IL-KUMMISSJONI EWROPEA

Brussell, 28.2.2020

COM(2020) 72 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

dwar is-sitwazzjoni tat-tħejjijiet għall-implimentazzjoni sħiħa tal-bażijiet legali l-ġodda għas-Sistema ta' Informazzjoni ta' Schengen (SIS) f'konformità mal-Artikolu 66(4) tar-Regolament (UE) 2018/1861 u l-Artikolu 79(4) tar-Regolament (UE) 2018/1862

1.INTRODUZZJONI

Fit-28 ta’ Novembru 2018, il-Parlament Ewropew u l-Kunsill adottaw tliet Regolamenti ġodda dwar l-istabbiliment, it-tħaddim u l-użu tas-Sistema ta’ Informazzjoni ta’ Schengen (SIS). 1 Ir-regolamenti l-ġodda dwar is-SIS iwessgħu l-kamp ta’ applikazzjoni u l-funzjonalitajiet tas-SIS fl-oqsma li ġejjin:

·kategoriji ġodda ta’ twissijiet u aktar possibbiltajiet mogħtija minn kategoriji eżistenti ta’ twissijiet;

·estensjoni ta’ kategoriji ta’ data f’allerti tas-SIS;

·possibbiltajiet tekniċi ġodda;

·kapaċitajiet bijometriċi ġodda;

·aċċess usa’ għat-twissijiet tas-SIS fil-livell nazzjonali u Ewropew.

Id-dispożizzjonijiet il-ġodda jeħtieġ li jiġu implimentati f’fażijiet differenti. Il-miri għall-implimentazzjoni li ġejjin huma ddefiniti fir-regolamenti:

1)fażi ta’ implimentazzjoni I (għandha tkun lesta biex tibda titħaddem sa tmiem l-2019): Il-Europol u l-membri tat-timijiet skjerati mill-Aġenzija Ewropea għall-Gwardja tal-Fruntiera u tal-Kosta 2 huma permessi jaċċessaw il-kategoriji kollha ta’ allerti fis-SIS;

2)fażi ta’ implimentazzjoni II(li għandha tkun lesta biex tibda titħaddem sa tmiem l-2020): l-Istati Membri kollha jistgħu jużaw is-Sistema Awtomatizzata għall-Identifikazzjoni tal-Marki tas-Swaba’ (AFIS) għat-tiftix abbażi tal-marki tas-swaba’ fis-SIS;

3)fażi ta’ implimentazzjoni III (li għandha tkun lesta biex tibda titħaddem sa tmiem l-2021): l-implimentazzjoni sħiħa tad-dispożizzjonijiet kollha tar-regolamenti l-ġodda tas-SIS.

F’dak ir-rigward, ir-regolamenti l-ġodda jistabbilixxu li, sa mhux aktar tard mit-28 ta’ Diċembru 2021, il-Kummissjoni għandha tadotta deċiżjoni li tistabbilixxi d-data li fiha jibdew l-operazzjonijiet tas-SIS skont ir-regolamenti l-ġodda. Sabiex jintlaħaq dan l-għan, huwa meħtieġ li sa dak iż-żmien:

·jkunu adottati l-atti implimentattivi kollha meħtieġa;

·L-Istati Membri jkunu nnotifikaw lill-Kummissjoni li huma jkunu għamlu l-arranġamenti tekniċi u legali meħtieġa; kif ukoll

·l-eu-LISA nnotifikat lill-Kummissjoni dwar it-tlestija b’suċċess tal-attivitajiet kollha tal-ittestjar.

L-Artikolu 66(4) tar-Regolament (UE) 2018/1861 u l-Artikolu 79(4) tar-Regolament (UE) 2018/1862 jitolbu lill-Kummissjoni biex tippreżenta, fuq bażi annwali, rapport lill-Parlament Ewropew u lill-Kunsill dwar l-istat attwali tat-tħejjijiet għall-implimentazzjoni sħiħa tar-regolamenti l-ġodda tas-SIS.

Dan l-ewwel rapport dwar l-istatus jiddeskrivi l-ħidma preparatorja li saret mill-Kummissjoni, l-Aġenziji u l-Istati Membri mill-1 ta’ Jannar 2019 sat-30 ta’ Settembru 2019. Huwa bbażat fuq l-informazzjoni pprovduta mill-Istati Membri u l-Aġenziji permezz ta’ kwestjonarji u riżultati miksuba f’laqgħat u f’sessjonijiet ta’ ħidma.

2.SITWAZZJONI ATTWALI TAT-TĦEJJIJIET GĦALL-IMPLIMENTAZZJONI TAR-REGOLAMENTI L-ĠODDA TAS-SIS

2.1.Il-partijiet interessati

Jeħtieġ li l-partijiet interessati differenti jaħdmu flimkien mill-qrib sabiex tinkiseb l-implimentazzjoni sħiħa tar-regolamenti l-ġodda tas-SIS sa tmiem l-2021.

Il-Kummissjoni hija responsabbli għall-monitoraġġ tal-proċess ta’ implimentazzjoni, li jiżgura l-implimentazzjoni korretta u armonizzata tad-dispożizzjonijiet legali, u għall-adozzjoni tal-atti ta’ implimentazzjoni u l-atti delegati meħtieġa.

l-eu-LISA hija responsabbli għall-iżvilupp tas-SIS Ċentrali u l-Infrastruttura ta’ Komunikazzjoni, inkluż it-tħejjija ta’ speċifikazzjonijiet tekniċi, l-ittestjar u t-tqegħid fis-seħħ tas-SIS il-ġdida sad-dati ta’ skadenza meħtieġa.

