This document is an excerpt from the EUR-Lex website
Document 52020PC0061
Proposal for a COUNCIL DECISION on the position to be taken on behalf of the European Union within the Regional Steering Committee of the Transport Community as regards certain budgetary matters in relation to the implementation of the Treaty establishing the Transport Community
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Tmexxija Reġjonali tal-Komunità tat-Trasport rigward ċerti kwistjonijiet baġitarji b’rabta mal-implimentazzjoni tat-Trattat li jistabbilixxi l-Komunità tat-Trasport
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Tmexxija Reġjonali tal-Komunità tat-Trasport rigward ċerti kwistjonijiet baġitarji b’rabta mal-implimentazzjoni tat-Trattat li jistabbilixxi l-Komunità tat-Trasport
COM/2020/61 final
IL-KUMMISSJONI EWROPEA
Brussell, 18.2.2020
COM(2020) 61 final
2020/0028(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Tmexxija Reġjonali tal-Komunità tat-Trasport rigward ċerti kwistjonijiet baġitarji b’rabta mal-implimentazzjoni tat-Trattat li jistabbilixxi l-Komunità tat-Trasport
MEMORANDUM TA’ SPJEGAZZJONI
1.SUĠĠETT TAL-PROPOSTA
Din il-proposta tikkonċerna deċiżjoni li tistabbilixxi l-pożizzjoni li għandha tittieħed f’isem l-Unjoni Ewropea fil-Kumitat ta’ Tmexxija Reġjonali stabbilit skont it-Trattat li jistabbilixxi l-Komunità tat-Trasport (“it-TCT”) b’rabta mal-adozzjoni prevista ta’ deċiżjoni dwar il-baġit tal-Komunità tat-Trasport għall-2020 mill-Kumitat ta’ Tmexxija Reġjonali.
2.KUNTEST TAL-PROPOSTA
2.1It-Trattat li jistabbilixxi l-Komunità tat-Trasport
L-Unjoni Ewropea hija parti għat-TCT, li daħal fis-seħħ fl-1 ta’ Mejju 2019. Permezz tad-Deċiżjoni 2019/1 tal-Kumitat ta’ Tmexxija Reġjonali, il-Kummissjoni ngħatat mandat biex timplimenta l-baġit tal-Komunità tat-Trasport sakemm issir effettiva l-ħatra tad-Direttur tas-Segretarjat Permanenti tal-Komunità tat-Trasport.
2.2Il-Kumitat ta’ Tmexxija Reġjonali
Il-Kumitat ta’ Tmexxija Reġjonali huwa stabbilit permezz tal-Artikolu 24 tat-TCT u huwa responsabbli għall-amministrazzjoni tat-TCT u biex jiżgura l-implimentazzjoni tajba tiegħu. Għal dan il-għan, jagħmel rakkomandazzjonijiet u jieħu deċiżjonijiet fil-każijiet previsti fit-TCT. B’mod partikolari, il-Kumitat ta’ Tmexxija Reġjonali:
(a) iħejji l-ħidma tal-Kunsill Ministerjali,
(b) jiddeċiedi dwar it-twaqqif ta’ kumitati tekniċi,
(c) jagħmel rakkomandazzjonijiet u jieħu deċiżjonijiet f’konformità mat-TCT,
(d) fir-rigward tal-atti tal-UE li jkunu għadhom kemm ġew adottati, jieħu azzjoni xierqa, b’mod partikolari permezz ta’ reviżjoni tal-Anness I tat-TCT,
(e) jaħtar id-Direttur tas-Segretarjat Permanenti wara konsultazzjoni mal-Kunsill Ministerjali,
(f) jista’ jaħtar wieħed jew aktar mid-Deputati Diretturi tas-Segretarjat Permanenti,
(g) jistabbilixxi r-regoli tas-Segretarjat Permanenti,
(h) jista’ jirrevedi, permezz ta’ deċiżjoni, il-livell ta’ kontribuzzjonijiet baġitarji,
(i) jadotta l-baġit annwali tat-TCT,
(j) jadotta deċiżjoni li tispeċifika l-proċedura għall-implimentazzjoni tal-baġit, għall-preżentazzjoni u għall-awditjar tal-kontijiet kif ukoll għall-ispezzjoni,
(k) jieħu deċiżjonijiet dwar it-tilwimiet imressqa mill-Partijiet Kontraenti,
(l) jadotta prinċipji ġenerali fil-qasam tal-aċċess għad-dokumenti, fir-rigward ta’ dokumenti miżmuma mill-korpi stabbiliti mit-TCT, jew skont dan,
(m) jadotta r-rapporti annwali għall-attenzjoni tal-Kunsill Ministerjali dwar l-implimentazzjoni tan-Netwerk Komprensiv;
(n) fir-rigward ta’ ċerti atti tal-Unjoni, jistabbilixxi termini perentorji u mezzi għat-traspożizzjoni mill-Partijiet tax-Xlokk tal-Ewropa.
