati f’dollari Amerikani maħruġa minn entitajiet sovrani u supranazzjonali unikament għall-finijiet ta’ diversifikazzjoni u skopertura għal kurva ta’ rata tal-imgħax oħra. Kwalunkwe riskju tal-kambju għandu jiġi ħħeġġjat billi jintużaw kif xieraq swaps jew strumenti oħra għal iħħeġġjar tas-suq tal-muniti barranin, kif speċifikat fis-subparagrafu preċedenti.
Il-Kummissjoni tista’, bil-qbil tal-Uffiċjal tal-Kontabbiltà, tkabbar il-kamp ta’ applikazzjoni tal-investimenti eliġibbli biex tinkludi klassijiet tal-assi u operazzjonijiet tal-investiment oħra konsistenti mal-istrateġija u mal-objettivi tal-investiment, kif ukoll muniti ta’ ekonomiji avvanzati oħra, kif elenkati minn żmien għal żmien mill-Fond Monetarju Internazzjonali u soġġetti għall-iħħeġġjar tar-riskju tal-kambju. Kull deċiżjoni dwar l-inklużjoni ta’ klassijiet tal-assi, operazzjonijiet tal-investiment jew muniti ta’ ekonomiji avvanzati ġodda għandha tkun sostnuta minn ġustifikazzjoni sostanzjata għal kull klassi tal-assi, operazzjoni jew munita, dwar kif it-tkabbir tal-possibbiltajiet tal-investiment se jtejjeb il-prestazzjoni tar-riskju / redditu tal-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar. Din il-ġustifikazzjoni għandha tinkludi valutazzjoni tal-kapaċitajiet operazzjonali meħtieġa biex jiġu appoġġati dawn il-possibbiltajiet ġodda ta’ investiment.
4.KUNSIDERAZZJONIJIET AMBJENTALI, SOĊJALI, TA’ GOVERNANZA U MORALI
Għandhom japplikaw il-kriterji ambjentali, soċjali u ta’ governanza li ġejjin:
(a) l-investimenti tal-assi tal-KEFA f’likwidazzjoni u, mat-twettiq tal-likwidazzjoni, tal-assi tal-Fond ta’ Riċerka għall-Faħam u l-Azzar għandhom jiġu implimentati skont l-objettiv ta’ politika tal-Unjoni li trawwem il-finanzjament sostenibbli u l-ġustizzja soċjali sa fejn ikun konsistenti mal-preservazzjoni tal-kapital tal-assi;
(b) l-implimentazzjoni tal-politika tal-investiment għandha tikkonforma mal-leġiżlazzjoni rilevanti kollha li tippromwovi l-istrumenti finanzjarji ambjentali, soċjali u ta’ governanza (ESG) u għandha tirrispetta l-istandards, is-sistemi, il-kriterji u l-proċessi rilevanti stabbiliti fil-qafas regolatorju tal-Unjoni;
(c) il-Kummissjoni tista’ tikkonsulta lill-Grupp ta’ Esperti Tekniċi tal-UE dwar il-Finanzjament Sostenibbli, jew is-suċċessur tiegħu, dwar l-implimentazzjoni tal-fatturi ESG fl-istrateġija tal-investiment għall-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar.
(d) il-Kummissjoni għandha timmonitorja l-profil ESG tal-assi tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar, u tirrapporta dwaru fir-rapport annwali msemmi fil-punt 7 (Proċeduri ta’ Ġestjoni).
Minħabba raġunijiet etiċi jew morali huma esklużi l-investimenti fl-attivitajiet li jidhru fil-lista li ġejja:
(a) investimenti f’titoli maħruġa minn entitajiet li, skont l-informazzjoni li jkollha l-Kummissjoni, ikunu nstabu, skont sentenza finali jew deċiżjoni amministrattiva finali, li huma involuti f’xi waħda mill-attivitajiet li ġejjin:
(i). attivitajiet meqjusa bħala illegali jew ipprojbiti minħabba raġunijiet etiċi jew morali fil-qafas regolatorju tal-Unjoni u skont il-konvenzjonijiet u l-ftehimiet internazzjonali;
(ii). attivitajiet relatati mal-iżvilupp, mal-produzzjoni u mal-kummerċ ta’ munizzjon jew armi li huma pprojbiti mil-liġi internazzjonali applikabbli.