L-Istati Membri huma responsabbli għall-iżvilupp tas-sistemi nazzjonali tagħhom f’konformità mal-iżviluppi fis-SIS Ċentrali, u għat-tlestija tat-tħejjijiet legali u proċedurali kollha meħtieġa għall-ipproċessar tad-data tas-SIS u l-informazzjoni supplimentari, f’konformità mar-regolamenti tas-SIS il-ġodda.

L-Aġenzija Ewropea għall-Gwardja tal-Fruntiera u tal-Kosta, l-Europol u l-Eurojust huma responsabbli biex jiżguraw li jsiru t-tħejjijiet kollha biex l-utenti awtorizzati tagħhom ikollhom aċċess għad-data tas-SIS f’konformità mar-regolamenti l-ġodda tas-SIS.

2.2.Il-Kummissjoni

2.2.1.Koordinazzjoni tal-attivitajiet u l-involviment tal-partijiet interessati

F’Jannar 2019 il-Kummissjoni waqqfet netwerk ta’ esperti mill-awtoritajiet kompetenti tal-Istati Membri u l-Aġenziji tal-UE, biex tikkoordina l-attivitajiet u tassisti lill-Kummissjoni f’diversi kompiti:

·Fil-kuntest tal-Grupp ta’ Esperti dwar is-Sistemi ta’ Informazzjoni għall-Fruntieri u s-Sigurtà 3 , is-Sottogrupp SIS u s-Sottogrupp SIRENE 4 jkunu ġew stabbiliti; il-kompiti tas-Sottogrupp tas-SIS għandhom jipprovdu lill-Kummissjoni b’parir espert dwar l-għażliet tekniċi biex tinkiseb l-implimentazzjoni korretta tad-dispożizzjonijiet u l-funzjonalitajiet ġodda tas-SIS, u biex tħejji atti delegati; il-kompitu tas-Sottogrupp SIRENE huwa li jipprovdi lill-Kummissjoni b’parir espert dwar il-modifiki meħtieġa fil-proċeduri SIRENE;

·Twaqqaf Kumitat 5 (“Pulizija tas-SIS-SIRENE” u “Fruntieri tas-SIS-SIRENE”) biex jgħin lill-Kummissjoni fil-preparazzjoni tal-atti ta’ implimentazzjoni meħtieġa; il-Kumitat huwa l-korp deċiżjonali ewlieni biex japprova r-rakkomandazzjonijiet magħmula minn esperti fis-Sottogruppi SIS u SIRENE jew f’laqgħat tekniċi mmexxija minn eu-LISA.

Il-Kummissjoni tieħu sehem b’mod attiv f’attivitajiet u f’laqgħat tekniċi mmexxija mill-eu-LISA u tiżgura l-koordinazzjoni tal-attivitajiet ta’ partijiet interessati differenti permezz ta’ laqgħat regolari tal-Kumitat tas-SIS-SIRENE.

2.2.2.Definizzjoni tar-rekwiżiti għall-iżviluppi tekniċi

Bħala l-ewwel pass, il-ħidma tal-Kummissjoni u tal-esperti tal-Istati Membri ffukat fuq it-tħejjija ta’ rekwiżiti għal żviluppi tekniċi fi ħdan is-SIS Ċentrali f’konformità mar-regolamenti l-ġodda.

Il-ħidma ewlenija dwar id-definizzjoni tar-rekwiżiti relatati mal-parti mhux bijometrika tas-SIS tlestiet f’April 2019. Wara l-approvazzjoni mill-Kumitat tas-SIS-SIRENE, il-punti maqbula ntbagħtu lill-eu-LISA għal aktar diskussjonijiet tekniċi mal-Istati Membri u l-inklużjoni fi speċifikazzjonijiet tekniċi jew ġew inkorporati fl-abbozz ta’ atti ġodda ta’ implimentazzjoni.

Ir-regolamenti l-ġodda tas-SIS jeħtieġu wkoll żvilupp sinifikanti tal-kapaċitajiet bijometriċi tas-SIS. Iċ-Ċentru Konġunt tar-Riċerka tal-Kummissjoni (JRC) wettaq tliet studji dwar l-implimentazzjoni tal-kapaċitajiet bijometriċi ġodda fis-SIS, dwar il-marki tas-swaba’ u l-identifikazzjoni tal-marki tas-swaba’, dwar l-identifikazzjoni tal-wiċċ u dwar il-profili tad-DNA 6 . L-istudji, li ġew iffinalizzati f’Ġunju 2019, ikkonkludew li huwa possibbli li jintużaw dawk it-teknoloġiji fis-SIS u li saru xi rakkomandazzjonijiet. Il-JRC jappoġġa wkoll b’mod kontinwu lill-Kummissjoni u lill-eu-LISA matul diskussjonijiet tekniċi mal-Istati Membri.

