52019PC0304

IL-KUMMISSJONI EWROPEA

Brussell, 28.6.2019

COM(2019) 304 final

2019/0144(NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

li temenda d-Deċiżjoni ta' Implimentazzjoni 2013/676/UE li tawtorizza lir-Rumanija biex tkompli tapplika miżura speċjali ta' deroga mill-Artikolu 193 tad-Direttiva 2006/112/KE dwar is-sistema komuni ta' taxxa fuq il-valur miżjud

MEMORANDUM TA’ SPJEGAZZJONI

Skont l-Artikolu 395(1) tad-Direttiva 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (“id-Direttiva tal-VAT” 1 ), il-Kunsill, filwaqt li jaġixxi b’mod unanimu fuq proposta tal-Kummissjoni, jista’ jawtorizza lil kwalunkwe Stat Membru biex japplika miżuri speċjali għal deroga mid-dispożizzjonijiet ta’ dik id-Direttiva, sabiex jissimplifika l-proċedura tal-ġbir tal-VAT jew sabiex jipprevjeni ċerti tipi ta’ evażjoni jew ta’ evitar tat-taxxa.

Permezz ta’ ittra rreġistrata mal-Kummissjoni fil-11 ta’ Marzu 2019, ir-Rumanija talbet l-awtorizzazzjoni biex tkompli tapplika miżura ta’ deroga mill-Artikolu 193 tad-Direttiva tal-VAT, li jiddetermina l-persuna responsabbli għall-ħlas tal-VAT.

B’konformità mal-Artikolu 395(2) tad-Direttiva tal-VAT, il-Kummissjoni infurmat lill-Istati Membri l-oħra bit-talba tar-Rumanija, permezz tal-ittri datati d-9 ta’ April 2019. Permezz ta' ittra datata l-10 ta' April 2019, il-Kummissjoni nnotifikat lir-Rumanija li kellha l-informazzjoni kollha meħtieġa biex tqis it-talba.

1.KUNTEST TAL-PROPOSTA

•Raġunijiet u għanijiet tal-proposta

Bħala regola ġenerali, l-Artikolu 193 tad-Direttiva tal-VAT jistipula li hija l-persuna taxxabbli li tipprovdi l-merkanzija jew is-servizzi li normalment għandha r-responsabbilità li tħallas il-VAT.

Skont l-Artikolu 395 tad-Direttiva tal-VAT, l-Istati Membri jistgħu japplikaw miżuri ta’ deroga mid-dispożizzjonijiet tad-Direttiva tal-VAT sabiex jissimplifikaw il-proċedura tal-ġbir tal-VAT jew biex jipprevjenu ċerti tipi ta’ evażjoni jew ta’ evitar tat-taxxa jekk ikunu ġew awtorizzati mill-Kunsill.

Fl-2009, ir-Rumanija talbet deroga biex tkun awtorizzata tapplika l-mekkaniżmu tar-reverse charge għal, inter alia, provvisti ta’ prodotti tal-injam. Skont din il-proċedura, il-ħlas tal-VAT isir ir-responsabbiltà tal-persuna taxxabbli li tirċievi l-provvisti. Dawn il-prodotti tal-injam jinkludu, b'mod aktar speċifiku, injam mhux maqtugħ, injam tond jew bix-xaqq biex jinħadem, il-ħatab, prodotti tal-injam, kif ukoll injam bit-tarf kwadru jew imxellef u injam ħarex, ipproċessat jew nofsu maħdum.

Din it-talba ġiet approvata mid-Deċiżjoni ta' Implimentazzjoni tal-Kunsill 2010/583/UE 2 sal-31 ta’ Diċembru 2013 u, fir-rigward tal-prodotti tal-injam, sussegwentement estiża sal-31 ta’ Diċembru 2016 bid-Deċiżjoni ta' Implimentazzjoni tal-Kunsill 2013/676/UE 3 u bid-Deċiżjoni ta’ Implimentazzjoni tal-Kunsill (UE) 2016/1206 4 sal-31 ta’ Diċembru 2019.

Ir-Rumanija issa talbet għall-estensjoni tad-deroga dwar l-applikazzjoni tal-mekkaniżmu tar-reverse charge għal provvisti ta’ dawn il-prodotti tal-injam.

