This document is an excerpt from the EUR-Lex website
Document 52019PC0576
Recommendation for a COUNCIL DECISION to authorise the European Commission to open negotiations for a Customs Cooperation and Mutual Administrative Assistance Agreement (CCMAA) with the Republic of Belarus
Rakkomandazzjoni għal DEĊIŻJONI TAL-KUNSILL li tawtorizza lill-Kummissjoni Ewropea tiftaħ in-negozjati dwar Ftehim ta’ Kooperazzjoni Doganali u Assistenza Amministrattiva Reċiproka (CCMAA) mar-Repubblika tal-Belarussja
Rakkomandazzjoni għal DEĊIŻJONI TAL-KUNSILL li tawtorizza lill-Kummissjoni Ewropea tiftaħ in-negozjati dwar Ftehim ta’ Kooperazzjoni Doganali u Assistenza Amministrattiva Reċiproka (CCMAA) mar-Repubblika tal-Belarussja
COM/2019/576 final
IL-KUMMISSJONI EWROPEA
Brussell, 4.11.2019
COM(2019) 576 final
Rakkomandazzjoni għal
DEĊIŻJONI TAL-KUNSILL
li tawtorizza lill-Kummissjoni Ewropea tiftaħ in-negozjati dwar Ftehim ta’ Kooperazzjoni Doganali u Assistenza Amministrattiva Reċiproka (CCMAA) mar-Repubblika tal-Belarussja
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u għanijiet tal-proposta
Tul l-aħħar snin saru progressi fir-relazzjonijiet bejn l-UE u l-Belarussja, filwaqt li l-kummerċ bilaterali fil-merkanzija bejn l-UE u l-Belarussja ilu jikber bis-sod. L-Unjoni Ewropea hija t-tieni l-ikbar imsieħba kummerċjali tal-Belarussja, billi tirrappreżenta terz tal-kummerċ globali tal-pajjiż. Fl-istess ħin, il-fabbriki tal-Belarussja huma responsabbli għal sehem kbir (bi stima ta’ ’l fuq minn 15 %) tal-prodotti illeċiti tat-tabakk maqbudin mill-awtoritajiet tad-dwana fl-Istati Membru tal-UE. Il-kummerċ illeċitu tat-tabakk jissarraf f’telf ta’ dħul li huwa stmat li jammonta għal EUR 10 biljun fis-sena għall-baġits tal-Istati Membri u tal-UE. Barra minn dan, il-kummerċ illeċitu tat-tabakk jipperikola l-politiki tas-saħħa pubblika tal-UE u dawk nazzjonali, u b’hekk jikkontribwixxi għall-għadd kbir ta’ mwiet marbutin mat-tipjip kull sena. Fl-2013, l-UE adottat strateġija komprensiva 1 biex tiġġieled il-kummerċ illeċitu tat-tabakk, li għadha rilevanti sal-lum 2 . Element ewlieni f’dik l-istrateġija huwa t-tisħiħ tal-kooperazzjoni mal-pajjiżi sors u ta’ tranżitu ewlenin. Għaldaqstant, il-proposta tissodisfa l-ħtiġijiet tal-Istati Membri tal-UE u tan-negozji tagħhom għal qafas legali għall-Kooperazzjoni Doganali u l-Assistenza Amministrattiva Reċiproka mal-Belarussja.
Fid-dawl tal-kuntest storiku speċifiku, il-Belarussja hija l-uniku pajjiż fil-viċinat tal-Lvant tal-UE, u l-uniku pajjiż fl-Unjoni Ekonomika Ewrażjatika, mingħajr bażi ġuridika formali għall-kooperazzjoni doganali u għall-assistenza amministrattiva reċiproka mal-UE. Għaldaqstant, hemm bżonn ftehim internazzjonali li jipprevedi bażi ġuridika għall-kooperazzjoni doganali, partikularment fl-oqsma tas-sigurtà tal-katina tal-provvista u l-faċilitazzjoni tal-kummerċ, kif ukoll għall-assistenza amministrattiva reċiproka sabiex il-ksur tal-leġiżlazzjoni doganali jiġi evitat, investigat u miġġieled. Il-ftehim mal-Belarussja se jkun għodda xierqa fil-ġlieda kontra l-frodi doganali.