2.2.3.Tħejjija ta’ miżuri implimentattivi tekniċi

Il-Kummissjoni bdiet tabbozza miżuri ta’ implimentazzjoni, li jiffokaw primarjament fuq ir-regoli tekniċi dwar id-dħul u l-ipproċessar ta’ data alfanumerika fis-SIS. Fi tmiem il-perjodu ta’ rappurtar, intlaħaq qbil wiesa’ bejn l-Istati Membri u l-Kummissjoni dwar is-sustanza ta’ dawk il-miżuri ta’ implimentazzjoni. Il-Kummissjoni biħsiebha tagħti bidu għall-proċedura ta’ adozzjoni fl-2020. Il-Kummissjoni biħsiebha taġġorna l-att ta’ implimentazzjoni eżistenti dwar il-kwalità tad-data 7 bijometrika matul l-2020 abbażi tar-rakkomandazzjonijiet tal-JRC u l-eżitu tad-diskussjonijiet tekniċi f’dan il-qasam immexxija mill-eu-LISA.

2.2.4.Preparazzjoni tal-aġġornament tal-Manwal SIRENE

Il-manwal SIRENE 8 huwa att ta’ implimentazzjoni li jistabbilixxi l-proċeduri għall-iskambju ta’ informazzjoni supplimentari relatata mat-twissijiet tas-SIS. Minħabba l-istadji differenti għall-implimentazzjoni stabbiliti fir-regolamenti l-ġodda, l-aġġornament tal-Manwal SIRENE jeħtieġ li jitlesta f’żewġ fażijiet:

·Il-fażi I tirrigwarda l-aġġornamenti meħtieġa għall-iskambju ta’ informazzjoni supplimentari bejn l-Istati Membri u l-Europol; din ir-reviżjoni teħtieġ li titlesta qabel ma l-Europol ikun teknikament konness man-netwerk SIRENE (ippjanat għall-2020);

·Il-fażi II hija relatata mal-aġġornament sħiħ tal-Manwal SIRENE, inklużi l-proċeduri ġodda kollha meħtieġa fid-dawl tar-regolamenti l-ġodda.

Rigward il-fażi I , il-Kummissjoni ħejjiet proposta għal reviżjoni tal-Manwal SIRENE attwali u ressqitha għad-diskussjoni fil-Kumitat fit-12 ta’ Settembru 2019. Il-Kummissjoni għandha l-intenzjoni li tiffinalizza r-reviżjoni matul l-2020 qabel ma l-Europol ikun teknikament konness man-netwerk SIRENE.

Fir-rigward tal-bidliet meħtieġa taħt il-fażi II, il-Kummissjoni analizzat flimkien mas-Sottogrupp SIRENE ir-rekwiżiti għal proċeduri SIRENE ġodda jew għal aġġornamenti ta’ proċeduri eżistenti f’diversi oqsma. Huma ppjanati diversi laqgħat barra mill-perjodu ta’ rappurtar bil-għan li jintlaħaq ftehim komuni dwar is-sustanza tad-dispożizzjonijiet ewlenin sal-bidu tal-2020. Ladarba jintlaħaq ftehim dwar is-sustanza, għandhom isiru l-passi li ġejjin:

·l-inklużjoni ta’ proċeduri ġodda jew riveduti fil-Manwal SIRENE rivedut u d-diskussjoni u l-approvazzjoni fil-Kumitat (attività mmexxija mill-Kummissjoni);

·aġġornament tal-ispeċifikazzjonijiet tekniċi għall-iskambju tad-data bejn l-Uffiċċji SIRENE (attività mmexxija mill-eu-LISA);

·aġġornament tas-sistemi tal-fluss tax-xogħol SIRENE nazzjonali f’konformità mal-ispeċifikazzjonijiet tekniċi għall-iskambju ta’ data (attività mmexxija mill-Istati Membri u l-Europol).

2.3.l-eu-LISA;

2.3.1.L-ippjanar u l-baġit

eu-LISA ippjanat li tibda topera f’żewġ fażijiet:

·Fażi I: f’Diċembru 2019, l-ewwel rilaxx uffiċjali se jkun lest għall-użu; dan ir-rilaxx ser jagħti lill-Europol aċċess sħiħ għas-SIS u jippermetti lill-Aġenzija Ewropea għall-Gwardja tal-Fruntiera u tal-Kosta tistabbilixxi konnessjoni teknika mas-SIS;

·Fażi II: f’Diċembru 2021 it-tieni rilaxx uffiċjali bil-bidliet kollha relatati mar-regolamenti l-ġodda ser jiġi kkonsenjat u jidħol fis-seħħ; qabel dan, eu-LISA qed tippjana li twettaq erba’ settijiet ta’ testijiet.

L-Artikolu 5(3) tar-Regolament (UE) 2018/1861 alloka EUR 31 098 000 lil eu-LISA għat-twettiq tal-iżviluppi tekniċi li jikkonċernaw is-SIS Ċentrali u l-Infrastruttura ta’ Komunikazzjoni, kif ukoll attivitajiet ta’ taħriġ tekniku relatati. Dan ir-rapport dwar l-istatus għadu ma fihx ħarsa ġenerali dettaljata tal-ispejjeż imġarrba minħabba li l-ewwel perjodu ta’ rappurtar huwa qasir ħafna.