Abbażi tar-rapport mibgħut mir-Rumanija, li ġie ppreżentat flimkien mat-talba għall-estensjoni tal-miżura, il-ħatra tar-riċevitur bħala l-persuna responsabbli għall-ħlas tal-VAT fuq il-provvisti tal-prodotti tal-injam imsemmija hawn fuq kellha l-effett li tipprevjeni l-evażjoni u l-evitar tat-taxxa f’dan is-settur li huwa kkaratterizzat minn għadd kbir ta’ rivendituri u intermedjarji żgħar li deher li kien diffiċli biex jiġu kkontrollati. Għaldaqstant, l-estensjoni għal perjodu limitat ieħor tidher ġustifikabbli billi jidher li l-miżura ma kellha l-ebda impatt negattiv fuq il-frodi fil-livell tal-bejgħ bl-imnut, jew f’setturi oħrajn fi Stati Membri oħra. Għaldaqstant, b’kunsiderazzjoni tas-sitwazzjoni legali u fattwali li ma nbidlitx, qed jiġi propost li tiġi estiża l-miżura ta’ deroga, biex b’hekk ir-Rumanija tkun tista’ tkompli tapplika din il-miżura ta’ deroga sal-31 ta’ Diċembru 2022.

B’mod ġenerali, id-derogi jingħataw għal perjodu ta’ żmien limitat biex ikun jista’ jiġi vvalutat jekk il-miżura speċjali hijiex xierqa u effettiva, u sabiex l-Istati Membri jingħataw iż-żmien biex jintroduċu miżuri konvenzjonali oħra sabiex jindirizzaw il-problema rispettiva sakemm tiskadi l-miżura ta’ deroga. Id-deroga li tippermetti l-użu tal-mekkaniżmu tar-reverse charge tingħata biss f’każijiet eċċezzjonali għal oqsma speċifikament frodulenti u għandha tintuża biss bħala l-aħħar alternattiva.

Għalhekk, sakemm tiskadi d-deroga, ir-Rumanija jeħtieġ li timplimenta miżuri konvenzjonali oħrajn biex tiġġieled u tipprevjeni aktar tixrid ta’ frodi tal-VAT fis-settur tal-injam. Konsegwentement, ma hemmx għalfejn titkompla d-deroga mill-Artikolu 193 tad-Direttiva 2006/112/KE fir-rigward ta’ dawn il-provvisti.

•Konsistenza mad-dispożizzjonijiet ta’ politika eżistenti fil-qasam ta’ politika

Derogi simili b’rabta mal-Artikolu 193 tad-Direttiva tal-VAT ingħataw lil Stati Membri oħra.

Għalhekk, il-miżura proposta hija konsistenti mad-dispożizzjonijiet eżistenti tad-Direttiva tal-VAT.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

L-Artikolu 395 tad-Direttiva tal-VAT.

•Sussidjarjetà (għall-kompetenza mhux esklużiva)

Meta titqies id-dispożizzjoni tad-Direttiva tal-VAT li fuqha hija bbażata l-proposta, il-prinċipju tas-sussidjarjetà ma japplikax.

•Proporzjonalità

Id-Deċiżjoni tikkonċerna awtorizzazzjoni mogħtija lil Stat Membru fuq talba tiegħu stess u ma tikkostitwixxi l-ebda obbligu.

Meta wieħed iqis il-kamp ta’ applikazzjoni limitat tad-deroga, il-miżura speċjali hija proporzjonata mal-għan li jrid jintlaħaq.

•Għażla tal-istrument

L-istrument propost: Deċiżjoni ta' Implimentazzjoni tal-Kunsill.

Skont l-Artikolu 395 tad-Direttiva tal-Kunsill 2006/112/KE, deroga mid-dispożizzjonijiet komuni tal-VAT hi possibbli biss bl-awtorizzazzjoni tal-Kunsill li jaġixxi b’mod unanimu bi proposta tal-Kummissjoni. Deċiżjoni ta’ Implimentazzjoni tal-Kunsill hija l-aktar strument xieraq minħabba li tista’ tiġi indirizzata lil Stat Membru individwali.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Konsultazzjonijiet mal-partijiet ikkonċernati

Din il-proposta hija bbażata fuq talba tar-Rumanija u tikkonċerna biss lil dan l-Istat Membru.

•Ġbir u użu tal-għarfien espert

Ma kienx hemm bżonn ta’ għarfien espert estern.

•Valutazzjoni tal-impatt

Il-proposta għal Deċiżjoni ta’ Implimentazzjoni tal-Kunsill għandha l-għan li tipprevjeni ċerti forom ta’ evażjoni jew ta’ evitar tat-taxxa fis-settur tal-injam u għalhekk għandha impatt potenzjalment pożittiv billi se tkompli tipprevjeni skemi ta’ frodi li ġew applikati qabel f’dan is-settur tal-injam. Skont ir-Rumanija, jekk din il-miżura ma tiġix estiża, il-qawmien mill-ġdid ta' dawn l-iskemi ma jkunx jista' jiġi evitat.