2.3L-atti previsti tal-Kumitat ta’ Tmexxija Reġjonali
Il-Kumitat ta’ Tmexxija Reġjonali għandu jadotta deċiżjoni dwar il-baġit tal-Komunità tat-Trasport għall-2020. Id-deċiżjoni prevista se ssir legalment vinkolanti għall-partijiet skont l-Artikolu 25(1) tat-TCT.
Baġit
Il-kontribuzzjoni għall-baġit tal-Komunità tat-Trasport hija stabbilita fl-Anness V tat-TCT. Is-sehem tal-Unjoni jammonta għal 80 % tal-baġit, filwaqt li l-20 % li jifdal għandu jiġi pprovdut mill-Partijiet tax-Xlokk tal-Ewropa.
Għall-2019, il-baġit totali ammonta għal EUR 1,630 miljun. Il-kontribuzzjoni tal-UE kienet ta’ ammont totali ta’ EUR 1,304 miljun, li jikkorrispondi għal 80 % tal-baġit totali tas-Segretarjat Permanenti biex ikopri l-kostijiet operazzjonali tiegħu għall-2019.
F’konformità mal-punt (a) tal-Artikolu 28 tat-TCT, is-Segretarjat Permanenti stabbilixxa l-abbozz ta’ baġit għas-sena 2020, filwaqt li tqieset il-ħatra progressiva tal-persunal tas-Segretarjat Permanenti li jippermettilha ssir operattiva u awtonoma bis-sħiħ. Il-baġit jammonta għal total ta’ EUR 3,000 miljun, li EUR 2,400 miljun (80 %) minnu ġej mill-UE 1 u EUR 0,6 miljun għall-Partijiet tal-Ewropa tax-Xlokk.
L-ammont għandu jkopri l-kostijiet li jifdal għat-twaqqif tas-Segretarjat Permanenti, kif ukoll il-kostijiet operazzjonali tiegħu. Skont l-Anness I tal-Ftehim dwar il-Kwartieri Ġenerali bejn il-Komunità tat-Trasport u s-Serbja, il-pajjiż ospitanti, jiġifieri s-Serbja, jipprovdi mingħajr ħlas l-uffiċċji tas-Segretarjat Permanenti u parti mit-tagħmir u s-servizzi relatati ma’ dawn l-uffiċċji (għamara, sigurtà, elettriku, ilma u tindif).
3.IL-POŻIZZJONI LI TRID TITTIEĦED F’ISEM L-UNJONI
L-adozzjoni ta’ din id-deċiżjoni mill-Kumitat ta’ Tmexxija Reġjonali hija meħtieġa għall-implimentazzjoni tat-TCT u għall-funzjonament tas-Segretarjat Permanenti. Peress li l-Unjoni hi parti għat-TCT, hemm bżonn li tiġi stabbilita pożizzjoni tal-Unjoni rigward il-baġit tal-organizzazzjoni.
4.BAŻI ĠURIDIKA
4.1Bażi ġuridika proċedurali
4.1.1 Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet tal-Kunsill li jistabbilixxu “il-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim”.
Il-kunċett ta’ “atti li jkollhom effetti legali” jinkludi l-atti li jkollhom effetti legali bis-saħħa tar-regoli tad-dritt internazzjonali li jirregolaw is-sede kkonċernata. Huwa jinkludi wkoll l-istrumenti li ma jkollhomx effett vinkolanti skont id-dritt internazzjonali iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 2 .
4.1.2 Applikazzjoni għal dan il-każ
Il-Kumitat ta’ Tmexxija Reġjonali huwa korp stabbilit permezz ta’ ftehim, jiġifieri t-TCT.