2.3.2.Attivitajiet ta' koordinament

l-eu-LISA ddeċidiet li tissepara d-diskussjonijiet tekniċi relatati mal-implimentazzjoni ta’ kapaċitajiet bijometriċi ġodda fi ħdan is-SIS mid-diskussjonijiet relatati mal-iżviluppi fil-parti mhux bijometrika tas-SIS. L-attivitajiet ta’ eu-LISA u l-kuntratturi tagħhom b’rabta mal-iżviluppi tekniċi fiż-żewġ oqsma huma kkoordinati permezz ta’ struttura ta’ Forum ta’ Ġestjoni ta’ Programm doppju (DPP) (“AFIS PMF” li jittratta l-bijometrika, u “SIS Recast PMF ” li tittratta mal-parti mhux bijometrika). Il-parteċipanti fl-istruttura PMF jinkludu l-Kummissjoni, il-maniġers tal-proġetti tal-Istati Membri u l-Aġenziji kollha u t-tim tal-proġett tal-eu-LISA.

2.3.3.Tħejjija ta’ speċifikazzjonijiet tekniċi għall-parti mhux bijometrika tas-SIS Ċentrali

l-eu-LISA bdiet l-attivitajiet ewlenin tagħha għall-parti mhux bijometrika tas-SIS f’Mejju 2019, wara li s-Sottogrupp tas-SIS iffinalizza l-lista ta’ rekwiżiti u ntlaħaq progress sinifikanti dwar il-miżuri implimentattivi tekniċi fil-Kumitat SIS-SIRENE. L-ewwel abbozz tad-Dokument ta’ Rekwiżiti tal-Utent ingħata lill-partijiet ikkonċernati kollha fit-2 ta’ Settembru 2019. L-ewwel verżjoni tad-Dokument ta’ Kontroll tal-Interface/l-Ispeċifikazzjoni Teknika Dettaljata (ICD/DTS) se tiġi pprovduta mill-eu-LISA f’Ottubru 2019. Il-pjan huwa li tiġi ffinalizzata l-ħidma fuq dawk l-ispeċifikazzjonijiet sal-bidu tal-2020.

l-eu-LISA ffirmat kuntratti speċifiċi għall-iżvilupp tas-SIS Ċentrali bħala parti mill-kuntratt qafas għall-Manutenzjoni fl-Ordni ta’ Ħidma tas-SIS.

2.3.4.Tħejjija ta’ speċifikazzjonijiet tekniċi għall-parti bijometrika tas-SIS Ċentrali

Il-komponent bijometriku tas-SIS Ċentrali (“SIS AFIS”) daħal fis-seħħ f’Marzu 2018. Ir-regolamenti l-ġodda tas-SIS jeħtieġu modifiki importanti għall-AFIS eżistenti. B’mod partikolari, it-tiftix bijometriku ser jiġi estiż b’kategoriji ġodda ta’ data dattiloskopika (marki tal-pala tal-id u marki latenti). Barra minn hekk, ir-regolamenti l-ġodda tas-SIS jeħtieġu li l-Istati Membri jkunu jistgħu jużaw il-funzjonalità tat-tiftix tal-marki tas-swaba’ fiċ-ċirkostanzi operattivi kollha.

l-eu-LISA nediet il- “Proġett tal-Fażi 2 tal-AFIS” biex tkompli tiżviluppa l-AFIS tas-SIS skont dawk ir-rekwiżiti. Fil-bidu, il-proġett jiffoka fuq l-aspetti ta’ “Analiżi u Disinn” tal-evoluzzjoni, li jkopru l-ħidma preliminari fuq il-bidu ta’ proġett, ir-rekwiżiti, l-ispeċifikazzjoni u d-disinn preliminari għall-Fażi 2 tal-AFIS tas-SIS. Id-dokument tar-Rekwiżiti tal-Utenti u d-Dokument ta’ Kontroll tal-Interface/l-Ispeċifikazzjoni Teknika Dettaljata se jiġu ffinalizzati sa tmiem l-2019. It-tieni fażi “Implimentazzjoni” se tibda fil-bidu tal-2020.

2.4.Stati Membri

2.4.1.Kamp ta' applikazzjoni

Dan ir-rapport ikopri biss l-Istati Membri li bħalissa huma konnessi mas-SIS. Din tikkonċerna lill-Istati Membri kollha tal-UE minbarra l-Irlanda u Ċipru, u l-erba’ Pajjiżi Assoċjati ma’ Schengen (30 Stat) 9 . Dan jikkonċerna wkoll lir-Renju Unit taħt id-dispożizzjonijiet tal-Ftehim dwar il-Ħruġ.

2.4.2.Baġit

L-Artikolu 5(4) tar-Regolament (UE) 2018/1861 alloka lill-Istati Membri allokazzjoni globali addizzjonali ta’ EUR 36 810 000 li għandha tkun iddedikata għall-aġġornament malajr u effettiv tas-sistemi nazzjonali kkonċernati. L-ewwel ammont ta’ EUR 18 405 000 ġie impenjat fl-2019.