Madankollu, minħabba l-kamp ta' applikazzjoni ristrett tad-deroga u l-applikazzjoni limitata fiż-żmien, f'kull każ l-impatt se jkun limitat.

4.IMPLIKAZZJONI GĦALL-BAĠIT

Il-proposta mhi se jkollha l-ebda implikazzjoni negattiva għall-baġit tal-UE.

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

Il-proposta hija limitata fiż-żmien.

2019/0144 (NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra d-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud 5 , u b’mod partikolari l-Artikolu 395(1) tagħha,

Wara li kkunsidra l-proposta tal-Kummissjoni Ewropea,

Billi:

(1)Id-Deċiżjoni ta’ Implimentazzjoni tal-Kunsill 2010/583/UE 6 u, sussegwentement, id-Deċiżjoni ta’ Implimentazzjoni tal-Kunsill 2013/676/UE 7 awtorizzaw lir-Rumanija biex tapplika miżura speċjali li tinnomina l-persuna taxxabbli li tirċievi l-provvisti ta’ prodotti tal-injam mingħand persuni taxxabbli bħala l-persuna responsabbli għall-ħlas tat-taxxa fuq il-valur miżjud (VAT) fuq dawk il-provvisti. L-awtorizzazzjoni mogħtija bid-Deċiżjoni ta’ Implimentazzjoni 2013/676/UE ġiet estiża sal-31 ta’ Diċembru 2019 bid-Deċiżjoni ta’ Implimentazzjoni tal-Kunsill (UE) 2016/1206 8 .

(2)Permezz tal-ittra rreġistrata mal-Kummissjoni fil-11 ta’ Marzu 2019, ir-Rumanija talbet l-awtorizzazzjoni biex tkompli tapplika l-miżura speċjali awtorizzata bid-Deċiżjoni ta’ Implimentazzjoni 2013/676/UE. It-talba kienet akkumpanjata minn rapport dwar l-applikazzjoni ta’ dik il-miżura, kif mitlub mill-Artikolu 3 ta’ dik id-Deċiżjoni ta’ Implimentazzjoni.

(3)Permezz ta' ittri datati d-9 ta' April 2019, il-Kummissjoni infurmat lill-Istati Membri l-oħra bit-talba tar-Rumanija. Permezz ta' ittra datata l-10 ta' April 2019, il-Kummissjoni nnotifikat lir-Rumanija li kellha l-informazzjoni kollha meħtieġa biex tqis it-talba.

(4)Skont l-informazzjoni pprovduta mir-Rumanija fit-talba tagħha, is-sitwazzjoni fattwali li ġġustifikat l-applikazzjoni tal-miżura speċjali ma nbidlitx. Barra minn hekk, l-analiżi mill-awtoritajiet Rumeni tindika li l-miżura kienet effettiva fit-tnaqqis tal-evażjoni tat-taxxa.

(5)Il-Kummissjoni tqis li l-miżura speċjali hija proporzjonata mal-għanijiet li jridu jinkisbu peress li hija limitata għal operazzjonijiet speċifiċi ħafna f’settur li joħloq problemi konsiderevoli fir-rigward tal-evażjoni u l-evitar tat-taxxa. Barra minn hekk tikkunsidra li l-applikazzjoni kontinwata tal-miżura m'għandux ikollha xi impatt negattiv fuq il-prevenzjoni ta' frodi fil-livell tal-bejgħ bl-imnut, f’setturi oħra jew fi Stati Membri oħra.

(6)Għalhekk, jenħtieġ li r-Rumanija tkun awtorizzata tkompli tapplika l-miżura speċjali għal perjodu limitat ulterjuri sal-31 ta' Diċembru 2022.

(7)B'mod ġenerali, id-derogi jiġu awtorizzati għal perjodu ta' żmien limitat biex ikun jista' jiġi vvalutat jekk il-miżuri speċjali humiex xierqa u effettivi. Id-derogi jagħtu lill-Istati Membri ż-żmien biex jintroduċu miżuri konvenzjonali oħrajn biex jindirizzaw il-problema inkwistjoni sal-iskadenza tal-miżuri speċjali. Deroga li tippermetti li jsir użu mill-mekkaniżmu tar-reverse charge tingħata biss eċċezzjonalment għal oqsma speċifiċi fejn isir frodi u tikkostitwixxi mezz tal-aħħar għażla. Għaldaqstant, ir-Rumanija jeħtieġ li timplimenta miżuri konvenzjonali oħra biex tiġġieled u tipprevjeni l-firxa ulterjuri tal-frodi tal-VAT fis-settur tal-injam u konsegwentement ma jkollhiex għalfejn tkompli tidderoga mill-Artikolu 193 tad-Direttiva 2006/112/KE fir-rigward ta’ dawn il-provvisti. Għaldaqstant, f’dan l-istadju m’hemmx bżonn li tiġi inkluża dispożizzjoni speċifika fid-Deċiżjoni ta’ Implimentazzjoni 2013/676/UE għat-tfassil ta’ talbiet ulterjuri dwar l-estensjoni tad-deroga awtorizzata b’dik id-Deċiżjoni ta’ Implimentazzjoni lil hinn mill-31 ta’ Diċembru 2022.