L-att li l-Kumitat ta’ Tmexxija Reġjonali huwa mitlub jadotta jikkostitwixxi att li jkollu effetti legali. Skont l-Artikolu 35 tat-TCT, il-Kumitat ta’ Tmexxija Reġjonali għandu s-setgħa jadotta l-baġit tal-Komunità tat-Trasport. Min-natura tagħhom, u bħala kwistjoni ta’ dritt internazzjonali li jirregola l-Kumitat ta’ Tmexxija Reġjonali, dan l-att fih elementi li jaffettwaw il-pożizzjoni legali tal-partijiet għat-TCT u, għaldaqstant, anki tal-Unjoni. Għaldaqstant, iridu jiġi kkunsidrat li għandu effetti legali.
L-atti previsti la jissupplimentaw u lanqas jemendaw il-qafas istituzzjonali tat-TCT.
Għalhekk, il-bażi ġuridika proċedurali għad-deċiżjoni proposta hija l-Artikolu 218(9) tat-TFUE.
4.2Bażi ġuridika sostantiva
4.2.1.Prinċipji
Il-bażi ġuridika sostantiva għal deċiżjoni skont l-Artikolu 218(9) tat-TFUE tiddependi primarjament fuq l-għan u fuq il-kontenut tal-att previst li fir-rigward tiegħu tittieħed pożizzjoni f’isem l-Unjoni. Jekk l-att previst ikollu żewġ għanijiet jew ikollu żewġ komponenti, u jekk wieħed minn dawk l-għanijiet jew minn dawk il-komponenti jkun jista’ jiġi identifikat bħala dak ewlieni, filwaqt li l-ieħor ikun sempliċement wieħed inċidentali, id-deċiżjoni skont l-Artikolu 218(9) tat-TFUE trid tissejjes fuq bażi ġuridika sostantiva unika, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għal dan il-każ
L-att previst huwa meħtieġ għall-funzjonament xieraq tal-Komunità tat-Trasport. Min-naħa l-oħra, it-TCT isegwi l-għanijiet u għandu komponenti fl-oqsma tat-trasport bit-triq, bil-ferrovija u bl-ilmijiet navigabbli interni, li huma mezzi koperti mill-Artikolu 91 tat-TFUE, kif ukoll fil-qasam tat-trasport marittimu, li hu mezz kopert mill-Artikolu 100(2) tat-TFUE. Minħabba n-natura orizzontali tiegħu, l-att previst jirreferi għal dawn l-elementi kollha.
Għaldaqstant, il-bażi ġuridika sostantiva tad-deċiżjoni proposta hija magħmula mid-dispożizzjonijiet li ġejjin: l-Artikoli 91 u 100(2) tat-TFUE.
4.3Konklużjoni
Jenħtieġ li l-bażi ġuridika tad-deċiżjoni proposta tkun l-Artikoli 91 u 100(2) tat-TFUE flimkien mal-Artikolu 218(9) tat-TFUE.
5. PUBBLIKAZZJONI TAL-ATT PREVIST
F’konformità mal-Artikolu 25(2) tat-TCT, id-deċiżjonijiet tal-Kumitat ta’ Tmexxija Reġjonali għandhom jiġu ppubblikati f’Il-Ġurnal Uffiċjali tal-Unjoni Ewropea.
2020/0028 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Tmexxija Reġjonali tal-Komunità tat-Trasport rigward ċerti kwistjonijiet baġitarji b’rabta mal-implimentazzjoni tat-Trattat li jistabbilixxi l-Komunità tat-Trasport
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikoli 91 u 100(2) flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)It-Trattat li jistabbilixxi l-Komunità tat-Trasport (“it-TCT”) ġie ffirmat mill-Unjoni Ewropea skont id-Deċiżjoni tal-Kunsill (UE) 2017/1937 3 . Dan ġie approvat f’isem l-Unjoni Ewropea fl-4 ta’ Marzu 2019 4 u daħal fis-seħħ fl-1 ta’ Mejju 2019.
(2)Bis-saħħa tal-Artikolu 35 tat-TCT, il-Kumitat ta’ Tmexxija Reġjonali (“il-Kumitat ta’ Tmexxija”) għandu s-setgħa jadotta l-baġit tal-Komunità tat-Trasport kull sena.
(3)Il-Kumitat ta’ Tmexxija Reġjonali tal-Komunità tat-Trasport għandu jadotta deċiżjoni dwar il-baġit tal-Komunità tat-Trasport għall-2020 sabiex jiġi żgurat li t-TCT jiġi implimentat.