2.4.3.Is-sitwazzjoni attwali tal-iskjerament tal-AFIS tas-SIS (li għandha titlesta sa tmiem l-2020)

Il-Kummissjoni talbet lill-Istati Membri biex jirrapportaw dwar l-istat attwali tat-tħejjijiet għall-iskjerament tas-SIS AFIS matul il-laqgħa tal-Kumitat tat-13 ta’ Ġunju. Wieġbu l-Istati Membri kollha. L-istatus sa tmiem il-perjodu ta’ rappurtar (30 ta’ Settembru 2019) huwa dan li ġej:

·19-il Stat Membru diġà varaw il-funzjonalità tat-tiftix tal-AFIS;

·3 Stati Membri ppjanaw li jiskjeraw il-funzjonalità tat-tiftix tal-AFIS xorta waħda fl-2019;

·2 Stati Membri ppjanaw li jiskjeraw il-funzjonalità tat-tiftix tal-AFIS fl-2020;

·6 Stati Membri ma tawx skeda ta’ żmien dettaljata għall-użu fit-tweġiba tagħhom għall-kwestjonarju; il-Kummissjoni se ssegwi mill-qrib l-istat ta’ implimentazzjoni ta’ dawk l-Istati Membri matul il-perjodu ta’ rappurtar li jmiss (1 ta’ Ottubru 2019–30 ta’ Settembru 2020).

2.4.4.Tħejjijiet għall-implimentazzjoni sħiħa tal-bażi legali l-ġdida (li għandha titlesta matul l-2021)

Il-preparazzjonijiet mill-Istati Membri huma kruċjali għaliex il-Kummissjoni tista’ tistabbilixxi biss id-data minn meta s-SIS il-ġdida tibda topera wara li l-Istati Membri jkunu nnotifikaw lill-Kummissjoni li huma jkunu għamlu l-arranġamenti tekniċi u legali meħtieġa.

Għandu jiġi nnutat li l-attivitajiet li jsiru mill-Istati Membri għadhom fi stadju preliminari peress li l-Istati Membri jistgħu biss jibdew jiżviluppaw b’mod sħiħ is-sistemi nazzjonali tagħhom meta l-ispeċifikazzjonijiet għall-iżviluppi fi ħdan is-SIS Ċentrali jiġu stabbiliti u d-dokumentazzjoni teknika tkun ġiet iffinalizzata (il-bidu tal-2020).

Il-Kummissjoni talbet lill-Istati Membri biex jirrappurtaw permezz ta’ kwestjonarju mniedi fil-11 ta’ Lulju 2019 dwar it-tħejjijiet li saru fil-livell nazzjonali. L-Istati Membri kollha kkonċernati wieġbu. L-Istati Membri ntalbu jipprovdu input fl-oqsma li ġejjin:

·l-ippjanar u l-ġestjoni tal-proġetti;

·Koordinazzjoni interna;

·valutazzjoni tal-impatt f’termini ta’ baġit, riżorsi umani, organizzazzjoni u leġiżlazzjoni nazzjonali.

F’termini ta’ ppjanar ta’ proġetti, kważi nofs l-Istati Membri (14 minn dawk li wieġbu) diġà bdew jiddefinixxu jew iddefinixxew pjan ta’ proġett u stadji importanti relatati; in-nofs l-ieħor (16 minn dawk li wieġbu) qed jippjanaw li jagħmlu dan sa tmiem l-2019 — bidu tal-2020. Barra minn hekk, il-maġġoranza tal-Istati Membri (24 minn dawk li wieġbu) stabbilixxew jew se jistabbilixxu fil-futur qarib tim ta’ proġett speċifiku u assenjati maniġer ta’ proġett; ħames Stati Membri se jimmaniġġjaw l-implimentazzjoni tas-SIS permezz ta’ dipartimenti jew timijiet eżistenti u Stat Membru wieħed għadu ma ċċarax kif se jimmaniġġja internament l-implimentazzjoni. Maġġoranza kbira ta’ dawk li wieġbu (26) jipprevedu li jistabbilixxu kooperazzjoni fil-livell nazzjonali bejn l-awtoritajiet kompetenti.

F’termini ta’ valutazzjoni tal-impatt, l-Istati Membri bħalissa jinsabu fi stadji differenti ta’ tħejjija 10 :

valutazzjoni tal-impatt baġitarju:

·18-il Stat Membru lestew il-valutazzjoni fl-2019;

·8 Stati Membri se jlestu l-valutazzjoni fl-2020;

·2 Stati Membri ser jibdew il-valutazzjoni fl-2020;

valutazzjoni tal-ħtiġijiet tar-riżorsi umani:

·9 Stati Membru lestew il-valutazzjoni fl-2019;

·9 Stati Membri se jlestu l-valutazzjoni fl-2020;

·5 Stati Membri ser jibdew il-valutazzjoni sa tmiem l-2019 — bidu tal-2020;

valutazzjoni tal-ħtiġijiet organizzattivi:

·7 Stati Membru lestew il-valutazzjoni fl-2019;

·9 Stati Membri se jlesti l-valutazzjoni sal-2020;

·10 Stati Membri rrapportaw li se jibdew il-valutazzjoni fi tmiem l-2019 — bidu tal-2020;

valutazzjoni tal-impatt fuq il-leġiżlazzjoni nazzjonali:

·9 Stati Membru lestew il-valutazzjoni fl-2019;

·12-il Stat Membru se jlestu l-valutazzjoni fl-2020;

·Stat Membru wieħed se jlesti l-valutazzjoni fil-bidu tal-2021.

Il-Kummissjoni se tkompli ssegwi mill-qrib l-attivitajiet preparatorji tal-Istati Membri matul il-laqgħat regolari tal-Kumitat tas-SIS-SIRENE.