Billi r-relazzjonijiet ġenerali bejn l-UE u l-Belarussja qegħdin jevolvu, wasal iż-żmien li jiġi ttrattat dan in-nuqqas fir-relazzjonijiet barranin tal-UE fir-rigward ta’ kwistjonijiet doganali fil-viċinat. Din l-inizjattiva hija konsistenti mal-Konklużjonijiet tal-Kunsill ta’ Frar 2016 dwar il-Belarussja, li jiddikjaraw li l-UE tibqa’ miftuħa għal aktar żvilupp fir-relazzjonijiet bejn l-UE u l-Belarussja, kif ukoll għal aktar passi sabiex jissaħħu r-relazzjonijiet politiċi u l-kooperazzjoni settorjali fil-kuntest ix-xieraq. L-inizjattiva tagħti segwitu wkoll lil kuntatti politiċi iktar riċenti, fosthom il-laqgħa tal-Grupp ta’ Koordinazzjoni UE-Belarussja tal-25 ta’ April 2019, u ż-żjara tal-Kummissarju Oettinger f’Minsk fi Frar 2019. It-tisħiħ tal-impenn tagħna mal-Belarussja huwa wkoll element ewlieni fil-Pjan ta’ Azzjoni adottat mill-Kummissjoni f’Diċembru 2018 dwar il-ġlieda kontra l-kummerċ illeċitu tat-tabakk 2018-2022 3 .
Din l-inizjattiva ma taqax fi ħdan il-Programm dwar l-Idoneità u l-Prestazzjoni tar-Regolamentazzjoni (REFIT).
•Konsistenza mad-dispożizzjonijiet eżistenti fil-qasam ta’ politika
Il-Kummissjoni ffirmat ftehimiet li jinkludu dispożizzjonijiet ta’ kooperazzjoni doganali u assistenza amministrattiva reċiproka mal-pajjiżi kollha fil-Viċinat tal-Lvant tagħna, kif ukoll mal-pajjiżi membri kollha l-oħra tal-Unjoni Ekonomika Ewrażjatika: ir-Russja 4 , l-Armenja 5 , il-Każakistan 6 u l-Kirgiżistan 7 .
•Konsistenza ma’ politiki oħra tal-Unjoni
Ir-rakkomandazzjoni hija konsistenti ma’ politiki oħra tal-Unjoni.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
L-Artikolu 218(3) u (4) tat-Trattat dwar il-Funzjonament tal-Unjoni Ewropea (TFUE) se jkun il-bażi ġuridika proċedurali.
Is-suġġett tal-ftehim se jkun parti mill-politika kummerċjali komuni tal-Unjoni, u għaldaqstant il-bażi ġuridika sostantiva tad-deċiżjonijiet dwar l-iffirmar u l-konklużjoni tal-ftehim se tkun l-Artikolu 207 tat-TFUE.
•Sussidjarjetà (għall-kompetenza mhux esklużiva)
L-inizjattiva taqa’ fil-kompetenza esklussiva tal-UE (il-politika kummerċjali komuni) skont l-Artikolu 207 tat-Trattat dwar il-Funzjonament tal-Unjoni Ewropea (TFUE). Għalhekk il-prinċipju tas-sussidjarjetà ma japplikax.
•Proporzjonalità
Ir-rakkomandazzjoni tal-Kummissjoni hija bi qbil mal-prinċipju tal-proporzjonalità.