(b) investimenti f’titoli maħruġa minn impriżi li, skont l-informazzjoni li jkollha l-Kummissjoni, jiġġeneraw aktar minn 25 % tad-dħul annwali globali tagħhom mill-attivitajiet elenkati hawn taħt:
(i). attivitajiet ta’ logħob tal-azzard (produzzjoni, kostruzzjoni, distribuzzjoni, ipproċessar, kummerċ jew attivitajiet relatati mas-software);
(ii). prodotti u attivitajiet relatati mat-tabakk (produzzjoni, distribuzzjoni, ipproċessar u kummerċ);
(iii). kummerċ tas-sess u infrastrutturi, servizzi u midja relatati.
5.TRASFERIMENT GĦALL-BAĠIT TAL-UNJONI EWROPEA
Id-dħul nett mill-investimenti tal-assi tal-KEFA f’likwidazzjoni u, mat-twettiq tal-likwidazzjoni, tal-assi tal-Fond ta’ Riċerka għall-Faħam u l-Azzar, u r-rikavati ġġenerati mill-bejgħ ta’ parti mill-assi, se jiġu impenjati għall-baġit ġenerali tal-Unjoni Ewropea bħala dħul iddedikat u se jiġu ttrasferiti mill-KEFA f’likwidazzjoni u, mat-twettiq tal-likwidazzjoni, mill-assi tal-Fond ta’ Riċerka għall-Faħam u l-Azzar meta meħtieġ biex jiġu ssodisfati l-obbligazzjonijiet mil-linja baġitarja diretta lejn il-programmi ta’ riċerka għas-setturi relatati mal-industrija tal-faħam u tal-azzar.
6.KONTABBILTÀ
L-amministrazzjoni tal-fondi għandha tkun spjegata fil-kontijiet annwali tal-KEFA f’likwidazzjoni u, mat-twettiq tal-likwidazzjoni, l-Assi tal-Fond ta’ Riċerka għall-Faħam u l-Azzar. Dawn għandhom ikunu bbażati fuq u ppreżentati skont ir-Regoli tal-Kontabbiltà tal-Kummissjoni kif adottati mill-Uffiċjal tal-Kontabbiltà tal-Kummissjoni, b’kont meħud tan-natura speċifika tal-KEFA f’likwidazzjoni u, mat-twettiq tal-likwidazzjoni, l-Assi tal-Fond ta’ Riċerka għall-Faħam u l-Azzar. Il-kontijiet ikunu approvati mill-Kummissjoni u eżaminati mill-Qorti tal-Awdituri. Il-Kummissjoni għandha tqabbad ditti esterni biex iwettqu verifika annwali tal-kontijiet tagħha.
7.PROĊEDURI TA’ ĠESTJONI
Il-Kummissjoni għandha twettaq, fir-rigward tal-KEFA f’likwidazzjoni u, mat-twettiq tal-likwidazzjoni, l-assi tal-Fond ta’ Riċerka għall-Faħam u l-Azzar, l-operazzjonijiet ta’ ġestjoni hawn fuq imsemmija skont dawn il-linji gwida u skont ir-regoli interni u l-proċeduri fis-seħħ għall-KEFA fil-mument tax-xoljiment tagħha jew kif modifikati wara.
Kull sena għandu jitfassal rapport dettaljat dwar l-operazzjonijiet ta’ ġestjoni mwettqa skont dawn il-linji gwida finanzjarji u jintbagħat lill-Istati Membri. Fir-rapport annwali, il-Kummissjoni għandha tinkludi informazzjoni dwar l-użu tal-klassijiet tal-assi differenti, dwar ir-raġunijiet għall-għażla tagħha li tinvesti fi klassijiet speċifiċi tal-assi u dwar il-prestazzjonijiet osservati f’kull klassi tal-assi.