2.5.Aġenziji

Din il-parti tar-rapport tiffoka fuq it-tħejjijiet li saru mill-Europol u mill-Aġenzija Ewropea għall-Gwardja tal-Fruntiera u tal-Kosta peress li d-dispożizzjonijiet li għandhom impatt fuq dawk l-Aġenziji jidħlu fis-seħħ sa tmiem l-2019 (huma koperti mill-ewwel fażi ta’ implimentazzjoni).

Il-bidliet li għandhom impatt fuq il-Eurojust huma minimi u japplikaw biss sa minn tmiem l-2021. Għalhekk, ir-rapport dwar l-istatus preżenti ma jinkludix preparazzjonijiet mill-Eurojust.

2.5.1.L-Europol

L-Europol diġà huwa utent tas-SIS skont ir-regolamenti attwali tas-SIS. Ir-regolamenti l-ġodda jinkludu għall-modifiki tal-Europol fiż-żewġ oqsma li ġejjin:

·aċċess għall-kategoriji kollha ta’ twissijiet fis-SIS, u

·il-konnessjoni man-netwerk SIRENE.

Id-dispożizzjonijiet il-ġodda japplikaw minn tmiem l-2019.

Matul l-ewwel perjodu ta’ rappurtar, l-Europol tejjeb l-interfaċċja eżistenti tiegħu biex jaċċessa l-allerti tas-SIS permezz ta’ Magna ta’ Tfittxija Unifikata li għandha tiġi skjerata minn Diċembru 2019. L-implimentazzjoni ġiet iffinalizzata u t-testijiet ta’ integrazzjoni ma’ eu-LISA huma ppjanati għar-raba’ trimestru tal-2019.

Il-Europol għandha l-għan li tkun lesta għall-konnessjoni man-netwerk SIRENE sa tmiem l-2020. Il-funzjoni ta’ SIRENE hija ppjanata li tkun stabbilita fi ħdan il-Front Office/Operational Centre fl-Europol li għandha kapaċitajiet ta’ 24/7. L-Europol jippjana li jintegra l-mail relay tas-SIRENE fis-sistema ta’ skambju ta’ messaġġi tiegħu stess SIENA (Applikazzjoni ta’ Netwerk għall-Iskambju Sikur ta’ Informazzjoni) biex jiżgura l-integrità tad-data u fluss tax-xogħol effiċjenti.

Barra minn hekk, l-Europol wettaq l-attivitajiet preparatorji li ġejjin:

·matul l-2019, il-proċeduri interni tal-Europol ġew aġġustati biex jinkludu l-kapaċitajiet ġodda li huma relatati mal-aċċess sħiħ għas-SIS; matul l-2020, ser isiru aktar aġġornamenti biex tiġi inkluża l-konnessjoni mal-mail relay tas-SIRENE u l-iskambju ta’ informazzjoni supplimentari;

·saru żjarat ta’ studju fl-uffiċċji SIRENE bil-għan li jinġabru l-aħjar prattiki; kif ukoll

·bdew konsultazzjonijiet minn qabel mal-Kontrollur Ewropew għall-Protezzjoni tad-Data 

Il-baġit tal-Europol għall-estensjoni tal-aċċess għall-kategoriji kollha ta’ twissijiet tas-SIS huwa ta’ EUR 70,596.

2.5.2.l-Aġenzija Ewropea għall-Gwardja tal-Fruntiera u tal-Kosta

Skont ir-regolamenti l-ġodda tas-SIS, minn tmiem l-2019, il-membri tat-timijiet skjerati mill-Aġenzija Ewropea għall-Gwardja tal-Fruntiera u tal-Kosta għandhom id-dritt jaċċessaw il-kategoriji kollha ta’ allerti fis-SIS. Il-membri ta’ dawk it-timijiet jeħtieġ li jkollhom aċċess għas-SIS permezz ta’ interfaċċja teknika stabbilita u miżmuma mill-Aġenzija Ewropea għall-Gwardja tal-Fruntiera u tal-Kosta.

Għal dak il-għan, fl-2019 l-Aġenzija Ewropea għall-Gwardja tal-Fruntiera u tal-Kosta ħejjiet u approvat proġett li jikkonsisti fil-partijiet li ġejjin:

·l-iżvilupp ta’ sistema, magħmula minn interfaċċja teknika li tinsab fil-kwartieri ġenerali tal-Aġenzija Ewropea għall-Gwardja tal-Fruntiera u tal-Kosta, applikazzjoni fuq l-internet u applikazzjoni mobbli għal konnessjoni mal-bażi tad-data;

·kunsinna ta’ tagħmir;

·l-iżvilupp ta’ proċeduri u regoli għall-użu tas-sistema, inklużi l-kanali ta’ komunikazzjoni, ir-regoli u l-kooperazzjoni mal-awtoritajiet tal-Istati Membri ospitanti; kif ukoll

·It-taħriġ tal-utent aħħari.

It-tul totali tal-proġett huwa stmat għal 25 xahar, bil-possibbiltà li jsiru tfittxijiet fis-SIS wara 19-il xahar (sa nofs l-2021). L-aħħar sitt xhur ser jiġu ddedikati biss għall-iżvilupp ta’ applikazzjoni mobbli.