Ftehim internazzjonali huwa l-istrument xieraq u meħtieġ biex jipprevedi bażi ġuridika għat-twettiq tal-kooperazzjoni doganali u tal-assistenza amministrattiva reċiproka ma’ pajjiż terz, kif ukoll fid-dawl tal-objettiv tagħna li nimpenjaw ruħna mal-Belarussja fil-kooperazzjoni doganali, peress li hija l-uniku pajjiż li fadal fil-fruntiera tal-Lvant tal-UE li għadu mhux kopert minn ftehim doganali.
•Għażla tal-istrument
Deċiżjoni tal-Kunsill tal-Unjoni Ewropea.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post / kontrolli tal-idoneità tal-leġiżlazzjoni eżistenti
Mhux applikabbli.
•Konsultazzjonijiet mal-partijiet ikkonċernati
Mhux applikabbli.
•Ġbir u użu tal-għarfien espert
Mhux applikabbli.
•Valutazzjoni tal-impatt
Il-ftehim għandu l-għan li jtejjeb l-applikazzjoni tal-leġiżlazzjoni doganali permezz ta’ kooperazzjoni u assistenza amministrattiva reċiproka bejn l-awtoritajiet doganali tal-UE u dawk tal-Belarussja.
Se jkun hemm impatt pożittiv bis-saħħa tal-allinjament tar-regoli u tal-ftuħ tal-komunikazzjoni mar-Repubblika tal-Belarussja.
Huwa mistenni wkoll impatt pożittiv indirett, permezz tat-titjib tal-applikazzjoni korretta tal-leġiżlazzjoni doganali, l-assistenza amministrattiva reċiproka u l-kooperazzjoni doganali, u b’hekk, fost l-oħrajn, se tonqos il-frodi doganali, speċjalment il-kuntrabandu tat-tabakk, u dan kollu se jissarraf f’livelli ogħla ta’ dħul doganali u fiskali fl-UE.
Soġġett għan-negozjati, it-test possibbli tal-ftehim se jkun simili għal dak tal-ftehimiet milħuqa mal-pajjiżi ġirien tal-Belarussja, kif ukoll ma’ pajjiżi oħra tal-Unjoni Ekonomika Ewrażjatika li l-Belarussja hija membru tagħha, u li jaqsmu l-istess kodiċi doganali reġjonali.
Fir-rigward tal-assistenza amministrattiva reċiproka, parti sostanzjali mill-kontenut tat-test huwa formali u proċedurali, u għalhekk l-abbozz tat-test mhux ta’ min jiġi sostanzjalment modifikat waqt in-negozjati.
•Idoneità regolatorja u simplifikazzjoni
Din l-inizjattiva ma taqax fi ħdan il-Programm dwar l-Idoneità u l-Prestazzjoni tar-Regolamentazzjoni (REFIT).
•Drittijiet fundamentali
Ir-rakkomandazzjoni hija konsistenti mat-Trattati tal-UE u mal-Karta tad-Drittijiet Fundamentali tal-Unjoni Ewropea.
4.IMPLIKAZZJONIJIET BAĠITARJI
Il-Ftehim dwar il-Kooperazzjoni Doganali u l-Assistenza Amministrattiva Reċiproka mhux se jkollu effett dirett fuq il-baġit tal-UE.
Il-ftehim se jkun jeħtieġ riżorsi finanzjarji u amministrattivi sabiex jitwaqqaf u jitmexxa kumitat konġunt, kif ukoll missjonijiet u diskussjonijiet possibbli biex il-ftehim jiġi implimentat.
Rakkomandazzjoni għal
DEĊIŻJONI TAL-KUNSILL
li tawtorizza lill-Kummissjoni Ewropea tiftaħ in-negozjati dwar Ftehim ta’ Kooperazzjoni Doganali u Assistenza Amministrattiva Reċiproka (CCMAA) mar-Repubblika tal-Belarussja
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
ADOTTA DIN ID-DEĊIŻJONI:
Artikolu 1
Il-Kummissjoni hija b’dan awtorizzata li tiftaħ in-negozjati, f’isem l-Unjoni Ewropea, mar-Repubblika tal-Belarussja għal ftehim dwar il-Kooperazzjoni Doganali u l-Assistenza Amministrattiva Reċiproka.