(4)Huwa xieraq li tiġi stabbilita l-pożizzjoni li għandha tittieħed f’isem l-Unjoni fil-Kumitat ta’ Tmexxija, peress li deċiżjoni bħal din hija neċessarja għall-funzjonament tas-Segretarjat Permanenti tal-Komunità tat-Trasport, u se jkollha effetti legali rigward l-Unjoni.
(5)L-għoti tas-setgħa lill-Kummissjoni biex timplimenta b’mod proviżorju l-baġit tal-Komunità tat-Trasport ma jbiddilx il-karattru essenzjali tas-setgħat mogħtija lil dik l-istituzzjoni mit-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea,
ADOTTA DIN ID-DEĊIŻJONI:
Artikolu 1
Il-pożizzjoni li trid tittieħed f’isem l-Unjoni fil-Kumitat ta’ Tmexxija Reġjonali tal-Komunità tat-Trasport fir-rigward tal-baġit tal-Komunità tat-Trasport għas-sena 2020 għandha tkun ibbażata fuq l-abbozz ta’ deċiżjoni tal-Kumitat ta’ Tmexxija Reġjonali mehmuż ma’ din id-Deċiżjoni.
Artikolu 2
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 18.2.2020
COM(2020) 61 final
ANNESS
tal-
Proposta għal Deċiżjoni tal-Kunsill
dwar il-pożizzjoni li għandha tittieħed f’isem l-Unjoni Ewropea fil-Kumitat ta’ Tmexxija Reġjonali tal-Komunità tat-Trasport rigward ċerti kwistjonijiet baġitarji b’rabta mal-implimentazzjoni tat-Trattat li jistabbilixxi l-Komunità tat-Trasport
ANNESS 1
ABBOZZ
DEĊIŻJONI Nru 2020/
TAL-KUMITAT TA’ TMEXXIJA REĠJONALI TAL-KOMUNITÀ TAT-TRASPORT
ta’ …
dwar l-adozzjoni tal-baġit tal-Komunità tat-Trasport għas-sena 2020
IL-KUMITAT TA’ TMEXXIJA REĠJONALI TAL-KOMUNITÀ TAT-TRASPORT,
Wara li kkunsidra t-Trattat li jistabbilixxi l-Komunità tat-Trasport, u b’mod partikolari l-Artikoli 24(1) u 35 tiegħu,
IDDEĊIEDA KIF ĠEJ:
Artikolu 1
B’dan hu adottat il-baġit tal-Komunità tat-Trasport għas-sena 2020, mehmuż ma’ din id-Deċiżjoni bħala l-Anness I.
Artikolu 2
Mingħajr preġudizzju għall-Artikoli 2 u 3 tad-Deċiżjoni 2019/1 tal-Kumitat ta’ Tmexxija Reġjonali, il-Kummissjoni Ewropea għandha tkun inkarigata mill-implimentazzjoni tal-baġit tal-Komunità tat-Trasport skont l-Artikolu 3.
Artikolu 3
L-Artikolu 2 għandu jieqaf japplika fil-jum ta’ qabel dak li fih tidħol fis-seħħ il-ħatra tad-Direttur permanenti tas-Segretarjat Permanenti.
Magħmul fi ..., fi ... 2020.
Għall-Kumitat ta’ Tmexxija Reġjonali
Il-President
ANNESS I: Baġit tal-Komunità tat-Trasport għas-sena 2020
|
KOSTIJIET OPERAZZJONALI TAS-SEGRETARJAT PERMANENTI (inkluż infiq fiss / kontabilità / attivitajiet ta’ komunikazzjoni / organizzazzjoni ta’ laqgħat) |
396,900 |
|
TAGĦMIR TAL-UFFIĊĊJU U GĦAMARA TAS-SEGRETARJAT PERMANENTI |
60,000 |
|
PERSUNAL (inkluż salarji, gratifiki, reklutaġġ, ivvjaġġar, kontribuzzjonijiet għal skemi tas-saħħa/pensjonijiet) |
1,461,500 |
|
STUDJI, ASSISTENZA TEKNIKA li għandhom jitmexxew mis-Segretarjat Permanenti |
800,000 |
|
TOTAL |
2,718,400 |
|
RIŻERVA (madwar 9,4 %) |
281,600 |
|
TOTAL FINALI |
3,000,000 |
|
Li minnu: Kontribuzzjoni tal-UE (80 %) |
2,400,000 |
|
Kontribuzzjoni tal-Partijiet tal-Ewropa tax-Xlokk (20 %: l-Anness V tat-TCT jipprovdi d-distribuzzjoni skont kull pajjiż) |
600,000 |