Barra minn hekk, matul il-perjodu ta’ rappurtar, l-Aġenzija Ewropea għall-Gwardja tal-Fruntiera u tal-Kosta wettqet l-attivitajiet li ġejjin:

·Inħatru Ġesturi tal-Proġetti u l-Kumitat ta’ Tmexxija, fit-18 ta’ Settembru 2019, il-Kumitat ta’ Tmexxija ħejja u approva l-każ tal-Kumitat ta’ Tmexxija;

·ġie stabbilit kuntatt fil-livell ta’ ħidma ma’ eu-LISA; kif ukoll

·bdiet il-konsultazzjoni mal-Uffiċjal tal-Protezzjoni tad-Data.

L-Aġenzija Ewropea għall-Gwardja tal-Fruntiera u tal-Kosta stmat għal proġett sħiħ baġit ta’ EUR 3 489 200 u spejjeż rikorrenti annwali ta’ EUR 212 000.

3.KONKLUŻJONIJIET

Matul l-ewwel perjodu ta’ rappurtar (mill-1 ta’ Jannar sat-30 ta’ Settembru 2019), il-partijiet interessati differenti għamlu progress sinifikanti biex jiksbu l-implimentazzjoni tar-regolamenti l-ġodda dwar is-SIS skont l-istadji definiti:

1)fażi ta’ implimentazzjoni I (tmiem l-2019): l-eu-LISA għamlet it-tħejjijiet meħtieġa biex testendi l-aċċess sħiħ għas-SIS għall-Europol, u biex tippermetti lill-Aġenzija Ewropea għall-Gwardja tal-Fruntiera u tal-Kosta biex tikkonnettja mas-SIS; Il-Europol ser ikollha aċċess għall-kategoriji kollha ta’ allert fis-SIS sa minn tmiem l-2019; l-Aġenzija Ewropea għall-Gwardja tal-Fruntiera u tal-Kosta pprovdiet finanzjament u bdiet proġett li jippermetti lill-membri tat-timijiet tagħha jiksbu aċċess għas-SIS fl-2021;

2)Fażi ta’ implimentazzjoni II (tmiem l-2020): fi tmiem il-perjodu ta’ rappurtar, 19-il Stat Membru bagħtu l-funzjonalità ta’ tfittxija ta’ marki tas-swaba’; 11-il Stat Membru għad iridu jużaw il-funzjonalità sa tmiem l-2020;

3)fażi ta’ implimentazzjoni III (tmiem l-2021): matul il-perjodu ta’ rappurtar, l-attivitajiet ġew ikkoordinati mill-Kummissjoni u l-eu-LISA biex jitħejjew miżuri ta’ implimentazzjoni u speċifikazzjonijiet tekniċi meħtieġa għall-implimentazzjoni sħiħa tar-regolamenti l-ġodda tas-SIS; ix-xogħol preparatorju ewlieni huwa ppjanat li jiġi ffinalizzat sal-bidu tal-2020, sabiex jingħata biżżejjed żmien lill-Istati Membri biex jibdew il-proġetti ta’ implimentazzjoni nazzjonali tagħhom; L-Istati Membri bdew attivitajiet preparatorji fil-livell nazzjonali biex ikunu lesti biex jibdew joperaw sa tmiem l-2021.

L-implimentazzjoni tar-regolamenti l-ġodda tas-SIS hija marbuta mill-qrib mal-implimentazzjoni tal-interoperabilità tas-sistemi tal-informazzjoni għall-fruntieri u s-sigurtà. Il-Kummissjoni waqqfet, flimkien mal-Bord ta’ Tmexxija tal-eu-LISA u l-Aġenzija Ewropea għall-Gwardja tal-Fruntiera u tal-Kosta, mekkaniżmu għall-monitoraġġ tal-progress fil-proġetti interrelatati kollha u identifikat kwalunkwe kwistjoni fi stadju bikri.

Ir-rapport dwar l-istatus li jmiss, li huwa mistenni fit-28 ta’ Diċembru 2020, se jkopri sena sħiħa u se jiddeskrivi l-attivitajiet tal-partijiet ikkonċernati matul il-perjodu ta’ rapportar li jmiss, mill-1 ta’ Ottubru 2019 sat-30 ta’ Settembru 2020.

(1)      Regolament (UE) 2018/1860 tal-Parlament Ewropew u tal-Kunsill tat-28 ta’ Novembru 2018 dwar l-użu tas-Sistema ta’ Informazzjoni ta’ Schengen għar-ritorn ta’ ċittadini ta’ pajjiżi terzi b’soġġorn illegali ĠU L 312, 7.12.2018, p. 1.    Ir-Regolament (UE) 2018/1861 tal-Parlament Ewropew u tal-Kunsill tat-28 ta’ Novembru 2018 dwar l-istabbiliment, it-tħaddim u l-użu tas-Sistema ta’ Informazzjoni ta’ Schengen (SIS) fil-qasam tal-verifiki fuq il-fruntieri, u li jemenda l-Konvenzjoni li timplimenta l-Ftehim ta’ Schengen, u li jemenda u jħassar ir-Regolament (KE) Nru 1987/2006 (ĠU L 312, 7.12.2018, p. 14).    Ir-Regolament (UE) 2018/1862 tal-Parlament Ewropew u tal-Kunsill tat-28 ta’ Novembru 2018 dwar l-istabbiliment, it-tħaddim u l-użu tas-Sistema ta’ Informazzjoni ta’ Schengen (SIS) fil-qasam tal-kooperazzjoni tal-pulizija u l-kooperazzjoni ġudizzjarja f’materji kriminali, li jemenda u jħassar id-Deċiżjoni tal-Kunsill 2007/533/ĠAI, u jħassar ir-Regolament (KE) Nru 1986/2006 tal-Parlament Ewropew u tal-Kunsill u d-Deċiżjoni tal-Kummissjoni 2010/261/UE, ĠU L 312, 7.12.2018, p. 56.