Artikolu 2
In-negozjati għandhom jitmexxew abbażi tad-direttivi ta’ negozjar tal-Kunsill stabbiliti fl-Anness.
Artikolu 3
Il-Kummissjoni għandha twettaq in-negozjati b’konsultazzjoni ma’ [l-isem tal-kumitat speċjali, li jrid jiddaħħal mill-Kunsill].
Artikolu 4
Din id-Deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 4.11.2019
COM(2019) 576 final
ANNESS
ta’ [...]
Rakkomandazzjoni għal DEĊIŻJONI TAL-KUNSILL
li tawtorizza lill-Kummissjoni Ewropea tiftaħ in-negozjati dwar Ftehim ta’ Kooperazzjoni Doganali u Assistenza Amministrattiva Reċiproka (CCMAA) mar-Repubblika tal-Belarussja
ANNESS
Rakkomandazzjoni għal deċiżjoni tal-Kunsill li tawtorizza lill-Kummissjoni Ewropea tiftaħ in-negozjati dwar Ftehim ta’ Kooperazzjoni Doganali u Assistenza Amministrattiva Reċiproka (CCMAA) mar-Repubblika tal-Belarussja
1.In-natura tal-Ftehim previst
Il-kamp ta’ applikazzjoni tal-Ftehim previst se jkun limitat għal kwistjonijiet ta’ kompetenza tal-Unjoni. L-objettiv ġenerali tal-Ftehim previst huwa li jiġu żviluppati u intensifikati l-kooperazzjoni u l-assistenza amministrattiva reċiproka fi kwistjonijiet doganali mar-Repubblika tal-Belarussja; b’mod partikulari, il-Ftehim għandu l-għan li jistabbilixxi l-bażi ġuridika għal qafas ta’ kooperazzjoni doganali li jimmira li jiżgura l-katina ta’ provvista u li jiffaċilita l-kummerċ leġittimu, filwaqt li jiżgura wkoll kontrolli doganali effettivi, u jħares l-interessi finanzjarji tal-Unjoni Ewropea billi jippermetti l-iskambju ta’ informazzjoni sabiex tiġi żgurata l-applikazzjoni korretta tal-leġiżlazzjoni doganali. Il-Ftehim previst se jiġi konkluż għal perjodu indefinit.
2.Il-kontenut tal-Ftehim previst
Il-Ftehim previst se jkopri d-dispożizzjonijiet kollha adottati mill-Unjoni Ewropea u mir-Repubblika tal-Belarussja, minn hawn ’il quddiem imsemmija wkoll “il-Partijiet Kontraenti”, fil-leġiżlazzjoni doganali rispettiva tagħhom li tirregola l-importazzjoni, l-esportazzjoni u t-tranżitu tal-merkanzija, u kull proċedura doganali oħra li l-merkanzija tgħaddi minnha. Fil-prinċipju, ma huwa eskluż ebda qasam soġġett għall-ġuriżdizzjoni tal-Unjoni, u li fih ikunu xierqa l-kooperazzjoni doganali u l-assistenza amministrattiva reċiproka.