(8)Il-miżura ta' deroga ma għandha l-ebda impatt negattiv fuq ir-riżorsi proprji tal-Unjoni li jirriżultaw mill-VAT.

(9)Għaldaqstant, jenħtieġ li d-Deċiżjoni ta' Implimentazzjoni 2013/676/UE tiġi emendata skont dan,

ADOTTA DIN ID-DEĊIŻJONI:

Artikolu 1

Id-Deċiżjoni ta' Implimentazzjoni tal-Kunsill 2013/676/UE għandha tiġi emendata kif ġej:

(1) fl-Artikolu 1, id-data “il-31 ta' Diċembru 2019” hija sostitwita bid-data “il-31 ta' Diċembru 2022”;

(2) l-Artikolu 3 jitħassar.

Artikolu 2

Din id-Deċiżjoni hija indirizzata lir-Rumanija.

Magħmul fi Brussell,

Għall-Kunsill

Il-President

(1) ĠU L 347, 11.12.2006, p. 1.

(2) Id-Deċiżjoni ta' Implimentazzjoni tal-Kunsill 2010/583/UE tas-27 ta' Settembru 2010 li tawtorizza lir-Rumanija biex tintroduċi miżura speċjali ta' deroga mill-Artikolu 193 tad-Direttiva 2006/112/KE dwar is-sistema komuni ta' taxxa fuq il-valur miżjud (ĠU L 256, 30.9.2010, p. 27)

(3) Id-Deċiżjoni ta' Implimentazzjoni tal-Kunsill 2013/676/UE tal-15 ta' Novembru 2013 li tawtorizza lir-Rumanija biex tkompli tapplika miżura speċjali ta' deroga mill-Artikolu 193 tad-Direttiva 2006/112/KE dwar is-sistema komuni ta' taxxa fuq il-valur miżjud (ĠU L 316, 27.11.2013, p. 31)

(4) Id-Deċiżjoni ta' Implimentazzjoni tal-Kunsill (UE) 2016/1206 tat-18 ta' Lulju 2016 li temenda d-Deċiżjoni ta' Implimentazzjoni 2013/676/UE li tawtorizza lir-Rumanija biex tkompli tapplika miżura speċjali ta' deroga mill-Artikolu 193 tad-Direttiva 2006/112/KE dwar is-sistema komuni ta' taxxa fuq il-valur miżjud (ĠU L 198, 23.7.2016, p. 47)

(5) ĠU L 347, 11.12.2006, p. 1.

(6) Id-Deċiżjoni ta' Implimentazzjoni tal-Kunsill 2010/583/UE tas-27 ta' Settembru 2010 li tawtorizza lir-Rumanija biex tintroduċi miżura speċjali ta' deroga mill-Artikolu 193 tad-Direttiva 2006/112/KE dwar is-sistema komuni ta' taxxa fuq il-valur miżjud (ĠU L 256, 30.9.2010, p. 27).

(7) Id-Deċiżjoni ta' Implimentazzjoni tal-Kunsill 2013/676/UE tal-15 ta' Novembru 2013 li tawtorizza lir-Rumanija biex tkompli tapplika miżura speċjali ta' deroga mill-Artikolu 193 tad-Direttiva 2006/112/KE dwar is-sistema komuni ta' taxxa fuq il-valur miżjud (ĠU L 316, 27.11.2013, p. 31)

(8) Id-Deċiżjoni ta' Implimentazzjoni tal-Kunsill (UE) 2016/1206 tat-18 ta' Lulju 2016 li temenda d-Deċiżjoni ta' Implimentazzjoni 2013/676/UE li tawtorizza lir-Rumanija biex tkompli tapplika miżura speċjali ta' deroga mill-Artikolu 193 tad-Direttiva 2006/112/KE dwar is-sistema komuni ta' taxxa fuq il-valur miżjud (ĠU L 198, 23.7.2016, p. 47)

Choose the experimental features you want to try