(2)    F’konformità mar-Regolamenti l-ġodda dwar is-SIS, il-membri tat-timijiet imsemmija fil-punti (8) u (9) tal-Artikolu 2 tar-Regolament (UE) 2016/1624 tal-Parlament Ewropew u tal-Kunsill tal-14 ta’ Settembru 2016 dwar il-Gwardja Ewropea tal-Fruntiera u tal-Kosta u li jemenda r-Regolament (UE) 2016/399 tal-Parlament Ewropew u tal-Kunsill ser ikollhom id-dritt ta’ aċċess għal u tiftix fid-data fis-SIS sa fejn ikun meħtieġ għat-twettiq tal-kompiti tagħhom u kif meħtieġ għall-pjan operazzjonali għal operazzjoni speċifika. Skont ir-Regolament (UE) 2019/1896 tal-Parlament Ewropew u tal-Kunsill tal-13 ta’ Novembru 2019 dwar il-Gwardja Ewropea tal-Fruntiera u tal-Kosta u li jħassar ir-Regolamenti (UE) Nru 1052/2013 u (UE) 2016/1624, l-Aġenzija Ewropea għall-Gwardja tal-Fruntiera u tal-Kosta tipprovdi l-appoġġ operazzjonali tagħha permezz tal-iskjerament tal-korpi permanenti tal-Gwardja Ewropea tal-Fruntiera u tal-Kosta li jiffurmaw timijiet ta’ ġestjoni tal-fruntieri, timijiet ta’ appoġġ għall-ġestjoni tal-migrazzjoni u timijiet ta’ ritorn.

(3)       https://ec.europa.eu/transparency/regexpert/index.cfm?do=groupDetail.groupDetail&groupID=3643

(4)    Talba għal Informazzjoni Supplimentari fid-Dħul Nazzjonali

(5)       https://ec.europa.eu/transparency/regcomitology/index.cfm?do=List.list  

(6)    Haraksim R., Galbally J., Beslay L., Study on Fingermark and Palmmark Identification Technologies for their Implementation in the Schengen Information System, EUR 29755 EN, Uffiċċju tal-Pubblikazzjonijiet tal-Unjoni Ewropea, il-Lussemburgu, 2019;     J. Galbally, P. Ferrara, R. Haraksim, A. Psyllos, L. Beslay, Study on Face Identification Technology for its Implementation in the Schengen Information System, EUR 29808 EN, Uffiċċju tal-Pubblikazzjonijiet tal-Unjoni Ewropea, il-Lussemburgu, 2019;    Angers A, Kagkli DM, Oliva L, Petrillo M, Raffael B, Study on DNA Profiling Technology for its Implementation in the Central Schengen Information System, EUR 29766 EN, Uffiċċju tal-Pubblikazzjonijiet tal-Unjoni Ewropea, il-Lussemburgu, 2019;

(7)    Deċiżjoni ta' Implimentazzjoni tal-Kummissjoni (UE) 2016/1345 tal-4 ta' Awwissu 2016 dwar standards minimi tal-kwalità tad-data għal rekords ta' marki tas-swaba' tas-Sistema ta' Informazzjoni ta' Schengen tat-tieni ġenerazzjoni (SIS II) (notifikata bid-dokument C(2016) 4988). ĠU L 213, 6.8.2016, p. 15.

(8)    Id-Deċiżjoni ta' Implimentazzjoni tal-Kummissjoni (UE) 2017/1528 tal-31 ta' Awwissu 2017 li tissostitwixxi l-Anness għad-Deċiżjoni ta' Implimentazzjoni 2013/115/UE dwar il-Manwal SIRENE u miżuri oħra ta’ implimentazzjoni tas-Sistema ta' Informazzjoni (SIS II) ta' Schengen tat-tieni ġenerazzjoni (ĠU L 231, 7.9.2017, p. 6).

(9)    Lista ta’ Stati Membri li wieġbu l-kwestjonarji: L-Awstrija, il-Belġju, il-Bulgarija, il-Kroazja, ir-Repubblika Ċeka, id-Danimarka, l-Estonja, il-Finlandja, Franza, il-Ġermanja, il-Greċja, l-Ungerija, l-Iżlanda, l-Italja, il-Latvja, il-Litwanja, il-Lussemburgu, Malta, in-Netherlands, in-Norveġja, il-Polonja, il-Portugall, ir-Rumanija, is-Slovakkja, is-Slovenja, Spanja, l-Iżvezja, u l-Iżvizzera.

(10)    Mhux l-Istati Membri kollha setgħu jipprovdu valutazzjoni speċifika għal kull waħda mill-kategoriji kkunsidrati fil-kwestjonarju.