Għaldaqstant, jenħtieġ li l-Ftehim previst ikopri elementi bħal dawn li ġejjin:
(1)Il-kooperazzjoni fit-titjib tal-leġiżlazzjoni doganali, u fl-armonizzazzjoni u s-simplifikazzjoni tal-proċeduri doganali;
(2)L-istabbiliment ta’ sistemi doganali moderni, inkluż teknoloġiji moderni ta’ żdoganar tal-merkanzija, dispożizzjonijiet għall-operaturi ekonomiċi awtorizzati, analiżi u kontrolli awtomatizzati bbażati fuq ir-riskju, proċeduri ssimplifikati għar-rilaxx tal-merkanzija, awditu ta’ wara r-rilaxx, dispożizzjonijiet għas-sħubijiet bejn id-dwana u n-negozji;
(3)L-iffaċilitar u l-kontroll effettiv tal-operati ta’ trażbord u tal-movimenti ta’ tranżitu mit-territorji rispettivi; il-kooperazzjoni u l-koordinazzjoni bejn l-awtoritajiet u l-aġenziji kollha kkonċernati fit-territorji rispettivi tagħhom biex jiffaċilitaw it-traffiku fit-tranżitu; fejn ikun rilevanti u xieraq, l-esplotazzjoni ta’ possibbiltajiet għall-interkonnessjoni tas-sistemi ta’ tranżitu doganali rispettivi;
(4)Etika professjonali;
(5)Fejn xieraq u skont modalitajiet li se jiġu ddefiniti, l-iskambju ta’ informazzjoni u data rilevanti, b’rispett għar-regoli ta’ kunfidenzjalità tad-data sensittiva u tal-protezzjoni tad-data personali tal-Partijiet Kontraenti;
(6)Il-koordinazzjoni ta’ azzjonijiet doganali bejn l-awtoritajiet doganali tal-Partijiet Kontraenti.
(7)Ir-rikonoxximent reċiproku tal-programmi tal-operaturi ekonomiċi awtorizzati u tal-kontrolli doganali, inkluż miżuri ekwivalenti ta’ faċilitazzjoni tal-kummerċ, fejn rilevanti u xieraq, u skont modalitajiet li se jiġu ddefiniti.
(8)Il-valutazzjoni doganali.
(9)Assistenza amministrattiva reċiproka.
3.Dispożizzjonijiet oħra
Ir-regoli applikabbli għall-kunfidenzjalità, il-protezzjoni tad-data u l-użu ta’ informazzjoni se jiġu ddefiniti skont il-leġiżlazzjoni rilevanti tal-UE.
Il-Ftehim previst se jinkludi l-klawżoli tas-soltu rigward l-applikazzjoni territorjali, id-dħul fis-seħħ, il-perjodu ta’ żmien u ż-żmien meħtieġ għad-denunzja.
4.Kumitat Konġunt għall-Kooperazzjoni Doganali
Il-Ftehim previst se jipprevedi Kumitat Konġunt ta’ Kooperazzjoni Doganali, li se jiżgura l-funzjonament korrett tal-Ftehim previst; jista’ jieħu deċiżjonijiet u miżuri oħra meħtieġa għall-implimentazzjoni tal-objettivi tal-Ftehim.
Skont l-Artikolu 17 tat-TUE, fi ħdan il-Kumitat Konġunt għall-Kooperazzjoni Doganali, l-Unjoni se tkun irrappreżentata mill-Kummissjoni, bl-għajnuna ta’ rappreżentanti tal-Istati Membri.
Jista’ jitwaqqaf Grupp ta’ Ħidma biex jeżamina u jagħmel ir-rakkomandazzjonijiet lill-Kumitat Konġunt għall-Kooperazzjoni Doganali fir-rigward ta’ kwistjonijiet tekniċi marbutin mal-implimentazzjoni tal-Ftehim previst.
Il-Grupp ta’ Ħidma se jkun magħmul minn esperti miż-żewġ Partijiet Kontraenti.
Se jirrapporta lill-Kumitat Konġunt għall-Kooperazzjoni Doganali, li min-naħa tiegħu se jieħu d-deċiżjonijiet xierqa b’kunsens reċiproku.
5.In-negozjar
Il-Kummissjoni jenħtieġ li tirrapporta lill-Kunsill dwar ir-riżultati tan-negozjati, u fejn ikun hemm bżonn, dwar kull problema li tista’ tinqala’ waqt in-negozjati.